د لاسرسۍ وړ لېنکونه

تازه خبر
جمعه ۱۵ کب ۱۳۹۹ کابل ۱۱:۲۷

افغانستان

کونړ چارواکي: ماین چاودنې یو سیمه ییز پولیس ووژاه

په کونړ کې پولیس

د کونړ ولایت په سرکاڼو ولسوالۍ کې د ماين چاودنې يو سیمه ییز پوليس وواژه.

د کونړ امنيه قوماندانۍ وياند فريدالله دهقان ازادي راډيو ته وويل چې چاودنه نن د یکشنبې (د سلواغې ۲۶مه) په ورځ ماښام مهال پنځه نېمې بجې د سرکاڼو ولسوالۍ اړوند بېلې سېمه کې د محلي پوليسو په پلې ګزمه شوې چې په خبره یې دې چاودنې یو محلي پولیس وژلی دی.

تر اوسه کومې وسله والې ډلې د يادې چاودنې مسوليت په غاړه نه دى اخېستى.

له تېرو پنځو ورځو په کونړ کې دا څلورمه چاودنه ده چې په کې محلي پوليس په نښه کېږي چې له امله یې د دوه ملکي وګړو په ګډون له لسو زياتو کسانو ته مرګ ژوبله اوښتې، خو تراوسه د ېوې هم چا مسوليت نه دى منلی.

د ورځې تازه خبرونه دلته ولولئ

امریکا سږ د زړورو ښځو جایزه د ۷ وژل شویو افغان مېرمنو په نوم نوموي

د امریکا د بهرنیو چارو وزارت

تمه ده چې د امریکا د بهرنیو چارو وزارت د زړورو ښځو افتخاري جایزه سږکال د هغو۷ مېرمنو په نوم کړي چې په افغانستان کې وژل شوي دي.

په کابل کې د امریکا سفارت نن جمعه(د کب ۱۵مه) په یوه بیان کې وویل، دا جایزې به راتلونکې اوونۍ د امریکا د بهرنیو چارو د وزیر انتوني بلېنکن په کوربه توب په یوه غونډه کې ورکړل شي.

په بیان کې راغلي دي چې دا جایزې به د افغانستان د بشري حقونو د خپلواک کمېسیون کمېشنرې فاطمې ناتاشا خلیل، د ملي امنیت د جندر د برخې مشرې جنرالې شمیلا فروغ، په ننګرهار کې د انعکاس ټلوېزیون خبریالې ملالې میوند، په میدان وردګو کې یوې قابلې مریم نورزاد، په کاپیسا کې مدني فعالې فرشتې کوهستانۍ، په غزني کې د مخدرو موادو پر ضد د مبارزې د پولیسو افسرې فاطمې رجبي او د زندانونو ساتونکې فرشتې ته ورکړل شي.

د زړورو ښځو سږنۍ جایزه پر افغانستان سربېره په ایران، ترکیه، بېلاروس، برما او وینزویلا کې د ښځو د حقونو فعالانو ته هم ورکړل کېږي.

په افغانستان کې تېر کال دا جایزه د میدان وردګو ښاروالې ظریفې غفاري ته ورکړل شوې وه.

د حکمتیار پلویانو د هدفي وژنو د بندېدو غوښتنه وکړه

ارشیف، عکس تئزیني بڼه لري

د ګلبدین حکمتیار یو شمېر پلویانو نن جمعه (د کب ۱۵مه) په کابل کې د حزب اسلامي د بندیانو د خوشې کېدو او د هدفي وژنو د بندېدو غوښتنه وکړه.

ښاغلي حکمتیار د مظاهرې ګډونوالو ته په وینا کې پر حکومت تور ولګاوه چې له حزب اسلامي سره د سولې د موافقې پر اساس یې د دې ګوند غړي له بنده نه دي خوشې کړي.

هغه د روانو ستونزو پړه پر حکومت او له بهره پر راغلو چارواکو واچوله او خبرداری یې ورکړ چې که دا وضعیت بدل نه شي نو د دوی اعتراضونه به دوام وکړي:

حکمتیار زیاته کړه: "نن مو د سوله ییزو مظاهرو لړۍ پیل کړه. دا لړۍ به تر هغه وخته دوام کوي چې روان دردوونکی وضعیت، جنګ ناامني، هدفي ترورونه او اوسنی خونړی بحران د تل لپاره پای ته ورسېږي."

