د لاسرسۍ وړ لېنکونه

تازه خبر
پنجشنبه ۲۳ غویی ۱۴۰۰ کابل ۱۲:۵۶

نړۍ

د اروپایي ټولنې د بهرنیو چارو وزیران پر روسیې د چک د تور په اړه بحث کوي

پراګ کې د روسیې سفارت مخ ته د راټول شویو مسکو پلویو معترضینو له ډلې د یوې په لاس کې د اروپايي ټولنې بیرغ

ټاکل شوې چې د اروپایي ټولنې د بهرنیو چارو وزیران نن په غونډه کې د چک جمهوریت د هغې ادعا په اړه بحث وکړي چې د روسیې پوځي جاسوسان‌یې څو کاله مخکې د مهماتو د یوه زېرمتون په چاودنه کې په لاس لرلو تورن کړي دي.

په دې چاودنه کې چې په ۲۰۱۴ کال د چک په ختیځه د زلین سیمې په وربیتیڅه کې شوې وه، دوه تنه ووژل شول.

د چک جمهوریت هغه روسي پوځي جاسوسان په دې چاودنه کې په لاس لرلو تورن کړي چې په ۲۰۱۸ کال په بریتانیا کې د روسیې د پخواني جاسوس سرګي سکریپال او د هغه لور د مسموم کېدو په پېښه کې په لاس لرلو تورن شوي دي.

وروسته له هغې چې د چک جمهوریت استخباراتو د روسیې پوځي جاسوسان په دې چاودنه کې په لاس لرلو تورن کړل او ۱۸ روسي ډیپلوماتان‌یې د جاسوسۍ په تور له خپلې خاورې وایستل، مسکو په ورته اقدام کې د دې هېواد ۲۰ ډیپلوماتان له خپلې خاورې وایستل.

د روسیې د بهرنیو چارو وزارت پرون وویل، چکي ډیپلوماتانو ته‌یې ویلي چې د دوشنبې د ورځې تر پایه له روسیې ووځي.

د دواړو هېوادونو ترمنځ دغه کړکېچ داسې مهال زیات شوی چې په پام کې ده د اروپایي ټولنې لوړپوړي ډیپلوماتان نن په غونډه کې په دې چاودنه کې د روسیې د لاس لرلو د ادعاوو په اړه بحث وکړي. هغه ادعا چې مسکو بې‌اساسه او هغه‌یې پر پراګ د واشنګټن د نفوذ نښه بللې ده.

د چک جمهوريت صدراعظم اندرې بابیش وویل، له خپلې خاورې د روسي ډیپلوماتانو د ایستلو پرېکړه‌یې د هغو کره شواهدو پر اساس کړې چې د چک د استخباراتو او امنیتي ادارو پلټونکو وړاندې کړې دي.

د ورځې تازه خبرونه دلته ولولئ

حماس ډلې نن پر اسرائیل سلګونه توغندي وویشتل

د اسرائیل او فلسطینیانو ترمنځ نښته

حماس ډلې نن سهار پر تل‌ابیب او د اسرائیل پر نورو برخو په سلګونه توغندي وایشتل او اسرائیل ژمنه وکړه چې پر غزې به هوایي بریدونو ته دوام ورکړي.

په عین حال کې نړیوالو په سیمه کې د رامنځته شوي کړکېچ چې په وروستیو څو کلونو کې یې ساری نه‌دی لیدل شوی، د کمېدو غوښتنه کړې ده.

د امریکا ولسمشر جو بایډن د اسرائیل له صدراعظم بنیامین نتانیاهو سره په ټیلیفوني خبرو کې د اسرائیل د امنیت او له ځان څخه د دفاع د حق کلک ملاتړ کړی او له غزې یې توغندویي بریدونه غندلي دي.

د سپینې ماڼۍ په وینا بایډن ویلي چې دی هیله‌من دی دغه حالت هر څومره ژر چې کېدای شي ختم شي، خو اسرائیل حق لري چې له خپل ځانه دفاع وکړي.

د اسرائیل صدراعظم داسې کومه نښه نه‌ده ښودلې چې ګواکې نوموړی دې اوربند ته بېړه ولري.

