د لاسرسۍ وړ لېنکونه

تازه خبر
جمعه ۳ غویی ۱۴۰۰ کابل ۱۰:۴۱

نړۍ

د میانمار له خلکو د ملګرو ملتونو غوښتنه: د پوځ د جرایمو شواهد راټول کړئ

میانمار کې د امنیتي ځواکونو له لوري د اعتراض کوونکو نیول

د ملګرو ملتونو پلټونکو د برما/ میانمار له خلکو غوښتي چې هر هغسې شواهد راټول کړي چې دوی یې د عامو اعتراض کوونکو پر وړاندې د پوځ له لوري جرایم ګڼي.

دغه اعتراضونه وروسته له هغه راپورته شول چې پوځ تېره میاشت د میانمار پر حکومت کودتا وکړه او د هېواد مشره انګ سان سوچي یې توقیف کړه.

یادې مظاهرې وروسته په تاوتریخوالي واوښتې چې د بشري حقونو د فعالانو په خبره لږترلږه ۱۸۰ کسان په‌کې وژل شوي دي.

د ملګرو ملتونو پلټونکې ډلې مشر نیکولاس کومیان نن په یوې اعلامیه کې ویلي چې دا شواهد به د برما د پوځ د مشرانو پر وړاندې دوسیو جوړولو کې وکارول شي. دی وایي دغو پوځیانو د معترضینو د خورولو لپاره له امنیتي ځواکونو کار اخیستی دی.

اعتراض کوونکي د مېرمن سوچي خوشې کېدل او د ملکي حکومت بېرته راګرځول غواړي.

د ورځې تازه خبرونه دلته ولولئ

کریمیا ټاپووزمه کې پوځي تطبیقات: روسي ځواکونه خپلو دایمي اډو ته ستنېږي

د روسي ځواکونو پراخ پوځي تطبیقات

مسکو د روسیې په جنوب او د اوکراین د کریمیا ټاپووزمې په شاوخوا کې له پراخو پوځي تطبیقاتو وروسته روسي ځواکونو ته امر کړی چې خپلو دایمي اډو ته ستانه شي.

مسکو په ۲۰۱۴ کال کې کریمیا ټاپووزمه د خپلې خاورې جز وګرځوله.

روسیې په کریمیا کې دا تطبیقات د لسګونه جنګي کښتیو، سلګونه جنګي الوتکو او د زرګونه پلیو سرتېرو په ښودلو ترسره کړل. امریکا او ناټو وايي چې دا له ۲۰۱۴ کال په راوروسته موده کې د اوکراین پولو ته نږدې د روسیې تر ټولو پیاوړی پوڅي حضور و.

پرونی اعلان داسې مهال کېږي چې د اوکراین په ختیځ کې د روسیې د پوځي تحرکاتو له کبله د لوېدیځ او مسکو په اړیکو کې کړکېچ زیات شوی. د اوکراین په ختیځ کې روس پلوي بېلتون‌پال له اوکرایني ځواکونو سره په جګړو بوخت دي.

په دې جګړو کې تر اوسه له ۱۴ زرو زیات خلک وژل شوي دي.

د بریتانیا ولسي جرګې د چین پر ضد پارلماني اقدام تأیید کړ

ارشیف، د بریتانیا پارلمان

د بریتانیا ولسي جرګې هغه پارلماني اقدام تأیید کړ چې د چین په شمال لوېدیځ ایالت سینکیانګ کې د اویغور او نورو مسلمان اقلیتونو پر ضد د پیکېنګ اقدامات د بشریت پر ضد جنایات او جینوسایډ بولي.

دا اعلامیه چې پرون د اپرېل په ۲۲مه تصویب شوه او اجرایي تضمین نه‌لري د چین د حکومت پر وړاندې د پارلمان د غړو د مخ په زیاتېدونکي اعتراض څرګندونه کوي.

ویل کېږي چې لږترلږه یو ملیون اویغوران او نور اقلیتونه چې ډېری مسلمانان دي، په سینکیانګ کې توقیف ځایونو ته په ورته جبري کمپونو کې ساتل کېږي.

په دې کمپونو کې له غیر قانوني توقیفونو نیولې د ښځو تر جبري شنډولو، بېګار او په سیستماتیک ډول له اساسي ازادیو د مسلمانانو تر محرومولو پورې د بېلابېلو سرغړونو راپورونه ورکړل شوي دي.

