د لاسرسۍ وړ لېنکونه

تازه خبر
جمعه ۲۷ وری ۱۴۰۰ کابل ۱۰:۲۰

افغانستان

د غور د تېورې ولسوال د ماین په چاودنه کې ووژل شو

د غور ولایت د تېورې ولسوال محمد رفیق اعلم

د غور ولایت د تېورې ولسوال محمد رفیق اعلم د ماین په چاودنه کې ووژل شو.

د تېورې امنیه قوماندان حبیب الرحمان ملکزاده ازادي راډیو ته وویل، ولسوال د ده پر موټر د نښلول شوي ماین په چاودنه کې هغه مهال ووژل شو چې له کوره دندې ته پر لاره و.

د غور د ولایت ویاند زلمي کریمي هم پیښه تایید کړې ده.

د غور چارواکي وايي، چاودنه د تیورې لرې پروت عاشقانو کلي کې شوې نو ځکه یې په اړه ډېر معلومات نه لري.

دوی دا د طالبانو کار بولي، خو طالبانو لا په دې اړه څه نه دي ویلي.

د ورځې تازه خبرونه دلته ولولئ

هیومن رایټس: امریکا دې افغانستان کې پر خپلو ژمنو عمل وکړي

د بشري حقونو د څار ټولنې لوګو

د بشري حقونو د څار ټولنې هیومن رایټس له متحدو ایالاتونو غوښتي دي چې په افغانستان کې د بشري حقونو د ملاتړ لپاره پر خپلو ژمنو عمل وکړي.

دا په داسې حال کې ده چې ولسمشر جوبایډن د چهارشنبې (د وري ۲۵مه) په ورځ اعلان وکړ چې د روان کال د مې په لومړۍ نېټه به له افغانستانه د خپلو پوځي ځواکونو ایستل پیل او د سېپټمبر تر ۱۱مې نېټې به یې بشپړ کړي.

د بشري حقونو د څار ټولنې چې مرکز یې په نیویارک کې دي نن په یوه خبرپاڼه کې وویل، د امریکا حکومت باید له افغانستان سره د تعلیم او روغتیا برخو کې په تېره د نجونو او ښځو لپاره خپلې مرستې زیاتې کړي او په داسې حال کې چې پراخېدونکي کړکېچ د بشري حقونو لاسته راوړنې له ګواښ سره مخامخ کړي او بشري بحران یې زیات کړی، د رسنیو د آزادۍ ملاتړ وکړي.

هیومن رایټس په خپل بیان کې همدا راز یادونه کړې چې عدالت ته د ښځو د لاسرسي او د سلګونه مدافع وکیلانو او قاضیانو د روزنې لپاره د افغانستان د قضايي اصلاحاتو په برخه کې د امریکا مرستې حیاتي دي.

ظریف: که طالبان غواړي نوییمو کلونو ته ستانه شي، امکان نه لري

د ایران د بهرنیو چارو وزیر محمدجواد ظریف

د ایران د بهرنیو چارو وزیر وايي چې طالبان باید د ډموکراسۍ پر اساس خپل ځان بدل کړي.

محمدجواد ظریف نن جمعه (د وري ۲۷مه) د ریزینا ډیالوګ په نوم په انلاین غونډه کې چې د افغانستان د ملي امنیت سلاکار حمدالله محب او د هند د بهرنیو چارو وزیر 'اېس جې' شنکر هم په کې حاضر وو همدا راز وویل، که طالبان غواړي چې نوییمو کلونو ته ستانه شي، نو دا امکان نه لري.

د ایران د بهرنیو چارو وزیر محمدجواد ظریف
د ایران د بهرنیو چارو وزیر محمدجواد ظریف

ښاغلي ظریف زیاته کړه: "که طالبان غواړي چې نوییمو کلونو ته ستانه شي، که یې ایډیالوژي او چلند بدلېږي که نه؟ خو هغو کلونو ته ورتګ بیا امکان نه لري. نن موږ په یوه نوي افغانستان کې ژوند کوو."

