د لاسرسۍ وړ لېنکونه

تازه خبر
پنجشنبه ۲۶ وری ۱۴۰۰ کابل ۰۶:۰۸

افغانستان

پکتیا کې د استېناف څارنوالۍ یو څارنوال ووژل شو

ارشیف، د پکتیا ګردېز ښار

په پکتیا کې یو څارنوال د مرکز ګردېز اړوند لومړۍ امنیتي حوزه کې وژل شوی دی.

د پکتیا والي محمد حلیم فدایي نن رسنیو ته د دې پېښې په تړاو وویل: "د پکتیا استېناف څارنوالۍ څارنوال شهید حسنیار خپل کلي خطابه کې د شپې ۱۱ بجو شاوخوا کې د ترورېستانو له لوري شهید شوی دی."

والي زیاته کړه چې قاتلان تښتېدلي دي او کشفي او امنیتي ځواکونه د هغوی د موندلو په لټه کې دي.

د دې پېښې مسؤلیت چا نه‌دی منلی.

د ورځې تازه خبرونه دلته ولولئ

فواید عامې وزارت: راتلونکو ۳ میاشتو کې ۱۲ پروژې پای ته رسیږي

آرشیف

د افغانستان د فواید عامې وزارت په راتلونکو درېیو میاشتو کې پر یو شمېر لویو رغنیزو پروژو د کار د پای ته رسېدو خبر ورکوي.

د دې وزارت مرستیال ویاند اشرف حق شناس ازادي راډیو ته وویل، چې د کابل د حلقوي سړک او د کابل- لوګر، شبرغان- سرپل او د شورابک- سپین بولدک د لویو لارو په ګډون دولس پروژې په دې پلان کې شاملې دي چې لګښت یې ۲۱،۷ میلیارد افغانیو ته رسېږي.

ښاغلی حق شناس وايي، په دې پروژو کې د ځینو چارې بشپړې شوي او د ځینو نورو تر کار لاندې دي چې هغه به هم په درېیو میاشتو کې بشپړې شي.

ګراهام: له افغانستانه د امریکايي ځواکونو د ایستلو پرېکړه ناسمه ده

امریکايي سناتور لینډسي ګراهام

امریکايي سناتور لینډسي ګراهام له افغانستانه د امریکايي ځواکونو د ایستلو برخه کې د ولسمشر جو بایډن پرېکړه ناسمه بللې ده.

جمهوريپال ګراهام چې په تېرو شلو کلونو کې د افغانستان په مسایلو کې پرون چهارشنبه (د وري ۲۵مه) په یوه خبري غونډه کې وویل، له افغانستانه د امریکايي ځواکونو ایستل د هغې بیمې فسخ کول دي چې د ۲۰۰۱ میلادي کال د سېپټمبر په ۱۱ مه نېټه پر متحدو ایالاتونو د بلې تروریستي حملې مخه یې نیوله.

ښاغلي ګراهام زیاته کړه چې پر طالبانو باور نه شي کېدای: "طالبان له القاعده او داعش سره توپیر لري. زه منم چې هغوی به دلته زموږ په کور کې پر موږ برید ونه کړي خو باور لرم چې دوی به القاعده او داعش ته په افغانستان کې د ازاد فعالیت امکان برابر کړي. طالبان دا لېوالتیا او ظرفیت نه لري چې هغوی تعقیب کړي."

سناتور ګراهام وايي، په طالبانو کې ځینې عناصر شته چې پرمختګ غواړي خو د ده په وینا ډېر تُندلاري کسان هم په کې شته.

په عین حال کې هند د امریکايي ځواکونو له وتلو وروسته په افغانستان کې د قدرت د تشې د راتلو د احتمال په اړه اندېښنه ښودلې.

د رویټرز خبري اژانس د راپور له مخې د هند دفاع وزیر جنرال بیپین راوټ نن پنجشنبه (د وري ۲۶مه) یوې امنیتي غونډې ته وویل، د ده وېره دا ده چې د نړیوالو پوځیانو له وتلو وروسته به د سولې دښمنان فعال شي.

