د لاسرسۍ وړ لېنکونه

تازه خبر
یکشنبه ۲۶ غویی ۱۴۰۰ کابل ۰۴:۲۵

نړۍ

د انګلستان د ملکې مېړه شهزاده فیلیپ مړ شو

د انګلستان د ملکې مېړه شهزاده فیلیپ

د انګلستان د ملکې الیزابت مېړه شهزاده فیلیپ نن د ۹۹ کلونو په عمر مړ شو.

د بکنګهام ماڼۍ نن په یوې اعلامیه کې راغلي چې ملکې الیزابت د خپل مېړه د مړینې اعلان وکړ.

نوموړي د روان کال په سر کې د زړه عملیات لپاره د یوه انفېکشن/مکروب د درملنې لپاره څلور اوونۍ په روغتون کې تېرې کړې وې، خو د مارچ په لومړیو کې بېرته ویندسور ماڼۍ ته ستون شو.

شهزاده فیلیپ نږدې اووه لسیزې د بریتانیا په سلطنتي کورنۍ کې د ملکې الیزابت ترڅنګ یو مخکښ رول لوبولی دی.

د ورځې تازه خبرونه دلته ولولئ

نتانیاهو: د فلسطیني سخت‌دریځو ضد اوسنی کمپاین به د اړتیا تر وخته دوام وکړي

د اسرائیل صدراعظم بنیامین نتانیاهو

د اسرائیل صدراعظم بنیامین نتانیاهو وایي، د فلسطیني سخت‌دریځو په وړاندې به اوسنی کمپاین تر هغو دوام وکړي چې اړتیا یې وي.

دا په داسې حال کې ده چې د امریکا متحده ایالاتو او ملګرو ملتونو د وضعیت د کرارېدو غوښتنه کړې ده.

بنیامین نتانیاهو پرون شنبه دغه خبرداری داسې مهال ورکړ چې د اسرائیل پوځ په غزه کې د جګپوړو چارواکو او د حماس د قوماندانانو پر څو ځایونو هوایي بریدونه وکړل.

د اسرائیل صدراعظم د حماس ډلې مشرانو ته وویل چې نه به د ځمکې پر سر او نه به هم تر ځمکې لاندې پټ پاتې شئ. له دې مخکې اسرائیل پرون په هوایي بریدونو کې په غزه کې د حماس ډلې د یوه سیاسي مشر او یوه جګپوړې ودانۍ چې د نړیوالو رسنیو دفترونه په‌کې و، په نښه کړي و.

فلسطیني چارواکي وایي د مې له ۱۰مې راهیسې چې نښتې پیل شوي لږترلږه ۱۴۵ کسان وژل شوي. ۴۱ یې ماشومان ښودل شوي او دغه‌راز ۱،۱۰۰ تنه هم ټپیان شوي دي.

اسرائیل خپل لور ته د ۱۰ کسانو وژنه تأیید کړې چې دوه په‌کې ماشومان دي.

د ملګرو ملتونو سرمنشي انتونیو ګوترش د ملکي تلفاتو په اړه خفګان او د رسنیو پر دفترونو یې د اسرائیل د هوایي بریدونو په اړه ژوره خواشیني څرګنده کړې ده.

د امریکا ولسمشر جو بایډن هم پرون د اسرائیل له صدراعظم بنیامین نتانیاهو او د فلسطیني ادارې له مشر محمود عباس سره خبرې وکړې او دواړه‌یې د وضعیت کرارېدو ته وهڅول.

بریتانیا کې د کرونا ویروس د هندي بڼې مثبت موارد ثبت شول

د کرونا ویروس د ازموینې ټیوب

د بریتانیا صدراعظم بورېس جانسون خبرداری ورکړی چې له هند څخه د کرونا ویروس بدله شوې بڼه‌یې په هېواد کې ثبت شوې ده.

جانسون پرون شنبې وویل چې بریتانیا ته د دغه ویروس د نوې بڼې سرایت هغه هڅې له خنډ سره مخامخ کوي چې په دې هېواد کې یې له 'کووېډ-۱۹' ناروغۍ څخه د خلاصون لپاره پیل کړې دي.

