د لاسرسۍ وړ لېنکونه

تازه خبر
چهارشنبه ۱۳ کب ۱۳۹۹ کابل ۰۴:۴۹

نړۍ

روسي پوليسو د لاريون پر مهال د ناوالني مېرمن نیولې

معترضان در روسیه

د روسیې د اپوزیسیون مشر الکسي ناوالني وايي پولیسو یې مېرمن په مسکو کې د مظاهرو پر مهال نیولې ده.

ناوالنې د پولیسو له توقیفځایه د ټولنیزو شبکو په یوه پوست کې ویلي، چې مېرمن یې یولیا ناوالنایا نن د هغو مظاهرو پر مهال ونیول شوه، چې په زرګونو کسان کې په راغونډ شوي وو.

مظاهره چیانو له توقیف نه د ناوالني د خوشې کېدو غوښتنه وکړه.

الکسي ناوالني چې له څه مودې یې په جرمني کې درملنه روانه وه، تېره اوونۍ مسکو ته له رسېدو سره سم ونیول شو.

د روسیې پولیسو په مسکو او لسګونو نورو ښارونو کې مظاهرې غیرقانوني بللي او په سلګونو کسان یې نیولي دي.

د ورځې تازه خبرونه دلته ولولئ

د روسیې سپوتنیک-وي واکسین سلواکیا ته ورسېد

د روسیې د کرونا ویروس ضد سپوتنیک-وي واکسین

سلواکیا ته د 'کووېډ-۱۹' ناروغۍ ضد سپوتنیک-وي واکسین دوه لکه دوزه ورسېدل. سلواکیا له روسیې سره د دوه ملیونه ډوزه سپوتنیک-وي واکسین د اخیستو تړون کړی دی.

د دوشنبې په ورځ د دې واکسین د لومړۍ برخې تر رسېدو وروسته، د دغه هېواد صدراعظم ایګور ماتوویچ وویل: "دا دوه ملیونه دوزه واکسین به له یو ملیون سلواکیانو سره د دوو میاشتو په ترڅ کې مرسته وکړي. موږ به د شوي تړون له مخې یو ملیون دوزه واکسین ترلاسه کړو. بیا به په مې او جون میاشتو کې یو ملیون دوزه نور ترلاسه کړو."

سلواکیا له هنګري وروسته د اروپایي ټولنې دوهم هېواد دی چې په روسیه کې د کرونا ضد جوړ شوی واکسین ترلاسه کوي. د اروپایي ټولنې د درملو د مؤسسې له لوري لاهم سپوتنیک-وي واکسین نه‌دی تصویب شوی.

امریکا: سعودي دې د خاشقجي قضیه کې نور اقدامات وکړي

وژل شوی خبریال جمال خاشقجي

د امریکا متحدایالاتونو پر سعودي چارواکو فشار زیات کړی چې د خبریال جمال خاشقجي د وژنې په قضیه کې نور اقدامات وکړي.

د سپینې ماڼۍ په یوه استخباراتي راپور کې چې د جمعې په ورځ خپور شو راغلي چې د خاشقجي قتل سعودي ولیعهد محمد بن سلمان تایید کړی و.

په ملګرو ملتونو کې د سعودي عربستان سفیر عبدالله المعلمي پرون دا راپور رد کړ.

د امریکا د بهرنیو چارو وزارت ویاند نېډ پرایس پرون دوشنبه(د کب ۱۱مه) وویل، متحدو ایالاتو سعودي عربستان ته په ډاګه ویلي دي چې د خاشقجي وژنه لا هم امریکا ته د منلو وړ نه ده.

ښاغلي پرایس وویل، امریکا له سعودي غوښتي چې د خاشقجي د قاتلانو بانډ منحل کړي او د هېواد په بنسټونو کې سیسټماټیک اصلاحات راولي، څو په بهر کې د سعودي د حکومت د مخالفینو پرضد د فعالیتونو بندېدل یقیني شي.

