د لاسرسۍ وړ لېنکونه

تازه خبر
یکشنبه ۲۹ وری ۱۴۰۰ کابل ۰۷:۱۸

افغانستان

نادر نادري: د سولې خبرو کې ځنډ د طالبانو پر ارادې شکونه راولاړوي

د افغان دولت او طالبانو ترمنځ د سولې خبرو پرانیست غونډه کې په قطر کې د طالبانو د سیاسي دفتر او مرکچي پلاوي یو شمېر غړي

د دولت د مذاکراتي هیئت یو غړی وايي، په قطر کې د سولې په خبرو کې ځنډ شکونه ولاړوي چې ایا مقابل لوری یعنې طالبان د جګړې، که سولې اراده لري.

نادر نادري په هغه مرکه کې چې تېره شپه له ملي ټلوېزیون نه خپره شوه، وویل: "اوس چې دومره وخت تېرېږي او پر اصلي مسایلو په مذاکرو کې پرمختګ نه‌شته، نو واقعاً دا شک ولاړوي چې هاخوا د جګړې اراده لري، که د سولې؟"

ښاغلي نادري وویل چې د دولت هیئت به هڅه وکړي چې په راروانو مذاکرو کې تر ډېره په افغانستان کې د اوربند پر ټینګښت بحث وکړي، ځکه اوربند او په افغانستان کې د جګړې بندېدل د اکثرو افغانانو غوښتنه ده.

په قطر کې د طالبانو او افغان دولت مذاکره کوونکو هیئتونو د تماس ډلو تر یوې میاشتې ځنډ وروسته تېره دوشنبه په خپلو کې غونډه وکړه.

د ورځې تازه خبرونه دلته ولولئ

اشرف غني: د دولت د سقوط اوازې ناسمې دي

د افغانستان جمهور رئیس محمد اشرف غني

له افغانستانه د ټولو بهرنیو ځواکونو د وتلو په درشل کې افغان ولسمشر وایي، د دوی د دولت د سقوط اوازې ناسمې دي.

محمد اشرف غني دا خبرې دوه ورځې وړاندې د نظامي ګنجوي نړیوال مرکز په ناسته کې کړې، خو د خبرو دا برخه‌یې نن ارګ پر خپلو ټولنیزو رسنیو خپره کړې ده.

ښاغلي غني زیاته کړې ځواکونه‌یې هره ورځ ۳۰ تر ۴۰ پورې عملیات مخته وړي او تر ډېره په خپلواکه توګه.

ښاغلی غني وايي: "موږ د سقوط په خطر کې نه‌یو، دا روایت ناسم دی چې د افغانستان دولت به وپرځېږي، موږ یوازې ۴۰ زره کمانډو، ځانګړي او هوايي ځواکونه لرو چې ښه پياوړي او ښه روزنه‌یې شوې ده، تر هغو چې دا ځواکونه وي د دولت د سقوط خطر نه‌شته."

له دې وړاندې د افغانستان دفاع وزارت هم ویلي چې د دوی ځواکونه د بهرنیو له حضور پرته هم د دغه هېواد او افغانانو د بشپړې دفاع وړتیا لري.

له افغانستانه په بې‌قید او شرطه ډول د ټولو بهرنیو ځواکونو له وتلو وروسته ځیني تحلیلیونه دا دي چې طالبان به ډېرې سیمې لاندې کړي.

د امریکا استخباراتو هم ورته اندېښنه ښودلې ده.

خوست کې هم درمل پلورونکو کاري اعتصاب وکړ

خوست کې د درمل پلورونکو کاري اعتصاب

د افغانستان د یو شمېر نورو ولایتونو په څېر خوست کې هم درمل پلورونکو کاري اعتصاب کړی چې خلکو ته‌یې ستونزې پیدا کړي.

دوی د دولت د هغې پرېکړې په وړاندې اعتراض کړی چې غواړي د درملو واردات په پنځو شرکتونو پورې منحصر کړي.

د خوست د درملتونونو د ټولنې مرستیال سلطان افغان ازادي راډیو ته وویل: "موږ خپل اعتصاب د تېرې پنجشنبې له ورځې پیل کړی او تر هغې به جریان لري چې موږ خپل حقه حقوقو ته لاسرسی نه‌وي شوی، موږ په خوست کې ۴۲۳ دواخانې او د درملو د شرکتونو نماینده‌ګۍ لرو چې دا ټول په مطلق ډول تړلي دي."

