د اماراتو هوایي شرکت دوبۍ ته د سفر په لړ کې له سپرلیو سره د پیجرونو او بیسیم مخابراتي وسیلو لرل منع کړل.

متحده عربي اماراتو په خپلو الوتکو کې د پیجرونو او بیسیم مخابراتي وسیلو پر کارولو بندیز وروسته له دې ولګاوه چې په لبنان کې د پېجرونو د چاودنو له کبله ډېر کسان ټپیان یا ووژل شول.

امارات هوايي شرکت، چې مرکز یې په دوبۍ کې دی، پرون شنبې په یوه بیان کې وویل چې په سیمه کې د تاوتریخوالي د زیاتېدو له امله منځني ختیځ ته د الوتنو موقتي لغوه څو ورځې نورې هم اوږدوي.

په منځني ختیڅ کې د کړکېچ له امله ډېرو هوايي شرکتونو خپلې الوت کرښې بدلې کړي دي.

د بیروت په جنوبي لمنه کې پر ضاحیه سیمه د اسراییل هوایي بریدونو تېره شپه او نن یکشنبې سهار دوام درلود او خبري اژانسونو راپور ورکړ چې په بیروت کې د زورورو چاودنو لوړ غږونه اورېدل شوي دي.

د راپورونو له مخې، یوه پراخ اور د بیروت د جنوب اسمان روښانه کړ او د یکشنبې په ورځ یې هوا ته لوګي پورته کېدل.

د لبنان ملي خبري اژانس ویلي چې د بیروت په جنوب کې د حزب‌الله تر کنټرول لاندې سیمه باندې تر ۳۰ ډېر هوايي بریدونه شوي چې د چاودنو غږونه یې په ټول ښار کې واورېدل شول.

په برید کې یو د تېلو پمپ او د طبي وسایلو یوه دیپو هم زیانمنې شوي دي.

د اسراییل پوځ اعلان وکړ چې دوی د وسلو زېرمې او د حزب‌الله تاسیسات په نښه کړي او ملکي خلکو ته د زیان رسولو لپاره یې لازم اقدامات کړي دي.

د لبنان رسمي خبری اژانس د اسراییل د نن سهار هوایي بریدونه درانه وبلل او ویې ویل چې څلور بریدونه د ضاحیه پر سیمو او یو برید د بیروت او ضاحیې ترمنځ په شویفات باندې شوی دی.

په برلین او لندن کې د اسراییل پلوي فعالان پر اسراییل د حماس د بریدونو د کالیزې په مناسبت سړکونو ته راووتل.

د اسراییل پلویانو د شنبې په ورځ په برلین کې له یهودانو سره د دښمنۍ د زیاتوالي پر وړاندې لاریون وکړ.

په همدې حال کې د اسراییل د هدفونو ملاتړ کوونکو په لندن کې لاریون وکړ.

تمه ده چې نن یکشنبې هم د اسراییل پلویان لاریونونه وکړي ځکه چې یهودان په ټوله نړۍ کې لاهم د یهودانو نوی کال لمانځي.

د تېر کال د اکټوبر په ۷مه د حماس ډلې، چې امریکا او اروپايي اتحادیه یې تروریستي بولي، پر اسراییل د پراخ او بې ساری برید پر مهال ۱۲۰۰ کسان ووژل او شاوخوا ۲۴۰ نور یې یرغمل کړل.

په ځواب کې یې اسراییل په غزه کې پوځي عملیات پیل کړل چې لا هم دوام لري.

پاکستاني چارواکو پرون شنبې وویل چې د وسله‌والو مخالفانو په بریدونو کې د دوی لږترلږه ۱۶ پوځیان وژل شوي دي.

د پاکستاني رسنیو د راپور له مخې، د دغه هېواد امنیتي چارواکي وايي چې د خیبرپښتونخوا په کورمه سیمه کې د وسله‌والو په یوه برید کې ۷ پوځیان وژل شوي او ۲ ټپیان شوي دي.

