د لاسرسۍ وړ لېنکونه

تازه خبر
جمعه ۲۴ غویی ۱۴۰۰ کابل ۰۳:۰۸

افغانستان

طالبان: د ترکیې کنفرانس ته چمتو نه‌یو

د ملا برادر په مشرۍ د طالبانو د قطر سیاسي دفتر غړي

طالبانو ویلي، دوی د اپرېل میاشتې په ۱۶مه د ترکیې کنفرانس ته چمتو نه‌دي.

د طالبانو د قطر د دفتر ویاند محمد نعیم نن ازادي راډيو ته وروسته تر دې دا خبره وکړه چې افغان چارواکو پرون وویل، د همدې اوونۍ په وروستیو کې دا کنفرانس جوړېږي.

په دې اړه سملاسي نور جزئیات نه‌دي ورکړل شوي.

دا په داسې حال کې ده چې د دې کنفرانس بل اصلي لوری، افغان حکومت استانبول غونډه کې د ګډون لپاره چمتووالی ښودلی او د دغې غونډې لپاره‌یې د سولې د طرحې مسوده چې د ملي مصالحې عالي شورا د توحید او ترتیب کمېټې له‌خوا وروستۍ شوې، "د افغانستان د سولې هوکړه‌لیک" نومول شوې او څلور بنسټیزې برخې لري، د دغې شورا مشر عبدالله عبدالله ته سپارلې ده.

دا طرحه ۱۴ مخه لري او لومړۍ برخه‌یې "د افغاستان د راتلونکي لپاره لارښود اصول" دي چې د خلکو د حقونو پر ساتنې ټینګار کوي.

په دوهمه برخه کې "د سولې سیاسي نقشه" چې په‌کې انتقالي حکومت ته چې د سولې حکومت په نوم نومول شوی اشاره شوې.

په درېیمه برخه کې "د ټاکنو له لارې د نظام په جوړېدو" او په څلورمه کې بیا "د جګړې پای" یا تل‌پاتې اوربند باندې بحث شوی دی.

دغه‌راز، مخکې له دې ​د افغان حکومت د سولې مذاکراتي پلاوي یوې سرچینې ویلي چې ملګرو ملتونو، قطر او ترکیې چې د استانبول ناستې ګډ کوربه‌توب په غاړه لري د مذاکراتو د اصولو او اجنډا سند چمتو کړی، افغان حکومت او طالبانو ته‌یې سپارلی دی.

که څه هم افغان حکومت او ملګري ملتونه په دې اړه څه نه‌وايي، خو طالبان وايي چې په دې اړه دوی ته څه نه‌دي سپارل شوي.

سرچینې ازادي راډيو ته وویل چې دغه سند د تېرې اوونۍ په لومړیو کې دوی ته سپارل شوی او دواړو لورو ته دوه ورځې وخت ورکړل شوی چې بېرته ځواب ورکړي، په وینا یې افغان حکومت ورته غبرګون ښودلی، خو طالبانو تر اوسه په دې اړه څه نه‌دي ويلي.

د ورځې تازه خبرونه دلته ولولئ

د برېښنا د ویجاړې شوې ستنې د بیارغونې پر مهال چاودنه؛ یو کارکوونکی ټپي شوی

د کابل په کلکان ولسوالۍ کې د برېښنا ویجاړه شوې ستن

د برښنا شرکت یو تخنیکي کارکوونکی د کابل په کلکان ولسوالۍ کې د یوې ویجاړې شوې ستنې د بیا رغېدو پر مهال په ماین کې ټپي شوی دی.

د ازبکستان د وارداتي برېښنا دا ستن تېر ماښام د نامعلومو وسله‌والو له‌خوا په بم الوزول شوې وه.

د برښنا شرکت ویاند سنګر نیازي نن ازادي راډیو ته وویل: "نن سهار چې زموږ همکارانو کار پیل کړ، له بده مرغه د دې ستنې ترڅنګ د یوه خښ شوي ماین په چاودنه کې یو کارکوونکی ټپي شوی دی."

ښاغلي نیازي زیاته کړه چې هڅه کوي د نن ورځې تر پایه دا ستن ترمیم شي.

تر دې دمخه ورځو کې په همدې کلکان ولسوالۍ کې د برېښنا دوه نورې ستنې هم د نامعلومو وسله‌والو له‌خوا په بمي چاودنو ویجاړې شوي. دغو پېښو د کابل په ګډون یو شمېر ولایتونه له برېښنا بې‌برخې کړل.

