د لاسرسۍ وړ لېنکونه

تازه خبر
شنبه ۹ کب ۱۳۹۹ کابل ۰۷:۴۳

نړۍ

د روسيې او سعودي چارواکو د سيمې امنیت او ايران په اړه بحث کړى

د عکس ښي لور ته د روسیې د بهرنیو چارو وزیر سرګي لاوروف او چپ لور ته د سعودي د بهرنیو چارو وزیر فيصل بن فرحان

د روسیې او سعودي عربستان د بهرنیو چارو وزیرانو د سیمې د امنیت او په تېره د خلیج له هېوادونو سره د تهران د اړیکو په اړه بحث وکړ.

سرګي لاوروف او فیصل بن فرحان پرون په مسکو کې سره ولیدل.

لاوروف له دې کتنې وروسته په یوه ګډه خبري غونډه کې وویل: "غواړو د دې شاهدان واوسو چې ایران او د خلیج هېوادونه په خپلو کې خبرې پیل کړي، د اعتماد او شفافیت د رامنځته کولو لپاره موافقه لیکونه لاسلیک کړي او په ټوله کې له یوبل سره همکار واوسي. د خلیج لپاره د یوه امنیتي تفاهم د پراختیا په مقصد زموږ وړاندیز دقیقا د همدې هدف لپاره دی."

د رویټرز خبري آژانس د راپور له مخې د سعودي د بهرنیوچارو وزیر له خپل روس سیال سره په کتنه کې، په منځنۍ آسیا کې د ده په وینا د ایران د مداخلې د پای ته رسولو غوښتنه کړې ده.

هغه همداراز ویلي، چې د سوریې د جګړې د پای ته رسولو پر وړاندې اساسي خنډ د ایران نیابتي وسله والې ډلې جوړوي.

د ورځې تازه خبرونه دلته ولولئ

مسکو کې د اپوزسیون د وژل شوي سیاستوال'نیمڅوف' ۶م تلین ترسره شو

بورېس نیمڅوف

د روسیې د حکومت سلګونه مخالفو فعالانو او ځینو لویدیځو ډيپلوماتانو په مسکو کې د اپوزسیون د وژل شوي سیاستوال بورېس نیمڅوف په شپږم تلین کې ګډون وکړ.

دوی د کرملین په څو کیلومترۍ کې په هغه ځای کې چې نیمڅوف د ۲۰۱۵ میلادي کال د فبروري په ۲۷ مه نېټه په ډزو ووژل شو، د ګلانو ګېډۍ کېښودې.

د نیمڅوف تلین هر کال په مسکو کې د لاریونونو په ترڅ کې نمانځل کېږي، خو د کرونا د محدودیتونو په ترڅ کې پر لویو غوڼدو د بندیز له کبله سږکال فعالان د نیمڅوف لپاره د یوه مؤقت څلي په ځای کې راټول شول.

په مسکو کې د امریکا د سفارت ویاندې ربېکا راس پر ټویټر لیکلي دي چې په دې مسکو کې د امریکا سفیر جان سولیوان د نیمڅوف قتل یو وحشیانه عمل بللی او هغه یې د روسیې یو سرسپارلی وګړی بللی دی.

د بریتانیا د پوځ متقاعد تورن سل کلن ټام مور  ومړ

د بریتانیا د پوځ متقاعد تورن سل کلن ټام مور 

د بریتانیا د پوځ متقاعد تورن سل کلن ټام مور چې له کرونا وبا سره د مبارزې لپاره یې نژدې ۳۳ میلیونه پونډه بسپنه راټوله کړې وه، نن خاورو ته وسپارل شو.

تورن مور چې د برتانیا د روغتیا ادارې د خیریه مرستو لپاره یې دا بسپنه په خپل بڼ کې د پلي تګ د یوه کمپاین په ترڅ کې راټوله کړه، د فبروري په دوهمه ومړ.

د بریتانیا ملکې دوهمې الېزابت ټام مور ته چې په تورن ټام هم مشهور و، د درناوي په مراسمو کې وویل چې دا، د بریتانیا ملت او نورې نړۍ ته د هغه الهام ستايي.

ټام مور په دوهمه نړیواله جګړه کې هم برخه اخېستې وه.

د تورن ټام د کورونا ټېسټ د جنوري په وروستیو کې مثبت راووت. د هغه کورنۍ ویلي و چې نوموړی د سږو د ناروغۍ له کبله د کرونا واکسین نه شي اخېستی.

