د لاسرسۍ وړ لېنکونه

تازه خبر
پنجشنبه ۲۳ غویی ۱۴۰۰ کابل ۰۲:۱۶

خبرونه

پکتیا کې بیا د کرکټ بورډ پرضد لاریونونه شوي

پکتیا کې د کرکټ پر ضد لاریون

نن پنجشنبه (د غويي ۲مه) د پکتيا ولايت په مرکز ګردېز کې ګڼو مدني فعالانو، ځوانانو او د کرکټ لوبې لوبغاړو د کرکټ بورډ پر ضد یو ځل بیا لاريون وکړ.

دوی وایي، کرکټ بورډ لا هم د دوی پوښتنو او غوښتونو ته مثبت ځواب نه دی ویلی او که یې غږ وا نه ورېدل شي، د کرکټ بورډ مرکزي دفتر به هم وتړي.

لاریونوال وایي، د شااوخوا ۶ کلونو په تېرېدو لا هم ګردېز کې د کرکټ لوبې معیاري لوبغالی نه دی جوړ شوی او د دې ولایت لوبغاړي له معیاري اکاډمۍ بې برخې دي.

د کرکټ لوبې تبصره کوونکي حقمل مسعودزي او د ځوانانو پارلمان غړي احمد الله احمدي رسنیو ته وویل چې دې ولايت کې په نشت حساب جوړ شوي لوبغالي کې هم لسګونه میلیونه افغانۍ مالي فساد شوی او له چارواکو یې د سپیناوي غوښتنه کوي.

دوی وایي، کرکټ بورډ یوازې په هوار میدان غیر منظم شین چمن کرلی او د لوبغاړو، مېلمنو او ننداره کوونکو لپاره هېڅ اسانتیاوې نه دي رغول شوي.

د یادونې وړ ده چې دغو لاریون کوونکو له دې وړاندې هم د یوه رسنیز کنفرانس پرمهال پکتیا کې د کرکټ ولایتي دفتر د اعتراض په توګه تړلی و.

ازادي راډیو هڅه وکړه چې په دې اړه د کرکټ بورډ نظر واخلي، خو بریالۍ نه شوه.

د ورځې تازه خبرونه دلته ولولئ

له طالبانو د اشرف غني غوښتنه: اوربند وغځوئ، ټول افغانان سولې ته تږي دي

د افغانستان جمهور رئیس محمد اشرف غني

افغان ولسمشر اشرف غني د کمکي اختر په مناسبت پیغام کې پر طالبانو غږ وکړ چې اوربند دې وغځوي.

ولسمشر غني وویل، جګړه پوځي حل‌لاره نه‌لري او بالاخره باید پای ته ورسول شي. نوموړي ټینګار وکړ چې ټول افغانان سولې ته تږي دي او ټول اړخونه باید د سولې لپاره هڅې وکړي.

طالبانو چې د اختر په مناسبت درې ورځنی اوربند اعلان کړی ویلي چې هغه به ونه‌غځوي. دا خبره تېره شپه د دې ډلې ویاند ذبیح‌الله مجاهد ازادي راډیو ته وکړه.

ښاغلی غني یو ځل بیا پر طالبانو غږ وکړ چې ټولګټو تأسیساتو ته له زیان رسولو دې لاس واخلي.

هغه خپله پخوانۍ خبره بیا تکرار کړه چې ویلي و په تېرو کلونو کې طالبانو د یو میلیارد ډالرو په ارزښت ټولګټو تأسیساتو ته زیان رسولی، هغه ادعا چې طالبانو رد کړې ده.

افغانان دا اختر داسې مهال لمانځي چې د جګړو دوام ډېرې کورنۍ د غم په ټغر کېنولي.

د روژې سږنۍ میاشت له خونړیو حملو سره مله وه. تر ټولو خونړۍ هغه‌یې د کابل په دشت برچي کې پر نجونو زده‌کونکو وه چې شااوخوا ۸۵ تنه ووژل شول او له ۱۰۰ زیات ټپیان شوي دي.

حماس ډلې نن پر اسرائیل سلګونه توغندي وویشتل

د اسرائیل او فلسطینیانو ترمنځ نښته

حماس ډلې نن سهار پر تل‌ابیب او د اسرائیل پر نورو برخو په سلګونه توغندي وایشتل او اسرائیل ژمنه وکړه چې پر غزې به هوایي بریدونو ته دوام ورکړي.

