خبرونه
د افغانستان ولسي جرګه د ۱۴۰۰ مالي کال د ملي بودجې پر درېیمه طرحه بحث کوي
تمه ده سبا د افغانستان ولسي جرګه د ۱۴۰۰ مالي کال د ملي بودجې درېیمه طرحه تر بحث لاندې ونیسي.
د جرګې یو شمېر غړو دوشنبه په عمومي ناسته کې وویل چې د بودجې په طرحه کې لږ بدلون راغلی دی.
د ولسي جرګې د اعلامیې له مخې د توازن او عدالت نشتوالی، د نیمګړو پروژو حذف او د ۹۱ او ۹۲ کوډونو کې د کمښت نهراتګ د بودجې له مهمو ستونزو دي.
د جرګې ځینو غړو همداراز وویل چې د بودجې په وړاندې باید سیاسي چلند ونهشي ځکه د دوی په خبره بودجه باید د ملي ګټو په اساس وروستۍ او تصویب شي.
د ۱۴۰۰ مالي کال بودجه کې لومړی وار د ۴۵۲ میلیارده افغانیو وړاندیز شوی و چې رد شوه. په دوهمه طرحه کې ۱۷۲ میلیارده افغانۍ کمه شوه او اوس په درېیمه طرحه کې ملي بودجه ۴۷۳ میلیارده افغانۍ ښودل شوې چې ۳۱۱ میلیاردهیې عادي او ۱۶۱ میلیاردهیې پراختیايي بودجه ده.
د ورځې تازه خبرونه دلته ولولئ
سرګی لاوروف له اميرخان متقي سره پر اقتصادي پياوړتيا خبرې کړي
د روسیې د بهرنیو چارو وزیر سرګی لاوروف او د طالبانو د بهرنیو چارو سرپرست وزیر امیرخان متقي پرون په مسکو کې په افغانستان کې د روغې جوړې د پروسې او د افغانستان او روسیې ترمنځ د انرژۍ د سکتور په شمول د اقتصادي همکاریو د پیاوړتیا په اړه خبرې وکړې.
انټرفاکس خبري اژانس د روسیې د بهرنیو چارو وزارت د خبرپاڼې پر اساس ویلي چې، لاوروف او متقي د افغانستان په اړه د مسکو فارمټ د شپږمې مشورتي ناستې په څنډه کې سره ولیدل.
دواړو خواو د افغانستان د ستونزو پر حللارې او د مسکو او کابل ترمنځ پر دوه اړخیزو همکاریو خبرې وکړې.
د روسیې د بهرنيو چارو وزارت په بیان کې همداراز ویل شوي چې، دواړو خواوو له بهره د افغانستان په کورنیو چارو کې لاسوهنه د نه منلو وبلله.
د ايران د بهرنيو چارو وزير له حزبالله د ملاتړ د دوام ژمنه کړې
د ایران د بهرنیو چارو وزیر عباس عراقچي پرون په بیروت کې وویل، په لبنان کې د ده حضور ښیي چې هېواد به یې د حزبالله تر شا ولاړ وي.
عراقچي خبریالانو ته وویل چې، د ایران اسلامي جمهوریت په اسراییل باندې د بریدونو د دوام اراده نهلري، خو د اسراییل د نورو اقداماتو په صورت کې به حتماً "سخت" ځواب ورکړي.
له بلې خوا د اسراییل د پوځ یوه ویاند پرون (جمعه) وویل، د پوځ د اټکل لهمخې، د دې اوونۍ په لومړیو کې په لبنان کې د اسراییل د ځمکنیو عملیاتو له پیل راهیسې د حزبالله د وسلهوالې ډلې شاوخوا ۲۵۰ غړي وژل شوي دي، چې پهکې یوشمېر جنګیالي او د کنډکونو قوماندانان شامل دي.
د اسراییل پوځ دا هم ویلي چې، د اسراییل په شمال کې په یوه جګړه کې دوه اسراییلي عسکر وژل شوي، خو پوځ نور جزیات ورنهکړل.
نن د افغانستان په ۱۵ ولايتونو کې د ورښتونو اټکل شوی
د طالبانو د اوبو اوانرژۍ وزارت له اټکل سره سم، نن به د افغانستان په ۱۵ ولایتونو کې باران و اوري او د هېواد په سیندیزو حوزو کې به د اوبو سطحه لوړه شي.
دغه وزارت پرون (جمعه) په یوه خبرپاڼه کې ویلي چې، د ناڅاپي بارانونو، ورښتونو او سېلونو ډېر احتمال د کابل او هلمند په سیندیزو حوزو کې اټکل شوی دی.