ښاغلي محب غونډې ته وویل، طالبان باید داسې ونه انګېري چې پر افغانانو به ځان تحمیل کړای شي او د هند د بهرنیو چارو وزیر ښاغلي 'جې شنکر' وویل چې د افغانستان د سولې په هڅو کې باید د سیمې هېوادونو ته هم ونډه ورکړل شي.

ښاغلي ظریف هم څرګنده کړه چې ایران د افغانستان د سولې په اړه د بحث لپاره د غونډې کوربه توب ته چمتو دی.

ریزینا ډیالوګ د هند د بهرنیو چارو وزارت په نوښت له کلونو راهیسې د سیمې او نړۍ پر مهمو سیاسي مسایلو د دولتي چارواکو، سیاستوالو او شننونکو په ګډون بحثونه جوړوي.

د ملي امنیت شورا د بیان له مخې نننۍ غونډه د افغانستان د سولې پر خبرو، په دې پروسه کې د سیمې او ګاونډيو هېوادونو د رول او له خپل هېواده د افغان ځواکونو د مستقلانه دفاع په اړه د بحث لپاره جوړه شوې ده.

د هند "ریزینا ډیالوګ" نن جمعه پر افغان سولې بحث کوي

د افغانستان د ملي امنیت سلاکار حمدالله محب

د هند "ریزینا ډیالوګ" نن جمعه (د وري ۲۷مه) د افغانستان د سولې په اړه د بحث کوربه دی.

په ننني بحث کې د افغانستان د ملي امنیت سلاکار حمدالله محب، د هند د بهرنیو چارو وزیر اېس جې شنکر او د ایران د بهرنیو چارو وزیر محمد جواد ظریف ګډون لري.

د افغانستان د ملي امنیت شورا په یوه ټویټري بیان کې ویلي چې د ریزینا ډیالوګ په ننني کنفرانس کې به: "د افغان سولې پر مذاکراتو او په دې پروسه کې د سیمې او ګاونډيو هېوادونو د رول او له هېواده د افغان امنیتي او دفاعي ځواکونو د مستقلانه دفاع په تړاو بحث وشي."

دا بحث (د کابل تقاطع: د سولې لار) Junction Kabul: The Road to Peace په نوم ترسره کېږي.

ریزینا ډیالوګ د هند د بهرنیو چارو وزارت په ګډ نوښت له کلونو راهیسې د سیمې او نړۍ پر مهمو سیاسي مسئلو د دولتي چارواکو، سیاستوالو او وتلو شننونکو بحثونه جوړوي.

افغانستان کې تېر کال ۲۹۹ مټریکه ټُنه ځمکني توت تولید شوي

ځمکني توت

د افغانستان د کرنې او مالدارۍ وزارت وایي، په دې هېواد کې تېر کال ۲۹۹ مټریکه ټُنه ځمکني توت تولید شوي دي.

د دغه وزارت ویاند اکبر رستمي تېر ماښام ازادي راډیو ته وویل چې اوس مهال څه باندې ۳۲۰ جریبه ځمکه کې دغه توت کرل شوي دي.

نوموړي زیاته کړه: "په هرات، کندز، بلخ، فاریاب، میدان وردک، دایکنډي، کابل، پروان، ننګرهار او یو شمېر نورو ولایتونو کې دا میوه تر ټولو ډېره کرل شوې ده. د دغه توت کرکیلې ته علاقمندي د دې میوې موجود بازار ته په کتو د پراخېدو په حال کې ده."

د کرنې وزارت وایي، د افغانستان اقلیم د دې میوې کرکیلې ته مساعد دی او له څو کلونو راهیسې خلکو ورته مخه کړې ده.

د دغه وزارت په وینا هر کیلو توت په بازار کې په شااوخوا دوه سوه افغانیو پلورل کېږي.

لغمان کې ټرافیکې پېښې۲ تنه ووژل او ۷ نور یې ژوبل کړل

ارشیف

په لغمان ولایت کې د ټرافیکې پېښې له امله دوه تنه ووژل شول.