ښاغلي راوټ د سولې د دښمن په توګه د کوم هېواد نوم وانه خېست.

ناټو: له افغانستانه د ځواکونو ایستل به د مې له لومړۍ نېټې پیل کړو

بروکسل کې د ناټو دفاع او بهرنیو چارو وزیرانو غونډه

ناټو اعلان کړی چې له افغانستانه د غوڅ ملاتړ مأموریت د ځواکونو ایستل به د مې په لومړۍ نېټه پیل او د سپټمبر په ۱۱مه نېټه بشپړ کړي.

دا اعلان په هغه اعلامیه کې شوی چې ناټو تېره شپه خپره کړه.

پرون له دې مخکې د امریکا ولسمشر جو بایډن اعلان وکړ چې له افغانستانه د امریکایي ځواکونو د وتلو بهیر به د سږني کال د مې په لومړۍ نېټه پیل او د سپټمبر په ۱۱مه نېټه بشپړ شي.

ناټو هم په خپله اعلامیه کې طالبانو ته د بایډن خبرداری تکرار کړی او ویلي یې دي چې که طالبان د دې ټلوالې پر سرتېرو د وتلو پر مهال برید وکړي، نو ځواب به‌یې د ځواک په کارولو ورکړي.

اعلامیه زیاتوي چې ناټو او شریکان به‌یې د افغانستان، افغانانو، د دې هېواد د اساسي قانون او د امنیت او د تېرو ۲۰ کلونو د لاسته راوړنو د خوندي کولو په هدف د افغانستان د بنسټونو ملاتړ ته دوام ورکړي.

تېر کال افغانستان کې ۷۴ زره مټریک ټنه مالوچ تولید شوي

مزار شریف کې د مالوچو کښت

د افغانستات کرنې او مالدارۍ وزارت وایي، په ۱۳۹۹ کال کې د هېواد په کچه ۷۴ زره مټریک ټنه مالوچ تولید شوي دي.

په ۱۳۹۸ لمریز کال بیا دا کچه ۷۳ زره مټریک ټنو ته رسېده.

د کرنې او مالدارۍ وزارت ویاند اکبر رستمي ازادي راډیو ته وویل، سږ کال په بلخ ولایت کې څه باندې ۲۸ زره ټنه مالوچ تولید شول چې تر نورو ولایتونو يې کچه لوړه وه.

د هغه په خبره هلمند، کندز، نیمروز، تخار، جوزجان او بغلان نور هغه ولایتونه دي چې د مالوچو د تولید له اړخه مهم بلل کېږي.

مالوچ د صنعتي نباتاتو له ډلې دی چې په سیمه‌ییزه او نړیواله کچه ښه بازار لري.

وسله‌والو طالبانو د غزني قره‌باغ ولسوالۍ پر مرکز برید کړی

ارشیف، غزني کې د یوې حملې له سیمې پورته شوی لوګی

د سې شنبې او چهارشنبې په منځنۍ شپه وسله‌والو طالبانو د غزني ولایت د قره‌باغ ولسوالۍ پر مرکز برید وکړ چې د تېرې شپې تر ناوخته‌یې دوام درلود.

د یادې ولسوالۍ سرپرست امنیه قوماندان وايي، دغه جګړه د شپې ۱۰:۴۵ دقیقې پیل شوه.

رمضان ځیرک تېره شپه ناوخته ازادي راډیو ته وویل، وسله‌وال طالبان اوس هم د ښار ځینو برخو کې شتون لري او پر امنیتي ځواکونو د لیزري وسلو بریدونه کوي.

رمضان ځیرک زیاتوي، که مرکزي دولت له دوی سره د هوايي ځواک مرسته ونه‌کړي، جګړه به ستونزمنه او دغه ولسوالۍ به سقوط شي.

رمضان ځیرک وايي نن د ورځې په اوږدو کې افغان هوايي ځواکونو پر دغه وسله‌والو بریدونه وکړل، یو رېنجر موټر یې په نخښه کړ چې په پایله کې یې شپږ تنه وسله‌وال وژل شوي دي.

