د لاسرسۍ وړ لېنکونه

تازه خبر
جمعه ۱۷ غویی ۱۴۰۰ کابل ۰۵:۵۱

خبرونه

د معتبره فلمي جایزو اوسکار مراسم ترسره شول

د اوسکار جایزې یو شمېر ګټونکي

د هالیووډ سینما د معتبره فلمي جایزو اوسکار مراسم بېګا ترسره شول.

انتوني هاپکنز د غوره فلمي لوبغاړي اوارډ وګاټه. دغه ۸۳ کلن فلمي لوبغاړي په پلار (The Father) فلم کې د لوبېدو په خاطر دا جایزه واخیسته. د فلم داستان په دې څرخي چې څنګه یو سړی د عمر په تېرېدو د خپلې لور له هر ډول مرستې ډډه کوي.

په ښځینه لوبغاړو کې بیا فرانسس مکدورماند د غوره لوبغاړې اوارډ وګاټه. هغې په نومادلند فلم کې اصلي رول لوبولی دی.

د دې فلم کیسه د هغې ښځې په ژوند څرخي چې د خاوند تر مړینې وروسته بې‌کوره او سرګردانه کېږي. د همدغه فلم ډایرکترې کلوی ژاو هم چې په خټه چینايۍ ده د غوره ډایرکترۍ اوارډ وګاټه.

د اوسکار معتبره فلمي اوارډونو مراسم بېګا په لاس انجلس کې وشول.

د ورځې تازه خبرونه دلته ولولئ

ارزګان کې د کوکنارو اړولو عملیات پیل شول

ارشیف، افغان ځواکونه د کوکنارو د له‌منځه وړلو پر مهال

په ارزګان ولایت کې د کوکنارو اړولو عمليات پيل شول.

له نشه‌يي موادو سره د مبارزې معينیت د رسنیو دفتر ازادي راډيو ته وويل، له نشه‌يي موادو سره د مبارزې پولیسو د ثور میاشتې پر ۱۵مه نېټه په دې ولایت کې د کوکنارو اړولو عمليات پيل کړل چې د دې کمپاين په لومړۍ ورځ‌يې د ارزګان ولايت په مرکز ترينکوټ (ده يک) سيمه کې ۵۰ جريبه ځمکه د کوکنارو له بوټو څخه پاکه کړه.

د يادونې وړ ده چې د دې ولايت په ډېری سيمو کې کوکنار نېښ وهلو ته برابر او په ځينو ولسوالیو کې خو بېخي نېښ وهل پيل شوي دي.

د روسیې یوې محکمې د ازادي راډیو د یوې قراردادي خبریالې عریضه رد کړه

مسکو کې د ازادې اروپا/ ازادي راډیو دفتر

د روسیې د پسکوف ښار یوې محکمې د ازادې اروپا/ ازادي راډیو د قراردادي خبریالې لودمیلا ساویتس کایا هغه اعتراض او عریضه رد کړه چې د بهرنیو اجنټانو په نوم د روسیې د نویو مطبوعاتي مقرراتو په چوکاټ کې یې د خپل نوم د شاملېدو له کبله کړی و.

یادې محکمې پرون حکم ورکړ چې د عدلیې وزارت له‌خوا په دې لېست کې د ساویتس کایا د نوم لیکل، قانوني دی.

د مېرمن ساویتس کایا مدافع وکیل به د دې پرېکړې پر ضد یوې بلې لویې محکمې ته مراجعه وکړي.

د روسیې د عدلیې وزارت د خارجي اجنټانو په لېست کې د دې خبریالې د نوم لیکلو دلیل نه‌دی په ډاګه کړی.

د تاجکستان چارواکي: له قرغزستان سره د جګړو له کبله مو ۱۹ وګړي وژل شوي

د تاجکستان او قرغزستان ترمنځ جګړه کې یوه ویجاړه شوې سیمه

د تاجکستان چارواکي وایي له قرغزستان سره په پوله په یوې لانجمنې سیمه کې د جګړو له کبله د دې هېواد ۱۹ وګړي وژل شوي او ۸۷ تنه ټپیان دي.

دا لومړني رسمي ارقام دي چې د تاجکستان د حکومت له‌خوا وړاندې کېږي.

