د لاسرسۍ وړ لېنکونه

تازه خبر
جمعه ۸ کب ۱۳۹۹ کابل ۰۸:۱۲

افغانستان

فراه کې پر افغان ځواکونو د ماین چاودنې یو سرتیری وژلی

د فراه د محبس د یوه مسوول په موټر کې ځای پر ځای شوي ماین چاودنه وکړه

په فراه ولایت کې پرون جمعه (د سلواغې ۱۰مه) د افغان ځواکونو پر یوه موټر چاودنه شوې چې په کې یو افغان سرتیری وژل شوی دی.

د فراه امنیه قوماندان غلام سخي غفوري ازادي راډیو ته ویلي چې جمعې ماښام شپږ بجې د فراه د محبس د یوه مسوول په موټر کې ځای پر ځای شوي ماین چاودنه وکړه چې په کې د پولیسو یو سرتیری ووژل شو.

تر اوسه هېڅ وسله والې ډلې ددې پېښې پړه نه ده منلې.

تېره اوونۍ هم د فراه د ولسي پاڅون د ځواکونو په یوه موټر او تر هغه مخکې د استېناف څارنوالۍ د یوه کارکوونکي د کور مخته د ماین چاودنو تلفات اړولي و.

د ورځې تازه خبرونه دلته ولولئ

سرپل کې یو ورزشي جمنازیوم ګټې اخیستنې ته وسپارل شو

شبرغان ښار کې ورزشي جمنازیوم

په سرپل ولایت کې د ۵۰ ملیونو افغانیو په لګښت یو ورزشي جمنازیوم ګټې اخیستنې ته وسپارل شو.

د سرپل والي قربانمراد وویل، دغه جمانزیوم په ۱۹۵۰ متره مربع ځمکه کې په عصري ډول جوړ شوی چې په یو وار د ۱،۵۰۰ نندارچیانو ځای لري.

دغه جمنازیوم د جمهوري ریاست د ملي پراختیا برنامې له لوري جوړ شوی.

د اسیا ملتونو جام کې د افغانستان فوټبال ملي ټیم درېیو لوبو وختونه تغییر شول

د افغانستان فوټبال فدراسیون لوبغالی

د افغانستان د فوټبال ملي ټیم درېیو لوبو وختونه د کرونا ویروس د ګواښونو له امله تغییر شول.

د افغانستان فوټبال فدراسیون ویاند فیروز مشعوف نن ازادي راډیو ته وویل چې د اسیا فوټبال کنفدراسیون د پرېکړې له مخې د اسیا د ملتونو جام په سیالیو کې د افغانستان ملي لوبډلې لوبېدا انتخاب شاته ولوېد.

د ښاغلي مشعوف په خبره دغه سیالۍ به د مارچ میاشت کې نه، بلکې د جون په میاشت کې د (اې) ډلې په یوه هېواد کې وشي.

د (اې) ډلې اسیا ملتونو جام ۲۰۲۳ کال کې کېږي چې د قطر، عمان، افغانستان، هند او بنګله‌دېش لوبډلې شاملې دي.

نامعلومو وسله‌والو د غزني ولایت مقام د جلساتو مدیر وواژه

د غزني ولایت مقام د جلساتو مدیر محمد موسی اخلاقي

د غزني ولایت یو چارواکی نن په یوه وسله‌وال برید کې ووژل شو.

د غزني د والي ویاند واحدالله جمعه‌زاده نن پنجشنبه ازادي راډیو ته وویل چې د ولایت د جلساتو مدیر محمد موسی اخلاقي نن ماسپښین د غزني ښار اړوند د امیر محمد خان کلا سیمه کې ووژل شو. ویاند زیاتوي چې پر اخلاقي او زوی یې د بې‌غږه تومانچې ډزې شوي.

