د لاسرسۍ وړ لېنکونه

تازه خبر
دوشنبه ۲۳ وری ۱۴۰۰ کابل ۰۴:۵۲

نړۍ

د ایران اټمي موافقه؛ ویانا کې غونډه جوړېدونکې ده

د امریکا او ایران ګډ بیرغونه

په پام کې ده چې د ایران او د نړۍ د پیاوړو قدرتونو استازي د اپرېل په شپږمه نېټه به په ویانا کې غونډه وکړي.

اروپايي ټولنې چې د ایران د اټمي خبرو چارې تنظیموي نن جمعه (د وري ۱۳مه) په یوه بیان کې وویل، دا پرېکړه نن د ایران او نړیوالو پیاوړو قدرتونو په ګډون په یوه انلاین غونډه کې وشوه.

بیان زیاتوي چې ایران او د نړۍ پیاوړو قدرتونو چمتووالی ښودلی چې دې موافقې ته د امریکا د راستنېدو هرکلی وکړي.

د اروپايي ټولنې، چین، فرانسې، جرمني، بریتانیا او ایران په ګډون ډلې ویلي چې د نننۍ غونډې په پای کې ګډونوالو په یوه اعلامیه کې له ایران سره د ۲۰۱۵ میلادي کال د اټمي موافقې د احیا لپاره پر خپلو ژمنو ټینګار وکړ.

واشنګټن ویلي دي چې د ایران اټمي موافقې ته د راستنېدو لپاره په دوه اړخیزو اقداماتو کې ګډون ته چمتو دی.

خو ایراني رسنیو د ایران د بهرنیو چارو د مرستیال وزیر عباس عراقچي له قوله راپور ورکړی چې نوموړی وايي، د ۲۰۱۵ میلادي کال موافقې ته د امریکا د راستنېدو لاره اواره ده او مذاکراتو ته اړتیا نه لري.

د ورځې تازه خبرونه دلته ولولئ

تاجکستان کې یو تورن د پولیسو د یوې ودانۍ له کړکۍ له ټوپ اچولو وروسته مړ شو

ارشیف، د تاجکستان پولیس

په تاجکستان کې په غلا تورن هغه کس مړ شو چې د پولیسو د یوې ودانۍ له کړکۍ نه‌یې ټوپ اچولی و.

د تاجکستان کورنیو چارو وزارت وایي، دا پېښه پلازمېنې دوشنبې ته په ۱۹ کیلومتري واټن کې د وحدت ښار دننه شوې ده.

وزارت ویلي، تورن ۳۱ کلن مهردین ګادوزاده د پولیسو د ودانۍ له درېیم پوړه تر ټوپ کولو وروسته په روغتون کې ساه ورکړه.

د ښاغلي ګادوزاده کورنۍ تر اوسه په دې اړه څه نه‌دي ویلي.

د پولیسو خبرې هم تر اوسه کومې خپلواکې سرچینې نه‌دي تأیید کړي.

له کلونو راهیسې د بشري حقونو ملي او نړیوالې ډلې د تاجکستاني چارواکو له‌خوا د زندانیانو او تورنو کسانو د شکنجې یادونه کوي.

امریکا کې د پولیسو په ډزو د یوه تورپوستي له وژلو وروسته اعتراضونه پارېدلي

د امریکا بروکلین ښار کې د پولیسو د یوه مرکز مخې ته راټول شوي اعتراض کوونکي

د امریکا په مینیاپولیس ښار کې وروسته تر دې اعتراضونه وپارېدل چې یوه پولیس افسر یو ۲۰ کلن تورپوستی امریکایي په ډزو وواژه.

د ځایي پولیسو یوې ادارې ویلي، دغه تورپوستي کس چې موټر ته ناست و پولیسو یې د ټرافیکي سرغړونې له کبله د نیولو نیت درلود.

