د لاسرسۍ وړ لېنکونه

تازه خبر
دوشنبه ۱۸ کب ۱۳۹۹ کابل ۰۱:۲۵

نړۍ

په پاکستان کې د معلولينو اعتراض درېيمې ورځې ته غځېدلى

ار

لسګونو معلولینو پرون د درېیمې ورځې لپاره د پاکستان په شمال لویدیځ کې د افغانستان د پولې په اوږدو کې خپلو اعتراضونو ته دوام ورکړ.

معترضین د کار موندنې، روغتيايي مراقبتونو او د خپلو ماشومانو لپاره د زده کړو زمینې برابرول غواړي.

دا اعتراضونه د فبرورۍ پر نهمه د جنوبي وزیرستان په انګور اډه سرحدي سیمه کې په تحصن پیل شول.

دوی وايي، تر هغو به خپلو اعتراضونو ته دوام ورکړي چې غوښتنې یې نه وي منل شوي.

د دغو مظاهرو یوه تنظیموونکي دین محمد آزادي راډیو ته ویلي، چې په دې اعتراضونو کې ۲۵۰ کسان ګډون لري چې ۱۶۰ تنه یې د ماینوو په چاودنو، ناامنیو او د پاکستان د امنیتي ځواکونو او طالبانو ترمنځ نښتو کې معلول شوي دي.

د واڼه ښار د کمېشنر مرستیال بشیر خان آزادي راډیو ته ویلي، چې چارواکي به د دغو مظاهره کوونکو یوازې منطقي غوښتنې وارزوي.

دی ادعا کوي، چې دغه معلولین په سرحد کې د قاچاق د اجازې په لټه کې دي چې د ده په خبره دولت به دا کار ونه مني.

د ورځې تازه خبرونه دلته ولولئ

استرالیا له برما سره دفاعي همکاري ودروله

میانمار کې د پوځ ضد مظاهرې

استرالیا وایي، له برما سره‌یې دفاعي همکاري درولې او د هغو مظاهره کوونکو چې د پوځ له لوري د تېرې میاشتې د کودتا په وړاندې اعتراضونه کوي، د بې‌رحمانه ځپنې له امله د خپلې بشري مرستې لوری بلې خوا ته اړوي.

د استرالیا د بهرنیو چارو وزیر مارایس پایان نن وویل چې هېواد به‌یې سمدستي دغه عاجلې بشري مرستې د برما له اقلیت روهینګیا مسلمانانو او د دې هېواد له نورو اقلیتونو سره وکړې.

استرالیا دغه‌راز وویل چې له برما سره‌یې د راتلونکو پنځو کلونو په مخه د شاوخوا یو ملیون ۲۰۰ زره امریکایي ډالرو په لګښت د پوځي زده‌کړې پروګرام ځنډولی دی.

له کله چې د تېرې فبرورۍ میاشتې په لومړۍ نېټه په میانمار یا پخوانۍ برما کې پوځ کودتا وکړه او د دې هېواد د ملکي حکومت مشره انګ سان سوچي او یو شمېر نور مشران‌یې په کور کې نظربند کړي یا نیولي په دې هېواد کې د پوځیانو پر ضد نږدې هره ورځ مظاهرې کېږي.

د دغو مظاهرو په ترڅ کې په لسګونه کسان وژل شوي او سلګونه نور نیول شوي دي.

د امریکا دفاع وزیر: د خپلو ګټو د دفاع لپاره هر لازم اقدام به وکړو

د امریکا دفاع وزیر لوید استین

د امریکا متحده ایالاتو دفاع وزیر وايي هېواد به‌یې د خپلو ګټو د دفاع لپاره هر لازم اقدام وکړي.

لوید استین (Lloyd Austin) دا خبره پرون یکشنبه وروسته تر دې وکړه چې د عراق عین‌الاسد پوځي اډې ته څېرمه یو راکټ ولګېد.

په دغه پوځي اډه کې د عراقي ځواکونو ترڅنګ د ائتلاف او امریکا پوځیان هم دېره دي.

