د لاسرسۍ وړ لېنکونه

تازه خبر
شنبه ۴ چنګاښ ۱۴۰۱ کابل ۱۰:۲۰

افغانستان

د کندهار صنعتي ښارګوټي کې د ممیزو د پروسس فابریکه پرانېستل شوه

د کرنې وزیر له خوا د کندهار په صنعتي ښارګوټي کې د ممیزو د پروسس فابریکه پرانيستل شوه

د افغانستان د کرنې وزیر له خوا د کندهار په صنعتي ښارګوټي کې د ممیزو د پروسس فابریکه پرانېستل شوه.

د کرنې، اوبو لګولو او مالدارۍ وزارت ویاند اکبر رستمي نن چهارشنبې(د وري ۱۱مه) ازادي راډیو ته وویل چې د کندهار په صنعتي ښارګوټي کې د ۲۴میلیونو افغانیو په لګښت چې د کرنې وزارت له خوا ورکول کېږي د ممیزو د پروسس فابرېکه ګټې اخېستنې ته وسپارل شوه.

نوموړي زياته کړه چې د دې فابريکې د جوړولو موخه بهرنيو هېوادونو ته په لوړ کيفيت د مميزو صادرول دي.

ښاغلي رستمي وويل چې کندهار د انګورو له لويو توليدوونکو ولايتونو څخه دی او د دې ولايت د انګورو محصولاتو خوندي کولو او د انګورو بڼوالو د عوايدو زياتوالی او معياري مميزو د توليد لپاره تېر کال د کرنې وزارت له خوا په دې ولايت کې څه باندې ۹۰۰معياري مميز خونې جوړ شوي دي او په راتلونکي کال کې به نورې هم جوړ شي.

کندهار د انګورو له لويو توليدوونکو ولايتونو څخه دی چې د کال زرګونه ټنه انګور توليدوي.

د مميزو د پروسس د يادې فابريکې په پرانېستې سره به مميز په معياري ډول پروسس او کورنيو او بهرنيو هېوادونو ته به صادر شي چې د بڼوالو د اقتصادي ودې ترڅنګ به د ملي اقتصاد د ودې لامل هم شي.

د ورځې تازه خبرونه دلته ولولئ

اروپايي اتحادیې له افغان زلزله ځپلو سره د یو میلیون یورو مرسته اعلان کړه

په پکتیکا کې د وروستۍ زلزلې له امله د نړېدلي کور انځور

اروپايي اتحادیې د افغانستان له زلزله ځپلو سره د یو میلیون یورو مرسته اعلان کړه.

دې اتحادیې په یوې اعلامیې کې ویلي، چې په دې نغدو پیسو به زلزله ځپلو ته لومړني روغتیايي خدمات، د څښاک اوبه، سرپناه او درمل برابر کړل شي.

پرون د بریتانیا د بهرنیو چارو وزیرې لیز ترس اعلان وکړ، چې هېواد به یې افغان زلزله ځپلو ته دوه نیم میلیون پونډه مرسته وکړي.

تر دې مخکې تایوان او جنوبي کوریا هر یو یو – یو میلیون ډالره مرسته اعلان کړې وه.

ملګري ملتونه د افغان ښځو پر وضعیت بېړنۍ غونډه جوړوي

ارشیف: په کابل کې د یو شمېر ښځو له لوري د کار، ډوډۍ او زده کړو د غوښتنې په خاطر د سوله ییز لاریون انځور. May 26 2022

د ملګروملتونو د بشري حقونو شورا د افغان ښځو او نجونو پر وضعیت د خبرو لپاره بیړنۍ غونډه جوړوي.

دې شورا پرون پر خپله ټویټرپاڼه کښلي چې دا ناسته به د راتلونکې جولای په لومړۍ نېټه دایره شي.

د ملګروملتونو د بشري حقونو کمېشنرې میشل باچلې لس ورځې وړاندې د جون ۱۵مه په جینیوا کې د ملګروملتو د بشري حقونو د شورا په غونډه کې طالبان د افغان ښځو او نجونو پر سیستماتیکې ځپنې تورن کړل.

دې دا هم وویل، چې افغانان د یوه نسل تر ټولو تیاره شطبې تجربه کوي.

