د لاسرسۍ وړ لېنکونه

تازه خبر
سه شنبه ۲۸ غویی ۱۴۰۰ کابل ۱۱:۳۵

افغانستان

حنیف اتمر په کابل کې د ترکیې له سفیر د استانبول پر ناستې خبرې وکړې

د محمد حنیف اتمر او اوغوزخان ارطغرول لیدنه

د افغانستان د بهرنیو چارو وزیر د افغان سولې په تړاو د ترکیې پر جوړېدونکې ناستې د دغه هېواد له سفیر سره خبرې کړې دي.

محمد حنیف اتمر او اوغوزخان ارطغرول پرون ناوخته په کابل کې سره لیدلي.

د بهرنیو چارو وزارت په اعلامیه کې راغلي چې ښاغلي اتمر د ترکیې له سفیر سره په لیدنه کې سولې او ثبات ته د رسېدو په هدف د ترکیې له‌خوا د غونډې کوربه‌توب مهم وباله.

دواړو لورو د غونډې په احتمالي اجنډا، د پلاوي په ترکیب، نړیوالو ګډونوالو او د ترکیې له دې غونډې د موجوده تمو په اړه بحث کړی.

تمه ده ترکیه همدا میاشت د افغانستان د سولې په اړه د یوې نړیوالې غونډې کوربه وي.

روېټرز خبري اژانس بیا له ارګه د یوه ور رسېدلي سند په حواله لیکلي چې د افغان ولسمشر له‌خوا وړاندې کېدونکې طرحه درې برخې لري.

په یوه سیاسي حل لاره باندې جوړجاړی او د نړیوالو تر څار لاندې اوربند، د انتخاباتو ترسراوی او "د سولې حکومت" تأسیس او د مخته تګ لپاره د یوه قانوني چوکاټ رامنځته کول د ولسمشر غني په دې درې پړاویزه طرحه کې شاملې مهمې برخې دي.

د ورځې تازه خبرونه دلته ولولئ

حنیف اتمر خپل ترکمني سیال سره پر ټاپي پروژې وغږېد

د افغانستان او ترکمنستان د بهرنیو چارو وزیران، حنیف اتمر او رشید مریدوف

د افغانستان او ترکمنستان د بهرنیو چارو وزیرانو د ټاپي پروژې د ګازو د نللیکې د رغونې د راتلونکو پړاوونو په اړه خبرې کړي.

د افغانستان د بهرنیو چار وزارت په یوه خبرپاڼه کې چې نن سې شنبه (د غویي په ۲۸مه)وختي خپره شوه ویلي چې محمد حنیف اتمر او رشید مریدوف پرون دوشنبه په ټیلیفوني خبرو کې د سیمه ییز اتصال د لویو پروژو، په تېره د افغانستان له لارې پاکستان او هند ته د ترکمنستان د ګازو د لېږد د نل لیکې د تطبیق پر اهمیت او همدا راز د افغانستان او ترکمنستان ترمنځ په نورو برخو کې د اقتصادي همکاریو په اړه خبرې کړي.

بیان زیاتوي چې ښاغلي مریدوف ښاغلي اتمر ته د ټاپي د پروژې د راتلونکو پړاوونو د کار د پرمختګ لپاره د ترکمنستان د تیاریو په اړه معلومات ورکړل.

د افغان مېرمنو په اړه د بشري حقوقو د څار د ټولنې خبرداری

ارشیف، افغان مېرمنې

د بشري حقونو د څار ټولنې خبرداری ورکړی چې د امریکا سنا ته یوه وړاندې شوې لایحه ښايي د افغان مېرمنو او نجونو لپاره د مالي ملاتړ د بندېدو باعث شي.