د امریکا دفاع وزیر استین له «ABC» ټلوېزیون سره په مرکه کې چې پرون خپره شوه وویل، امریکا له عراقه غواړي چې دغه پېښه په جدیت وڅېړي او معلومه کړي چې څوک مسؤل دي.

وروسته له هغې چې د امریکا په یوه هوايي حمله کې د ۲۰۲۰م کال د جنورۍ میاشتې پر درېیمه د عراق پلازمېنې بغداد ته څېرمه د ایران د سپاه پاسداران د قدس ځواک قوماندان قاسم سلیماني ووژل شو، ایران د دې وژنې د غچ اخیستو خبرداری ورکړی و.

د دوبۍ نړیوال هوايي ډګر کې به نور د مسافرو سترګې د پاسپورټ رول لوبوي

د دوبۍ هوايي ډګر

تر دې وروسته به د دوبۍ په نړیوال هوايي ډګر کې د مسافرو سترګې د هغوی د پاسپورټ په څېر رول ولوبوي.

په دې معنی چې پرمختللې وسیلې به لومړی د مسافرو د سترګو عکسونه اخلي او بیا به مسافر د دوبۍ له میدانه د الوتنو لپاره په اوږدو کتارونو کې انتظار نه‌پاتې کېږي.

که څه هم دا تازه تدابیر تېره میاشت معرفي شوي، خو پرون یکشنبه اجرا شول چې هدف‌یې د مسافرو د وخت د ضایع کېدو مخنیوی دی.

د دوبۍ په هوايي ډګر کې د سترګو سکن کول یو څو ثانیې وخت نیسي او مسافرو ته اسانتیا ایجادوي.

د نړیوالو الوتنو له اړخه د دوبۍ هوايي ډګر د نړۍ له لویو هوايي ډګرونو ګڼل کېږي.

یوازې په ۲۰۱۹م کال کې نږدې ۲۴ ملیونه وګړو د دې میدان له طریقه تګ راتګ کړی دی، خو تېر میلادي کال د کرونا وبا له کبله د مسافرو شمېر ۷۰ سلنه کم شو.

پاپ فرانسېس د موصل الطاهره کلیسا کې د عراق د جګړې قربانیانو ته دعا وکړه

د کاتولیکو عیسویانو مشر پاپ فرانسېس د عراق د شمالي ښار موصل په یوې لرغونې کلیسا کې د عراق د جګړې قربانیانو ته د دعا پر مهال

د کاتولیکو عیسویانو مشر پاپ فرانسېس د عراق د شمالي ښار موصل په یوې لرغونې کلیسا کې د عراق د جګړې قربانیانو ته دعا وکړه.

خلک نن سهار د الطاهرې کلیسا په انګړ کې راټول او د پاپ خبرو ته‌یې غوږ کېښود، د نصرانیانو دا یو لرغونی مرکز د داعش ډلې له‌خوا نړېدلی دی.

الطاهره د نړۍ یوه له لرغونو کلیساوو څخه وه چې ۱۴ پېړۍ تاریخ لري.

پاپ په خپلو خبرو کې د عراق له مسیحیانو وغوښتل چې د هستوګنې سیمې پرې نه‌ږدي.

له ۲۰۱۴ نر تر ۲۰۱۷ کال پورې پر موصل ښار د داعش د ولکې له کبله سلګونه زره مسیحیان د عراق د شمالي سیمو پرېښودو ته اړ شول.

پاپ په قره‌قوش سیمه کې د عراق یوې بلې لویې کلیسا ته هم ولاړ چې یوه برخه‌یې داعش نړولې ده.

دغلته د داعش له ماتې وروسته بېرته مسیحیان خپلو مېنو ته ستانه شوي دي.

۸۴ کلن پاپ د نن ورځې په پای کې د اربیل په ستډیوم کې خلکو ته وینا کوي او اټکل دا دی چې لسګونه زره کسان به دې راټولېدنه کې ګډون وکړي.

پاکستان کې له کرښې د رېل ګاډي وتو پېښه؛ یو کس وژل شوی ۴۰ نور ټپيان دي

د پاکستان په جنوبي سند ایالت کې له کرښې وتلی مسافر وړونکی رېل ګاډی

د پاکستان په جنوبي سند ایالت کې یو مسافر وړونکی رېل ګاډی له کرښې وتلی چې له امله‌یې یو تن وژل شوی او ۴۰ نور ټپيان دي.