د طالبانو د ترانسپورت او انرژۍ وزارت په خبرپاڼه کې راغلي چې کاپیسا، کونړ، لغمان، ننګرهار، لوګر، پکتیا او خوست هغه ولایتونه دي چې د سېلونو او شدید باران احتمال پهکې زیات دی.
په وروستیو ورځو کې په لغمان او ننګرهار ولایتونو کې د سېلونو له کبله د څو تنو د مړینې او ټپي کېدو ترڅنګ ډېره کرنیزه ځمکه ویجاړه شوه.
د بښنې نړيوال سازمان: پاکستان بايد د سولهييزو اعتراضونو حق ته درناوی ولري
د بښنې نړیوال سازمان له پاکستاني چارواکو غوښتي چې، مخابراتي شبکې ژر تر ژره بېرته فعالې کړي او د سولهییزو اعتراضونو حق ته درناوی وکړي.
دغه سازمان ټینګار وکړ چې، د پاکستان حکومت باید د سولهییزو لاریونونو پر وړاندې له غیرقانوني ځواکونو او میتودونو کار وانهخلي.
په اسلاماباد کې د پاکستان تحریک انصاف "پيټيآی" د پلویانو د اعتراضونو د مخنیوي په غبرګون کې، د بښنې نړیوال سازمان پرون (جمعه) پر خپله ایکسپاڼه یا پخواني ټویټر لیکلي، د محدودیتونو لګول، په غیر قانوني ډول له زوره کار اخیستل او د لاریون کوونکو نیول او ځپل د اندېښنې وړ دي.
له بلې خوا د پېښور لوړې محکمې د خیبرپښتونخوا ایالتي حکومت ته ویلي چې، پولیسو ولې د خیبر په جمرود کې د پښتون ژغورنې غورځنګ د پلویانو پر ضد له اوښکې بهونکي ګاز څخه کار اخیستی دی.
د پښتون ژغورنې غورځنګ مشرانو شکایت کړی چې حکومت د دوی د هغې جرګې لپاره، چې د اکتوبر په یوولسمه یې رابللې، خېمې سوځولي او پر خلکو یې اوښکي بهونکي ګاز شیندلی او همداراز یې د انترنیټ او موبایل ټليفون شبکې يې بندې کړي دي.
د بښنې نړیوال سازمان ټینګار کړی چې، د مخابراتي شبکو په پرچاو کولو او د سړکونو په بندولو سره د اعتراضونو مخنیوی د بیان د ازادۍ او معلوماتو ته د لاسرسي د حقونو سرغړونه ده.
په پلازمېنه اسلامآباد کې امنیتي ځواکونه ځای پرځای کېږي
د پاکستان د کورنیو چارو وزارت وايي، د امنیت د ټینګښت په موخه په پلازمېنه اسلامآباد کې امنیتي ځواکونه ځای پرځای کوي.
دې وزارت نن د اکټوبر څلورمه په یو بیان کې ویلي، دا ځواکونه د شانګهای ناستې د امنیت د تامین په هدف سر له سبا شنبې د روانې میاشتې تر ۱۷مې نېټې په اسلامآباد کې ځای پرځای کېږي.
د پاکستاني رسنیو د راپورونو پر بنسټ، دا ځواکونه د پاکستان د صداعظم شهباز شریف تر منظورۍ وروسته چې پوځ او رېنجرز ځواک به هم په کې شامل وي، اسلامآباد ته د امنیت د ټینګښت لپاره وربلل کېږي.
ټاکل شوې د شانګهای د همکارۍ سازمان ۲۳مه سرمشريزه د اکټوبر پر ۱۵مه او ۱۶مه په اسلامآباد کې وشي.
بل پلو، نن د پاکستان د کورنیو چارو وزیر محسن نقوي ویلي، چاته به د مظاهرو لپاره اسلامآباد ته د داخلېدو اجازه نه ورکوي.
هغه د تحریک انصاف ګوند له پلویانو غوښتي چې د نورو هېوادونو استازي پاکستان ته راځي، نو ځکه دې مظاهري نه کوي.
تحریک انصاف ګوند یا "پيټيآی" د خپل زنداني مشر او د پاکستان پخواني صداعظم عمران خان د خوشې کېدو په موخه نن د اسلامآباد په جمهوریت څلور لاره کې د مظاهرو اعلان وکړ.
هالنډ ته د یو شمېر افغانانو د لېږد پرېکړه وغندل شوه
د هالنډ د حکومت اپوزسیون د واکمن ښې اړخي ګوند هغه پرېکړه وغندله چې پر بنسټ يې په افغانستان کې د دوی له پوځیانو سره افغان کارکوونکي هالنډ ته نه لېږدوي.