په افغانستان کې د ښځو او نجونو د حقونو د خوندیتوب په نوم د دواړو ګوندونو له خوا جوړه شوې لایحه چې تېره اوونۍ سنا ته وړاندې شوه، د امریکا د بهرنیو چارو وزیر موظفوي چې په کال کې دوه ځلي د افغان مېرمنو او نجونو د حقونو په اړه کانګرس ته راپور ورکړي.

دا لایحه د افغان ښځو د خوندیتوب په هدف جوړه شوې، خو په عین حال کې دا خبرداری هم ورکوي چې که د افغانستان راتلونکی حکومت د دې حقونو له تضمین څخه ډډه وکړي، نو امریکا به خپلې مرستې پرې بندې کړي.

د بشري حقونو د څار ټولنې په یو بیان تازه کې ویلي چې د افغانستان له اوسني او راتلونکي حکومت سره د ښځو د حقونو په مسئله کې حساب کتاب مهم دی ، خو دا ټولنه پر مرستندویو هېوادونو غږ کوي څو دا یقیني کړي چې که د افغانستان له راتلونکي حکومت سره د احتمالي سرغړونې له کبله خپلې مرستې کموي نو باید په داسې طریقه یې کمې کړي چې افغان ښځې زیانمنې نه شي.

ملي اردو: فاریاب کې د ۳ پاکستانیانو په ګډون ۱۹ طالبان وژل شوي

ارشیف، فاریاب کې امنیتي سرتیري د عملیاتو پرمهال

ملي اردو ادعا کوي چې په فاریاب ولایت کې د درېیو پاکستاني وګړو په ګډون نولس وسله والو طالبان وژل شوي دي.

۲۰۹ شاهین قول اردو نن سې شنبه (د غويي ۲۸مه) سهار په یوه خبرپاڼه کې ویلي چې دا وسله وال تېره ورځ مازیګر د پښتون کوټ ولسوالۍ په خواجه ناموسي سیمه کې هغه مهال په یو هوايي برید کې په نښه شول چې په فاریاب ولایت کې د حملو لپاره یې پلان جوړاوه.

خبرپاڼه زیاتوي چې په وژل شویو کې پر ۳ پاکستانيانو سربېره د بالامرغاب او المار لپاره نومول شوی ولسوال او د طالبانو څو نور مهم کسان هم شامل دي.

طالبانو په فاریاب کې د خپلو وسله والو د وژل کېدو په اړه ادعا نه رد کړې او نه یې تایید کړې ده.

افغانستان: تیرکال سعودي ته صادرات دوه برابره زیات شوي

ریاض کې د افغانستان سفارت: د کرونا وبا محدودیتونو سربېره، د ۲۰۱۹ کال په پرتله په ۲۰۲۰ کال کې سعودي عربستان ته د افغانستان صادراتو له ۱۰۰ سلنې ډېره وده وکړه.

په ریاض کې د افغانستان سفارت وایي، سعودي عربستان ته تېر ۲۰۲۰ میلادي کال کې د افغان سوداګرو صادرات دوه برابره زیات شوي دي.

د سفارت د خبرپاڼې له مخې د سعودي رسمي شمېرې ښيي چې ۲۰۱۹ میلادي کال کې سعودي ته د افغانستان د صادراتو ارزښت څه باندې ۱۳ میلیونه ډالره وو.

د خبرپاڼې له مخې ۲۰۲۰ میلادي کال کې له کرونا وبا سره-سره د صادراتو ارزښت څه باندې ۲۸ نیم میلیونه ډالرو ته لوړ شو.

سعودي عربستان ته د افغانستان صادرات تر ډېره زعفران، وچه مېوه او قالینې دي چې د دواړو هېوادونو ترمنځ د هوایي دهلیز له لارې لېږدول شوي دي.

په ریاض کې د افغانستان سفارت اټکل کوي چې روان ۲۰۲۱ میلادي کال کې به دغه هېواد ته د صادراتو ارزښت څه باندې ۴۲ میلیونه ډالره وي.

