د لاسرسۍ وړ لېنکونه

تازه خبر
شنبه ۱۶ کب ۱۳۹۹ کابل ۰۸:۴۳

نړۍ

لېتوانیا: اروپايي ټولنه دې پر روسیې نور بندیزونه ولګوي

د لېتوانیا د بهرنیو چارو وزیر ګابریلیوس لاندس بیرګیس

د لېتوانیا د بهرنیو چارو وزیر پر روسیې د نورو بندیزونو د لګولو غوښتنه کړې.

ګابریلیوس لاندس بیرګیس پرون پنجشنبې(د سلواغې ۲مه) د ازادۍ راډیو له بېلاروسۍ څانګې سره په ځانګړې مرکه کې پر اروپایي ټولنې غږ وکړ چې د کرملېن د منتقد او د روسیې د اپوزیسیون د مشر الکسي ناوالني له نیول کېدو وروسته پر کرملین نور بندیزونه هم ولګوي.

د لېتوانیا د بهرنیو چارو وزیر زیاته کړه چې د اروپايي ټولنې د بهرنۍ پالیسۍ مشر جوزېپ بوریل باید په را روانه میاشت کې مسکو ته خپل سفر هم لغوه کړي.

ناوالني چې د وژونکو کیمیاوي موادو په وسیله له مسمومېدو وروسته په جرمني کې تر علاج لاندې و، په روانه اوونۍ کې مسکو ته د راستنېدو پر مهال ونیول شو.

د ورځې تازه خبرونه دلته ولولئ

د امریکا سنا پر ۱،۹ ټریلیون ډالره بودیجې په اړه بحثونه پيل کړي

ارشیف، د امریکا سنا جرګه

د امریکا سنا جرګې د کووېډ-۱۹پر مهال خلکو ته د اسانتیاوو د رامنځته کولو په هدف د۱۹۰۰ میلیارد ډالرو یا یو اعشاریه نهه ټریلیون ډالرو بودیجې په اړه بحثونه پيل کړي.

د دې بودیجې طرحه د ولسمشر جوبایډن له خوا وړاندې شوې.

ښايي د دې پیسو د مصرف په اړه بحثونه ډېر وخت ونیسي وي. د دغه پروګرام هدف دا دی چې په امریکا کې له کووېډ – ۱۹ سره ښه مبارزه او زیانمن شوي اقتصاد سره مرسته وشي.

د دغه پروګرام له لارې هر امریکايي ته د ۱۴۰۰ ډالرو ورکړې وړاندیز شوی دی.

د کووېډ-۱۹د واکسین پیسې، ټېسټونه، دولتي ادارو او محلي حکومتونو سره مرسته، ښوونځیو او هوایي شرکتونو سره مرسته، کم عایده او ګڼ ماشومو کورنیو سره د ټکس په برخه کې د اسانتیا راوړل او په روغتیايي بیمه کې سبسیډي د دغه پروګرام مهمې برخې یادې شوي دي.

د بلوچستان چاودنې ۵ کارګر وژلي او ۲ پاکستاني سرتیري یې ټپیان کړي

ارشیف، عکس تئزیني بڼه لري

تېر ماښام د پاکستان د بلوچستان ایالت په یوه لېرې پرته سیمه کې د ساختماني کارګرو پر موټر چاودنه شوې چې په کې پنځه کسان وژل شوي او د هغوی دوه سرتیري ټپیان دي.

هېچا د دې برید مسوولیت په غاړه نه دی اخیستی.

د سیبۍ ولسوالۍ مرستیال کمېشنر زاهد شاه ویلي چې د دې چاودنې په اړه څېړنې پيل شوي دي.

بلوچستان له کلونو د فرقه یي شخړو او د پوځ او بلوڅ بېلتون پالو عموماً د بلوچستان د ازادۍ لښکر او ازادۍ جبهې وسله والو د بریدونو شاهد دی.