نتانیاهو ژمنه کړې چې په غزه کې به د حماس او نورو سخت دریځو ډلو د پوځي وړتیاوو د کمزوري کولو لپاره اقداماتو ته دوام ورکړي.

حماس ډلې هم د جګړې دوام ته لېوالتیا ښکاره کړې او د دې ډلې د سیاسي چارو مشر اسماعیل هنیه ویلي چې له دښمن سره مقابله پای نه‌لري.

د غزې د روغتیایي چارواکو په وینا د مې له ۱۰مې راهیسې چې د دواړو لورو ترمنځ نښتې پیل شوي، په غزه کې لږترلږه ۵۶ فلسطینیان وژل شوي دي.

په وژل شویو کې ۱۴ ماشومان هم شامل دي.

د اسرائیل روغتیایي چارواکو خپل لور ته د ۷ کسانو د وژل کېدو خبره کړې ده.

امریکا، چین د اویغور مسلمانانو او نورو مذهبي لږکیو په ډلوژنې تورن کړ

د امریکا او چین ملي بیرغونه

د امریکا د بهرنیو چارو وزارت چین د اویغور مسلمانانو او نورو مذهبي لږکیو په جینوسایډ یا ډلوژنې تورن کړ.

دې وزارت په نړۍ کې د مذهبي ازادیو په اړه په کلني راپور کې چې پرون چهارشنبه‌یې خپور کړی، دغه‌راز ایران او روسیه په نړۍ کې له مذهبي ازادیو ستر سرغړوونکي بللي دي.

د بهرنیو چارو وزیر انتوني بلېنکن په نړۍ کې د مذهبي ازادیو په اړه د دغه کلني راپور څخه په استفادې غواړي د هغو هېوادونو نومونه په ډاګه کړي او هغوی وشرموي چې نوموړی یې له مذهبي ازادیو ستر تېري کوونکي بولي.

ښاغلی بلېنکن په نړۍ کې مذهبي ازادۍ نړیوال بشري حق بولي.

د امریکا د پخواني ولسمشر ډونالد ټرمپ ادارې په تېره جنوري میاشت کې ویلي و چې په شینجن ایالت کې د چین سیاستونه د بشریت ضد جنایت او نسل وژنه ګڼل کېږي، هغه دریځ چې د بلېنکن په خبره د بایډن اداره هم وسره موافقه ده.

بلېنکن وویل، چین په پراخه پیمانه مذهبي بیانونه جرم بولي او د اویغور مسلمانانو او نورو مذهبي او نورو لږکیو په وړاندې د بشریت ضد اعمال سر ته رسوي.

په دغه کلني راپور کې ایران، برما، روسیه، نایجریا او سعودي عربستان هم په نړۍ کې پر مذهبي ازادیو ستر تېري کوونکي په نښه شوي دي.

لاوروف ته د بلېنکن خبرداری: د بایډن اداره به د مسکو تجاوز بې‌غبرګونه پرېنږدي

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن خپل روسي سیال سرګي لاوروف ته ویلي چې د ولسمشر جو بایډن اداره به پر متحده ایالاتو او یا بل هر ځای د مسکو تجاوز بې‌غبرګونه پرېنږدي.

د امریکا د بهرنیو چارو وزارت ویاند نید پرایس وویل چې بلېنکن او لاوروف پرون چهارشنبه پر ټیلیفون خبرې وکړې او زیاته‌یې کړه چې د امریکا د بهرنیو چارو وزیر د ولسمشر بایډن هغه پرېکړه بیا تکرار کړه چې وایي امریکایي وګړي به خوندي کوي او د روسیې د هر هغه اقدام په وړاندې چې امریکا او یا یې متحدین زیانمن کړي، د خپلو ګټو دفاع کوي.

دا څرګندونې داسې مهال شوي چې په اوکراین کې دننه او شاوخوا ته د روسي ځواکونو د ځای پر ځای کېدو په ګډون پر یو شمېر مسایلو د واشنګټن او مسکو ترمنځ اړیکې ترینګلې دي.