جانسون وویل، د لګول شویو محدودیتونو د لیرې کولو بله مرحله له سبا د مې له ۱۷ پیلېږي، خو خبرداری ورکوي چې ښايي د ویروس د دغې نوې بڼې سرایت د ټول محدودیتونو لیرې کول د جون تر۲۱مې پورې شا ته وغورځوي.

د بریتانیا روغتیایي چارواکو د انګلستان په دوو ښارونو کې کور په کور کې د کرونا ویروس ازموینې پیل کړې دي.

د بریتانیا د بالغو وګړو دوه درېیمه برخه‌یې لږترلږه د کرونا یو دوز واکسین اخیستی، خو بیا هم په ټول هېواد کې د دغه ویروس د خپریدو خطر له‌منځه نه‌دی تللی.

د امریکا د بهرنیو چارو وزیر یو شمېر اروپایي هېوادونو ته سفر پیلوي

د امریکا د بهرنیو چارو وزیر انتوني بلېنکن

د امریکا د بهرنیو چارو وزیر انتوني بلېنکن نن یو شمېر اروپایي هېوادونو ته خپل پنځه ورځنی سفر پیلوي.

دی به په دې سفر کې ډڼمارک، ایسلنډ او ګرینلنډ ته ولاړ شي او په ترڅ کې به‌یې د ارکتېک شورا په غونډه کې برخه واخلي.

د امریکا د ولسمشر جو بایډن د ادارې له پیل راهیسې په لومړي ځل ښاغلی بلېنکن په دې غونډه کې له خپل روسي سیال سرګي لاوروف سره مخامخ ګوري.

دغه شورا چې اته غړي لري د مې پر ۱۹مه خپله دوه ورځنۍ غونډه په ریکیاویک ښار کې پیلوي.

د بلېنکن د سفر په اجنډا کې د ارکتېک شورا د غړو هېوادونو له بهرنیو چارو وزیرانو سره دوه اړخیزې لیدنې شاملې دي. په دې کې روسیه هم شته چې تمه ده د راتلونکو دوو کلونو لپاره د دې شورا دوره‌یي مشري وکړي.

د روسیې د بهرنیو چارو وزارت یوې اعلامیې وړاندې ویلي وو چې د امریکا او روسیې د بهرنیو چارو وزیران به د مې پر ۲۰مه پر متقابلو اړیکو او نړیوالو مسایلو خبرې وکړي.

د دواړو هېوادونو ترمنځ په دې وروستیو کې تشنج بیا ډېر شوی دی.

د سپاه پاسداران د قدس ځواکونو قوماندان: د حماس ډلې ملاتړ ته دوام ورکوو

د ایران د سپاه پاسداران انقلاب د قدس ځواکونو قوماندان اسماعیل قاآني

د اسرائیل او حماس ډلې ترمنځ د جګړو په دوام، د ایران یوه لوړپوړي چارواکي ویلي چې په بشپړ ډول د حماس ملاتړ ته دوام ورکوي.

د ایران د دولتي ټلوېزیون د راپور له مخې د ایران د سپاه پاسداران انقلاب د قدس ځواکونو قوماندان اسماعیل قاآني پرون د حماس د ډلې له مشر اسماعیل هنیه سره د ټیلیفوني خبرو پر مهال له دې ډلي خپل ملاتړ ښودلی دی.

بل‌خوا د امریکا متحده ایالاتو ولسمشر د اسرائیل له صدراعظم نتانیاهو او د فلسطین له مشر محمود عباس سره خبرې کړي او د وضعیت د کرارېدو غوښتنه‌یې کړې ده.

ولسمشر بایډن د تاوتریخوالي د دوام په اړه اندېښنه ښودلې.

پرون اسرائیلي ځواکونو بیا پر غزې تړانګې سخت بریدونه وکړل.

فلسطین مني چې د تېرو شپږ ورځنیو جګړو پر مهال د دوی له لوري ۱۴۵ تنه وژل شوي چې ماشومان هم په‌کې دي.

اسرائیل هم د حماس په راکټي بریدونو کې د خپلو ۱۰ وګړو د وژل کېدو خبر تأییدوي.

د اسرائیل صدراعظم بنیامین نتانیاهو ویلي، ترهغو چې اړتیا یې وي پر غزې به بریدونو ته دوام ورکړي.

