د لاسرسۍ وړ لېنکونه

تازه خبر
سه شنبه ۲۱ غویی ۱۴۰۰ کابل ۰۵:۵۹

افغانستان

اشرف غني: له امریکا او ناټو سره دوه اړخیز امنیتي تړونونه پر ځای دي

د افغانستان جمهور رئیس محمد اشرف غني

افغان ولسمشر اشرف غني وایي، د امریکا له متحده ایالاتو او ناټو سره‌یې دوه اړخیز امنیتي تړونونه پر ځای دي او نړیوالو متحدانو ورته ډاډ ورکړی چې د افغان امنیتي ځواکونو د تمویل تجهیز او روزنې په چارو کې به همکاري ته دوام ورکړي.

ولسمشر غني دغه څرګندونې نن په امنیتي غونډه کې کړي چې د وینا دغه لنډه برخه‌یې ارګ په خپله وېب‌پاڼه کې خپره کړې ده.

ولسمشر غني له دې مخکې پرون له امریکایي سي‌اېن‌اېن ټلوېزیون سره په مرکه کې وویل چې له افغانستانه د امریکایي ځواکونو وتلو موږ ته د دې فرصت رامنځته کړی چې له سره محاسبه وکړو او د طالبانو او پاکستان لپاره‌یې هم د انتخاب وخت.

ولسمشر غني وویل: "د پاکستان لپاره د انتخاب وخت رارسېدلی. ایا دا هېواد غواړي چې د سوله‌ییزې اسیا په اتصال کې د یوه نړیوال لوبغاړي په توګه خپل رول ولوبوي یا د ګډوډي لاره غوره کوي؟"

ولسمشر غني طالبان هم ورته انتخاب ته راوبلل او زیاته‌یې کړه، د طالبانو هغه ستره پلمه چې جګړه د دې لپاره کوي چې له افغانستانه نړیوال ځواکونه وباسي، نوره اعتبار نه‌لري.

د غني په وینا په افغانستان کې جګړه له مذهبي پلوه نوره نه‌شي توجیه کېدای او سیاسي روغه جوړه یوه حتمي چاره ده. ښاغلي غني وویل، اوس پر طالبانو او د هغوی پر ملاتړو پورې تړلې چې کومه لاره غوره کوي.

طالبانو او پاکستاني چارواکو تر اوسه د افغان ولسمشر د دغو څرګندونو په اړه تبصرې نه‌دي کړي.

د ورځې تازه خبرونه دلته ولولئ

د نړۍ د نوموتي بوکسر محمد علي کلې دوهمه مېرمن کابل ته راغلې

د نړۍ د نوموتي بوکسر محمد علي کلې دوهمه مېرمن خلیله علي کابل کې د فوټبال له یو شمېر ښځینه لوبغاړو سره د لیدو پر مهال

د نړۍ د نوموتي بوکسر محمد علي کلې دوهمه مېرمن خلیله علي نن کابل ته راغله.

د افغانستان د فوټبال فدراسیون ویاند عزیز مشعوف نن ازادي راډيو ته وویل، اغلې علي د افغانستان فوټبال فدراسیون له مشر یوسف کارګر سره لیدلي او په یو لړ مسایلو یې ورسره خبرې کړې دي.

ښاغلی مشعوف وايي، په ۲۰۱۳ کال کې هغه مهال چې افغانستان د سوېلي اسیا د فوټبال سیالیو اتل شو، یو شمېر خیرخواه کسانو چې محمد علي کلې هم د دوی له ډلې و په افغانستان کې یې د ویکتور (بریا) په نوم د یوه ورزشي سټدیوم د جوړېدو خبره وکړه.

نوموړې وايي، د محمد علي کلي مېرمن اغلې علي د سفر هدف هم د همدغې پروژې پیل دی.

د ښاغلي مشعوف د معلوماتو پر بنسټ، دغه پروژه له تېرو اتو کلونو راهیسې د نامعلومو دلایلو په خاطر ځنډول شوې وه.

د فوټبال فدراسیون د معلوماتو له مخې، دغه ورزشي ستډیوم به د کابل په پغمان ولسوالۍ کې په شاوخوا ۸۰۰ جریبه ځمکه کې جوړ شي.

لوګر چارواکي: افغان سرتیرو لس طالبان وژلي او ۴ نور ژوبل دي

ارشیف، عکس تزئیني بڼه لري

د لوګر ولایت امنیتي چارواکي وايي، تېره شپه ددې ولایت مرکز ته څېرمه لس وسله وال طالبان وژل شوي او څلور نور ټپیان شوي دي.

