د لاسرسۍ وړ لېنکونه

تازه خبر
شنبه ۱۸ غویی ۱۴۰۰ کابل ۰۲:۰۲

افغانستان

رستمي: سږکال ۱.۸ میلیارډه کرنیز او مالدارۍ پورونه وېشل کېږي

یو شمېر بزګران

د افغانستان د کرنې، اوبو لګولو او مالدارۍ وزارت وايي، روان مالي کال به د کرنې د پراختیا د وجهي صندوق له لارې له ۷ زرو زیاتو بزګرانو او متشبیثینو ته ۱.۸ میلیارډه افغانۍ پور ورکړي.

د دغه وزارت ویاند اکبر رستمي نن چهارشنبه(د غويي ۱) ازادي راډیو ته وویل، دا پورونه د بزګرانو او متشبیثنو د ځان بسیاینه په هدف دوی ته ورکول کېږي او د ورکړې لړۍ یې پيل شوې ده.

دی وايي: "چاته چې پور ورکول کېږي، بزګران، کوپراټیفونه، کرنیز سوداګر، د چرګانو، غواوو او کبانو فارمونه، د غذایي توکو تولیدي فابریکې او د وچې او تازه مېوو صادرونکي په کې شامل دي."

د افغانستان د کرنې، مالدارۍ او اوبو لګولو وزارت تېر مالي کال هم له شپږ زرو زیاتو بزګرانو ته نږدې یو نیم میلیارډ افغانۍ پور ورکړی و.

د ورځې تازه خبرونه دلته ولولئ

د کورنیو چارو وزارت بغلان کې د امنیتي وضعیت د ښه کېدو ډاډ ورکړ

ارشیف

د افغانستان د کورنیو چارو وزارت په بغلان ولایت کې له درنو جګړو وروسته اوس د وضعیت د عادي کېدو خبر ورکوي.

د کورنیو چارو وزارت ویاند طارق ارین ازادي راډیو ته وویل چې د تېرې ورځې په جګړو کې طالبانو ته درانه تلفات اوښتي.

ښاغلي ارین د تلفاتو دقیق شمېر ونه ښود، خو زیاته یې کړه چې په دې سیمه کې د طالبانو پرضد د افغان ځواکونو عملیات روان دي: "زموږ ګډ امنیتي ځواکونه هڅه کوي چې ټولو تروریستانو او طالبانو ته بیاهم سخت ځواب ورکړي، څو دا سیمه له طالبانو په بشپړ ډول پاکه شي."

له دې مخکې افغان چارواکو او طالبانو د بغلان په دهنه غوري، نهرین او د مرکزي بغلان ولسوالیو کې د درنو جګړو خبر ورکړ.

افغان چارواکو وویل چې دې جګړو کې یې شااوخوا سلو طالبانو ته مرګ ژوبله اړولې او طالبانو وویل چې په دهنه غوري کې یې د دولتي ځواکونو پنځه قرارګاوې نیولې دي.

یو شمېر لویدیځ ډیپلوماتانو افغانستان کې د تشدد د بندېدو غوښتنه کړې

د یو شمېر لویدیځو هېوادونو ډيپلوماتانو پرون جمعه(د غويي ۱۷مه) یو ځل بیا په افغانستان کې د تشدد د بندېدو غوښتنه وکړه.

د افغانستان لپاره د اروپایي ټولنې، فرانسې، جرمني، ایټالیا، بریتانیا، ناروې امریکا او همدا راز د ناټو ځانګړو استازو په برلین کې له پرونۍ غونډې وروسته په یوه اعلامیه کې چې شل مادې لري ویلي چې دوی په افغانستان کې د زور له لارې د یوه حکومت له جوړېدو سره مخالفت کوي.

له دې غونډې سره د طالبانو د قطر د دفتر پلاوی هم د ویډیو کنفرانس له لارې یوځای شوی و.

د طالبانو د مرکچي پلاوي مرستیال شېر محمد عباس ستانکزي طالبان د سولې پلوی غورځنګ وباله: "د افغانستان اسلامي امارت له کومه وخته چې تاسیس شوی تر اوسه یې تل په افغانستان کې د سولې لپاره ډېرې هڅې کړي او ګامونه یې اخیستي دي. زه په حقیقت کې ویلی شم چې د اسلامي امارت ابتدا د سولې په خاطر باندې وه."