پر واشنګټن انتقادونه په زیاتېدو دي چې ولې یې په دې قضیه کې د بن سلمان پر ضد اقدام نه دی کړی، خو د سپینې ماڼۍ ویاندې جېن ساکي پرون دوشنبې په یوه خبري غونډه کې په دې اړه د یوې پوښتنې په ځواب کې وویل: "له تاریخي پلوه د امریکا ولسمشرانو- که ډیموکراتان وو، که جمهوریپال، د هغو هېوادونو د حکومتي رهبرانو پرضد اقدام نه دی کړی چې موږ ډیپلوماتیکې اړیکې ورسره لرو."

جمال خاشقجي د ۲۰۱۸ کال د اکتوبر په دوهمه نېټه د ترکیې په استانبول ښار کې د سعودي عربستان قونسلګرۍ ته تر ننوتلو وروسته تری تم شو او باور دا دی چې همالته وژل شوی او مړی یې له منځه وړل شوی دی.

ملګري ملتونه: د ۱،۷ میلیارد ډالرو مرسته یمن لپاره کافي نه ده

د ملګرو ملتونو سرمنشي انتونیو ګوتیریش

ملګري ملتونه وايي، هغه ۱،۷ میلیارد ډالر چې مرستندویو هېوادونو یې ژمنه کړې، په یمن کې له قحطۍ سره د مبارزې لپاره کافي نه دي.

د ملګرو ملتونو سرمنشي انتونیو ګوتیریش پرون دوشنبه(د کب ۱۱مه) په یوه انلاین غونډه کې له نړیوالو مرستندویانو د یمن لپاره د درې میلیارده او اته نیم سوه میلیونه ډالرو د ځانګړي کولو غوښتنه وکړه.

ملګري ملتونه وايي، د یمن نیمايي نفوس چې شپاړس میلیونه وګړي دي، له لوږې سره لاس ګرېوان دي.

حوثي یاغیانو چې ایران یې ملاتړ کوي په ۲۰۱۴ کال کې پلازمېنه پر صنعا او د یمن د شمال پر سیمو ولکه ټینګه کړه.

امریکا اوکراین سره د ۱۲۵ میلیونه ډالرو په ارزښت پوځي مرسته کوي

ارشیف، عکس تئزيني بڼه لري

د امریکا دفاع وزارت له اوکراین سره د ۱۲۵ میلیونه ډالرو په ارزښت پوځي مرسته اعلان کړه.

پنټاګون په یوه بیان کې وايي، په دې مرستو کې په وسلو سمبالې د ګزمې دوه کښتۍ هم شاملې دي څو اوکراین له هغو په کار اخېستو سره له خپل سمندري قلمرو څخه دفاع وکړای شي.

اوکراین د کریمیا د ټاپو وزمې پرسر له روسیې سره اختلاف لري.

مسکو په ۲۰۱۴ میلادي کال کې کریمیا اشغال کړه او له هغه وخته تراوسه د اوکراین په ختیځ کې د روس پلوو بېلتونپالو ملاتړ کوي.

د اوکراین په جګړه کې چې ۷ کاله پرې اوښتي، تر اوسه له ۱۴ زرو زیات کسان وژل شوي دي.

اوکراین د ډیپلوماتانو یوه شبکه شنډه کړې چې په قاچاق تورن وو

د یوکراین پولیس

د اوکراین د امنیتي خدماتو اداره وايي، د ځینو اوسنیو او پخوانیو ډیپلوماتانو یوه شبکه یې شنډه کړې چې د قیمتي توکو په قاچاق تورن وو.

د اوکراین دغه پخواني او اوسني ډیپلوماتان تورن دي چې د سرو-زرو او بهرنیو اسعارو په ګډون یې د سلګونو-زره ډالرو په ارزښت اجناس قاچاق کړي دي.

د امنیتي خدماتو ادارې پرون دوشنبه(د کب ۱۱مه) په یوه اعلامیه کې ویلي، دغو ډیپلوماتانو، د ډیپلوماټیکو اسنادو د پوستي خدماتو له سیسټم او ډیپلوماټیکو اسنادو څخه په استفاده، له اروپا اوکراین او له اوکراین اروپا ته اجناس قاچاق کول.

د دغو کسانو هویت نه دی په ډاګه شوی.

دغې ادارې ویلي چې د دې پېښې په تړاو څېړنې پیل شوي، د تورنو کسانو شمېر لا روښانه شوی نه دی.