خبرپاڼه کې راغلي، کله چې پولیس تورن کس ته نږدې شول، هغه موټر ته کېناست او د تښتېدو هڅه‌یې کوله چې همدې وخت کې پولیس ډزې پرې وکړې.

پولیسو ویلي، دغه کس له یوه بل موټر سره له ټکر مخکې د سړک د سر څو موانع هم لاندې کړې دي.

دا پېښه داسې مهال وشوه چې پرون په بروکلین ښار کې پر هغو کسانو اوښکې بهوونکی ګاز وکارول شو چې د پولیسو د یوه مرکز مخې ته راټول شوي وو.

دغه مرکز کې د هغه پولیس محاکمه روانه ده چې نږدې کال وړاندې يې د جورج فلوید په نوم یو تورپوستی د نیولو پر مهال خفک کړی و.

انګلستان د کرونا ویروس له کبله لګول شوي محدودیتونه نرموي

ارشیف، لندن کې د کرونا ویروس ضد واکسین د تطبیق سیار کلینیک

انګلستان، سر له نن څخه د کرونا ویروس له کبله د لګول شویو محدودیتونو د نرمولو لپاره بل اقدام کوي.

دا په داسې حال کې ده چې په انګلستان کې په 'کووېډ-۱۹' ناروغۍ د اخته کېدونکو کسانو شمېر کم شوی او اکثریت پوخ ­عمره کسانو د دې ناروغۍ په وړاندې د واکسین لومړۍ ستن لګولې ده.

سر له نن دوشنبې څخه به، ټول دکانونه بېرته پرانیستل شي، خلک به وکړای شي سلمانیو ته لاړ شي او د عینې کورنۍ غړي کولای شي په انګلستان کې په رخصتۍ لاړ شي، خو چې په یوه استوګنځای کې واوسي او پخلی په خپله وکړي.

جېمونه، د لامبو حوضونه، کتابتونونه او ژوبڼونه به هم بېرته پرانیستل شي.

د بریتانیا صدراعظم بورېس جانسون د محدودیتونو کمېدل د ازادۍ پر لوري یو مهم ګام بللی دی، خو له خلکو غوښتنه کړې چې بیا هم احتیاط او مسؤلانه چلند وکړي.

ایران او پاکستان کې د کرونا له لاسه مړینې اوج ته رسېدلي

ایران کې د کرونا له امله د یوه مړه شوي ناروغ لپاره کېندل شوی قبر

د افغانستان په دوو ګاونډیو هېوادونو ایران او پاکستان کې د کرونا له لاسه مړینې اوج ته رسېدلې دي.

د ایران د روغتیا وزارت پرون اعلان وکړ چې دوی په تېر یوه شپه او ورځ کې له ډسمبر راهیسې د مړینو تر ټولو لوړ شمېر ثبت کړی.

د روغتیا وزارت ویاندې سیما لاري تأیید کړه چې په ۲۴ ساعتونو کې ۲۵۸ کسان د کرونا له لاسه مړه شوي.

د ایران ولسمشر حسن روحاني بیا وویل چې د مړینو د شمېر او د کرونا د مثبتو پېښو زیاتوالی په ایران کې د کرونا د انګلیسي بڼې د خپرېدو له امله دی چې د ده په خبره له عراقه ایران ته رسېدلی.

د ورلډ میټرس انفو وېب‌پاڼې له مخې په ایران کې پر کرونا د اخته خلکو شمېر له دوو ملیونو، ۷۰ زره او ۱۴۱ کسانو اوښتی چې له ډلې یې ۶۴ زره او ۴۹۰ کسان مړه دي.

اخوا په پاکستان کې 'کووېډ-۱۹' په یوه ورځ ۱۱۴ کسان مړه کړي.

په پاکستان کې د کرونا د څار ادارې چارواکو یکشنبه دا اعلان وکړ.

