د لاسرسۍ وړ لېنکونه

تازه خبر
دوشنبه ۲۰ غویی ۱۴۰۰ کابل ۰۹:۲۴

نړۍ

د روسیې اپوزېسیون د بندي مشر الکسي ناوالنۍ ډاکتره جریمه شوه

د الکسي ناوالنۍ ډاکتره اناستاشیا واسیلي ییفا

د روسیې اپوزېسیون د بندي مشر الکسي ناوالنۍ ډاکتره په دې خاطر جریمه کړل شوه چې تېره اوونۍ یې هڅه وکړه چې ناروغ ناوالنۍ سره په محبس کې وویني.

د کرملېن دا منتقد له مسکوه دباندې بندي دی.

د مسکو د پیتوشکي سیمې محکمې اناستاشیا واسیلي ییفا یو لک او ۸۰ زره روبله چې ۲ زره ۳۲۰ ډالره کېږي، جریمه کړې او ویلي یې دي چې نوموړې په داسې ځای کې د راټولېدو هڅه کړې چې له کبله‌یې کېدای شي په ټرانسپورت کې خنډ پېښ شي.

د ورځې تازه خبرونه دلته ولولئ

د وزني وژنه؛ کربلا کې مظاهره‌چیانو د ایران قونسلګرۍ ته د اور اچولو هڅه وکړه

عراقي مظاهره‌چیان کربلا کې د ایران قونسلګرۍ ته د اور اچولو هڅه کوي.

د عراق په کربلا کې د یوه وتلي فعال تر وژل کېدو وروسته عراقي مظاهره‌چیانو پرون هڅه وکړه چې د شیعه‌ګانو په دغه سپېڅلي ځای کې د ایران قونسلګرۍ ته اور واچوي.

ایهاب وزني چې د ۲۰۱۹م کال په اکټوبر میاشت کې په عراق کې د حکومت ضد اعتراضونو د تنظیموونکي په توګه مشهور و، وخت ناوخت‌یې پر اداري فساد، په ایران پورې د تړلو ملېشه‌وو او په عراق کې یې د ایران د نفوذ په اړه انتقادونه کول.

دی د شنبې ناوخته له خپل کور دباندې د نامعلومو موټرسایکل سپرو وسله‌والو په حمله کې ووژل شو.

د عراق د بشري حقونو خپلواک کمېسیون په وینا، دا دېرشم فعال دی چې د ۲۰۱۹م کال له اکټوبر میاشتې راهیسې په هدفي حملو کې وژل کېږي.

په دې موده کې شااوخوا ۶۰۰ مظاهره‌چیان هم تر ډېره د مظاهرو پر مهال وژل شوي چې فعالانو دا قتلونه د ایران پلوه ملېشو کار بللی دی.

د وزني وژنه پرون په کربلا کې د مظاهرو سبب شوه چې برخه‌والو یې سړکونه او پلونه وتړل او ټایرونو ته‌یې اور واچاوه.

ځینو مظاهره‌چیانو چې د وزني جنازه‌یې لېږدوله، شعار ورکاوه، "ایران دې له مخې لیرې شي" او "خلک د رژیم نسکورېدل غواړي".

انتونیو ګوترش له اسرائیل د زغم او سوله‌ییزو غونډو ته د درناوي غوښتنه وکړه

د ملګرو ملتونو سرمنشي انتونیو ګوترش

د ملګرو ملتونو سرمنشي له اسرائیل غوښتنه وکړه چې تر ډېره حده له زغم څخه کار واخلي او د سوله‌ییزو غونډو د ازادۍ حق ته درناوی وکړي.

د ملګرو ملتونو یوه ویاند پرون یکشنبه وویل چې سرمنشي انتونیو ګوترش په اشغال شوي ختیځ بیت‌المقدس او له خپلو کورونو د فلسطیني کورنیو د احتمالي اخراج په اړه ژوره اندېښنه ښوولې ده.

