د لاسرسۍ وړ لېنکونه

تازه خبر
چهارشنبه ۱ غویی ۱۴۰۰ کابل ۰۰:۲۴

افغانستان

ولسمشر غني بیا د واک د لېږد لپاره پر انتخاباتو ټینګار وکړ

د افغانستان ولسمشر

د افغانستان ولسمشر یو ځل بیا د واک د لېږد لپاره پر انتخاباتو ټینګار وکړ.

محمد اشرف غني نن سې شنبه (د وري ۱۰مه) د استانبول پروسې په نهم کنفرانس کې د تاجکستان په پلازمېنه دوشنبې کې دا هم وویل چې د دې ټاکنو څارنه دې په نړیواله کچه وشي.

ښاغلي غني زیاته کړه چې د اوربند څارنه دې هم نړیوال وکړي او کله چې افغانان د سولې یوه توافق ته رسیږي، دا به د لویې جرګې له لوري تاییدیږي.

د استانبول پروسې د نهم کنفرانس نن دوهمه او وروستۍ ورځ ده او تمه ده چې تردې وروسته په ترکیه کې د افغانستان د سولې په خاطر غونډه جوړه شي.

په دې غونډه کې ټاکل شوې ده چې د افغانستان د دولت او طالبانو د استازیو سربېره د سیمې او نړۍ د یو شمېر هېوادو استازي ګډون وکړي.

د ورځې تازه خبرونه دلته ولولئ

پکتیکا کې زیاته پیمانه امونیم نایټرېټ مواد ضبط شول

پکتیکا کې نیول شوي امونیم نایټرېټ

په پکتیکا کې سرحدي ځواکونه په زیاته پیمانه د امونیم نایټرېټ موادو چې په چاودېدونکو توکو کې هم ترې کار اخیستل کېږي، د ضبطولو خبر ورکوي.

په پکتیا کې د ۲۰۳ تندر قول اردو د دوهمې سرحدي لوا قوماندان ډګروال ګوجرخان امان وایي، په ۱۵۵ بوجیو کې دغه مواد چې له پاکستانه په قاچاقي توګه راوړل شوي و، د دې ولایت په تروې ولسوالۍ کې نیول شوي دي.

ښاغلی امان زیاتوي: "په دې باندې د پاکستان مارک دی. له دې ځایه دښمن غوښتل چې دغه مواد د افغانستان نورو ولایتونو ته ولېږدوي."

د ښاغلي امان په وینا په ډېرو ماینونو کې له دغو موادو چې د تخریب اندازه‌یې زیاته ده، کار اخیستل کېږي.

ماین چاودنې د زابل د ولایتي شورا رئیس عطاجان حق بیان ټپي کړی

د زابل د ولایتي شورا رئیس عطاجان حق بیان

د زابل د ولایتي شورا رئیس عطاجان حق بیان د والي د دفتر پر ودانۍ کې د ځای پرځای شوي ماین په چاودنه کې ټپي شوی.

د زابل امنیې قوماندان جنرال محمد ویس صمیمي ازادي رادیو ته وویل، چاودنه نن سې شنبه (د وري ۳۱مه) غرمه ۱۱ نیمي بجې د زابل د والي په دفتر کې هغه مهال رامنځته شوه چې امنیتي چارواکي د یوې امنیتي غونډې لپاره راټول شوي وو.

د صمیمي په وینا ښاغلی حق بیان د درملنې لپاره روغتون ته لېږدول شوی او روغتیایي وضعیت یې د ډاډ وړ دی.

هغه زیاته کړه، په دې اړه چې دغه ماینونه چا ایښي وو، پلټنې پیل شوي دي.

د ښاغلي صمیمي په وینا شپږ ماینونه د ودانۍ په چت کې ایښودل شوي وو چې یوه یې انفجار کړی او له ښاغلي حق بیان پرته بل چاته زیاند نه دی رسیدلی.

تر اوسه د دې پېښې مسؤلیت چا یا کومې ډلې نه دی اخېستی.

ملي امنیت په تخار کې د انسان تښتونکو یوه ۶ کسیزه ډله نیولې

ارشیف

د افغانستان ملي امنیت په تخار ولایت کې د انسان تښتونکو د یوې ډلې د نیولو خبر ورکوي.

د ملي امنیت د عمومي ریاست له لوري په خپره شوې خبرپاڼه کې راغلي چې د انسان تښتونکو دغه شپږ کسیزه ډله د ځانګړو ځواکونو په عملیاتو کې نیول شوې ده.