پاشنیان: که اپوزیسیون تر وخت مخکې ټاکنې ومني، موږ یې هم ومنو

د ارمنستان صدراعظم نیکول پاشنیان

د ارمنستان صدراعظم نیکول پاشنیان پرون دوشنبه (د کب ۱۱مه) وویل، که اپوزیسیون شرطونه ومني، دی تر وخت مخکې پارلماني ټاکنو ته تیار دی.

په ارمنستان کې سیاسي کړکېچ وروسته له هغې اوج ته ورسېد چې د پاشنیان ملاتړو او د اپوزیسیون غړو جلا- جلا پراخ لاریونونه وکړل.

وروسته له هغې چې پوځ تېره اوونۍ له واکه د صدراعظم پاشنیان د لېرې کېدو غوښتنه وکړه، دی له روان سیاسي کړکېچ سره لاس و ګرېوان دی.

پاشنیان د پوځ دا غوښتنه د پوځي کودتا یوه هڅه ګڼلې ده.

نیکول پاشنیان پرون د پلازمېنې یریوان په جمهوریت میدان کې خپلو زرګونو پلویانو ته په وینا کې وویل، که پارلماني اپوزیسیون تر وخت مخکې ټاکنې ومني، موږ به یې هم ومنو.

د برما د لیرې شوې مشرې محاکمه؛ پر انګ سان سوچي نور تورونه هم ولګول شول

له قدرته د میانمار یا د پخوانۍ برما د حکومت لیرې شوې مشره انګ سان سوچي

له قدرته د میانمار یا د پخوانۍ برما د حکومت پر لیرې شوې مشرې انګ سان سوچي چې نن د لومړي ځل لپاره په یوه محاکمه کې ودرول شوه، نور تورونه ولګول شول.

۷۵ کلنه انګ سان سوچي د تېرې مارچ میاشتې له لومړۍ نېټې چې د دې هېواد پوځ کودتا وکړه او هغه‌یې له قدرته لیرې او په کور کې نظربند کړه، د وېډیویي کنفرانس له لارې په دې محاکمه کې چې په پلازمېنه نیپیداو کې جوړه شوې وه، راڅرګنده شوه او روغتیایي وضعیت‌یې ښه ښکارېده.

سوچي هېواد ته په غیر قانوني توګه د واکي ټاکي د مخابرو د واردولو، د برما د طبیعي افتونو له قانون او د 'کووېډ-۱۹' ناروغۍ له امله له لګول شویو بندیزونو څخه په سرغړونه تورنه شوه.

له کله چې هغه له قدرته لیرې شوې، په تېره یوه میاشت کې په دې هېواد کې مظاهرې پیل شوې دي.

اعتراض کوونکي، د ملکي حکومت د بېرته اعادې او د سوچي او د هغې د ګوند د نورو غړو د خوشې کېدو غوښتنه کوي.

نتانیاهو عمان خلیج کې د اسرائیل پر یوې کښتۍ برید د ایران کار وباله

د اسرائیل صدراعظم بنیامین نتانیاهو

د اسرائیل صدراعظم بنیامین نتانیاهو ایران تورن کړ چې تېره اوونۍ یې په عمان خلیج کې د اسرائیل پر یوې بار وړونکې کښتۍ برید کړی، هغه ادعا چې تهران رد کړې ده.

بنیامین نتانیاهو د اسرائیل له دولتي راډیو، کان سره په مرکه کې چې نن خپره شوې وویل، دا واضح ده چې دا برید د ایران کار و. نوموړي ایران د اسرائیل لوی دښمن وباله چې په وینا یې کلک هوډ لري چې مخه به‌یې نیسي.

د اسرائیل صدراعظم د دې پوښتنې په ځواب چې ایا اسرائیل به د دغه برید په وړاندې غبرګون وښیي، وویل، دوی په ټوله سیمه کې د ایران پر هدفونو ګوزارونه کوي.

د ایران د بهرنیو چارو وزارت ویاند سعید خطیب‌زاده دغه ادعا چې ګوندې هېواد یې پر بار وړونکې کښتۍ په برید کې لاس درلود، په کلکه رد کړه او ویې‌ویل، نتانیاهو د هغه په ټکو له ایران سره سودایي شوی دی.