د لوګر د پولیسو ویاند ګل حیدر احمدي وایي"تېره شپه د افغان ځواکونو په خپل هوایي برید کې هغه وسله وال په نښه کړل چې غوښتل یې د مرکز پل علم اړوند پر امنیتي پوستو بریدونه وکړي چې په پایله کې ۶ وسله وال طالبان ووژل شول او درې نور ټپیان شول."

احمدي همداراز زیاتوي چې تېره ورځ د مرکز اړوند سیمه کې په وسله والو طالبانو خپل ماین چاودلی چې له امله یې درې تنه وژل شوي او یو تن یې ټپي شوی دی.

وسله والو طالبانو که څه هم تر اوسه د دې دواړو پېښو په اړه رسنیو ته څه نه دي ویلي، خو پر ټوېټر یې له افغان لوري ور اوښتي تلفات ناسم بللي.

دا په داسې حال کې ده چې له تېرو څو اوونیو راهیسې د لوګر په مرکز او ولسوالیو کې هدفي وژنو او جګړو زرو اخېستی چې په وروستي برید کې چې تېر مازدیګر وشو، د پل علم ښار د لومړۍ حوزې اوسنی او پخوانی دواړه امرین ووژل شول او دوه سرتیري ټپیان شول.

د پکتیا والي: زرمت کې ۱۱ طالبان وژل شوي او ۳ نور ژوبل دي

ارشیف، پکتیا کې یو شمېر طالبان

د پکتیا والي وايي، د دې ولایت په زرمت ولسوالۍ ۱۱ وسله وال طالبان وژل شوي او درې نور ټپیان دي.

د پکتیا والي محمد حلیم فدایي نن د سې شنبې(د غويي ۲۱مه) په ورځ رسنیو ته وویل، د دې ولایت د زرمت ولسوالۍ په سهاکو سیمه کې د افغان ځواکونو په هوایي برید کې ۵ وسله وال طالبان وژل شوي او سراچه ډوله موټر یې له منځه تللی دی.

فدايي زیاته کړه: "په وژل شویو طالبانو کې ماین جوړونکی او د لایرزي وسلې د مسوول تر څنګ د پنځه زره بندیانو په لېست کې له بنده خوشې شوي طالب وسله وال هم شامل دي چې جګړې ته بېرته ګرځیدلي وو."

د پکتیا والي فدایي همدا راز وویل، د زرمت ولسوالۍ په شملزیو او د سیدکرم ولسوالۍ په نري خېلو جومات کې په وسله والو طالبانو خپل ماینونه چاودلي چې په پایله کې یې شپږ وسله وال وژل شوي او درې نور ټپيان دي.

وسله والو طالبانو تر اوسه د دې پېښو په تړاو رسنیو ته څه نه دي ویلي.

زلمي خلیلزاد د دایمي اوربند غوښتنه کړې ده

د افغانستان د سولې لپاره د امریکا ځانګړی استازی زلمی خلیلزاد

د افغانستان د سولې لپاره د امریکا ځانګړي استازي زلمي خلیلزاد د اختر په درې ورځو کې د اوربند هرکلی کړی او د دایمي اوربند غوښتنه یې کړې ده.

ښاغلي خلیلزاد په ټویټر کې د سولې د خبرو په سرعت ټینګار کړی، څو د ده په وینا دا بې معنی جګړه پای ته ورسېږي.

تر دې مخکې د امریکا د بهرنیو چارو د وزارت ویاند نېډ پرایس په واشنګټن کې د دوشنبې په ورځ خبري غونډې ته د خبرو پر مهال د اختر د درې ورځني اوربند هرکلی وکړ او له طالبانو یې وغوښتل چې دا اوربند وغځوي.

ښاغلي پرایس له طالبانو او افغان مشرانو وغوښتل چې په جدي توګه د سولې په بهیر کې ښکېل شي، څو په راتلونکي کې افغانان د ترهګرۍ له شره خلاص شي او له بې مفهومه تاوتریخوالي پرته ژوند وکړي.

خوست والي: دې اوونۍ کې زر جوړ شوي جوماتونه پرانیستل کېږي

په خوست کې نمونوي جومات ګټې اخیستنې ته وسپارل شو

د سې شنبې په ورځ د خوست د ازادۍ مېنې په ساحه کې یو نمونوي دوه پوړیز جومات او د فاتحو سالون له جوړېدو وروسته ګټې اخېستنې ته وسپارل شو.