افغان حکومت د نننیو اعتراضونو پر وړاندې غبرګون نه دی ښودلی خو له دې مخکې یې ویلي چې له حزب اسلامي سره د ۲۰۱۶ میلادي کال په سېپټمبر میاشت کې د شوې موافقې مواد عملي شوي دي.

حکومت همدا راز په هدفي وژنو طالبان ګرم بللي دي.

افغان مرکچي پلاوې: خلیلزاد سره ناسته کې د سولې پر چټک بهیر ټینګار وشو

شریفې زرمتۍ

په دوحه کې د افغان دولت د مرکچي پلاوي یوه غړې وايي چې دې او همکارانو یې د افغانستان د سولې لپاره د امریکا له ځانګړي استازي زلمي خلیلزاد سره په کتنه کې د سولې د مذاکراتو د چټکولو او په دې بهیر کې د ملګرو ملتونو د رول او د سیمه ییزې اجماع د پیاوړتيا پر اړتیا ټینګار وکړ.

شریفې زرمتۍ رسنیو ته په یو استول شوي ویډیويي پیغام ویلي چې له خلیلزاد سره دا لیدنه تېر ماښام وشوه: "ښاغلي خلیلزاد سره دې ناسته کې د مذاکراتو د بهیر پر چټکوالي او ملاتړ ټینګار وشو. همدا راز د ملګرو ملتونو پر رول، د سیمه ییزې اجماع پر پیاوړتیا او د جګړې او تاوتریخوالي پر له منځه وړلو خبرې وشوې."

ښاغلی خلیلزاد پرون دوحې ته ورسېد، خو له هغه مخکې یې سیمې ته د سفر په پیل کې په کابل کې له افغان چارواکو او سیاسي شخصیتونو سره د سولې د مذاکراتو په اړه خبرې وکړې.

ننګرهار کې پنځوس کیلوګرامه نشه يي مواد ونیول شول

ننګرهار ولایت، عکس تئزیني بڼه لري

په ننګرهار ولایت کې څه د پاسه پنځوس کیلوګرامه نشه يي مواد ونیول شول.

د ننګرهار ولایت د امنیه قوماندانۍ رسنیو ته ویلي چې پولیسو په جلال اباد ښار کې د استوګنې پر یوه کور عملیات وکړل چې په نتیجه کې یې ۲۹ کیلوګرامه چرس، ۱۶ کیلوګرامه تاریاک او شبږ کیلوګرامه هیروئین ونیول.

د دې موادو د ساتنې په تور پنځه تنه هم نیول شوي او له نشه يي موادو سره د مبارزې د عدلي او قضايي مرکز څارنوالۍ ته معرفي شوي دي.

هرات کې د شرابو یوه کارخونه ویجاړه شوه

ارشیف، عکس تئزیني بڼه لري

د هرات ولایت پولیسو د شرابو یوه کارخانه ویجاړه کړه.

د هرات ولایت د امنیه قوماندانۍ ویاند عبدالاحد ولي زاده ازادي راډیو ته وویل، له نشه يي موادو سره د مبارزې پولیسو په ګذره ولسوالۍ کې پر یوې کارخونې د برید په نتیجه کې یو زرو ۹۰۰ کیلوګرامه تخمیر شوي کشمش او ۲۹ لېټره شراب ونیول.

پولیسو د شرابو د کارخانې وسایل له منځه یووړل،خو د ساتنې او جوړولو په تور یې څوک نه دي نیولي.

غزني او پنجشېر کې ۴۰ کیلوګرامه نشه يي توکي نیول شوي

ارشیف، عکس تئزیني بڼه لري

په غزني او پنجشیر ولایتونو کې به دوو جلا جلا پېښو کې څه د پاسه څلوېښت کیلوګرامه نشه يي مواد ونیول شول.

په لومړۍ پېښه کې پولیسو د غزني ولایت په مرکز کې د نشه يي موادو پر یوې ذخیرې د برید په نتیجه کې ۲۳ کیلوګرامه چرس ونیول.

له نشه يي موادو سره د مبارزې معینیت د رسنیو دفتر وايي چې پولیسو په دوهمه پېښه کې د پنجشیر ولایت په بازارک سیمه کې د موټرو د تلاشۍ پر مهال ۱۹کیلوګرامه چرس ونیول.