تمه ده بلېنکن او لاوروف راتلونکې اوونۍ د ایسلند په ریکاویک ښار کې د یوې سرمشریزې په څنډو کې مخامخ سره وګوري.

انوشکا او کوهلي هند کې له کرونا ځپلو سره د مرستې د پیسو اندازه لوړه کړه

د بالیوود وتلې ستوري انوشکا شرما او مېړه‌یې ویرات کوهلي

د بالیوود وتلې ستوري انوشکا شرما او مېړه‌یې ویرات کوهلي له کرونا ځپلو سره د مرستې لپاره د راټولېدونکو پیسو اندازه لوړه کړه.

هندي رسنیو راپور ورکړی چې دغې جوړې مخکې د ۷ کروړه هندي روپیو د راټولېدو ژمنه کړې وه، خو اوس‌یې هدف ۱۱ کروړه ته لوړ کړ څو په خپل هېواد کې د کرونا ځپلو د ژغورنې لپاره وکارول شي.

انوشکا او مېړه‌یې د چهارشنبې په ورځ دا اعلان وکړ. دوی د دې کار لپاره له وړاندې کمپاین پیل کړی دی.

هند دا مهال د کرونا ویروس سخت ځپلی دی چې د وروستیو راپورونو له مخې په دې هېواد کې د 'کووېډ-۱۹' ناروغانو شمېر تر ۲۳ ملیون او ۳۴۰ زرو اوښتی دی. څه باندې ۲۵۴ زره کسان له همدې ناروغۍ په هند کې مړه شوي دي.

تاجکستان کې د سختو بارانونو له امله ځمکې ښویېدو ۹ تنه مړه کړي

د تاجکستان کولاب ښار کې د بارانونو له امله د ځمکې ښویېدل

د تاجکستان چارواکي وایي، د دې هېواد په لوېدیځ کې د سختو بارانونو له امله د ځمکې د ښویېدو په پېښو کې ۹ تنه مړه شوي دي.

د تاجکستان د بېړنیو حالاتو کمېټې نن په یوه بیان کې وویل چې د ځمکې ښویېدو له امله اته تنه د خاتلون سیمې په کولاب ښار او شمس‌الدین شاهین، واخش او کوشانیان سیمو کې مړه شوي او یو تن هم د دوشنبې په ۱۵ کیلومترۍ د حصار په ښارګوټي کې مړ شوی دی.

د بیان له مخې پرون دغو بارانونو په ځپل شویو سیمو کې د خلکو ډېرو کورونو، پلونو او نورو تأسیساتو او هم دولتي ودانیو ته زیان رسولی دی.

دغې کمېټې دغه‌راز په سیمه کې بل سبا د جمعې په ورځ د نورو بارانونو د اورېدو خبرداری هم ورکړی او له اوسېدونکو یې غوښتي چې په غرنیو سیمو کې دې د موټرو له تګ څخه ډډه وکړي.

د ناپیلیون کمیس او یو لیک بلجیم کې نندارې ته ایښودل شوی

د ناپیلیون بناپارټ

د ناپیلیون بناپارټ یو کمیس او یو لیک په بلجیم کې نندارې ته ایښودل شوی.

د راپورونو له مخې ناپیلون بناپارټ چې په ۱۹مه پیړۍ کې د فرانسې امپراطور و، دغه سپین رنګه او بې لستوڼو کمیس هغه مهال اغوست چې د اتلانتیک جنوب د سینټ ایلینا ټاپو کې یې په جلاوطنۍ کې ژوند کاوه.

هغه لیک هم چې نندارې ته وړاندې شوی د هغو څو محدودو لیکونو څخه یو دی چې ناپیلیون په لاس په انګریزي لیکلی.

تمه ده چې دغه لیک به د اکتوبر په ۲۷مه په لندن کې د خرڅلاو لپاره داوطلبي ته وړاندې شي.

د بریتانیا د واترلوی موزیم مسوولین وایي، د ناپیلیون بناپارټ لیک ښایي په ډېره لوړه بیه چې په تاریخ کې به یې ساری نه وي لیدل شوی، وپلورل شي.

