د لاسرسۍ وړ لېنکونه

تازه خبر
یکشنبه ۲۲ وری ۱۴۰۰ کابل ۱۱:۴۵

افغانستان

د افغانستان د کورنیو چارو وزارت: طالبانو د جګړو په ډګر کې ماتې خوړلې

د افغانستان د کورنیو چارو وزارت

د افغانستان د کورنیو چارو وزارت وایي، طالبانو د جګړو په ډګر کې ماتې خوړلې ځکه‌یې په کابل او نورو ښارونو کې د مقناطیسي چاودنو په ګډون د نا امنیو پر زیاتوالي ډېر تمرکز کړی دی.

د دې وزارت ویاند طارق ارین پرون په کابل کې په یوه خبري کنفرانس کې وویل، امنیتي ځواکونو هم د ښار د امنیت د ټینګښت د هڅو په ترڅ کې په دې وروستو کې د نا امنیو د پېښو په تړاو د طالبانو په ګډون شاوخوا ۳۰۰ ترهګر نیولي او په لسګونه ماینونه او نورې چاودېدونکې وسیلې یې شنډ کړي دي.

ښاغلی ارین زیاتوي: "لږترلږه په تېره یوه میاشت کې په کابل کې ۳۰ حلقې ماینونه شنډ کړای شوي دي. دا په دې معنی چې د ۳۰ فاجعو مخه نیول شوې ده. دغه ماینونه د سړک د غاړې ماینونه، مقناطیسي او استقامتي ماینونه وو او هدف‌یې هم د خلکو وژل و."

ښاغلي ارین دغه څرګندونې داسې مهال کوي چې پرون یکشنبه هم کابل د دوو مقناطیسي ماین چاودنو شاهد و.

د امنیتي چارواکو په وینا په دغو چاودنو کې چې په نهمه ناحیه او ۱۲مه ناحیه کې وشوې، دوه کسان‌ ژوبل شوي دي.

د ورځې تازه خبرونه دلته ولولئ

د هرات- اسلام کلا او هرات- تورغونډۍ لارې بېرته پرانېستل شوې

آرشیف، د هرات یوه لویه لار

په هرات ولایت کې دوه مهمې لارې د هرات- اسلام کلا او هرات- تورغونډۍ لارې پرون بېرته پرانېستل شوې.

دغه لارې له یوې اوونۍ راهیسې د هغو کسانو د تحصن له کبله تړل شوې وې چې د اسلام کلا ګمرک په وروستۍ اورلګېدنه کې زیانمن شوي دي.

د هرات والي ویاند، جېلاني فرهاد پرون شنبه (د وري ۲۱مه) ازادي راډیو ته وویل: "د هرات- اسلام کلا او هرات- کندهار ترمنځ د لویو لارو فعالیت له سره پیل شو. د پارلمان او مالیې وزارت د پلاوي تر سفر او د هرات ولایت چارواکو تر خبرو وروسته دغه اعتصاب او تحصن پای ته ورسېد."

د والي ویاند وايي، دغه تحصن په دې ولایت کې د غذايي او نورو موادو د بیو لوړېدو سبب شوی و.

د تحصن برخه والو چې د سلواغې/ دلوې پر ۲۵ مه په اورلګېدنه کې زیانمن شوي، د زیانونو د جبران غوښتنه درلوده.

بشري حقونو کمېسیون: د خوست صبریو کې افغان سرتیرو ۲ تنه وژلي

ارشیف

د افغانستان د بشري حقونو خپلواک کمېسیون وايي، د دوی موندنې ښيي چې د خوست په صبرۍ ولسوالۍ کې د افغان امنیتي ځواکونو د هاوان مرمۍ یوه ښځه او یو ماشوم وژلي دي.

د دغه کمېسیون ویاند ذبیح الله فرهنګ پرون شنبه (د وري ۲۱مه) رسنیو ته په استولي پیغام کې ویلي، دغه پېښه کې چې د وري پر اوومه شوې، شپږ نور کسان ټپیان شوي.

دی وايي: "دواړه خواوې باید دافغانانو غوښتنې ومني او اوربند وکړي، له بلې خوا له افغان دولت نه مو غوښتنه دا ده چې په حقیقت موندنه، د عدالت په تامین او خلکو په ساتنه کې مخکښ شي او دې برخه کې مسولانه چلند وکړي."

په خوست کې امنیتي ځواکونو د ملکیانو د مرګ ژوبلې په اړه څه نه دي ویلي، خو د مارچ له ۱۸مې تر ۲۹مې یې د پوځي عملیاتو د ترسره کولو خبر ورکړی و.