افغان زلزله ځپلي د ژوندانه لومړنیو توکو د نشتون یا کمښت سره مخ دي

په پکتیکا کې د وروستۍ زلزلې له امله د نړېدلو کورونو انځور

نړیوال خبري اژانسونه وايي، سره له دې چې د افغانستان زلزله ځپلو سیمو ته بشري مرستې استول شوي خو پرون جمعه د زلزله ځپلو سیمو ډېرو اوسېدونکو وویل چې لا هم د څښاک د اوبو، خوړو او سرپناه د نشتوالي یا کموالي له ستونزې کړېږي.

د فرانس پریس خبري اژانس د راپور له مخې، یو شمېر کلي یو مخ ویجاړ شوي او له زلزلې څخه روغ وتلي کسان وايي، چې حتی د خپلو مړو د ښخولو لپاره وسایل نه شي موندلی.

دوی د څښاک اوبو، خوړو او سرپناه له کموالي شکایت کوي او لویه اندېښنه یې دا ده چې که ژمی راغی نو به څه کوي.

په افغانستان کې د وروستۍ زلزلې د مړو شمېر ۱۱۵۰ کسانو ته ورسېد

د زلزلې له امله د مړو شویو کسانو جسدونه

د طالبانو د حکومت د سرچینو په وینا په افغانستان کې د وروستۍ زلزلې د مړو شمېر ۱۱۵۰ کسانو ته ورسېده.

یونېسیف وايي، د قربانیانو په ډله کې لږترلږه ۱۲۱ ماشومان هم شامل دي.

په افغانستان کې د یونېسیف استازي محمد ایو یا ویلي، چې په دې سخته زلزله کې همداراز نژدې اویا نور ماشومان هم ټپیان شوي دي.

د چارشنبې په ورځ د افغانستان په جنوب ختیځ کې یوه سخته زلزله وشوه، چې شدت یې د ریښتر په مقیاس ۶،۱ و. دې زلزلې تر ټولو زیات تلفات په پکتیکا او خوست ولایتونو کې اړولي دي.

طالبان: نړیواله ټولنه دې د زلزلې له ټپیانو سره مرسته وکړي

په سویل ختیځ کې زلزله ځپلو سره د مرستې رسونې انځور

د طالبانو حکومت له نړیوالې ټولنې څخه د وروستۍ زلزلې له ټپیانو سره د مرستې غوښتنه کړې.

د طبیعي پېښو پر وړاندې مبارزې د وزارت ویاند محمدنسیم حقاني رویټرز خبري آژانس ته ویلي، چې په دې زلزله کې لس زره کورونه یا په بشپړ ډول یا څه ناڅه نړیدلې دي، خو نوموړی زیاتوي چې د طالبانو د حکومت د روغتیا وزارت کافي درمل نه لري.

حقاني ویلي دي، چې دا یوه لویه غمیزه وه نو ځکه د طالبانو حکومت صحي مرستو او نورو د ضروري شیانو ته اړ دی.

طالبان: هند او نورو هېوادونو کې روزل شويو افغان پوځیانو ته دندې ورکوو

په هند کې روزل شوي افغان نظامیان

د طالبانو د حکومت د کورنیوچارو وزارت وايي، چې په هند او نورو هېوادونو کې روزل شوي افغان پوځیان به په دندو وګوماري.

د دې وزارت ویاند عبدالنافع ټکور بېګا له آزادۍ راډیو سره په خبرو کې په بهر کې روزل شوي افغان پوځیان د هېواد شتمني وبلله.

هغه وویل: "په هند او نورو هېوادونو کې روزل شوي افغان نظامیان د وطن کدري شتمني ده. د اسلامي امارت د کورنیو چارو وزارت تیار دی چې یاد کسان د خپلو زده کړو او مسلک مطابق پر دندو وګوماري."

د طالبانو حکومت په هند کې روزل شویو افغان پوځیانو ته په دولتي چوکاټ کې د دندو د ورکولو ژمنه داسې مهال کوي چې هند د پنجشنبې په ورځ په کابل کې خپل سفارت ته یوه تخنیکي ډله واستوله او په دې توګه یې په افغانستان کې خپل ډيپلوماتیک حضور یوځل بیا پیل کړ.

د کندهار برېښنا شرکت دوه انجنيران په ترافيکي پېښه کې مړه شوي

د افغانستان په عمومي نقشه کې د کندهار ولايت موقعيت

د کندهار د برېښنا شرکت دوه انجنیران پرون ناوخته د کندهار - هلمند پر لویه لار په ترافیکي پیښه کې مړه شوي دي.

