د لاسرسۍ وړ لېنکونه

تازه خبر
جمعه ۲۴ غویی ۱۴۰۰ کابل ۰۸:۴۷

افغانستان

د کلیو د بیارغونې او پراختیا وزارت ۱۹ ولایتونو کې ۶۶ پروژې پلې کوي

ارشیف

د افغانستان د کلیو د بیارغونې او پراختیا وزارت، خصوصي شرکتونو او د کلیوالي انکشافي شورګانو ترمنځ نن چهارشنبه (د غويي ۱) د ۷۰۵ میلیونو افغانیو په ارزښت د ۶۶ پراختیايي پروژو تړونونه لاسلیک شول.

د دغه وزارت ویاند فریدون اژن وايي چې دغه پروژې به په ۱۹ ولایتونو کې پلې او ۱۳۷زره کلیوال به یې له ګټو برخمن شي.

نوموړی زیاتوي، دغو پروژو کې د سړکونو، استنادي او محافظتي دیوالونو، د اوبو د مدیریت د کانالونو، د کاریزونو او سربندونو او دغه شان د پلونو او پلچکونو جوړول شامل دي.

یاد وزارت وايي چې له دې وړاندې یې هم د ولسي تړون په چوکاټ کې لسګونه پروژې پلي کړي او ځینې د پلي کېدو په حال کې دي.

د ورځې تازه خبرونه دلته ولولئ

د اوربند دوهمه ورځ؛ کابل کې بمي چاودنې ۱۲ تنه ووژل

د شکردرې نننۍ پېښه

په افغانستان کې د درې ورځني اوربند په دویمه ورځ نن لږ تر لږه ۱۲ کسان په کابل کې د بمي چاودنې له کبله ووژل شول.

د کابل امنیه قومانداني وايي، په دې چاودنه کې چې د شکردرې ولسوالۍ په یوه جومات کې د جمعې د لمانځه پر مهال وشوه، د جومات ملا امام مفتي نعمان هم وژل شوی دی.

بل خوا د کورنیو چارو وزارت وايي، په چاودنه کې شااو خوا ۲۰ کسان ټپیان شوي دي.

د دغه وزارت مرستیال ویاند، حامد روشن رسنیو ته، د پېښې په اړه څېړنې پیل شوې دي: "زموږ لومړنۍ څېړنې ښيي چې دغه چاودنه په جومات کې دننه د ځای پر ځای شویو موادو له کبله شوې ده. زموږ څېړنې لا هم روانې دي."

د وسله والو طالبانو یوه ویاند ذبیح الله مجاهد په یوه اعلامیه کې دغه چاودنه غندلې ده.

له اوربند سره- سره د اختر په اوله ورځ په کندهار، کندز او غزني کې د ماینونو د چاودنو له کبله لږ تر لږه د ۱۱ ملکیانو د وژل کېدو راپورونه ورکړل شول.

دفاع وزارت: د کندهار هوايي ډګر د پوځي اډې مسوولیت اردو ته سپارل شوی

د کندهار هوايي ډګر

د افغانستان دفاع وزارت وايي، تر دې وروسته به افغان ځواکونه د کندهار هوايي ډګر، له پوځي اډې د ټرورېزم پر وړاندې د مبارزې لپاره کار اخلي.

د دغه وزارت مرستیال ویاند فواد امان نن جمعه ازادي راډیو ته وویل: امریکايي ځواکونو د کندهار هوايي ډګر د پوځي اډې مسوولیت ملي اردو ته سپارلی: "تر دې وروسته به د افغانستان دفاع وزارت له دې پوځي اډې د ټرورېزم پر وړاندې د مبارزې لپاره کار اخلي. افغان لوري ته د امریکايي ځواکونو له خوا د پوځي اډو او کمپونو د سپارلو لړۍ په بریا سره روانه ده."

بل خوا امریکايي چارواکو هم ویلي، امریکايي ځواکونو د کندهار هوايي اډې بشپړ مسوولیت افغان لوري ته سپارلی دی.

د امریکا سټارس اینډ سټرایپس ورځپاڼې راپور ورکړی چې د نړیوال ائتلاف پوځیان به د امنیتي اندېښنو د ارزونې لپاره یوه یا دوې ورځې لا هم د کندهار هوايي ډګر په پوځي اډه کې پاتې وي.

که څه هم د دې اډې مسولیت رسما افغان چارواکو ته سپارل شوی خو تر اوسه دا څرګنده نه ده چې کله به ترې د ټولو بهرنیو ځواکونو وتل بشپړ شي.