دا ډول جوماتونه او د فاتحو سالونونه د افغان ولسمشر په لارښوونه د هېواد په ۳۴ ولایتونو کې جوړ شوي چې د یوې اوونۍ په موده کې به د ټولو پرانېسته وشي.

چارواکې وايي، جومات په یو وخت کې د ۲ زره لمونځ کوونکو او د فاتحې سالون په یو وخت کې د زرو کسانو ظرفیت لري چې ټول ورباندې ۵۰ میلیونه افغانۍ لګښت شوی دی.

د خوست د حج او اوقافو رئیس مولوي اظهارالدین ازادي راډیو ته وویل، دا ډول جوماتونه او د فاتحې سالونه چې ټول په یو ډیزاین جوړ شوي، د ولسمشر غني داسې اقدام وو چې له دې مخکې کوم ولسمشر نه وو کړی.

نوموړي له ولسمشر غني مننه وکړه چې په هېواد کې يې دیني اړخ ته پاملرنه ډېره کړې او دا اړخ يې قوي کړی دی.

د جومات او فاتحې سالون د پرانیستې په مراسمو کې خوست والي مهمند کټوازي وویل، په دې اوونۍ کې د افغان حکومت له خوا جوړ شوي زر جوماتونه پرانیستل کیږي.

دده په وینا، په دې سره به په دې ځای کې خلکو ته په یو ښه چاپیریال کې د عبادت کولو او فاتحې اخیستلو زمینه برابره وي.

د خوست دیني علماء دیني سپيڅلتیاوو ته پاملرنه د حکومت او ولس تر منځ د اړیکو او باور په ډېریدو کې اغېزمن بولي.

د علماوو شورا رئیس مولوي شاه محمد محمدي وايي، حکومت د هېواد په کچه د زرو جوماتونو د جوړولو په دې اقدام سره وښوده چې علماوو، دیني مراکزو او د خپلو وطنوالو دیني سپيڅلتیاوو ته پوره درناوی لري: "دا چې دولت دا مرکزونه جوړ کړل ويې ښوده چې دا اسلامي دولت دی، اسلام ته، دیني مقدساتو ته، علماوو ته او دیني مراکزو ته دوی احترام لري، خپله دا کار د دولت او ولس په منځ کې د ملي یووالي، اسلامي روحیې قوي کولو لپاره دېر ښه او مناسب کارونه وو، چې ترسره شول."

د افغانستان د یو شمېر نورو سیمو په شان په خوست کې هم د لږ شمېر راجسټر شویو جوماتونو او دیني مرکزونو پرته زرګونه جوماتونه او سلګونه مدرسې، ملا امامان، زده کوونکي او طالب العمان يې ثبت او راجسټر نه دي.

کارونو ته د جذب لپاره د طالب العمانو د تعلیمي اسنادو ارزیابي او د هغوی درجه بندي تر اوسه هم حکومت لپاره له مهمو ستونزو څخه ګڼل کیږي.

اقتصاد وزارت ۵ میاشتو کې ۱۶۲ غیر دولتي موسسو ته د فعالیت جوازونه ورکړي

د افغانستان د اقتصاد وزارت

د افغانستان د اقتصاد وزارت وايي چې په وروستیو ۵ میاشتو کې یې شااوخوا ۱۶۲ غیر دولتي موسسو ته چې ۱۵۴ کورنۍ او ۸ بهرنۍ وې د فعالیت جوازونه ورکړي دي.

د دغه وزارت ویاندې نوریې نضهت نن سې شنبه (د غويي ۲۱مه) ازادي راډیو ته وویل په پام کې ده چې دغې موسسې د حکومتوالۍ او عامه خدمتونو، د اقتصادي او کرنیزو چارو، ښوونې او فرهنګ، خوندیتوب او عامه تغذیې په سکتورونو کې یو شمېر پروژې تطبیق کړي دي.

نوموړې زیاتوي، دغو موسسو ته د جواز د ورکولو له درکه دوه میلیونه او ۶۰۹ زره افغانۍ د اقتصاد وزارت پر عوایدو اضافه شوي دي.

د اقتصاد وزارت وايي، هرکال کې په اوسط ډول له دوی سره ۲۵۰ کورنۍ او بهرنۍ موسسې ځانونه ثبتوي.