د دې موادو د ساتنې او انتقال په تور دوه تنه هم نیول شوي دي.

بدخشان کې د سل کیلوګرامو نشه يي توکو د قاچاق مخه ونیول شوه

ارشیف،

په بدخشان ولایت کې د څه د پاسه سل کیلوګراموه نشه يي موادو د قاچاقو مخه ونیول شوه.

د بدخشان ولایت امنیه قوماندان محمد صادق مرادي ازادي راډیو ته وویل، پولیسو ۱۴۰ کیلوګرامه چرس ونیول چې له بهارک ولسوالیه یې په یوه بار وړونکي موټر کې د وردوج ولسوالۍ له لارې له هېواده بهر قاچاق کول.

د موټروان په ګډون دوه کسان هم د دې موادو د قاچاقو په تور نیول شوي دي.

اروپايي ټولنې د هدفي وژنو په اړه افغان چارواکو سره اندېښنه وښوده

تېره ورځ ننګرهار کې نامعلومه وسله‌والو د ګچو د یوې کارخونې ۷ کارکوونکي وژلي وو، په عکس ښکاري چې د دې کارخونې د یوه کارکوونکي جسد لېږدول کېږي.

ولسمشر اشرف غني او په کابل کې د اروپايي ټولنې د غړو او ځینو نورو هېوادونو سفیرانو د افغانستان د سولې د پروسې د راتلونکو ګامونو په اړه خبرې وکړې.

ارګ په یوه بیان کې وايي، دې غونډه کې چې پرون پنجشنبه (د کب ۱۴مه) جوړه شوه د سولې لپاره د سیمه ییزې او نړیوالې اجماع او نورو مسایلو په اړه بحث وشو.

د ارګ په بیان په دې اړه نور جزئیات نه دي ورکړل شوي.

په همدې حال کې په افغانستان کې د اروپايي ټولنې استازولۍ پر ټویټر لیکلي دي چې له ښاغلي غني او د ولسمشر له لومړي مرستیال امرالله صالح سره د اروپايي ټولنې د ډیپلوماتانو خبرې رغنده وې او دوی دې کتنه کې په افغانستان کې د هدفي وژنو له کبله خپله اندېښنه څرګنده کړه.

په افغانستان کې د خبریالانو، مدني فعالانو، دیني عالمانو او دولتي کار کوونکو هدفي وژنې دې وروستیو کې زیاتې شوي.

د دې وژنو په لړۍ کې د سې شنبې (د کب ۱۲مه) په ورځ د ننګرهار په مرکز جلال اباد کې په دوو جلا حملو کې د انعکاس ټلوېزېون درې ښځینه کارکوونکې ووژل شوې.

د دې حملو مسوولیت داعش ډلې ومانه.

"افغانستان کې د خبریالانو خوندیتوب لپاره بېړني اقداماتو ته اړتیا شته"

افغانستان کې وژل شوي خبریالان

د بې پولو خبریالانو ټولنې په افغانستان کې د خبریالانو د وژنو د بندېدو غوښتنه کړې.

د دې ټولنې د افغانستان او ایران د څانګې مسوول رضا معیني پرون پنجشنبې (د کب ۱۴مه) ازادي راډیو ته وویل چې په افغانستان کې د خبریالانو د خوندیتوب لپاره عاجلو او عملي اقداماتو ته اړتیا شته.

ښاغلي معیني زیاته کړه: "موږ له افغان چارواکو دې برخه کې جدي څېړنې غواړو او له نړیوالې ټولنې، په تېره له امریکا، جرمني او فرانسې غواړو چې د جرمونو د نړیوالې محکمې په تحقیقاتو کې د دې جنایتونو د ور زیاتولو په هدف د بې پولې خبریالانو د ټولنې د غوښتنې ملاتړ وکړي."

په افغانستان کې د خبریالانو او د رسنیو د کار کوونکو د وژنې له کبله اندېښنې وروسته له هغه لا زیاتې شوې چې د انعکاس د خصوصي ټلوېزیون درې ښځینه کارکوونکې په دوو جلا حملو کې د ننګرهار په مرکز جلال اباد کې ووژل شوې.

د دې وژنو مسوولیت داعش ډلې ومانه.