د ازادي راډیو خبریال وایي په دې سیمه کې د شخړو له کبله ۲۰ کسان وژل شوي چې ۱۱ یې پوځي کارکوونکي دي.

تر دې وړاندې قرغزي چارواکو ویلي وو چې په سرحدي لانجو کې ۳۶ تنه قرغزي وګړي وژل شوي، ۱۸۹ نور ټپیان دي او ۵۸ زره کسان له خپلو کورو څخه وتلو ته اړ شوي دي.

سپېس اېکس بالاخره 'سټارشیپ' توغندی په بریالیتوب سره وازمایه

ارشیف، د سپېس اېکس د یوه توغندي ازموینه

سپېس اېکس وتوانېد په پنځم ځل هڅې د سټارشیپ توغندی په بریالیتوب سره وازمایي.

دا د هغې فضایي بېړۍ د جوړېدو لپاره یو بل ګام دی چې په پام کې لري سپوږمۍ ته ستورمزلي واستوي.

دغه راکټ چې «SN15» نومول شوی د مې پر پنځمه په تکزاس کې د سپېس اېکس له یوې اډې بوکا چیکا څخه وتوغول شو.

دا توغندی وتوانېد په شپږو دقیقو ازمایشي الوتنه کې د شاوخوا ۱۰ کیلومتره مزل ووهي او بېرته په بریالیتوب سره ځمکې ته راشي.

د دغه توغندي پخوانۍ څلور ځله هڅې ناکامه شوې وې.

وروسته له هغه چې ناسا د سټارشیپ دا راکټ انتخاب کړ چې سپوږمۍ ته د ستورمزلو د رسولو لپاره وکارول شي، سپېس اېکس له ډېرو فشارونو سره مخامخ وو.

د سټارشیپ دا پنځمه بریالۍ ازموینه فضا ته د لومړني امریکایي الن شیپرډ د تګ له ۶۰مې کلیزې سره برابره ده.

خلیلزاد: که طالبان وغواړي د زور له لارې واک ته ورسېږي، امریکا به‌یې ونه‌مني

د افغانستان د سولې لپاره د امریکا ځانګړی استازی زلمی خلیلزاد

د افغانستان د سولې لپاره د امریکا ځانګړي استازي زلمي خلیلزاد ویلي، که طالبان وغواړي د زور له لارې واک ته ورسېږي، امریکا به‌یې ونه‌مني.

ښاغلی خلیلزاد د ازادي راډیو د تاجکستان له څانګې سره په دوشنبه ښار کې په یوې ځانګړې مرکه کې وویل: "هېڅ هېواد چمتو نه‌دی، زموږ له بحثونو دا څرګنده شوه چې هېڅوک د جګړې او زور له لارې حکومت نه‌مني او مشروع‌یې نه‌ګڼي، داسې حکومت به منزوي وي."

خلیلزاد زیاته کړه، د امریکا هدف دا دی چې د افغانستان د جګړې دواړه لوري سولې ته د رسېدو لپاره کار وکړي.

د ښاغلي خلیلزاد په خبره د طالبانو یو بل انتخاب په یوه ټول‌شموله حکومت کې ورګډېدل دي چې نړیواله ټولنه به‌یې ملاتړ وکړي او داسې حکومت به مشروع وي او نړیواله ټولنه به خپلو مرستو ته ورسره دوام ورکړي.

دا څرګندونې داسې مهال کېږي چې طالبانو د افغانستان هلمند او بغلان په ګډون په بېلابېلو ولایتونو کې خپل فعالیتونه ډېر کړي دي.

فوټبال؛ چلسي لوبډله د اروپا د اتلانو جام فاینل ته ووته

ارشیف

د انګلستان د چلسي د فوتبال ټیم خپل هسپانوي رقیب ریال مادرېد ته ماته ورکړه او د اروپا د اتلانو جام فاینل ته ووت.

لوبه تیره شپه په لندن کې ترسره شوه او چلسي دوه د صفر په مقابل کې ریال مادرېد ته ماتې ورکړه.

تېره اوونۍ دواړو ټیمونو لوبه یو-یو مساوي کړې وه.

وړمه ورځ مانچسټر سیټي د پاریس سنت جرمن لوبډلې ته دوه د صفر په مقابل کې ماته ورکړې او د اروپا د فوتبال جام فاینل ته ووتلی و.