بلوڅ بېلتون پال خپلواکي غواړي.

کرستین برګینر: امنیت شورا دې د میانمار په اړه چټک ګامونه پورته کړي

میانمر کې پر مظاهره چیانو اوښلن ګاز کارول شوی.

د میانمار لپاره د ملګرو ملتونو د سازمان ځانګړې استازې له امنیت شورا غوښتي چې د میانمار په اړه متحد او چټک ګامونه پورته کړي.

د ملګرو ملتونو امنیت شورا داسې وخت په میانمار بحث وکړ چې جمعه (د کب ۱۵مه) هم د دغه هېواد پوځیانو په مظاهره چیانو باندې زورزیاتی کړی دی.

له مظاهره چیانو سره د حکومت زورزیاتي ګڼ نړیوال غبرګونونه پارولي دی.

تر اوسه پورې د مظاهره چیانو له ډلې شااوخوا ۵۰ تنه وژل شوي او تر ۱۷۰۰ زیات نیول شوي دي.

د میانمار لپاره د ملګرو ملتونو ځانګړې استازې کرستین برګینر د لسګونه ملکي مظاهره چیانو له وژل کېدو وروسته ویلي چې تر څو به د میانمار د پوځي حکومت دا کړنې وزغمل شي.

هغې زیاته کړه چې د میانمار وضعه یوه خطرناکه بشري ناورین په لور روانه ده.

مظاهره چیان له څو اوونیو د پوځي حکومت پر ضد راوتلي دي. پوځ د دغه هېواد مشره انګ سان سوچي د فبروري په لومړۍ بندي کړې ده او واک یې په خپل لاس کې اخېستی.

پاپ فرانسس د عراق مرکز بغداد ته ورسېد

د نړۍ د کاتولیک عیسیویانو مذهبي مشر پاپ فرانسس په بغداد کې

د نړۍ د کاتولیک عیسیویانو مذهبي مشر پاپ فرانسس نن جمعه (د کب ۱۵مه)بغداد ته ورسېد.

دا عراق ته د پاپ لومړی سفر او په نړۍ کې د کرونا د وبا له خپرېدو وروسته د هغه لومړی نړیوال سفر دی.

پاپ فرانسس هغو خبریالانو ته چې له ده سره په الوتکه کې وو، وویل خوښ دی چې د سفرونو لړۍ یې بیا پیل کړه او هغه ټاټوبي ته- چې له کلونو راهیسې شهید شوی دی، دا سیمبولیک سفر د ده دنده وه.

پاپ به د دې څلور ورځني سفر په ترڅ کې هڅه وکړي چې د عراق عیسويانو ته چې شمېر یې په کمېدو دی ډاډ ورکړي، د ادیانو ترمنځ د ډیالوګ لپاره کار وکړي او د شیعه ګانو له لوی مذهبي مشر ایت الله علي سیستاني سره وګوري.

د عراق د عیسیویانو ټولنه چې شمېر یې شااوخوا درې لکه کسانو ته رسېږي، د نړۍ له ډېرو لرغونو او متنوع ټولنو څخه ده.

ایران: د یوې مسافر وړونکې الوتکې د برمته کولو هڅه ناکامه شوه

ارشیف، د ایران ملي بیرغونه

د ایران سپاه پاسداران ځواک ادعا کوي چې د یوې مسافر وړونکې الوتکې د برمته کولو هڅه یې ناکامه کړې ده.

سپاه پاسداران نن جمعه (د کب ۱۵مه) پر خپله وېب پاڼه په یوه بیان کې وویل چې د برمته نیوونکي هدف د هغې جټ الوتکې تښتول و چې له جنوب لویدیځ ښار اهواز څخه د شمال لویدیځ مشهد ښار پر لور روانه وه.

په بیان کې راغلي دي چې دې الوتکې په اصفهان ښار کې بېړنۍ ناسته وکړه او د برمته نیوونکي هڅه شنډه شوه.