په روان هجري لمریز کال کې د ازادي راډیو د خبریال محمدالیاس داعي په ګډون لږ تر لږه لس خبریالان په افغانستان کې په هدفي حملو کې وژل شوي دي.

پر کابل پوهنتون د برید پر عامل 'عادل' د اعدام حکم تایید شو

پر کابل پوهنتون د برید عاملین

په افغانستان کې د استېناف یوې محکمې د کابل پوهنتون د تروریستي حملې د عامل او طراح د اعدام حکم تایید کړ.

د افغانستان د سترې محکمې ویاند احمد فهیم قویم تېر ماښام ازادي راډیو ته وویل چې د عادل د اعدام حکم په بګرام زندان کې د تروریستي جرایمو د څېړنې د استېناف محکمې له خوا تایید شو.

ښاغلي قویم زیاته کړه: "د کابل پوهنتون د تروریستي حملې عامل او طراح عادل چې په ارش او طلحه مشهور و، مخکې اړوندې ابتداییه محکمې په اعدام محکوم کړی و. دا حکم اوس د استېناف محکمې له خوا تایید شو."

د روان کال په لړم میاشت کې پر کابل پوهنتون خونړي برید چې مسوولیت یې داعش ډلې ومانه، ۲۲ کسان ووژل او له څلوېښتو زیات نور یې ټپیان کړل.

د سترې محکمې ویاند ښاغلی قويم همدا راز وايي چې استېناف محکمې د عادل یو بل ملګری عبیدالله هم- چې په حماد مشهور و، په نورو تروریستي جرمونو کې د لاس لرلو له کبله په اعدام محکوم کړی دی.

ننګرهار کې نامعلومه وسله‌والو د یوې کارخونې ۷ کارکوونکي ووژل

ارشیف، د ننګرهار جلال‌اباد ښار د یوې پېښې په سیمه کې ولاړ پولیس.

ننګرهار کې نامعلومه وسله‌والو د ګچو د یوې کارخونې ۷ کارکوونکي وژلي دي.

د دغه ولایت امنیه قوماندان جمعه ګل همت رسنیو ته ویلي، پېښه تېره شپه په سره رود ولسوالۍ کې شوې ده.

د ننګرهار د ولایتي شورا غړي اجمل عمر ازادي راډیو ته ویلي چې وژل شوي کارګران هزاره توکمه دي چې دغلته په مزدورۍ بوخت وو.

د ننګرهار د سیمه‌ییز روغتون مسؤلینو هم ویلي چې له څېرو دغه کسان هزاره توکمه ښکاري.

د برید مسؤلیت کومې ډلې نه‌دی اخیستی، خو له دې وړاندې داعش وسله‌والو د پاکستان په کوټه کې پر هزاره توکمو ورته بریدونه کړي دي.

په یوه بله پېښه کې نن سهار ننګرهار کې د ماین چاودنې یوه ډاکتره ووژله او د هغې ماشومه لور یې ټپي کړه.

دغه چاودنه د ښار د عربانو ګولایي سیمه کې پر رېکشا د نښلول شوي ماین له کبله وشوه.

بدخشان کې د واورې ښویېدو له کبله ۱۵ تنه مړه شوي

ارشیف، بدخشان کې د واورې ښویېدو له امله د یو وژل شوي کس مړی

د بدخشان په خواهان ولسوالۍ کې د واورې ښویېدو له کبله ۱۵ تنه مړه شوي او ۵ نور ژوبل دي.

د بدخشان والي محمد زکریا سودا ازادي راډیو ته ویلي، دغه ټول کسان سیمه کې د سرو زرو د کان کېندونکي وو.

د ښاغلي سودا په خبره، پېښه نن له غرمې مخکې د خواهان ولسوالۍ په زرند اب کلي کې د یوه غره او پر سر یې د واورې د ښویېدو له کبله شوې ده.

سودا وایي، دا لومړنۍ شمېرې دي او په خبره‌یې، ممکن وروسته د مرګ‌ژوبلې کره شمېر معلوم شي او بدلون هم په‌کې راشي.

پېښه داسې ځای کې شوې چې د بدخشان د والي په خبره کنټرول‌یې د طالبانو په لاس کې دی او مخابراتي اړیکې هم په‌کې سمې نه‌دي.