په عین حال کې نړیوالو په سیمه کې د رامنځته شوي کړکېچ چې په وروستیو څو کلونو کې یې ساری نه‌دی لیدل شوی، د کمېدو غوښتنه کړې ده.

د امریکا ولسمشر جو بایډن د اسرائیل له صدراعظم بنیامین نتانیاهو سره په ټیلیفوني خبرو کې د اسرائیل د امنیت او له ځان څخه د دفاع د حق کلک ملاتړ کړی او له غزې یې توغندویي بریدونه غندلي دي.

د سپینې ماڼۍ په وینا بایډن ویلي چې دی هیله‌من دی دغه حالت هر څومره ژر چې کېدای شي ختم شي، خو اسرائیل حق لري چې له خپل ځانه دفاع وکړي.

د اسرائیل صدراعظم داسې کومه نښه نه‌ده ښودلې چې ګواکې نوموړی دې اوربند ته بېړه ولري.

نتانیاهو ژمنه کړې چې په غزه کې به د حماس او نورو سخت دریځو ډلو د پوځي وړتیاوو د کمزوري کولو لپاره اقداماتو ته دوام ورکړي.

حماس ډلې هم د جګړې دوام ته لېوالتیا ښکاره کړې او د دې ډلې د سیاسي چارو مشر اسماعیل هنیه ویلي چې له دښمن سره مقابله پای نه‌لري.

د غزې د روغتیایي چارواکو په وینا د مې له ۱۰مې راهیسې چې د دواړو لورو ترمنځ نښتې پیل شوي، په غزه کې لږترلږه ۵۶ فلسطینیان وژل شوي دي.

په وژل شویو کې ۱۴ ماشومان هم شامل دي.

د اسرائیل روغتیایي چارواکو خپل لور ته د ۷ کسانو د وژل کېدو خبره کړې ده.

امریکا، چین د اویغور مسلمانانو او نورو مذهبي لږکیو په ډلوژنې تورن کړ

د امریکا او چین ملي بیرغونه

د امریکا د بهرنیو چارو وزارت چین د اویغور مسلمانانو او نورو مذهبي لږکیو په جینوسایډ یا ډلوژنې تورن کړ.

دې وزارت په نړۍ کې د مذهبي ازادیو په اړه په کلني راپور کې چې پرون چهارشنبه‌یې خپور کړی، دغه‌راز ایران او روسیه په نړۍ کې له مذهبي ازادیو ستر سرغړوونکي بللي دي.

د بهرنیو چارو وزیر انتوني بلېنکن په نړۍ کې د مذهبي ازادیو په اړه د دغه کلني راپور څخه په استفادې غواړي د هغو هېوادونو نومونه په ډاګه کړي او هغوی وشرموي چې نوموړی یې له مذهبي ازادیو ستر تېري کوونکي بولي.

ښاغلی بلېنکن په نړۍ کې مذهبي ازادۍ نړیوال بشري حق بولي.

د امریکا د پخواني ولسمشر ډونالد ټرمپ ادارې په تېره جنوري میاشت کې ویلي و چې په شینجن ایالت کې د چین سیاستونه د بشریت ضد جنایت او نسل وژنه ګڼل کېږي، هغه دریځ چې د بلېنکن په خبره د بایډن اداره هم وسره موافقه ده.

بلېنکن وویل، چین په پراخه پیمانه مذهبي بیانونه جرم بولي او د اویغور مسلمانانو او نورو مذهبي او نورو لږکیو په وړاندې د بشریت ضد اعمال سر ته رسوي.

په دغه کلني راپور کې ایران، برما، روسیه، نایجریا او سعودي عربستان هم په نړۍ کې پر مذهبي ازادیو ستر تېري کوونکي په نښه شوي دي.

د افغانستان او ایران ولسمشرانو پر افغان سولې او وروستیو پېښو خبرې وکړې

د افغانستان جمهور رئیس محمد اشرف غني او یو شمېر نور افغان چارواکي د ایران ولسمشر حسن روحاني سره د ټیلیفوني خبرو پر مهال

د افغانستان او ایران ولسمشرانو د افغانستان د سولې او په دې هېواد کې د وروستیو ترورېستي پېښو په اړه ټیلیفوني خبرې وکړې.