تاتارستان کې پر ښوونځي برید؛ د ۹ کسانو مړي د دوی کورنیو ته سپارل شوي

تاتارستان کې د ښوونځي د برید په دې پېښه کې له شلو زیات کسان ټپیان شوي هم دي.

د هغو ۹ کسانو مړي د هغوی خپلو خپلوانو ته د ښځولو لپاره وسپارل شول چې د تاتارستان د مرکز پر یوه ښوونځي په برید کې وژل شوي وو.

مسطنتقین په دې اړه څېړنه کوي چې ولې د دې ښوونځي زده کوونکي او ښوونکي د حملې لپاره په نښه شوي وو او عاملان یې څوک دي؟

په دې پېښه کې له شلو زیات کسان ټپیان شوي. ډېری قربانیان د ښوونځي زده کوونکي او مسلمانان دي.

وژل شوي څلور هلکان او درې نجونې، ټول د اتم ټولګي زده کوونکي بلل شوي او یو ښوونکی او د ښوونځي یو بل کار کوونکی هم په وژل شوېو کې شامل دي. یو ۱۹ کلن کس د دغې حملې په تور نیول شوی او ویل شوي چې هغه مخکې له دې چې په ښوونځي کې دننه ډزې پیل کړي، په وره یې کې یې یوه وسیله چاودلې وه.

د دغې پېښې په خاطر نن په تاتارستان کې ملي ویر اعلان شوی.

د ایران پخوانی ولسمشر احمدي نژاد راتلونکو ټاکنو ته کاندید شوی

د ایران پخوانی ولسمشر محمود احمدي نژاد

د ایران پخواني ولسمشر محمود احمدي نژاد د درېیم ځل لپاره د ولسمشرۍ په راتلونکو انتخاباتو کې ځان کاندید کړی او نوم لیکنه یې کړې ده.

د ایران دولتي ټلویزیون نن چهارشنبه (د مې په ۱۲مه)خبر ورکړ چې احمدي نژدا د خپلو ملاتړو په ملتیا د کورنیو چارو وزارت ته لاړ او د نوم لیکنې لپاره یې لازمې فورمې ډکې کړې.

۶۴ کلن احمدي نژاد چې ورته د یوه تُندلاري محافظه کار په توګه کتل کېږي، په دې وروستیو کې یې په واکمن نظام انتقادونو ته مخه کړې ده.

نوموړي مخکې د ۲۰۰۵ نه تر۲۰۱۳ کلونو پورې دوه دورې د ولسمشر په توګه دنده ترسره کړې.

د هغه په دوره کې ایران د خپل اټمي پروګرام پر سر په ښکاره له لویدیځ سره په تقابل کې ولوېد.

د احمدي نژاد د ۲۰۰۹ کال لانجمن انتخابات هم چې نوموړی یې ګټونکی اعلان شوی و، په دې هېواد کې پراخې مظاهرې راپارولې وې چې د ۱۹۷۹ کال د اسلامي انقلاب وروسته یې ساری نه وو لیدل شوی.

د ایران اوسنی ولسمشر حسن روحاني نه شي کولی بیا ځان کاندید کړي ځکه دا یې د ولسمشرۍ دوهمه دوره ده.

ټاکل شوې د ایران د ولسمشرۍ انتخابات د جون په اتلسمه ترسره شي.

روسیې په مسکو کې د رومانیا سفارت د پوځي اتشې همکار اخراج کړی

د رومانیا ملي بیرغ

د رومانیا له خوا د یوه روسي ډیپلومات د اخراج د پرېکړې په عکس العمل کې روسیې په مسکو کې د رومانیا سفارت د پوځي اتشې د همکار د اخراج خبر ورکړی دی.

د هغه یادښت له مخې چې د روسیې د بهرنیو چارو وزارت پرون سې شنبه (د غويي ۲۱مه) په مسکو کې د رومانیا سفیر کریستین ایسترات ته سپارلی، د رومانیا د پوځي اتشې همکار نامطلوب شخص بلل شوی دی.

هغه ته ۷۲ ساعته وخت ورکړل شوی چې له روسیې ووځي.