له ۳۰۰ زیات کسان پر کانګرس د برید قضیه کې تورن پېژندل شوي

پر کانګرس د یرغل یو عکس

له ۳۰۰ زیات کسان د متحد ایالاتونو د کانګرس پر ودانۍ د پخواني ولسمشر ډونالډ ټرمپ د پلویانو د برید په قضیه کې تورن پېژندل شوي.

د امریکا مرستیال لوی څارنوال جان کارلین پرون جمعه (د کب ۸مه) خبریالانو ته وویل چې د قانون د تنفیذ ځواکونو لږ تر لږه ۲۸۰ تورن کسان نیولي دي.

کارلین زیاته کړه چې د تورنو کسانو په اړه تحقیقات په بې سارې چټکۍ سره روان دي.

ډېری تورن پر خواله رسنیو د بلواګرو په ډله کې د خپلو ویډیوګانو د خپرولو او هغو پوستونو پر اساس چې دوی خپل دا کار ویاړ بللی، نیول شوي.

د جنوري په شپږمه نېټه د کانګرس پر ودانۍ د ټرمپ د پلویانو د برید پر مهال د پولیسو د یوه افسر په ګډون پنځه کسان ووژل شول.

له دې پېښې یوه اوونۍ وروسته، د استازو جرګې ښاغلی ټرمپ پر کانګرس د خلکو د برید د پارولو په تور استیضاح کړ، خو د فبروري په ۱۳ مه نېټه یې د سنا په استیضاحیه محاکمه کې برائت واخیست.

ملګرو ملتونو کې د برما سفیرله نړیوالې ټولنې د مرستې غوښتنه وکړه

کیاو مو تُن په برما کې د پوځ له لوري له مظاهره چیانو سره د تشدد د مخنیوي لپاره په نړیواله کچه د اقداماتو غوښتنه وکړه. 

په ملګرو ملتونو کې د برما سفیر په خپل هېواد کې له پوځي کودتا سره مخالفت وکړ او په برما کې یې ملکي حکومت ته د بېرته واک سپارلو لپاره له نړیوالې ټولنې د مرستې غوښتنه وکړه.

کیاو مو تُن د جمعې (د کب ۸مه) په ورځ له ټولو هېوادونو وغوښتل چې په ښکاره بیانونه خپاره کړي، په کې په برما کې پوځي کودتا وغندي او دا حکومت په رسمیت ونه پېژني.

کیاو مو تُن په برما کې د پوځ له لوري له سوله ییزو مظاهره چیانو سره د تشدد د مخنیوي لپاره په نړیواله کچه د اقداماتو غوښتنه وکړه.

په برما کې پوځ د فبروري په لومړۍ نېټه واک په خپل لاس کې واخېست،

د هېواد مشره انګ سان سوچي او د هغې د ګوند نور مشران یې زنداني کړل.

پوځیان ادعا کوي چې د نوومبر په انتخاباتو کې درغلۍ شوې وې.

سوریه کې پر ایران پلوه ملېشو برید او تهران ته د واشنګټن خبرداری

د امریکا د متحد ایالاتونو ولسمشر جوبایډن

د امریکا د متحد ایالاتونو ولسمشر جوبایډن وایي، د سوریې په ختیځ کې پر ایران پلوه ملېشو هوایي برید ته باید تهران د یوه خبرداري په سترګه وګوري.

بایډن پرون جمعه (د کب ۸مه) خبریالانو ته په هوسټن کې وویل، له سزا ورکولو پرته ممکنه نه ده.

تر دې څرګندونو مخکې پرون د امریکا د دفاع وزارت ویاند جان کربي په سوریې کې د شوي بمبارۍ په اړه وویل: "لکه څرنګه چې موږ تېره شپه څرګنده کړه او د ولسمشر بایډن په امر چې ښکاره یې ویلي دي چې دی به د امریکایانو او د ایتلاف د غړیو ساتنه کوي، همدا راز به په سیمه کې زموږ امنیتي ګټې خوندې کوي."

د امریکا دفاع وزارت د پنجشنبې په ورځ په سوریې کې بمباري وکړه او ویې ویل چې دا د روانې میاشتې په پیل کې د توغندیو هغه برید ته ځواب و چې په عراق کې پر یوې اډې، چې په کې امریکایي او ایتلافي ځواکونه وو، شوی دی.