د پاکستان د اوسپنې پټلۍ یو کارکوونکی کامران لشاري وایي، دغه رېل ګاډی نن سهار له کراچۍ د لاهور خوا ته روان و چې له کرښې ووت او ۸ کابینونه‌یې چپه شول.

د لشاري په خبره، د ۴۰ ټپیانو او یوې وژل شوې ښځې جسد سیمه کې یوه نږدې روغتون ته لېږدول شوي دي.

د پاکستان د رېل پټلۍ وزیر اعظم سواتي ویلي، د پېښې د لامل په اړه به څېړنه وکړي.

سویس کې نن د ښځو د بورقې په اړه ټول پوښتنه کېږي

ارشیف، جرمني کې بورقه لرونکې مېرمنې

په سویس کې نن په دې ټول‌پوښتنه کېږي چې د ښځو بورقه منع کړل شي او که نه‌شي.

دا ټول‌پوښتنه له دې سره سره کېږي چې په دغه هېواد کې د هغو ښځو چې د مخ په شمول سر تر پایه ځان پټوي، شمېر له لسګونو تنو نه‌اوړي.

مخکې تر مخکې نظرپوښتنې ښيي چې د موافقو او مخالفو شمېر ډېر سره نږدې دی.

که په ټول‌پوښتنه کې د خلکو اکثریت د بورقې پر ضد رایه ورکړه، نوی قانون به سړي هم له دې راګرځوي چې خپلې ښځې د مخ پټولو ته مجبوره نه‌کړي.

روغتیا نړیوال سازمان: اروپا کې یو وار بیا د کرونا ویروس په زیاتېدو دی

د بلغاریا په یوه روغتون کې په کرونا ویروس د اخته ناروغانو څانګه

د روغتیا نړیوال سازمان وايي، په اروپا کې یو وار بیا د کرونا ویروس مثبتې پېښې په زیاتېدو دي.

د دې ادارې په وینا په تېرو ۶ اوونیو کې په اروپا کې د کرونا ویروس پېښې مخ په کمېدو وې، خو په وروستۍ یوه اوونۍ کې یو ملیون نوې پېښې ثبت شوې چې تر ورتېرې اوونۍ په سلو کې ۹ ډېرې دي.

د روغتیا نړیوال سازمان وايي چې اکثره نوې پېښې د کرونا د انګلیسي بڼې دي.

د کرونا دا ډول ویروس په ۱۰ هېوادونو لکه بریتانیا، ایټالیا، ایرلنډ، جرمني، فرانسه، هالنډ، اسرائیل، اسپانیا او پورتګال کې زیات دی.

تېرو ۲۴ ساعتونو کې د یمن مارب ولایت نښتو کې لږترلږه ۹۰ تنه ووژل شول

ارشیف، یمن کې د نښتو یوه سیمه

د یمن حکومتي سرچینو پرون (شنبه) وویل، په تېرو ۲۴ ساعتونو کې د دغه هېواد د مارب ولایت په نښتو کې لږترلږه ۹۰ تنه وژل شوي دي.

د ایران له ملاتړه برخه‌منو حوثي یاغیانو له تېرې میاشتې راهیسې د دې ستراتېژيکې سیمې د نیولو لپاره بریدونه پیل کړي دي.

دا تېل لرونکې سیمه د یمن په شمال کې د دولتي ځواکونو وروستی مرکز ګڼل کېږي.

د یمن حکومتي سرچینو ویلي چې په وروستیو نښتو کې ۳۲ دولتي ځواکونه یا د حکومت پلوي قبایل وژل شوي دي.

دوی د حوثي یاغیانو د وژل شویو کسانو شمېر ۵۸ تنه ښودلی دی.

امریکا کې تر ۸۷ ملیونه او ۹۱۲ لکه دوزه ډېر کرونا واکسین خلکو ته ورکړل شوی

نیویارک کې په کرونا ویروس اخته یوه ناروغ ته د کرونا ویروس ضد واکسین تطبیق

په امریکا کې د ناروغیو د وقایې او مخنیوي مرکز وايي، تر پرون شنبې پورې په دغه هېواد کې تر ۸۷ ملیونه او ۹۱۲ لکه دوزه ډېر د کرونا واکسین خلکو ته ورکړل شوی دی.

