د لاسرسۍ وړ لېنکونه

تازه خبر
جمعه ۳ سلواغه ۱۳۹۹ کابل ۰۶:۳۵

افغانستان

ولسي جرګې د ۱۴۰۰ مالي کال بودیجه رد کړه

ولسي جرګه

ولسي جرګې د ۱۴۰۰ مالي کال بودیجه رد کړه.

د دغې جرګې منشي اسدالله شهباز نن ازادي راډیو ته وویل، چې دغه بودیجه د ناانډولۍ له کبله د پارلمان له لوري رد کړل شوه.

نوموړي وویل، چې د افغانستان د ولسي جرګې د مالي او بودیجې کمېسیون چې د ١٤٠٠ هجري لمریز کال بودیجه یې ارزولې وه، خپل رپوټ د جرګې عمومي غونډې ته وړاندې کړ.

نوموړي غه بودیجه ناانډوله وبلله او وویل، چې ددغې بودیجې په برابرولو کې د هېواد یو شمېر بېوزله سیمو ته پام نه دی شوی، خو یو شمېر هغو سیمو ته چې د بیارغونې ډېرې پروژې په کې عملي شوې، ډېره پاملرنه شوې ده.

د ۱۴۰۰ مالي کال لپاره ټول ټال ملي بودیجه ۴۵۲،۶ میلیارده افغانۍ تخمین شوې ده.

له دې جملې عادي بودیجه ۲۹۶ میلیارده افغانۍ ده، چې د ملي بودیجې ۶۵ سلنه جوړوي او همدارنګه پراختیایي بودیجه د ۱۵۶ میلیارده افغانیو په لرلو سره د ملي بودیجې ۳۵ سلنه جوړوي.

د ورځې تازه خبرونه دلته ولولئ

پکتیا چارواکي: اریوب ځاځي کې ماین چاودنې یو قومي مشر وژلی

د افغانستان په نقشه کې د پکتیا ولایت

په پکتیا کې ماین چاودنې یو تن قومي مشر وژلی او یو بل کس یې ټپي کړی دی.

د پکتیا د پولیسو ویاند حیات الله نظامي ازادي راډیو ته وویل چې چاودنه د پنجشنبې د ورځې مازدیګر ناوخته د دې ولایت د اریوب ځاځیو ولسوالۍ په خوازي خېلو سیمه کې شوې.

دی وایي، د چسپکي ماین په دې چاودنه کې د حاجي رحیم په نوم یو قومي مشر وژل شوی او یو بل کس ټپي شوی دی.

د یادې سیمې اوسیدونکي حاجي رحیم د دې ولسوالۍ یو له هغو قومي مشرانو بولي چې د خیر ښېګڼې او د سیمې د ارامۍ او د خلکو د یووالي لپاره یې ګڼې هلې ځلې کولې.

دوی وایي، نوموړي له چا سره شخصي دښمني نه درلوده او له افغان حکومته غوښتنه کوي چې دا پېښه په جدي ډول وڅیړي.

تر اوسه د دې چاودنې مسولیت چا نه دی منلی.

فوټبال؛ پامیر لوبډلې په هرات کې د اتلوالي جام وګاټه

ارشیف، په هرات کې د فوټبال لوبډله

پامیر لوبډلې د هرات له شلو کلونو د کم عمره ځوانانو د فوټبال جام سیالیو اتلولي وګټله.

د هرات ولایت د روزشي ادارې فني مسول ضیاالحق ضیا نن پنجشنبه (د سلواغې ۲مه) ازادي راډيو ته وویل چې دغه سیالۍ له تېرو دوو میاشتو راهیسې د ۲۴ لوبډلو ترمنځ روانې وې.

ښاغلی ضیا زیاتوي، په یادو سیالیو کې د پامیر او سرخ پوشانو لوبډلې توانېدلې وې چې پای لوبو ته لاره پیدا کړي.

د پامیر او سرخ پوشانو ترمنځ وروستۍ لوبه تېره ورځ وشوه چې په پایله کې پامیر درې د دوه په مقابل کې سرخ پوشانو لوبډلې ته ماته ورکړه او د سیالو اتلوالي یې خپله کړه او په ترتیب سره سرخ پوشانو او ارش کمیل لوبډلو دوهم او درېیم مقامونه ترلاسه کړل.