د افغانستان دولت ویلي، غواړي د درملو واردات په پنځو شرکتونو منحصر کړي او دغه شرکتونه به‌یې بیا په زنځیري ډول په درملتونونو وېشي.

له دې وړاندې په کابل، هرات او ګڼو نورو ولایتونو کې د درملو کاروباریانو ورته اعتراضونه کړي دي.

حنیف اتمر او شاه محمود قریشي د سولې بهیر پر ګړندیتوب خبرې وکړې

د افغانستان د بهرنیو چارو وزیر محمد حنیف اتمر او د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي وایي، له خپل افغان سیال محمد حنیف اتمر سره‌یې د سولې بهیر پر ګړندیتوب خبرې کړې دي.

ښاغلي قریشي نن (د اپرېل ۱۸) پر خپله ټویټرپاڼه ولیکل، هیله‌من دی چې په استانبول کنفرانس کې له ښاغلي اتمر سره وګوري او بیا یې اسلام‌اباد کې کوربه‌توب وکړي.

د قریشي په خبره، دی او ښاغلی اتمر به له استانبول کنفرانس وروسته په پاکستان کې د همدې کنفرانس د لارو چارو په اړه خبرې وکړي.

ټاکل شوې د استانبول کنفرانس د همدې اپرېل میاشتې په ۲۴مه پیل شي، افغان دولت وایي د ګډون کوونکو نوملړ یې بشپړ کړی، خو طالبانو لا په کنفرانس کې د ګډون یا نه‌ګډون په اړه په څه نه‌دي ویلي.

طالبانو دومره ویلي، تر هغه چې ټول بهرني ځواکونه له افغانستانه ونه‌وځي، دوی به داسې کنفرانسونو کې ګډون ونه‌کړې چې د دې هېواد په اړه پرېکړه په‌کې کېږي.

د ننګرهار د پچیراګام او هسکې مېنې لپاره د 'داعش ډلې نوی مسؤل' ووژل شو

ارشیف، ننګرهار کې یو افغان سرتېری

د افغانستان د ملي امنیت ځواکونو په عملیاتو کې د پچیراګام او هسکې مېنې ولسوالیو لپاره د داعش ډلې نوی مسؤل ووژل شو.

د ملي امنیت ریاست په یوې خبرپاڼه کې راغلي چې دا عملیات تېره شپه د کوز کونړ ولسوالۍ په مربوطاتو کې شوي چې په نتیجه کې د داعش ډلې یو مسؤل کمین چې په حکیم‌الله مشهور دی، د تېښتې پر مهال ووژل شو.

خبرپاڼه زیاتوي په دې عملیاتو کې امنیتي ځواکونو او ملکي وګړو ته زیان نه‌دی رسېدلی.

د جرمني دفاع وزیرې له خپل حکومت له دوی سره د کارکوونکو افغانانو منل غوښتي

د جرمني دفاع وزیره انګریت کارنبایر

د جرمني دفاع وزیره انګریت کارنبایر وایي له حکومت څخه‌یې غواړي هغه افغانان چې د افغانستان په جګړو کې یې په هغه هېواد کې له دېره جرمني پوځیانو سره مرسته کړې او دا مهال‌یې ژوند په خطر کې دی، ومني.

نوموړي د جرمني ډي پي اې خبري اژانس ته وویل چې په حکومت کې دننه د یوې اسانه او چټکي حل‌لارې لپاره کار روان دی.

مېرمن کارنبایر زیاته کړه، کله چې جرمني ځواکونه له افغانستان څخه وځي، دا د جرمني مسؤلیت دی چې له دوی سره همکار افغانان په ناخوندي ډول یوازې پرې نږدي.

په افغانستان کې له دېره ۱،۰۰۰ جرمني سرتېرو ترڅنګ ۳۰۰ افغان کارکوونکي په دندو بوخت دي.

جلال‌اباد کې د یوې کورنۍ ۸ غړي ووژل شول

جلال‌اباد کې د یوې پېښې په سیمه کې راټول شوي پولیس

د یوې کورنۍ ۸ غړي تېر ماښام په جلال‌اباد ښار کې ووژل شول.

د ننګرهار والي ضیاءالحق امرخېل وایي دا پېښه د جلال‌اباد ښار د ۹مې ناحیې اړوند سیمه کې داسې مهال شوې چې دغه کسان د تراوېح پر لمانځه ولاړ ول.