د فلسطیني مظاهره‌چیانو او اسرائیلي پولیسو په نښتو کې لږترلږه ۱۰۰ تنه فلسطینیان ټپيان شوي دي.

دا خبره د فلسطین د سره صلیب کمېټې چارواکو پرون یکشنبه رسنیو ته کړې ده.

نښتې د مسلمانانو د درېیم تر ټولو سپېڅلي ځای او پر هغه ځمکه د فلسطینیانو د کورونو خالي کولو پر سر پیدا شوې چې یهودان‌یې د ملکیت دعوه کوي.

پولیسو د زرګونه فلسطینیانو پر ضد ربړي مرمۍ، اوښکې بهوونکی ګاز او ګنګسوونکي لاسي بمونه کارولي دي.

د اسرائیل پولیسو بیا ویلي چې د دوی ۱۷ تنه هم ټپیان شوي دي.

د نړۍ د کاتولیک عیسویانو رهبر پاپ فرانسېس یکشنبه هیله وښوده چې په بیت‌المقدس کې روانې لانجې او نښتې پای ته ورسېږي.

د فلسطیني مظاهره‌چیانو او اسرائیلي پولیسو نښته؛ ۱۰۰ فلسطینیان ټپيان شوي

اسرائيلي پولیس له فلسطیني مظاهره‌چیانو سره د اخ‌وډب پر مهال

د فلسطیني مظاهره‌چیانو او اسرائیلي پولیسو په نښتو کې لږترلږه ۱۰۰ تنه فلسطینیان ټپيان شوي دي.

دا خبره د فلسطین د سره صلیب کمېټې چارواکو پرون یکشنبه رسنیو ته کړې ده.

نښتې د مسلمانانو د درېیم تر ټولو سپېڅلي ځای او پر هغه ځمکه د فلسطینیانو د کورونو خالي کولو پر سر پیدا شوې چې یهودان‌یې د ملکیت دعوه کوي.

پولیسو د زرګونه فلسطینیانو پر ضد ربړي مرمۍ، اوښکې بهوونکی ګاز او ګنګسوونکي لاسي بمونه کارولي دي.

د اسرائیل پولیسو بیا ویلي چې د دوی ۱۷ تنه هم ټپیان شوي دي.

د نړۍ د کاتولیک عیسویانو رهبر پاپ فرانسېس یکشنبه هیله وښوده چې په بیت‌المقدس کې روانې لانجې او نښتې پای ته ورسېږي.

ځینو عرب هېوادونو بیا د اسرائیلي ځواکونو له‌خوا د زور زیاتي کارول غندلي دي.

د اسرائیل صدراعظم بنیامین نتانیاهو پرون وویل هېڅ تُندلاري ته اجازه نه‌ورکوي چې د بیت‌المقدس/اورشلیم ثبات ګډوډ کړي.

د شنبې شپې دا بې‌سارې نښتې داسې وخت شوي چې له یوې خوا شاوخوا ۹۰،۰۰۰ فلسطینیان د قدر شپې لمونځ لپاره الاقصا جومات ته ورغونډ شوي و او له بلې خوا یهودانو د یکشنبې ماښام لپاره د بیت‌المقدس ورځې د لمانځنې په هدف تابیاوې نیولې وې.

د مې په ۷مه هم په نښتو کې لږ تر لږه ۲۰۵ فلسطینیان او ۱۸ اسرائیلي سرتېري ټپيان شول.

د سعودي د کورنیو چارو وزارت د ښځو حقونو مخکښه فعاله لجين الهذلول احضار کړې

د سعودي عربستان د ښځو د حقونو مخکښه فعاله لجين الهذلول

د سعودي عربستان د ښځو د حقونو مخکښه فعاله لجين الهذلول د کورنیو چارو وزارت د پوښتنو لپاره احضار کړې ده.

د لجین خور په خپل ټویټر دا خبر ورکړی دی.