دې ادارې په خپل بیان کې اندېښنه ښودلې چې د ۱۱۴ کسانو مړینه بې‌سارې او د جدي اندېښنې وړ ده.

په پاکستان کې په کرونا د ټولو اخته خلکو شمېر له ۷۲۰ زره ۱۶۴ ته رسېږي چې له ډلې یې ۱۵،۴۴۳ کسان مړه شوي.

د قرغزستان خلکو د اساسي قانون تعدیل ته رایه ورکړه

قرغزستان کې د اساسي قانون تعدیل لپاره ټول‌پوښتنه

په قرغزستان کې خلکو د ټول‌پوښتنې له لارې د اساسي قانون تعدیل ته رایه ورکړه.

په دې اساس دوی د اوسني ولسمشر سادیر جباروف د واکونو له پراخېدو سره خپله موافقه وښوده.

د قرغزستان د ټاکنو مرکزي کمېسیون اعلان وکړ چې د رایو ۹۰ فیصده شمېرل شوي او ښيي چې ۷۹ فیصده رأی ورکوونکو د اساسي قانون له تعدیله ملاتړ کړی دی.

د ټول‌پوښتنې د اعتبار لپاره د رایو په شرایطو د برابرو کسانو له ډلې باید لږترلږه ۳۰ فیصده خلکو رایه ورکړې وی. د ټاکنو کمېسیون ویلي د خلکو ګډون ۳۵ فیصده و.

د نوي اساسي قانون له مخې ولسمشر د دې واک پیدا کوي چې د پارلمان ۲۵ فیصده څوکۍ کمې کړي او هم د محکمو او څارنوالیو مشران وټاکي.

د نوي اساسي قانون له مخې به یوه نوي مشورتي اداره رامنځته کېږي چې مشري به‌یې ولسمشر جباروف کوي. منتقدین وايي دا به د یوه موازي پارلمان حیثیت ولري چې د ولسمشر د واک دایره به لا پسې زیاته کړي.

راب: بریتانیا او امریکا اوکراین کې د روسیې بې ثباته هڅو سره مخالف دي

د بریتانیا د بهرنیو چارو وزیر ډومینیک راب

د بریتانیا د بهرنیو چارو وزیر وایي، بریتانیا او متحده ایالات په اوکراین کې د روسیې د هڅو چې هغه بې ثباته کوونکي بللې، کلک مخالف دي.

ډومینیک راب نن یکشنبه (د وري ۲۲مه) وویل، په وروستیو کې له اخېستل شوېو ویډیوګانو، تصویرونو او نورو اسنادو څخه ښکاري چې د روسیې وسله والو ځواکونو د اوکراین د پولو پر لور یا د لاندې کړې د اوکراین کریمیا ټاپو وزمې ته ډېر خوزښتونه پیل کړي چې ورسره دا اندېښنې چې ګوندې مسکو به د اوکراین ختیځې برخې ته د ځواکونو د استولو لپاره تیاری نیسي، زیاتې شوي دي.

کریملین د ځواکونو د په شا کولو لپاره د لویدیځ غوښتنې رد کړې او هم یې دا خبره چې دغو ځواکونو ګواښ رامنځته کړی، رد کړې ده.

کریملین ویلي، د روسیې د خاورې دننه یې د ځواکونو خوزښتونه د ملي حاکمیت مسئله ده.

ښاغلی راب دغه څرګندونې یوه ورځ وروسته له هغې کوي چې د اوکراین ولسمشر ولادیمیر زیلینسکې د ترکیې ولسمشر رجب طیب اردوغان ته د وضعیت په اړه معلومات ورکړل.

د دواړو لورو له خبرو وروسته اردوغان سیمه کې وروستي پرمختګونه د اندېښنې وړ وبلل او هیله یې ښکاره چې دغه لانجه د خبرو له لارې او د اوکراین د ځمکنۍ بشپړتیا سره سم له سوله ییزې لارې هواره شي.