د دغه وزارت د چارواکو په وینا دم ګړۍ ۱۹۴۴ کورنۍ او ۲۶۸ بهرنۍ موسسې له اقتصاد وزارت سره ثبت دي.

د ګازو او تیلو ټانکرونو سوځېدل؛ الکوزی: ۲۰۰ میلیونه ډالره زیان رسېدلی

ارشیف، د کابل په شمال کې د ټانکرونو د سوځیدو د پېښې عکس

د افغانستان د سوداګرۍ خونو فدارسیون وايي چې په بېلابېلو ولایتونو کې د ګازو او تیلو ټانکرونو د سوځېدو په پېښو کې خصوصي سکتور ته شااوخوا ۲۰۰ میلیونه ډالره زیان رسېدلی.

د سوداګرۍ خونو فدارسیون مرستیال خان جان الکوزي نن سې شنبه (د غويي ۲۱مه) ازادي راډیو ته وویل چې له زیان سربېره په بازار کې د ګازو او تیلو بیې هم لوړې شوي او د مواد کمښت رامنځته شوی.

الکوزي زیاته کړه: "د پانګونې خونې له لوري چې کوم وروستی راپور خپور شوی، د ټولو اور لګېدنو زیان شااو خوا ۲۰۰ میلیونو ډالرو ته رسېږي."

نوموړی زیاتوي، په دې سره د موادو په رسولو کې ځنډ رامنځ ته شوی.

د افغانستان د خونو فدارسیون وايي، په نړیوال معیار برابر د سونګ توکو او ټانکر موټرو لپاره د تم ځای نه شتون او پرله پسې اورلګېدنو ته په کتو اوس هم د دې احتمال شته چې ورته پېښې بیا تکرار شي.

دا په داسې حال کې ده چې څه موده وړاندې د هرات په اسلام قلعه، دوه ځله په فراه، کندهار، دوه ځله د کابل په دروازو او تر ټولو وروستۍ د اورلګېدنې پېښه بېګاه شپه په بغلان کې وه چې د ښاغلي الکوزي خبره په دې ټولو پېښو کې ۲۰۰ د ګازو او تیلو ټانکرونه سوځېدلي او زيانمن شوي دي.

تخار چارواکي: سیلابونو د ۴ کوچنیانو په ګډون ۶ کسان مړه کړي

ارشیف، افغانستان کې راغلي سیلابونه ګڼ زیانونه اړولي دي

د تخار ولایتي چارواکي وايي چې تېر ماښام په فرخار تنګي سیمه کې د سېلابونو له کبله د څلورو کوچنیانو په ګډون شپږ کسان مړه شوي دي.

د تخار د طبیعي پېښو پر ضد د مبارزې د ادارې مشر فرید نېکپور ازادي راډيو ته وویل چې د دې سېلابونو له کبله لویې لارې هم بندې شوي دي: "د ورسج، فرخار او تالقان ترمنځ لارې بندې دي. د فرخار، تالقان او بدخشان پر لار هم زموږ کار روان دی چې لاره پرانیزي. وسایل سیمې ته استول شوي او د سروې ټیمونه هم په ساحه کې دي."

ښاغلی نېکپور زیاتوي چې دې سېلابونو د اوبو څو کانالونه او پراخې کرنیزې ځمکې له منځه وړي او د فرخار تنګي په شاخان سیمه کې یې یو پُل هم ویجاړ کړی دی.

نن ټول افغانستان کې د خونړیو پېښو په خاطر ملي ویر اعلان شوی

د ویر په پار د افغانستان ملي بیرغي نیم ځوړند دی

نن سې شنبه (د غويي ۲۱مه) په ټول افغانستان کې د وروستیو خونړیو پېښو په خاطر ملي ویر اعلان شوی.

د افغانستان حکومت ملي ویر وروسته له هغې اعلان کړ چې د کابل په دشت برچي کې په یوه خونړي برید کې په لسګونو د ښوونځي زده کوونکې او له هغې مخکې د لوګر په مرکز پل علم کې په ورته خونړي برید کې په لسګونو د دولسمو ټولګیو هغه فارغان ووژل شول چې د کانکور په آزموینه کې د ګډون لپاره له ازرې ولسوالۍ دې ښار ته ورغلي وو.