ښاغلی جمعه‌زاده زیاتوي: "ناپېژانده وسله‌والو د غزني ولایت د مقام د غونډو تنظیموونکی مدیر ښاغلی محمد موسی خان اخلاقي د بې‌غږه تومانچې په ډزو شهید کړی دی او په پېښه کې د هغه زوی ټپي شوی دی."

له دې مخکې ۲۰۳ تندر قول اردو وویل، طالبانو تېر ماښام د اندړو ولسوالۍ د وړې ارزو او غټې ارزو سیمو پر پوستو د برید پلان درلود، خو افغان ځواکونو په ځوابي حملو کې ۳۲ تنه طالبان وژلي او ۱۰ نور یې ټپیان کړي دي.

تندر قول اردو: غزني کې ۳۲ وسله‌وال طالبان ووژل شول او ۱۰ نور ټپيان دي

ارشیف، غزني کې د افغان ځواکونو عملیات

ملي اردو په غزني ولایت کې پر طالبانو د افغان ځواکونو په ځوابي حملو کې د دې ډلې د ۴۲ وسله‌والو د مرګ‌ژوبلې خبر ورکوي.

د ۲۰۳ تندر قول اردو ویاند اېمل خان مومند نن رسنیو ته په یوه استولي بیان کې وویل: "د ګډو امنیتي ځواکونو په متقابلو ډزو کې ۳۲ تنه طالبان وژل شوي او ۱۰ نور یې ټپیان شوي. همدراز له چاودېدونکو موادو ډک یو موټر چې د برید لپاره چمتو شوی و او یوه اندازه وسلې او مهمات‌یې له‌منځه وړل شوي."

ښاغلی مومند زیاتوي چې په دې جګړه کې درې افغان سرتېري هم ټپيان شوي.

طالبانو په دې اړه تر اوسه څه نه‌دي ویلي.

لغمان او ننګرهار کې دوو فابریکو په کار پیل وکړ

ارشیف، عکس تزئیني بڼه لري

په لغمان ولایت کې د ایوډین لرونکي مالګې او په ننګرهار کې د پلاستیکي توکو د تولید فابریکو په کار پیل وکړ.

د افغانستان د صنعت او سوداګرۍ وزارت له لوري په خپره شوې اعلامیه کې راغلي، په لغمان کې لومړنۍ د مالګې فابریکه ده چې په یو جریب ځمکه کې د ۶۰ زره ډالرو په پانګونې سره جوړه شوې او په یوه شپه او ورځ کې د یو ټن ایوډین لرونکې مالګې د تولید وړتیا لري.

دغه فابریکه خپل خام مواد د بلخ ، فاریاب او تخار ولایتونو د مالګې کانونو څخه ترلاسه کوي.

د اعلامیې له مخې په ننګرهار ولایت کې د پلاستیکي توکو یوه فابریکه د ۵۰ زره امریکايي ډالرو په پانګونې سره جوړ شوې او تېره ورځ یې په کار پیل وکړ.

دغه فابریکه، بېلابېلي پلاستیکي توکي، ګلدانونه،پلاستیکي جګ او ګیلاسونه تولیدوي چې د اړتیا وړ اومه توکي هم د هېواد دننه موادو څخه ترلاسه کوي.

افغانستان ازبېکستان ته د وچې مېوې صادرات پيل کړل

د افغانستان وچه میوه

د افغانستان د کرنې او مالدارۍ وزارت وايي چې ازبېکستان ته یې د وچې مېوې صادرات پيل کړل.

د دغه وزارت ویاند اکبر رستمي نن پنجشنبه (د کب ۷مه) ازادي راډیو ته وویل چې د ایرا فورټ په نامه د یو کورني شرکت په همکاري دا صادارت پيل شول.

د ښاغلي رستمي په خبره تېره ورځ لومړۍ جوپه د ۶۰ زرو امریکايي ډالرو په ارزښت ۶۰ ټنه سره ممیز ازبېکستان ته صادر شول.