ایران: د نطنز اټمي تأسیساتو کې الکترونیکې ستونزه پېښه شوې

نطنز اټمي تأسیسات

ایران نن یکشنبه (د وري ۲۲مه) د نطنز په اټمي تأسیساتو کې د یوې الکترونیکې ستونزې خبر ورکړ.

تر دې یوه ورځ مخکې په دغو تأسیساتو کې نوي پرمختللي سنټریفیوژونه فعال شوي و چې د یورانیمو د پخولو پروسه لا چټک کوي.

د ایران په تر ټولو خوندي اټمي تأسیساتو کې د حملې دغه وروستۍ پېښه داسې مهال رامنځته کېږي چې د نړۍ له قدرتونو سره د دې هېواد د اټمې تړون په اړه خبرې پیل شوي.

د ایران د اټمي انرژۍ د ادارې ویاند بهروز کمالوندي وویل، دغې پېښې تلفات نه دي اړولي او نه یې هم هوا ککړه کړې، خو زیاته یې کړه چې د نطنز د تأسیساتو برېښنا یې اغېزمنه کړې ده.

تېر کال د نطنز په اټمي تأسیساتو کې اور ولګېد چې حکومت هغه د ایران پر اټمي پروګرام د حملې هڅه بللې وه.

تر ځمکې لاندې د نطنز اټمي تاسیسات د ایران د یورانیمو د پخولو د پروګرام مهم ځای دی چې د نړیوالې اټمي انرژۍ د ادارې څارونکو پرې څارنه کړې.

د دغې حملې او د ځینو نورو حملو تورونه پر اسراییل چې په سیمه کې د ایران یو سر سخت دښمن ګڼل کېږي، لګول شوي دي.

قرغېزستان کې نن خلک د رایې مرکزونو ته ځي

قرغېزستان کې رایې اچونې ته په نوبت ولاړ دي

په قرغېزستان کې خلک نن یکشنبه (د وري ۲۲مه) د رایې مرکزونو ته ځي چې هغه نوي اساسي قانون ته رایه ورکړي چې د ولسمشر واک پیاوړی او د پارلمان واک کمزوری کېږي.

دغه ټول پوښتنه یا ریفرانډم درې میاشتې وروسته له هغې ترسره کېږي چې صدرجپاروف د یوه سیاسي کړکېچ په نتیجه کې د ولسمشر په توګه غوره شو.

د تېر کال په اکتوبر کې د پارلماني انتخاباتو وروسته د نوي حکومت په وړاندې پراخ اعتراضونه وشول چې په نتیجه کې یې دغه حکومت نسکور شو.

جپاروف چې د پخواني ولسمشر سورونبای جینبیکوف تر استعفا وروسته د دغه سیاسي بحران په نتیجه کې د مؤقت ولسمشر په توګه غوره شوی و، د تېر کال په نوومبر کې یې د اساسي قانون نوې مسوده تصویب کړې وه.

چین: د کرونا ضد واکسین د تولید شوېو ډوزو شمېر له ۳ میلیارده اوړي

د چین له لوري جوړ شوی واکسین

د چین یو چارواکی وايي، دغه هېواد کې به د روان ۲۰۲۱میلادي کال تر پایه د کرونا ضد واکسین د تولید شوېو ډوزو شمېر له ۳ میلیارده واوړي.

د چین د روغتیا ملي کمېسیون یوه چارواکي ژینګ ژونګوۍ چې د کرونا ضد واکسین د پرمختیايي پروژو مشري هم کوي، پرون شنبه (د وري ۲۱مه) د چین په سیچوان ولایت کې د یوې غونډې پرمهال وکړې.

د پاکستان په ګډون د نړۍ په ځینو هېوادونو کې په چین کې د کرونا ضد د جوړ شوي واکسین لګولو ته اجازه ورکړل شوې ده.