ولسمشر اشرف غني د تېرې یکشنبې په ورځ د ملي ویر د ورځې د اعلانولو پر مهال وویل چې د دې پېښو د مړیو او ټپیانو له کورنیو سره په غم او درد کې ځان شریک بولي او په همدې خاطر د سې شنبې ورځ ملي ویر اعلانوي چې ټول هېواد کې به د قربانیانو لپاره د فاتحې مراسم ترسره کېږي.

دغه راز به نن په کوردننه په دولتي ادارو او بهر کې د افغانستان په ډیپلوماتیکو نمایندګیو کې د افغانستان بیړغ نیم ځوړند وي.

امریکا: طالبان دې ۳ ورځنی اوربند وغځوي

ارشیف، پکتیا کې یو شمېر طالبان

د امریکا متحدو ایالاتونو د طالبانو له خوا د درې ورځو لپاره د اوربند د اعلانولو هرکلی وکړ او له دې ډلې یې وغوښتل چې هغه وغځوي.

د امریکا د بهرنیو چارو د وزارت ویاند نېډ پرایس پرون دوشنبه (د غويي ۲۰مه) په واشنګټن کې وویل، له طالبانو او له افغان مشرانو غواړي چې په جدي توګه د سولې په پروسه کې ښکېل شي، څو دا مسئله یقیني شي چې د افغانستان خلک په راتلونکي کې د ترورېزم له شره خلاص او له بې مفهومه تاوتریخوالي پرته ژوند وکړي.

ښاغلي پرایس دغه راز وویل چې متحده ایالات په کابل کې د نجونو پر ښوونځي د شنبې د ورځې خونړۍ برید چې لسګونو زده کونکو ته په کې مرګ ژوبله واوښته، غندي خو دا هم څاري چې څوک د دې برید مسوول دي.

پرایس زیاته کړه، تر دې مخکې د دا ډول حملو مسوولیت د اسلامي دولت ډلې یا داعش اخیستی دی.

طالبانو هم دغه برید غندلی او په هغه کې یې خپل لاس لرل رد کړي دي.

د کوچني اختر په مناسبت د طالبانو له خوا د درې ورځني اوربند په غبرګون کې د افغانستان حکومت هم له خپله اړخه ورته اوربند اعلان کړی دی.

کورنیو چارو وزارت: هغه کسان نښه کېږي چې د دښمن په ګټه تبلیغات کوي

د افغانستان د کورنیو چارو وزارت ویاند طارق ارین

د افغانستان د کورنیو چارو وزارت وایي، د یو شمېر هغو کسانو د په نښه کولو لپاره یې هڅې پیل کړي چې د دې وزات په وینا په رسنیو کې د دښمن په ګټه او د ملي امنیت ضد تبلیغات کوي او له دښمن سره اړيکې پالي.

د دې وزارت ویاند طارق ارین تېره شپه ازادي راډیو ته وویل، دغه هڅې یې د رسنیو له مسوولینو سره په همغږۍ پیل کړي دي: "دغه اقدام د هغو کسانو په اړه دی چې له دښمن سره اړیکې لري یا یې نفوذي کسان دي، خو په عین حال کې د بیان د ازادۍ اصول به هم په پام کې نیول کېږي."

د ښاغلي ارین په وینا دوی د هغو کسانو لټه کوي چې د خبریالانو په نوم د ملي ګټو او ملي امنیت ضد فعالیتونه سرته رسوي.

تر دې مخکې وسله والو طالبانو هم یو شمېر رسنۍ تورنۍ کړې وې چې بې پرې راپورونه دې نه ورکوي، بلکې د افغانستان د ملي امنیت د ادارې په ګټه پېښې تر خبري پوښښ لاندې نیسي چې په کور دننه د رسنیو د ملاتړ ډلو او نړیوالو پراخ غبرګونونه یې راو پارول.

چارواکي: د هرات ـ کندهار لویه لاره د ټرافیکو پر مخ پرانیستل شوه

ارشیف

د هرات چارواکي وایي، د هرات ـ کندهار لویه لاره له پرون دوشنبې(د غويي ۲۰مه) غرمې راهیسې د ټرافیکو پر مخ پرانیستل شوې ده.

د هرات د والي ویاند جیلاني فرهاد وویل، د دې ولایت د ادرسکن ولسوالۍ اوسېدونکو د مخدره موادو د قاچاق په تور د یوه کس د نیول کېدو او کابل ته د هغه د استولو په اعتراض کې دغه لاره سهار مهال تړلې وه.