له افغانستانه د امریکايي ځواکونو وتل د مې میاشتې پر لومړۍ نېټه پیل شوي او د سېپټمبر تر یوولسمې نېټې دوام کوي.

حیات: د پولیسو له نومه ناوړه استفاده کوونکي له دندې شړل کېږي

د افغانستان د کورنیو چارو سرپرست وزیر حیات الله حیات

د افغانستان د کورنیو چارو سرپرست وزیر وايي، هر پولیس چې د پولیسو د بدنامۍ لپاره د پولیسو له نوم څخه ناوړه استفاده کوي، له دندې شړل کېږي.

حیات الله حیات، دا څرګندونې په هرات ولایت کې د پولیسو، ملي امنیت او ملي اردو ترمنځ پر همږغۍ د ټینګار په باب په د وینا پر مهال وکړې.

د کورنیو چارو وزارت نن جمعه په یوه اعلامیه کې ویلي چې ښاغلي حیات دغو ارګانونو ته ویلي، هېڅ آمر باید د زورواکو ځانګړو فرمایشونو ته غاړه کښېنږدي، که چېرې دا کار کوي، له دندې به ګوښه کړای شي.

د هلمند پخوانی والي جنرال عبدالنبي الهام ومړ

د هلمند پخوانی والي جنرال عبدالنبي الهام

د هلمند پخوانی والي جنرال عبدالنبي الهام د کرونا ناروغۍ له کبله ومړ.

دا خبره د هلمند د قبایلو د چارو رییس نوید نظري په خپل فیسبوک لیکلې ده.

ځینو نورو چارواکو او خبریالانو هم د جنرال الهام د مړینې خبر خپور کړی دی.

جنرال عبدالنبي الهام چې پنځه ورځې دمخه د هلمند له ولایته ګواښه کړای شوی و په کابل کې د کرونا ناروغۍ په خاطر په یوه روغتون کې بستر و.

د سیمه ییزو ارګانونو خپلواکې ادارې د جنرال الهام پر ځای محمد ولي علیزی د هلمند والي ټاکلی دی.

ولسمشر غني: د افغانستان د روزنځایونو وضعیت به وڅېړل شي

ولسمشر غني

ولسمشر اشرف غني وايي چې د هېواد د روزنځایونو وضعیت به وڅېړل شي او د هغو د ستونزو د حل لپاره به عاجل اقدامات عملي شي.

ښاغلي غني دا څرګندونې پرون- پنجشنبې په ارګ کې له یو شمېر بې سرپرسته او یتیمو ماشومانو سره د کتنې پر مهال وکړې.

د جمهوري ریاست د مطبوعاتي دفتر د خبرپاڼې له مخې، افغان ولسمشر دې ماشومانو ته د اختر مبارکۍ له ویلو وروسته څرګنده کړه چې د پوهنې او لوړو زده کړو وزارتونو ته به هدایت ورکړي چې په بورسیو کې یتیم او بې سرپرسته ماشومان هم په پام کې ونیسي.

عادله راز امریکا کې د افغانستان نوې سفیره شوه

عادله راز

عادله راز د امریکا په متحدو ایالاتونو کې د افغانستان د نوې سفیرې په توګه په دنده ګومارل شوې ده.

د افغانستان د بهرنیو چارو په وزارت کې یوې سرچینې چې نه غواړي هویت یې څرګند شي تېره شپه له ازادي راډیو سره په خبرو کې دا خبر تایید کړ.

مېرمن راز له دې مخکې په ملګرو ملتونو کې د افغانستان د دایمي استازې په توګه کار کاوه.

په واشنګټن ډي سي کې د افغانستان سفیره له دې مخکې رویا رحماني وه.

افغان ولسمشر د ترکمنستان، ترکیې، قزاقستان او قرغزستان له ولسمشرانو سره وغږید

ارشیف، ولسمشر غني

افغان ولسمشر اشرف غني د ترکمنستان، ترکیې، قزاقستان او قرغزستان له ولسمشرانو سره د دوه اړخیزو اړیکو او د افغانستان د سولې د روانو هڅو په اړه خبرې کړي.

ارګ په یو خبرپاڼه کې وايي چې ښاغلي غني پرون له قربانګلي بېردي محمدوف، رجب طیب اردوغان، قاسم جومارت توقایف او سدر جباروف سره پر ټیلیفون خبرې وکړې.

