د لاسرسۍ وړ لېنکونه

تازه خبر
دوشنبه ۱۱ کب ۱۳۹۹ کابل ۱۰:۴۶

خبرونه

چارواکي: غزني او بغلان کې ۱۹ وسله‌وال طالبان ووژل شول

ارشیف، غزني کې د افغان ځواکونو عملیات

د ۲۰۳ تندر قول اردو د غزني په قره‌باغ ولسوالۍ کې د وسله‌والو طالبانو د بریدونو د په شا تمبولو او دې ډلې ته د درنې مرګ‌ژوبلې خبر ورکوي.

د دې قول اردو د مطبوعاتو د برخې مسؤل ایمل خان مومند رسنیو ته په یوه صوتي پیغام کې ویلي: "تېره شپه ترهګرو طالبانو د غزني ولايت د قره‌باغ ولسوالۍ اړوند د «چوک زردالو» سیمه کې د دفاعي او امنیتي ځواکونو په پوستو ډله‌ییز بریدونه وکړل. دغه بریدونه د ګډو دفاعي، امنیتي او هوایي ځواکونو د کلک غبرګون په پایله کې په مکمل ډول د ماتې سره مخ او په شا وتمبول شول چې د ګډو امنيتي او دفاعي ځواکونو د متقابلو ډزو په پایله کې ۱۳ تنه طالبان وژل شوي او د یوه ډل‌مشر په ګډون‌یې ۹ تنه ټپيان شوي."

د ښاغلي مومند په وینا د افغان ځواکونو د متقابلو بریدونو په پایله کې دغه‌راز یو اندازه وسلې او مهمات او د څو تنو طالبانو جسدونه چې د جګړې په ډګر پاتې و د دفاغي ځواکونو لاسته ورغلي.

وسله‌والو طالبانو تر اوسه په دې اړه څه نه‌دي ویلي.

د یوه بل خبر له مخې د بغلان امنیتي چارواکي د دې ولایت او پلخمري د لویې لارې په اوږدو کې د افغان ځواکونو د ګډو عملیاتو په پایله کې د ۶ طالبانو د وژل کېدو او اوو نورو د ټپي کېدو خبر ورکوي.

د بغلان امنیه قوماندان محمد ویس صمیمي نن رسنیو ته په یوه استولې خبرپاڼه کې دغه‌راز ویلي چې په وژل شویو کې د طالبانو دوه ماین خښوونکي هم شامل دي.

هغه ویلي دغه نښتې هغه مهال پیل شوې چې افغان ځواکونو د دې لارې په اوږدو کې پنځه امنیتي پوستې اچولې او طالبانو یې د مخنیوي هڅې وکړې.

د ورځې تازه خبرونه دلته ولولئ

زلمی خلیلزاد دوحې، کابل او یو شمېر نورو ښارونو ته تازه سفر پيلوي

د افغان سولې لپاره د امریکا ځانګړی استازی زلمی خلیل‌زاد

د افغانستان د سولې لپاره د امریکا ځانګړی استازی زلمی خلیلزاد دوحې، کابل او یو شمېر نورو ښارونو ته تازه سفر پيلوي.

دا خبره د امریکا د بهرنیو چارو وزارت پرون په یوه خبرپاڼه کې کړې ده.

خبرپاڼه کې راغلي، خلیلزاد به له افغان چارواکو، مشرانو، طالب استازو او د هغو هېوادونو له چارواکو سره خبرې له سره پيل کړي چې د افغانستان په عادلانه او دوامداره سیاسي جوړجاړي او دایمي او هر اړخیز اوربند کې یې ګټې نغښتې دي.

خلیلزاد یو کال وړاندې په دوحه کې د طالبانو له مرستیال او د سیاسي دفتر له مشر ملا عبدالغني برادر سره (افغانستان ته د سولې راوستلو) په نوم د دوحې هوکړه لاسلیک کړه.

د نوموړي دا سفر داسې مهال پیلېږي چې افغان دولت د دوحې هوکړه ګټوره نه‌بولي او ویلي یې دي، دغې هوکړې له وخت ضایع کولو پرته افغانانو ته بل څه نه‌دي ورکړي.

طالبان بیا دا هوکړه ګټوره بولي او وایي، امریکایي لوری باید پرې ودرېږي.