لجین درې میاشتې مخکې له زندانه خوشې شوې وه.

لجین الهذلول په سعودي کې د ښځو لپاره د موټر چلونې د حق لپاره پراخه مبارزه کړې ده او هم‌یې په دغه هېواد کې ښځو ته په لږه ونډه نیوکې کړي.

دا مخکښه فعاله په ۲۰۱۸ کال کې له ګڼو نورو ښځو سره په ګډه زنداني شوې وه.

د برازیل ولسمشر د مور ورځې په درنښت د موټرسایکل چلونې یوه سیالۍ کې ګډون وکړ

د برازیل ولسمشر ژایر بولسونارو

د برازیل ولسمشر ژایر بولسونارو د مور د ورځې په درنښت د موټرسایکل چلونې په یوه سیالۍ کې ګډون وکړ.

دا سیالي په پلازمېنه برازیلیا کې پرون ترسره شوې.

ولسمشر بولسونارو له ولسمشرۍ ماڼۍ الوورادا ووت او د سلګونه موټرسایکل چلوونکو په ملتیا یې د ښار په منځ کې شاوخوا یو ساعت موټرسایکل وچلاوه.

د برازیل په ولسمشر د کرونا ویروس د مخنیوي په برخه کې تُندې نیوکې کېږي ځکه هلته د کرونا له لاسه د مړو شمېر نږدې څلور لکه او ۲۰ زرو کسانو ته پورته شوی دی.

خو د راپورونو له مخې ولسمشر بولسونارو د موټرسایکل چلونې په دې سیالۍ کې په ګډون سره وغوښتل د خلکو ملاتړ جلب کړي.

د امریکا سمندري ځواکونو له یوې بیړۍ د وسلو یوه محموله ضبط کړې

د امریکا سمندري ځواکونه

د امریکا سمندري ځواکونو په عرب سمندرګي کې له یوې بیړۍ د وسلو یوه محموله ضبط کړې ده.

دغو ځواکونو نن یکشنبه (د غويي ۱۹مه) ویلي، دا ارزوي چې دا وسلې له کومه ځایه بیړۍ کې بار شوې وې او چېرته لېږدېدلې.

له دې وړاندې امریکايي ځواکونو په عرب سمندرګي کې هغه پرمختللې ایراني وسلې ضبط کړې وې چې د یمن حوثي سخت دریځو ته لېږدول کېدې.

په نوېو ترلاسه شوېو وسلو کې لسګونه د ټانک ضد روسي توغندي، زرګونه میله چینایي ټوپک او سلګونه مېله 'پي.کې.اېم' ماشیندارې شاملې دي.

ویل شوي دا وسلې څو ورځې وړاندې له یوې بادي بیړۍ ترلاسه شوي چې په کوم هېواد پورې تړاو نه لري.

د بېلاروس مشر لوکاشینکا د واک د لېږد لپاره نوی فرمان لاسلیک کړ

د بېلاروس ځواکمن مشر الکساندر لوکاشینکا

د بېلاروس ځواکمن مشر الکساندر لوکاشینکا ویلي، که دی وژل کېږي یا له دندې د پر مخ بیولو وړتیا له لاسه ورکوي، د ولسمشرۍ واکونه دې د دغه هېواد امنیت شورا ته وسپارل شي.

لوکاشینکا د واک د دغه ډول لېږد فرمان نن (د مې په نهمه) لاسلیک کړی دی.

له دې وړاندې تګلاره دا وه چې که ولسمشر وژل کېږي یا د واک وړتیا له لاسه ورکوي، د نوي ولسمشر تر لوړې پورې به واک صدر اعظم ته سپارل کېږي.

دا په داسې حال کې ده چې ډېرو حکومتونو د بېلاروس د تېر کال په ولسمشریزو ټاکنو کې د لوکاشینکا بریا غیر مشروع بللې ده.