له دې مخکې د متحده ایالاتو حکومت او د بلجیم، هالنډ او کاناډا پارلمانونو هم پر پیکېنګ د جینوسایډ تور پورې کړی دی.

یو بنګله‌دېشی کډوال نیویارک کې د بم الوزولو په جرم په عمري بند محکوم شو

عقایدالله، هغه بنګله‌دېشی کډوال چې درې کاله مخکې یې د نیویارک په مترو کې په لاس جوړ شوی بم الوزولی و.

د نیویارک په منهاتن کې فدرال محکمې هغه بنګله‌دېشی کډوال چې درې کاله مخکې یې د نیویارک په مترو کې په لاس جوړ شوی بم الوزولی و، په عمري بند محکوم کړ.

۳۱ کلن عقایدالله د ۲۰۱۷ کال په ډسمبر میاشت کې د نیویارک د نامتو سیمې ټایمز چوک د مترو په تم‌ځای کې یو بم الوزولی و چې دی او درې نور کسان‌یې ټپیان کړل.

چارواکي وايي، نوموړي دا پایپ ډوله بم له هغو ساختماني موادو جوړ کړی و چې د کار له ساحې څخه‌یې د کار پر مهال ترلاسه کړي وو.

د محکمې قاضي ریچارډ سولیوان د حکم له اعلان مخکې د عقایدالله (Akayed Ullah) کار وحشت او بوږنوونکی عمل وباله.

څارنوالانو د محاکمې پر مهال وویل چې عقایدالله د کومې ډلې غړی نه‌و، خو د داعش ډلې تبلیغاتو اغېز پرې کړی و او په منخني ختیځ کې د پخواني ولسمشر ډونالد ټرمپ د بهرنۍ پالېسۍ له کبله په غوسه شوی و.

د اټمي انرژۍ نړیواله اداره: ایران سنټریفیوژنونه نصب کړې

د ایران د نطنز اټمي تأسیسات

د اټمي انرژۍ نړیوالې ادارې په خپل تازه راپور کې ویلي چې ایران د نطنز په تأسیساتو کې تر ځمکې لاندې پرمختللي سنټریفیوژنونه نصب کړي دي.

د رویټرز خبري اژانس د راپور له مخې، د دې ادارې په راپور کې چې پرون (چهارشنبه د اپریل په ۲۱مه) خپور شو، ویل شوي چې ایران په داسې حال کې پرمختللي سنټریفیوژنونه نصب کړي چې له شپږو نړیوالو قدرتونو سره د دغه هېواد د اټمي موافقې پر بنسټ ایران د یورانیمو د غني کولو لپاره د داسې سنټریفیوژنونو د نصبولو حق نه لري.

د اندونیزیا یو ستر اوبتل بې درکه شوی

ارشیف

د اندونیزیا سمندري ځواک پرون چهارشنبه (د غويي ۱) وویل چې یو ستر اوبتل یې چې ۵۳ تنه عمله په کې سپره ده، بې درکه شوی دی.

د اندونیزیا د وسله والو ځواک د لوی درستیز په وینا دا اوبتل د بالي ټاپو په شمالي اوبو کې ورک شوی او د موندلو لپاره یې هلې ځلې روانې دي.

ده همدا راز وویل چې دې اوبتل په یوه مانوره کې ګډون کړی و چې له مرکز سره یې تماس پرې شو.

یمن لپاره د امریکا استازی: حوثیانو سره د ایران ملاتړ ډېر زیات دی

یمن کې حوثي یاغیان

د یمن لپاره د امریکا ځانګړی استازی وايي، د یمن له حوثیانو سره د ایران ملاتړ ډېر زیات دی.

ټیم لنډرکینګ پرون چهارشنبه(د غويي ۱) د کانګرس غړیو ته وویل، داسې هېڅ نښه نه لیدل کېږي چې ایران دې له سوله ییزې لارې د دې شخړې د حلولو نیت ولري.

ده همدا راز وویل، که ایران رغنده رول ولوبوي هرکلی به یې وکړي، خو دې برخه کې هېڅ نښه نه ویني.

د یمن لپاره د امریکا ځانګړي استازي دا هم وویل چې د ایران د هغو بیړیو مخنیوی ګران دی چې حوثیانو ته وسلې وړي، خو ټینګار یې وکړ چې دې برخه کې نړیوالې همکارۍ ته اړتیا ده.