د ارګ په یوې اعلامیه کې چې بېګاه خپره شوه راغلي چې د ایران ولسمشر د خپل حکومت او خلکو په استازیتوب د وروستیو ترهګریزو پېښو په اړه خپله غمرازي او خواخوږي وښوده.

د ارګ اعلامیه زیاتوي چې محمد اشرف غني او حسن روحاني په افغانستان کې د سولې پر هڅو، سیمه‌ییزې همکارۍ او د افغانستان او ایران ترمنځ د اړیکو د پراختیا په اړه بحث وکړ.

افغانستان څو وروستیو ورځو کې د خونړیو پېښو شاهد و. تېره شنبه د کابل دشت برچي سیمه کې پر سیدالشهدا ښوونځي موټر بم او پرله‌پسې چاودنو شااوخوا ۸۵ نجونې زده‌کوونکې ووژلې او له ۱۰۰ زیات ټپيان دي.

د کوچني اختر لومړۍ ورځ؛ افغان ولسمشر له لمانځه وروسته ملت ته وینا کوي

د افغانستان ولسمشر محمد اشرف غني

نن د ۱۴۰۰ لمریز کال د ثور ۲۳مه د نېکمرغه کوچني اختر لومړۍ ورځ ده.

تمه ده د افغانستان ولسمشر د اختر تر لمانځه وروسته په دې اړه ملت ته وینا وکړي.

افغانستان د نورې اسلامي نړۍ ترڅنګ دا ورځ داسې مهال لمانځي چې په دې هېواد کې ډېری خلک د جګړو او ناامنیو له کبله له ګڼو ستونزو او ناخوالو سره مخامخ دي.

خو خلک په دې وروستیو کې د طالبانو له‌خوا د اختر په ورځو کې د موقتي اوربند اعلان په نېک فال نیسي.

د طالبانو ویاند ذبیح‌الله مجاهد تېر ماښام ازادي راډیو ته وویل چې دا اوربند به د اختر تر درېیمې ورځې وي.

ښاغلی مجاهد وايي: "دا اوربند د شپې مهال پیل او د درېیمې ورځي د شپې تر ۱۲ پورې به دوام وکړي."

تر دې وړاندې عامو افغانانو، حکومت او هم نړیوالو سربېره پر دې چې د دې ګام هرکلی وکړ، خو ټینګار یې دا وو چې اوربند تر اختر وروسته هم وغځوي او تل‌پاتې سولې ته لار هواره کړي.

وسله‌والو طالبانو '۴۱ افغان امنیتي سرتېري' له خپلو زندانونو خوشې کړل

ارشیف، یو شمېر وسله‌وال طالبان

وسله‌والو طالبانو پرون ۴۱ افغان امنیتي سرتېري له خپلو زندانونو خوشې کړي.

د دغې ډلې ویاند ذبیح‌الله مجاهد پرون پر ټویټرپاڼه ولیکل چې دغه سرتېري د روژې په مناسبت خوشې شوي دي.

د مجاهد په خبره دغه سرتېري په بادغیس، فاریاب، سرپل او جوزجان ولایتونو کې د دوی له زندانونو خوشې شوي او زیاتوي چې ټول خوشې شوي کسان خپلو کورونو ته واستول شول.

افغان چارواکو تر اوسه د دې بندیانو د خوشې کېدو په اړه د رد یا تأیید ځواب نه‌دی ویلی.

مجاهد زیاتوي چې په ټوله روژې میاشت کې ۲۵۸ تنه افغان ځواکونه د دوی له زندانونو څخه په بېلابېلو پړاوونو کې خوشې شوي دي.

لاوروف ته د بلېنکن خبرداری: د بایډن اداره به د مسکو تجاوز بې‌غبرګونه پرېنږدي

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن خپل روسي سیال سرګي لاوروف ته ویلي چې د ولسمشر جو بایډن اداره به پر متحده ایالاتو او یا بل هر ځای د مسکو تجاوز بې‌غبرګونه پرېنږدي.

د امریکا د بهرنیو چارو وزارت ویاند نید پرایس وویل چې بلېنکن او لاوروف پرون چهارشنبه پر ټیلیفون خبرې وکړې او زیاته‌یې کړه چې د امریکا د بهرنیو چارو وزیر د ولسمشر بایډن هغه پرېکړه بیا تکرار کړه چې وایي امریکایي وګړي به خوندي کوي او د روسیې د هر هغه اقدام په وړاندې چې امریکا او یا یې متحدین زیانمن کړي، د خپلو ګټو دفاع کوي.