د دې برید مسوولیت ټي‌ټي‌پي یا تحریک طالبان پاکستان په غاړه واخیست.

تر دې یوه ورځ وړاندې د جمعې په ورځ ناوخته په شمالي وزیرستان کې د پوځ پر یوه کاروان په برید کې لږترلږه ۶ پوځیان ووژل شول او یو شمېر نور ټپیان شول.

د پاکستان پوځ په یوه بیان کې پېښه تایید کړه او برید یې د ټي‌ټي‌پي کار وباله.

د پاکستان د امنیتي چارواکو په قول ویل شوي چې په څو نورو بریدونو کې لږترلږه ۲۲ پاکستاني پوځیان ټپیان شوي دي.

له بلې خوا د بلوچستان بېلتون غوښتونکې ډلې ویلي چې د پاکستان د پوځ پر کاروان یې د سړک د غاړې بمي برید کړی او درنه مرګ‌ژوبله یې وراړولې ده.

خو چارواکي وايي چې په دې برید کې درې پوځیان وژل شوي دي.

د اوکراین ولسمشر ولودمیر زیلینسکي پرون ویلي، چې بله اوونۍ به په جرمني کې د اوکراین لپاره پوځي ملاتړ پر موضوع د بحث لپاره په یوه نړیواله غونډه کې برخه واخلي.

په دې غونډه کې چې فرانکفورټ ته نږدې د امریکا په یوه هوايي اډه کې کېږي، د امریکا د متحدو ایالتونو د ولسمشر جو بایډن په ګډون د اوکراین څه باندې ۵۰ متحدان برخه اخلي.

د اوکراین ولسمشر ولودمیر زیلینسکي په ټولنیزو شبکو کې ویلي چې د اکټوبر پر ۱۲مه د جرمني د رامشټاین په ۲۵مه غونډه کې چې د لومړي ځل لپاره د رهبرانو په سطحه دایرېږي، برخې اخیستو ته په چمتووالي بوخت دی.

زیلینسکي ویلي، په دې غونډه کې به د جګړې د پای ته رسېدو لپاره د څرګندو او کوټلو اقداماتو طرحه وړاندې کړي او په وینا یې د شریکانو د هوډ له کبله ښايي د روسیې مخه ونیول شي او اوکراین پیاوړی شي.

په داسې حال کې چې نړیوال فکر کوي چې اسراییل به پر ایران برید وکړي، د اسراییل حملې پر لبنان روانې دي.

یوه اسراییلي چارواکي چې د نوم له اخیستو ډډه کړې، فرانس پرېس اژانس ته پرون وویل چې د اسراییل پوځ تیارسی شوی چې د اسراییل پر خاوره او خلکو د ایران غیرقانوني برید ته ځواب ورکړي.

خو دغه پوځي چارواکي په دې اړه نور توضیحات ورنه کړل چې اسراییل به کله او څرنګه حمله کوي.

د اسراییل هارتز، انګلیسي ژبې ورځپاڼې هم د پوځي چارواکو په وینا چې نومونه یې نه دې اخیستي راپور ورکړی چې اسراییل به ایران ته مناسب ځواب ورکړي.

ایران تېره اونۍ په لسګونو توغندي د اسراییل په لور وویشتل چې اکثر یې شنډ شول.

د ژغورنې ډلو په بوسنیا-هرزګوینا کې د سېلابونو له امله د ۴۰ کسانو د موندلو لپاره تر پرون ناوخته پورې هڅې کولې.

په بوسنیا-هرزګوینا کې یو شمېر کلیو ته مواصلاتي لارې قطع شوې دي.

د بوسنیا صدراعظم نرمین نیکسیچ پرون خبرې غونډې ته وویل چې د دونجا جابلانیکا سیمه سېلابونو ډېره اغېزمنه کړې ده.

