د لاسرسۍ وړ لېنکونه

تازه خبر
سه شنبه ۲۱ غویی ۱۴۰۰ کابل ۰۹:۰۰

افغانستان

کابل کې سلګونه کسانو د عبدالغني علیپور پر ضد مظاهره وکړه

د غیر مسؤله وسله‌والو یو قوماندان عبدالغني علیپور

په کابل کې سلګونه کسانو د غیر مسؤله وسله‌والو د یوه قوماندان عبدالغني علیپور پر ضد مظاهره کړې ده.

د افغانستان دولتي ټلوېزیون او پژواک خبري اژانس د مظاهره کوونکو عکسونه خپاره کړي چې د دې هېواد بیرغونه لېږدوي او به بنرونو یې د عليپور ضد شعارونه لیکلي دي.

مظاهره کوونکي غوښتنه لري چې د ملي اردو د یوې هليکوپټرې د غورځېدو او څو پوځیانو د وژلو په خاطر باید د سیمه‌ییزو وسله‌والو دا قوماندان ونیول شي او قانوني چلند ورسره وشي.

له دې وړاندې د ښاغلي علیپور یوه ویاند له ازادي راډیو سره خبرو کې منلې وه چې د ده وسله‌والو د میدان وردګو په بهسودو ولسوالۍ کې له امنیتي ځواکونو سره د جګړې پر مهال د ملي اردو څرخي الوتکه نسکورې کړې ده.

دغه څرخي الوتکه نږدې درې اوونۍ مخکې وویشتل شوه چې د دفاع وزارت په خبره ۴ عمله او ۵ سرتېري په‌کې ووژل شول.

له پېښې وروسته دولتي ځواکونو بهسودو ولسوالۍ کې عملیات پیل کړل او وروسته چارواکو وویل چې علیپور له سیمې وتلی دی.

د ورځې تازه خبرونه دلته ولولئ

نن ټول افغانستان کې د خونړیو پېښو په خاطر ملي ویر اعلان شوی

د ویر په پار د افغانستان ملي بیرغي نیم ځوړند دی

نن سې شنبه (د غويي ۲۱مه) په ټول افغانستان کې د وروستیو خونړیو پېښو په خاطر ملي ویر اعلان شوی.

د افغانستان حکومت ملي ویر وروسته له هغې اعلان کړ چې د کابل په دشت برچي کې په یوه خونړي برید کې په لسګونو د ښوونځي زده کوونکې او له هغې مخکې د لوګر په مرکز پل علم کې په ورته خونړي برید کې په لسګونو د دولسمو ټولګیو هغه فارغان ووژل شول چې د کانکور په آزموینه کې د ګډون لپاره له ازرې ولسوالۍ دې ښار ته ورغلي وو.

ولسمشر اشرف غني د تېرې یکشنبې په ورځ د ملي ویر د ورځې د اعلانولو پر مهال وویل چې د دې پېښو د مړیو او ټپیانو له کورنیو سره په غم او درد کې ځان شریک بولي او په همدې خاطر د سې شنبې ورځ ملي ویر اعلانوي چې ټول هېواد کې به د قربانیانو لپاره د فاتحې مراسم ترسره کېږي.

دغه راز به نن په کوردننه په دولتي ادارو او بهر کې د افغانستان په ډیپلوماتیکو نمایندګیو کې د افغانستان بیړغ نیم ځوړند وي.

امریکا: طالبان دې ۳ ورځنی اوربند وغځوي

ارشیف، پکتیا کې یو شمېر طالبان

د امریکا متحدو ایالاتونو د طالبانو له خوا د درې ورځو لپاره د اوربند د اعلانولو هرکلی وکړ او له دې ډلې یې وغوښتل چې هغه وغځوي.

د امریکا د بهرنیو چارو د وزارت ویاند نېډ پرایس پرون دوشنبه (د غويي ۲۰مه) په واشنګټن کې وویل، له طالبانو او له افغان مشرانو غواړي چې په جدي توګه د سولې په پروسه کې ښکېل شي، څو دا مسئله یقیني شي چې د افغانستان خلک په راتلونکي کې د ترورېزم له شره خلاص او له بې مفهومه تاوتریخوالي پرته ژوند وکړي.