شهزاده چارلز د فیلیپ د مړینې په تړاو د خلکو له خواخوږۍ مننه وکړه

شهزاده چارلز

شهزاده چارلز وايي، شاهي کورنۍ د شهزاده فیلیپ تر مړینې وروسته د نړۍ په بېلابېلو برخو کې د خلکو د ملاتړ له کبله منندویه ده.

شهزاده چارلز چې د بریتانیا د تخت او تاج وارث ګڼل کېږي، پرون شنبه )د وري ۲۱مه) په یوه اعلامیه کې وویل، پلار یې یو ځانګړی شخصیت و.

ده د فیلیپ د مړینې په تړاو د خلکو د خواخوږۍ مننه وکړه.

شهزاده فیلیپ چې د دویمې الیزابت خاوند دی، د ۹۹ کلونو په عمر تېره جمعه له دې نړۍ سترګې پټې کړې.

بکینګهم ماڼۍ ویلي، خاورو ته د شهزاده فیلیپ د سپارلو مراسم به را روانه شنبه په خصوصي ډول ترسره شي.

د جرمني پارلمان: زندان کې دې له ناوالنۍ سره شوی چلند وڅېړل شي

الکسي ناوالنۍ

د جرمني د پارلمان غړو د روسیې د حکومت له سیاسي مخالف الکسي ناوالنۍ سره د مسکو چلند هدفمنه شکنجه وبلله.

دغه پارلمان د شکنجې د مخنیوي لپاره د اروپا له ځانګړي شوي کمېسیونه غوښتنه وکړه چې په زندان کې له ناوالنۍ سره شوی چلند وڅېړي.

د جرمني د پارلمان غړو په یوه لیک کې چې پرون شنبه(د وري ۲۱مه) په فېسبوک کې خپور شو، له الکسي ناوالنۍ سره چلند د شکنجې د مخنیوي لپاره اروپايي کمېسیون له کنوانسیون سره په ټکر کې وبلل شو.

په لیک کې راغلي چې روسیه هم د اروپايي شورا د غړي په توګه د دغه کنوانسیون یوه غړې ده.

د روسیې سیاسي مخالف الکسي ناوالنۍ په تېره جنورۍ میاشت کې له جرمني له ستنېدو سره سم د مسکو په یوه هوايي ډګر کې ونیول شو.

هغه په یو ډول زهرجنو کیمیاوي موادو مسموم کړای شوی و چې بیا د درملنې لپاره جرمني ته ولېږدول شو.

لوېډ اسټن د امریکا متحدو هېوادونو ته د سفر لړۍ پیلوي

د دفاع وزیر لوېډ اسټن

د پنټاګون مشر نن شنبه (د وري ۲۱مه) د امریکا متحدو هېوادونو ته د سفر لړۍ پیلوي.

د دفاع وزیر لوېډ اسټن دا سفر داسې مهال پلان شوی چې د اوکراین او روسیې په اړیکو کې کړکېچ په زیاتېدو دی.

اسټن به په را روانه اوونۍ کې د اسرائیل، جرمني او بریتانیا له حکومتي او پوځي مشرانو سره وګوري او د اپرېل په ۱۴مه به په بروکسل کې د ناټو په مقر کې له عمومي منشي ینس سټولټنبرګ سره په کتنه کې د روسیې د بې ثباته کوونکي چلند د مخنیوي لپاره د ټلوالې د اقداماتو پر څرنګوالي بحث وکړي.

پنټاګون د پنجشنبې په ورځ په یوه بیان کې وویل، اسټن به له خپلو سیالانو او چارواکو سره په کتنو کې د نړیوالو دفاعي اړیکو د اهمیت په اړه خبرې وکړي او د ګډې دفاع، د مسوولیتونو د وېش او د اتلانتیک د دواړو غاړو د هېوادونو د دایمي امنیت لپاره د متحدوایالاتونو پر ژمنه به ټینګار وکړي.