په اعلامیه کې راغلي چې د دغه ډلې مشر چې منګل نومېږي، د جنايي جرمونو او تروریستي کړونو په تور زنداني شوی وو، خو څه موده وړاندې د طالبانو د زندانیانو د لېست له مخې ازاد شو.

اعلامیه وايي، نیول شوې ډلې پلان درلود چې په تالقان ښار کې درې ملي سوداګر اختطاف کړي، خو هدف ته تر رسېدو وړاندې ونیول شول.

په اعلامیه کې راغلي دي چې له یادې ډلې سره یوه اندازه وسلې او مهمات هم نیول شوي دي.

رستمي: د غوا او وریو د غوښې کلنۍ تولید یو نیم میلیون ټنو ته ورسېد

د افغانستان د کرنې، اوبو لګولو او مالدارۍ وزارت وايي چې د غوا او پسونو د غوښې کلنۍ تولید کچه څه باندې یو نیم میلیونه مټریک ټنو ته رسېدلې ده.

د دغه وزارت ویاند اکبر رستمي نن سې شنبه (د وري ۳۱مه) ازادي راډیو ته وویل، د غوښې ډېری تولېدونکي او مصرف کوونکي کابل، بلخ، کندهار، هرات، ننګرهار او ځینې نور ولایتونه دي.

دی وايي: "په ۱۳۹۹ لمریز کال کې د هېواد په کچه د وري، وزې او غواوو یو میلیون او ۵۸۹ زره او ۲۶۹ مټریک ټنه غوښه تولید او مصرف شوي دي."

د ښاغلي رستمي په خبره، د تولید شوېو غوښو له ډلې ۹۱۲ زره او ۳۸۷ مټریک ټنه یې د غوا او ۶۷۶ زره او ۸۸۲ مټریک ټنه نور یې د وزې او وریو غوښې دي.

د کرنې وزارت وايي، دم ګړۍ په ټول هېواد کې د غوښینو غواوو، وریو او وزو دوه زره او ۹۵۰ فارمونه موجود دي چې له دې ډلې یو زرو ۶۲ یې د غوښینو غواوو، ۹۳۲ یې د وریو د پالنې فارمونه او ۹۵۶ یې د وزو د پالنې فارمونه دي.

دا مهال د افغانستان په بازارونو کې د غوا او وریو یو کیلو غوښه له ۳۰۰ تر ۵۰۰ افغانۍ پلورل کېږي.

د احصايي اداره: تېرکال واردات ۳,۵ سلنه او صادرات ۱۰ کم شوي وو

تېره ورځ د احصایې او معلوماتو ملي اداره کې د ۱۳۹۹ کال د احصائیوي کلنۍ د خپرېدو غونډه جوړه شوه

د افغانستان د احصاېې ملي اداره وايي، تېر ۱۳۹۹ لمریزکال کې د وارداتي اجناسو ټول ارزښت ۶۵۳۷,۶ ميليون ډالره او صادراتي اجناسو ارزښت ۷۷۶,۷ ميليونه ډالره وو.

د احصایې او معلوماتو ملي ادارې یاد معلومات تېره ورځ د ۱۳۹۹ مالي کال ارقام، شاخصونه او احصاییوي معلومات په یوه غونډه کې خپاره کړل.

د دغې ادارې د احصایې مرستیال حسیب الله موحد وویل چې د تېرکال پرتله په وارداتو کې ۳,۵ سلنه او په صاداراتو د ۱۰ سلنې په اندازه کموالی راغلی.

د احصایې اداره دا هم وویل چې دا مهال د افغانستان نفوس څه باندې ۳۳ نیم میلیونه ده چې ۵۱ سلنه یې نارینه دي.

د هرات والي: پر ولسي پاڅونوالو او امنیه قوماندانۍ برید شنډ شو

د افغانستان په نقشه کې د هرات ولایت

د هرات والي په غوریانو ولسوالۍ کې پر ولسي پاڅونوال او امنیه قوماندانۍ د وسله وال برید د شنډېدو خبر ورکوي.

عبدالوحید قتالي وايي چې طالبانو غوښتل یو موټر بم د غوریان ولسوالۍ د امنیه قوماندانۍ په څنګ کې د پاڅونوالو په پوسته کې والوزوي.

ښاغلی قتالي زیاتوي چې امنیتي ځواکونو بریدکوونکی هدف ته له رسېدو مخکې تشخیص او په نښه کړ، خو په چاودنه کې دوه ولسۍ پاڅونوال وژل شوي او څلور نور ټپیان شوي دي.

د هرات والي وايي له موټر بم چاودنې وروسته د دواړو خواوو ترمنځ جګړه ونښته چې څو ساعته یې دوام وکړ.