خو د پرونۍ غونډې ګډونوالو په خپله ګډه اعلامیه کې د روان تشدد د دوام ډېره پړه پر طالبانو اچولې او له دې ډلې یې غوښتي دي چې نا اعلان شوي پسرلني عملیات ودروي او ژر تر ژره روغتونونو، ښونځیو، جوماتونو او نورو عامه ځایونو ته نژدې بریدونه پای ته ورسوي.

د صنعت او سوداګرۍ وزارت: د تالک د ډبرو صادرات بیا پیل شوي

د تالک ډبرې

د افغانستان صنعت او سوداګرۍ وزارت وايي چې له ننګرهاره ولایت نه بهر ته د تالک ډبرې د صادراتو لړۍ بیا ځلي پيل شوي دي.

د دغه وزارت ویاند فواد احمدي نن شنبه (د غويي ۱۸مه) ازادي راډيو ته وویل، دغه کاني ډبره هند، پاکستان، تاجیکستان، قزاقستان، ازبیکستان، ټایوان، جرمني، کولمبیا او سریلانکا ته صادریږي.

د نوموړي په وینا تېرو دوو میاشتو کې دغو ډبرو د زرګونه ټنه صادره شوې چې شااوخوا سل میلیونه افغانۍ عواید راټول شوي.

د ننګرهار ولایت په خوګیاڼو ، شېرزاد او شینوارو ولسوالیو کې د تالک ډبرو کانونه شته چې ۷۰۰۰ زره کسانو ته یې د کار زمینه هم برابره کړې.

د صنعت او سوداګرۍ وزارت وايي چې د تالک ډبرو کانونه په کابل ، کندهار ، میدان وردګ ، لوګر ، کونړ ، خوست ، کاپیسا ، پروان او ننګرهار ولایتونو کې تثبیت شوي دي.

د سوداګرۍ او صنعت وزارت وايي، د دغې ډبرې صادرات د قاچاق د مخنیوي او د تړونونو د نیوي کولو په هدف ځنډېدلي وو.

د اوبو د تنظیم اداره: د ارچي او شهروان کانالونو چارې بشپړې شوې

ارشیف

د افغانستان د اوبو د تنظیم ملي اداره وايي، د ارچي او شهروان کانالونو چارې بشپړې او ګټې اخېستنې ته وسپارل شوې.

د دغې ادارې ویاند نظام الدین خپلواک نن شنبه (د غويي ۱۸مه) ازادي راډیو ته وویل، دغه دوه کانالونه د تخار او کندز ولایتونو ترمنځ ګډې پروژې دي چې چارې یې په اساسي ډول بشپړې شوي دي.

ښاغلي خپلواک زیاته کړه: "دغه پروژې د اسیا پراختیايي بانک په مالي لګښت پلي شوي چې تر شپېته میلیونه امریکايي ډالرو زیات لګښت پرې راغی."

د ښاغلي خپلواک په وینا دغه کانالونه له ۵۰ زره هکتاره زیاته کرنیزه ځمکه خړوبوي او شااوخوا دوله لکه کسان به يې په مستقیم ډول له ګټو برخمن شي.

د اوبو د تنظیم ملي اداره وايي چې نږدې راتلونکي کې به د هېواد په یو شمېر نورو ولایتونو کې هم دیته ورته پروژې ګټې اخېستنې ته وسپارل شي.

معصوم ستانکزی وایي، طالبانو په روژې میاشت کې ګڼ خلک ووژل

ارشیف

د افغان دولت د مرکچي پلاوي مشر معصوم ستانکزی وایي، طالبانو په روژې میاشت کې ګڼ خلک ووژل.

ښاغلي ستانکزي پرون جمعه (د غويي ۱۷مه) پر خپله ټویټرپاڼه ولیکل، دا تاوتریخوالی داسې مهال روان دی چې د روژې له راتګ او د بهرنیو ځواکونو له وتلو سره سم هیله دا وه چې طالبان به په جدیت سره د سولې لاره تعقیب کړي.

ده ویلي، ستره بریا په جګړه کې نه، بلکې په خبره یې د ولس په هوساینه کې ده.

له دې وړاندې د ملي امنیت شورا ویلي و چې طالبانو یوازې په یوه اوونۍ کې پر افغانانو ۸۷۰ اته سوه اویا بریدونه کړي دي.