د برېښنا شرکت پرونۍ اعلامیه وايي، دغه کسان له یوې نیمې میاشتې راهیسې د کجکي د برېښنا فابریکه کې په کار بوخت وو، چې د راستنېدو پر مهال یې د کندهار ـ هلمند پر لویه لار ټکر وکړ او دواړو ساه ورکړه.

برېښنا شرکت وايي دوه نور کارګران یې ټپیان شوي دي.

پکتيکا کې بيا ځلې زلزلې نن ۵ تنه مړه کړل

پکتيکا کې د تېرې چهارشنبې د زلزلې له امله د رامنځته شوې ويجاړۍ انځور

د طالبانو سرپرست حکومت د روغتیا وزارت په یوه خبرپاڼه کې ویلي چې دا زلزله نن له غرمې مخکې شااوخوا ۱۰ بجې شوې ده.

د دغه وزارت ویاند ډاکتر شرافت زمان ویلي، په دغې زلزله کې تر ۱۱ زیات نور کسان ټپیان شوي دي.

د امریکا د جیولوژي سروې ادارې ویلي چې د نن ورځې د دغې زلزلې قدرت ۴،۳ ریښتر درجې و.

دا په داسې حال کې ده چې د طالبانو د چارواکو په وینا، د افغانستان په پکتیکا او خوست ولایتونو کې د چهارشنبې سهار وختي زلزلې امله شا او خوا زر تنه وژل شوي او سلګونه نور ټپيان شوي دي.

خپلواکو سرچینو تر اوسه دا شمېرې نه‌دي تأیید کړي.

د طالب چارواکو په وینا د دغې زلزلې تر ټولو ډېر زیان د پکتیکا ولایت ګیانې او برمل ولسوالیو ته رسېدلی دی.

پکتيکا او خوست ولايتونو ته د مرستو د لېږد لړۍ پيل شوې

له ايرانه را استول شوې مرسته

د طالبانو د حکومت له پېښو سره د مبارزې وزارت وايي، په پکتیکا او خوست ولایتونو کې زلزله ځپلو کورنیو ته د خوراکي، غیر خوراکي او نغدو پیسو د لېږد لړۍ پیل شوې ده.

د دغه وزارت مرستیال مولوي محمد نسیم حقاني تېره شپه ازادي راډیو ته وویل، پېښو ته د رسېدو په چارو کې د دولت وزارت له لارښوونې سره سم، له کابل څخه ۱۵۰۰خیمې، ۱۵۰۰ بورۍ وریجې، ۱۵۰۰ بورۍ غنم، ۱۰۰۰ چریکي بسترې، ۱۰۰ خوراکي کڅوړې او ۱۰۰ میلیونه افغانۍ د خوست او پکتیکا ولایتونو زلزله ځپلو ته استول کېږي.

د افغانستان له زلزله ځپلو سره پر کور دننه او بهر کمسارې مرستې وشوې او د مرستو د اعلان لړۍ لا هم روانه ده.

هند په افغانستان خپل ډيپلوماټيک حضور پيل کړ

د هندوستان بيرغ

هندي رسنیو راپور ورکړ چې دغه هېواد پرون (پنجشنبې) په کابل کې خپل سفارت ته تخنیکي ټیم ولېږه او په دې توګه یې یو وار بیا په افغانستان کې ډیپلوماتیک حضور پیل کړ.

د هندي رسنیو د راپورونو له مخې، دا ډله د بشري مرستو د اغېزمن ارسال هڅې څاري او له افغانانو سره به د اړیکو د غښتلي کولو هڅې کوي.

د هند یوه بله ډله مخکې د بشري مرستو د چارو د څارنې لپاره کابل ته تللې وه. دغه ټیم د طالبانو له جګپوړو غړو سره وکتل او د افغانستان امنیتي وضعیت یې و ارزاوه.

هند د تېر کال په اګست میاشت کې کابل ته د طالبانو له ننوتلو وروسته خپل ډیپلوماتان له افغانستانه وایستل.

تايوان د افغانستان له زلزله ځپلو سره د يو ميليون ډالرو مرستې ژمنه وکړه

د تايوان تايپي ښار

د تایوان حکومت ژمنه وکړه چې د افغانستان له زلزله ځپلو سره د یو میلیون ډالرو مرسته کوي.

د تایوان د بهرنیو چارو وزارت پرون (پنجشنبې) په یوه خبرپاڼه کې ویلي چې افغان زلزله ځپلو ته د یو میلیون امریکايي ډالرو مرستې پرېکړه یې وروسته له دې وکړه چې د بېلابېلو شریکو هېوادونو له متخصصانو سره یې مشوره وکړه.