دغه راز د هرات د والي له مطبوعاتي دفتره په یوه خپره شوې خبرپاڼه کې په دغه پېښه کې د ښځو او ماشومانو په ګډون د ۱۲ ملکیانو د ټپي کېدو خبره شوې او ویل شوي چې د هستوګنې څلور کورونه بشپړ ویجاړ شوي او په لسګونو نورو ته زیان رسیدلی دی.

طالبانو تراوسه په دې اړه څه نه دي ویلي.

پکتیا کې د هاوان مرمۍ یوه نجلۍ او یو هلک وژلي

ارشیف

د پکتیا په ځاځي اریوب ولسوالۍ کې د هاوان مرمۍ یوه نجلۍ او یو هلک وژلي دي.

د پکتیا د امنیه قوماندانۍ ویاند محمد لعل امیري ازادي راډیو ته وویل، پېښه پرون دوشنبه (د وري ۳۰مه) هغه مهال وشوه چې دې ماشومانو د هاوان یوه زړه مرمۍ ټکوله.

ښاغلي امیري زیاته کړه: "د پکتیا په ځاځي اریوب ولسوالۍ کې یوه نجلۍ او یو هلک بهر راوتلي او یوه پخوانۍ مرمۍ یې ټکولې ده. د هاوان دا مرمۍ چاودلې ده او دواړه په شهادت رسېدلي."

د امیري په وینا نجلۍ لس کلنه او هلک شپاړس کلن وو.

د افغانستان په ناامنه سیمو کې د وسله والو ډلو له خوا د سړک پر غاړو ایښودل شوي ماینونه او د تېرو ۴۰ کلونو له جګړو پاتې ماینونه او نا چاودي مهمات اوس هم د ګڼو افغانانو ژوند ګواښي.

نامعلومو وسله والو کابل کې دوه تنه امنیتي منسوبین وژلي

ارشیف، عکس تزئیني بڼه لري

نامعلومو وسله والو د کابل ښار ۱۲مې ناحیې ته څېرمه دوه تنه امنیتي منسوبین په ډزو وژلي دي.

د کابل د امنیه قوماندانۍ ویاند فردوس فرامرز رسنیو ته ویلي، دا پېښه نن سې شنبه (د وري ۳۱مه) اووه او ۴۰ دقیقې د ۱۲مې ناحیې په لومړي بلاک سیمه کې رامنځته شوې ده.

دی وايي پېښه تر څېړنو لاندې ده.

د پېښې پړه تر اوسه کومې وسله والې ډلې نه ده منلې.

دا په داسې حال کې چې د روانې لمریزې میاشتې په ۲۷مه د کابل د ۱۰مې امنیتي حوزې اړوند په یوه امنیتي پوسته کې یو افسر د خپلو دوو همکارانو له‌خوا په ډزو ووژل شو.

د وژل شوي افسر حسین علي خپلوان وايي، که څه هم د حسین علي وژونکي نیول شوي، خو اندېښنه لري چې له سزا پرته بېرته ازاد نه‌شي.

د افغانستان د دایمي بې طرفۍ په اړه د کابینې پرېکړه!

د افغانستان کابینه

ارګ ماڼۍ وايي، د کابینې په غونډه کې پرېکړه وشوه چې د بهرنیو ځواکونو له وتلو وروسته دې د افغانستان د دایمي بې طرفۍ غوښتنې په اړه لویه جرګه جوړه شي.

د کابینۍ غړو دوشنبه (د وري ۳۰مه) ناوخته د ولسمشر اشرف غني په مشرۍ دا پرېکړه کړې ده.

دوی په غونډه کې له افغانستانه د بهرنیو ځواکونو د وتلو پر څرنګوالي هم بحث کړی دی.

د ارګ ماڼۍ د بیان له مخې د غونډې ګډونوالو ویلي چې د امریکايي ځواکونو وتل د دواړو هېوادونو د اړیکو د پرېکون په معنی نه ده، بلکې د افغانستان او امریکا تر منځ د اړیکو او همکاریو د نوي څپرکي پیل دی.

د افغان حکومت په کابینه کې همدا راز د امریکايي ځواکونو تر وتلو وروسته د دواړو هېوادونو د دوه اړخیزو او څو اړخیزو قراردادونو او معاهدو د اجرايي او الزامي کېدو خبره هم یاده شوې ده.

د امریکا د ولسمشر جوبایډن د پرېکړې له مخې د مې له لومړۍ نېټې له افغانستانه د پاتې امریکايي ځواکونو وتل پیلېږي چې د سېپټمبر تر ۱۱مې به بشپړ شي.