د نوموړي په خبره، په دغه ۲۴ ساعته جګړه کې افغان امنیتي ځواکونو ته زیان نه‌دی اوښتی.

وسله‌وال طالبان هم مني چې افغان هوايي ځواکونو بمبار کړی دی، خو وايي د دوی جنګیالو ته په‌کې زیان نه‌دی اوښتی.

د دغه ډلې ویاند ذبیح‌الله مجاهد ازادي راډیو ته وویل، وسله‌والو طالبانو د قره‌باغ ولسوالۍ مرکز ته څېرمه ځیني عملیات ترسره کړي دي.

قره‌باغ له غزني مرکز څخه شاوخوا په ۲۵ کیلومترۍ واټن سوېل لور ته د کابل-کندهار پر لویه لاره پرته ولسوالۍ ده چې ډېری سیمې یې د وسله‌والو طالبانو په واک کې دي.

سي‌ای‌اې له افغانستانه د ځواکونو له وتلو وروسته د ستر ګواښ خبرداری ورکړ

د امریکا د استخباراتو د مرکزي ادارې، سي‌ای‌اې رئيس ویلیم برنز

د امریکا د استخباراتو د مرکزي ادارې، سي‌ای‌اې رئيس له افغانستانه د امریکايي او ائتلافي ځواکونو له وتلو وروسته د ستر ګواښ خبرداری ورکړ.

ویلیم برنز، د ولسمشر بایډن له لوري د ځواکونو د ایستلو تر اعلان څو ساعته وړاندې د امریکا د سنا جرګې استخباراتي کمېټې ته وویل، کله چې امریکايي او ائتلافي ځواکونه له افغانستانه ووځي، ستر خطر به رامنځته شي.

ده په عین حال کې وویل چې امریکا به دا امکان ولري چې ځیني امکانات بېرته ترلاسه کړي.

د امریکا ولسمشر جو بایډن چهارشنبه ناوخته اعلان وکړ چې له افغانستانه ټول امریکايي ځواکونه د روان کال د سپټمبر تر ۱۱مې نېټې باسي.

ښاغلي بایډن چهارشنبه «۱۴۰۰ کال د وري ۲۵مه» ناوخته وویل، د ۲۰۰۱ م کال د سپټمبر د ۱۱مې د حملو مطلب دا نه‌دی چې امریکايي پوځیان ۲۰ کاله وروسته لا هم په افغانستان کې پاتې شي.

د پاکستان لوی درستیز او د امریکا بهرنیو چارو وزیر پر افغان سولې خبرې وکړې

د پاکستان لوی درستیز جنرال قمر جاوېد باجوه

پاکستان وايي، د دغه هېواد د پوځ لوی درستیز پرون د امریکا له بهرنیو چارو وزیر سره د افغانستان د سولې او د سیمې د امنیت په اړه خبرې وکړې.

د پاکستان د پوځ مطبوعاتي څانګې په یوه خبرپاڼه کې ویلي، د پوځ لوی درستیز جنرال قمر جاوېد باجوه او انتوني بلېنکن پر دوه اړخیزو مسئلو او د افغانستان د سولې په پروسه کې د وروستیو انکشافاتو په شمول د سیمې د امنیت په اړه خبرې وکړې.

د پاکستان د پوځ د خبرپاڼې پر اساس، د دغه هېواد لوی درستیز د امریکا د بهرنیو چارو وزیر ته د افغانانو په مشرۍ او مالکیت د سولې د پروسې د ملاتړ بشپړ ډاډ ورکړ.

په خبرپاڼه کې دغه‌راز راغلي چې د امریکا بهرنیو چارو وزیر د پاکستان پوځ لوی درستیز ته د دوو هېوادونو ترمنځ د اړیکو د لا پراختیا ژمنه ورکړه.

بایډن له اشرف غني سره له افغانستانه د امریکايي ځواکونو پر ایستلو خبرې وکړې

د افغانستان جمهور رئیس محمد اشرف غني او د امریکا ولسمشر جو بایډن

د امریکا ولسمشر جو بایډن له افغانستانه د خپلو پوځیانو د د ایستلو د نوې نېټې تر رسمي اعلان څو ساعته وړاندې تېره شپه د افغانستان ولسمشر اشرف غني ته ټیلیفون وکړ.