د اروپا د اتلانو د جام وروستۍ یا فاینل لوبه به د روانې مې میاشتې په ۲۹مه په استانبول کې د مانچسټر سیټي او چلسي لوبډلو ترمنځ ترسره شي.

د ولسي جرګې رییس د المپیک کمېټې مشرتابه او ورزشکاران وستایل

د افغانستان د ولسي جرګې رییس میر رحمان رحماني

د افغانستان د ولسي جرګې رییس میر رحمان رحماني د المپیک ملي کمېټې مشرتابه او د ورزشي فدراسیونونو یو شمېر اتلانو ته ستاینلیکونه ورکړل.

د المپیک ملي کمېټه وايي چې ښاغلي رحماني د هغوی د اغېزمنو پروګرامونو او ښو کړنو له امله وستایل.

دا په داسې حال کې ده چې په دې وروستیو کې افغان لوبغاړي په ملي او نړیوالو لوبو کې ښه ځلېدلي دي.

احمد ولي هوتک: فرانسوی سیال مې کمزوری دی سیالي ورسره نه کوم

د ازادو مبارزو افغان لوبغاړی احمد ولي هوتک

د ازادو مبارزو افغان لوبغاړی احمد ولي هوتک وايي، سیال یې کمزوری دی نو ځکه ورسره سيالي نه کوي.

نوموړی دا څرګندونې پر خپل فیسبوک پاڼې لیکلې او ویلي دي: "ټاکل شوې وه چې له يو پېژندل شوي او پياوړي اروپايي سيال سره سيالۍ ولرم په همدې موخه مې روژه په خوله څو برابره زيات زيار و ایسته تمرينات مې وکړل."

نوموړي زیاته کړې، خو دا چې مشخص سيال د ستونزو له کبله سفر ته چمتو نه وو نو سازمان يو بل سيال غوره کړ چې څلوېښت سيالۍ يې کړې وې او نسبتاً پياوړى و.

خو دی وایي، د خپلو ورزشي مشاورینو په غوښتنه دغه سیالي لغوه کړه.

ټاکل شوې وه چې احمد ولي د خپل فرانسوي سيال نايب اعزام سره د مې په ١٤مه سيالي وکړي.

بلېنکن اوکراین سره د واشنګټن ژمنې بیا تکرار کړې

د امریکا د بهرنیو چارو وزیر انتوني بلېنکن د اوکرایین له ولسمشر سره

د امریکا د بهرنیو چارو وزیر انتوني بلېنکن کییف ته د سفر پر مهال د اوکراین د ملي حاکمیت، ځمکنۍ بشپړتیا او خپلواکۍ برخه کې د واشنګټن ژمنې بیا تکرار کړې.

دا د ولسمشر جوبایډن د ادارې لومړنی لوړپوړی چارواکی دی چې کییف ته سفر کوي.

بلېنکن نن پنجشنبه (د غويي ۱۶مه) د اوکراین د بهرنیو چارو له وزیر دیمتري کولیبا سره ولیدل.

په داسې حال کې چې د اوکراین او روسیې ترمنځ تاوتریخوالی ډېر شوی، اوکراین ته د بلېنکن دا یو ورځنی سفر له دې هېواده د امریکا د ملاتړ قوي پیغام رسوي.

د اوکراین د بهرنیو چارو وزیر ښاغلي بلېنکن ته وویل چې کییف د مسکو پلوه بیلتون غوښتونکو سره په مقابله کې له اوکراین سره د امریکا د مرستو ستاینه کوي.

د اوکراین په ختیځ کې د اوکراین د حکومت او روس پلوه بیلتون پالو ترمنځ جګړو له جنورۍ راهیسي بیا زور اخېستی دی.

بلېنکن به په دې سفر کې د اوکرایین له ولسمشر ولودمیرزلنسکي، د دې هېواد د پارلمان او د مدني ټولنې له یو شمېر غړیو سره وګوري.

نامعلومو وسله والو کندهار کې خبریال نعمت روان وژلی دی

نعمت روان

د طلوع د خصوصي ټلوېزیون پخوانی ویاند او اوس د مالېې وزارت د خپرونو امر نعمت روان نن پنجشنبه (د غويي ۱۶مه) سهار په کندهار ولایت کې د ناپېژاندو وسله والو له خوا په ډزو ووژل شو.