د اسرائیل دغه کښتۍ چې موټر یې لېږدول، د سعودي عربستان د دمام له بندره سنګاپور ته په لاره وه چې د فبرورۍ په ۲۵مه پرې یوه چاودنه وشوه.

په دغه چاودنه کې چاته زیان نه‌دی رسېدلی، خو اسرائیلي مالک‌یې ویلي چې چاودنې د کښتۍ یوه خوا د یو نیم مترو په شعاع دوه ځایه سورۍ کړې ده.

د ایران له لوري د خبرو لپاره د غونډې د وړاندیز پر ردولو د امریکا خواشیني

ارشیف، د ایران او امریکا بیرغونه

واشنګټن د تهران پر هغه اقدام خواشیني څرګنده کړه چې پرون‌یې د امریکا له متحده ایالاتو او له اروپایي قدرتونو سره د ۲۰۱۵ کال د تړون د احیا پر سر د خبرو لپاره د غیر رسمي غونډې وړاندیز رد کړ.

تهران ټینګار وکړ چې واشنګټن دې لومړی ټول یو اړخیز بندیزونه لیرې کړي.

د سپیني ماڼۍ ویاندې جن ساکي وویل، که څه هم د ایران دغه ځواب موږ خواشیني کړي یو، خو دې ته چمتو یو چې د دغه تړون د عملي کېدو لپاره په بامفهومه ډیپلوماسۍ کې بېرته ښکېل شو.

جن ساکي وویل، واشنګټن به د دغه تړون له نورو لاسلیکوونکو، د ملګرو ملتونو د امنیت شورا له څلورو دایمي غړو چین، فرانسې، روسیې او بریتانیا او له جرمني سره سلا مشورو ته دوام ورکړي.

د ایراني رسنیو د راپور له مخې د ایران د بهرنیو چارو وزارت ویاند سعید خطیب‌زاده وویل، هغو وروستیو اقداماتو او ویناوو ته په پام چې متحده ایالاتو او درې اروپایي قدرتونو کړي، ایران داسې نه‌انګېري چې اوس دې له دغو هېوادونو سره د غیر رسمي غونډې لپاره چې د اروپایي ټولنې د بهرني سیاست مشر یې وړاندیز کړی، مناسب وخت وي.

ایراني چارواکو له دې مخکې ویلي چې تهران د جوزف بورېل پر دغه وړاندیز غور کوي.

د امریکا پخوانی ولسمشر ډونالد ټرمپ خپل هېواد په ۲۰۱۸ کال له دغه تړونه وایست او پر تهران‌یې بېرته بندیزونه ولګول.

ایران او د امریکا د ولسمشر جو بایډن نوې اداره په دې اړه چې د دغه تړون د احیا لپاره څوک باید لومړی ګام پورته کړي، سره اختلاف لري.

پولیسو  په برما کې لږ تر لږه ۱۸ معترضان وژلي

برما کې د اعتراضونو پر مهال د پولیسو له لوري پر سر ویشتل شوې د یوې معترضې مېرمنې مړی

پولیسو په برما کې لږ تر لږه ۱۸ معترضان وژلي او یو شمېر نور یې ټپیان کړي دي.

دغه معترضان پرون یکشنبه د پولیسو په ډزو وویشتل شول او دغه ورځ د کودتا پر ضد د څو اوونیو اعتراضونو له پيل راهیسې تر ټولو خونړۍ وه.

یوې ښځې هم په غالب ګومان وروسته تر دې د زړه د حملې له کبله ساه ورکړه چې پولیسو په یانګون ښار کې د ښوونکو اعتراض د یوه نارنجک بم په وسیله تیت او پرک کړ.

د ملګرو ملتونو عمومي منشي انتونیو ګوترش د اعتراض کوونکو ځپل په کلکو ټکو غندلي او د اعتراض کوونکو پر ضد یې د وژونکو وسلو کارونه او د هغوی خپل‌سره نیول د نه‌منلو وړ عمل بللی دی.

هغه د وژنې او د خلکو د ټپي کېدو پر زیاتوالي ژوره اندېښنه ښودلې ده.

په برما کې له یوې میاشتې راهیسې چې پوځ کودتا کړې او د ملکي حکومت مشره انګ سان سوچي او د هغې د ګوند یو شمېر نور غړي یې نیولي، اعتراضونه پیل شوي دي.