له دې ټاکنو وروسته د بېلاروس سیاسي مخالفانو اعتراضونه پيل کړي چې په سخت ډول ځپل کېږي.

د فلسطینیانو او اسرائیلي پولیسو تازه شخړې؛ ۶۴ فلسطینیان ټپيان شول

د فلسطینیانو او اسرائیلي پولیسو ترمنځ تېر ماخوستن تازه شخړې

د فلسطینیانو او اسرائیلي پولیسو ترمنځ تېر ماخوستن تازه شخړې رامنځته شوي دي.

دغلته نانندرۍ د اسلام د درېیم تر ټولو سپیڅلي ځای بیت المقدس پر سر او دغه راز د یهودانو له خوا د ادعا له مخې د دوی له ځمکو د فلسطینیانو د شړلو پر سر رامنځته شوي دي.

د تېر ماخوستن شخړې هغه مهال ونښتې چې شااوخوا نوي زره فلسطینیان د قدر د شپې د نمانځلو په موخه اقصی جومات کې راټول شوي وو.

په تازه نښتو کې ۶۴ فلسطینیان ټپيان شوي چې له دې ډلې ۱۱ تنه روغتون کې بستر شوي دي.

دا کسان تر دې وروسته ټپيان شول چې پولیسو پرې ربړۍ ګولۍ، اوښکې بهونکی ګاز او بې سده کوونکې لاسي بمونه وکارول.

تر دې یوه ورځ وړاندې ۲۰۵ فلسطینیان او ۱۸ اسرایلي افسران ټپیان شوي وو.

روسیه نن یکشنبه خپل پوځي ځواک نندارې ته ږدي 

یو روسی سرتیری

روسیه نن یکشنبه (د غويي ۱۹مه) په دوهمه نړیوالې جګړې کې پر نازي المان د پخواني شوروي اتحاد د بري د ۷۶ کلیزې په مناسبت خپل پوځي ځواک نندارې ته ږدي.

تمه ده د روسیې ولسمشر ولادیمیر پوتین د مسکو په سره میدان کې له نورو جنرالانو او افسرانو ترڅنګ ددغو مراسمو لیدنه کوي.

په دې پریډونو کې ۱۲۰۰۰ سرتیري، ۱۹۱ پوځي وسایط نندارې ته ایښودل کېږي چې الوتکي او هلیکوپترې به هم د دې مراسمو بدرګه وي.

ولسمشر پوتین له دوو لسیزو راهیسي چې واک ته رسیدلی، یا د ولسمشرۍ یا د صدراعظمۍ په پوستونو کې هڅه کړې چې د پخواني شوروي اتحاد د تېرو سمبولونو په بیا ښکاره کولو د هېواد پالنې روحیه پیاوړې کړي.

فرانسې امریکا ته: د کرونا واکسین د محتویاتو پر صادراتو محدودیت ختم کړه

د فرانسې ولسمشر امانویل مکرون

د فرانسې ولسمشر، د امریکا له متحدو ایالاتونو وغوښتل چې د کرونا ضد واکسین او د دغه واکسین او د هغه د محتویاتو پر صادراتو محدودیت ختم کړي.

ایمانوئل مکرون پرون شنبه (د غويي ۱۸مه) د پرتګال په پورتو ښار کې د اروپايي ټولنې د مشرانو تر دویمې غیررسمي غونډې وروسته یوه کنفرانس ته وویل: "د امریکا له متحدو ایالاتونو په څرګنده غوښتنه کوم چې د واکسین پر صادراتو او د هغه پر محتویاتو محدودیت چې د واکسین د تولید مخه نیسي، ختم کړي. نن د جرمني کیور واک (CureVac) شرکت ویلي چې په اروپا کې واکسین نه شي تولیدولی. راګېر پاتې یو. ځکه امریکا د ځینو موادو مخه نیولې ده. د واکسین د تولید او په بېړه یې نېستنمنو، یا د متوسطو اقتصاد لرونکو هېوادونو لپاره د رسولو کیلي د واکسین زیات تولید دی. پر واکسین اود واکسین د محتویاتو پر صادراتو هم بندیز ختم کړئ."