په پېښه کې د چارواکو په وینا چاته زیان نه دی اوښتی.

د سپاه په خبرپاڼه کې ویل شوي، یرغمل نیوونکي- چې هویت یې نه دی افشا شوی غوښتل دا الوتکه د خلیج یوه هېواد ته یوسي.

چین: د هانګ کانګ انتخاباتي سیسټم کې به بدلونونه راوړو

د چین صدراعظم لي- کي کیانګ

چین اعلان کړی چې د هانګ کانګ په انتخاباتي سیسټم کې به بدلونونه راوړي.

له دې اعلانه ښکاري چې پېکېنګ په دې مهم نړیوال مالي مرکز کې نور نو خپل مخالفین نه شي زغملای.

صدراعظم لي- کي کیانګ نن د خلکو د ملي کانګرس یا پارلمان په پرانېستونکې غونډه کې د وینا پر مهال په هانګ کانګ او بله نیمه کورواکې سیمه- مککاو کې د چین د اساسي قانون د بشپړ انفاذ پر اړتیا ټینګار وکړ:

ښاغلی کیانګ زیاته کړه: "موږ د یوه هېواد او دوو سیسټمونو پر اصل ولاړ یو. موږ به د دې دوو سیمو د ادارې سیسټمونه او مېکانیزمونه اصلاح کړو، څو اساسي قانون او اساسي اصول په کې نافذ کړو."

د ملي کانګرس د رئیسه پلاوي مرستیال مشر ونګ چېن ویلي چې د هانګ کانګ د اجرائیه رئیس د غوراوي طریقه باید اصلاح شي ځکه د هغه په وینا د دې سیمې په انتخاباتي سیسټم کې نیمګړتیاوو د اپوزیسیون فعالانو ته اجازه ورکړې چې د خپلواکۍ غږ اوچت کړي.

د چین د ملي کانګرس کلنۍ غونډه نن د مارچ په پنځمه پرانېستل شوه چې یوه اوونۍ به دوام وکړي.

تمه ده چې دا بدلونونه به په دې غونډه کې تصویب شي.

د اروپا او شمالي امریکا ترمنځ د نفاق د هڅو په اړه د ناټو خبرداری

د ناټو عمومي منشي ینس سټولټنبرګ

د ناټو عمومي منشي وايي چې اروپايي ټولنه د ترورېزم او روسیې د ګواښونو پر وړاندې په یوازې ځان خپله دفاع نه شي کولای.

ینس سټولټنبرګ پرون- پنجشنبې د بلجیم د اروپا په کالج کې د وینا پرمهال د اروپا او شمالي امریکا ترمنځ د نفاق د هڅو په اړه خبرداری ورکړ او ویې ویل، اروپايي ټولنه د روسیې او ترورېزم د بې ثباته کوونکي سلوک پر وړاندې د دې وچې ساتنه په یوازې ځان نه شي کولای.

سټولټنبرګ زیاته کړه چې د اروپا او شمالي امریکا ترمنځ د نفاق اچولو هڅې به نه یوازې ناټو بلکې اروپا هم کمزورې کړي.

د ډونالډ ټرمپ د ولسمشرۍ پرمهال د ناټو له اروپايي غړو سره د امریکا اړیکې ترینګلي شول.

نوي ولسمشر جوبایډن که څه هم د ناټو له غړو سره د نژدې همکاریو غوښتنه کړې، خو په عین حال کې یې پر دې اړتیا ټینګار کړی چې اروپا باید د ناټو لګښتونو ته اوږه ورکړي.

برما کې بیا پر معترضانو ډزې وشوې او یو تن یې ووژل شو

برما کې مظاهرې

په داسې حال کې چې د ملګرو ملتونو امنیت شورا د میانمار د کړکېچ په اړه د بحث لپاره غونډې ته تیاری نیسي، د دې هېواد امنیتي ځواکونو نن جمعه (د کب ۱۵مه) یو ځل بیا د پوځي کودتا پر مخالفو معترضانو ډزې وکړې او یو تن یې وواژه.