د ننګرهار والي: پېښور کې د افغان طالبانو ۲ قوماندانان وژل شوي

د ننګرهار لپاره د وسله والو طالبانو يو مهم نظامي قوماندان نیک محمد رهبر رهبرمل د پيښور حاجي کیمپ سيمه کې وژل شوی

د ننګرهار والي وايي، د وسله والو طالبانو یو مهم نظامي قوماندان په پېښور کې وژل شوی.

ضیاالحق امرخېل دا خبره دوشنبه (د وري ۳۰مه) ماښام په یوه بیان کې کړې ده.

هغه زیاته کړې، د ننګرهار لپاره د طالبانو دا نظامي قوماندان مولوي نېک محمد رهبر رهبرمل و چې دوشنبه ناوخته پرې د پېښور حاجي کمپ سیمه کې برید شوی.

امرخېل دا هم ویلي چې د مولوي نیک محمد په وژنې سربېره بریدګرو د هغه دوه ملګري چې یو یې د ښاري شبکې مسوول عزیزالله مشهور په مصطفی و ټپیان کړي دي.

په افغانستان کې ګڼو رسنیو راپور ورکړی چې مولوي نیک محمد د ننګرهار لپاره د طالبانو نظامي قوماندان و او عزیزالله هم چې په مصطفی مشهور و په ننګرهار کې د دې ډلې د استخباراتو ښاري شبکه رهبري کوله.

وسله والو طالبانو تر دې دمه دا خبره رد یا تایید کړې نه ده.

لا معلومه نه چې پر دغو طالبانو چا برید کړی او نه یې کومې ډلې مسوولیت په غاړه اخېستی.

د هرات له زندانه ۳۵ ایراني بندیان خوشې شول

ارشیف

د هرات له زندانه ۳۵ ایراني بندیان خوشې شوي دي.

د هرات ولایت د استېناف محکمې رئیس شریف احمد فاني ازادي راډيو ته وویل دا بندیان یې له افغان زندانیانو سره په تبادله کې پرون دوشنبه (د وري ۳۰مه) خوشې کړي دي.

فاني زیاته کړه: "موږ تر اوسه د اویا کسانو په اړه پرېکړه کړې چې د خوشې کېدو په شرایطو برابر وو. د افغانستان د قوانینو پر اساس مو سزاوې ورته تعدیل کړې. د تعدیل له مخې ځینې بندیان خوشې کېږي او د ځینو نورو د حبس په موده کې کمښت راځي."

په پرونیو ۳۵ خوشې شوېو بندیانو کې ۱۳ ښځې هم شاملې دي.

د راپورونو پر اساس ایران په هرات او ځینو نورو ولایتونو کې د خپلو بندي اتباعو د خوشې کېدو په بدل کې شااوخوا دوه میاشتې مخکې ۶۳۹ افغان بندیان خوشې او افغانستان ته یې وسپارل.

چارواکي: بهرنیو هېوادونو ته د غالیو صادرات بیا پيلېږي

افغاني غالۍ

د افغانستان د سوداګرۍ او صنایعو وزارت وايي، ژر به د هوايي دهلېزونو له لارې بهرنیو هېوادونو ته د غالیو صادرات بیا پيل شي.

دا خبره د یاد وزارت ویاند فواد احمدي دوشنبه (د وري ۳۰مه) ناوخته ازادي راډیو ته وکړه.

هغه وویل، د بودجې د کمښت په خاطر د هوا له لارې صادرات نه کېدل: "له یو لړ هڅو وروسته اوس تمه ده بېرته له هوايي دهلېزونو د غالیو د صادراتو لپاره زمینه برابره شي. له هغه ور هاخوا د لاجورد، چابهار او هم د ازبېکستان، ایران او پاکستان له لارې بهر او اروپايي هېوادونو ته د غالیو صادرات روان دي."

احمدي وویل، ژر به د سوداګرۍ وزارت له مخې د غالیو سکتور ته د یوه ۶ سلیزه تشویقي سبسیډي ورکول پرانېستل شي.

له دې مخکې د غالیو صادروونکو ادعا کوله چې د هوا له لارې د صادراتو په درېدو سره د غالیو په صادراتو کې نوي فیصده کمښت راغلی دی.

د افغانستان غالۍ د نړۍ له مرغوبو غالیو یادیږي چې په لویدیځو هېوادونو کې ګڼ مینه وال لري.