ښاغلی امرخېل زیاتوي چې پنځه تنه وژل شوي د حاجي عبدالوهاب په نوم یوه کس زامن او درې نور یې ورېرونه ول.

د والي په خبره لومړني معلومات ښیي چې دا پېښه د ځمکو پر سر د شخصي دښمنۍ له کبله شوې ده.

د غزني په قره‌باغ ولسوالۍ کې چاودنې ۴ ملکيان ووژل

ارشیف، غزني کې د یوې چاودنې په سیمه کې ولاړ پولیس

افغان چارواکي وايي چې د غزني ولایت په قره‌باغ ولسوالۍ کې څلور ملکي وګړي د یوه ماین په چاودنه کې وژل شوي دي.

د قره‌باغ امنیه قوماندان رمضان ځیرک تېر ماښام ازادي راډیو ته وویل چې دا چاودنه پرون مازیګر قره‌باغ ولسوالۍ ته نږدې په لایق کلي کې وشوه.

ښاغلي ځیرک د پېښې په اړه زیاته کړه: "څلور کسان شهیدان شول. هغوی یې د دروازې مخې ته ماین ایښی و. د دوی موټر هم ټوټې ټوټې شوی و. وروسته د کلي خلک پسې راپاڅېدلي دي او طالبان‌یې وهلي او له کلي څخه‌یې په زور شړلي دي."

ښاغلی ځیرک وايي، د تېرې سې شنبې او چهارشنبې ترمنځ شپه کې چې طالبانو د قره‌باغ پر مرکز برید وکړ او د ولسوالۍ بازار ته ننول، نو د بازار ټولې لارې یې په ماینونو وپوښلې چې د نوموړي په وینا پرون چاودلی ماین هم له همدې ډلې وو.

طالبانو تر اوسه په دې اړه څه نه‌دي ویلي.

اتمر له خپل هندي سیال سره د امریکا د پوځي مأموریت پر پای ته رسېدو خبرې وکړې

د افغانستان د بهرنیو چارو وزیر محمد حنیف اتمر او د هند د بهرنیو چارو وزیر اس جې شنکر

د افغانستان د بهرنیو چارو وزیر له خپل هندي سیال سره په افغانستان کې د امریکا د پوځي مأموریت د پای ته رسېدو په اړه خبرې کړي.

د بهرنیو چارو وزارت په یوه بیان کې وايي چې محمد حنیف اتمر پرون شنبه له اس جې شنکر سره په ټیلیفوني خبرو کې د امریکايي ځواکونو له وتلو وروسته په امنیتي، سیاسي او پراختیايي برخو کې له افغانستان سره د امریکا د همکاریو د نوي فصل په اړه خبرې وکړې.

بیان زیاتوي چې ښاغلي شنکر په افغانستان کې د سولې د ټینګښت په مقصد د سیمه‌ییزې همکارۍ د پیاوړي کولو په برخه کې د هند د فعالې ونډې ډاډ ورکړ.

د افغانستان د بهرنیو چارو وزیر له دې خبرو مخکې پرون په کابل کې د امریکا سفارت له شارژدافیر راس وېلسن سره هم وکتل.

د بهرنیو چارو وزارت په یوه جلا بیان کې وايي، ښاغلي وېلسن د امریکايي ځواکونو له وتلو وروسته له افغان دفاعي امنیتي ځواکونو سره د مرستو او همداراز په پراختیايي او بشري برخو کې د متحده ایالاتو د مرستو د دوام ډاډ ورکړ.

پنټاګون: افغانستان کې پر امریکايي ځواکونو برید به سخت ځواب سره مخ شي

ارشیف

د امریکا د متحد ایالاتونو دفاع وزارت یو وار بیا وویل چې په افغانستان کې پر امریکايي ځواکونو او متحدانو یې هر ډول احتمالي حمله به له سخت ځواب سره مخامخ شي.

د امریکا د دفاع وزارت ویاند جان کربي پرون جمعه (د وري ۲۷مه) په واشنګټن کې دا خبره وکړه: "دا به زموږ لپاره عاقلانه نه وي چې دا ګواښونه جدي ونه ګڼو او دا به د طالبانو لپاره هم عاقلانه نه وي چې هغه څه جدي ونه ګڼي چې ولسمشر او دفاع وزیر ویلي چې د وتلو پر وخت زموږ او زموږ د متحدانو پر پوځیانو به هر برید ته ډېر سخت ځواب ورکړو."