د جمعې سهار سخت بارانونه پیل شول چې له امله یې سېلابونه وبهېدل او د بوسنیا-هرزګوینا په مرکزي او جنوبي سیمو کې د ځمکو د ښویېدو سبب شول.

تر اوسه په هرزګوینا کې د ۱۴ کسانو او په بوسنیا کې د درې کسانو د مړینې خبرونه خپاره شوي او د بېړنیو چارو د ادارو په وینا لږ تر لږه ۴۰ کسان تري تم دي.

د ښځو د کرکټ په نړیوال جام کې نن د هند ملي لوبډله له پاکستان او د وېسټ اینډیز ټیم له سکاټلنډ سره سیالي کوي.

په دې نړیوال جام کې پرون استرالیا د شپږ ویکټو په توپیر سریلانکا ته ماته ورکړه او انګلستان د بنګله‌دېش لوبډلې ته د ۲۱ منډو په توپیر ماتې ورکړه.

د ښځو د کرکټ په نړیوال جام کې لسو لوبډلو برخه اخیستې چې د اکټوبر په څلورمه په متحده عربي اماراتو کې پيل شو.

پایلوبه به یې د همدې میاشتې په ۲۰مه د اماراتو په دوبۍ ښار کې ترسره شي.

د چین د بهرنیو چارو وزارت نن شنبه ویلي، له لبنان څخه څه باندې ۲۰۰ چینایي وګړي په خوندي توګه ایستل شوي دي.

دغه وزارت په‌دې باب د رویټرز خبري اژانس د پوښتنې په ځواب کې په یوه بیان کې وویل: "دغه خلک چې په دوو ډلو کې ایستل شوي، په‌کې درې د هانګ کانګ اوسېدونکي او یو د تایوان هېوادوال شامل دي."

د چین د بهرنیو چارو وزارت ویلي: "په لبنان کې د چین سفارت ثابت پاتې دی او له چینایي وګړو سره په امنیتي تدابیرو کې مرستې ته دوام ورکوي."

دا اقدام وروسته له هغه کېږي چې تېره سه‌شنبه د ایران له‌خوا پر اسرايیل د توغندیو له برید او په لبنان کې د اسرايیل له حملو وروسته په منځني ختیځ کې شخړې زیاتې شوې دي.

تېره چهارشنبه هم د چین رسمي خبري اژانس سینهوا راپور ورکړی و، چې د حکومت له‌خوا له ۲۰۰ څخه ډېر چینایي اتباع په خوندي ډول له لبنان څخه ایستل شوي دي.

بلخوا د ټایوان د بهرنیو چارو وزارت ویلي چې اټکل کېږي، په لبنان کې د ټایوان درې وګړي بېرته دغه ټاپو ته ستانه شي او دوو نورو یې د کورنیو دلایلو له امله په لبنان کې پاتې کېدل غوره کړي دي.

د فلسطینيانو افراطي ډلې حماس، چې د امریکا متحده‌ایالتونو او اروپايي ټولنې له‌خوا ترهګره ډله ګڼل شوې، ویلي نن د لبنان په شمال کې د کډوالو په یوه کمپ کې د اسرايیل په برید کې د دوی یو قوماندان وژل شوی دی.

دا لومړی ځل دی چې په غزې تړانګه کې د جګړې له پیله دا سیمه په نښه کېږي.

حماس ویلي، د دوی "قوماندان" سعید عطاالله علي، د هغه مېرمن او دوې لوڼې د طرابلس شمالي ښار ته څېرمه په بدوي کمپ کې د هغه پر کور د حماس په ټکو د «صهیونیستانو» په بمبارۍ کې وژل شوي دي.

له کله چې تېر کال په غزه کې د حماس او اسرايیل ترمنځ جګړه پیل شوې، اسرايیل په وار- وار په لبنان کې د حماس چارواکي په نښه کړي دي.

حماس ډلې له هغه وخت راهیسې په لبنان کې د خپلو لږ تر لږه ۱۸ وسله‌والو د وژل کېدو خبر ورکړی دی.