د طالبانو د قطر دفتر ویاند محمد نعیم بیا وایي، جګړه پر دوی تپل شوې. ده له ازادي راډیو سره خبرو کې وویل، د دوی دایمي موقف دا دی چې ستونزې باید د خبرو له لارې هوارې شي.

بغلان چارواکي: بېلابېلو سیمو کې د طالبانو خوځښتونه په شا تمبول شوي

ارشیف، بغلان کې افغان امنیتي ځواکونه د عملیاتو پر مهال

د بغلان چارواکي وایي، د دغه ولایت په بېلابېلو سیمو کې د طالبانو خوځښتونه په شا تمبول شوي دي.

د بغلان مرستیال والي ذبیح الله احساس تېره شپه ازادي راډیو ته وویل، وضعیت اوس د امنیتي او دفاعي ځواکونو په کنټرول کې دی: "بېلابېلو سیمو کې د وسله والو مخالفانو له خوا مزاحمتونه کېدل، دوی د افغان دفاعي او امنیتي ځواکونو له خوا په شا تمبول شوي دي، هم په مرکزي بغلان ولسوالۍ، هم په نهرین او هم په دهنه غوري کې."

ښاغلي احساس وویل، د عملیاتو پر مهال شااوخوا سلو طالبانو ته مرګ ژوبله اوښتې، خو دا یې ونه ویل چې د دوی ځواکونه څه شمېر تلفات لري.

طالبانو د بغلان پر جګړې تازه څه نه دي ویلي، خو پرون جمعه (د غويي ۱۷مه) یې ادعا کړې وه چې په دهنه غوري ولسوالۍ کې ېې د امنیتي او دفاعي ځواکونو پنځه قرارګاوې نیولي دي.

چارواکي: هلمند کې جګړو بې ځایه شوي کډوال بیړنیو مرستو ته اړتیا لري

ارشیف، هلمند کې د جګړو یوه بې ځایه شوې کورنۍ

د هلمند چارواکي وایي، دغلته له تازه جګړې بې ځایه شوي کسان بیړنیو مرستو ته اړتیا لري.

د هلمند د کډوالو مشر سید محمد رامین ازادي راډیو ته وویل، دوی تراوسه یوازې له خپلو ولایتي سرچینو له بې ځایه شوېو سره مرسته کړې چې بسنه نه کوي.

د هغه په خبره، شااوخوا زر کورنۍ همدې شپو ورځو کې له خپلو مېنو بې ځایه شوي او د ولایت نسبتاً خوندي سیمو ته یې پنا وړې ده.

له دې وړاندې خپله یو شمېر بې ځایه شویو ازادي راډیو ته ویلي چې له اقتصادي او ټولنیز اړخه په سخت حالت کې ژوند کوي.

د هلمند د مرکز لښکرګاه په شااوخوا سیمو او څو ولسوالیو کې له تېرې شااوخوا یوې اوونۍ راهیسې د افغان ځواکونو او طالبانو ترمنځ سخته جګړه روانه ده.

د کابل کلکان ولسوالۍ کې د وارداتي برېښنا د الوزول شویو پایو جوړول پیل شوي

د کابل په کلکان ولسوالۍ کې الوزول شوې د برېښنا پايې

د افغانستان برېښنا شرکت وايي د کابل په کلکان ولسوالۍ کې د وارداتي برېښنا دوو نړول شویو پایو جوړول پیل شوي دي.

د دغه ریاست په وینا، دغه دوه پایې نن سهار وختي په میرزاخېل سیمه کې د ماینونو د چاودنې په نتیجه کې نړول شوي او درېیمه پایه یو څه تخریب شوې ده.

تر دې پېښې وروسته په کابل او ځینو نورو ولایتونو کې د برېښنا جریان تر ډېره پرې شوی دی.

د پېښې مسؤلیت چا نه‌دی منلی.

چارواکي: میدان وردګ ولایت کې دوو نفوذي کسانو د ملي اردو ۷ سرتېري وژلي

ارشيف، د افغان ځواکونو يوه پوسته

چارواکي وايي په میدان وردګ ولایت کې دوو نفوذي کسانو د ملي اردو ۷ سرتېري وژلي دي.

د ۲۰۳ تندر قول اردو ویاند اېمل خان مومند نن ازادي راډیو ته وویل، دغه پېښه تېره شپه په میدان ښار کې شوې.

ښاغلی مومند زياتوي: "د مرکز اړوند په پولاد خان سیمه کې زموږ په یوه پوسته کې دوو نفوذي کسانو له طالبانو سره لاس یو کړی، دغې پوستې ته ننوتلي او زموږ ۷ تنه سرتېري یې شهیدان کړي او یو تن ټپي کړی دی."