ښاغلي پرایس دغه راز وویل چې متحده ایالات په کابل کې د نجونو پر ښوونځي د شنبې د ورځې خونړۍ برید چې لسګونو زده کونکو ته په کې مرګ ژوبله واوښته، غندي خو دا هم څاري چې څوک د دې برید مسوول دي.

پرایس زیاته کړه، تر دې مخکې د دا ډول حملو مسوولیت د اسلامي دولت ډلې یا داعش اخیستی دی.

طالبانو هم دغه برید غندلی او په هغه کې یې خپل لاس لرل رد کړي دي.

د کوچني اختر په مناسبت د طالبانو له خوا د درې ورځني اوربند په غبرګون کې د افغانستان حکومت هم له خپله اړخه ورته اوربند اعلان کړی دی.

کورنیو چارو وزارت: هغه کسان نښه کېږي چې د دښمن په ګټه تبلیغات کوي

د افغانستان د کورنیو چارو وزارت ویاند طارق ارین

د افغانستان د کورنیو چارو وزارت وایي، د یو شمېر هغو کسانو د په نښه کولو لپاره یې هڅې پیل کړي چې د دې وزات په وینا په رسنیو کې د دښمن په ګټه او د ملي امنیت ضد تبلیغات کوي او له دښمن سره اړيکې پالي.

د دې وزارت ویاند طارق ارین تېره شپه ازادي راډیو ته وویل، دغه هڅې یې د رسنیو له مسوولینو سره په همغږۍ پیل کړي دي: "دغه اقدام د هغو کسانو په اړه دی چې له دښمن سره اړیکې لري یا یې نفوذي کسان دي، خو په عین حال کې د بیان د ازادۍ اصول به هم په پام کې نیول کېږي."

د ښاغلي ارین په وینا دوی د هغو کسانو لټه کوي چې د خبریالانو په نوم د ملي ګټو او ملي امنیت ضد فعالیتونه سرته رسوي.

تر دې مخکې وسله والو طالبانو هم یو شمېر رسنۍ تورنۍ کړې وې چې بې پرې راپورونه دې نه ورکوي، بلکې د افغانستان د ملي امنیت د ادارې په ګټه پېښې تر خبري پوښښ لاندې نیسي چې په کور دننه د رسنیو د ملاتړ ډلو او نړیوالو پراخ غبرګونونه یې راو پارول.

چارواکي: د هرات ـ کندهار لویه لاره د ټرافیکو پر مخ پرانیستل شوه

ارشیف

د هرات چارواکي وایي، د هرات ـ کندهار لویه لاره له پرون دوشنبې(د غويي ۲۰مه) غرمې راهیسې د ټرافیکو پر مخ پرانیستل شوې ده.

د هرات د والي ویاند جیلاني فرهاد وویل، د دې ولایت د ادرسکن ولسوالۍ اوسېدونکو د مخدره موادو د قاچاق په تور د یوه کس د نیول کېدو او کابل ته د هغه د استولو په اعتراض کې دغه لاره سهار مهال تړلې وه.

ښاغلي فرهاد زیاته کړه: "د ادرسکن ولسوالۍ د خلکو استازیو نن وروسته له هغې چې خپلې غوښتنې یې له والي سره مطرح کړې او والي هم ورسره ژمنه وکړه چې غوښتنې به یې له اړوندو مسوولو چارواکو سره شریکې کړي، له اعتراض څخه لاس واخیست."

د هرات ادرسکن ولسوالۍ د هرات ښارد ختیځ په ۴۵ کیلو مترۍ کې د هرات – کندهار د لویې لارې پر سر پرته ده.

په لوګر کې د لومړۍ امنیتي حوزې امر شاهپور احمدزی ووژل شو

په لوګر کې د لومړۍ امنیتي حوزې امر شاپور احمدزی

په لوګر کې د لومړۍ امنیتي حوزې امر ووژل شو.