کوټه کې بمي چاودنې ۳ تنه ووژل او ۹ یې ژوبل کړل

دا بمي چاودنه د کوټې د سرینا هوټل په پارکنګ کې شوې

درې تنه د پاکستان په کوټه ښار کې د سرینا هوټل په پارکنګ کې په بمي چاودنه کې ووژل شول.

پاکستاني چارواکي وایي، په دې پېښه کې چې تېر ماښام شوې ۹ کسان ټپیان شوي دي چې د ځینو وضعیت نازک ښودل شوی دی.

د پولیسو افسر محمد منیر په خبره د سرینا هوټل مخته څو ولاړ موټر په دې پېښه کې وسوځېدل.

تحریک طالبان چې په پاکستاني طالبانو مشهور دي د دې پېښې مسؤلیت ومانه او ویې ویل چې د چارواکو په نښه کولو نیت یې درلود.

په دې هوټل کې د چین سفیر اوسېده، خو د پېښې پر مهال په هغه ځای کې نه وو.

دا خبره د پاکستان د کورنیو چارو وزیر شیخ رشید احمد ځایي رسنیو ته وکړه.

چینایي چارواکو تر اوسه په دې اړه تبصره نه ده کړې.

روسي پولیسو ۱۷۰۰ مظاهره چیان نیولي چې د ناوالنۍ په پلوي راوتلي وو

مسکو کې پولیسو د ناوالنۍ یو پلوی نیولی دی.

روسي پولیسو له ۱۷۰۰ زیات هغه مظاهره چیان نیولي چې د کریملین د منتقد الکسي ناوالني د خوشې کېدو لپاره یې پرون چهارشنبه (د غويي ۱) د روسیې په یو شمېر ښارونو کې په مظاهرو کې برخه اخېستې وه.

الکسي ناوالنۍ چې په زندان کې یې د ډوډۍ نه خوړلو اعتصاب درېیمې اونۍ ته داخلېږي، روغتیایي وضعیت یې مخ په خرابېدو دی.

پرون چې کله ولسمشر ولادیمیر پوتین خپله کلنۍ وینا کوله، په زرګونه کسان له ولادي واستوک څخه تر کالینینګراد پورې په مختلفو ښارونو د الکسي ناوالنۍ د پلویانو له مظاهرو سره یوځای شول.

د دغو مظاهرو مشرې د ناوالنۍ د فساد ضد بنسټ کوي. دوی وېره لري که د الکسي ناوالنۍ سمه درملنه ونه شي، د هغه وضعیت به دومره خراب شي چې رغېدل به یې ممکن نه وي.

د ملګرو ملتونو د متخصصینو یوې څلور کسیزې ډلې پرون چهارشنبې وویل چې د ناوالنۍ ژوند له جدي خطر سره مخامخ دی.

د روسي پولیسو د ناوالنۍ ډېر پلویان مخکې تر دې چې په مظاهرو کې برخه واخلي ونیول.

ناوالنۍ په جنوري میاشت کې له جرمني بېرته روسیې ته د ستنېدو پر مهال د مسکو په هوایي ډګر کې تر نیول کېدو وروسته زنداني شوی.

د جورج فلوېډ وژنه؛ امریکايي افسر دیریک شاوون مجرم وپېژندل شو

د پولیسو پخوانی افسر دیریک شاوون

د امریکا د یوې محکمې منصفه پلاوي د پولیسو پخوانی افسر دیریک شاوون په میناپولیس ښار کې د تورپوستي امریکایي جورج فلوېډ په وژنه کې مجرم وپېژنده.

دغه ۱۲ کسیز پلاوي پرون سې شنبه (د وري ۳۱مه) لس ساعته بحثونه وکړل او ۴۵ کلن شاوون یې د وژنې په تورونو مجرم وپیژند.

شاوون اوس له لسګونه کاله قید سره مخامخ دی.

متخصصانو ویلي، دا افسر به د استناف غوښتنه وکړي.

مجرم پېژندل شوي پخواني افسر تېرکال په مې میاشت کې د یوه تورپوستي امریکایي جورج فلوېډ پر مرۍ ۹ دقیقې زنګون ایښي و چې وروسته هغه سا ورکړه.

د رویټرز خبري اژانس د راپور له مخې، د وژل شوي تورپوستي سلګونه پلویان د دغه حکم پرمهال د محکمې مخې ته راټول شوي او ښادۍ یې کړي دي.