د روسیې د بهرنیو چارو وزارت ویلي، دغه پرېکړه په بخارست کې د روسیې د سفارت د پوځي اتشې د همکار د بې اساسه اخراج په ځواب کې شوې ده.

په وروستیو کې ګڼو هېوادونو روسي ډیپلوماتان اخراج کړي دي، مسکو هم ځوابي اقدام کړی دی.

دا لړۍ وروسته له هغې چې پیل شوه چې تېره میاشت چک جمهوریت ځینې روسي ډیپلوماتان په ۲۰۱۴میلادي کال کې د چک د مهماتو په زېرمو کې له چاودنو سره د روسي جاسوساتو د ارتباط په تور له خپلې خاورې وایستل.

د روسیې تاتارستان کې پر یوه ښوونځي د ډزو او چاودنې له کبله ۸ تنه ووژل شول

د روسیې تاتارستان کې پر ښوونځي د برید سیمه

د روسیې له تاتارستان سیمې راپورونه وایي، پر یوه ښوونځي د ډزو او چاودنې له کبله لږ تر لږه اته تنه وژل شوي دي.

په وژل شویو کې یو ښوونکی او اته زده‌کوونکي دي.

یوې نجلۍ د تاتارستان په مرکز کازان کې د ازادي راډیو تاتار څانګې ته وویل: "د بم څلور چاودنې وشوې. ټولې دروازې ماتې شوې."

رسنۍ خبر ورکوي چې نن لومړی پر ښوونځي چاودنه وشوه بیا لږ تر لږه دوو تنو ډزې پیل کړې.

د راپور له مخې پولیسو یو برید کوونکی وژلی او دوهم د ښوونځي دننه دی چې یو شمېر کسان‌یې له ځان سره برمته کړي دي.

ایران د ولسمشرۍ د ۱۳مې دورې انتخاباتو لپاره د احتمالي نوماندانو ثبت پیل کړ

د ایران د ولسمشرۍ انتخاباتو د نوماندانو د نوم لیکنې لړۍ

ایران د ولسمشرۍ د ۱۳مې دورې د انتخاباتو لپاره د احتمالي نوماندانو د نومونو د ثبت لړۍ پیل کړې ده.

ټاکل شوې ده چې دا ټاکنې د جون په ۱۸مه ترسره شي.

د دې انتخاباتو د نوماندانو نوم لیکنه سر له ننه پیل شوې او تمه ده چې پنځه ورځې دوام وکړي.

په دوهم پړاو کې به بیا د نوماندانو په اړه نګهبان شورا فیصله کوي چې چا ته اجازه ورکوي چې انتخاباتو ته ودرېږي او د چا نوم لیرې کوي.

تمه ده چې د نوماندانو وروستی لېست د مې په ۲۷مه اعلان شي او له دې سره د انتخاباتي مبارزې ۲۰ ورځنی کمپاین پیل شي.

د ایران اوسنی ولسمشر حسن روحاني چې دوه دورې ولسمشر پاتې شوی له قانون سره سم حق نه‌لري چې درېیم ځلي ځان کاندید کړي.

اسراییل په غزه کې هوایي بریدونه کړي

ارشیف، غزه کې لګیدلی توغندی

اسراییل په غزه کې هوایي بریدونه کړي دي او فلسطیني وسله والو له دې ګڼ میشتې سیمې تیره شپه توغندي وویشتل.

په غزه کې د فلسطینیانو روغتیایي چارواکي د ماشومانو په ګډون د ۲۴ کسانو د مړینې خبر ورکوي او وایي چې تر سلو ډېر ټپیان شوي دي.

اسراییلي پوځیان وایي، له تېرې شپې راهیسې یو سل او دیرش هدفه په نښه شوي دي او دا بریدونه د شااوخوا دوه سوه توغندیو د برید په ځواب کې ترسره شوي دي چې له غزې د حماس او نورو وسله والو ډلو له لوري د اسراییل په لور ویشتل شوي دي.

اسرائیل وایي چې ۱۵ وسله وال یې وژلي دي، د وسلو فابریکې یې په نښه کړي، د وسله والو د وسلو ډیپوګان یې له منځه وړي، د هغوی کینایستلي تونلونه یې وران کړي دي، همدا راز د وسله والو د قوماندې مرکزونه په نښه شوي دي.