د افغانستان د رسنیو د مرکز رییس دواخان مینه پال ازادي راډیو سره په خبرو کې د نعمت روان وژنه تاکید کړه او دا ېې د هېواد او خلکو د دښمنانو کار وباله.

ښاغلي مینه پال زیاته کړه: "نعمت روان نن د کندهار ښار په ۱۴ ناحیه کې د دوو موټر سایکل سپرو له خوا په ډزو ووژل شو، جسد اوس د کندهارپه روغتون کې دی."

د مالېي وزارت د خپرونو د مسوولینو د معلوماتو له مخې نعمت روان تېره ورځ کندهار ته د خپلو تعلیمي او تحصیلي اسنادو د جوړولو په خاطر تللی و.

تر اوسه کومې وسله والې ډلې د پېښې پړه نه ده منلې.

تر دې یوه ورځ دمخه په کابل کې یو شمېر سفارتونو، ملګرو ملتونو او د ازادو رسنیو د ملاتړ بنسټونو د خبریالانو پر وړاندي د طالبانو ګواښ سخت غندلی دی .

طالبانو د چهارشنبې په ورځ د ټویټرله لارې خبرداری ورکړ، که خبریالان په یو اړخیز ډول حکومتي خبرونه خپاره کړي جدي چلند به ورسره وشي.

د کلیو بیارغونې او پراختیا وزارت ۱۵۸ پروژو تړونونه لاسلیک کړي

په ۱۰ ولایتونو کې د ۱۵۸ پرمختیایي پروژو هوکړه لیک لاسلیک شو

د افغانستان د کلیو بیارغونې او پراختیا سرپرست وزیر په لسو ولایتونو کې له یو میلیارډ زیاتو افغانیو په ارزښت له پرمختیایي شوراګانو سره د ۱۵۸ پروژو تړونونونه لاسلیک کړل.

د دغه وزارت له لوري په خپره شوې اعلامیه کې راغلي چې د دې پروژو له ډلې مهمې یې د کندهار په ارغنداب سیمه کې د جنګ له امله د رامنځته شوېو ورانیو د بیارغونې ۱۳۸ رغنیزې پروژې دي چې ۸۱۰ میلیونه افغانۍ لګښت پرې راځي.

اعلامیه زیاتوي چې۲۰۰ میلیونه افغانیو په ارزښت ۲۰ نورې پروژې به د هېواد په ۹ ولایتونو کې چې بادغیس، فراه، غزني، جوزجان، کونړ، نورستان، ننګرهار، تخار او زابل کې پلې شي.

دغو پروژو کې د محافظتي او استنادي دیوالونو، د کرنیزو کانالونو، بولډر دیوالونو ، کاریزونو او سولر پمپونو جوړول راځي.

امریکا د کرونا واکسینونو د تولید لپاره د معنوي مالکیت له حقه تیریږي

ارشیف

د امریکا د ولسمشر جو بایډن ادارې پرون چهارشنبې (د غويي ۱۵مه) اعلان وکړ چې د کووېډ – ۱۹ ضد واکسینونو د تولید لپاره د معنوي مالکیت د حق له خوندیتوبه تیریږي، څو د کرونا وبا پر وړاندې هڅې ګړندۍ شي.

د سوداګرۍ لپاره د امریکا استازې کاترین تای Katherine Tai په یوه بیان کې د واشنګټن دغه دریځ داسې مهال اعلان کړ چې د نړیوالې سوداګرۍ ټولنه د نړیوالۍ سوداګرۍ د قوانینو د نرمېدو په اړه خبرې کوي، څو ډېر هېوادونه وکولی شي چې د ژوند ژغورلو واکسینونه تولید کړي.

تای وویل، اداره یې له معنوي مالکیت څخه په قوي ملاتړ باور لري، خو د دې لپاره چې د دغې وبا ټغر ټول شي، په استثنایي توګه د کووېډ -۱۹ ضد واکسینونو د تولید ملاتړ کوي.

د روغتیا د نړیوال سازمان مشر ټېډروس ادهانم ګیبریسیوس د امریکا دغه اعلان د کووېډ – ۱۹ په وړاندې د مبارزې یوه نه هیرېدونکې شېبه بللې، خو د درملو د تولیدونکو شرکتونو او ټولنو نړیوال فدراسیون ویلي چې دغه اقدام به د کووېډ – ۱۹ ضد واکسینونو تولید زیات نه کړي.