په خبرپاڼه کې راغلي دي چې دوی یو بل ته د اختر مبارکۍ وویلې او د سیمې د هېوادونو ترمنځ د همکاریو په اړه یې بحث وکړ.

په عین حال کې ترکي رسنیو راپور ورکړی چې ولسمشر اردوغان د افغانستان او قرغزستان له ولسمشرانو او د عراق له صدراعظم سره د خبرو پر مهال د اسراییل د اقداماتو پر وړاندې له فلسطینیانو سره د پیوستون په اړه بحث وکړ.

د حماس تر ولکې لاندې غزې سیمه کې د روغتیا وزارت پرون وویل چې په تېرو درېیو ورځو کې د اسراییلي پوځ په حملو کې لږ تر لږه ۸۳ فلسطینیان وژل شوي.

د اسراییلو روغتیايي چارواکو هم د اوو اسراییلیانو د مړینې خبر ورکړی.

اسراییلي پوځ دا هوايي حملې وروسته له هغه پیل کړې چې د اسراییلو پر څو سیمو د حماس ډلې له خوا توغول شوي توغندي راپرېوتل.

د برېښنا د ویجاړې شوې ستنې د بیارغونې پر مهال چاودنه؛ یو کارکوونکی ټپي شوی

د کابل په کلکان ولسوالۍ کې د برېښنا ویجاړه شوې ستن

د برښنا شرکت یو تخنیکي کارکوونکی د کابل په کلکان ولسوالۍ کې د یوې ویجاړې شوې ستنې د بیا رغېدو پر مهال په ماین کې ټپي شوی دی.

د ازبکستان د وارداتي برېښنا دا ستن تېر ماښام د نامعلومو وسله‌والو له‌خوا په بم الوزول شوې وه.

د برښنا شرکت ویاند سنګر نیازي نن ازادي راډیو ته وویل: "نن سهار چې زموږ همکارانو کار پیل کړ، له بده مرغه د دې ستنې ترڅنګ د یوه خښ شوي ماین په چاودنه کې یو کارکوونکی ټپي شوی دی."

ښاغلي نیازي زیاته کړه چې هڅه کوي د نن ورځې تر پایه دا ستن ترمیم شي.

تر دې دمخه ورځو کې په همدې کلکان ولسوالۍ کې د برېښنا دوه نورې ستنې هم د نامعلومو وسله‌والو له‌خوا په بمي چاودنو ویجاړې شوي. دغو پېښو د کابل په ګډون یو شمېر ولایتونه له برېښنا بې‌برخې کړل.

له طالبانو د اشرف غني غوښتنه: اوربند وغځوئ، ټول افغانان سولې ته تږي دي

د افغانستان جمهور رئیس محمد اشرف غني

افغان ولسمشر اشرف غني د کمکي اختر په مناسبت پیغام کې پر طالبانو غږ وکړ چې اوربند دې وغځوي.

ولسمشر غني وویل، جګړه پوځي حل‌لاره نه‌لري او بالاخره باید پای ته ورسول شي. نوموړي ټینګار وکړ چې ټول افغانان سولې ته تږي دي او ټول اړخونه باید د سولې لپاره هڅې وکړي.

طالبانو چې د اختر په مناسبت درې ورځنی اوربند اعلان کړی ویلي چې هغه به ونه‌غځوي. دا خبره تېره شپه د دې ډلې ویاند ذبیح‌الله مجاهد ازادي راډیو ته وکړه.

ښاغلی غني یو ځل بیا پر طالبانو غږ وکړ چې ټولګټو تأسیساتو ته له زیان رسولو دې لاس واخلي.

هغه خپله پخوانۍ خبره بیا تکرار کړه چې ویلي و په تېرو کلونو کې طالبانو د یو میلیارد ډالرو په ارزښت ټولګټو تأسیساتو ته زیان رسولی، هغه ادعا چې طالبانو رد کړې ده.

افغانان دا اختر داسې مهال لمانځي چې د جګړو دوام ډېرې کورنۍ د غم په ټغر کېنولي.

د روژې سږنۍ میاشت له خونړیو حملو سره مله وه. تر ټولو خونړۍ هغه‌یې د کابل په دشت برچي کې پر نجونو زده‌کونکو وه چې شااوخوا ۸۵ تنه ووژل شول او له ۱۰۰ زیات ټپیان شوي دي.