دا څرګندونې داسې مهال شوي چې په اوکراین کې دننه او شاوخوا ته د روسي ځواکونو د ځای پر ځای کېدو په ګډون پر یو شمېر مسایلو د واشنګټن او مسکو ترمنځ اړیکې ترینګلې دي.

تمه ده بلېنکن او لاوروف راتلونکې اوونۍ د ایسلند په ریکاویک ښار کې د یوې سرمشریزې په څنډو کې مخامخ سره وګوري.

انوشکا او کوهلي هند کې له کرونا ځپلو سره د مرستې د پیسو اندازه لوړه کړه

د بالیوود وتلې ستوري انوشکا شرما او مېړه‌یې ویرات کوهلي

د بالیوود وتلې ستوري انوشکا شرما او مېړه‌یې ویرات کوهلي له کرونا ځپلو سره د مرستې لپاره د راټولېدونکو پیسو اندازه لوړه کړه.

هندي رسنیو راپور ورکړی چې دغې جوړې مخکې د ۷ کروړه هندي روپیو د راټولېدو ژمنه کړې وه، خو اوس‌یې هدف ۱۱ کروړه ته لوړ کړ څو په خپل هېواد کې د کرونا ځپلو د ژغورنې لپاره وکارول شي.

انوشکا او مېړه‌یې د چهارشنبې په ورځ دا اعلان وکړ. دوی د دې کار لپاره له وړاندې کمپاین پیل کړی دی.

هند دا مهال د کرونا ویروس سخت ځپلی دی چې د وروستیو راپورونو له مخې په دې هېواد کې د 'کووېډ-۱۹' ناروغانو شمېر تر ۲۳ ملیون او ۳۴۰ زرو اوښتی دی. څه باندې ۲۵۴ زره کسان له همدې ناروغۍ په هند کې مړه شوي دي.

د کابل کلکان ولسوالۍ کې د وارداتي برېښنا یوه بله ستن په ماین والوزول شوه

د کابل کلکان ولسوالۍ کې الوزول شوې د برېښنا ستن

د ازبکستان د وارداتي برېښنا یوه ستن په کلکان ولسوالۍ کې په ماین والوزول شوه.

د افغانستان برښنا شرکت د پروان حوزې مشر روح‌الله ساجد ازادي راډیو ته وویل چې تېر ماښام شاوخوا اته نیمې بجې نامعلومو وسله‌والو له دې ستنې سره چاودېدنکي مواد ځای پرځای کړي وو.

د ښاغلي ساجد په خبره د دې ستنې په ویجاړېدو سره د پلازمېنې په ګډون د اوو ولایتونو برېښنا پرې شوه.

تر اوسه د دې پېښې مسؤلیت چا نه‌دی منلی.

برښنا شرکت له دې پېښې وروسته په یوې اعلامیه کې وویل چې د دې شرکت تخنیکي کارکوونکي په کلکان کې دي او هڅه کوي د امنیتي وضعیت په پام کې نیولو سره د دې لین د بېرته رغولو چارې پیل کړي.

دا په داسې حال کې ده چې تر دې پېښې دمخه په روانه اوونۍ کې هم دغې ولسوالۍ کې د نامعلومو کسانو له‌خوا د برېښنا دوه ستنې په بمونو الوزول شوې وې چې لا یې هم د رغونې چارې په بشپړه توګه پای ته نه‌دي رسېدلي.

دفاع وزارت: د میدان وردګ نرخ ولسوالۍ کې نوي ځواکونه ځای پر ځای شول

ارشیف، یو شمېر افغان ځواکونه

د افغانستان دفاع وزارت یوه ورځ وروسته له هغې چې د میدان وردګ ولایت د نرخ ولسوالۍ د طالبانو لاس ته پرېوته، په دې ولسوالۍ کې د نویو ځواکونو د ځای پر ځای کېدو خبر ورکوي.

د دې وزارت مرستیال ویاند فواد امان ازادي راډیو ته وویل چې په دې ولسوالۍ کې د طالبانو په وړاندې عملیات پیل شوي دي.