د لوګر د والي ویاند دیدار لونګ ازادي راډیو ته تأیید کړه چې څارمن شاهپور احمدزی نن مازدیګر د لوګر په مرکز پل علم ښار کې هغه مهال ترور شو چې نوموړي په ښار کې د امنیت لپاره چک پاینټ اچولی و.

د لوګر امنیه قومانداني هم پېښه تأییدوي او وایي، په دې برید کې له نوموړي سره د اولې حوزې پخوانی امر او دوه پولیس سرتېري هم ټپيان شوي دي.

دوی وایي، د برید عاملین وسله‌وال طالبان و چې د پېښې له ځایه په تېښته بریالي شوي دي.

شاهپور احمدزي له دې وړاندې له تېرو څو کالونو راهیسې د لوګر د پولیسو د ویاند په توګه دنده ترسره کوله او تازه له تېرو څو میاشتو راهیسې د اولې حوزې امر ټاکل شوی و.

وسله‌والو طالبانو تر اوسه په دې اړه څه نه‌دي ویلي.

عبدالله او باجوه د سولې د معنی لرونکو بین‌الافغاني خبرو پر پیل خبرې کړي

د افغانستان د ملي مصالحې عالي شورا مشر عبدالله عبدالله د پاکستان د پوځ له لوی درستیز جنرال قمر جاوېد باجوه سره د لیدنې پر مهال

د افغانستان د ملي مصالحې عالي شورا مشر عبدالله عبدالله د پاکستان د پوځ له لوی درستیز جنرال قمر جاوېد باجوه سره د سولې د معنی لرونکو بین‌الافغاني خبرو پر پیل خبرې کړې دي.

د دوی ترمنځ نن په کابل کې د سپېدار ماڼۍ دننه ملاقات شوی دی.

ښاغلي باجوه ویلي، د افغانستان د ستونزې یوازنی حل یوه سیاسي جوړجاړي ته رسېدل او ټاکنې دي.

د راپورونو له مخې د بریتانیا د پوځ لوی درستیز هم کابل ته د ښاغلي باجوه د سفر ملګری دی.

دا خبره په اسلام‌اباد کې د ازادي راډیو خبریال د خپلو سرچینو په حواله وکړه.

معلومه نه‌ده چې دغو پوځي چارواکو له ولسمشر محمد اشرف غني سره هم کتلي او که نه.

د جاپان صدراعظم: هېڅکله د المپیک لوبې راته لومړیتوب نه‌لري

د جاپان صدراعظم یوشیدي سوګا

د جاپان صدر اعظم وایي، د توکیو د المپیک لوبو د ترسره کولو په خاطر باید خلک له خطر سره مخامخ نه‌کړي.

یوشیدي سوګا نن (د مې په ۱۰مه) وویل، هېڅکله د المپیک لوبې ورته لومړیتوب نه‌لري، بلکې په خبره‌یې له کرونا د خپلو اتباعو د ساتنې په فکر کې دی.

ټاکل شوې د توکیو د المپیک سیالۍ چې له مخکې نه یو کال ځنډېدلې دي، سږکال د جولاۍ له ۲۳مې د اګسټ تر ۸مې پورې ترسره شي.

په همدې حال کې په جاپان کې شوې یوه نظرپوښتنه ښيي چې د دغه هېواد شااوخوا ۶۰ فیصده خلک د المپیک لوبو د لغوه کولو غوښتنه کوي.

روېټرز خبري اژانس ویلي، جاپان کې څه باندې درې لکه لاسلیکونه راټول شوي چې د المپیک لوبو مخنیوی وکړي.

د پاکستان لوی درستیز او د بریتانیا د پوځ مشر په ناڅاپي سفر کابل ته راغلي

د پاکستان لوی درستیز او د بریتانیا د پوځ مشر

د پاکستان او بریتانیا لوړپوړي پوځي مشران په ناڅاپي سفر کابل ته راغلي دي.

د ارګ دوو باوري سرچینو ازادي راډیو سره خبرو کې کابل ته د پاکستان د لوی درستیز قمر جاوېد باجوه سفر تأیید کړی، خو د بریتانیا د پوځ د مشر سفر لا رسمي نه‌دی تأیید شوی.