چین له افغانستان سره د کرونا ضد دوه لکه دوزه نور واکسین مرسته کوي

د چین کرونا ویروس ضد سینوفارم واکسین

د افغانستان عامې روغتیا وزارت وایي، چین پرون ورسره د نورو کرونا ضد دوه لکه دوزه واکسین د مرستې ژمنه وکړه.

دا خبره د دې وزارت مرستیال ویاند میرویس عليزي تېره شپه ازادي راډیو ته وکړه او ویې‌ویل: "د چین سفیر چې د افغانستان د عامې روغتیا له وزیر سره ناسته درلوده، له افغانستان سره‌یې د ۲۰۰ زره نورو واکسینو د مرستې ژمنه وکړه چې په دې سره د هغو واکسینو چې چین‌یې له افغانستان سره د مرستې ژمنه کوي، څلور لکه دوزو ته رسېږي."

له دې مخکې د کواکس نړیوال ائتلاف هم له افغانستان سره د درې ملیون دوزه واکسین د مرستې ژمنه کړې ده.

د علیزي په وینا تر اوسه پورې یې له اتو زرو زیاتو کسانو ته د کرونا ضد واکسین لومړي دوزه ورکړي دي.

دا د استرازینیکا د واکسین هغه پنځه لکه دوزه دي چې هند له افغانستان سره مرسته کړې ده.

ترکیه او افغانستان د خپلو ډیپلوماتیکو اړیکو سلمه کلیزه لمانځي

د افغانستان او ترکیې بیرغونه

ترکیه او افغانستان په خپلو کې د ډیپلوماتیکو اړیکو سلمه کلیزه لمانځي.

د هغې اعلامیې له مخې چې د ترکیې د بهرنیو چارو وزارت پرون یکشنبې خپره کړې، ویل شوي چې د ترکیې د بهرنیو چارو وزیر مولود چاوش اوغلو به نن دوشنبه په انقره کې د افغانستان له سفیر امیر محمد رامین سره په ګډه د دې سفارت په انګړ کې نیالګي چې د دواړو هېوادونو د ملګرتیا سمبول دی، کېنوي.

د ترکیې د انادولیا خبري اژانس د راپور له مخې اوغلو به له هغې وروسته د وېډیو کنفرانس له لارې له کابل سره په دې مناسبت جوړو شویو مراسمو ته چې د هغه سیال د افغانستان د بهرنیو چارو وزیر حنیف اتمر به هم په‌کې ګډون کوي، وینا وکړي.

د افغانستان او ترکیې ترمنځ ډیپلوماتیکې اړیکې د ۱۹۲۱ کال د مارچ په لومړۍ نېټه د دواړو هېوادونو ترمنځ د یوه ائتلاف د تړون په لاسلیک کېدو سره ټینګې شوې.

ترکیه هم لومړنی هېواد و چې په ۱۹۱۹ کال د افغانستان له خپلواکۍ وروسته‌یې په کابل کې سفارت پرانیست.

د راپور له مخې افغانستان هم دوهم هېواد دی چې هغه مهال چې ترکیې د خپلواکۍ لپاره جګړه مخ ته وړله د ترکیې عالي ملي اسامبله‌یې په رسمیت پېژندلې وه.

د ښځو عالي شورا خپله لومړۍ غونډه په ارګ کې وکړه

ارګ کې د ښځو عالي شورا لومړۍ غونډه

د ښځو د عالي شورا لومړۍ غونډه پرون یکشنبه په ارګ کې جوړه شوه.

د ولسمشرۍ ماڼۍ په یوه ټویټ کې ویلي چې په دې غونډه کې چې ولسمشر اشرف غني او د هغه مېرمنې رولا غني حضور درلود، د دې شورا د فعاليتونو د څرنګوالي، د سولې پروسې او له جمهوريت څخه د ملاتړ په اړه له ښځو سره د مشورتي ناستو راپور وړاندې شو.

په دې اړه نور جزئیات نه‌دي ورکړل شوي، خو تر دې څه موده وړاندې د ولسمشرۍ ماڼۍ په خپله وېب‌پاڼه کې ویلي وو، د ښځو عالي شورا به ۲۶ دايمي غړي لري چې دولتي ادارې، د ښځو د حقونو مدافع بنسټونه، مدني ټولنې او نور د ښځو چارو اړوند لوري به په‌کې شامل وي.