د افغانستان ولسمشر اشرف غني له دې خبرو وروسته په خپله ټویټرپاڼه کې لیکلي چې له خپل امریکايي ساري سره‌یې له افغانستانه د امریکايي پوځیانو د وتلو په اړه ټیلیفوني خبرې کړي او ورته ویلي چې افغان ځواکونه د خپل هېواد د دفاع بشپړه وړتیا لري.

ولسمشر غني همداراز ویلي، له ولسمشر بایډن سره په ټیلیفوني خبرو کې یې د سپټمبر تر لومړیو پورې له افغانستانه د امریکايي پوځیانو د وتلو په اړه د خبرو پر مهال ویلي چې د افغانستان اسلامي جمهوریت د امریکا پرېکړې ته درناوی او په دې برخه کې له خپلو امریکايي شریکانو سره همکاري کوي.

ده ټینګار کړی چې افغان امنیتي او دفاعي ځواکونه په ویاړ د خپلو خلکو او هېواد د دفاع توان لري، دا مسؤلیت‌یې تل ادا کړی او افغان ملت به تل د دوی قدر وکړي.

له کله چې جو بایډن د امریکا ولسمشر غوره شوی، دا لومړی ځل دی چې د افغانستان له ولسمشر سره ټیلیفوني خبرې کوي.

بلېنکن: له افغانستانه د ځواکونو تر ایستلو وروسته هم دې هېواد سره ژمن یو

د امریکا بهرنیو چارو وزیر انتوني بلېنکن نن په بروکسل کې د وینا پر مهال

د امریکا بهرنیو چارو وزیر وايي، متحده ایالات به له افغانستانه د خپلو ځواکونو تر ایستلو وروسته هم له دې هېواد سره ژمن پاته وي.

انتوني بلېنکن وویل، ناټو هېوادونه به له افغانستانه د خپلو ځواکونو پر ایستلو کار وکړي چې ده دا "د بدلون پړاو" یاد کړ.

ده نن په بروکسل کې د وینا پر مهال وویل: "وخت رارسېدلی چې خپل ځواکونه بېرته کور ته راولو. ولسمشر بایډن به په څو ساعتونو کې په امریکا کې په دې اړه وینا وکړي. زه دلته یم چې له خپلو متحدینو سره له نږدې پر هغو اصولو کار وکړو چې په لومړي سر کې مو جوړ کړي وو. موږ په ګډه راغلي یو، په ګډه به ځو. په نږدې اوونیو او میاشتو کې به پر دې له ډېر نږدې کار کوو."

له ده سره د بروکسل په سفر کې د امریکا دفاع وزیر لوید استین هم ملګری دی.

بل‌خوا د افغانستان د ملی مصالحې عالي شورا رئیس د سپټمبر تر ۱۱مې نېټې له افغانستان د بهرنیو عسکرو وتو ته په غبرګون کې وايي، له دې پرېکړې د طالبانو د ناسم درک په اړه اندېښنه شته.

ښاغلي عبدالله نن رسنیو ته وویل، له افغانستان څخه د بهرنیو عسکرو وتل، له دې هېواد سره د نړیوالې ټولنې د اړیکو د پرېکون په معنی نه‌دي، خو په دې هم نه‌پوهېږي چې د اړیکو دوام به څه ډول وي.

د سپټمبر تر ۱۱مې د ټولو امریکایي ځواکونو وتل تر هغه مهلت چې مخکې د امریکا او طالبانو ترمنځ تړون کې ټاکل شوی، شاوخوا څلور میاشتنی ځنډ ښیي.

طالبانو بیا د دې پرېکړې په ځواب کې په ټولو هغو کنفرانسونو کې د نه‌ګډون اعلان کړی چې د افغانستان په اړه جوړېږي، خو وړاندې دې ډلې پر دې ځواکونو د بریدونو خبره کړې وه.