په اسلام‌اباد کې د ازادي راډیو خبریال طاهر خان وایي، له ښاغلي باجوه سره د کابل په سفر کې د بریتانیا د پوځ مشر هم ملګری دی.

طاهر خان د خپلو سرچینو په حواله وایي، بریتانیا هڅه کوي چې د افغانستان او پاکستان د اړیکو په ښه کولو کې منځګړیتوب وکړي.

ښاغلی طاهر خان زیاتوي: "زموږ چې څه معلومات دي، بریتانیا غواړي د افغانستان او پاکستان ترمنځ بې‌اعتمادي او بې‌باوري ختمه شي چې د دواړو هېوادونو همکاري زیاته شي، دا معلومات دلته د بریتانیا له‌خوا اسلام‌اباد کې خپاره شوي، د پاکستان د پوځ د اطلاعاتو څانګې (ای.اس.پي.ار) یوه اعلامیه خپره کړې چې د پاکستان د پوځ مشر او د بریتانیا د پوځ مشر غونډه هم کړې ده."

کابل ته د پاکستان او بریتانیا د پوځي مشرانو له سفره یوه ورځ وړاندې طالبانو د اختر درېیو ورځو لپاره اوربند اعلان کړ.

بل لور ته په دې وروستیو ورځو کې د جګړې لیکې ډېرې تودې شوي او دا جګړه پر ښکېلو خواوو سربېره ملکیانو ته هم دروند زیان اړوي.

پروان کې دوو چاودنو لږ تر لږه ۵ تنه ووژل او شااوخوا ۲۰ نور ټپیان دي

ارشیف، پروان کې د یوې چاودنې په سیمه کې راټول شوي پولیس

په پروان کې د ځایي چارواکو په خبره پر عامو خلکو دوه چاودنې شوي چې لږ تر لږه ۵ تنه په‌کې وژل شوي او شااوخوا ۲۰ نور ټپیان دي.

لومړنۍ چاودنه له غرمې مخکې د شېخ علي ولسوالۍ د اوسېدونکو د سپرلۍ پر کاسټر موټر شوې چې درې تنه په‌کې وژل شوي او یوه مور او زوی د چاودنې څپې سیند ته ګزار کړي دي.

د ازادي راډیو خبریال د چارواکو په حواله وایي، سیند څپانده دی او تر اوسه د مور او ماشوم جسدونه هم نه‌دي پيدا شوي.

پر کاسټر دې چاودنې ۱۱ تنه ټپیان کړي هم دي. د سپرلۍ دا موټر له چارېکارو غوربند درې ته پر لاره و چې د سیند یوه پله ته په رسېدو پر خښ شوي ماین وخوت.

د پروان د امنیه قوماندانۍ د جنایي جرمونو په وړاندې د مبارزې مشر محمد صادق هاشمي وایي، کله چې خلک د لومړنۍ چاودنې ځای ته نږدې شول، بله چاودنه شوې چې نهه تنه‌یې ټپیان کړي دي.

تر اوسه د دغو ماین چاودنو انګېزه نه‌ده معلومه او مسؤلیت‌یې هم کومې ډلې نه‌دی منلی.

دا په داسې حال کې ده چې په زابل کې تېره شپه د سپرلۍ پر ۴۰۴ موټر دوه غبرګې چاودنې وشوې چې لږ تر لږه ۱۱ تنه‌یې ووژل او ۲۵ نور یې ټپیان کړل.

غور کې یوه پولیس خپل څلور همکاران په ډزو وژلي

د افغانستان غور ولایت د فېروزکوه ښار

د غور چارواکي وایي دغلته یوه پولیس خپل څلور همکاران په ډزو وژلي دي.

دا پيښه تېره شپه د فېروزکوه ښار شمال ته په "تیلک کاسي" امنیتي پوسته کې رامنځته شوې.

د غور د والي ویاند زلمي کریمي ازادي راډیو ته ویلي چې دغه پولیس د پیرې پر مهال خپلو ملګرو باندې ډزې کړي او تښتېدلی دی.

کریمي برید کوونکی د طالبانو نفوذي کس یادوي، خو طالبانو په دې اړه رسنیو ته څه نه‌دي ویلي.