د جمهوري ریاست په وینا په افغانستان کې د ښځو د عالي شورا له رامنځته کېدو هدف دا دی چې د یو لړ نورو مسایلو په ګډون چې د ښځو په ژوند کې بدلون راوستی شي، ښځې پیاوړې شي، حقونه‌یې خوندي او پراختیا ورکړل شي.

د افغانستان کرکټ ملي لوبډله سبا له زېمبابوې سره د لوبو لړۍ پيلوي

ارشیف، د افغانستان د کرکټ ملي لوبډله

د افغانستان د کرکټ ملي لوبډله به سبا سې شنبه د زېمبابوې د کرکټ له ملي لوبډلې سره د دوو ټېسټ لوبو او درې ۲۰ اووره لوبو مسابقې پیل کړي.

د افغانستان کرکټ بورډ وايي د دغو لوبو لپاره‌یې ښه چمتووالی نیولی دی.

د کرکټ بورډ ویاند فرید هوتک ازادي راډیو ته وویل: "د افغانستان او زېمبابوې د کرکټ ملي لوبډلو ترمنځ به په متحده عرب اماراتو کې د افغانستان په کوربه‌توب دوه ټېسټ لوبې وشي. د ویلو ده چې د دغو لوبو لپاره د افغانستان د کرکټ ملي لوبډله پوره چمتووالی لري."

د افغانستان او زېمبابوې ترمنځ به لومړۍ ۲۰ اووره مسابقه د مارچ میاشتې پر ۱۷مه وشي.

ایران له امریکا او اروپایي قدرتونو سره د خبرو لپاره د غونډې وړاندیز رد کړ

د تهران ښار یوې څنډه کې د ایران بیرغ

ایران پرون د امریکا له متحده ایالاتو او له اروپایي قدرتونو سره د ۲۰۱۵ کال د تړون د احیا پر سر د خبرو لپاره د غیر رسمي غونډې وړاندیز رد کړ.

تهران ټینګار وکړ چې واشنګټن دې لومړی ټول یو اړخیز بندیزونه لیرې کړي.

د ایراني رسنیو د راپور له مخې د ایران د بهرنیو چارو وزارت ویاند سعید خطیب‌زاده وویل، هغو وروستیو اقداماتو او ویناوو ته په پام چې متحده ایالاتو او درې اروپایي قدرتونو کړي، ایران داسې نه‌انګېري چې اوس دې له دغو هېوادونو سره د غیر رسمي غونډې لپاره چې د اروپایي ټولنې د بهرني سیاست مشر یې وړاندیز کړی، مناسب وخت وي.

ایراني چارواکو له دې مخکې ویلي چې تهران د جوزف بورېل پر دغه وړاندیز غور کوي.

د امریکا پخواني ولسمشر ډونالد ټرمپ خپل هېواد په ۲۰۱۸ کال له دغه تړونه وایست او پر تهران‌یې بېرته بندیزونه ولګول.

ایران او د امریکا د ولسمشر جو بایډن نوې اداره په دې اړه چې د دغه تړون د احیا لپاره څوک باید لومړی ګام پورته کړي، سره اختلاف لري.

پاکستان کې په یوه وسله‌وال برید کې یو مذهبي مشر ووژل شو

ارشیف، د پاکستان پولیس

د پاکستان پولیس د پلازمېنې اسلام‌اباد په یوه څنډه کې په یوه وسله‌وال برید کې د یوه مذهبي مشر د وژل کېدو خبر ورکوي.

پولیسو وویل، په دې پېښه کې چې د شنبې په ورځ د بهارا کاهو په سیمه کې شوې، له مفتي اکرام‌الرحمن سره د هغه ۱۳ کلن زوی او یو زده‌کوونکی هم وژل شوي دي.

د پولیسو په وینا وسله‌والو په مفتي رحمن هغه مهال برید وکړ چې د خپل موټر پر لور روان و.

تر اوسه چا یا کومې ډلې د دغه برید مسؤلیت نه‌دی اخیستی.

اکرام‌الرحمن د مولانا فضل‌الرحمن په مشرۍ د جمعیت علمای اسلام په ګوند پورې تړلی و. مولا فضل‌الرحمن د اپوزېسیون د ۱۱ ګوندي ائتلاف چې هدف‌یې د حکومت نسکورول دي، مشري کوي.