ملګرو ملتونو د اسرائیل او حماس ډلې ترمنځ د کړکېچ کمولو غوښتنه وکړه

د اسرائیل او فلسطین ترمنځ د شخړو دوام

د ملګرو ملتونو د بشري حقونو څانګې یوې مشرې، له ټولو هغو اړخونو چې د اسرائیل او په غزه کې د حماس ډلې ترمنځ د جګړې سبب شوي، د کړکېچ کمولو غوښتنه وکړه.

د بشري حقونو لپاره د ملګرو ملتونو عالي کمېشنرې میشل باشله (Michelle Bachelet) پرون شنبه له جنیوا په یوه اعلامیه کې وویل: "داسې ښکاري چې د ښکېلو لورو پاروونکو خبرو د کړکېچ د کمولو پر ځای، کړکېچ زیات کړی دی."

د مېرمن باشله تر دغو څرګندونو څو ساعته وروسته د اسرائیل هوايي حملې په غزه ښار کې هغه دنګه ودانۍ وویشتله چې د اسوشیټډ پرس اژانس او نورو رسنیو دفترونه په‌کې وو.

د ملګرو ملتونو دغې چارواکې خبرداری ورکړی چې د فلسطیني وسله‌والو ډلو له‌خوا پر اسرائیل راکټي حمله له نړیوالو بشري قوانینو څرګنده سرغړونه ده.

داسې اندېښنې هم شته چې د اسرائیل د پوځ له‌خوا پر غزه په ځینو حملو کې ملکي اهداف په نښه شوي دي.

یو اوکراینی چارواکی: روسیې سره د پارلمان د یوه غړي تبادله نا ممکنه نه‌ده

ارشیف، د روسیې او اوکراین بیرغونه

د اوکراین یوه لوړ رتبه چارواکي له روسیې سره د پارلمان د یوه غړي تبادله له امکانه لیرې ونه‌بلله.

د اوکراین د ملي امنیت او دفاعي شورا سکرتر الکسي دانیلوف پرون په یوه مرکه کې وویل، که فرصت برابر شي، کیف به "په پوره لېوالتیا" د اوکراین د پارلمان غړی، ویکټور مید-وید-چوک روسیې ته وسپاري، په بدل کې د اوکراین هغه وګړي تسلیم کړي چې به روسیه کې بندیان دي.

د اوکراین دغه چارواکي زیاته کړه، دغه پرېکړه باید د ولسمشر ولادیمیر زلنسکي له‌خوا وشي.

د اوکراین لویې څارنوالۍ د مې میاشتې پر ۱۱مه، د اوکراین د عمده سیاسي مخالف ګوند مخکښ غړی ویکټور مید-وید-چوک په خیانت تورن کړ چې اوس په کور کې نظربند دی.

دی چې له روسیې سره د نږدې اړیکو پلوی دی، د خیانت تورونه ردوي.

روسیه د اوکراین په ختیځ کې د روس‌پلوه جګړه‌مارو ملاتړ کوي. په دې ساحه کې له ۲۰۱۴م کال راهیسې په شخړو کې تر ۱۳،۰۰۰ ډېر کسان وژل شوي دي.

چین وايي پر مریخ د دوی د فضايي بېړۍ کېناستل سخت کار و

د چین د فضايي ساینس او ټکنالوژۍ ادارې له لوري د مریخ سطحې خپور کړی انځور

د چین د فضايي ساینس او ټکنالوژۍ اداره وايي، پر مریخ د دوی د فضايي بېړۍ کېناستل سخت کار و.

د تیانوین-یو (Tianwen-1) مأموریت قوماندان هی رونګوی پرون شنبه پر مریخ د چین د فضايي بېړۍ تر کېناستو وروسته په پیکېنګ کې وویل: "دا ګران کار و. لومړی وار دی چې په دې مسیر کې ګام ږدو. موږ له زیانو پېچلتیاوو سره مخامخ شولو، خو زیاتې هڅې مو وکړې. د دې بریالۍ ناستې لیدل چې له پلان او هدف سره سم ترسره شول، په ژوره فضا کې د چین د تحقیقاتو مهم څرک دی. ځکه چین د لومړي وار لپاره له ځمکې پرته په بله سیاره کې یوه پلټونکې وسیله ښکته کړله."