د یونان پلازمېنه کې د جنایي پېښو یو خبریال وژل شوی

د سټار ټلوېزیون خبریال ګیورګوس کارایواز 

د یونان په پلازمېنه اتن کې د جنایي پېښو یو خبریال په ډزو وژل شوی.

دا د اروپايي ټولنې په یوه غړي هېواد کې د یوه خبریال د وژنې نادره پېښه ده.

پولیس او سیمه ییزې رسنۍ وايي، د سټار ټلوېزیون خبریال ګیورګوس کارایواز Giorgos Karaivaz چې یو خبري بلاګ یې هم درلود پرون د اپرېل په نهمه د خپل کور د مخې پر سړک د دوو موټر سایکل سپرو په ډزو ووژل شو.

د یوې سیمه ییزې ورځپاڼې د راپور له مخې ګاونډیانو د ډزو غږ نه دی اورېدلی، نو ښايي نوموړی د بې غږه تومانچې په وسیله وژل شوی وي.

د دې قتل د احتمالي عواملو په اړه څه نه دي ویل شوي، خو د ده پر بلاګ په یو بیان کې ویل شوي چې کارایواز د خپل کار په خاطر په نښه شوی دی.

د ایران د اټمي تړون په پار د غونډو لومړی پړاو پای ته ورسېد

ویانا کې د ایران د اټمي تړون د بیا را ژوندي کولو غونډه

په پلازمېنه ویانا کې د ایران د اټمي تړون د بیا را ژوندي کولو د غونډو لومړی پړاو پرون جمعه (د وري ۲۰مه) له پرمختګ پرته پای ته ورسېد، خو ډیپلوماتانو دا څلور ورځنۍ غونډې ګټورې وبللې.

اروپایي ټولنه د دې خبرو کوربتوب کوي او هڅه یې دا ده چې د امریکا متحد ایالاتونه او ایران بېرته د دوه زره پنځلسم کال د اټمي تړون ژمنې پرځای کړي.

د امریکا او ایران ډیپلوماتانو د دې غونډو پر مهال مخامخ خبرې سره ونه کړې، خو د اټمي تړون د نورو خواوو، بریتانیا، چین، فرانسې، جرمني او روسیې استازیو له ایراني لوري سره د شته اختلافاتو پرسر خبرې وکړې.

د متحد ایالاتونو پخوانی ولسمشر ډونالډ ټرمپ په دوه زره اتلسم کال کې له دې تړونه بهر شو او پر ایران یې نور سخت بندیزونه ولګول.

دوه کاري ډلې جوړې شوې دي، یوه یې هڅه کوي چې واشنګټن وهڅوي چې بندیزونه لېرې کړي او بله ډله ایران هڅوي چې د تړون ژمنې پرځای کړي.

امریکا: د ایران کاري ډله بېرته خپلې خبرې پيلوي

د امریکا او ایران ګډ بیرغونه

د امریکا د بهرنیو چارو وزارت وایي، د ایران کاري ډله بېرته خپلې خبرې پيلوي.

د دغه وزارت ویاندې جالینا پورتر د جمعې (د وري ۲۰مه) په ماښام وویل، واشنګټن تمه لري چې دا ډله راتلونکې اوونۍ خپل کار پيل کړي.

دې وویل، اوس مهال د دواړو هېوادونو پلاوي د مشورو لپاره خپلو پلازمېنو ته بېرته ګرځیدلي دي.

د امریکا او ایران د اټمي خبرو منځګړیتوب په اټمي تړون کې ښکېل اروپایي او د نړۍ نور ستر قدرتونه کوي.

د نړۍ له شپږو پياوړو هېوادونو سره د ایران اټمي موافقه ۲۰۱۵ میلادي کال کې لاسلیک شوه، خو د امریکا پخوانی ولسمشر ۲۰۱۸ کال کې له دې موافقې ووت.

نور راوښيه

XS
SM
MD
LG