د پنجشنبې (د وري ۲۶مه) په ورځ ماسپښین ۳ بجې د کابل _جلال اباد پر لویه لاره د قرغیو ولسوالۍ اړوند خیروخېلو سیمه کې د ټېلر او مارسیډیز موټر ترمنځ ټکر شوی چې له امله یې ۲ تنه وژل شوي او ۷ نورټپیان دي.

د لغمان د والي د رسنیو دفتر ازادي راډیو په استول شوېو معلوماتو کې ویلي چې ټپیان نږدې روغتیایي مرکز ته انتقال شوي او وضعیت یې د ډاډ وړ دی.

د معلوماتو له مخې، پېښه د موټر چلوونکو د بې احتیاطۍ له امله رامنځته شوې ده.

جلال اباد ښار کې د درملو شرکتونو او درملتونونو کار بنديز پیل کړی

ارشیف

د ننګرهار ولایت په مرکز جلال اباد ښار کې د درملو شرکتونو او درملتونونو له دې کبله کار بنديز کړی چې ګواکې حکومت په پام کې لري د درمليزو خدمتونو سکټور يوازې څو محدودو شرکتونو ته په واک کې ورکړي.

د دغه ښار د درملیزو خدمتونو او درملتونونو مالکانو پرون پنجشنبه (د وري ۲۶مه) په همدې اړه په جلال اباد ښار کې اعتراضیه غونډه جوړه کړه او ګواښ یې وکړ چې دا اقدام کولی شي په دې برخه کې شوې پانګونه زیانمنه او زرګونه کسان بې روزګاره کړي.

په ختيځ زون کې د درمل پلورونکو د اتحاديې مشر نجيب الله صاحبزاده په دې غونډه کې وویل: "د انحصاري شرکتونو خبره ده. ویل کېږي چې طرح وړاندې شوې ده ریاست جمهوري ته چې له پنځو تر لسو پورې دې اوسي او هغوی دې بیا په انحصاري توګه دوا راوړي، ځنځیري دواخانې دې ولري او نور دغه سکتور دې محروم شي. باید قانون د خصوصي سکتور سره یو ځای د ولسي ګټو په موخه ترتیب او جوړ شي."

د ښاغلي صاحب زاده په خبره، خصوصي سکټور د هېواد په کچه په دې برخه کې ميليونونه ډالر پانګونه کړې او شااوخوا ترسلګونو زرو کسان په کې په کار بوخت دي.

اعتراض کوونکو ګواښ وکړچې که افغان حکومت د دوی غږ وانه وري نو خپلو اعتراضونو ته به دوام ورکړي.

د ننګرهار د والي دفتر وایي، په دې اړه به له کابل سره خبرې وکړي.

د غزني والي: سږکال پر ۱۰۰ پراختیايي پروژو کار پیلوو

د غزني والي برید جنرال سید عمر نورستانی

د غزني ولایت چارواکي وايي، دغه ولایت کې به سږ کال تر سلو په زیاتو پراختیايي پروژو کار پیل کړي.

د غزني والي برید جنرال سید عمر نورستاني ازادي راډیو ته وویل، هغه پروژې به هم بېرته پیل شي چې تېر کال نېمګړې پاتې وې.

ښاغلي نورستاني زیاته کړه: "غزني ولایت کې سږ کال موږ ۱۱۶ پراختیايي پروژې لرو چې د هغوی له ډلې ۱۸ پروژې د ولایتي پلان څخه دي چې نږدې ورځو کې به یې عملي کار پیل شي او ۹۸ نورې پراختیايي پروژې له پراختیايي پلان څخه بهر دي، د هغوی بودجه چې منظوره شوه او راشي هغه به هم پیل شي."

غزني د افغانستان هغه ولایت دی چې د سختو جګړو له امله په کې د پراختیايي پروژو پلي کېدل له ستونزو سره مخ کېږي.