دا د چین لومړنۍ فضايي بېړۍ ده چې د مریخ سیارې پر سطحه راښکته کېږي.

دغه وسیله به له هغه روباټ سره چې د لمر په انرژۍ چلېږي درې میاشتې د مریخ د سطحې نمونې د نورې څېړنې لپاره راټولې کړي.

اسراییل پر غزې بمبارۍ وکړې؛ حماس یې په ځواب کې پر دوی توغندي وتوغول

غزه کې نننۍ برید

اسراییلي الوتکو نن سهار بیا پر غزې بمبارۍ وکړې او د حماس ډلې وسله والو په ځواب کې د اسراییل پر لور توغندي وویشتل.

په یوه برید کې یوه نهه پوړې ودانۍ چې د اسوشیټېډ پریس خبري اژانس او څو نورو رسنیو دفترونه په کې وو، نړول شوې ده.

فلسطیني روغتیاپالان وایي په یوه هوایي حمله کې لږ تر لږه ۱۰ کسان چې ټول د یوې لویې کورنۍ غړي وو، د غزې په شمال کې او په لویدیځه غاړه کې په پرونیو نښتو کې ۱۱ کسان وژل شوي دي.

د اسراییل صدراعظم بنیامین نتانیاهو پرون ماښام په یوه ویډیويي پیغام کې د حماس او نورو فلسطیني ډلو پر ضد د حملو د دوام ګواښ وکړ: "ما ویلي چې موږ به د حماس او نورو تروریستي ډلو پر ضد حملې ډېرې سختې کړي او موږ به دې کار ته دوام ورکړو. حماس فکر کاوه چې پټېدای شي خو دا ډله هلته ځان نه شي پټولای."

د فلسطین د روغتیایي چارواکو په وینا په غزه کې له دوشنبې ورځې راهیسې د ۳۹ ماشومانو او ۲۲ ښځو په ګډون ټول ۱۳۹ کسان وژل شوي دي.

د فلسطینیانو په راکټي حملو کې نن یو تن په تل ابیب کې ووژل چې له دې سره د ټولو وژل شویو اسراییلیانو شمېر نهو ته لوړ شو.

ابراهیم رییسي د ایران د ولسمشریزو انتخاباتو ته ځان کاندید کړی

د قضا مشر ابراهیم رییسي

د ایران د ولسمشرۍ په را روانو انتخاباتو کې، د دې هېواد د قضا مشر چې له تُندلارو روحانیونو څخه دی، ځان کاندید کړی.

ابراهیم رییسي چې د ایران ستر مذهبي مشر ایت الله علي خامنه یي سره نژدې اړیکي لري نن شنبې د احتمالي کاندیدانو د ثبت په وروستۍ ورځ اعلان وکړ چې د جون د اتمې په انتخاباتو کې به ودرېږي.

احتمالي کاندیدان شورای نګهبان تاییدوي او تمه ده چې دا شورا د روانې مې میاشتې په ۲۷مه نېټه د کاندیدانو وروستی فهرست اعلان کړي.

د احتمالي کاندیدانو په فهرست کې د پارلمان پخوانی رییس علي لاریجاني چې له مخکښو محافظه کارانو څخه دی، د پخواني ولسمشر علي اکبر هاشمي رفسنجاني مشر زوی محسن هاشمي رفسنجاني او ځینې نور کسان چې د سپاه پاسداران په انقلابي ځواک کې د کار سابقه لري هم شامل دي.

پخواني ولسمشر محموداحمدي نژاد هم د چهارشنبې په ورځ د ولسمشرۍ په انتخاباتو کې د سیالۍ لپاره خپل نوم ثبت کړ.

د اروپايي ټولنې نیوکه: روسیې امریکا او چک غیر دوست هېوادونه نومولي

ارشیف، د اروپايي ټولنې بیرغ

اروپايي ټولنې پر روسیې له دې کبله انتقاد کړی چې امریکا او چک جمهوریت یې غیر دوست هېوادونه نومولي دي.