څو ورځې وړاندې هم افغان دولت ۱۴ ډوله وچه مېوه هم کاناډا ته صادر کړه، د افغانستان وچې مېوې نړۍ کې ښه بازار موندلای.

افغانستان په سیمه کې د وچې مېوې یو مهم تولیدونکی هېواد دی چې د کال په اوږدو کې سیمې او نړۍ ته بېلابېل زرګونه ټنه وچه مېوه صادروي.

اروپايي ټولنې او افغان حکومت پر ۳ موضع ګانو بحث وکړ

د افغانستان او اروپايي ټولنې ګډ بیرغونه

اروپايي ټولنې او د افغانستان حکومت پر بشري حقونو، ښې حکومتوالۍ او کډوالۍ د خپلو کاري ډلو درېیمه مجازي غونډه کې بحث وکړ.

په دې غونډه کې چې پرون چهارشنبه (د کب ۶مه) وشوه، په دغو درېیو برخو کې د پرمختګونو او ستونزو په اړه بحث وشو.

د دې غونډې د ګډې اعلامیې له مخې، تر ډېره د رسنیو د کار کوونکو، مدني فعالانو او د قانون د تنفیذ پر چارواکو پر هدف وژنو تمرکز وشو.

اروپايي ټولنې د افغانستان له حکومته غوښتنه کړې چې د دغو فعالانو امن خوندي کړي او هغه کسان محاکمه کړي چې په دغسې هدفي وژنو کې لاس لري.

د پښتني بانک پخوانی مشر او ۳ کار کوونکي په بند محکوم شول

ارشیف، په کابل کې د پښتني بانک یوه څانګه

د افغانستان د پښتني بانک پخوانی مشر او درې کار کوونکي په تنفیذي بند او هر یو په ۹۰۰زره امریکايي ډالرو نقدي جریمې محکوم شول.

د اداري فساد د لویو جرمونو پرضد د مبارزې عدلي او قضايي مرکز پرون چهارشنبه(د کب ۶مه) د محاکمې پر مهال د پښتني بانک پخوانی مشر حیات الله دیاني په شپږو کلونو او شپږو میاشتو تنفیذي بند محکوم کړ.

د دغه بانک درې نور کارکوونکي د تزویر، له قدرته د ناوړه استفادې او د ۹۰۰زره امریکايي ډالرو اختلاس په تور په څه باندې پنځو کلونو بند محکوم شول.

دغه څلور واړه هر یو د۹۰۰زره امریکايي ډالرو معادل نغدي جریمې په ورکړه هم محکوم شول.

محمد حنیف اتمر مسکو کې له روسي چارواکو سره پر افغان سولې غږېږي

د افغانستان د بهرنیو چارو وزیر محمد حنیف اتمر

د افغانستان د بهرنیو چارو وزیر به په مسکو کې د روسیې له عالي رتبه چارواکو سره د افغانستان پر سوله او نورو موضوعاتو خبرې وکړي.

محمد حنیف اتمر د خپل روسي سیال سرګي لاوروف په رسمي بلنه پرون چهارشنبه(د کب ۶مه) په درې ورځني سفر روسیې ته لاړ.

د بهرنیو چارو وزارت ویاند ګران هېواد ازادي راډیو ته وویل: "د دې سفر موخه د افغانستان د سولې په هکله د دوه-اړخیزو اړیکو پیاوړتیا، د سیمه ییزې او نړیوالې اجماع پیاوړتیا او د دواړو هېوادونو ترمنځ د اقتصادي، سیاسي او امنیتي همکاریو پراختیا ده."

دا سفر په داسې وخت کې کېږي چې تېره اوونۍ د افغانستان لپاره د روسیې ځانګړي استازي ضمیر کبلوف د سولې لپاره په افغانستان کې د یوه انتقالي ایتلافي حکومت د جوړېدو وړاندیز کړی و.