په همدې حال کې د روغتیا نړیوال سازمان مشر ټېډورس ادهانوم ګیبریسوس هم د نړۍ له اوو لویو اقتصادلرونکو هېوادونو غوښتنه کړې چې په شتمنو او نېستمنو هېوادونو کې دې په عادلانه ډول د واکسین وېش ته لومړیتوب ورکړي.

پاکستان د کرونا ضد ۱،۲میلیونه ډوزه واکسین ترلاسه کړ

آرشیف، د اسټرازینکا واکسین

پاکستان پرون شنبه (د غويي ۱۸مه) د کوواکس پروګرام له لارې د کرونا ضد یو اعشاریه دوه میلیون ډوزه واکسین ترلاسه کړ.

د ماشومانو د ملاتړ لپاره د ملګرو ملتونو ادارې (یونیسف) پرون شنبه په یوه مطبوعاتي اعلامیه کې وویل، دا د اکسفورډ د اسټرا-زینیکا واکسین لومړۍ بسته ده چې پاکستان ته ورکول کېږي.

کوواکس د واکسین هغه نړیوال پروګرام دی چې تر ډېره له بې وزلو هېوادونو سره د واکسین په برخه کې مرسته کوي.

دغه پروګرام په وروستیو کې د اکمالاتو له ستونزو سره مخامخ و.

د امریکا د جانز هاپکېنز پوهنتون د شمېرو له مخې په پاکستان کې په کرونا ویروس د اخته کسانو شمېر تر ۸ لکو او ۵۴زرو زیات دی.

فلسطین کې مظاهرې؛ اسرائیل د شخړو مخنیوي ته امنیتي تدابیر شدید کړل

آرشیف، فلسطین کې مظاهره چیان

اسرائیل ویلي، له فلسطیني مظاهره چیانو سره د نورې شخړې د مخنیوي لپاره یې امنیتي تدابیر پرون شنبه(د غويي ۱۸مه) شدید کړل.

دا په داسې حال کې ده چې د بیت المقدس په الاقصی جومات کې د شخړو پر مهال تر ۲۰۰ د زیاتو کسانو ټپي کېدو اندېښنې زیاتې کړې.

د اسرائیل د پولیسو کمېشنر یاکوف شبتي وویل، پرون شنبه د لیلة القدر یا د قدر شپې په درشل کې په بیت المقدس کې اضافي امنیتي ځواکونه وګمارل شول.

شبتي په یوه اعلامیه کې وویل، خلک به د مظاهرې حق لري، خو بلوا به سخت ځواب شي.

سعودي عربستان او پاکستان د همکاریو د پراخولو موافقه لاسلیک کړه

ارشیف، د پاکستان صدراعظم عمران خان او د سعودي شهزاده

سعودي عربستان او پاکستان د کشمیر د لانجې پر سر له څو میاشتو ترینګلو اړیکو وروسته نن په خپلو کې د همکاریو د پراخولو موافقه لاسلیک کړه.

په دې سند کې چې سعودي عربستان ته د پاکستان د صدراعظم عمران خان د دوه ورځني سفر په ترڅ کې نن شنبې(د غويي ۱۸مه) لاسلیک شو، له مجرمانو سره د چلند، د مخدرو موادو پر ضد د ګډې مبارزې، د عامه تأسیساتو او څو نورې پروژې شاملې دي.

دواړو لورو همدا راز موافقه کړې چې د دې چارو د سمون لپاره یوه عالي شورا هم جوړه کړي.