د افغانستان او ایران ولسمشرانو پر افغان سولې او وروستیو پېښو خبرې وکړې

د افغانستان جمهور رئیس محمد اشرف غني او یو شمېر نور افغان چارواکي د ایران ولسمشر حسن روحاني سره د ټیلیفوني خبرو پر مهال

د افغانستان او ایران ولسمشرانو د افغانستان د سولې او په دې هېواد کې د وروستیو ترورېستي پېښو په اړه ټیلیفوني خبرې وکړې.

د ارګ په یوې اعلامیه کې چې بېګاه خپره شوه راغلي چې د ایران ولسمشر د خپل حکومت او خلکو په استازیتوب د وروستیو ترهګریزو پېښو په اړه خپله غمرازي او خواخوږي وښوده.

د ارګ اعلامیه زیاتوي چې محمد اشرف غني او حسن روحاني په افغانستان کې د سولې پر هڅو، سیمه‌ییزې همکارۍ او د افغانستان او ایران ترمنځ د اړیکو د پراختیا په اړه بحث وکړ.

افغانستان څو وروستیو ورځو کې د خونړیو پېښو شاهد و. تېره شنبه د کابل دشت برچي سیمه کې پر سیدالشهدا ښوونځي موټر بم او پرله‌پسې چاودنو شااوخوا ۸۵ نجونې زده‌کوونکې ووژلې او له ۱۰۰ زیات ټپيان دي.

د کوچني اختر لومړۍ ورځ؛ افغان ولسمشر له لمانځه وروسته ملت ته وینا کوي

د افغانستان ولسمشر محمد اشرف غني

نن د ۱۴۰۰ لمریز کال د ثور ۲۳مه د نېکمرغه کوچني اختر لومړۍ ورځ ده.

تمه ده د افغانستان ولسمشر د اختر تر لمانځه وروسته په دې اړه ملت ته وینا وکړي.

افغانستان د نورې اسلامي نړۍ ترڅنګ دا ورځ داسې مهال لمانځي چې په دې هېواد کې ډېری خلک د جګړو او ناامنیو له کبله له ګڼو ستونزو او ناخوالو سره مخامخ دي.

خو خلک په دې وروستیو کې د طالبانو له‌خوا د اختر په ورځو کې د موقتي اوربند اعلان په نېک فال نیسي.

د طالبانو ویاند ذبیح‌الله مجاهد تېر ماښام ازادي راډیو ته وویل چې دا اوربند به د اختر تر درېیمې ورځې وي.

ښاغلی مجاهد وايي: "دا اوربند د شپې مهال پیل او د درېیمې ورځي د شپې تر ۱۲ پورې به دوام وکړي."

تر دې وړاندې عامو افغانانو، حکومت او هم نړیوالو سربېره پر دې چې د دې ګام هرکلی وکړ، خو ټینګار یې دا وو چې اوربند تر اختر وروسته هم وغځوي او تل‌پاتې سولې ته لار هواره کړي.

وسله‌والو طالبانو '۴۱ افغان امنیتي سرتېري' له خپلو زندانونو خوشې کړل

ارشیف، یو شمېر وسله‌وال طالبان

وسله‌والو طالبانو پرون ۴۱ افغان امنیتي سرتېري له خپلو زندانونو خوشې کړي.

د دغې ډلې ویاند ذبیح‌الله مجاهد پرون پر ټویټرپاڼه ولیکل چې دغه سرتېري د روژې په مناسبت خوشې شوي دي.

د مجاهد په خبره دغه سرتېري په بادغیس، فاریاب، سرپل او جوزجان ولایتونو کې د دوی له زندانونو خوشې شوي او زیاتوي چې ټول خوشې شوي کسان خپلو کورونو ته واستول شول.

افغان چارواکو تر اوسه د دې بندیانو د خوشې کېدو په اړه د رد یا تأیید ځواب نه‌دی ویلی.

مجاهد زیاتوي چې په ټوله روژې میاشت کې ۲۵۸ تنه افغان ځواکونه د دوی له زندانونو څخه په بېلابېلو پړاوونو کې خوشې شوي دي.

د کابل کلکان ولسوالۍ کې د وارداتي برېښنا یوه بله ستن په ماین والوزول شوه

د کابل کلکان ولسوالۍ کې الوزول شوې د برېښنا ستن

د ازبکستان د وارداتي برېښنا یوه ستن په کلکان ولسوالۍ کې په ماین والوزول شوه.

د افغانستان برښنا شرکت د پروان حوزې مشر روح‌الله ساجد ازادي راډیو ته وویل چې تېر ماښام شاوخوا اته نیمې بجې نامعلومو وسله‌والو له دې ستنې سره چاودېدنکي مواد ځای پرځای کړي وو.