چک ممکن د اروپایي ټولنې له تأیید پرته د روسیې کرونا ضد واکسین تطبیق کړي

ارشیف، د روسیې کرونا ویروس ضد واکسین سپوتنیک-وي

د چک جمهوريت صدراعظم اندري بابیش وایي، هېواد یې ممکن د اروپایي ټولنې د درملو د ادارې له تأیید پرته د روسیې د کرونا ضد سپوتنیک-وي واکسین استعمال ته اجازه ورکړي.

بابیش دغه څرګندونې پرون یکشنبې له «CNN Prima News» سره په مرکه کې وکړې او ویې‌ویل، د اروپایي ټولنې د درملو ادارې «EMA» ته منتظر نه‌شي پاتې کېدای ځکه روسیې ورته د خپل واکسین د تأیید لپاره درخواستي نه‌ده وړاندې کړې.

هغه زیاته کړه، د چک د درملو د ادارې تأیید به کافي وي چې په هېواد کې د روسیې د سپوتنیک-وي واکسین تطبیق ته اجازه ورکړي.

چک جمهوریت چې د نړۍ په کچه پر 'کووېډ-۱۹' ناروغۍ د اخته شویو کسانو شمېر په‌کې زیات دی، تر اوسه‌یې خپلو نږدې شپږنیم لکه وګړو ته د کرونا ضد فایزرـبایو ان تیک، مودرنا او استرازینیکا واکسینونه ورکړي دي.

دا هېواد شاوخوا ۱۰ ملیونه او اووه لکه نفوس لري چې تر اوسه په‌کې د کرونا له امله له ۲۰ زرو زیات کسان مړه شوي او له یو ملیون ۲۳۵ زرو زیات کسان پرې اخته شوي دي.

په دې هېواد کې په دې وروستیو کې د 'کووېډ-۱۹' مثبتې پېښې ډېرې زیاتې شوي چې شمېر یې په تېرو ۲۴ ساعتونو کې نږدې اتو زرو ته رسېدلی.

د چک جمهوريت صدراعظم دغه‌راز وویل چې هېواد به‌یې د چینایي سینوفارم واکسین په وړاندې هم ورته تګلاره غوره کړي.

ترکیې او ایران د یو بل سفیران ور احضار کړي

د ایران او ترکیې ګډ بیرغونه

ترکیې او ایران د یو بل سفیران ور احضار کړي دي.

د ترکیې دولتي اژانس راپور ورکړی چې د بهرنیو چارو وزیر مولود چاوش اغلو د ایران سفیر محمد فرازمند ور غوښتی او له هغه یې غوښتي چې له ترهګرۍ سره په مبارزه کې د ترکيې تر څنګ ودریږي.

هاخوا ایران هم د ترکیې سفیر ور غوښتی او خپل اعتراض یې د ترکي چارواکو د هغو څرګندونو په غبرګون ور اورولی چې ویلي یې و زرګونه د 'پي.کې.کې' د کردانو کارګر ګوند غړي په ایران کې حضور لري.

دا ګوند د ترکیې له خوا یو ترهګر ګوند بلل شوی چې وخت پر وخت یې په عراق او سیمه کې پر سنګرونو عملیات هم ورته کوي.

د دغه ډیپلوماټیک جنجال یوه بل عامل هم په عراق کې د ایران او ترکیې د سفیرانو تر منځ شخړه ده.

د ایران سفیر ایرج مسجدي د عراق له یوه کُرد ژبي ټلوېزیون سره په مرکه کې ویلي و چې ایران په عراق باندې د ترکیې د بریدونو خلاف دی.

د مسجدي د دغو خبرو په غبرګون د ترکیې سفیر فاتح یلدیز په ټوېټر لیکلي: "فکر کوي وروستی کس چې د عراق پولو ته د درناوي درس ورکوي د ایران سفیر به وي."

د برما پولیسو ۷ مظاهره چیان وژلي او ګڼ نور یې ټپیان کړي

برما کې پر مظاهره چیانو ډزې شوي

د برما پولیسو نن یکشنبه(د کب ۱۰مه) پر مظاهره چیانو ډزې کړي، اووه کسان یې وژلي او ګڼ نور یې ټپیان کړي.