د افغانستان ملي امنیت عمومي ریاست: کابل کې د طالبانو د ترور هسته ونیول شوه

د افغانستان د ملي امنیت عمومي ریاست له لوري نیول شوي کسان

د افغانستان د ملي امنیت عمومي ریاست په کابل کې د طالبانو د "ترور هسته" ونیول شوه.

د دې ریاست له لوري په خپره شوې خبرپاڼه کې راغلي دي چې نیول شوې نهه کسیزې وسله‌والې ډلې په دې ولایت کې د چسپکي ماینونو په ايښودلو، هدفي وژنو او دغه‌شان د دې ښار په ۱۲مه او ۱۹مه ناحیه کې د پولیسو په پوستو د لاسي بمونو د غورځولو په پېښو کې لاس درلود.

د اعلامیې پر بنسټ دغه وسله‌والې ډلې جنګي وسایل او ناچاوده مهمات په لغمان کې د طالبانو له سیمه‌ییزو قوماندانانو ترلاسه کول.

په اعلامیه کې دغه‌شان راغلي دي چې یادې ډلې پلان درلود چې په کابل ښار کې هدفي وژنې پیل کړي، خو د ملي امنیت د ځانګړو ځواکونو له لوري ونیول شول.

په اعلامیه کې دا نه‌دي ویل شوي چې یاده ډله د کابل په کوم ځای کې او کله نیول شوې ده.

وسله‌والو طالبانو تر دې دمه په دې اړه کوم غبرګون نه‌دی ښودلی.

بل لور ته د بامیانو د والي دفتر ویلي، د دغه ولایت لپاره‌یې د طالبانو نومول شوی مرستیال نیولی دی.

د بامیان ولایت په یوه خبرپاڼه کې راغلي چې قاري عبدالجلیل عمري له خپل یوه ملګري سره پرون په کهمرد ولسوالۍ کې د ملي امنیت ځواکونو په عملیاتو کې ونیول شو.

طالبانو په دې اړه هم تر اوسه څه نه‌دي ویلي.

پکتیا کې مخ پټو وسله‌والو دوه ملکیان وژلي

ارشیف، د پکتیا ګردېز ښار یوه څنډه

د پکتیا چارواکي وایي، نامعلومه وسله‌والو په ځاځي اریوب ولسوالۍ کې دوه تنه ملکیان وژلي دي.

د امنیه قوماندانۍ ویاند محمد لعل امیري وایي، دغه کسان تېر ماخوستن په بیان‌خېلو سیمه کې د مخ پټو وسله‌والو له‌خوا وژل شوي دي.

ښاغلی امیري زیاتوي: "دوه نفره ملکي کسان وو، روژه ماتی او تراوېح‌یې کړي او بیا هلته یوه دکان کې ناست وو، نا معلومه کسانو ډزې پرې کړي، همدا دوه تنه په شهادت رسېدلي، برید کوونکي په تېښته بریالي شوي."

د ده په وینا وژل شویو کې یو صراف او بل هم مسافر و چې تازه له متحده عربي اماراتو نه راغلی و.

د ملي مصالحې عالي شورا: لنډمهاله اوربند اساسي او دایمي حل لاره نه‌ده

ارشیف، د ۲۰۱۸ کال د اختر په ورځو کې یو شمېر طالب جنګیالي د اوربند پر مهال په ځينو سیمو کې د ګرځېدو پر مهال

د افغانستان د ملي مصالحې عالي شورا وایي، لنډمهاله اوربند د دغه هېواد د ستونزو د هواري اساسي او دایمي حل لاره نه‌ده.

دغې شورا نن په یوه خبرپاڼه کې ویلي، له اوسني ناورین نه د وتلو لار د سولې د خبرو چټکول، دایمي اوربند او د تل لپاره د جګړې درول دي.

په اعلامیه کې راغلي، د تېرو څلورو لسیزو تجربو ښودلې چې جګړه نه‌یوازې دا چې د حل لاره نه‌ده، بلکې لانجه نوره هم ژوروي.