له طالبانو د اشرف غني غوښتنه: اوربند وغځوئ، ټول افغانان سولې ته تږي دي

د افغانستان جمهور رئیس محمد اشرف غني

افغان ولسمشر اشرف غني د کمکي اختر په مناسبت پیغام کې پر طالبانو غږ وکړ چې اوربند دې وغځوي.

ولسمشر غني وویل، جګړه پوځي حل‌لاره نه‌لري او بالاخره باید پای ته ورسول شي. نوموړي ټینګار وکړ چې ټول افغانان سولې ته تږي دي او ټول اړخونه باید د سولې لپاره هڅې وکړي.

طالبانو چې د اختر په مناسبت درې ورځنی اوربند اعلان کړی ویلي چې هغه به ونه‌غځوي. دا خبره تېره شپه د دې ډلې ویاند ذبیح‌الله مجاهد ازادي راډیو ته وکړه.

ښاغلی غني یو ځل بیا پر طالبانو غږ وکړ چې ټولګټو تأسیساتو ته له زیان رسولو دې لاس واخلي.

هغه خپله پخوانۍ خبره بیا تکرار کړه چې ویلي و په تېرو کلونو کې طالبانو د یو میلیارد ډالرو په ارزښت ټولګټو تأسیساتو ته زیان رسولی، هغه ادعا چې طالبانو رد کړې ده.

افغانان دا اختر داسې مهال لمانځي چې د جګړو دوام ډېرې کورنۍ د غم په ټغر کېنولي.

د روژې سږنۍ میاشت له خونړیو حملو سره مله وه. تر ټولو خونړۍ هغه‌یې د کابل په دشت برچي کې پر نجونو زده‌کونکو وه چې شااوخوا ۸۵ تنه ووژل شول او له ۱۰۰ زیات ټپیان شوي دي.

د افغانستان او ایران ولسمشرانو پر افغان سولې او وروستیو پېښو خبرې وکړې

د افغانستان جمهور رئیس محمد اشرف غني او یو شمېر نور افغان چارواکي د ایران ولسمشر حسن روحاني سره د ټیلیفوني خبرو پر مهال

د افغانستان او ایران ولسمشرانو د افغانستان د سولې او په دې هېواد کې د وروستیو ترورېستي پېښو په اړه ټیلیفوني خبرې وکړې.

د ارګ په یوې اعلامیه کې چې بېګاه خپره شوه راغلي چې د ایران ولسمشر د خپل حکومت او خلکو په استازیتوب د وروستیو ترهګریزو پېښو په اړه خپله غمرازي او خواخوږي وښوده.

د ارګ اعلامیه زیاتوي چې محمد اشرف غني او حسن روحاني په افغانستان کې د سولې پر هڅو، سیمه‌ییزې همکارۍ او د افغانستان او ایران ترمنځ د اړیکو د پراختیا په اړه بحث وکړ.

افغانستان څو وروستیو ورځو کې د خونړیو پېښو شاهد و. تېره شنبه د کابل دشت برچي سیمه کې پر سیدالشهدا ښوونځي موټر بم او پرله‌پسې چاودنو شااوخوا ۸۵ نجونې زده‌کوونکې ووژلې او له ۱۰۰ زیات ټپيان دي.

د کوچني اختر لومړۍ ورځ؛ افغان ولسمشر له لمانځه وروسته ملت ته وینا کوي

د افغانستان ولسمشر محمد اشرف غني

نن د ۱۴۰۰ لمریز کال د ثور ۲۳مه د نېکمرغه کوچني اختر لومړۍ ورځ ده.

تمه ده د افغانستان ولسمشر د اختر تر لمانځه وروسته په دې اړه ملت ته وینا وکړي.

افغانستان د نورې اسلامي نړۍ ترڅنګ دا ورځ داسې مهال لمانځي چې په دې هېواد کې ډېری خلک د جګړو او ناامنیو له کبله له ګڼو ستونزو او ناخوالو سره مخامخ دي.

خو خلک په دې وروستیو کې د طالبانو له‌خوا د اختر په ورځو کې د موقتي اوربند اعلان په نېک فال نیسي.