رویټرز اژانس راپور ورکړی پولیسو وروسته له هغه په مظاهره چیانو مخامخ ډزې کړي چې صوتي بمونو، اوښکو بهوونکو ګازونو او هوايي ډزو د هغوی د خورولو لپاره کار ورنه کړ.

په مرکزي ښار یانګون او ځینو نورو ښارونو کې د پولیسو له خوا دا زور زیاتی او په نتیجه کې یې د خلکو مرګ ژوبله تر ټولو خونړۍ او بې سارې بلل شوې ده.

خلک له څو اوونیو راهیسې د پوځي کودتا په غبرګون مظاهرې کوي او هر وار د امنیتي ځواکونو له تُند عکس العمل سره مخ کېږي.

په برما کې حالت د فبروري له لومړۍ راهیسې ګډوډه ده، ځکه پوځیانو کودتا وکړه او د حکومت مشره انګ سان سوچي او ګڼ نور دولتي چارواکي یې بندیان کړل.

د پوځ مشرانو د انګ سان سوچي په مشرۍ ګوند په پارلماني ټاکنو کې په درغلیو تورن کړ او د کودتا په مټ یې ټول واک په خپل لاس کې واخېست.

د برما پوځي چارواکو د ملګرو ملتونو او نړیوالې ټولنې له غوښتنو سربېره د مظاهره چیانو ځپلو ته دوام ورکړی دی.

غزني کې چاودنې یو کس وژلی او ۷ نور یې ټپیان کړي

ارشیف، عکس تئزیني بڼه لري

د غزني چارواکي وايي، یوې چاودنې نن یکشنبه (د کب ۱۰مه) یو کس وژلی او ۷ نور یې ټپیان کړي دي.

د والي ویاند واحدالله جمعه زاده ازادي راډیو ته وویل، چادونه نن تر غرمې وروسته د لومړۍ امنیتي حوزې اړوند په کلا سبز سیمه کې شوې ده.

هغه زیاته کړه چې د سړک غاړې دې ماین چاودنه کې وژل شوی کس ملکي وګړی دی او د ۷ ټپيانو په منځ کې دوه پوځیان او پاتې نور ملکیان دي.

جمعه زاده وویل، ښايي د مرګ ژوبلو شمېر ځکه لوړ لاړ شي چې شااوخوا د کورونو او ودانیو ښېښې ماتې شوي دي.

د پېښې پړه لا تر اوسه کومې وسله والې ډلې نه ده منلې.

د کوټې په ګډون ډېری پښتون مېشتو ښارونو کې کاربندیز اعلان شوی

ارشیف، عکس تئزیني بڼه لري

د عوامي نېشنل ګوند د بلوچستان ویاند اسد خان اڅکزي د وژنې پر ضد نن یکشنبه (د کب ۱۰) د کوټې په ګډون په زیاتره پښتون مېشتو ښارونو کې کاربندیز اعلان شوی دی.

عوامي نېشنل ګوند د خپل دې مخکښ د وژل کېدو پر ضد د ننني کاربندیز تر څنګ د درې ورځني ویر اعلان هم کړی دی.

د عوامي نېشنل ګوند د بلوچستان وياند اسد خان اڅکزي مړی د فبرورۍ پر ۲۷مه وموندل شو.

نوموړی د ۲۰۲۰میلادي کال په سېپټمبر کې له کچلاک سره نېږدې تښتول شوی و.

د عوامي نېشنل ګوند د بلوچستان مشرانو د فبرورۍ پر ۲۷مه مشال راډيو ته وويل چې د کوټې د پوليسو له خوا ورته وويل شو چې ځېنې برمته ګر يې نيولي دي.

د دوی په وینا، هغوی اقرار کړی چې اسد خان يې څو ورځې وړاندې وژلی او مړی يې په نوحصار سيمه کې په يوه کنده کې غورځولی دی.

اسد خان اڅکزی د کلا عبدالله ضلعې د مرکز چمن اوسېدونکی او د عوامي نېشنل ګوند د صوبايي‌ مشر اصغر خان اڅکزي د تره زوی وو.