د افغانستان د بهرنیو چارو وزارت په یوه اعلامیه کې د دې پر وړاندې تُند غبرګون ښکاره کړ او دا وړاندیز یې له اوسنیو واقعیتونو سره په ټکر کې وباله.

دفاع وزارت د امریکا د ۶۴۰ جنګي وسایطو مرسته مهمه وبلله

د امریکا متحده ایالاتو د ملي دفاع وزارت ته ۶۴۰ جنګي وسایط وسپارل

د افغانستان دفاع وزارت، له دغه وزارت سره د امریکا د ۶۴۰ جنګي وسایطو مرسته مهمه وبلله.

د دغه وزارت ویاند روح الله احمدزي پرون چهارشنبه (د کب ۶مه) ناوخته ازادي راډیو ته وویل: "د امریکا متحدو ایالاتونو د افغانستان له ملي دفاع وزارت سره د ۶۴۰ جنګي وسایطو مرسته وکړه. موږ د دوی د دغو مرستو مننه کوو. له دغو وسایطو او تجهیزاتو به د امنیت د ښه والي او ټینګښت په برخه کې ګټه واخېستل شي."

د دفاع وزارت په حواله په دغو وسایطو کې چې پرون دفاع وزارت ته وسپارل شول، ۴۰۳ هاموې، ۴۳ رنجرونه، ۲۳ امبولانسونه او ۱۷۰ موټرسایکلونه شامل دي چې ټولو قول اردوګانو ته به ولېږل شي.

ارزګان کې د ورا یو موټر ۱۰ مسافر سیند کې د بند پاتې کېدو له امله مړه شوي

د افغانستان په عمومي نقشه کې ارزګان ولایت

په ارزګان کې د ورا یو موټر په سیند کې بند پاته شوی چې له کبله‌یې په‌کې سپاره ۱۰ تنه مړه شوي دي.

د ارزګان د والي له دفتره خپره شوې خبرپاڼه وایي، دغه موټر په ګېزاب ولسوالۍ کې تېره ورځ هغه مهال اوبو کې بند شو چې د هلمند له سينده تېرېده.

په خبرپاڼه کې راغلي، د موټر ماشین بخار کړی و او تر هغو چې خلک د مرستو لپاره ور رسېدل، په‌کې سپاره څلور ماشومان او ۶ ښځې مړه شوي ول.

تر اوسه معلومه نه‌ده چې د موټر دننه کسانو د اکسیجن د کموالي او که موټر ته د اوبو د ورننوتو له کبله ساه ورکړې ده.

موټر چلوونکی له دې پېښې ژوندی وتلی دی.

د غزني چارواکي: نامعلومو وسله‌والو د موبایلونو یو معلول انجنیر وواژه

چارواکي وايي، په غزني کې د موبایلونو یو انجنیر نامعلومو وسله‌والو په دې خاطر وژلی چې د سرتېرو موبایلونه‌یې جوړول.

د والي ویاند واحدالله جمعه‌زاده د چهارشنبې (د کب ۶مه) په ورځ ازادي راډیو ته وویل، شکرالله نن سهار د خپل کور ترڅنګ وژل شوی دی.

ښاغلی جمعه‌زاده زیاتوي: "د غزني ولایت مرکز اړوند د خشکو په سیمه کې ناپېژانده وسله‌والو یو انجنیر چې د غزني ښار په بزازي سیمه کې یې د موبایلونو دکان درلود، له دې امله په شهادت رسولی چې ګواکې ده د دولتي کسانو او امنیتي ځواکونو موبایلونه جوړول."

شکرالله په کوچنیوالي کې ګوزڼ وهلی وو چې دا وخت په پښو معلول وو.

تر اوسه د دغې پېښې مسؤلیت چا نه‌دی منلی.

دا په داسې حال کې ده چې په غزني کې د هدفي وژنو لړۍ له تېرو ۱۲ کالو څخه روانه ده.