ولسمشر غني په هلمند کې د داعي په نوم د څلور لاري نومول منظور کړل

لښکرګاه کې د داعي په نوم څلور لاری

د افغانستان ولسمشر په هلمند کې د ازادي راډیو د وژل شوي خبریال الیاس داعي په نوم د یوې څلور لارې نومول منظور کړل.

د ولسمشرۍ ماڼۍ د چارو ادارې مطبوعاتي دفتر ویلي، دغه وړاندیز د هلمند د خبریالانو له خوا د اطلاعاتو او فرهنګ وزارت په وسیله تر محمد اشرف غني رسیدلی و.

دغه دفتر وایي، ښاغلي غني پرون دوشنبه (د غويي ۲۷مه) دغه وړاندیز ومانه چې له مخې به یې لښکرګاه کې یوه څلور لارې د داعې په نوم شي.

هلمند کې د ازادي راډيو خبریال الیاس داعي شااوخوا ۷ میاشتې مخکې د ماین په چاودنه کې ووژل شو.

د فاریاب والي له اوږدو لانجو وروسته بالاخره په کار پیل وکړ

د فاریاب نوی ټاکل شوی والي محمد داوود د ځینو سیمه‌ییزو چارواکو په حضور کې معرفي شو

د افغانستان د سیمه‌ییزو ارګانونو خپلواکه اداره وايي، د فاریاب نوي والي له اوږدو لانجو وروسته بالاخره په کار پیل وکړ.

د سیمه‌ییزو ارګانونو د خپلواکې ادارې ویاندې نرګس مومند نن په یو وېډیويي پیغام کې ویلي چې د فاریاب نوي والي محمد داوود له یو څه ستونزو سره سره نن په کار پیل وکړ.

اغلې مومند زیاتوي: "که څه هم موږ په فاریاب ولایت کې مخکې ځینې ستونزې درلودې، خو له نېکه مرغه دا ستونزې حل شوي او د فاریاب نوی والي رسماً معرفي شوی او کار یې پیل کړی دی."

د فاریاب ولایت رسمي سرچینو ویلي چې ښاغلی داوود د فاریاب د ولایتي شورا د رئیس او نورو چارواکو په حضور کې معرفي شو.

د ښاغلي داوود له معرفي کېدو سره هم‌مهاله د عبدالرشید دوستم په مشرۍ د ملي اسلامي جنبش سلګونه پلویان چې د نوموړي له ټاکنې سره‌یې مخالفت کاوه د اعتراض لپاره د مرکز میمنې لارو کوڅو ته راووتل.

یوې سیمه‌ییزې سرچینې چې د موضوع د حساسیت له کبله نه‌غواړي هویت‌یې افشا شي ازادي راډیو ته وویل چې محمد داوود د پراخو اعتراضونو له کبله د ولایت د مقام پر ځای د ۲۰۹ شاهین قول اردو په یوه قرارګاه کې معرفي شو.

د امریکا او پاکستان د بهرنیو چارو وزیرانو پر افغان سولې خبرې وکړې

د امریکا د بهرنیو چارو وزیر انتوني بلېنکن

د امریکا او پاکستان د بهرنیو چارو وزیرانو د افغانستان د سولې په پروسه باندې خبرې کړې دي.

د پاکستان د بهرنیو چارو وزارت یکشنبه ماښام په دې اړه اعلامیه ورکړې ده.

د اعلامیې له مخې د پاکستان د بهرنیو چارو وزیر شاه محمود قریشي خپل امریکايي سیال انتوني بلېنکن ته ډاډ ورکړی چې هېواد یې د افغانستان د سولې له پروسې کلک ملاتړ کوي.

هغه دا ټینګار هم کړی چې له سیاسي حل لارې سولې ته رسېدل د ټولو ښکېلو افغان خواوو، سیمې او نړیوالې ټولنې ګډ مسؤلیت دی.