له دې جلا د تایوان د ولسمشرې وياندې کشاویر چانګ په یوه بیان کې وویل چې د دغه هېواد ولسمشرې تاسي اینګ وین د افغانستان د زلزلې د قربانیانو له کورنیو سره خواخوږي څرګنده کړې ده.

انالنا بریوک: د طالبانو له واک ته رسېدو وروسته ۲۱ زره افغانان جرمني ته ورغلي

د جرمني د بهرنیو چارو وزیره انالنا بریوک

د جرمني یوه چارواکې وايي، د تېر کال په اګست کې د طالبانو له واک ته رسېدو څخه راوروسته تر ۲۱ زره ډېر افغانان جرمني ته ورغلي دي.

د جرمني حکومت ژمنه کړې، هغه افغانان، چې د جرمني له پوځ او نړیوالو موسسو سره یې کار کړی دی او همدا راز هغه افغانان چې د طالبانو له لوري له خطر سره مخامخ دي، خپل هېواد ته بیايي.

د جرمني د بهرنیو چارو وزیرې انالنا بریوک پرون (پنجشنبه) وویل، په مجموع کې د هغو افغانانو په درو کې دوې برخې، چې د جرمني د مهاجرت اجازه یې ترلاسه کړې ده، دې هېواد ته رسېدلي دي.

د افغانستان سوداګرۍ خونې د روسيې له يوې خصوصې څانګې سره قرارداد لاسليک کړ

ارشيف

د افغانستان د سوداګرۍ او پانګونې خونو د روسیې له یوې خصوصي څانګې سره د همکارۍ قرارداد لاسلیک کړ چې پر اساس یې د کابل – مسکو ترمنځ سوداګري راکړه ورکړه زیاتېږي.

د سوداګرۍ او پانګونې خونو رييس محمد یونس مومند ازادي راډیو ته وویل، د دې موافقې پر اساس به افغان سوداګر له روسیې څخه په نسبتاً ښه بیه غنم او تېل رانیسي.

نوموړي وويل، همکاري به تر ډېره د صادراتو او وارداتو برخه کې پياوړې شي او دغه راز د ترانزيټ او ترانسپورت برخو کې هم د همکارۍ ژمنې شوي دي.

نورستان او کونړ کې د ورښتونو له امله ۲۰ تنه مړه شوي دي

نورستان

په نورستان او کونړ ولایتونو کې وروستیو بې وخته درنو واورو د سر و مال تاوانونه اړولي دي.

تر دې مخکې پرون د کونړ ځايي چارواکو د سختې واورې د اورېدو له کبله په دغه ولایت کې د ۲۰ تنو د مړینې خبر ورکړ.

د دوی په وینا د کونړ د څوکۍ ولسوالي په دیوه ګل دره کې د واورې د اورېدو له امله ۱۲ ماشومان مړه شوي دي.

له دې جلا د کونړ په کومار کلي کې د درنې واورې په وجه د یوه کور د چت د پرېوتو په پېښه کې د یوې کورنۍ ۸ غړي مړه شوي او ۳ نور ټپیان شوي دي.

ځايی سرچینې وايي چې په مړو شویو کسانو کې ۴ ماشومان او ۳ ښځې دي.

د طالبانو تر کنټرول لاندې باختر خبري اژانس د ځايي چارواکو په قول راپور ورکړی چې د واورې د اورېدو له کبله په کونړ کې سلګونه څاروي هم مړه شوي دي.

د نورستان د اطلاعاتو او فرهنګ ريیس مولوي سميع الحق حق بيان وايي، ورښتونو په دې ولایت کې د سر و مال زیانونه اړولي دي.

کونړ: د يوه کور د چت پرېوتو له امله ۶ تنه مړه شوي

د افغانستان په عمومي نقشه کې د کونړ ولایت موقعیت

د کونړ مرکز اسعداباد کلي کې د یوه کور د چت پرېوتو له امله ۶ تنه مړه او څلور ټپیان دي.

ویل شوي دغه کور د زیات اورښت له کبله راپرېوتی دی.

د کونړ د اطلاعاتو او کلتور سرپرست رئیس مولوي نجیب اله حنیف د پنج­شنبې ورځ ازادي راډیو ته وویل، په مړو او ټپیانو کې ښځې او ماشومان هم شامل دي.

نور راوښيه

XS
SM
MD
LG