د هالنډي رسنیو د راپورونو پر بنسټ، تېره اوونۍ د هالنډ د حکومت وزیرانو هغه پرېکړه بېرته واخیسته چې ویلي وو، ۱۴۵ افغان امنیتي ساتونکي چې په افغانستان کې يې په غیرمستقیم ډول د دوی له پوځیانو سره کار کړی و، هالنډ ته انتقالوي.
اپوزسیون پرون ماښام په یو لړ بحثونو کې ویلي، دا پرېکړه افغان امنیتي ساتونکو ته د مرګ د سزا د ورکولو او د "ژمنې ماتولو" په مانا ده.
اپوزسیون له ښې اړخو غوښتي چې پر خپلې پرېکړې له سره غور وکړي.
د هالنډ حکومت ویلي، که څه هم ممکن د دغو افغان امنیتي ساتونکي ډېر شمېر په هالنډ کې د پناه د غوښتنې وړ وي، خو د دوی انتقال او په هالنډ کې يې ځای پرځای کول ستونزمن دي.
پر افغانستان د طالبانو له واکمنېدو راهیسې نژدې څلور زره افغانان هالنډ ته انتقال شوي دي.
په بوسنیا او هیرزیګوینا کې سېلابونو لږترلږه ۱۴ کسان مړه کړي
په بوسنیا او هیرزیګوینا کې د وروستیو سېلابونو له امله لږترلږه ۱۴ کسان مړه شوي دي.
چارواکو نن جمعه وویل چې دغه سېلابونه تېره شپه د دې هېواد په مرکزي او جنوبي برخو کې د شدیدو بارانونو په نتیجه کې راوتلي وو.
د نیریتوا کانټن د سیمهییزې ادارې ویاند ډارکو جوکن وویل ډېر نور کسان ترې تم دي او یو زیات شمېر نور هم ټپیان شوي دي.
د چارواکو په خبره، په جلانیکه او کونیچ سیمو کې د شدیدو بارانونو له امله ځمکې ښویدلې چې چارواکو پهکې د طبیعي ناورین حالت اعلان کړی دی.
دا سیمې د بوسنیا او هیرزیګوینا د پلازمېنې سارایوو او جنوبي ښار موسټر ترمنځ پرتې دي چې په ځینو کلیو کې یې اوبه د کورونو ترچتونو پورې پورته شوې دي.
د بوسنیا د رېلګاډي د خدمتونو ادارې په هغو سیمو کې چې سېلابونه راوتلي، د رېلګاډي خدمات ځنډولي دي.
د بوسنیا په څنګلورو هېوادونو، مونتینیګرو او کرویشیا کې هم د شیدیدو بارانونو، سېلابونو او تندو بادونو راپورونه ورکړل شوي دي.
د روسيې په ورونيژ سيمه کې د اوکراين د بريد له امله د تېلو په يو ډيپو کې اور لګېدلی
د روسیې په جنوب لوېدیځ ورونیژ سیمه کې نن سهار وختي د اوکراین د یوې بېپیلوټه الوتکې د برید په نتیجه کې په سیمه کې د تېلو په یوه لوی ډیپو کې اورلګېدلی دی.
دا خبره د سیمې والي الکساندر ګوسیف نن پر ټلېګرام چینل کړې او ویلې یې دي، چې د انیسکي په سیمه کې چېرته چې د تېلو دغه ډیپو دی، د روسیې د هوایې مدافعې لهخوا په ډزو کې د نسکورې شوې بېپیلوټه الوتکې ټوټې راغورځېدلې وې، چې په نتیجه کې د تېلو په یوه تش ټانکر کې اور ولګېد.
تر اوسه د مرګژوبلې راپورونه نهدي ورکړل شوي.
د سیمې د والي په خبره د اطفایې کارکونکي هڅه کوي چې لګېدلی اور مړ کړي.
د مسکو فارمټ غونډه کې نن د افغانستان پر وضعيت خبرې کېږي
د روسیې د بهرنیو چارو وزیر سرګې لاوروف له لوېدیځو هېوادونو وغوښتل چې خپل مسولیت پرځای کړي او له جګړې وروسته د افغانستان د رغونې چارې بېرته پیل کړي.
لاوروف دغه څرګندونې نن د مسکو فارمټ چې روسیه يې کوربنه ده، د غونډې ګډونوالو ته په پرانیستونکې وینا کې وکړې.