په اعلامیه کې د قریشي په حواله زیاته شوې چې د پوځیانو مسؤلانه ایستل، د تاوتریخوالي کمښت، دایمي اوربند او د ټول‌شموله سیاسي جوړجاړي د ترلاسه کولو لپاره د شته موقع کارول خورا ارزښت لري.

لغمان ولایت کې تندر دوه تنه وژلي

د افغانستان عمومي نقشه کې لغمان ولایت

د لغمان ولایت په قرغیو ولسوالۍ کې تندر دوه تنه وژلي دي.

دا خبره د لغمان ولایت مطبوعاتي دفتر په یوه اعلامیه کې کړې ده.

د اعلامیې له مخې، دا پېښه یکشنبه مازیګر مهال د قرغیو ولسوالۍ د چهارباغ په مفتي کلا سیمه کې شوې ده.

د تندر پرېوتو په دې پېښه کې د وژل شویو نومونه حسیب‌الله او نصیر یاد شوي.

بل چا ته په دې پېښه کې زیان نه‌دی اوښتی.

د ملا عبدالمنان نیازي زوی د هغه ځای ناستی وټاکل شو

د وسله‌والو طالبانو د انشعابي ډلې مخکېنی مرستیال ملا عبدالمنان نیازی

د وسله‌والو طالبانو د انشعابي ډلې د مرستیال ملا عبدالمنان نیازي مړی پرون په هرات کې خاورو ته وسپارل شو او زوی یې د هغه ځای ناستی وټاکل شو.

د راپورونو له مخې د ملا عبدالمنان نیازي د جنازې په مراسمو کې د طالبانو د انشعابي ډلې سلګونه پلویانو او غړو محمد خالد نیازی خپل مشر وټاکه.

خالد نیازي ازادي راډیو ته وویل چې د خپل پلار لار به تعقیبوي: "زه هم د حاجي صاحب هیلې پوره کوم. د هغه هیلې او اهداف یو امن افغانستان او ارامه او خوشحاله خلک و."

ملا عبدالمنان نیازی د طالبانو په دوره کې د بلخ او هرات والي پاتې شوی و. هغه د طالبانو د پخواني مشر ملا اختر منصور تر وژل کېدو وروسته د ملا محمد رسول په مشرۍ د انشعابي ډلې مرستیال وټاکل شو.

د هرات والي عبدالوحید قتالي ازادي راډیو ته وویل ملا نیازی تېره چهارشنبه د ادرسکن او ګذرې ولسوالیو ترمنځ په یوه برید کې سخت ټپي شوی و.

دی د درملنې لپاره کابل ته انتقال شوی و چې همالته‌یې ساه ورکړه او مړی یې یکشنبه هرات ته یوړل شو.

له افغانستانه به د امریکایي ځواکونو وتل تر 'ټاکلې نېټې مخکې' بشپړ شي

له افغانستانه د امریکايي ځواکونو د وتلو بهیر

له افغانستانه به د امریکایي ځواکونو د وتلو بهیر تر ټاکلې نېټې مخکې بشپړ شي.

دا خبره یوه غربي چارواکي چې د ځواکونو د وتلو د بهیر په اړه معلومات لري، د خپل نوم نه‌ښودلو په شرط اسوشیټډ پرس خبري اژانس ته کړې او ویلي یې دي چې ښایي د ټولو امریکایي ځواکونو د وتلو بهیر د جولای تر لومړیو پورې بشپړ شي.

دغه چارواکي په دې اړه نور جزئیات نه‌‍دي ورکړي ځکه د ځواکونو د وتلو څرنګوالی تر ډېره نه‌دی رسنیز شوی.

د امریکا د ولسمشر جو بایډن د پرېکړې له مخې له افغانستانه د ټولو امریکایي ځواکونو د وتلو لپاره د سپټبر ۱۱مه وروستۍ نېټه ټاکل شوې ده.