ښاغلی امان زیاتوي: "نوي ځواکونه د میدان وردګ په نرخ ولسوالۍ کې ځای شوي. په دغه ولسوالۍ کې د ترهګرو په وړاندې تصفیوي عملیات پیل شوي. که خدای کول دغه ولسوالۍ به ډېر ژر بېرته له طالبانو تصفیه شي."

یوه چارواکي ویلي چې هڅه کوي چې دغه ولسوالۍ د اختر په مناسبت تر اعلان شوي اوربند مخکې بېرته له طالبانو ونیسي.

دغه چارواکي د خپل نوم نه‌ښودلو په شرط ویلي چې دا کار ځکه کوي چې طالبان ښایي د اختر له ورځو په استفادې په دې ولسوالۍ کې خپلې مورچلې ټینګې کړي چې ورسره به‌یې د بېرته نیولو لپاره عملیات پېچلي او د تلفاتو له زیاتوالي سره مل وي.

تر دې مخکې د میدان وردګ والي عبدالرحمن طارق تأیید کړې وه چې پر نرخ ولسوالۍ د طالبانو د ډله‌ییزو بریدونو په نتیجه کې امنیتي ځواکونو له دې ولسوالۍ تاکتیکي شا تګ کړی دی.

د طالبانو ویاند ذبیح‌الله مجاهد په یوه ټویټ کې ویلي چې وسله‌والو یې په دغه ولسوالۍ کې ټولې دولتي ادارې پرون سې شنبه ونیولې. هغه افغان امنیتي ځواکونو ته د درنو تلفاتو د اړولو ادعا هم کړې چې افغان چارواکو رد کړې ده.

تاجکستان کې د سختو بارانونو له امله ځمکې ښویېدو ۹ تنه مړه کړي

د تاجکستان کولاب ښار کې د بارانونو له امله د ځمکې ښویېدل

د تاجکستان چارواکي وایي، د دې هېواد په لوېدیځ کې د سختو بارانونو له امله د ځمکې د ښویېدو په پېښو کې ۹ تنه مړه شوي دي.

د تاجکستان د بېړنیو حالاتو کمېټې نن په یوه بیان کې وویل چې د ځمکې ښویېدو له امله اته تنه د خاتلون سیمې په کولاب ښار او شمس‌الدین شاهین، واخش او کوشانیان سیمو کې مړه شوي او یو تن هم د دوشنبې په ۱۵ کیلومترۍ د حصار په ښارګوټي کې مړ شوی دی.

د بیان له مخې پرون دغو بارانونو په ځپل شویو سیمو کې د خلکو ډېرو کورونو، پلونو او نورو تأسیساتو او هم دولتي ودانیو ته زیان رسولی دی.

دغې کمېټې دغه‌راز په سیمه کې بل سبا د جمعې په ورځ د نورو بارانونو د اورېدو خبرداری هم ورکړی او له اوسېدونکو یې غوښتي چې په غرنیو سیمو کې دې د موټرو له تګ څخه ډډه وکړي.

د ناپیلیون کمیس او یو لیک بلجیم کې نندارې ته ایښودل شوی

د ناپیلیون بناپارټ

د ناپیلیون بناپارټ یو کمیس او یو لیک په بلجیم کې نندارې ته ایښودل شوی.

د راپورونو له مخې ناپیلون بناپارټ چې په ۱۹مه پیړۍ کې د فرانسې امپراطور و، دغه سپین رنګه او بې لستوڼو کمیس هغه مهال اغوست چې د اتلانتیک جنوب د سینټ ایلینا ټاپو کې یې په جلاوطنۍ کې ژوند کاوه.

هغه لیک هم چې نندارې ته وړاندې شوی د هغو څو محدودو لیکونو څخه یو دی چې ناپیلیون په لاس په انګریزي لیکلی.

تمه ده چې دغه لیک به د اکتوبر په ۲۷مه په لندن کې د خرڅلاو لپاره داوطلبي ته وړاندې شي.

د بریتانیا د واترلوی موزیم مسوولین وایي، د ناپیلیون بناپارټ لیک ښایي په ډېره لوړه بیه چې په تاریخ کې به یې ساری نه وي لیدل شوی، وپلورل شي.