افغانستان او ترکمنستان د ټاپي پروژې امنیتي پلان لاسلیک کړ

د افغانستان او ترکمنستان تر منځ د ټاپي (TPI) د ګازو نللیکې امنیتي پلان لاسلیک شو.

افغانستان او ترکمنستان د ټاپي پروژې لپاره امنیتي پلان لاسلیک کړ. دا خبره د افغانستان د ملي امنیت شورا په یوه اعلامیه کې کړې ده.

له ترکمنستانه د ټاپي د پروژې مدیر محمد متیرات امانوف پرون پنجشنبه(د وري ۲۶مه) کابل ته تللی و او هلته یې د امنیت شورا له مرستیال عبادالله عباد سره دا امنیتي پلان لاسلیک کړی.

د امنیت شورا د اعلامیې له مخې د ټاپي امنیتي پلان د څو هېوادونو د هغې لویې پروژې له تطبیق او ودې سره مرسته کوي چې له ترکمنستانه جنوبي اسیا ته ګاز لېږدوي او د سیمه‌یز ثبات او بسیاینې سبب ګرځي.

دا شورا وایي، ټاپي د افغانستان مهمه پروژه ده چې د سیمه‌ییز امنیت او د ادغام له سیاست سره مرسته کوي او د سیمې لوبغاړي هېوادونه لکه پاکستان او هند په ګډو ګټو کې سره متحد کوي.

د ټاپي ګازو پایپ ‎لاین ۱۸۰۰کیلومتره واټن ولري.

افغان چارواکي وايي، تمه ده سږ کال د دې پروژې کار پیل شي چې ورسره به لسګونه زره کسانو ته د کار زمینه برابره شي.

افغان لیکوال، شنونکی او ملي سوداګر فدامحمد نظري ووژل شو

ارشیف

افغان لیکوال، شنونکی او ملي سوداګر فدامحمد نظري نامعلومو وسله والو پرون چهارشنبه (د وري ۲۵مه) په خپل کور کې وواژه.

د کابل د امنیه قوماندانۍ ویاند فردوس فرامرز ویلي چې وسله وال کسان تېره شپه دولس بجې د کابل په دهبوري سیمه کې د نظري کور ته ننوتلي او نوموړی یې وژلی دی.

د دې وژنې مسوولیت تراوسه چا نه دی منلی، خو پولیس وايي چې په دې اړه یې تحقیقات پیل کړي دي.

نظري چې د فدامحمد خواریکښ په نوم هم پېژندل کېده څو کتابونه لیکلي او د شعرونه یوه چاپي ټولګه هم ترې پاتې ده.

فواید عامې وزارت: راتلونکو ۳ میاشتو کې ۱۲ پروژې پای ته رسیږي

آرشیف

د افغانستان د فواید عامې وزارت په راتلونکو درېیو میاشتو کې پر یو شمېر لویو رغنیزو پروژو د کار د پای ته رسېدو خبر ورکوي.

د دې وزارت مرستیال ویاند اشرف حق شناس ازادي راډیو ته وویل، چې د کابل د حلقوي سړک او د کابل- لوګر، شبرغان- سرپل او د شورابک- سپین بولدک د لویو لارو په ګډون دولس پروژې په دې پلان کې شاملې دي چې لګښت یې ۲۱،۷ میلیارد افغانیو ته رسېږي.

ښاغلی حق شناس وايي، په دې پروژو کې د ځینو چارې بشپړې شوي او د ځینو نورو تر کار لاندې دي چې هغه به هم په درېیو میاشتو کې بشپړې شي.

ګراهام: له افغانستانه د امریکايي ځواکونو د ایستلو پرېکړه ناسمه ده

امریکايي سناتور لینډسي ګراهام

امریکايي سناتور لینډسي ګراهام له افغانستانه د امریکايي ځواکونو د ایستلو برخه کې د ولسمشر جو بایډن پرېکړه ناسمه بللې ده.