د دې برید د دقیقو تلفاتو په اړه څه نه دي ویل شوي.

رولانډ کوبیا: د اوربند په اړه اروپايي ټولنه خپل دریځ نه پټوي

د افغانستان لپاره د اروپايي ټولنې ځانګړي استازی رولانډ کوبیا

د افغانستان لپاره د اروپايي ټولنې ځانګړي استازي په ټوېټر د ماسک یو عکس خپور کړئ چې پرې لیکلي " اوربند".

رولانډ کوبیا لیکلي چې اروپايي ټولنه خپل دریځ نه پټوي.

هغه ویلي، دا ماسک چې پرې اوربند لیکلی دی باید ټولو ته وویشل شي، څو هم له کووېډ-۱۹ او هم له جنګ سره مبارزه وشي.

هغه زیاته کړې دا به د اوربند لپاره یوه ټولپوښتنه وي.

امریکا د سعودي په ۷۶ اتباعو د ویزې بندیز اعلان کړ

د امریکا او سعودي عربستان ملي بیرغونه

د امریکا د بهرنیو چارو وزیر انتوني بلېنکن د سعودي عربستان په ۷۶ اتباعو د ویزې بندیز اعلان کړ.

بلېنکن دا ګام وروسته له هغه پورته کړ چې د امریکا متحده ایالاتونو له خوا یو تازه خپور شوی راپور ښيي چې د سعودي عربستان ولیعهد محمد بن سلمان په ۲۰۱۸ میلادي کال کې د جمال خاشقجي د تښتولو او یا وژنې طرحه تایید کړې وه.

د بهرنیو چارو وزیر انتوني بلېنکن ویلي، په دغو کسانو د (خاشقجي بن) پالیسۍ په چوکاټ کې د ویزې بندیزونه ځکه لګېدلي چې دوی د بهرني دولت په استازیتوب د خبریالانو، فعالانو یا نورو اشخاصو د ځورولو، ګواښلو یا زیانمنولو په اعمالو کې ښکېل و.

د خاشقجي وژنه هم په دغو کسانو تړلې بلل شوې، خو د دوی کارونه یوازې په دې پېښې محدود نه دي بلل شوي.

انتوني بلېنکن وویل، هغه کسان باید د امریکا خاورې ته د ننوتلو اجازه ونه لري چې دلته د بهرنیو دولتونو په استازیتوب وتلې مخالفې سیاسي څېرې په نښه کوي.

د امریکا د دولت په څلور مخیز اطلاعاتي راپور کې راغلي چې د راپور څېړونکي داسې فکر کوي چې د سعودي عربستان ولیعهد محمد بن سلمان په ۲۰۱۸ میلادي کال کې د ترکیې په استانبول کې د خبریال جمال خاشقجي د نیول او یا وژلو عملیات تایید کړي و.

۵۹ کلن خاشقجي د امریکا په کلیفورنیا کې اوسېده او د سعودي عربستان د حکومت په مخالفت یې د واشنګتن پُسټ لپاره مقالې لیکلې.

دی د ۲۰۱۸ کال د اکتوبر په ۲ په استانبول کې د سعودي عربستان قونسلګرۍ ته تر ننوتلو وروسته تري تم شو او باور دا دی چې همالته وژل شوی او مړی یې له منځه وړل شوی.

بایډن: هېڅکله به د روسیې له لوري د کریمیا الحاق په رسمیت ونه پېژنو

د امریکا ولسمشر جوبایډن

د امریکا ولسمشر ویلي، هېڅکله به د روسیې له خوا د کریمیا الحاق په رسمیت ونه پېژني.

جوبایډن دا خبره د فبروري په ۲۶مه چې د کریمیا د الحاق اووم کال پوره شو وکړه.

ولسمشر بایډن زیاته کړه، امریکا متحده ایالتونه به د روسیې د پاروونکو کړنو پر وړاندې د اوکرایین تر څنګ ولاړ وي او ګډ کار به کوي، څو روسیه د خپل زور زیاتي او ناوړه استفادې په خاطر مسووله وګڼل شي.

د ۲۰۱۴ میلادي کال د فبروري په ۲۶مه وروسته له هغه چې په کییف کې تر مظاهرو وروسته روس پلوی ولسمشر ویکتور یانکوویچ له واکه لېرې شو کریمیا ونیوله او د اوکرایین د ختیځ په دوو ولایتونو کې یې له روس پلوو بېلتون پالو ملاتړ وکړ.