بل خوا د ملي امنیت عمومي ریاست تېره اوونۍ ویلي وو چې د خوست په صبریو، باک او ځاځي میدان ولسواليیو په عملیاتو کې د حقاني شبکې ځینې غړي وژل شوي دي.

د تورخم ښارګوټي له لارې په قاچاقي ډول د پنډو وړل راوړل منع کېږي

تورخم ښارګوټی

سر له سبا دوشنبه)د وري ۲۳مه) د تورخم ښارګوټي له لارې په قاچاقي ډول د پنډو یا وړو بارونو وړل راوړل منع کېږي.

د ننګرهار د والي ویاند عطا الله خوږیاڼي پرون شنبه (د وري ۲۱مه) ازادي راډیو ته وویل، دغه پرېکړه مسافرو ته د اسانتیا برابرولو په هدف شوې ده: "ننګرهار والي د تورخم ښار ګوټي له ځینو مسوولانو او سوداګرو سره د غونډې پر مهال پرېکړه وکړه چې له دوشنبې به د تورخم ښارګوټي له لارې هېڅ ډول ګنډې وړونکي تګ راتګ ونه کړي. هغه کسان چې سرغونه کوي، توکي یې ضبطېږي او قانوني چلند ورسره کېږي."

د ننګرهار والي ضیا الحق امرخېل پرون ویلي چې د دې پرېکړې د جدي تطبیق لپاره د تورخم ښاروال، کمېسار، د ګمرک او ملي امنیت مدیرانو ته دنده سپارل شوې ده.

روغتیا وزارت: د پولیو واکسین په اړه طالبانو سره خبرې روانې دي

ارشیف، جلال اباد کې یوه ماشوم ته د پولیو څاڅکي ور اچوي

د افغانستان د عامې روغتیا وزارت وايي، د ملګرو ملتونو په مرسته له طالبانو سره خبرې روانې دي چې کور پر کور د ګوزڼ ضد واکسین لګولو کمپاین ته اجازه ورکړي.

دغه وزارت کې د ګوزڼ د له منځه وړلو پروګرام د عامه اړیکو مشر میرجان راسخ ازادي راډیو ته وویل:"له وسله والو طالبانو سره زموږ د خبرو لړۍ جاري ده. څو هغوی په دې قانع کړو چې تر خپلې ولکې لاندې سیمو کې کور پر کور د واکسین کمپاین ته اجازه ورکړي. البته دغه لړۍ د ملګرو ملتونو ادارو او په سیمو کې زموږ د ټولنې د مخورو، مشرانو او دیني عالمانو له خوا روانه ده."

ښاغلی راسخ وايي، د ګوزڼ ضد واکسین په هر کمپاین کې شااوخوا ۳ میلیونه ماشومان له دغه واکسینه بې برخې پاتې کېږي.

د طالبانو ویاند ذبیح الله مجاهد ازادي راډیو ته ویلي، دوی په هلمند، کندهار او ارزګان کې د کور پر کور واکسین کمپاین مخه ځکه نیولې وه چې د ده په خبره له دغه کمپاینه د استخباراتي فعالیتونو په هدف کار اخېستل کېده.

مجاهد وايي، دوی اوس هڅه کوي چې له دغه کمپاین سره همکاري وکړي.

د ګوزڼ ضد واکسین تازه کمپاین چې په ۳۲ ولایتونو کې عملي شو، تېره جمعه پای ته ورسېد. په دایکنډي او بامیان کې دغه کمپاین د هوا د خرابوالي له کبله عملي نه شو.

هرات چارواکي: د ګاز په تأسیساتو کې لګېدلی اور مړ شوی

ارشیف، عکس تزئیني بڼه لري

په هرات ولایت کې د هرات- تورغونډۍ د لویې لارې په اوږدو د ګاز په تأسیساتو کې لګېدلی اور مړ شوی دی.

د هرات د والي ویاند جېلاني فرهاد ازادي راډیو ته وویل چې دې اور پېښه کې یو تن برسېرن ټپي شوی دی.

د هرات د برېښنا شرکت د رسنیو مسوولې زینب محسني وویل چې د اور پېښې له کبله د ښار په ځنیو سیمو کې برېښنا قطع شوې وه.

تر دې مخکې د هرات په اسلام کلا بندر کې د اور د لګېدو په پېښه کې سلګونه موټر وسوځېدل.