د روسیې حکومت پرون د مې په څوارلسمه نېټه د غیردوست هېوادونو لېست خپور کړ او ژمنه یې وکړه چې که نور هېوادونه هم غیر دوستانه چلند وکړي نو پر وړاندې به یې ورته اقدام وشي.

د دې نومونې په نتیجه کې امریکا په روسیه کې په خپل ډیپلوماتیک ماموریت کې سیمه ییز کار کوونکي نه شي ګومارلی او د چک جمهوریت لپاره د سیمه ییزو کار کوونکو پر شمېر محدودیت لګول کېږي.

د اروپايي شورا مشر شارل مایک نن شنبې د روسیې دا پرېکړه د روان کړکېچ د پراخولو په برخه کې یوبل ګام وباله او ویې ویل چې دا اقدام به ډيپلوماتیکو اړیکي نور هم ترینګلي کړي.

د یهودانو ګڼ وژنه؛ اوکراین کې یې په یاد کنیسه پرانیستل شوه

ارشیف

په اوکراین کې نن په دوهمه نړیواله جګړه کې د یهودانو د ګڼې وژنې د یوې لویې پېښې په یاد له لرګیو جوړه کنیسه پرانیستل شوه.

د اوکراین صدراعظم دینیس شمیهال Denys Shmyhal په بابین یار دره کې د دې یادګاري ودانۍ د پرانیستو پر مهال وویل دا سمبولیکه کنیسه د ټولو هغو کسانو یاد ته د درناوي لپاره ده چې په هغه سیمه کې وژل شوي دي.

دا یهودي عبادتځای چې د یوه پرانیستي کتاب په بڼه جوړ شوی په نقشونو او لیکلو دعاګانو ډیزاین شوی دی او دننه د لویدیځ اوکراین د لرغونو کنیسو په بڼه جوړ شوی دی.

د دې کنیسې د پرانیستو مراسم د اوکراینیانو د یاد له ورځې سره برابره ده.

دا ورځ د هغو اوکراینیانو په یاد نمانځل کېږي چې په دوهمه نړیواله جګړه کې یې د یهودانو له ژغورنې سره مرسته کړې وه.

د ۱۹۴۱ کال په سپټمبر میاشت کې د پلازمېنې کیف په لمنو کې په بابین یار دره کې شااوخوا ۳۴ زره یهودان چې ښځې او ماشومان هم پکې وو، ووژل شول.

پر غزې د اسراییلو سخت بریدونه؛ په شمال کې لږ تر لږه ۷ تنه وژل شوي

ارشیف

اسراییل نن پر غزې وروسته له هغه بریدونه سخت کړل چې په لویدیځه غاړه او له لبنان سره پر پوله نښتې وشوې.

اسراییلي الوتکو نن سهار بیا پر غزې بمبارۍ وکړې او د حماس ډلې وسله والو په ځواب کې د اسراییل پر لور توغندي وویشتل.

فلسطیني روغتیاپالان وایي په یو هوایي برید کې د غزې په شمال کې لږ تر لږه ۷ تنه وژل شوي دي.

د اسراییل صدراعظم بنیامین نتانیاهو پرون ماښام په یوه ویډیويي پیغام کې د حماس او نورو فلسطیني ډلو پر ضد د حملو د دوام ګواښ وکړ: " ما ویلي چې موږ به د حماس او نورو تروریستي ډلو پر ضد حملې ډېرې سختې کړي او موږ به دې کار ته دوام ورکړو. حماس فکر کاوه چې پټېدای شي خو دا ډله هلته ځان نه شي پټولای."

فلسطینیان وایي چې په لویدیځه غاړه کې له اسراییلي ځواکونو سره د مظاهره چیانو د اخ و ډب پر مهال ۱۱ کسان وژل شوي او پنځوس نور په اصلي او ربړي مرمیو ټپیان شوې دي.

د فلسطین د روغتیایي چارواکو په وینا په غزه کې له دوشنبې راهیسې د ښځو او ماشومانو په ګډون لږترلږه یوسل او دوه دیرش تنه وژل شوې دي.

د اسراییل لور ته د اتو تنو د وژل کیدو خبر ورکړل شوی دی.