د اوکرایین په ختیځ کې له هغه وخت راهیسې د جګړو له امله ۱۳ زره کسان وژل شوي دي.

نایجریا کې پر یوه ښوونځي له برید وروسته سلګونه نجونې ترۍ تمې دي

ارشیف، نایجریا کې یو ښوونځی چې ګڼ زده کوونکې یې ترې تمې دي.

د نایجریا په شمال کې پر یوه ښوونځي له وسله‌وال برید وروسته سلګونه نجونې ترۍ تمې دي. د زامفارا ایالت اوسېدونکي وايي چې دا برید نن د جانګېبې سیمې پر منځني ښوونځي وشو.

نصیرو عبدالهي چې وايي دوه لوڼې یې یوه ۱۰ کلنه او بله ۱۳ کلنه لادرکه دي اسوشیټډ پرس خبري اژانس ته ویلي، د ښوونځي حاضري ښيي چې ۳۰۰ نجونې لادرکه دي.

د سیمې یوه اوسېدونکي اژانس ته ویلي چې وسله‌والو ښوونځي ته نږدې د پوځ پر یوه اډه او پوسته هم برید وکړ، هغوی ته‌یې خبرداری ورکړ چې دخالت دې نه‌کوي او بیا یې څو ساعته په ښوونځي کې تېر کړل.

د نایجریا د معلوماتو دولتي کمېشنر سلیمان توناو انکا هم تأیید کړې چې وسله‌والو له دې ښوونځي څخه نجونې تښتولي، خو هغه زیاته کړه چې امنیتي ځواکونه په جنایتکارانو پسې دي.

د بریتانیا سترې محکمې سوریه کې له داعش سره د یوځای شوې مېرمنې غوښتنه رد کړه

په بریتانیا کې زېږېدلې شمیمه بېګم چې اوس ۲۱ کلنه ده په ۲۰۱۵ کال کې له دوو ټولګیوالو سره سوریې ته وتښتېده او هلته د داعش له یوه جنګیالي سره واده شوه.

د بریتانیا سترې محکمې د هغې مېرمنې غوښتنه رد کړه چې په تانده ځوانۍ کې له داعش ډلې سره یوځای شوه او سوریې ته ولاړه.

په بریتانیا کې زېږېدلې شمیمه بېګم چې اوس ۲۱ کلنه ده په ۲۰۱۵ کال کې له دوو ټولګیوالو سره سوریې ته وتښتېده او هلته د داعش له یوه جنګیالي سره واده شوه.

محکمې د دې غوښتنه ځکه رد کړې ده چې وايي، نوموړې د بریتانیا لپاره امنیتي ګواښ پېښوي.

د بریتانیا دولت په ۲۰۱۹ کال کې د شمیمې تابعیت سلب کړ، خو نوموړې چې اوس‌مهال په سوریه کې په یوه توقیف ځای کې اوسېږي، بریتانیا ته د ستنېدو غوښتنه کړې ده څو د قضا دا پرېکړه وننګوي.

استېناف محکمې د شمیمې دا غوښتنه ومنله مګر سترې محکمې په یوه حکم کې چې نن اعلان شو دا پرېکړه رد کړه، خو په عین حال کې یې وویل چې دا کولای شي له هېواده بهر دا پروسه پر مخ بوځي.

سوریه کې پر ایران پلوو ملېشو د امریکا له هوايي حملو وروسته د تهران غبرګون

په سوریه کې پر ایران پلوو ملېشو د امریکا پوځ هوايي حمله

په سوریه کې پر ایران پلوو ملېشو د امریکا د پوځ له هوايي حملو وروسته تهران پر لوېدیځو هېوادونو غږ کړی چې د ملګرو ملتونو د امنیت شورا پرېکړه‌لیکونو ته درناوی وکړي.

د امریکا دفاع وزارت نن اعلان وکړ چې په عراق کې د امریکا او نړیوال ائتلاف پر پوځي اډې د روانې میاشتې د راکټي برید په ځواب کې یې په سوریه کې د ایران پلوو ملېشو پر سنګرونو بمباري کړې ده.

د ایران د بهرنیو چارو وزیر محمد جواد ظریف نن جمعه له دې حملو یوازې څو ساعته وروسته خپل سوریايي سیال سره په دې اړه ټیلیفوني خبرې وکړې.