د بښنې نړیوال سازمان: تېرکال د اعدامونو کچه ټیټه شوې

ارشیف

د بښنې نړیوال سازمان وایي، په ۲۰۲۰ میلادي کال کې په نړۍ کې د اعدامونو کچه په لږ تر لږه یوې لسیزه کې ټیټې کچې ته رسیدلې ده.

په لندن کې مېشت دغه سازمان پرون سې شنبه (د وري ۳۱مه) په نړۍ کې د اعدامونو په اړه خپل راپور خپور کړ.

راپور کې راغلي، ایران او ۱۷ نورو هېوادونو تېر کال د کرونا وبا له ګواښ سره سره هم اعدامونه اجرا کړي دي.

د دوی موندنې ښيي چې ۲۰۲۰ میلادي کال کې ۴۸۳ کسان اعدام شوي چې د ۲۰۱۹ کال پرتله ۲۶ فیصده کموالی ښيي.

پروسږ کال ایران ۲۴۶، مصر ۱۰۷، عراق ۴۵ او سعودي عربستان ۲۷ تنه اعدام کړي چې دا شمېر د ټولو اعدام شویو کسانو اتیا فیصده جوړوي.

چین، شمالي کوریا، سوریه او ویتنام په دوهمه درجه کې هغه هېوادونه یاد شوي چې اعدام په کې شوی. ​

قریشي: متحده عربي امارات پاکستان ته دوه میلیارده ډالر پور ورکوي

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي وايي، متحده عربي اماراتو منلې چې پاکستان ته دوه میلیارد ډالره پور ورکړي.

د پاکستان د بهرنیو چارو وزارت له خبرپاڼې سره سم، د دغه هېواد د بهرنیو چارو وزیر پرون سې شنبه (د وري ۳۱مه) وویل، د متحده عربي اماراتو د بهرنیو چارو وزیر شېخ عبدالله ابن زاید النهیان له ده سره په کتنه کې ژمنه وکړه چې له پاکستان سره هر ډول مرسته کوي.

د پاکستان د بهرنیو چارو وزیر د متحده عربي اماراتو له لوري د دوه میلیارده ډالره مرستې ورکړه، د متحده عربي اماراتو د چارواکو د همکاریو او د دوو هېوادونو ترمنځ د ښو اړیکو ښکارندویه بللې ده.

دا په داسې حال کې ده چې د (وري ۵مه-۱۴۰۰) کې د پیسو نړیوال صندق پاکستان ته د شپږ میلیارده ډالرو پور تر ارزونې وروسته دغه هېواد ته د ۵۰۰ میلیونه ډالرو مرسته تصویب کړې وه.

د ارمنیانو وژنه؛ اوغلو: که امریکا اړیکې خرابوي خپله پرېکړه دې وکړي

د ترکیې د بهرنیو چارو وزیر مولود چاووش اوغلو

د ترکیې د بهرنیو چارو وزیر مولود چاووش اوغلو وايي، د امریکا له لوري د ټول وژنې په توګه په ۱۹۱۵ میلادي کال کې د ارمنیانو د ډله ېیزې وژنې په رسمیت پېژندل به د دوو هېوادونو اړیکو ته زیان واړوي.

چاووش اوغلو پرون سې شنبه (د وري ۳۱مه) وویل، که امریکایان غواړي چې د دوو هېوادونو ترمنځ اړیکې لا خرابې کړي، نو خپله پرېکړه دې وکړي.

د امریکا د کانګرس غړیو په ۲۰۱۹ میلادي کال د رایو په اکثریت یو پرېکړه لیک تصویب کړ چې پر بنسټ یې د شلمې پېړۍ په لومړیو کې د عثماني امپراتورۍ په دوره کې د ارمنیانو ټول وژنه تایید شوه.ترکیه دا مني چې په یاده موده کې ډېر شمېر ارمنیان وژل شوي، خو منظمه ټول وژنه نه تاییدوي.

مشهور پاکستانی خبریال ابصار علم د یوه برید په ترڅ کې ټپي شوی

مشهور پاکستانی خبریال ابصارعلم

مشهور پاکستانی خبریال ابصارعلم وایي، په اسلام اباد کې د خپل کور مخې ته د برید پرمهال ټپي شوی دی.