د دې مرکز په وینا تر اوسه پورې په امریکا کې څه باندې ۱۱۶ ملیونه او ۲۵۵ زره دوزه کرونا ضد واکسین وېشل شوی دی.

د امریکا د ناروغیو د وقایې او مخنیوي مرکز زیاتوي چې تر پرون پورې څه باندې ۵۷ ملیونه او ۳۵۸ لکه امریکایانو ته یو دوز او نږدې ۳۰ ملیونو ته دوه دوزه واکسین ورکړل شوی دی.

د امریکا ولسمشر جو بایډن ویلي چې د مې میاشتې تر پایه به ټولو امریکایانو ته د کرونا ویروس په وړاندې واکسین برابر شي.

د پاکستان پوځ: شمالي وزیرستان کې مو ۸ اسلام‌پلوه ملېشې وژلي

ارشیف، د پاکستان امنیتي ځواکونه

د پاکستان پوځ وایي، ځواکونو یې په شمالي وزیرستان کې اته اسلام‌پلوه ملېشې وژلې دي.

دوی وایي، دغه کسان په هغو جلا جلا عملیاتو کې له‌منځه تللي چې د افغانستان سرحد ته نږدې په بویه او دوسالي سیمو کې پرون شنبه ترسره شول.

د چارواکو د معلوماتو له مخې وژل شویو کې درې تنه د ټي.ټي.پي یا تحریک طالبان پاکستان غړي شامل دي.

تر اوسه پاکستاني طالبانو په دې اړه څه نه‌دي ویلي او د پوځ دغه ادعا خپلواکو سرچینو هم نه‌ده تأیید کړې.

وزیرستان تېر کال د پاکستان پر امنیتي ځواکونو د ډېرو بریدونو او دغه‌راز د حکومتي چارواکو او مشرانو د هدفي وژنو شاهد و.

د امریکا سنا جرګې کرونا ځپلو سره د ۱،۹ تریلیونه ډالرو مرستې ته رایه ورکړه

آرشیف، کانگرس امریکا

د امریکا سنا جرګې کرونا ځپلو سره د ۱،۹ تریلیونه ډالرو د مرستو سند ته رایه ورکړه.

دې کار د کانګرس له‌خوا د دغه سند تصویب او د ولسمشر لاسلیک ته لاره هواره کړه.

د مرستو دغه اندازه د امریکا د ټول اقتصاد نژدې یو پر ۱۰مه برخه جوړوي.

ډیموکراتانو د دغه سند ملاتړ او جمهوري‌پالو یې په مخالفت رایې وکارولې چې بالاخره د یوې مثبتې رایې په تفاوت تأیید شو.

په سنا کې د اکثریت مشر سناتور چک شومر وویل، "موږ د امریکا خلکو ته وایو چې مرستې پر لاره دي".

د دې سند له مخې به اکثره امریکایي وګړي ۱،۴۰۰ ډالر مرسته ترلاسه کړي.

له مخالفو ډلو جوړ ائتلاف استازي نن د ارمنستان له ولسمشر سره ګوري

د ارمنستان ولسمشر ارمن سرکیسیان

د ارمنستان له مخالفو ډلو د جوړ ائتلاف استازي نن د مارچ په ۷مه د دغه هېواد له ولسمشر ارمن سرکیسیان سره د روان سیاسي کړکېچ په اړه خبرې کوي.

له څه باندې ۱۰ ډلو جوړ دغه ائتلاف ارمنستان کې له وخته مخکې پارلماني ټاکنو او دغه‌راز د صدراعظم نیکول پاشینیان د استعفا غوښتنه کوي.

مخالفان به له ولسمشره وغواړي چې د صدراعظم له‌خوا د لوی درستیز د لیرې کولو پرېکړه د اساسي قانون محکمې ته راجع کړي.