د کابل د سید الشهدا د ښوونځي د بیارغونې چارې پیل شوي

د کابل د سید الشهدا ښوونځی

د افغانستان د ملي پراختیا شرکت وایي، د افغان ولسمشر محمد اشرف غني د ځانګړي حکم پر بنسټ یې د کابل د سید الشهدا د ښوونځي د بیارغونې چارې پیل کړي.

دغه شرکت پر خپل فیسبوک پاڼه کې لیکلي دي چې د ښوونځي د بیارغونې چارې به ژر بشپړې او د زده کوونکو پر مخ به یو وار بیا پرانیستل شي.

سید الشهدا ښوونځی چې د کابل په دشت برچي سیمه کې موقعیت لري، د روانې شنبې په ورځ پرې موټر بم خونړي حمله وشوه چې له امله یې د ښوونځي له سلو ډېرو زده کوونکو ته مرګ ژوبله واوښته.

د ملي پراختیا شرکت وایي چې اوس مهال د دغه ښوونځي په اتو بلاکونو کار روان دی او ډېر ژر به بشپړ شي.

تاتارستان کې پر ښوونځي برید؛ د ۹ کسانو مړي د دوی کورنیو ته سپارل شوي

تاتارستان کې د ښوونځي د برید په دې پېښه کې له شلو زیات کسان ټپیان شوي هم دي.

د هغو ۹ کسانو مړي د هغوی خپلو خپلوانو ته د ښځولو لپاره وسپارل شول چې د تاتارستان د مرکز پر یوه ښوونځي په برید کې وژل شوي وو.

مسطنتقین په دې اړه څېړنه کوي چې ولې د دې ښوونځي زده کوونکي او ښوونکي د حملې لپاره په نښه شوي وو او عاملان یې څوک دي؟

په دې پېښه کې له شلو زیات کسان ټپیان شوي. ډېری قربانیان د ښوونځي زده کوونکي او مسلمانان دي.

وژل شوي څلور هلکان او درې نجونې، ټول د اتم ټولګي زده کوونکي بلل شوي او یو ښوونکی او د ښوونځي یو بل کار کوونکی هم په وژل شوېو کې شامل دي. یو ۱۹ کلن کس د دغې حملې په تور نیول شوی او ویل شوي چې هغه مخکې له دې چې په ښوونځي کې دننه ډزې پیل کړي، په وره یې کې یې یوه وسیله چاودلې وه.

د دغې پېښې په خاطر نن په تاتارستان کې ملي ویر اعلان شوی.

د ایران پخوانی ولسمشر احمدي نژاد راتلونکو ټاکنو ته کاندید شوی

د ایران پخوانی ولسمشر محمود احمدي نژاد

د ایران پخواني ولسمشر محمود احمدي نژاد د درېیم ځل لپاره د ولسمشرۍ په راتلونکو انتخاباتو کې ځان کاندید کړی او نوم لیکنه یې کړې ده.

د ایران دولتي ټلویزیون نن چهارشنبه (د مې په ۱۲مه)خبر ورکړ چې احمدي نژدا د خپلو ملاتړو په ملتیا د کورنیو چارو وزارت ته لاړ او د نوم لیکنې لپاره یې لازمې فورمې ډکې کړې.

۶۴ کلن احمدي نژاد چې ورته د یوه تُندلاري محافظه کار په توګه کتل کېږي، په دې وروستیو کې یې په واکمن نظام انتقادونو ته مخه کړې ده.

نوموړي مخکې د ۲۰۰۵ نه تر۲۰۱۳ کلونو پورې دوه دورې د ولسمشر په توګه دنده ترسره کړې.

د هغه په دوره کې ایران د خپل اټمي پروګرام پر سر په ښکاره له لویدیځ سره په تقابل کې ولوېد.

د احمدي نژاد د ۲۰۰۹ کال لانجمن انتخابات هم چې نوموړی یې ګټونکی اعلان شوی و، په دې هېواد کې پراخې مظاهرې راپارولې وې چې د ۱۹۷۹ کال د اسلامي انقلاب وروسته یې ساری نه وو لیدل شوی.

د ایران اوسنی ولسمشر حسن روحاني نه شي کولی بیا ځان کاندید کړي ځکه دا یې د ولسمشرۍ دوهمه دوره ده.

ټاکل شوې د ایران د ولسمشرۍ انتخابات د جون په اتلسمه ترسره شي.

نور راوښيه

XS
SM
MD
LG