ابصار علم د ډزو یوه ویډیو چې د موټر له دننه اخېستل شوې ده، پرون سې شنبه (د وري ۳۱مه) په خواله رسنیو کې شریکه کړه او ویې ویل چې دی په نس کې په مرمۍ لګیدلی دی.

وروسته بل خبریال عزیز سید په روغتون کې د ابصارعلم پوښتنې ته ورغی او ویې ویل چې ډاډه دی او روحیه یې عالي ده.

دا څرګنده نه ده چې پر ابصار علم چا ډزې کړي دي، خو دی په دې مشهور دی چې په ملکي چارو کې یې بیا-بیا د پوځ پر مداخلې انتقاد کاوه.

ابصار علم په خپاره کړي ویډیو پیغام کې ویلي، هغو کسانو ته چې پر ما یې برید کړی دی زما پیغام دا دی چې زه له داسې شیانو نه ویریږم او له خپلو هڅو به په شا نه شم.

د پاکستان د کورنیو چارو وزیر شیخ رشید احمد دا پېښه غندلې ده او د تحقیقاتو غوښتنه یې کړې ده.

د پاکستان د اپوزسیون ډلې غړې مریم نواز په ټویټر کې لیکلي دي چې د مخالفو غږونو غلي کېدل یو سرطان دی چې له کلونو راهیسې دا هېواد ځوروي او ابصارعلم د دې بې رحمه او وحشي جنایت تازه نښه ده.

ابصارعلم پخوا د انګلیسي ژبې 'نېشن' ورځپاڼې مسوول مدیر و او د پاکستان د انټرنیټي رسنیو مشر هم پاتې شوی دی.

روسیه کې د امریکا سفیر: واشنګټن ته د سلا مشورو په پار ځم

مسکو کې د امریکا سفیر جان سُلیوان

د واشنګټن او مسکو ترمنځ د اختلافاتو له زیاتېدو سره په روسیه کې د امریکا سفیر ویلي دي چې دا اوونۍ به د خپل هېواد له چارواکو سره د سلامشورې لپاره واشنګټن ته لاړ شي.

د دواړو هېوادونو اړیکې وروسته تر هغې ترینګلي شول چې د متحد ایالاتونو ولسمشر جوبایډن د سایبري بریدونو، د امریکا په انتخاباتو کې د مداخلې او په افغانستان کې امریکایي ځواکونو ته د روسيې له لوري د ګواښونو په خاطر پر مسکو نوي بندیزونه ولګول.

همدا راز د کریملین د سیاسي منتقد الکسي ناوالنۍ مساله ده، د اوکراین په ختیځ او کریمیا ټاپو وزمه کې د روسیي ځواکونو د شمېر د زیاتېدو موضوع ده او تازه دا تور پورې شوی دی چې روسیې په دوه زره څوارلسم کال کې د چک جمهوریت د مهماتو په یوه زېرمه کې په چاودنه کې لاس درلود.

په مسکو کې د امریکا د سفارت ویاندې ریبیکا راس ویلي دي چې سفیر جان سُلیوان غواړي له خپلو همکارانو سره د جوبایډن د ادارې او روسیې پر اړیکو خبرې وکړي.

مودي: هندیان دې کرونا سره د مبارزې لپاره تروسه وسه هڅه وکړي

د اکسیجن د کمبود ستونزه په ځانګړي ډول په پلازمېنې نوي ډلي کې ډېره ده.

د هند صدراعظم له خپلو هېوادوالو غوښتي دي چې له کرونا وبا سره د مبارزې لپاره تروسه وسه هڅې وکړي.

ناریندرا مودي وویل، هېواد یې یو ځل بیا له سترې جګړې سره په مبارزه بوخت شوی دی.

ده په خپله ټلوېزیوني وینا کې تېره شپه دا هم وویل چې د کرونا وبا تر دوهمې څپې مخکې په هند کې وضعیت په ښه کېدو و، خو اوس ستونزه ستره شوې ده.

مودي په داسې وخت کې دا وینا وکړه چې په هند کې د اکسیجن د کمبود ستونزه په ځانګړي ډول په پلازمېنې نوي ډلي کې ډېره ده.

په هند کې تر ۱۵ میلیونه او شپږ لکه ډېر کسان په کرونا اخته شوي دي او تر یو لک او دوه اتیا زره ډېرو کسانو د دې اخېستونکي ناروغۍ له امله خپل ژوند له لاسه ورکړی دی.

نور راوښيه

XS
SM
MD
LG