افغان کرکټر نبي عیسی خېل: ډالۍ شوې پیسې بې ‌وزلو ته ځانګړې کوم

د افغانستان د کرکټ ملې لوبډلې لوبغاړی محمدنبي عیسی‌ خېل

د افغانستان د کرکټ ملې لوبډلې لوبغاړی محمدنبي عیسی‌ خېل وايي، د لوبې غوره لوبغاړي په توګه تر ټاکل کېدو وروسته، ده ته ډالۍ شوې پيسې يا امتیاز د هېواد بې ‌وزلو خلکو ته ځانګړی کړي.

محمد نبي عیسی‌ خېل پرون چهارشنبه (د کب ۱۳مه) د‌ پاکستان سوپر لیګ سیالیو کې د لوبې د غوره لوبغاړي له ټاکل کېدو وروسته، پر خپلې رسمي فیسبوک‌ پاڼې ولېکل، په هره لوبه کې چې دی غوره لوبغاړی وبلل شي، انعامي پیسې یې د خپل هېواد بې‌وزلو خلکو ته ځانګړې کوي او د نبي فاونډېشن له لارې یې د خیر ښېګڼې په کار لګوي.

محمد نبي په پرونۍ لوبه کې د خپلې لوبډلې کراچي کینګز لپاره خورا ښه لوبه وکړه. هغه په توپ اچونه کې دوه اوورونه وکړل، ۱۲ منډې یې ورکړې، خو کومه وکټ یې وا نه ‌خېسته، ولې په توپ وهنه کې یې بیا د ۳۵ توپونو په مټ ۶۷ منډې وکړې.

نبي په یاده لوبه کې ۸ څلوریزې او څلورشپږیزې ووهلې.

د غور- هرات لویه لاره له بندښت وروسته بېرته پرانېستل شوه

ارشیف، عکس تئزیني بڼه لري

د غور- هرات لویه لاره له نژدې شلو ورځو بندښت وروسته بېرته خلاصه شوه.

دغه لاره د دې لپاره بنده وه چې په اوږدو کې یې د حکومتي ځواکونو عملیات روان وو او چارواکو ادعا کوله چې طالبانو دغې سیمه کې د عملیاتو پر ضد ماینونه خښ کړي دي.

د غور امنیه قوماندان عبدالقادر ولي زاده ازادي راډیو ته وویل، د قومي مشرانو او سپین ږېرو په منځګړیتوب پرون چهارشنبه (د کب ۱۳مه) ماښام دا لاره خلاصه شوه.

د دغې لارې له بندېدو سره په غور کې د خوراکي موادو بیې هم لوړې شوې.

چارواکي: بزګرو ته د کوکنارو پرځای د بدیلو محصولات د کښت پروګرام جوړېږي

ارشیف، عکس تئزیني بڼه لري

د افغانستان د کرنې اوبو لګونې او مالدارۍ وزارت کروندګرو ته د کوکنارو د کښت پرځای د بدیلو زراعتي محصولات د کښت پروګرام د جوړېدو خبر ورکوي.

د دې وزارت له لوري خپرې شوې خبرپاڼه کې راغلي چې د کرنې اوبو لګونې او مالدارۍ وزارت، د متحده ایالاتو د قانون اجرا او د مخدره توکو چارو نړیوال دفتر يا INL او د ملګرو ملتونو پراختیایي ادارې هوډ کړی چې د کرنې او د کلیو د پراختیا پروژه نویو سیمو ته وغځوي.

دا پروژه د مشروع معیشت ته لاسرسی، کرنې او کليوالي پرمختیا ودې په نوم جوړه شوې ده.

د دې پروژې موخه په هغو سیمو کې چې کوکنار کرل کېږي، د هغو پرځای د میوو، سبزیو او نورو با ارزښته کرنې محصولاتو کښت دود کول دي.

یاده پروژه د ملګرو ملتونو پراختیایي ادارې او ROP یا «د سولې ریښې» بنسټ له خوا چې پر کرنې کار کوي د ۳۰ میلیونه ډالرو په ارزښت پلي کېږي.

د کرنې اوبو لګونې او مالدارۍ وزارت معلومات ښیې چې د کوکنارو د کښت پر ځای د بدیلو محصولاتو کښت پروژه به په بادغیس، فراه، کندها، بلخ، لغمان، او ننګرهار ولایتونو کې تر پنځو کلونو دوام وکړي.

نور راوښيه

XS
SM
MD
LG