د دې دوو هېوادونو اړيکې وروسته له هغه ساړه شول چې اسلام اباد د هغه څه په خاطر چې پاکستان یې د کشمېر په لانجمنه سیمه کې د هند له لوري د بشري حقونو سرغړونې بولي د ریاض د ملاتړ غوښتنه وکړه، خو ریاض له هند سره په اړیکو کې له ډېر احتیاط څخه کار اخلي، ځکه د تېلو لوی پېرودونکی او مهم تجارتي شریک یې دی.

له دې وروسته سعودي عربستان د عمران خان پر حکومت فشار راووړ چې ۳ میلیارده ډالره پور او د ۳،۲ میلیاردو ډالرو په ارزښت د تېلو د قرضې اسانتیا چې په ۲۰۱۸ کال کې یې ژمنه ورسره کړې وه، پرې کړي او پاکستان په غبرګون کې له چینه د مالي ملاتړ غوښتنه وکړه.

له دې مخکې د پاکستان لوی درستیز جنرال قمر جاوېد باجوه هم له سعودي ولیعهد محمدبن سلمان سره وکتل.

د فضايي قوماندې مرکز د بې کنټروله شوي چینايي راکټ په لټه کې دی

ارشیف

د امریکا د فضايي قوماندې مرکز چې د بې کنټروله شوي چینايي راکټ په لټه کې دی، هغه تصویرونه خپاره کړي چې ښيي دا راکټ ښايي سبا د مې په نهمه د کابل پر وخت د سهار شااوخوا اووه نیمې بجې یو ځل بیا په پسیفیک سمندر کې د ځمکې اتموسفیر ته ننوځي.

د سپېس راکټ به نوم دا وېب سایټ چې د امریکا د پوځ یوه څانګه یې چلوي نن شنبه (د غويي ۱۸مه) په دې تصویري پیغام کې وویل چې ښايي د دې راکټ موقعیت او اتموسفیر ته د هغه د ننوتو په وخت کې بیا بدلون راشي.

له دې مخکې د دې راکټ موقعیت چې وزن یې شااوخوا ۲۲ ټنو ته رسېږي، د ترکمنستان د فضا پرسر ښودل شوی و او له دې سره دا اندېښنې هم رامنځته شوي چې ښايي انسانانو ته زیان واړوي.

دا بې لارې شوی راکټ چین د اپرېل په ۲۹ مه د خپل ځانګړي فضايي سټېشن د لېږدولو په مقصد فضا ته وتوغاوه.

اروپایي ټولنه او هند به د ازادې سوداګرۍ پر خبرو بحثونه وکړي

ارشیف، د اروپايي ټولنې بیرغونه

اروپایي ټولنه او هند به هڅه وکړي چې په نننۍ سرمشریزه کې د ازادې سوداګرۍ پر دریدلو خبرو بیا بحثونه پيل کړي.

د اروپایي ټولنې مشران د پرتګال په پورتو ښکار کې پرون راغونډ شوي و او نن(د مې په ۸مه) به له دوی سره د هند صدراعظم ناریندرا مودي د ویډیو کنفرانس له لارې برخه واخلي.

د هند او اروپایي ټولنې تر منځ د ازادې سوداګرۍ موضوع په دوه زره دیارلسم کال کې د تعارفې د کمېدو، د اختراعاتو د ثبت د خوندیتوب او په اروپا کې د هندیانو د کار د اجازې په شمول د یو شمېر دلایلو له امله ودرول شوې.

اروپایي ټولنه او هند د اړیکو د پراختیا لپاره هڅې کوي او دواړه لوري د چین اقتصادي ځواک ته اندیښمن دي.

خو یو شمېر ډلې لکه د بښنې نړیوال سازمان چې غړیو یې د غونډې د ځای بهر اعتراضاً شعمې ولګولې، د اروپایي ټولنې پر مشرانو فشار راوړی چې د مودي د حکومت له لوري د اپوزسیون د ځپلو مساله له پامه ونه غورځوي.

نور راوښيه

XS
SM
MD
LG