معترضان، د پوځ له ځپونکو اقداماتو سره-سره چې په ترڅ کې یې له پنځوسو زیات کسان مړه او له اولس سوو زیات نور ونیول شول نن بیا هم د میانمار په مرکز او نورو ښارونو کې واټونو ته راووتل.

دا تاوتریخوالی د نړیوالو له خوا غندل شوی دی.

ټاکل شوې د ملګرو ملتونو امنیت شورا نن پر میانمار د وسلو نړیوال بندیز او پر پوځ یې اقتصادي بندیزونه ولګوي.

امنیت شورا به همدا راز دا قضیه د جرمونو نړیوالې محکمې آی سي سي ته راجع کړي.

د کالیفورنیا یوه ژوبڼ کې ۹ بیزوګانې د کووېډـ۱۹ پرضد واکسین شوې

ارشیف، عکس تئزیني بڼه لري

د امریکا د متحدو ایالاتونو د کالیفورنیا ایالت په یوه ژوبڼ کې ۹ غټې بیزوګانې د کووېډـ۱۹ ناروغۍ پرضد واکسین شوې.

دا په نړۍ کې لومړني ژوي دي چې په دومره لوی شمېر کې واکسین کېږي.

د سان­دیاګو د ژوبڼ چارواکو نن وویل چې ۴ اورانګوټان او ۵ بونوبو بیزوګانې په وروستیو اوونیو کې په کرونا ویروس اخته شوې وې.

د دغه ژوبڼ ویاندې دارلا داویس (Darla Davis) د برېښنالیک له لارې رویټرز خبري اژانس ته ویلي چې دغو نهو بیزوګانو ته ازمېښتي واکسین ورکړل شوی.

د هغې په وینا دغه واکسین په لومړیو کې سپیانو او پیشوګانو ته جوړ شوی و.

دغو بیزوګانو ته کرونا ضد واکسین په داسې کې لګول کېږي چې په جنورۍ میاشت کې چارواکو د سان دیاګو په سفري ژوبڼ کې په کرونا ویروس د اتو ګوریلاګانو اخته کېدل تایید کړي وو.

امریکا: ایران به پر اټمي موضوع «ګټورو خبرو» ته ستون شي

د ایران او امریکا ګډ بیرغونه

د امریکا متحدو ایالاتونو هیله وښوده چې ایران به پر اټمي موضوع «ګټورو خبرو» ته ستون شي.

دا هیله وروسته تر دې وښوول شوه چې د واشنګټن اروپايي شریکانو موافقه وکړه چې د اټمي انرژۍ په نړیواله اداره کې پر تهران د سانسور پلان لغوه کړي.

د امریکا د بهرنیو چارو وزارت ویاند نېډ پرایس (Ned Price) پرون پنجشنبه (د کب ۱۴مه) وویل، واشنګټن خوشحاله دی، ځکه وروسته له هغې چې ایران د ۲۰۱۵میلادي کال اټمي موافقې د راتلونکي په باب ځینې هڅوونکې اشارې ورکړې، نو اروپايي شریکانو هم موافقه وکړه وکړه چې پر ایران له انتقاده لاس واخلي.

ښاغلي پرایس وویل، واشنګټن په پوره لېوالتیا د ایران قوي ارادې ته په تمه دی، څو داسې لارې چارې غوره کړي چې د باوري او کوټلي پرمختګ سبب کېږي.

د تهران او واشنګټن ترمنځ کړکېچ وروسته له هغې زیات شو چې د امریکا مخکېني ولسمشر ډونالډ ټرمپ په ۲۰۱۸میلادي کال کې له اټمي تړونه د وتلو او پر ایران د اقتصادي بندیزونو بیالګولو اعلان وکړ.

د اوسني ولسمشر جو بایډن ادارې په مشروط ډول هغې موافقې ته له بېرته ستنېدو سره لېوالتیا ښوولې ده.