د دغه فدراسیون په وینا دا ځکه چې دې برخه کې سیسټم پیچلی دی.

د کرنې، اوبو لګولو او مالدارۍ وزارت کرنیز پورونه منظور کړل

د افغانستان د کرنې، اوبو لګولو او مالدارۍ وزارت وايي چې د ٣٤٤ میلیونه افغانیو په ارزښت یې کرنیز پورونه منظور کړي دي.

د دغه وزارت ویاند اکبر رستمي نن پنجشنبه (د غويي ۱۶مه) ازادي راډيو ته وویل، دغه پورونه په څلورو برخو کې ورکول کېږي.

په دې پورونو د افغانستان په بېلابېلو سیمو کې کوپراتیفونو، د وریجو د پروسس یوه فابریکه، د اوړو د جوړولو یوه فابریکه او دغه شان د کارتن جوړولو یوه فابریکې جوړیږي.

ښاغلی رستمي وايي چې دا پورونه د کرنې د پراختیا صندوق له خوا چې یو مالي دولتي غیر بانکي بنسټ دی او د یاد وزارت تر چتر لاندې فعالیت کوي، ورکول کېږي.

د کرنې وزارت د معلوماتو له مخې یاد صندوق د خپل تاسیس له پیله تر دې دمه ۱۳ میلیارډه افغانۍ په مستقیم او غیر مستقیم ډول بزګرانو ته په بېلابېلو برخو کې پورونه ورکړي دي.

د امریکا د بهرنیو چارو وزیر د اوکراین پلازمېنې کییف ته ورسېد

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن د اوکراین پلازمېنې کییف ته ورسېد.

نوموړی به په دغه یوه ورځني سفر کې د دې ترڅنګ چې له ګاونډ روسیې سره په راپورته شوي کړکېچ کې د اوکراین قوي ملاتړ په ډاګه کړي، دغه راز به کییف ته د فساد پر وړاندې د مبارزې په اړه د واشنګټن پیغام هم ورسوي.

بلېنکن پرون چهارشنبې (د غويي ۱۵مه) په یوه ټویټ کې وویل، دغه سفر به یو مهم فرصت وي چې د روسیې د یرغل په اړه خبرې وکړي او هم پر دې مسئلې ټینګار وشي چې اړتیا ده زموږ اوکراینی شریک اصلاحاتو ته دوام ورکړي.

بلېنکن به د اوکراین له ولسمشر ولودمیر زلنسکي، د بهرنیو چارو له وزیرانو د اوکراین د پارلمان او د مدني ټولنې له یو شمېر غړیو سره وګوري.

زلنسکي ویلي، له واشنګټنه غواړي چې په ناټو تړون کې د اوکراین د غړیتوب د هڅو د ملاتړ برخه کې یو قوي پیغام ورکړي.

نورستان کې سیلابونو یو تن وژلی او ګڼ زیانونه یې اړولي

ارشیف

د نورستان ولایت سیمه ییز چارواکي وايي په دې ولایت کې زیاتو اورښتونو او سیلابونو یو تن وژلی او خلکو ته یې مالي او ځاني زیانونه هم اړولي دي.

د نورستان والي حافظ عبدالقیوم ازادي راډیو ته وویل، سیلابونه د نورستان په ټولو برخو کې راوتلي: "په بېلابېلو ولسوالیو او مختلفو کلیو کې سیلابونو زیات مالي تاوانونه رسولي دي . څاروي یې له منځه وړي، کورونه یې نړولي، سړکونه یې ډېر زیات ویجاړ کړي، په واما ولسوالۍ کې درې څلورو کلیو ته غځېدلي سړکونه یې ویجاړ کړي. په دواب ولسوالۍ کې یې یو تن وژلی هم دی."

والي وایي زیاتوي، زیانمنو شوېو کورنیو ته به اړینې مرستې ورسوي او د لارو ترمیم لپاره هم پلان لري.

په تېرو څو ورځو کې د هېواد په یو شمېر ولایتونو کې د زیاتو بارانونو له امله سیلابونه راووتل چې خلکو یې ته ځاني او مالي زیانونه واړول.

نور راوښيه

XS
SM
MD
LG