د روسیې د تاس خبري اژانس د راپور لهمخې لاورف همدارانګه پر افغانستان د لوېدیځ د بندیزونو د لیرې کېدو او د دې هېواد د کنګل شویو شتمنیو د ازادېدو غوښتنه وکړه.
د لاوروف په خبره په افغانستان کې بشري اړتیاو ته په پام چې، د ملګروملتونو په خبره له ۲۳ ميلیونه زیات وګړي یې مرستو ته اړ دي، باید لهدې هېواد سره د نړیوالو بشري مرستو اندازه زیاته شي.
هغه همدارنګه وویل، دغه پروسه باید سیاسي نهشي.
د مسکو فارمټ پهدې شپږمه مشورتي غونډه کې به د روسیې، چین، هند، ایران، پاکستان، ازبکستان، قزاقستان، قرغزستان، تاجکستان او ترکمنستان استازي او د طالبانو د حکومت د بهرنیو چارو سرپرست وزیر امیرخان متقي ګډون وکړي.
د روسیې د بهرنیو چارو وزارت ویلي، پهدې غونډه کې به په افغانستان کې د ملي روغې جوړې د هڅو پر پیاوړتیا، د طالبانو د حکومت او د سیمې د هېوادونو ترمنځ د همکارۍ د پراختیا او له مخدره موادو او ترهګرۍ سره د مبارزې پر لارو چارو خبرې وشي.
د جرمني خبري اژانس د راپور لهمخې د تړلو دروازو تر شاه له بحثونو وروسته به یوه ګډه اعلامیه هم صادره شي.
د طالبانو د حکومت مرستیال ویاند حمدالله فطرت هیله وښوده چې دغه غونډه به له سیمهییز امنیت او اقتصادي ثبات سره مرسته وکړي.
د مسکو فارمټ چې په ۲۰۱۷م کې رامنځته شوی، هدف یې د افغانستان په وړاندې له چلنجونو سره مبارزه او سیمهییزې همکارۍ ته وده ورکول دي.
د ۲۰۲۱ کال د اګسټ له میاشتې راهیسې چې امریکایي ځواکونه له افغانستانه ووتل او دا هېواد بیا د طالبانو لاس ته پرېوت، د سیمې قدرتونو د طالبانو له سرپرست حکومت سره فعالې ښکېلتیا ته مخه کړې ده.
خامنهيي: پر اسراييل د ايران بريد قانوني او مشروع و
د ایران لوی مشر ایتالله علي خامنهيي پر اسرايیل د ایران د توغندیو د برید دفاع وکړه او هغه یې مشروع وباله.
هغه نن په تهران کې د جمعې د لمانځه د یوې نادرې خطبې په ترڅ کې پر اسراییل د ایران د سهشنبې د ورځې توغندییز پراخ برید ته په اشاره وویل، د وسلهوالو ځواکونو عملیات یې په بشپړه توګه قانوني او مشروع و او زیاته يې کړه چې که اړتیا وه، په راتلونکې کې به بیا هم پر اسراییل برید وکړي.
خامنهیي دغه څرګندونې داسې مهال کوي چې په لبنان کې د اسراییل لهخوا د هوایي بریدونو او ځمکنیوعملیاتو په ترڅ کې، په منځني ختیځ کې د پراخې سیمهییزې شخړې وېره په زیاتېدو ده.
دا به په نژدې پنځو کلونو کې لومړی ځل وي چې خامنهيي عامه خطبه ورکوي.
وروستی ځل نوموړي د ۲۰۲۰م کال په جنوري کې د جمعې خطبه ورکړې وه او هغه هم په بغداد کې د متحدهایالاتو په برید کې د ایران د سپاهپاسداران انقلاب ځواکونو قوماندان قاسم سلیماني له وژل کېدو وروسته وه.
متحدهایالاتو په عراق کې د امریکا پر یوې پوځي اډې د ایران له توغندویي برید وروسته سلیماني په برید کې په نښه کړی و.
ویل شوي چې د خامنهيي له خطبې وروسته به د حزبالله چې امریکا یې د یوې ترهګرې ډلې په توګه پېژني، د پخواني مشرحسن نصرالله چې تېره اوونۍ د بیروت په جنوب کې د اسراییل په یوه هوایي برید کې ووژل شو، د ویر او دعا مراسم ترسره شي.
ایران روانه اوونۍ پر اسراییل د توغندیز برید په اړه وویل، دغه برید یې د حسن نصرالله د وژنې د غچ اخیستو لپاره وکړ.
د اسراییل صدراعظم دا د ایران لویه تېروتنه بللې او د پیاوړي غچ اخیستونکي برید ګواښ یې کړی دی.