په هغه موافقه کې چې د طالبانو او واشنګټن ترمنځ لاسلیک شوې، له افغانستانه د امریکايي ځواکونو وتلو ته د مې میاشتې لومړۍ نېټه مهلت ټاکل شوی و.

طالبانو ویلي دي، که امریکایي ځواکونه د مې میاشتې تر لومړۍ نېټې ونه وځي مسوولیت به یې د امریکایانو پر غاړه وي.

د امریکا د متحد ایالتونو ولسمشر جو بایډن د چهارشنبې په ورځ اعلان وکړ چې ټول امریکايي ځواکونه به د سپټمبر میاشتې تر یوولسمې له افغانستانه ووځي

کابل کې 'د افغانستان د بیان ازادۍ کور' په نوم یو بنسټ جوړ شو 

ارشیف

د افغانستان د رسنیو ځینو خبریالانو او مسوولانو 'د افغانستان د بیان ازادۍ کور' په نوم یو بنسټ جوړ کړ.

دغه بنسټ نن شنبه (د وري ۲۸مه) په خپله لومړۍ غونډه کې د سولې پروسې په پای کې د خبریالانو او د بیان د ازادي د خوندیتوب غوښتنه وکړه.

د افغانستان د بیان ازادۍ کور په خپله اعلامیه کې د خبریالانو په وړاندې د شوي تاوتریخوالي او وژنو د پېښو څېړنه هم غوښتې ده.

د بشري حقونو د څار نړیوال سازمان د روان میلادي کال په لومړیو کې ویلي وو چې په قطر کې د ۲۰۲۰م کال په سپټمبر میاشت کې د سولې مذاکرو له پیل سره جوخت په افغانستان کې د خبریالانو په وړاندې زورزیاتی زیات شوی دی.

په دې موده کې د ازادۍ راډیو د خبریال محمد الیاس داعي تر څنګ ځینې خبریالان وژل شوي چې د عاملانو د محاکمې برخه کې د کوم پرمختګ راپور نه دی ورکړی شوی دی.

حسین زماني د افغانستان د فوتبال په ملي لوبډله کې ومنل شو

ارشیف

د هالنډ د اجاکس او د ایټالیا د جنیوا فوټبال لوبډلو پخواني لوبغاړي حسین زماني د افغانستان د فوتبال په ملي لوبډله کې ومنل شو.

د افغانستان د فوټبال فدارسیون ویاند فیروز مشعوف نن شنبه (د وري ۲۸مه) ازادي راډیو ته وویل، ټاکل شوې چې حسین زماني په ملي لوبډله کې د فوټبال نړیوال جام انتخاباتي سياليو او دغه شان د اسیا ملتونو جام په سیالو کې ولوبېږي.

۱۸ کلن حسین زماني د هالنډ د امسټردام په اجاکس لوبډلو او اکاډمۍ کې لوبه کړې او له هغې وړاندې د ایټالیا جنیوا ۱۹ کلنو لوبډله کې لوبېدلی.

نوموړی دا مهال د هالنډ فوټبال لومړي لیګ او د تل سټار په لوبډلو کې لوبېږي.

اتمر او ظریف د ستراتیژیکو همکاریو د سند پر لاسلیکېدو ټینګار وکړ

د افغانستان د بهرنیو چارو حنیف اتمر (چپ) له خپل ایراني جواد ظریف سره

د افغانستان او ایران د بهرنیو چارو وزیرانو د دواړو هېوادونو ترمنځ د ستراتیژیکو همکاریو د سند پر نهايي کېدو او لاسلیکېدو ټینګار وکړ.

د افغانستان د بهرنیو چارو وزارت نن شنبه(د وري ۲۸مه) په یوه اعلامیه کې وویل، چې محمد حنیف اتمر او محمد جواد ظریف په دې اړه په ټیلیفوني مکالمه کې بحث وکړ.

په دې اعلامیه کې نور جزئیات نه دي ورکړل شوي.

د ایران د بهرنیو چارو وزارت مرستیال عباس عراقچي د دغه سند پر نهايي کېدو د بحث لپاره تېر کال کابل ته سفر کړی و.

عراقچي د هغه سفر پر مهال ویلي و چې تهران او کابل د امنیتي ګواښونو پر وړاندې د مبارزې لپاره ګډې کړنلارې ته اړتیا لري.

افغانستان او ایران نه دي ویلي چې د دغه سند په جوړولو کې څومره پرمختګ شوی او کله به د دواړو لوریو له خوا لاسلیک شي.