دفاع وزارت: بدخشان کې ۲۱ طالبان وژل شوي

افغان سرتیري

د افغانستان دفاع وزارت وايي چې د بدخشان ولایت د وردوج ولسوالۍ لپاره د طالبانو له خوا نومول شوی ولسوال تر شلو له زیاتو وسله والو سره یو ځای د هوايي ځواک په حملو کې وژل شوی دی.

د دفاع وزارت ویاند فواد امان ازادي راډیو سره په خبرو کې په دې اړه نور جزئیات ورکړل: "په هغو هوايي حملو کې چې پرون د بدخشان په وردوج ولسوالۍ کې وشوې، ۲۱ طالبان چې د وردوج لپاره د طالبانو له خوا نومول شوی ولسوال قاري حیدري هم په کې دی، وژل شوي او ۲۳ نور ټپیان شوي دي."

طالبانو تراوسه په دې اړه څه نه دي ویلي.

د افغانستان د جګړې ښکېل اړخونه تل یو بل ته د سختو زیانونو د اړولو ادعاوې کوي.

د کرنې وزارت: تېرکال افغانستان کې ۲۵۰۰ ټنه شات تولید شوي

په افغانستان په تېر لمریز کال کې نږدې دوه زره او ۵۰۰ ټنه شات تولید شوي دي.

د کرنې، اوبو لګولو او مالدارۍ وزارت ویاند نن شنبه (د وري ۲۱مه) ازادي راډیو ته وویل چې د وزارت د معلوماتو او احصایي ریاست شمېرې ښیي چې په ۱۳۹۹م لمریز کال کې د هېواد په مرکز او ولایتونو کې دوه زره او ۴۹۰ مټریک ټنه شات تولید شوي دي.

نوموړي وویل، پکتیا د ۸۹۹ ټنه شاتو په تولید سره لومړی ځای خپل کړی دی او وروسته د ننګرهار ولایت د ۵۰۰ ټنو په تولید سره او خوست د ۴۱۶ ټنو په تولید سره د هېواد د شاتو تر ټولو لوی تولیدوونکي ولایتونه دي.

همدارنګه هرات، لغمان، بدخشان، کندز او بامیان هم د شاتو د تولید برخه کې د لویو تولیدوونکو ولایتونو په ډله کې دي.

په هېواد کې د شاتو مچیو روزنې شپږ زره او ۷۵۷ فارمونه شته دي چې ډېری یې د بادغیس، هرات، بدخشان، پکتیا، کندز، دایکنډي، بامیان، لوګر، سرپل، فراه، میدان وردګ، کاپیسا، تخار، بغلان او خوست ولایتونو کې دي.

بادغیس د ۷۲۲ فارمونو، هرات د ۵۹۳، پکتیا د ۵۵۰ او بدخشان د شاتو مچیو د ۵۲۶ فارمونو په درلودو سره د شاتو مچیو روزنې د فارمونو برخه کې د جدول په سر کې دي.

د شاتو مچیو روزنه په افغانستان کې د یو ښه عاید لرونکي دندې په توګه د پراختیا په حال کې ده چې محصولات یې ښه کورني او بهرني بازار لري.

په کورنیو بازارونو کې د شاتو نوعیت ته په کتو یو کیلو خالص شات له ۵۰۰ تر دوه زره افغانیو پلورل کېږي.

دا په داسې حال کې ده چې په ۱۳۹۸م کال د شاتو د تولید کچه دوه زره او ۱۰۰ ټنه وه چې دا شمېره په ۱۳۹۹م کال کې ۳۹۰ ټنه زیاتوالی لري.

اتل قول اردو: د کندهار ارغنداب او ژېړۍ کې ۴۲ طالبان وژل شوي

کندهار کې له عملیاتو وروسته سیمه

په کندهار کې دېره د ملي اردو اتل قول اردو ادعا کوي چې د دې ولایت په ارغنداب او ژېړۍ ولسوالیو کې ۴۲ طالبان د عملیاتو پر مهال وژل شوي دي.

د ۲۰۵ اتل قول اردو ویاند خواجه یحیی علوي نن شنبه (د وري ۲۱مه) سهار په یوه غږیز پیغام کې په دې اړه رسنیو ته معلومات ورکړل: "تېره ورځ دفاعي او امنیتي ځواکونو د هوايي قوې په ملاتړ د کندهار په ارغنداب او ژېړۍ ولسوالیو کې وسله وال طالبان په نښه کړل چې په پایله کې یې ۴۲ تنه طالبان ووژل شول او ۵ نور ټپیان شول."