ملګري ملتونه: د برما پوځ تېر فبروري کې اعتراض کوونکي وژلي او وهلي

برما کې د پوځ درې سرتیري یو اعتراض کوونکی وهي.

د ملګرو ملتونو د بشري حقونو څېړونکی توماس اندریو وايي چې د میانمار پوځ په تېره فبروري میاشت کې له پوځي کودتا وروسته اعتراض کوونکي وژلي، وهلي او په غیرقانوني ډول يې نیولي دي.

دا څرګندونې داسې مهال کېږي چې ټاکل شوې د ملګرو ملتونو امنیت شورا نن جمعه (د کب ۱۵مه) پر میانمار د وسلو نړیوال بندیز او پر پوځ یې اقتصادي بندیزونه ولګوي.

امنیت شورا به همدا راز دا قضیه د جرمونو نړیوالې محکمې ای سي سي ته راجع کړي.

خو ښاغلي اندریو په جنیوال کې د ملګرو ملتونو د بشري حقونو شورا ته په خپل راپور کې د نورو پراخو بندیزونو غوښتنه کړې او ویلي یې دي چې باید د میانمار د تېلو او ګاز پر سکتور چې اداره یې د پوځ په لاس کې ده بندیز ولګول شي.

پرون پنجشنبه (د کب ۱۴مه) له دې مخکې د ملګرو ملتونو د بشري حقونو لوی کمېشنر مېشل بچلېت په یوه بیان کې وویل، وروسته له دې چې د میانمار پوځ د فبروري په لومړۍ نېټه پوځي کودتا وکړه، لږ تر لږه ۵۴ کسان وژل شوي او له ۱۷۰۰ زیات کسان نیول شوي دي.

اپوزیسیون: ارمنستان کې د پارلماني ټاکنو په اړه خبرو نتیجه نه ده ورکړې

په پارلمان کې د اپوزیسیون د ډلې مشر ایدموند ماروکیان

د ارمنستان په پارلمان کې د اپوزیسیون د یوې ډلې مشر وايي چې له صدراعظم سره د وختي پارلماني انتخاباتو په اړه خبرو تراوسه نتیجه نه ده ورکړې.

نیکول پاشینیان چې له سیاسي بحران او د پوځ له خوا د استعفا له غوښتنو سره مخامخ دی، ویلي دي چې ناڅاپي انتخاباتو ته تیار دی، خو په دې شرط چې اپوزیسیون هم د ځانګړو شرایطو منلو ته چمتو شي.

په پارلمان کې د اپوزیسیون د ډلې مشر ایدموند ماروکیان له پاشینیان سره له غونډې وروسته خبریالانو ته وویل چې خبرې وشوې خو موافقې ته ونه رسېدل.

د ارمنستان سیاسي حالات سخت کړکېچن دي ځکه د پاشینیان او اپوزیسیون پلویانو د یو بل پر وړاندې لاریونونه پیل کړي دي.

ماروکیان وویل، ښايي په راتلونکو خبرو کې- چې نور سیاسي ځواکونه هم باید برخه په کې واخلي، دواړه لوري یوې موافقې ته نژدې شي.

د ازادي راډیو د تاجکي څانګې پر ۲ خبریالانو برید شوی

ارشیف

د ازادي راډیو د تاجکي څانګې پر دوو خبریالانو په پلازمېنه دوشنبې کې د تېلو د بیو د لوړېدو په اړه د راپور جوړولو پر مهال برید وشو.

پر شهلا عبدالله او ملا رجب یوسفي پرون د مارچ په څلورمه په داسې حال کې برید وشو چې د تېلو په یوه ټانک کې یې له یوه ډرېور سره مرکه کوله.

دواړه ژورنالیستان وايي، د تېلو د ټانک یوه کار کوونکي دوی ته وویل چې مرکه دې بنده کړي، بیا راغی، شهلا عبدالله یې پورې وهله او هڅه یې وکړه چې د هغې د کمرې لېنز بند کړي.