جمهوريپال ګراهام چې په تېرو شلو کلونو کې د افغانستان په مسایلو کې پرون چهارشنبه (د وري ۲۵مه) په یوه خبري غونډه کې وویل، له افغانستانه د امریکايي ځواکونو ایستل د هغې بیمې فسخ کول دي چې د ۲۰۰۱ میلادي کال د سېپټمبر په ۱۱ مه نېټه پر متحدو ایالاتونو د بلې تروریستي حملې مخه یې نیوله.

ښاغلي ګراهام زیاته کړه چې پر طالبانو باور نه شي کېدای: "طالبان له القاعده او داعش سره توپیر لري. زه منم چې هغوی به دلته زموږ په کور کې پر موږ برید ونه کړي خو باور لرم چې دوی به القاعده او داعش ته په افغانستان کې د ازاد فعالیت امکان برابر کړي. طالبان دا لېوالتیا او ظرفیت نه لري چې هغوی تعقیب کړي."

سناتور ګراهام وايي، په طالبانو کې ځینې عناصر شته چې پرمختګ غواړي خو د ده په وینا ډېر تُندلاري کسان هم په کې شته.

په عین حال کې هند د امریکايي ځواکونو له وتلو وروسته په افغانستان کې د قدرت د تشې د راتلو د احتمال په اړه اندېښنه ښودلې.

د رویټرز خبري اژانس د راپور له مخې د هند دفاع وزیر جنرال بیپین راوټ نن پنجشنبه (د وري ۲۶مه) یوې امنیتي غونډې ته وویل، د ده وېره دا ده چې د نړیوالو پوځیانو له وتلو وروسته به د سولې دښمنان فعال شي.

ښاغلي راوټ د سولې د دښمن په توګه د کوم هېواد نوم وانه خېست.

ناټو: له افغانستانه د ځواکونو ایستل به د مې له لومړۍ نېټې پیل کړو

بروکسل کې د ناټو دفاع او بهرنیو چارو وزیرانو غونډه

ناټو اعلان کړی چې له افغانستانه د غوڅ ملاتړ مأموریت د ځواکونو ایستل به د مې په لومړۍ نېټه پیل او د سپټمبر په ۱۱مه نېټه بشپړ کړي.

دا اعلان په هغه اعلامیه کې شوی چې ناټو تېره شپه خپره کړه.

پرون له دې مخکې د امریکا ولسمشر جو بایډن اعلان وکړ چې له افغانستانه د امریکایي ځواکونو د وتلو بهیر به د سږني کال د مې په لومړۍ نېټه پیل او د سپټمبر په ۱۱مه نېټه بشپړ شي.

ناټو هم په خپله اعلامیه کې طالبانو ته د بایډن خبرداری تکرار کړی او ویلي یې دي چې که طالبان د دې ټلوالې پر سرتېرو د وتلو پر مهال برید وکړي، نو ځواب به‌یې د ځواک په کارولو ورکړي.

اعلامیه زیاتوي چې ناټو او شریکان به‌یې د افغانستان، افغانانو، د دې هېواد د اساسي قانون او د امنیت او د تېرو ۲۰ کلونو د لاسته راوړنو د خوندي کولو په هدف د افغانستان د بنسټونو ملاتړ ته دوام ورکړي.

تېر کال افغانستان کې ۷۴ زره مټریک ټنه مالوچ تولید شوي

مزار شریف کې د مالوچو کښت

د افغانستات کرنې او مالدارۍ وزارت وایي، په ۱۳۹۹ کال کې د هېواد په کچه ۷۴ زره مټریک ټنه مالوچ تولید شوي دي.

په ۱۳۹۸ لمریز کال بیا دا کچه ۷۳ زره مټریک ټنو ته رسېده.

د کرنې او مالدارۍ وزارت ویاند اکبر رستمي ازادي راډیو ته وویل، سږ کال په بلخ ولایت کې څه باندې ۲۸ زره ټنه مالوچ تولید شول چې تر نورو ولایتونو يې کچه لوړه وه.

د هغه په خبره هلمند، کندز، نیمروز، تخار، جوزجان او بغلان نور هغه ولایتونه دي چې د مالوچو د تولید له اړخه مهم بلل کېږي.