ایران له امریکا او اروپایي قدرتونو سره د خبرو لپاره د غونډې وړاندیز رد کړ

د تهران ښار یوې څنډه کې د ایران بیرغ

ایران پرون د امریکا له متحده ایالاتو او له اروپایي قدرتونو سره د ۲۰۱۵ کال د تړون د احیا پر سر د خبرو لپاره د غیر رسمي غونډې وړاندیز رد کړ.

تهران ټینګار وکړ چې واشنګټن دې لومړی ټول یو اړخیز بندیزونه لیرې کړي.

د ایراني رسنیو د راپور له مخې د ایران د بهرنیو چارو وزارت ویاند سعید خطیب‌زاده وویل، هغو وروستیو اقداماتو او ویناوو ته په پام چې متحده ایالاتو او درې اروپایي قدرتونو کړي، ایران داسې نه‌انګېري چې اوس دې له دغو هېوادونو سره د غیر رسمي غونډې لپاره چې د اروپایي ټولنې د بهرني سیاست مشر یې وړاندیز کړی، مناسب وخت وي.

ایراني چارواکو له دې مخکې ویلي چې تهران د جوزف بورېل پر دغه وړاندیز غور کوي.

د امریکا پخواني ولسمشر ډونالد ټرمپ خپل هېواد په ۲۰۱۸ کال له دغه تړونه وایست او پر تهران‌یې بېرته بندیزونه ولګول.

ایران او د امریکا د ولسمشر جو بایډن نوې اداره په دې اړه چې د دغه تړون د احیا لپاره څوک باید لومړی ګام پورته کړي، سره اختلاف لري.

پاکستان کې په یوه وسله‌وال برید کې یو مذهبي مشر ووژل شو

ارشیف، د پاکستان پولیس

د پاکستان پولیس د پلازمېنې اسلام‌اباد په یوه څنډه کې په یوه وسله‌وال برید کې د یوه مذهبي مشر د وژل کېدو خبر ورکوي.

پولیسو وویل، په دې پېښه کې چې د شنبې په ورځ د بهارا کاهو په سیمه کې شوې، له مفتي اکرام‌الرحمن سره د هغه ۱۳ کلن زوی او یو زده‌کوونکی هم وژل شوي دي.

د پولیسو په وینا وسله‌والو په مفتي رحمن هغه مهال برید وکړ چې د خپل موټر پر لور روان و.

تر اوسه چا یا کومې ډلې د دغه برید مسؤلیت نه‌دی اخیستی.

اکرام‌الرحمن د مولانا فضل‌الرحمن په مشرۍ د جمعیت علمای اسلام په ګوند پورې تړلی و. مولا فضل‌الرحمن د اپوزېسیون د ۱۱ ګوندي ائتلاف چې هدف‌یې د حکومت نسکورول دي، مشري کوي.

چک ممکن د اروپایي ټولنې له تأیید پرته د روسیې کرونا ضد واکسین تطبیق کړي

ارشیف، د روسیې کرونا ویروس ضد واکسین سپوتنیک-وي

د چک جمهوريت صدراعظم اندري بابیش وایي، هېواد یې ممکن د اروپایي ټولنې د درملو د ادارې له تأیید پرته د روسیې د کرونا ضد سپوتنیک-وي واکسین استعمال ته اجازه ورکړي.

بابیش دغه څرګندونې پرون یکشنبې له «CNN Prima News» سره په مرکه کې وکړې او ویې‌ویل، د اروپایي ټولنې د درملو ادارې «EMA» ته منتظر نه‌شي پاتې کېدای ځکه روسیې ورته د خپل واکسین د تأیید لپاره درخواستي نه‌ده وړاندې کړې.

هغه زیاته کړه، د چک د درملو د ادارې تأیید به کافي وي چې په هېواد کې د روسیې د سپوتنیک-وي واکسین تطبیق ته اجازه ورکړي.

چک جمهوریت چې د نړۍ په کچه پر 'کووېډ-۱۹' ناروغۍ د اخته شویو کسانو شمېر په‌کې زیات دی، تر اوسه‌یې خپلو نږدې شپږنیم لکه وګړو ته د کرونا ضد فایزرـبایو ان تیک، مودرنا او استرازینیکا واکسینونه ورکړي دي.