په عین حال کې د چین د بهرنیو چارو وزیر وانګ یي له افغانستانه په بېړه د امریکایي او ناټو ځواکونو د وتلو په اړه اندېښنه ښودلې.

د اسوشیټډ پرس د راپور له مخې نوموړي له خپل پاکستاني ساري د بهرنیو چارو له وزیر شاه محمود قریشي سره پرون شنبې په ټیلیفوني خبرو کې خبرداری ورکړ چې له افغانستانه د نړیوالو ځواکونو په بېړه وتل به د سولې پرروان بهیر ډېره بده اغېزه او هم به د سیمې پر امنیت منفي تأثیر وکړي. وانګ یي له ملګرو ملتونو غوښتي چې په دې برخه کې پراخ رول ولوبوي.

د افغانستان دفاع وزارت: کندز کې د طالبانو د استخباراتو مسؤل ونیول شو

د افغانستان دفاع وزارت له لوري محمد حسن ته منسوب خپور شوی انځور

د افغانستان دفاع وزارت د کندز په امام صاحب ولسوالۍ کې د طالبانو د استخباراتو د مسؤل د نیولو خبر ورکوي.

دې وزارت نن په خپره کړې خبرپاڼه کې یوازې دومره ویلي چې کمانډو ځواکونو د کندز ولایت امام صاحب ولسوالۍ لپاره د طالبانو استخباراتي مسؤل "محمد حسن" نن له یوه ټوپک او یوې تومانچې سره ونیو.

دفاع وزارت د دې پېښې په اړه نور جزئیات نه‌دي ورکړي، خو له دې مخکې یې دې ولسوالۍ ته د طالبانو په وړاندې د جګړې د پیاوړي کېدو لپاره د کمانډو د نویو ځواکونو د استولو خبره کړې وه.

د پامیر۲۱۷ قول اردو هم له دې مخکې ویلي و چې طالبانو تر کوچني اختر مخکې پر دې ولسوالۍ بریدونو ته زور ورکړی و.

د افغانستان عامې روغتیا وزارت: اختر کې نږدې ۴۰۰ کسان په کرونا اخته شوي

ارشیف، د کابل افغان-جاپان روغتون کې په کرونا ویروس اخته شوي ناروغان او یو مړ شوی کس

د افغانستان عامې روغتیا وزارت وایي، رسمي شمېرې یې ښیي چې د اختر په درې ورځو کې نږدې ۴۰۰ کسان پر 'کووېډ-۱۹' ناروغۍ اخته شوي دي.

د دې وزارت مرستیال ویاند میرویس علیزي ازادي راډیو ته وویل: "د اختر په درې ورځو کې کوم ارقام چې زموږ لاس ته راغلي، له ۲،۳۰۰ زیاتو هېوادوالو چې د کرونا ویروس باندې مشکوک و، د پي سي ار ټست لپاره لابراطوارونو ته مراجعه کړې ده. له دې ډلې ۳۹۶ یې مثبت دي، یعنې پر کرونا اخته شوي. همدارنګه پر کرونا اخته شوي ۹۳ کسان رغېدلي او په خواشینۍ سره ۱۷ کسانو هم ژوند له لاسه ورکړی دی."

له دې مخکې د عامې روغتیا او د حج او اوقافو وزارتونو له خلکو غوښتي و چې د اختر په شپو ورځو کې دې روغتیایي لارښوونې په پام کې ونیسي ترڅو د کرونا ویروس د چټک سرایت مخه ونیول شي.

په افغانستان کې د رسمي شمېرو له مخې په کرونا ۶۳ زره او ۵۹۸ کسان اخته شوي او له امله‌یې ۲،۷۴۵ کسان هم مړه شوي دي.

داعش د کابل په شکردره ولسوالۍ کې پر یوه جومات د حملې مسؤلیت واخیست

د کابل شکردره کې پر جومات له چاودنې وروسته د قربانیانو د کورنیو یو شمېر غړي

د اسلامي دولت ډلې یا داعش د کابل په شکردره ولسوالۍ کې پر یوه جومات د حملې مسؤلیت اخیستی.