د ایران حکومت د رسمي وېب‌پاڼې د راپور له مخې ظریف له خپل سیال فیصل مقداد سره په خبرو کې ټینګار وکړ چې لوېدیځوال باید د سوریې په اړه د ملګرو ملتونو د امنیت شورا پرېکړه‌لیکونو ته درناوی وکړي.

روښانه نه‌ده چې د دوی اشاره د امنیت شورا کومو پرېکړه‌لیکونو ته وه.

پنټاګون وايي، په ننني برید کې چې د ولسمشر جو بایډن په مشرۍ د امریکا د نوې ادارې لومړنی پوځي اقدام و، د سوریې او عراق په سرحد کې د کنټرول د برخې ډېر تأسیسات په نښه شول. پنټاګون وايي، په دې تأسیساتو کې د ایران پلوو ملېشه ډلو کتایب حزب‌الله او کتایب سیدالشهدا مرکزونه دېره وو.

امریکا د سوریې ختیځ کې د ایران پلوه ملېشو پر مرکزونو هوایي بریدونه کړي

ارشیف، ۲۰۱۹ کال کې پر کتایب حزب‌الله ډلې هوايي حمله

د امریکا د دفاع وزارت ویلي، د سوریې په ختیځ کې د عراق پولې ته نږدې یې د ایران پلوه ملېشو پر مرکزونو هوایي بریدونه کړي دي.

پنټاګون پرون (د فبرورۍ په ۲۵مه) یوه خبرپاڼه کې وویل، دا هوایي ګزارونه د هغو راکټي بریدونو په ځواب کې شوي چې روانه میاشت په عراق کې د امریکایي او ائتلافي ځواکونو پر یوې اډې وشول.

په خبرپاڼه کې راغلي "دا عملیات یو ښکاره پیغام لېږدوي، ولسمشر جو بایډن به داسې کار کوي چې امریکایي او ائتلافي پرسونل خوندي کړي".

د امریکا دفاع وزارت وایي، د هوایي بریدونو پر مهال د سوریې او عراق پر پوله څو هغه مرکزونه په نښه شوي چې د کتایب حزب‌الله او کتایب سیدالشهدا ډلو په ګډون ایران پلوه ملېشو کارول.

په هغه برید کې چې د فبرورۍ په ۱۵مه د ایربيل پر نړیوال هوایي ډګر وشو، د امریکا یو ملکي قراردادي ووژل شو او یو امریکایی او یو د ائتلافي ځواکونو سرتېری په‌کې ټپيان شول.

تر دې وروسته په بغداد کې پر یوې امریکایي اډې او دغه‌راز د امریکا پر سفارت د توغندیو برید شوی دی.

پاکستان ته 'د ترهګرو د مالي ملاتړو له نوملړه' د وتلو لپاره مهلت وټاکل شو

پاریس کې د مالي اقدام ځانګړې ډلې غونډه چې پاکستان ته په‌کې تر جون میاشتې د ترهګرو د مالي ملاتړو هېوادونو له نوملړه د وتلو مهلت وټاکل شو.

پر پیسو مینځلو د څار یوه نړیوال بنسټ پاکستان ته مهلت ورکړی چې تر جون میاشتې پورې د ترهګرو د مالي ملاتړو هېوادونو له نوملړ نه ووځي.

د مالي اقدام ځانګړې ډلې (FATF) پرون پنجشنبه اعلان وکړ چې پاکستان د دوی د ۲۷ سپارښتنو له ډلې په ۲۴ هغو کې پرمختګ کړی دی.

په پاریس کې مېشت دغې ډلې د یوې درې ورځنۍ انلاین غونډې په پای کې ویلي، پاکستان باید د ترهګرو د تمویل په برخه کې درې پاته کمۍ هم له‌منځه یوسي.

د مالي اقدام ځانګړې ډلې په ۲۰۱۸ کال کې د پیسو مینځلو د بشپړ نه‌کنټرول او د ترهګرو د تمویل له کبله پاکستان په خپل خړ لېست کې شامل کړ.

په دغه لېست کې د پاکستان موجودیت دغه هېواد کې بهرنۍ پانګونه او سوداګري زیانمنه کړې ده.

د دغه بنسټ له اعلان وروسته پاکستان ویلي، ژمن دي چې د دغې نړیوالې ډلې سپارښتنې عملي کړي.