د طالبانو ویاند ذبیح‌الله مجاهد تېر ماښام ازادي راډیو ته وویل چې دا اوربند به د اختر تر درېیمې ورځې وي.

ښاغلی مجاهد وايي: "دا اوربند د شپې مهال پیل او د درېیمې ورځي د شپې تر ۱۲ پورې به دوام وکړي."

تر دې وړاندې عامو افغانانو، حکومت او هم نړیوالو سربېره پر دې چې د دې ګام هرکلی وکړ، خو ټینګار یې دا وو چې اوربند تر اختر وروسته هم وغځوي او تل‌پاتې سولې ته لار هواره کړي.

وسله‌والو طالبانو '۴۱ افغان امنیتي سرتېري' له خپلو زندانونو خوشې کړل

ارشیف، یو شمېر وسله‌وال طالبان

وسله‌والو طالبانو پرون ۴۱ افغان امنیتي سرتېري له خپلو زندانونو خوشې کړي.

د دغې ډلې ویاند ذبیح‌الله مجاهد پرون پر ټویټرپاڼه ولیکل چې دغه سرتېري د روژې په مناسبت خوشې شوي دي.

د مجاهد په خبره دغه سرتېري په بادغیس، فاریاب، سرپل او جوزجان ولایتونو کې د دوی له زندانونو خوشې شوي او زیاتوي چې ټول خوشې شوي کسان خپلو کورونو ته واستول شول.

افغان چارواکو تر اوسه د دې بندیانو د خوشې کېدو په اړه د رد یا تأیید ځواب نه‌دی ویلی.

مجاهد زیاتوي چې په ټوله روژې میاشت کې ۲۵۸ تنه افغان ځواکونه د دوی له زندانونو څخه په بېلابېلو پړاوونو کې خوشې شوي دي.

د کابل کلکان ولسوالۍ کې د وارداتي برېښنا یوه بله ستن په ماین والوزول شوه

د کابل کلکان ولسوالۍ کې الوزول شوې د برېښنا ستن

د ازبکستان د وارداتي برېښنا یوه ستن په کلکان ولسوالۍ کې په ماین والوزول شوه.

د افغانستان برښنا شرکت د پروان حوزې مشر روح‌الله ساجد ازادي راډیو ته وویل چې تېر ماښام شاوخوا اته نیمې بجې نامعلومو وسله‌والو له دې ستنې سره چاودېدنکي مواد ځای پرځای کړي وو.

د ښاغلي ساجد په خبره د دې ستنې په ویجاړېدو سره د پلازمېنې په ګډون د اوو ولایتونو برېښنا پرې شوه.

تر اوسه د دې پېښې مسؤلیت چا نه‌دی منلی.

برښنا شرکت له دې پېښې وروسته په یوې اعلامیه کې وویل چې د دې شرکت تخنیکي کارکوونکي په کلکان کې دي او هڅه کوي د امنیتي وضعیت په پام کې نیولو سره د دې لین د بېرته رغولو چارې پیل کړي.

دا په داسې حال کې ده چې تر دې پېښې دمخه په روانه اوونۍ کې هم دغې ولسوالۍ کې د نامعلومو کسانو له‌خوا د برېښنا دوه ستنې په بمونو الوزول شوې وې چې لا یې هم د رغونې چارې په بشپړه توګه پای ته نه‌دي رسېدلي.

دفاع وزارت: د میدان وردګ نرخ ولسوالۍ کې نوي ځواکونه ځای پر ځای شول

ارشیف، یو شمېر افغان ځواکونه

د افغانستان دفاع وزارت یوه ورځ وروسته له هغې چې د میدان وردګ ولایت د نرخ ولسوالۍ د طالبانو لاس ته پرېوته، په دې ولسوالۍ کې د نویو ځواکونو د ځای پر ځای کېدو خبر ورکوي.

د دې وزارت مرستیال ویاند فواد امان ازادي راډیو ته وویل چې په دې ولسوالۍ کې د طالبانو په وړاندې عملیات پیل شوي دي.

ښاغلی امان زیاتوي: "نوي ځواکونه د میدان وردګ په نرخ ولسوالۍ کې ځای شوي. په دغه ولسوالۍ کې د ترهګرو په وړاندې تصفیوي عملیات پیل شوي. که خدای کول دغه ولسوالۍ به ډېر ژر بېرته له طالبانو تصفیه شي."