د بیان ازادي د خونديتوب په پار انلاین غونډه وشوه

ارشیف

تر پنځوسو د ډېرو هېوادونو او لویو ټکنالوژي کمپینو استازیو نن په انلاین غونډه کې پر دې خبرې وکړې چې څرنګه په انټرنټ کې ممکنه ده چې د بیان ازادي خوندي شي او د افراطيانو د تبلیغاتو مخه ونیول شي.

دا غونډه د هغو نړیوالو هڅو برخه ده چې د فرانسې ولسمشر امانویل مکرون او د نیوزیلنډ صدراعظمې جاسیندا اردیرن د دوی پر هېوادونو له خونړیو بریدونو وروسته چې پر ټولنیزو رسنیو خپرې شوې، پیل کړې.

په نیوزیلنډ کې دوه کاله مخکې یو سپین پوستي توکمپالي یو پنځوس مسلمانان په جوماتونو کې ووژل او دا برید یې د فیسبوک له لارې په ژوندۍ بڼه خپور کړ.

په فرانسه کې بیا یو استاد سامویل پاتي په اکتوبر کې یوه مسلمان افراطي وروسته تر دې وواژه چې دې ښوونکي د زده کړې پرمهال د اسلام د پیغمر تصویر ښکاره کړی و او دا بهیر ان لاین خپور شوی و، د دې ښوونکي قاتل بیا وروسته په انټرنټ کې پر خپل برید ویاړ وکړ.

د نننۍ غونډې په پیل کې د فرانسې ولسمشر امانویل ماکرون وویل چې پر ښوونکي سامویل پاتې به دا برید کله هم هیر نه شي.

ښاغلي ماکرون زیاته کړه چې ترهګر له انټرنټه د خپلې پروپاګندې لپاره استفاده کوي چې ډیموکراتیک ځواکونه او د بیان د ازادیو مدافعان باید دې ستونزې ته سمه حل لاره پیدا کړي.

د چین فضایي بیړۍ د مریخ پر غولي  خپل روبات ښکته کړ

ارشیف

د چین فضایي بیړۍ نن په بریالیتوب د مریخ پر غولي خپل روبات ښکته کړ. دا د چین او د دغه هیواد د فضایي پروګرام لپاره یوه تاریخي لاسته راوړنه ده.

د چین 'سي.سي.ټي.وي' دولتي ټلوېزیون د مریخ پر غولي د دې روبات د کښیناستو راپور ورکړ.

د دغهّ هېواد د رسمي اژانس سینهوا په وینا، د ( تیان وین-یو) په نوم فضایي بیړۍ مریخ ته ورسېده او دا لومړی ځل دی چې د چین یو روبات پر دې سیارې کښیني.

د ژورونګ په نوم روبات چې شپږ پښې لري، نژدې درې میاشتې به په مریخ کې تیرې کړي او له هغه ځایه به د کاڼو سیمپلونه د څیړنې لپاره مځکې ته راوړي.

تاجزاده، د ایران ولسمشریزو ټاکنو کاندیداتورۍ ته نوم­لیکنه وکړه

په ایران کې د اصلاحپالو یوه وتلی شخصيت او سوداګر سید مصطفی تاجزاده

په ایران کې د اصلاحپالو یوه وتلي شخصيت او سوداګر سید مصطفی تاجزاده، د دغه هېواد د ولسمشرۍ ټاکنو د کاندیداتورۍ لپاره نوم­لیکنه وکړه.

تاجزاده چې ۶۴ کلن دی، د ایران په کورنیو چارو وزارت کې د خپل نوم تر ثبتولو وروسته وویل، د بریا په صورت کې به په نظام کې اساسي بدلونونه راولي: "زه د امریکا او روسیې پر خلاف د ګرانبیه بهرني سیاست مخالف یم. موږ به د خبرو اترو او روغې جوړې لوری خوشې نه کړو، حتی که مقابل لوری له موږ سره جګړه هم غواړي."

سید مصطفي تاجزاده د ایران د پخواني ولسمشر محمد خاتمي په اداره کې د کورنیو چارو وزارت مرستیال په توګه دنده ترسره کړې ده.

په پام کې ده په ایران کې د ولسمشرۍ دیارلسم انتخابات د روان میلادي کال د جون میاشتې پر ۱۸مه وشي.

نور راوښيه

XS
SM
MD
LG