الکسي ناوالنۍ د مسکو له یوه بدنامه توقیف‌ځایه لېږدول شوی

د روسیې د اپوزېسیون مشر الکسي ناوالنۍ

د روسیې د اپوزېسیون مشر الکسي ناوالنۍ د موتروسکایا تیشینا په نوم د مسکو له بدنام توقیف‌ځایه لېږدول شوی دی.

د ناوالنۍ مدافع وکیل وادیم کوبزیف پرون د نورو جزئیاتو ورکولو پرته په ټویټر کې دا اعلان کړی دی.

د روسیې د زندانونو مسؤلو چارواکو هم تأیید کړې چې د اپوزېسیون بندیوان مشر الکسي ناوالنۍ یوه بل زندان ته انتقال شوی، خو د نوي زندان د موقعیت په اړه‌یې جزئیات نه‌دي ورکړي.

د محبسونو د خدماتو د فدرال ادارې مشر الکساندر کلاشنیکوف نن جمعه وویل چې ناوالنۍ هغه ځای ته لېږدول شوی چې د محکمې د حکم په اساس باید د حبس وخت په‌کې تېر کړي، خو نوموړي په دې اړه څه ونه‌ویل چې د کرملېن دا منتقد سیاستوال چېرته بیول شوی دی.

د کرملېن منتقد ۴۴ کلن ناوالنۍ وروسته له هغې د جنورۍ پر ۱۹مه دغه بدنام توقیف‌ځای ته اچول شوی و چې یوه قاضي په بېړه ترتیب شوې محاکمه کې د ۳۰ ورځو لپاره په توقیف کې د ناوالنۍ د ساتلو حکم ورکړ.

ناوالنۍ له جرمني د راستنېدو پر مهال د مسکو په یوه هوايي ډګر کې ونیول شو.

دی تر مسمومېدو وروسته چې ملامتي یې پر ولسمشر ولادیمیر پوتین اچوي، جرمني ته د درملنې لپاره ولېږدول شو.

کرملېن د مسمومولو په قضیه کې خپل دخالت رد کړی دی.

د روسیې یوې محکمې د فبرورۍ میاشتې په لومړیو کې ناوالنۍ د اختلاس په تور په درې نیم کاله تعلیقي بند محکوم کړ.

د فبرورۍ پر ۲۰مه‌یې د خوشې کېدو لپاره درخواست رد شو، خو په زندان کې د هغه تېر کړي وخت ته په پام سره‌یې د بند موده دوه‌نیمو کلونو ته راکمه شوه.

روسیه په سایبریا کې د یوه زندان د ساتونکو په اړه څېړنې پیل کړي

ارشیف، د سایبریا ایرکوڅک سیمه کې یو زندان

روسیه وايي په سایبریا کې یې د یوه زندان د نامعلوم شمېر ساتونکو په اړه څېړنې پیل کړې دي.

د روسیې د جزايي خدماتو فدرال ادارې دا اعلان وروسته له هغې کېږي چې په دې زندان کې د بندیانو د سختې شکنجې راپورونه خپاره شول.

دغې ادارې پرون پنجشنبه وویل، د ۱۰ هغو بندیانو په اړه‌یې هم څېړنې پیل کړي چې د ادعاوو له مخې دوی بل زنداني، طاهر جان باقییف شکنجه کړی دی.

د دې ادارې په خبره د شکنجو دغه موارد چې قومي انګېزه لري تأیید ته اړتیا لري.

د ګُلاګو ټکي نیټ (Gulagu.net) په نوم د بشري حقونو د ملاتړ ډلې په ډسمبر او روانه میاشت د ایرکوڅک (Irkutsk) سیمې په اصلاحي مرکزونو کې د شکنجې د دوو نورو پېښو راپور هم ورکړی دی.

د بشري حقونو د ملاتړ ډلو ته ځینو بندیانو ویلي، کله چې دوی نورو زندانونو ته هم لېږدول شوي، وهل شوي او شکنجه شوي دي.

د بندیانو په خبره د زندانونو ساتونکو هغه بندیان هم چې له مسؤلانو سره همکارۍ ته‌یې غاړه ایښې وه، په زوره اړ کړي چې په بلوا کې پر خپل دخالت اعتراف وکړي.

نور راوښيه

XS
SM
MD
LG