د ښاغلي ساجد په خبره د دې ستنې په ویجاړېدو سره د پلازمېنې په ګډون د اوو ولایتونو برېښنا پرې شوه.

تر اوسه د دې پېښې مسؤلیت چا نه‌دی منلی.

برښنا شرکت له دې پېښې وروسته په یوې اعلامیه کې وویل چې د دې شرکت تخنیکي کارکوونکي په کلکان کې دي او هڅه کوي د امنیتي وضعیت په پام کې نیولو سره د دې لین د بېرته رغولو چارې پیل کړي.

دا په داسې حال کې ده چې تر دې پېښې دمخه په روانه اوونۍ کې هم دغې ولسوالۍ کې د نامعلومو کسانو له‌خوا د برېښنا دوه ستنې په بمونو الوزول شوې وې چې لا یې هم د رغونې چارې په بشپړه توګه پای ته نه‌دي رسېدلي.

دفاع وزارت: د میدان وردګ نرخ ولسوالۍ کې نوي ځواکونه ځای پر ځای شول

ارشیف، یو شمېر افغان ځواکونه

د افغانستان دفاع وزارت یوه ورځ وروسته له هغې چې د میدان وردګ ولایت د نرخ ولسوالۍ د طالبانو لاس ته پرېوته، په دې ولسوالۍ کې د نویو ځواکونو د ځای پر ځای کېدو خبر ورکوي.

د دې وزارت مرستیال ویاند فواد امان ازادي راډیو ته وویل چې په دې ولسوالۍ کې د طالبانو په وړاندې عملیات پیل شوي دي.

ښاغلی امان زیاتوي: "نوي ځواکونه د میدان وردګ په نرخ ولسوالۍ کې ځای شوي. په دغه ولسوالۍ کې د ترهګرو په وړاندې تصفیوي عملیات پیل شوي. که خدای کول دغه ولسوالۍ به ډېر ژر بېرته له طالبانو تصفیه شي."

یوه چارواکي ویلي چې هڅه کوي چې دغه ولسوالۍ د اختر په مناسبت تر اعلان شوي اوربند مخکې بېرته له طالبانو ونیسي.

دغه چارواکي د خپل نوم نه‌ښودلو په شرط ویلي چې دا کار ځکه کوي چې طالبان ښایي د اختر له ورځو په استفادې په دې ولسوالۍ کې خپلې مورچلې ټینګې کړي چې ورسره به‌یې د بېرته نیولو لپاره عملیات پېچلي او د تلفاتو له زیاتوالي سره مل وي.

تر دې مخکې د میدان وردګ والي عبدالرحمن طارق تأیید کړې وه چې پر نرخ ولسوالۍ د طالبانو د ډله‌ییزو بریدونو په نتیجه کې امنیتي ځواکونو له دې ولسوالۍ تاکتیکي شا تګ کړی دی.

د طالبانو ویاند ذبیح‌الله مجاهد په یوه ټویټ کې ویلي چې وسله‌والو یې په دغه ولسوالۍ کې ټولې دولتي ادارې پرون سې شنبه ونیولې. هغه افغان امنیتي ځواکونو ته د درنو تلفاتو د اړولو ادعا هم کړې چې افغان چارواکو رد کړې ده.

د کابل د سید الشهدا د ښوونځي د بیارغونې چارې پیل شوي

د کابل د سید الشهدا ښوونځی

د افغانستان د ملي پراختیا شرکت وایي، د افغان ولسمشر محمد اشرف غني د ځانګړي حکم پر بنسټ یې د کابل د سید الشهدا د ښوونځي د بیارغونې چارې پیل کړي.

دغه شرکت پر خپل فیسبوک پاڼه کې لیکلي دي چې د ښوونځي د بیارغونې چارې به ژر بشپړې او د زده کوونکو پر مخ به یو وار بیا پرانیستل شي.

سید الشهدا ښوونځی چې د کابل په دشت برچي سیمه کې موقعیت لري، د روانې شنبې په ورځ پرې موټر بم خونړي حمله وشوه چې له امله یې د ښوونځي له سلو ډېرو زده کوونکو ته مرګ ژوبله واوښته.

د ملي پراختیا شرکت وایي چې اوس مهال د دغه ښوونځي په اتو بلاکونو کار روان دی او ډېر ژر به بشپړ شي.

نور راوښيه

XS
SM
MD
LG