له کندهاره د یوه بل خبر له مخې د کندهار د ملي امنیت ریاست نن شنه دولس تورن کسان چې د چارواکو په وینا په کندهار ښار کې یې په هدفي وژنو کې لاس درلود، خبریالانو ته وښودل.

ملي امنیت وویل چې دا کسان طالبان دي.

وسله والو طالبانو تر اوسه په دې اړه څه نه دي ویلي.

د امرالله صالح دفتر:کابل کې د داعش ډلې مشر ونیول شو

غلام ناصر الخراساني

د ولسمشر د لومړي مرستیال دفتر د ملي امنیت د ځواکونو له خوا په پلازمېنه کابل کې د داعش ډلې د مشر د نیولو خبر ورکوي.

د امرالله صالح دفتر په یوه خبرپاڼه کې چې شېبه مخکې خپره شوه ویلي دي چې غلام ناصر الخراساني په کابل کې ښار کې په لسګونه تروریستي حملو، وژنو او اختطافونو کې لاس درلود.

په خبرپاڼه کې نوموړی د داعشي طالبانو د تروریستي ډلې مشر بلل شوی.

د خبرپاڼې له مخې الخراساني د کابل له لویدیځ څخه د یوه ۱۴ کلن هلک په تښتولو کې هم لاس درلود.

هرات چارواکي: د کمرکلاغ د ګازو په تأسیساتو کې اور لګیدلی

ارشیف، عکس تزئیني بڼه لري

په هرات کې د سیمه ییزو چارواکو په وینا، د هرات – تور غونډۍ د لویې لارې په اوږدو کې د ګازو په تأسیساتو کې اور لګیدلی دی.

د هرات والي سید وحید قتالي وایي، اطفاییه د کمرکلاغ سیمې ته چې اور په کې لګیدلی دی، استول شوې ده او د دوه سوه اووم ظفر قول اردو اطفاییې هم سیمې ته حرکت کړی دی.

تر اوسه د تلفاتو په اړه څه نه دي ویل شوي، خو د هرات د رسنیو مسوولې زیبت محسني وویل چې د دې پېښې له امله د هرات ښار په ځینو سیمو کې برېښنا قطع شوې ده.

د کرکټ لوبډلې درې وتلي افغان ستوري د هند کرکټ لیګ کې لوبېږي

ارشیف

د افغانستان د کرکټ ملي لوبډلې درې وتلي ستوري د هندوستان د کرکټ په لیګ کې چې بېګا پيل شول، لوبېږي.

دغه افغان لوبغاړي محمد نبي، راشد خان او مجیب الرحمان دي چې درې سره د سنرایزر حیدر اباد په لوبډله کې لوبه کوي.

د افغانستان کرکټ بورد له شور او زوږه ډک دغه لیګ کې د افغان لوبغاړو لوبېدل ګټور بولي.

د هندوستان د کرکټ غوره لیګ د جون میاشتې تر څلورمې نېټې دوام کوي.

برېښنا شرکت: د کابل ښاریانو د برېښنا د لګښت بېلونه یو میاشتني شول

ارشیف

د افغانستان برېښنا شرکت وایي چې د کابل د اوسېدونکو د لګښت بېلونه یې له دوه میاشتني سیستم نه یوې میاشتې ته واړول.

د دغه شرکت ویاند وحیدالله توحیدي ازادي راډیو ته وویل چې دا ګام یې د خلکو له پرله پسې غوښتنې وروسته اوچت کړی دی او په خبره یې د ۱۴۰۰ کال له پيله دا چاره د تطبیق وړ ده: "د کال له پیله به دا د کابل په رهایشي سیمو کې تطبیق کړای شي او په نژدې راتلونکې کې به نورو غټو ولایتونو ته هم وغځیږي. له اقتصادي لحاظه دا به مشترکینو ته د بل په لګښت کې پنځوس فیصده کمښت راولي."

د پلازمېنې کابل او شااوخوا ولایتونو برېښنا تر ډېره د افغانستان له دوو شمالي ګاونډیو ازبېکستان او تاجېکستان څخه واردېږي چې وخت نا وخت یې خلک د پرچاوۍ په اړه هم شکایتونه کوي.

اتل قول اردو: کندهار کې تر ۴۰ ډېرو وسله‌والو طالبانو ته مرګ‌ژوبله واوښته

ارشیف، کندهار کې د افغان ځواکونو عملیات

افغان چارواکي په کندهار ولایت کې د عملیاتو پر مهال تر ۴۰ ډېرو وسله‌والو طالبانو ته د مرګ‌ژوبلې ادعا کړې.