یوه چارواکي ویلي چې هڅه کوي چې دغه ولسوالۍ د اختر په مناسبت تر اعلان شوي اوربند مخکې بېرته له طالبانو ونیسي.

دغه چارواکي د خپل نوم نه‌ښودلو په شرط ویلي چې دا کار ځکه کوي چې طالبان ښایي د اختر له ورځو په استفادې په دې ولسوالۍ کې خپلې مورچلې ټینګې کړي چې ورسره به‌یې د بېرته نیولو لپاره عملیات پېچلي او د تلفاتو له زیاتوالي سره مل وي.

تر دې مخکې د میدان وردګ والي عبدالرحمن طارق تأیید کړې وه چې پر نرخ ولسوالۍ د طالبانو د ډله‌ییزو بریدونو په نتیجه کې امنیتي ځواکونو له دې ولسوالۍ تاکتیکي شا تګ کړی دی.

د طالبانو ویاند ذبیح‌الله مجاهد په یوه ټویټ کې ویلي چې وسله‌والو یې په دغه ولسوالۍ کې ټولې دولتي ادارې پرون سې شنبه ونیولې. هغه افغان امنیتي ځواکونو ته د درنو تلفاتو د اړولو ادعا هم کړې چې افغان چارواکو رد کړې ده.

د کابل د سید الشهدا د ښوونځي د بیارغونې چارې پیل شوي

د کابل د سید الشهدا ښوونځی

د افغانستان د ملي پراختیا شرکت وایي، د افغان ولسمشر محمد اشرف غني د ځانګړي حکم پر بنسټ یې د کابل د سید الشهدا د ښوونځي د بیارغونې چارې پیل کړي.

دغه شرکت پر خپل فیسبوک پاڼه کې لیکلي دي چې د ښوونځي د بیارغونې چارې به ژر بشپړې او د زده کوونکو پر مخ به یو وار بیا پرانیستل شي.

سید الشهدا ښوونځی چې د کابل په دشت برچي سیمه کې موقعیت لري، د روانې شنبې په ورځ پرې موټر بم خونړي حمله وشوه چې له امله یې د ښوونځي له سلو ډېرو زده کوونکو ته مرګ ژوبله واوښته.

د ملي پراختیا شرکت وایي چې اوس مهال د دغه ښوونځي په اتو بلاکونو کار روان دی او ډېر ژر به بشپړ شي.

د هرات والي: له طالبانو د بېلې شوې ډلې مرستیال عبدالمنان نیازی ټپی شوی

عبدالمنان نیازی

د هرات والي تایید کړه چې له طالبانو د بېلې شوې ډلې مرستیال عبدالمنان نیازی تېره شپه د ناپېژانده وسله والو په ډزو کې ټپي شوی دی.

عبدالوحید قتالي ازادي راډیو ته وویل چې پر هغه حمله د ګذره او ادرسکن ولسوالیو ترمنځ شوې ده: "تېره شپه له لسو بجو وروسته د هرات په جنوبي ولسوالۍ کې ملا عبدالمنان پر سر ټپي شوی او درې تنه ورسره نور ووژل شول."

د هرات د والي په وینا نوموړی اوس د هرات په حوزوي روغتون کې بستر دی او درملنه یې کېږي.

د ملاعبدالرسول په مشرۍ دغې ډلې په ۱۳۹۴ کال د هرات په شینډنډ ولسوالۍ کې اعلان وکړ چې له طالبانو جلا شوې ده.

ښاغلی نیازی د دې ډلې د مرستیال په توګه ګومارل شوی و.

۲۰۷ پامیر قول اردو:کندز کې د طالبانو بریدونه په شا تمبیدلي

ارشیف، کندز کې افغان امنیتي ځواکونه د عملیاتو پر مهال

د ۲۰۷ پامیر قول اردو وایي، د کندز ولایت په امام صاحب ولسوالۍ کې یې د طالبانو پراخې حملې پر شا تمبولې او دغې ډلې ته یې درنه مرګ ژوبله اړولې ده.

دغې قول اردو نن چهارشنبه (د غویي په ۲۲مه)په خپره کړې خبرپاڼه کې ویلي چې له دوو ورځو راهیسې وسله والو طالبانو د دې ولسوالۍ پر یو شمېر پوستو پراخ بریدونه کړي وو چې دې ولسوالۍ ته د ملي اردو د ځانګړو ځواکونو په رسېدو او د طالبانو پر وړاندې د پراخو ځمکنیو او هوایي بریدونو په پایله کې وسله وال په شا وتمبول شول.