افغانستان کې تېر کال ۲۹۹ مټریک ټُنه ځمکني توت تولید شوي

ځمکني توت

د افغانستان د کرنې او مالدارۍ وزارت وایي، په دې هېواد کې تېر کال ۲۹۹ مټریکه ټُنه ځمکني توت تولید شوي دي.

د دغه وزارت ویاند اکبر رستمي تېر ماښام ازادي راډیو ته وویل چې اوس مهال څه باندې ۳۲۰ جریبه ځمکه کې دغه توت کرل شوي دي.

نوموړي زیاته کړه: "په هرات، کندز، بلخ، فاریاب، میدان وردک، دایکنډي، کابل، پروان، ننګرهار او یو شمېر نورو ولایتونو کې دا میوه تر ټولو ډېره کرل شوې ده. د دغه توت کرکیلې ته علاقمندي د دې میوې موجود بازار ته په کتو د پراخېدو په حال کې ده."

د کرنې وزارت وایي، د افغانستان اقلیم د دې میوې کرکیلې ته مساعد دی او له څو کلونو راهیسې خلکو ورته مخه کړې ده.

د دغه وزارت په وینا هر کیلو توت په بازار کې په شااوخوا دوه سوه افغانیو پلورل کېږي.

د ننګرهار د وریجو پر کارخونې د پانګې کچه د پام وړ لوړه شوې

د ننګرهار د شیخ مصري په صنعتي پارک کې د وریجو کارخونه

د افغانستان د صنعت او سوداګرۍ وزارت وايي، د ننګرهار د شیخ مصري په صنعتي پارک کې د وریجو په کارخونه کې د پانګې کچه د پام وړ لوړه شوې ده.

د دغه وزارت ویاند فواد احمدي نن شنبه (د وري ۲۸مه) ازادي راډیو ته وویل، په لومړي سر کې د وریجو د تولید، پروسس او بسته بندي په برخه کې شپږ لکه ډالره پانګونه شوې وه، خو اوس دغه کچه څلور میلیونو ډالرو ته لوړه شوې ده.

ښاغلي احمدي زیاتوي، یاده کارخونه په ۲۴ ساعتونو کې د ۱۲۰ مټریک ټنه وریجو د پروسس او بسته بندي ظرفیت لري او ۷۰۰ کسانو ته یې د کار زمینه برابره کړې ده.

د افغانستان ختیځ په ځانګړي توګه ننګرهار او لغمان ولایتونو د وریجو لپاره حاصلخېزې ځمکې لري چې له دې وړاندې یې پروسس او بسته بندي په دودیز ډول ترسره کېده.

چارواکي: غزني او غور کې ۲۶ طالبان وژل شوي

ارشیف، غزني کې افغان امنیتي سرتیري

د ملي اردو ۲۰۳ تندر قول اردو په غزني ولایت کې د ۲۲ وسله والو طالبانو د وژل کېدو ادعا وکړه.

د ۲۰۳ تندر قول اردو مطبوعاتي مسوول اېمل خان مومند نن شنبه (د وري ۲۸مه) رسنیو ته وویل، د غزني په قره باغ ولسوالۍ کې له امنیتي او دفاعي ځواکونو سره په نښته کې ځینې نور وسله وال طالبان ټپیان شوي دي.

مومند زیاته کړه: "د لومړنیو راپورونو له مخې ۲۲ طالب جګړه ماران په نښتو، د توپچي او هوايي ځواکونو په بریدونو کې وژل شوي او ۸ تنه نور یې ټپیان شوي دي."

تندر قول اردو ویلي، دغه عملیات چې هوايي ځواک یې هم ملتیا کوله د قره باغ ولسوالۍ د بازار په ساحو کې شوي او دغه بازار له طالبانو تصفیه شوی دی.

بل خوا د غور د امنیت امر، نېک محمد نېکزاد وايي تېره شپه وسله والو طالبانو په دولتیار ولسوالۍ کې د امنیتي ځواکونو پر پوسته حمله وکړه چې په ځوابي برید کې ۴ وسله وال طالبان ووژل شول او یو تن ټپي شو.

د ښاغلي نېکزاد په وینا، نن شنبه (د وري ۲۸مه) مازیګر د فېروزکوه په لویدیځ کې د طالبانو یو ماین په خپله پر دوی چاودلی چې دوه تنه طالبان یې وژلي دي.

د دغو پېښو په اړه طالبانو تر اوسه څه نه دي ویلي.

نور راوښيه

XS
SM
MD
LG