د حاجي بخشي پر جومات د اختر په دوهمه د جمعې په ورځ په چاودنه کې لږترلږه ۱۲ کسان وژل شوي او شاوخوا ۱۵ نور ټپیان شوي وو.

په وژل شویو کې د دې جومات ملا مفتي نعمان هم شامل و. د جرمني د ډې پې اې خبري اژانس د راپور له مخې په هغه خبرپاڼه کې چې د داعش اړوند ناشر نیوز خبري رسنۍ پرون شنبه خپره کړې دغې ډلې ویلي وسله‌والو یې چاودېدونکې وسیله په دغه جومات کې خښه کړې وه.

طالبانو چې د اختر په مناسبت درې ورځنی اوربند اعلان کړی و هم دغه حمله غندلې او ویلي و چې په‌کې لاس نه‌لري.

د طالبانو او افغان حکومت ترمنځ درې ورځنی اوربند تېره نیمه شپه پای ته ورسېد او افغان چارواکي د افغانستان په یو شمېر ولایتونو کې د نښتو د بیا پیلېدو خبر ورکوي.

د درې ورځني اوربند پای؛ هلمند کې بیا نښتې پیل شوي

ارشیف، هلمند کې د افغان ځواکونو عملیات

د درې ورځني اوربند له پای ته رسېدو سره سم له هلمند څخه د نښتو د بیا پیلېدو راپورونه ورکول کېږي.

د اختر په مناسبت اعلان شوی اوربند تېره شپه ۱۲ بجې پای ته ورسېد.

د فرانسپرس اژانس د راپور له مخې د هلمند د مرکز لښګرګاه په لمنو کې د وسله‌والو طالبانو او افغان امنیتي ځواکونو ترمنځ نښتې بیا پیل شوې دي.

د هلمند د ولایتي شورا رئیس عطاالله افغان دې اژانس ته وویل چې نښتې نن سهار پیل شوې او تر اوسه دوام لري. هغه وویل، طالبانو د لښکرګاه په لمنو کې او یو شمېر نورو ولسوالیو کې پر یو شمېر امنیتي پوستو بریدونه پیل کړي دي.

د افغان پوځ یوه ویاند چې نوم‌یې نه‌دی ښودل شوی هم د جګړو د پیلېدو خبره تأیید کړې ده.

د طالبانو ویاند ذبیح‌الله مجاهد فرانسپرس ته ویلي چې جګړې مقابل لوري پیل کړي، خو افغان چارواکو تر اوسه په دې اړه څه نه‌دي ویلي.

محب: د دښمن هدف قدرت ته د طالبانو رسول نه، بلکې د خپلې جغرافیې پراخول دي

د افغانستان د ملي امنیت سلاکار حمدالله محب

د افغانستان د ملي امنیت سلاکار وايي، د "دښمن" هدف قدرت ته د طالبانو رسول نه، بلکې د خپلې جغرافیې پراخول دي.

حمدالله محب دغه خبرې پرون شنبه د ننګرهار په ګوشتې ولسوالۍ کې د وینا پر مهال وکړې.

د ملي امنیت شورا وايي، ښاغلي محب یوې ولسي غونډې ته وویل چې د ګوشتې ولسوالۍ ټولو اوسېدونکو د امن او سولې لپاره له امنیتي او دفاعي ځواکونو سره همکاري کړې ده.

ښاغلي محب ویلي چې د ولس په ویښتیا کې د ډیورند "فرضي" کرښې په دواړو غاړو کې د دیني عالمانو او ځوانانو نقش مهم دی.

ښاغلي محب تر دې مخکې هم په خپلو خبرو کې له طالبانو د پاکستان د ملاتړ په اړه تندې څرګندونې کړې وې.

نور راوښيه

XS
SM
MD
LG