ښاغلي فرهاد زیاته کړه: "د ادرسکن ولسوالۍ د خلکو استازیو نن وروسته له هغې چې خپلې غوښتنې یې له والي سره مطرح کړې او والي هم ورسره ژمنه وکړه چې غوښتنې به یې له اړوندو مسوولو چارواکو سره شریکې کړي، له اعتراض څخه لاس واخیست."

د هرات ادرسکن ولسوالۍ د هرات ښارد ختیځ په ۴۵ کیلو مترۍ کې د هرات – کندهار د لویې لارې پر سر پرته ده.

په لوګر کې د لومړۍ امنیتي حوزې امر شاهپور احمدزی ووژل شو

په لوګر کې د لومړۍ امنیتي حوزې امر شاپور احمدزی

په لوګر کې د لومړۍ امنیتي حوزې امر ووژل شو.

د لوګر د والي ویاند دیدار لونګ ازادي راډیو ته تأیید کړه چې څارمن شاهپور احمدزی نن مازدیګر د لوګر په مرکز پل علم ښار کې هغه مهال ترور شو چې نوموړي په ښار کې د امنیت لپاره چک پاینټ اچولی و.

د لوګر امنیه قومانداني هم پېښه تأییدوي او وایي، په دې برید کې له نوموړي سره د اولې حوزې پخوانی امر او دوه پولیس سرتېري هم ټپيان شوي دي.

دوی وایي، د برید عاملین وسله‌وال طالبان و چې د پېښې له ځایه په تېښته بریالي شوي دي.

شاهپور احمدزي له دې وړاندې له تېرو څو کالونو راهیسې د لوګر د پولیسو د ویاند په توګه دنده ترسره کوله او تازه له تېرو څو میاشتو راهیسې د اولې حوزې امر ټاکل شوی و.

وسله‌والو طالبانو تر اوسه په دې اړه څه نه‌دي ویلي.

عبدالله او باجوه د سولې د معنی لرونکو بین‌الافغاني خبرو پر پیل خبرې کړي

د افغانستان د ملي مصالحې عالي شورا مشر عبدالله عبدالله د پاکستان د پوځ له لوی درستیز جنرال قمر جاوېد باجوه سره د لیدنې پر مهال

د افغانستان د ملي مصالحې عالي شورا مشر عبدالله عبدالله د پاکستان د پوځ له لوی درستیز جنرال قمر جاوېد باجوه سره د سولې د معنی لرونکو بین‌الافغاني خبرو پر پیل خبرې کړې دي.

د دوی ترمنځ نن په کابل کې د سپېدار ماڼۍ دننه ملاقات شوی دی.

ښاغلي باجوه ویلي، د افغانستان د ستونزې یوازنی حل یوه سیاسي جوړجاړي ته رسېدل او ټاکنې دي.

د راپورونو له مخې د بریتانیا د پوځ لوی درستیز هم کابل ته د ښاغلي باجوه د سفر ملګری دی.

دا خبره په اسلام‌اباد کې د ازادي راډیو خبریال د خپلو سرچینو په حواله وکړه.

معلومه نه‌ده چې دغو پوځي چارواکو له ولسمشر محمد اشرف غني سره هم کتلي او که نه.

د جاپان صدراعظم: هېڅکله د المپیک لوبې راته لومړیتوب نه‌لري

د جاپان صدراعظم یوشیدي سوګا

د جاپان صدر اعظم وایي، د توکیو د المپیک لوبو د ترسره کولو په خاطر باید خلک له خطر سره مخامخ نه‌کړي.

یوشیدي سوګا نن (د مې په ۱۰مه) وویل، هېڅکله د المپیک لوبې ورته لومړیتوب نه‌لري، بلکې په خبره‌یې له کرونا د خپلو اتباعو د ساتنې په فکر کې دی.

ټاکل شوې د توکیو د المپیک سیالۍ چې له مخکې نه یو کال ځنډېدلې دي، سږکال د جولاۍ له ۲۳مې د اګسټ تر ۸مې پورې ترسره شي.

په همدې حال کې په جاپان کې شوې یوه نظرپوښتنه ښيي چې د دغه هېواد شااوخوا ۶۰ فیصده خلک د المپیک لوبو د لغوه کولو غوښتنه کوي.

روېټرز خبري اژانس ویلي، جاپان کې څه باندې درې لکه لاسلیکونه راټول شوي چې د المپیک لوبو مخنیوی وکړي.

نور راوښيه

XS
SM
MD
LG