له غزې اکثر ویشتل شوي توغندي د اسراییل دفاعي سیستم دفع کړي دي، خو شپږ تنه یې د اسراییل په جنوبي ښار عسقلان کې وروسته له هغه ټپیان کړل چې توغندي د خلکو پر کورونو ولګیدل.

امریکا:پر کوچنیانو دې د فایزر - بیو اېن ټیک واکسین پلی شي

ارشیف

د امریکا د صحي قوانینو ادارې د ۱۲ او ۱۵ کلونو ترمنځ کوچنیانو ته د کووېډ- ۱۹پر ضد د فایزر - بیو اېن ټیک کمپنیو د واکسین د تطبیق اجازه ورکړې.

د امریکا د خوړو او درملو د ادارې 'FDA' سرپرستې کمېشنرې جنیت ووډکوک دا اقدام د کرونا وبا د مخنیوي برخه کې یو مهم ګام بللی.

مېرمن ووډکوک پرون د مې په لسمه نېټه په یو بیان کې وویل چې دا پرمختګ به امریکایانو ته د عادي ژوند د بیا پیل او د دې وبا د پای ته رسېدو حس ورکړي.

په متحدو ایالاتونو کې د کرونا پر ضد د واکسین په شرایطو برابرو په سلو کې ۵۷ وګړو چې شمېر یې یو سل او اته پنځوس میلیونه ته رسېږي لږ تر لږه یو ډوز واکسین تر لاسه کړی دی.

'اوزیریس رېکس' څیړنیزه ستوربیړۍ به اسماني ګرد له ځان سره راوړي

اوزیریس رېکس تحقیقاتي سفینه

د ناسا هغې ستوربېړۍ چې د یو شهاب یا اسماني تېږې په اړه د څېړنې لپاره فضا ته استول شوې د دې فضايي ګَړنګ له نمونو سره، ځمکې ته د ستنېدو لپاره خپل څه باندې دوه کلن سفر پرون د مې په لسمه نېټه پیل کړ.

اوزیریس رېکس تحقیقاتي سفینه به د بېنو په نوم د اسماني تېږې ټوټې او ګرد له ځان سره راوړي.

د امریکا د فضايي تحقیقاتو د ادارې- ناسا کارپوهان هیله من دي چې د دې موادو د څېړنې په مرسته به د شمسي نظام د ترکیبي عناصرو او ان پر ځمکه د ژوند د پیل په اړه نور معلومات ترلاسه کړي.

د دې شهاب واټن له ځمکې سره دوه سوه اته اویا میلیونه کیلومتره دی او اوزیریس ستوربېړۍ به دوه ځلي د لمر پر مدار له تاوېدو او د ۲،۳ میلیارد کیلومتره واټن له بشپړولو وروسته ځمکې ته راستنه شي.

د یوه میني بوس په اندازه دا سفینه به د ۲۰۲۳ میلادي کال د سېپټمبر په ۲۴مه د امریکا د اوتا ایالت په یوه دښته کې راکښته شي او د بېنو د اسمان تېږې نمونې به له ځان سره راوړي.

د هندوستان کرکټ لوبډله سريلانکا ته ځي

د هند کرکټ لوبغاړي

د هندوستان کرکټ لوبډله د درېیو يو ورځنيو او درېیو شل اووريزو لوبو لپاره سريلانکا ته ځي.

د سريلانکا د کرکټ بورډ د اداري کمېټې رئيس ارجونا ډيسلوا ویلي دي، دغه لوبې به د ننداره کوونکو په نه شتون کې د کولمبو په پرماداسا لوبغالي کې ترسره شي.

نوموړي زیاته کړې چې يو ورځنۍ لوبې د جولای مياشتې په ۱۳ مه نېټه پيلېږي او دغه شان شل اووريزي لوبې به د همدې مياشتې په ۲۲مه نېټه پيل او تر ۲۷مې نېټې به دوام وکړي.

نور راوښيه

XS
SM
MD
LG