د ۲۰۵ اتل قول اردو ویاند خواجه یحیی علوي ازادي راډیو ته په استول شوي پیغام کې وویل چې دا عملیات ارغنداب، ژړۍ او د شاه ولیکوټ ولسوالیو په اړوندو سیمو کې شوي دي.

ښاغلی علوي زیاتوي: "د دغو عملیاتو په پایله کې ۳۶ طالبان ووژل شول، ۶ نور ټپیان دي او ۳ کسان هم ونیول شول. همداراز د دښمن یوه اندازه وسلې او مهمات له‌منځه وړل شوي دي."

ښاغلی علوي وایي په دغو سیمو کې ۵۰ بېلابېل ډولونه ماینونه له سیمې څخه کشف او خنثی شوي دي.

طالبانو تر اوسه په دې اړه څه نه‌دي ویلي.

بایډن له افغانستانه د ځواکونو ایستلو پرېکړه تر ټاکلي ضرب‌الاجل مخکې اعلانوي

د امریکا ولسمشر جو بایډن

سپینه ماڼۍ وایي د امریکا ولسمشر جو بایډن به له افغانستان څخه د امریکایي ځواکونو د ایستلو پرېکړه تر ټاکلي ضرب‌الاجل دمخه چې د مې ۱ نېټه ده، اعلان کړي.

د سپینې ماڼۍ ویاندې جین ساکي دا خبره د اپرېل پر اتمه په واشنګټن کې خبریالانو ته وکړه.

مېرمن ساکي وویل: "د ولسمشر د پرېکړې تر اعلان دمخه زه څه نه‌وایم. تمه لرم چې د مې تر لومړۍ دمخه‌یې په خپله له ولسمشر څخه واورئ. هغه په ښکاره او دوامدار ډول ویلي چې د مې تر لومړۍ نېټې د ځواکونو ایستل عملاً ګران کار دی. دا ضرب‌الاجل پخوانۍ ادارې ټاکلی."

د سپینې ماڼۍ ویاندې وویل چې په دې اړه له څو اوونیو راهیسې ډیپلوماتیکې هڅې او له طالبانو سره خبرې روانې دي.

د مې تر لومړۍ نېټې له افغانستان څخه د ټولو امریکایي ځواکونو وتل هغه ضرب‌الاجل دی چې د ۲۰۲۰ کال په فبرورۍ کې د امریکا متحده ایالاتو او طالبانو ترمنځ تړون کې موافقه ورباندې وشوه. هغه مهال ډونالد ټرمپ د امریکا ولسمشر و.

طالبان ټینګار کوي چې امریکا باید پر خپله ژمنه عمل وکړي.

د افغان سولې بهیر کې د ښځو پر بشپړې ونډې د ځینو بهرنیو ډيپلوماتانو ټینګار

ارشیف، یو شمېر افغان مېرمنې

په کابل کې ځینو بهرنیو ډیپلوماټانو ویلي د ښځو له بشپړې او مؤثرې ونډې پرته به تل‌پاتې سیاسي جوړجاړی او د افغانستان بیارغونه ناشونې وي.

کابل کې د امریکا سفارت شارژدافیر راس وېلسن د دغو ډیپلوماټانو ګډه اعلامیه په خپل ټوېټر خپره کړې ده.

په کابل کې د امریکا، ملګرو ملتونو، اروپايي ټولنې، بریتانیا، اسټرالیا، ډنمارک، هالنډ او ترکیې له سفیرانو او استازو جوړه دا ډله له افغان ښځو د کابل مېشتو سفیرانو د ملاتړ ګروپ نومېږي.

د دې ګروپ په اعلامیه کې راغلي د سولې مذاکرات په حساس پړاو کې دي، نو ټولې خواوې باید د تصمیم نیونې په بهیرونو کې ښځو ته د مستقیم غړیتوب او سلا مشورو زمینه برابره کړي.

له دې مخکې د بشري حقونو د څار نړیول سازمان له ملګرو ملتونو غوښتي و چې د افغان سولې په پروسه کې د ښځو د لا زیاتې ونډې لپاره هڅه وکړي.

بهرنیو ډیپلوماټانو داسې وخت د افغان سولې په پروسه کې د ښځو لا زیات ګډون غوښتی چې له دې مخکې د افغانستان د سولې په مذاکراتي ټیم او د مسکو په غونډو کې ښځو ته په لږه ونډه نیوکې شوي.

نور راوښيه

XS
SM
MD
LG