وروسته کله چې یوسفي په خپل موبایل ټیلیفون د دې جریان ویډیو اخېستله نو بریدکوونکی د هغه خوا ته راغی، ورته ویې ویل چې د خپلې کمپنۍ له خوا له لیکلي مکتوب پرته د ده په ودانۍ کې د فلم اخېستو اجازه نه لري.

یوسفي ورته وویل چې د ده د ودانۍ فلم نه اخلي، بلکې له هغو ډرېورانو سره مرکې کوي چې د پټرولو د بیو له لوړېدو سر ټکوي.

یوه ډاکټر وروسته د یوسفي د مخ د وړو ټپونو علاج وکړ. د دوشنبې ښار د سینو سیمې پولیسو د پېښې په اړه ابتدايي تحقیقات پیل کړي دي.

امریکا له چین، روسیې او ځینو پیاوړو هېوادونو سره سیالي ستره ننګونه بولي

د امریکا ولسمشر جو بایډن

امریکا کې د جو بایډن په مشرۍ حکومت وایي، له چین، روسیې او یو شمېر نورو پیاوړو هېوادونو سره سیالۍ د امریکا په وړاندې ستره ننګونه ده.

د سپینې ماڼۍ په یوه سند کې چې پرون خپور شو او د بایډن د ملي امنیت سیاست په‌کې مشخص شوی، چین د نړۍ دوهمه درجه اقتصادي هېواد یاد شوی دی.

په دغه سند کې راغلي، چین د امریکا یوازنی سیال دی چې په اقتصادي، ډيپلوماتیکو، تخنیکي او نظامي امکاناتو سره د نړیوال نظام ثبات ګواښلی شي.

په دغه ۲۴ صفحه‌یي سند کې خبرداری ورکړل شوی چې روسیه هم هوډ لري خپل نړیوال نفوذ پیاوړی کړي او په نړیواله صحنه کې مخرب رول ولوبوي.

سند کې د ایران او شمالي کوریا په اړه ویل شوي چې دغه دواړه هېوادونه د امریکا د متحدانو او سیمې ثبات ګواښي.

میانمار کې د اعتراض کوونکو ځپل؛ د مظاهرو پر مهال ۳۸ تنه وژل شوي

د میانمار د پوځي واکمنۍ ضد مظاهرې

په میانمار یا پخوانۍ برما کې له پرونیو خونړیو مظاهرو وروسته نن هم دغلته اعتراضونو دوام درلود.

نن زرګونه کسان د دوو لویو ښارونو یانګون او ماندالای سړکونو ته راوتلي و چې پولیسو یې بیا هم د تیت او پرک کولو لپاره اوښکې بهوونکی ګاز وکاراوه او ډزې یې پرې وکړې.

پرون د مظاهرو پر مهال ډزو کې ۳۸ تنه وژل شوي چې ملګرو ملتونو دغلته د اعتراضونو له پیل راهیسې دا خونړۍ ورځ یاده کړې ده.

د فبرورۍ له لومړۍ نېټې چې په میانمار کې پوځ کودتا کړې، دا هېواد تقریباً هره ورځ د مظاهرو شاهد دی او تر اوسه په‌کې د شاوخوا ۵۰ کسانو د وژل کېدو راپورونه ورکول شوي دي.

بریتانیا د میانمار د وضعیت په اړه د خبرو لپاره سبا د ملګرو ملتونو د امنیت شورا غونډه رابللې ده.

د امریکا متحده ایالاتو ویلي چې د میانمار د پوځیانو په وړاندې پر نورو اقداماتو غور کوي او اروپایي ټولنې ویلي چې پر بې‌وسلې ملکیانو ډزې له نړیوال قانون څخه ښکاره سرغړونه ده.

نور راوښيه

XS
SM
MD
LG