دفاع وزارت: کندهار کې ۴۲ طالبان وژل شوي او ۸ نور ټپیان دي

ارشیف،افغان ځواکونه د عملیاتو پر مهال

د افغانستان دفاع وزارت وایي، ځواکونو یې کندهار کې ۴۲ طالبان وژلي او ۸ نور یې ټپیان کړي دي.

دغه وزارت په یوه خبرپاڼه کې ویلي چې د دولت دغه مخالفان تېره ورځ په میانشین، پنجوایي او ارغنداب ولسوالیو کې د عملیاتو پر مهال وژل شوي.

خبرپاڼه کې ویل شوي چې د عملیاتو پر مهال د ارغنداب او میوند ولسوالیو له شااوخوا سیمو څخه د طالبانو ۳۵ کړۍ ماینونه هم کشف او شنډ شوي دي.

طالبانو تر اوسه د دفاع وزارت د دغې ادعا په اړه څه نه دي ویلي.

طالبانو په یوه جلا خبرپاڼه کې د بلخ په چهاربولک او شولګر ولسوالیو کې د ۱۸ افغان سرتېرو د وژنې ادعا کړې ده.

تراوسه دولتي سرچینو په دې اړه څه نه دي ویلي.

افغان چارواکي او طالبان تل یو بل ته د دغسې درنې مرګ ژوبلې اړولو ادعا کوي، خو خپلواکې سرچینې یې ډېر کله تایید او یا هم رد نه شي کولای.

ناټو: افغانستان کې دې تاوتریخوالی ودرېږي څو سولې ته لاره هواره شي

ارشیف

ناټو یو ځل بیا وویل چې افغانستان کې باید تاوتریخوالی ودرېږي چې سولې ته لاره هواره شي.

ناټو پر خپله رسمي ټویټرپاڼه لیکلي، د ملګرو ملتونو وروستی راپور څرګندوي چې د افغانستان د دولت ضد مخالفان د ډېرې ملکي مرګ ژوبلې عاملان دي.

په افغانستان کې د ملګرو ملتونو مرستندوی ماموریت یوناما خپل کلني راپور کې وویل چې ۲۰۲۰ کال کې د ملکي مرګ ژوبلې ۶۲ سلنه عاملان وسله وال مخالفان وو.

دوی دې کال کې د ۴۵ سلنې مرګ ژوبلې نسبت طالبانو، ۸ فیصده داعش او ۹ سلنې نسبت نورو دولت ضد کړیو ته کړی دی.

د افغانستان دولت وایي، طالبان تر دې هم زیات ملامت دي، خو طالبانو بیا د ملګرو ملتونو راپور یو اړخیز بللی دی.

د پښتو ژبې نومیالی شاعر او لیکوال عبدالرحیم روغانی ومړ

ارشیف، عکس تئزيني بڼه لري

د پښتو ژبې نومیالي شاعر او لیکوال عبدالرحیم روغاني له اوږدې ناروغۍ وروسته د ۷۱ کلنۍ په عمر له نړۍ سترګې پټې کړې.

عبدالرحیم روغاني د پښتو په اوسنیو شاعرانو کې یو له هغو وو چې زیاتې قطعې یې لیکلې دي.

روغاني لومړنۍ زده کړې په خپله سیمه سوات کې کړې وې او وروسته یې په پښتو ژبه کې د ماسټرۍ تر کچې زده کړې مخته یوړې.

د روغاني په شاعري‌ کې ولسي رنګ زیات دی ځکه خو یې ډېر شعرونه مشهورو سندرغاړو هارون باچا، سردار علي ټکر او نورو له موسیقۍ سره ویلي دي.

له نوموړي ګڼ شعري او نثري اثار پاتې دي چې ( نوې نغمه، ځوریدلي احساسات، سندریز احساس، د رڼا څاڅکي) یې شعري ټولګې او ( کوربانه خیالونه او خود غرض) یې نثري کتابونه دي.

نور راوښيه

XS
SM
MD
LG