د لاسرسۍ وړ لېنکونه

تازه خبر
جمعه ۱۰ وری ۱۴۰۳ کابل ۰۶:۴۹

واشنګټن پوسټ: امریکا له طالبانو سره د واک وېش لپاره د موقت حکومت طرحه وړاندې کړې


یو شمېر نړیوالې ورځپاڼې
یو شمېر نړیوالې ورځپاڼې
  • نیویارک ټایمز

نیویارک ټایمز ورځپاڼې په خپله نوې ګڼه کې په افغانستان کې د سولې د روانو هڅو په لړ کې د امریکا د هغې طرحې یادونه کړې چې له ملګرو ملتونو څخه‌یې د افغانستان د سولې په اړه د بحث لپاره په ترکیه کې د یوې غونډې د جوړېدو وړاندیز کړی.

په دې مطلب کې ولسمشر اشرف غني ته د امریکا د بهرنیو چارو د وزیر انتوني بلېنکن د لیک یادونه شوې. افغان چارواکو له ازادي راډيو سره په خبرو کې تأیید کړې ده چې دا لیک ښاغلي غني ته رسېدلی، خو دې چارواکو یې د محتوا په اړه څه نه‌دي ویلي.

نیویارک ټایمز لیکي، د امریکا د بهرنیو چارو وزارت د دې لیک په اړه له څه ویلو ډډه کړې، خو په یو بیان کې یې یادونه کړې چې له افغانستانه د پوځي ځواکونو د ایستلو په برخه کې هر امکان د مېز پر سر دی، که څه هم په لیک کې ویل شوي دي چې په افغانستان کې د امریکايي سرتېرو د وضعیت په اړه تر اوسه هېڅ راز پرېکړه نه‌ده شوې.

د مخکېني ولسمشر ډونالد ټرمپ د ادارې او طالبانو ترمنځ د تېر کال د فبرورۍ د ۲۹مې نېټې د موافقې له مخې ټول امریکايي ځواکونه باید د سږني کال د مې تر لومړۍ نېټې له افغانستانه ووځي، خو په دې شرط چې طالبان هم د ترورېزم پر ضد د مبارزې په چاره کې پر خپلو ژمنو وفا وکړي.

ولسمشر غني ته د ښاغلي بلېنکن د لیک د څرنګوالي په اړه نیویارک ټایمز لیکي چې د دې لیک لحن په غیر معمول ډول څرګند او واضح دی او بلېنکن افغان ولسمشر ته په‌کې وايي چې باید د ده د پیغام فوریت درک کړي.

په مطلب کې راغلي چې بلېنکن هڅه کوي د افغان حکومت او طالبانو ترمنځ د سولې د مذاکراتو بهیر چټک کړي، هغه مذاکرات چې په سپټمبر میاشت کې پیل شول، ډېر سوکه پر مخ ځي او تر اوسه‌یې کومه نتیجه هم نه‌ده ورکړې.

  • واشنګټن پوسټ

واشنګټن پوسټ ورځپاڼې هم په یو مطلب کې چې سرلیک‌یې دی متحده ایالاتو په افغانستان کې له طالبانو سره د واک د وېش لپاره د موقت حکومت طرحه وړاندې کړې ده، همدې موضوع ته اشاره کړې.

په مطلب کې راغلي چې د بایډن حکومت له دې وېرې چې د افغانستان د سولې د خبرو برخلیک نه‌دی معلوم او له افغانستانه د امریکايي سرتېرو د احتمالي ایستلو لپاره د مې د لومړۍ نېټې مهلت هم رانږدې کېږي، په افغانستان کې د طالبانو او افغان حکومت ترمنځ د موقت حکومت د جوړېدو طرح برابره کړې او د ایران په ګډون د افغانستان له ګاونډيانو سره‌یې تماسونه نیولي.

واشنګټن پوست لیکي، تېره اوونۍ د افغانستان د سولې لپاره د امریکا د ځانګړي استازي زلمي خلیلزاد په وسیله له افغان حکومت او طالبانو سره د دې طرحې له شریکولو سره په یوه وخت کې د امریکا د بهرنیو چارو وزیر انتوني بلېنکن ولسمشر غني ته خبرداری ورکړی چې له افغانستانه د امریکايي پوځیانو ایستل اوس هم تر غور لاندې دي او که داسې وشي، نو په نتیجه کې یې ښايي طالبان په چټکۍ سره نورې سیمې لاندې کړي.

XS
SM
MD
LG