عوامي نېشنل ګوند د اسد خان اڅکزي او د ده په شان د برمته کړل شوېو يو شمېر نورو کسانو د راخوشې کولو لپاره د فبرورۍ پر ۲۲مه په ټول پاکستان کې مظاهرې او احتجاجونه وکړل.

دوی د پاکستان له حکومت او امنيتي ادارو غوښتنه وکړه چې په زوره لادرکه کړل شوي ټول کسان دې راخوشې کړل شي يا دې عدالتونه ته وړاندې کړل شي.

کرکټ؛ افغانستان او زیمبابوې مارچ کې ۲ ټېسټ لوبې کوي

ارشیف، عکس تئزيني بڼه لري

ټاکل شوې افغان او زیمبابوې کرکټ ملې لوبډلې راتلونکې مارچ میاشت کې د دوو ټېسټ لوبو لړۍ ترسره کړي.

لومړۍ ټېسټ لوبه د مارچ په دوهمه او دوهمه ټېسټ لوبه بیا د مارچ په لسمه نېټه پيلیږي.

د تېرې شپې په لوبه کې لومړی زیمبابوې توپ وهنه وکړه چې د شپږو لوبغاړو په سوځېدو سره یې ۵۰۵ منډې وکړې او له هغه وروسته یې افغان ملې لوبډلې ته د توپ وهنې وار ورکړ.

د زیمبابوې لپاره کاسوزا ۱۲۹، ویلمس ۸۶، رضا ۷۴ او بورل بیا ۶۵ منډې جوړې کړې.

کله چې افغان لوبډلې توپ وهنه پيل کړه، نو د اتو لوبغاړو په سوځېدو سره یې ۲۷۱ منډې وکړې چې وروسته د لوبې د وخت پوره کېدو له امله او دا چې افغان لوبغاړي نا سوځېدلي پاتې وو د لوبې نتيجه مساوي اعلان شوه.

د افغان کرکټ ملې لوبډلې لپاره منیر احمد کاکړ ۱۲۹ ناسوځېدلې منډې، اصغر افغان ۵۰ منډې او افسر ځاځي بیا ۲۹ منډې جوړې کړې.

لوګر کې د فوټبال د 'ډي' درجې روزنیز کورس پیل شو

ارشیف، عکس تئزيني بڼه لري

په لوګر ولایت کې دفوټبال د 'ډي' درجې روزنیز کورس پیل شو.

د فوټبال فدراسیون روزونکي وحیدالله واحدي نن یکشنبه (د کب ۱۰مه) ازادي راډیو ته وویل چې دغه صنف نوېو روزونکو ته د زده کړې او پوهاوي لوړولو په هدف جوړ شوی.

نوموړي وویل چې دغه پروګرام چې نن پیل شوی شپږ ورځې به دوام وکړي.

د ښاغلي واحدي په وینا په یاد روزنیز پروګرام کې به ٢٤ روزونکي کې عملي او نظري زده کړې وويني.

ټاکل شوې چې د دغه پروګرام په پای کې غوره روزونکي د اسیا 'سي' کټګورۍ ته هم ور وپېژندل شي.

افغان سوک وهونکی قیس خادمي خپل بریتانوي سیال سره مخ کېږي

ارشیف، عکس تئزیني بڼه لري

ټاکل شوې چې افغان سوک وهونکی قیس خادمي نن (یکشنبه-د کب ۱۰مه) شپه له خپل بریتانوي سیال سره په لندن کې د سیالۍ ډګر ته ولاړ شي.

د افغانستان د سوک وهنې فدراسیون رئیس شکیب ستاري نن ازادي راډیو ته وویل چې خادمي د نړۍ د سوک وهنې سازمان یو له اتلو لوبغاړو شمېرل کېږي چې تر اوسه يې اته لوبې ګټلې دي.

ښاغلی ستاري وایې، دغه افغان لوبغاړی خپل بریتانوي سيال اعجاز احمد سره چې د 'ای‌،اېف.‌بي' کمربند لري او د ٧ لوبو ګټونکی دی، مخ کېږي.

د نوموړي په وینا یاده لوبه افغان لوبغاړي خادمي ته برخلیک ټاکونکی ده او که دا لوبه وګټې د نړۍ د ١٠٠ ګټونکو لوبغاړو په لېست کې به شامل شي.

نور راوښيه

XS
SM
MD
LG