دا هېواد شاوخوا ۱۰ ملیونه او اووه لکه نفوس لري چې تر اوسه په‌کې د کرونا له امله له ۲۰ زرو زیات کسان مړه شوي او له یو ملیون ۲۳۵ زرو زیات کسان پرې اخته شوي دي.

په دې هېواد کې په دې وروستیو کې د 'کووېډ-۱۹' مثبتې پېښې ډېرې زیاتې شوي چې شمېر یې په تېرو ۲۴ ساعتونو کې نږدې اتو زرو ته رسېدلی.

د چک جمهوريت صدراعظم دغه‌راز وویل چې هېواد به‌یې د چینایي سینوفارم واکسین په وړاندې هم ورته تګلاره غوره کړي.

ترکیې او ایران د یو بل سفیران ور احضار کړي

د ایران او ترکیې ګډ بیرغونه

ترکیې او ایران د یو بل سفیران ور احضار کړي دي.

د ترکیې دولتي اژانس راپور ورکړی چې د بهرنیو چارو وزیر مولود چاوش اغلو د ایران سفیر محمد فرازمند ور غوښتی او له هغه یې غوښتي چې له ترهګرۍ سره په مبارزه کې د ترکيې تر څنګ ودریږي.

هاخوا ایران هم د ترکیې سفیر ور غوښتی او خپل اعتراض یې د ترکي چارواکو د هغو څرګندونو په غبرګون ور اورولی چې ویلي یې و زرګونه د 'پي.کې.کې' د کردانو کارګر ګوند غړي په ایران کې حضور لري.

دا ګوند د ترکیې له خوا یو ترهګر ګوند بلل شوی چې وخت پر وخت یې په عراق او سیمه کې پر سنګرونو عملیات هم ورته کوي.

د دغه ډیپلوماټیک جنجال یوه بل عامل هم په عراق کې د ایران او ترکیې د سفیرانو تر منځ شخړه ده.

د ایران سفیر ایرج مسجدي د عراق له یوه کُرد ژبي ټلوېزیون سره په مرکه کې ویلي و چې ایران په عراق باندې د ترکیې د بریدونو خلاف دی.

د مسجدي د دغو خبرو په غبرګون د ترکیې سفیر فاتح یلدیز په ټوېټر لیکلي: "فکر کوي وروستی کس چې د عراق پولو ته د درناوي درس ورکوي د ایران سفیر به وي."

د برما پولیسو ۷ مظاهره چیان وژلي او ګڼ نور یې ټپیان کړي

برما کې پر مظاهره چیانو ډزې شوي

د برما پولیسو نن یکشنبه(د کب ۱۰مه) پر مظاهره چیانو ډزې کړي، اووه کسان یې وژلي او ګڼ نور یې ټپیان کړي.

رویټرز اژانس راپور ورکړی پولیسو وروسته له هغه په مظاهره چیانو مخامخ ډزې کړي چې صوتي بمونو، اوښکو بهوونکو ګازونو او هوايي ډزو د هغوی د خورولو لپاره کار ورنه کړ.

په مرکزي ښار یانګون او ځینو نورو ښارونو کې د پولیسو له خوا دا زور زیاتی او په نتیجه کې یې د خلکو مرګ ژوبله تر ټولو خونړۍ او بې سارې بلل شوې ده.

خلک له څو اوونیو راهیسې د پوځي کودتا په غبرګون مظاهرې کوي او هر وار د امنیتي ځواکونو له تُند عکس العمل سره مخ کېږي.

په برما کې حالت د فبروري له لومړۍ راهیسې ګډوډه ده، ځکه پوځیانو کودتا وکړه او د حکومت مشره انګ سان سوچي او ګڼ نور دولتي چارواکي یې بندیان کړل.

د پوځ مشرانو د انګ سان سوچي په مشرۍ ګوند په پارلماني ټاکنو کې په درغلیو تورن کړ او د کودتا په مټ یې ټول واک په خپل لاس کې واخېست.

د برما پوځي چارواکو د ملګرو ملتونو او نړیوالې ټولنې له غوښتنو سربېره د مظاهره چیانو ځپلو ته دوام ورکړی دی.

نور راوښيه

XS
SM
MD
LG