ښاغلی مومند زیاتوي چې نفوذي کسان تر پېښې وروسته له سیمې تښتېدلي او د پوستې ټول تجهیزات، وسلې او وسایل‌یې له ځان سره وړي دي.

د دې حملې مسؤلت تر اوسه چا نه‌دی منلی.

د ملي اردو یو چارواکی: بغلان کې ۱۰۰ وسله‌والو طالبانو ته مرګ‌ژوبله اوښتې

ارشيف، بغلان کې د افغان ځواکونو عمليات

د ملي اردو یو چارواکی ادعا کوي چې په بغلان ولایت کې ۱۰۰ وسله‌والو طالبانو ته مرګ‌ژوبله اوښتې ده.

د افغانستان په شمال کې د کمانډو لومړۍ لوا قوماندان، ډگروال صفي‌الله محمدي، نن رسنیو ته په یوه لېږلي وېډیويي پیغام کې وویل، وسله‌والو طالبانو ته په تېرو ۴۸ ساعتونو کې دغه مرګ‌ژوبله په نهرین، مرکزي بغلان او دهنه غوري ولسوالیو کې اوښتې ده.

ښاغلی محمدي زياتوي: "تر سلو ډېر تلفات لري. دوی له ملي پولیسو، ملي امنیت او ملي اردو سره په مخامخ جګړه کې وژل شوي. تېره شپه د تازه دمه ځواکونو له رسېدو سره د دوی مرګ‌ژوبله زیاته شوې ده. که خدای کول زموږ عملیات به دوام لري."

بل‌خوا دفاع وزارت نن په یوه خبرپاڼه کې ویلي، په بغلان ولایت کې دفاعي او امنیتي ځواکونه د پرمختګ په حال کې دي.

په بغلان ولایت کې په وروستیو ورځو کې جګړې زیاتې شوي او تېره چهارشنبه بورکه ولسوالۍ هم د وسله‌والو طالبانو لاس ته ورغله.

د افغانستان ملي امنیت شورا: وسله‌والو طالبانو پر افغانانو بریدونه زیات کړي

ارشيف، يو شمېر وسله‌وال طالبان

د افغانستان د ملي امنیت شورا ویاند وايي، وسله‌والو طالبانو په تېره یوه اوونۍ کې پر افغانانو خپل بریدونه زیات کړي دي.

رحمت‌الله اندړ تېره شپه په یوه ټویټ کې ویلي، په تېر یوه کال کې په افغانستان کې یو امریکایي سرتېری هم نه‌دی وژل شوی، خو یوازې په یوه اوونۍ کې طالبانو پر افغانانو ۸۷۰ بریدونه کړي دي.

ښاغلي اندړ پوښتنه کړې، "دا کوم ډول جهاد دی چې يوازې د افغانانو پر خلاف روان دی؟"

د وسله‌والو طالبانو ویاندویانو که څه هم د ښاغلي اندړ د دغه بیان په اړه تبصره نه‌ده کړې، خو تر دې مخکې یې د بریدونو د زیاتېدو مسؤل افغان دولت بللی و.

امریکا له افغانستانه د خوندي وتلو لپاره نورې بم غورځوونکې الوتکې ګمارلي

ارشيف، امريکايي «B-52» الوتکې

د امریکا متحده ایالاتو دفاع وزارت له افغانستانه د امریکايي او ائتلافي ځواکونو د وتلو د بهیر د خوندیتوب لپاره په افغانستان کې نورې درانه بم غورځوونکې او جنګي جټ الوتکې ګمارلې دي.

د امریکا دفاع وزیر لوید استېن دا خبره پرون پنجشنبه له خبریالانو سره په خبرو کې وکړه.

ښاغلي استین ویلي: "تر یوې اوونۍ لږه موده کېږي چې له افغانستانه د سرتېرو وتل له پلان سره سم روان دي."

ده زیاته کړې چې پر نړیوالو پوځیانو تر اوسه کومه مستقیمه حمله نه‌ده شوې.

د امریکا د لوی درستیزانو د کمېټې مشر جنرال مارک میلي ویلي چې د ځواکونو د وتلو د بهیر د خوندیتوب لپاره شپږ «B-52» ډوله لیرې واټنه بم غورځوونکې او ۱۲ «F-18» ډوله الوتکې ګمارل شوې دي.