اشرف غني: له امریکا او ناټو سره دوه اړخیز امنیتي تړونونه پر ځای دي

د افغانستان جمهور رئیس محمد اشرف غني

افغان ولسمشر اشرف غني وایي، د امریکا له متحده ایالاتو او ناټو سره‌یې دوه اړخیز امنیتي تړونونه پر ځای دي او نړیوالو متحدانو ورته ډاډ ورکړی چې د افغان امنیتي ځواکونو د تمویل تجهیز او روزنې په چارو کې به همکاري ته دوام ورکړي.

ولسمشر غني دغه څرګندونې نن په امنیتي غونډه کې کړي چې د وینا دغه لنډه برخه‌یې ارګ په خپله وېب‌پاڼه کې خپره کړې ده.

ولسمشر غني له دې مخکې پرون له امریکایي سي‌اېن‌اېن ټلوېزیون سره په مرکه کې وویل چې له افغانستانه د امریکایي ځواکونو وتلو موږ ته د دې فرصت رامنځته کړی چې له سره محاسبه وکړو او د طالبانو او پاکستان لپاره‌یې هم د انتخاب وخت.

ولسمشر غني وویل: "د پاکستان لپاره د انتخاب وخت رارسېدلی. ایا دا هېواد غواړي چې د سوله‌ییزې اسیا په اتصال کې د یوه نړیوال لوبغاړي په توګه خپل رول ولوبوي یا د ګډوډي لاره غوره کوي؟"

ولسمشر غني طالبان هم ورته انتخاب ته راوبلل او زیاته‌یې کړه، د طالبانو هغه ستره پلمه چې جګړه د دې لپاره کوي چې له افغانستانه نړیوال ځواکونه وباسي، نوره اعتبار نه‌لري.

د غني په وینا په افغانستان کې جګړه له مذهبي پلوه نوره نه‌شي توجیه کېدای او سیاسي روغه جوړه یوه حتمي چاره ده. ښاغلي غني وویل، اوس پر طالبانو او د هغوی پر ملاتړو پورې تړلې چې کومه لاره غوره کوي.

طالبانو او پاکستاني چارواکو تر اوسه د افغان ولسمشر د دغو څرګندونو په اړه تبصرې نه‌دي کړي.

افغانستان کې تېره اوونۍ نږدې '۴۰ ملکیان' وژل شوي

ارشیف، کابل کې په یوه چاودنه کې د یوه وژل شوي کس مړی

د افغانستان د بشر حقونو خپلواک کمېسیون وایي، تېره اوونۍ نږدې ۴۰ ملکیان په دې هېواد کې په جګړو او د ناامنیو په پېښو کې وژل شوي دي.

د دې کمېسیون د عامه اړیکو مشر ذبیح‌الله فرهنګ ازادي راډیو ته وویل: "د حمل له ۲۱مې نه د حمل تر۲۶مې پورې شاوخوا ۳۹ ملکي وګړي په افغانستان کې وژل شوي دي. په وژل شویو کې اته ماشومان او څلور ښځې شامل دي. د دغو وژنو مسؤل طالبان او ناپېژانده وسله‌وال دي."

د ښاغلي فرهنګ په وینا بم چاودنې او هدفي وژنې تېره اوونۍ د ملکي تلفاتو اصلي لامل بلل کېږي.

هغه د جګړې له ښکېلو اړخونو په تېره بیا له طالبانو وغوښتل چې د ملکي وګړو د ژوند د خوندیتوب لپاره دې اوربند وکړي.

د سرپل د هنډبال لوبډلې کپټانه ووژل شوه

نوریه تابش

د سرپل د هنډبال لوبډلې کپټانه نوريه تابش وژل شوې، تابش د دغه ولايت په مرکز کې په خپل کور کې وژل شوې ده.

د سرپل د امنيه قوماندانۍ وياند نور اغا فيضي نن ازادي راډیو ته وویل چې نوريه تابش د هغې مخکېني مېړه وژلې ده.

دی وايي، دوی ته رسېدلي معلومات ښيي چې د نوريې مخکېنی مېړه د شپې د هغې کور ته ورغلی، ډزې يې کړي، نوريه او د هغې ورېندار يې وژلې او ورور او مور يې ژوبل دي.

فيضي وايي، د نوریې تابش مېړه تښتېدلی، خو پوليس پلټنې کوي.

د افغانستان د هنډبال فدراسیون هم دا خبر تأییدوي.

د افغانستان د ښځو هنډبال ملي لوبډلې مشره حمیرا وایي نوريه تابش دا مهال د سرپل ټیم کپټانه وه.

نور راوښيه

XS
SM
MD
LG