د قول اردو په وینا په دغو عملیاتو کې طالبانو ته مرګ ژوبله رسیدلې، خو دقیق شمېر یې نه دی ښودلی.

خو دفاع وزارت بیا د دغو عملیاتو په اړه نن (د غویي په۲۲مه)په خپره کړې خبرپاڼه کې د څلورو طالبانو د وژل کېدو او درې نورو د ټپي کېدو خبره کړې ده.

د پامیر قول اردو د خبرپاڼې له مخې د دغو عملیاتو په نتیجه امام صاحب ولسوالۍ او دې ولسوالۍ ته غځېدلې لویه لاره له طالبانو پاکه شوې او هم هغه پُل چې طالبانو نړولی و، د خلکو په مرسته بېرته ترمیم شوی دی.

وسله والو طالبانو تر اوسه د افغان پوځ د دغې ادعا په اړه څه نه دي ويلي.

د افغانستان د وضعیت په اړه د امریکا کانګرس ته لیک لیږل شوی

ارشیف، د امریکا د کانګرس ودانۍ

د افغانستان د ولسي جرګې، د بشري حقونو او د مدني ټولنې غړیو او د افغانستان ـ امریکا د سولې او ثبات ډموکراټیکې شورا د امریکا کانګرس ته په یوه استولي لیک کې غوښتنه کړې چې د افغانستان د وضعیت د لا خرابیدو د مخنیوي لپاره دې اقدام وکړي.

دغه لیک کې پر ځینو موضوعاتو ټینګار شوی او ویل شوي چې که ورته پام وشي، په دې هېواد کې د تېرو ۲۰ کلونو لاس‌ته راوړنې خوندي او د یوې بلې کورنۍ جګړې د پیل مخنیوی کیدی شي.

په دغه لیک کې لس مهم موارد یاد شوي دي. د بېلګې په توګه له افغان ځواکونو مالي ملاتړ، د نجونو، ښځو او لږکیو له حقونو دفاع، د افغان هوايي ځواک سره تل‌پاتې مرسته، پر طالبانو فشار او د سولې لپاره د سیمې هېوادونو همکاري یې مهم موارد دي.

په دغه لیک کې د امریکا له کانګرسه د مرستې غوښتنه داسې مهال کېږي چې وسله والو طالبانو له افغانستانه د امریکایي ځواکونو د وتلو د بهېر پیلیدو سره حملو ته زور ورکړی دی.

ټاکل شوې چې ټول امریکایي ځواکونه د روان کال د سېپټمبر تر ۱۱مې له افغانستانه ووځي.

د افغانستان-چین د نښلیدونکي سړک ۱۵ سلنه رغنیزې چارې بشپړې شوې

د ټولګټو وزارت وايي، چین سره د نښلېدونکې لارې رغنیزې چارې په چټکۍ سره دوام لري.

د افغانستان د ټولګټو وزارت وايي چې له چین سره د نښلېدونکې لارې رغنیزې چارې ۱۵ سلنه پرمختګ کړی او نور کار یې هم په چټکۍ سره دوام لري.

د دغه وزارت ویاند احمد خلیل امید نن چهارشنبه (د غویي په ۲۲مه) ازادي راډیو ته وویل چې دا جغلي سړک چې ۴۹.۷ کیلومتره اوږدوالی لري، د بدخشان ولایت د پامیر له بزهای ګُنبد خور له سیمې پیل او د واخان ولسوالۍ تر پایه پورې چې کابو د چین سرحدي نقطې ته رسېږي غځيدلی.

دی وايي: "یاد سړک چې د افغانستان دولت له راتلونکي پلان سره سم د واخان کورېډور برخه جوړوي پر مټ به يې افغانستان د سیمه ییز نښلون اقتصاد محوره سیاست ته څو ګامه نور هم ورنږدې کړي."

نوموړی زیاتوي، دا جغلي به د اسفالټي سړک لپاره بنسټ شي، چې پرمټ به یې افغانستان او چین هېوادونه سره ونښلي،

مسوولين وايی، د څه باندې ۳۶۹ میلیونه افغانیو په ارزښت د دې سړک د جوړولو لپاره د ټولګټو وزارت له خوا له ۲۲ سیمه ېیزو شوراګانو سره تړون شوی، چې مالي لګښت یې له ملي بودیجې ورکول کېږي.