یوناما: ۳ میاشتو کې افغان جګړې ۵۷۳ ملکيان وژلي

ارشیف، د ننګرهار یوه پېښه

د ملکي مرګ ژوبلې په تړاو د یوناما تازه راپور ښیې چې د روان زیږدیز کال په لومړیو درېیو میاشتو کې د افغانستان په جګړو کې۵۷۳ تنه ملکي کسان وژل شوي او ۱۲۱۰ تنه تپيان شوي دي.

یوناما یو ځل بیا د جګړې پر ښکېلو غاړو د ولسي وګړو ژوند ته د پوره پام کولو او د افغان غمیزې د پای ته رسولو غږ کړی.

په همدې حال کې د بشري حقونو خپلواک کمېسیون هم د جګړو له ښکېلو خواوو غوښتي چې د روژې د میاشتې په درناوي دې اوربند وکړي.

د دغه کمېسیون د نشراتو او اړیکو مسوول ذبیح الله فرهنګ ازادي راډیو ته وویل: "زموږ تمه دا ده چې طالبان او حکومت د خلکو غوښتنو ته درناوی وکړي. خلک د جنګ دوام نه بلکې اوربند غواړي."

تر دې وړاندې د افغانستان ولسمشر محمد اشرف غني او د ملي مصالحې د عالي شورا مشر عبدالله عبدالله هم د روژې په میاشتې کې د اوربند غوښتنه کړې وه.

طالبانو تراوسه دغو پرله پسې غوښتنو ته مثبت جواب نه دی ویلی.

ملي امنیت: ننګرهار کې د داعش ډلې یو مرستیال قوماندان وژل شوی

افغان سرتیري ننګرهار کې د عملیاتو پر مهال

د ملي امنیت ادارې په ننګرهار ولایت کې د داعش ډلې د یوه مرستیال قوماندان د وژل کېدو خبر ورکړی.

دغې ادارې په یوه اعلامېه کې ویلي چې د ملي امنیت ځانګړو ځواکونو تېره شپه د ننګرهار د خوګیاڼو ولسوالۍ په چمتله سیمه کې عملیات ترسره کړل چې په نتیجه کې د داعش دغه مرستیال قوماندان لعلي ګل چې په مصطفی مشهور وو، د مقاومت په نتیجه کې ووژل شو.

د اعلامیې له مخې دغه کس په شېرزاد او خوګیاڼو ولسوالیو کې افغان امنیتي ځواکونو ته د ماینونو په ایښودلو کې لاس درلود.

اعلامیې د عملیاتو په اړه نور جزئیات نه دي ورکړي.

داعش وسله والو په دې اړه تر اوسه رسنیو ته څه نه دي ویلي.

د تخار رستاق ولسوالۍ کې ۵ لویې پروژې ګټې اخېستنې ته وسپارل شوې

د تخار والي مولوي عبدالله قرلق

د تخار ولایت په رستاق ولسوالۍ کې د ۱۳۹ میلیونه افغانیو په لګښت پنځه لوېې ټولګټې پروژې ګټې اخېستنې ته سپارل شوي دي.

د چارواکو د خبرو له مخې چې دې پروژو کې د ۳ ښوونځیو ودانۍ او د څښاک د پاکو اوبو دوه شبکې شامل دي او مالي لګښت یې افغان دولت ورکړی.

د تخار والي مولوي عبدالله قرلق رسنیو ته وویل: "د څښاک اوبو په دې دوو پروژو څه باندې ۸۷ میلیونه افغانۍ لګښت راغلی. پخوا کلیوالو د څښاک اوبو ته لاس رسی نه درلود او په ډېرې خوارۍ به یې له لېرو سیمو غیر صحي اوبو راوړلې. خو د دې پروژو په ګټې اخېستو سره د ۱۵ کلیو اوسېدونکي د څښاک له پاکو اوبو برخمن شول."

د سیمې خلک هم له دې پروژو خوښ دي وايي، پخوا یې له لېرې سیمو ناپاکې اوبه راوړلې چې د کورنۍ ګڼ غړي به پرې ناروغ وو.

رستاق ولسوالۍ د تخار مرکز تالقان شمال لور ته په ۷۰ کیلو متره واټن کې پروت دی چې ددې ولایت له سرحدي ولسوالیو شمېرل کیږي.