د دغې شورا مشر عبدالله عبدالله له طالبانو غوښتي چې بېرته د سولې خبرو ته وګرځي او دایمي اوربند وکړي.

دا څرګندونې داسې مهال کېږي چې تېره شپه طالبانو د کمکي اختر د درېیو ورځو په مخه د اوربند اعلان وکړ.

د همدې اوربند په درشل کې بیا جګړه توده شوې او په بېلابېلو ولایتونو کې د جګړې پر دواړو خواوو سربېره ملکیانو ته زیان اوړي.

دفاع وزارت: د کندهار ارغستان ولسوالۍ کې یوې څرخي الوتکې اضطراري ناسته کړې

ارشیف، یو شمېر افغان ځواکونه او د افغان هوايي ځواک یوه هلیکوپټره

د افغانستان دفاع وزارت وايي، د هوايي ځواک یوې څرخي الوتکې د کندهار په ارغستان ولسوالۍ کې اضطراري ناسته کړې ده.

دغه وزارت په یوه اعلامیه کې ویلي، دغه الوتکه تېره شپه د هوا د خرابوالي له کبله اضطراري ناستې ته مجبوره شوه.

د وزارت په حواله، په پېښه کې دوو پیلوټانو ته کوم زیان نه‌دی اوښتی.

د دغې الوتکې نوعیت نه‌دی روښانه شوی.

خو د کندهار په هوايي لواء کې يوې سرچينې ازادي راډیو ته وویل چې دغې الوتکې د کندهار هوايي ډګر ته نږدې د ارغستان ولسوالۍ په (جګ نري) په سیمه کې د تخنيکي ستونزې له امله بېړنۍ ناسته کړې او يو پيلوټ ټپي شوی دی.

کابل او لوګر کې د خونړیو بریدونو په خاطر سبا ملي ماتم اعلان شو

 د کابل په دشت برچي کې د شنبې ورځې خونړي برید د قربانیانو د خاورو ته سپارلو مراسم

د کابل په دشت برچي کې د شنبې ورځې او په لوګر کې د خونړي برید په خاطر افغان ولسمشر سې شنبه ملي ماتم اعلان کړی.

ولسمشر محمد اشرف غني یکشنبه وویل چې د مړو او ټپیانو له کورنیو سره په غم او درد کې ځان شریک بولي او په همدې خاطر د سې شنبې په ورځ د ملي ماتم او سراسري فاتحې اعلان کوي.

ښاغلي غني وویل: "په لوګر کې په بې‌ګناه محصلینو او په کابل کې پر معصومو زده‌کوونکو د ترهګریزو بریدونو د شهیدانو د درناوي لپاره د همدې اوونۍ سې شنبې ورځ د ملي ماتم اعلان کوم. د دې غمجنې پېښې د شهیدانو د روح لپاره به د ارګ په جامع جومات، ټولو دولتي ادارو او ولایتونو، ټولو جوماتونو او تکیه‌خانو او د هېواد په بهرنیو استازولیو کې د فاتحې او دعا مراسم ترسره شي."

ولسمشر غني همداراز وویل چې د وژل شویو او ټپيانو له کورنیو سره به نغدي مرستې وشي او هم به د دشت برچي د سیمې د خلکو د امنیت لپاره د سیمې له خلکو په سلا هڅې وشي.

د شنبې په ورځ په دشت برچي سیمه کې سیدالشهدا نجونو ښوونځي مخ ته په موتر بم حمله کې د رسمي شمېرو له مخې له ۵۰ زیات کسان وژل شوي او تر ۱۰۰ زیات ټپیان دی.

روېټرز اژانس بیا د افغان چارواکو په حواله ویلي چې تر یکشنبې ناوخته د مړو شمېر ۶۸ او د ټپيانو ۱۶۵ ته پورته شو.

افغان چارواکو طالبان په دې برید کې ښکېل بللي، خو طالبانو بیا هر ډول ښکېلتیا رد کړې.

تر دې مخکې د کابل په لوېدیځ سیمه کې د اکثرو خونړیو بریدونو مسؤلیت داعش یا اسلامي دولت ډلې په غاړه اخیستی.

نور راوښيه

XS
SM
MD
LG