له افغانستانه د امریکايي ځواکونو وتل د مې میاشتې له لومړۍ نېټې پیل شوي او د سپټمبر تر ۱۱مې به دوام کوي.

ښاغلي میلي ویلي، د دغو ځواکونو د وتلو د پروسې له پیل راهیسې وسله‌وال طالبان هره ورځ د افغان دولت پر اهدافو په اوسط ډول د ورځې له ۸۰ تر ۱۲۰ حملې کوي.

جرمني د افغانستان سولې په اړه د څو هېوادونو د استازو کوربه‌توب وکړ

جرمني کې د افغان سولې په اړه جوړه شوې غونډه

جرمني پرون د افغانستان د سولې په اړه د څو هېوادونو د استازو کوربه و.

دې غونډې ته چې په برلین کې وشوه د افغان سولې لپاره د امریکا خاص استازی زلمی خلیلزاد، د افغانستان لپاره د ناټو، ملګرو ملتونو، بریتانیا، جرمني، فرانسې، ناروې او ایټالیا خاص استازي/سفیران ورغلي وو.

د جرمني د بهرنیو چارو وزارت سکرتر میګوېل بِرګِر په خپل ټویټر لیکلي "په دې حساسه مرحله کې د افغانستان د سولې د پروسې په ملاتړ د همفکرانو ترمنځ د بحثونو او نږدې همغږیو دوام ډېر مهم دی."

د افغانستان د سولې په اړه داسې وخت دا غونډه شوې چې د مې په لومړۍ له افغانستانه د امریکا او ناټو ځواکونو وتل پیل شوي او تمه ده سپټمبر په ۱۱ پای ته ورسیږي.

په کور دننه هم د افغان دولت او طالبانو تر منځ جګړې تر بل هر وخت زیاتې شوي.

د نعمت روان وژنې ته د امرالله صالح غبرګون: طالبانو یو بل ناوړه کار وکړ

د افغانستان ولسمشر لومړی مرستیال امرالله صالح

د افغان خبریال نعمت روان د وژنې په غبرګون د ولسمشر لومړي مرستیال امرالله صالح ویلي "طالبانو یو بل ناوړه کار وکړ".

صالح نن سهار په خپل ټویټر دا خبره لیکلې ده.

هغه زیاته کړې چې طالبان له ازادیو وېرېږي که هغه د بیان، فکر، انتخاب، ژوندانه یا د پوښتنې ازادي ده.

نعمت روان پرون د کندهار په ۱۴مه ناحیه کې په یوه هدفي برید کې ووژل شو.

طالبانو ویلي چې د روان په وژنه کې دوی لاس نه‌لري.

خو د حکومت د اطلاعاتو او رسنیو د مرکز مشر او د نعمت روان نږدې خپلوان دوا خان مینه‌پال د طالبانو ډله تورنوي چې له کلونو راهیسې په دغسې وژنو کې ښکېل دي.

نعمت روان پخوا له طلوع‌نیوز ټلوېزیون سره د خبریال او ویاند دنده مخته وړه او تازه په مالیې وزارت کې د مطبوعاتو امر ټاکل شوی و.

کونړ کې يو ځانمرګی هدف ته له رسېدو مخکې په چاودنه کې ووژل شو

ارشیف، کونړ کې یو شمېر افغان ځواکونه

د کونړ په مرکز اسعداباد کې يو ځانمرګی بریدګر هدف ته له رسېدو مخکې په چاودنه کې وژل شوی دی.

دا خبره د کونړ امنیه قوماندان سمونوال محمد یوسف مظلومیار ازادي راډیو ته وکړه.

ښاغلی مظلومیار وايي: "يو تن ځانمرګى چې غوښتل يې د ګڼې ګوڼې څخه په ډک ځاي کې چاودنه وکړي، هدف ته له رسېدو وړاندې ورسره چاودېدونکي موادو چاودنه کړې، خپله وژل شوى او يو بل کس چې ياد ځانمرګی يې د هدف په لور روان کړى و، نيول شوى."

د روژې په مياشت کې دا دوهم ځانمرګى دى چې کونړ کې هدف ته له رسېدو وړاندې پرې خپل چاودېدونکي مواد چاودنه کوي له‌منځه ځي او نور چاته په‌کې زيان نه‌رسېږي.

نور راوښيه

XS
SM
MD
LG