ننګرهار کې د شاتو برخه کې پانګونه زیاته شوې

ارشیف

په ننګرهار کې د مچیو د شاتو په برخه کې پانګونه زیاته شوې ده.د افغانستان صنعت او سوداګرۍ وزارت وایي، خصوصي پانګوالو په ننګرهار ولایت کې د مچیو شاتو پنځه سوه وړو او لویو فارمونو کې د پنځوس میلیونه افغانیو په ارزښت پانګونه کړې ده.

د دې وزارت ویاند فواد احمدي ازادي راډیو ته وویل، دې برخه کې د پانګونې له ډیرېدو سره دوو زره کسانو ته د کار زمینه هم برابره شوې ده.

د ښاغلي احمدي په خبره، اوس پنځوس واړه او لوی شرکتونو د شاتو پروسس او بسته بندۍ برخه کې په کار بوخت دي.

د صنعت او سوداګرۍ وزارت د معلوماتو له مخې د ننګرهار ولایتو شاتو د ګلف فود په نوم نړیوال نندارتو کې چې دوبۍ کې جوړ شوی و له بهرنیو شرکتونو سره د سلو زرو ډالرو په ارزښت تړونونو ترسره کړي دي.

شمېرې ښیي چې تېرکال د مچيو د فارمونو درلودونکو څه د باڅه څلور سوه ټنه شات ترلاسه کړي چې ډېری یې بهرنیو هېوادونو ته لېږل شوي دي.

چارواکي: افغانستان کې د چرګانو د غوښې تولید ۲۶۰ زره ټنو ته رسېږي

د هېواد په کچه د چرګ پالنې څه باندې نهه زره فارمونه فعالیت لري

د کرنې اوبو لګونې او مالدارۍ وزارت وایي، افغانستان د چرګانو د غوښې د توليد برخه کې ځان بسیاینې ته نږدې شوی او اوس مهال، په کلني ډول په هېواد کې د چرګانو د غوښې تولید ۲۶۰ زره ټنو ته رسېږي.

د دې وزارت ویاند اکبر رستمي ازادي راډیو ته وویل، دا مهال د هېواد په کچه د غوښېنو، هګیو او تکثیري چرګانو نهه زره او ۲۴۷ لوی او واړه فارمونه فعال دي.

د ښاغلي رستمي په خبره، کابل د هګيو د چرګانو له نږدې دوه زره فارمونو په درلودو سره، د هګیو چرګانو تر ټولو زیات فارمونه لري او کندهار د غوښېنو چرګانو شااوخوا زر فارمونه لري.

هغه زیاته کړه، د تکثیري چرګانو د ساتنې فارمونه کم دي او څلور نور فارمونه په بلخ او کندهار ولایتونو کې جوړ شوي دي.

د کرنې اوبو لګونې او مالدارۍ وزارت شمېرې ښیي چې په تېر لمریز کال کې د چرګانو د غوښي تولید ۲۶۱ زره او ۴۷ مټریک ټنه ته ورسېد چې ډېره برخه یې کابل، هرات، ننګرهار، تخار، کندهار، بلخ، هلمند او فراه ولایتونو کې تولید شوي.

چارواکي: فراه کې موټربم چاودنې ۲ملکیان ووژل او ۲۰ نور یې ژوبل کړل

ارشیف، عکس تزئیني بڼه لري

په فراه ولایت کې د یوه موټر بم په چاودنه کې لږ تر لږه ۲ ملکیان ووژل شول او نږدې ۲۰ تنه نور ټپیان شول.

د فراه د امنیه قوماندانۍ ویاند، فاروق حضرتي تېره شپه ازادي راډیو ته وویل، په ټپیانو کې ۲ پولیس او نور ملکیان دي.

د حضرتي په خبره دغه چاودنه پرون مازیګر پنځه بجه د فراه په لومړۍ ناحیه کې وشوه.

چارواکي وايي، په وژل شوېو کې یو تن ماشوم هم شامل دی.

نور راوښيه

XS
SM
MD
LG