د دوی په خبره، واخان کورېډور به نه یوازې د چین او افغانستان تر منځ لنډه لار وي، چې خام مواد او تولیدات به یې له لارې تبادله کیږي، بلکه د واخان ملي پارک ته به هم د سیلانیانو په تګ راتګ کې مرسته وکړي.

ګمرکونو کې د څارویو د ناروغیو د تشخیص  ۱۸ لابراټوارونه جوړ شوي

یو لابراتوار

سږکال د افغانستان د کرنې، اوبو لګولو او مالدارۍ وزارت د هېواد ګمرکونو، هوایي ډګرونو او بندرونو کې د څارویو د ناروغیو د تشخیص ۱۸ لابراټوارونه جوړ شوي.

د دغه وزارت ویاند اکبر رستمي نن چهارشنبه (د غويي ۲۲مه) ازادي راډیو ته وویل چې دغه لابراتوارونه د عامې روغتیا وزارت او کابل ښاروالۍ په مرسته جوړ او په عصري توکو سمبال دي.

نوموړی زیاتوي، د دغو لابراټوارونو د جوړېدو موخه هېواد ته د واردېدونکو څارویو د بېلابېلو ناروغیو سمه څېړنه او پر وخت مخنیوی دی، څو له دې لارې د ناروغیو او افتونو سمه پېژندنه او پر وخت یې مخنیوی وشي.

دا په داسې حال کې ده چې له دې وړاندې افغانستان ته په قاچاقي ډول د حیواناتو بې کیفیته دواګانې راتلې چې د مالدارانو په وینا نه یوازې د ناروغيو مخنیوي کې مرسته نه کوله، بلکې د څارویو د مړینې لامل هم کېدې.

ننګرهار چارواکي: شېرزادو کې ماین چاودنې ۲ ملکیان وژلي

ارشیف

په ننګرهار کې د سړک غاړې یوې ماین چاودنې ۲ ملکیان ووژل او درې نور یې ټپیان کړل.

د ننګرهار د امنیه قوماندانۍ ویاند فریدخان ازادي راډیو ته وویل، چاودنه نن چهارشنبه(د غويي ۲۲مه) سهار شپږ بجې د شېرزادو ولسوالۍ په طوطو سیمه کې وشوه.

د ازادي راډیو خبریال د ځایي اوسیدونکو په حواله وایي چې پر سراچې موټر شوې دغې چاودنې څلور تنه وژلي او درې نور یې ټپیان کړي دي.

وژل شوي او ټپیان ټول ولسي وګړي یاد شوي دي.

تراوسه د چاودنې پړه کومې وسله والې ډلې نه ده اخیستې.

سعودي عربستان: سبا پنجشنبه به د کوچني اختر لومړۍ ورځ وي

ارشیف، د کابل شاه دوشمېره جومات کې د وړم کال د اختر لمونځ

سعودي عربستان وايي، سبا پنجشنبه (د غويي ۲۳مه) به د کوچني اختر لومړۍ ورځ وي.

د دغه هېواد رسنیو راپور ورکړی چې شوال میاشت ونه لیدل شوه، نن چهارشنبه به د روژې دېرشمه وي.

سږکال اختر داسې مهال کې راځي چې په لوګر او کابل کې د وروستیو خونړیو پېښو له کبله پرون سې شنبه د ملي ماتم ورځ وه.

طالبانو او افغان حکومت د اختر په درېیو ورځو کې اوربند اعلان کړی دی.

خو د ملي امنیت شورا ویاند رحمت الله اندړ وايي، افغانان دایمي اوربند غواړي: "د افغانستان د معضلې او مشکلاتو حل په دایمي اوربند کې نغښتی دی. په درېیو ورځو کې د افغانانانو نه وژل ستونزه نه حلوي، ځکه خو د دې اوربند تود هرکلی هم ونه وشو. افغان وژنې ته دې د پای ټکې کښېښودل شي. افغانان دایمي اوربند غواړي."

سږکال د روژې میاشت خونړۍ وه چې په لوګر او کابل کې وروستۍ حملې یې خونړۍ پېښې ګڼل شوې دي.

نور راوښيه

XS
SM
MD
LG