مالوچ د صنعتي نباتاتو له ډلې دی چې په سیمه‌ییزه او نړیواله کچه ښه بازار لري.

وسله‌والو طالبانو د غزني قره‌باغ ولسوالۍ پر مرکز برید کړی

ارشیف، غزني کې د یوې حملې له سیمې پورته شوی لوګی

د سې شنبې او چهارشنبې په منځنۍ شپه وسله‌والو طالبانو د غزني ولایت د قره‌باغ ولسوالۍ پر مرکز برید وکړ چې د تېرې شپې تر ناوخته‌یې دوام درلود.

د یادې ولسوالۍ سرپرست امنیه قوماندان وايي، دغه جګړه د شپې ۱۰:۴۵ دقیقې پیل شوه.

رمضان ځیرک تېره شپه ناوخته ازادي راډیو ته وویل، وسله‌وال طالبان اوس هم د ښار ځینو برخو کې شتون لري او پر امنیتي ځواکونو د لیزري وسلو بریدونه کوي.

رمضان ځیرک زیاتوي، که مرکزي دولت له دوی سره د هوايي ځواک مرسته ونه‌کړي، جګړه به ستونزمنه او دغه ولسوالۍ به سقوط شي.

رمضان ځیرک وايي نن د ورځې په اوږدو کې افغان هوايي ځواکونو پر دغه وسله‌والو بریدونه وکړل، یو رېنجر موټر یې په نخښه کړ چې په پایله کې یې شپږ تنه وسله‌وال وژل شوي دي.

د نوموړي په خبره، په دغه ۲۴ ساعته جګړه کې افغان امنیتي ځواکونو ته زیان نه‌دی اوښتی.

وسله‌وال طالبان هم مني چې افغان هوايي ځواکونو بمبار کړی دی، خو وايي د دوی جنګیالو ته په‌کې زیان نه‌دی اوښتی.

د دغه ډلې ویاند ذبیح‌الله مجاهد ازادي راډیو ته وویل، وسله‌والو طالبانو د قره‌باغ ولسوالۍ مرکز ته څېرمه ځیني عملیات ترسره کړي دي.

قره‌باغ له غزني مرکز څخه شاوخوا په ۲۵ کیلومترۍ واټن سوېل لور ته د کابل-کندهار پر لویه لاره پرته ولسوالۍ ده چې ډېری سیمې یې د وسله‌والو طالبانو په واک کې دي.

سي‌ای‌اې له افغانستانه د ځواکونو له وتلو وروسته د ستر ګواښ خبرداری ورکړ

د امریکا د استخباراتو د مرکزي ادارې، سي‌ای‌اې رئيس ویلیم برنز

د امریکا د استخباراتو د مرکزي ادارې، سي‌ای‌اې رئيس له افغانستانه د امریکايي او ائتلافي ځواکونو له وتلو وروسته د ستر ګواښ خبرداری ورکړ.

ویلیم برنز، د ولسمشر بایډن له لوري د ځواکونو د ایستلو تر اعلان څو ساعته وړاندې د امریکا د سنا جرګې استخباراتي کمېټې ته وویل، کله چې امریکايي او ائتلافي ځواکونه له افغانستانه ووځي، ستر خطر به رامنځته شي.

ده په عین حال کې وویل چې امریکا به دا امکان ولري چې ځیني امکانات بېرته ترلاسه کړي.

د امریکا ولسمشر جو بایډن چهارشنبه ناوخته اعلان وکړ چې له افغانستانه ټول امریکايي ځواکونه د روان کال د سپټمبر تر ۱۱مې نېټې باسي.

ښاغلي بایډن چهارشنبه «۱۴۰۰ کال د وري ۲۵مه» ناوخته وویل، د ۲۰۰۱ م کال د سپټمبر د ۱۱مې د حملو مطلب دا نه‌دی چې امریکايي پوځیان ۲۰ کاله وروسته لا هم په افغانستان کې پاتې شي.

نور راوښيه

XS
SM
MD
LG