دوی د خپلو غوښتنو د منلو لپاره حکومت ته د مارچ تر نهمې مهلت ورکړی او ویلي یې دي، د هېواد برخلیک د ولسمشر په واک کې دی.

ارمنستان کې سیاسي کړکېچ وروسته له هغه زیات شوی چې صدراعظم د دغه هېواد لوی درستیز اونیک ګاسپرېن (Onik Gasparian) له دندې لیرې او لوړپوړي چارواکي یې د کودتا پر هڅه تورن کړل.

پولنډ کې ترافیکي پېښې ۶ اوکرایني وګړي مړه کړي

ارشیف، عکس تئزیني بڼه لري

د پولنډ په ختیځ کې د یوه بس د ټکر په پېښه کې ۶ اوکرایني وګړي مړه شوي او ۴۱ نور ټپیان شوي دي.

اوکرایني چارواکي وايي، دا بس چې لسګونه اوکراینیان په کې سپاره وو، نن شنبه(د کب ۱۶مه) سهار د اوکراین سرحد ته نژدې د پولنډ جنوب ختیځ ښار یاروسلاو په لمنو کې یوې کندې ته ولوېده.

د اوکراین د بهرنیو چارو وزارت ویاند اولېه نیکولېنکو تایید کړه چې په پېښه کې وژل شوي شپږ کسان اوکرایني وګړي دي.

د پېښې د علت په اړه تراوسه څه نه دي ویل شوي.

اوکرایني کارګران پولنډ ته- چې د پام وړ اقتصادي وده لري، د کار لپاره ځي او د دې هېواد د کار مهم ځواک جوړوي.

پاپ عراق کې له شیعه رهبر ایت الله علي السیستاني سره وکتل

د نړۍ د کاتولیکو عیسیویانو مذهبي مشر پاپ فرانسس له شیعه رهبر ایت الله علي السیستاني سره

د نړۍ د کاتولیکو عیسیویانو مذهبي مشر پاپ فرانسس د عراق په نجف ښار کې له ځواکمن شیعه رهبر ایت الله علي السیستاني سره وکتل.

دا عراق ته د رومن کاتولیک عیسیویانو د مذهبي مشر لومړی سفر او په نړۍ کې د کرونا د وبا له خپرېدو وروسته د پاپ فرانسس لومړی نړیوال سفر دی.

پاپ د بندو دروازو تر شا په دې کتنه کې هڅه وکړه چې د سوله ییز ګډ ژوند او د عراق د عیسوي ټولنو د پیاوړي کولو پیغام ورسوي.

السیستاني له لیدنې وروسته په یوه بیان کې وویل چې عراقي عیسیویان باید په سوله کې ژوند وکړي او د نورو عراقیان په څېر له ټولو حقوقو برخمن شي او واتیکان په یوه بیان کې وویل چې پاپ له السیستاني او عراقي شیعه ګانو څخه د عیسویانو د ملاتړ په خاطر چې د ده په وینا تر ټولو مظلوم او ځورېدلي خلک دي، مننه وکړه.

د دې سفر جریان په مستقیم ډول پر ټلوېزیون خپرېده او د نجف اوسېدونکو د دواړو مذهبي مشرانو د لیدنې هرکلی وکړ.

عمران خان له پارلمانه د اعتماد رایه ترلاسه کړه

د پاکستان صدراعظم عمران خان

د پاکستان صدراعظم عمران خان له پارلمان څخه د اعتماد رایه ترلاسه کړه.

د ۳۴۰ کسیز پارلمان د ولسي جرګې په غونډه کې عمران خان یوسل او اته اویا موافقې رایې وګټلې په داسې حال کې چې ۱۷۲ رایو ته اړتیا وه.

د اپوزیسیون ۱۶۰ وکیلانو دا غونډه تحریم کړه.

عمران خان وروسته له دې چې د مالیې وزیر د مشرانو جرګې په انتخاباتو کې، په سنا کې د خپل سیټ په ساتلو کې پاتې راغی او په نتیجه کې یې په دې جرګه کې د ده ګوند اکثریت له لاسه ورکړ، په خپله خوښه له پارلمانه د اعتماد رایې د اخېستو غوښتنه کړې وه.

نور راوښيه

XS
SM
MD
LG