"افغانستان کې به د سولې په اړه د علماوو تاریخي غونډه جوړه شي"

ارشیف، افغانستان کې یو شمېر علماء

د افغانستان د بهرنیو چارو وزارت وایي، ډېر ژر به دغه هېواد کې د سولې په اړه د اسلامي نړۍ د علماوو 'تاریخي' غونډه ترسره شي.

د بهرنیو چارو وزارت ویلي، د دغې غونډې د جوړېدو خبره په ریاض کې د اسلامي نړۍ د اړیکو مشر شیخ محمد بن عبدالکریم العیسی د بهرنیو چارو له وزیر محمد حنیف اتمر سره د لېدو پر مهال کړې ده.

د بهرنیو چارو وزارت خبرپاڼه کې که څه هم د دغې غونډې دقیق وخت او ځای نه دی ښودل شوی، خو ویلي یې دي، دغه غونډه کې به د افغانستان کړکېچ ته له دیني نظره د حل لارې چارې ولټول شي.

د اسلامي نړۍ د اړیکو رئیس ویلي، دغه غونډه باید تاریخي او برخلیک ټاکونکې پایله ولري او له طالبانو به هم وغواړي چې ګډون په کې وکړي.

له دې وړاندې ځینو نورو وتلو دیني عالمانو د افغانستان اوسنۍ جګړه "چې دواړه لوري یې افغانان او مسلمانان دي" ناروا بللي، خو له دې سره -سره هم د جګړې په شدت کې د پام وړ کموالی نه دی راغلی.

کرکټ؛ افغانستان ایرلنډ ته د ۲۸۸ منډو هدف وټاکه

افغان کرکټ لوبډله

د افغانستان د کرکټ ملي لوبډلې له ایرلنډ سره نننۍ لوبه کې ښه بیټینګ یا توپ وهنه وکړه او سیالې لوبډلې ته یې د ۲۸۸ منډو هدف وټاکه.

دا د دواړو ټیمونو ترمنځ د پلان شوېو درېیو پنځوس اورېزو لوبو لومړنۍ سیالۍ ده چې نن پنجشنبه (د سلواغې ۲مه) په اماراتو کې ترسره کېږي.

د افغانستان د پيل یوه لوبغاړي رحمان الله ګربز ۱۲۷ منډې وکړې.

وروسته به معلومه شي چې د ایرلنډ لوبډله به دغه هدف پوره کړي او که به افغان لوبډلې ته لومړنۍ ماته مني؟

د دغو دواړو ټیمونو ترمنځ دوهمه او درېیمه سیالۍ د جنورۍ په ۲۴مه او ۲۶مه نېټه کېږي.

د کرنې وزارت: اماراتو ته د افغانستان د صادراتو کچه څو برابره زیاتېږي

ارشیف، د هوايي دهلېز له لارې د افغانستان د حاصلاتو او تولیداتو د صادرولو بهیر

د افغانستان کرنې، اوبو لګولو او مالدارۍ وزارت وايي، هڅې روانې دي چې سږ کال اماراتو ته د صادراتو کچه څو برابره زیاته شي.

د دغه وزارت د اوبو لګولو او طبعیي سرچینو مرستیال حشمت‌الله غفوري وايي چې ۱۳ کرنیز توکي چې کولای شي د متحده عربي اماراتو د مارکېټ غوښتنې ته ځواب ورکړي، باید په جدې توګه پرې کار وشي.

ښاغلی غفوري زیاتوي، له هغو سوداګرو سره چې متحده عربي اماراتو ته کرنیز محصولات صادروي، د هوایي دهلېز او ځمکني ټرانسپورت په برخه کې د دوی د ستونزو او دغه‌راز د پروسس، بسته‌بندۍ، سرټیفکېټونو او د مېوو او سبو سټنډرد کولو په برخه کې یې پر شته ستونزو او ننګونو خبرې کړې دي.

امارات د افغانستان کرنیزو محصولاتو لپاره ښه بازار دی او له څو کالو را په دې خوا د افغانستان یو شمېر بڼوالۍ او کرنیز بېلابېل محصولات متحده عربي اماراتو ته صادرېږي.

د ۱۴۰۰ مالي کال د بودجې سند د درېیم ځل لپاره ولسي جرګې ته استول کېږي

ارشیف، د افغانستان ولسي جرګې تالار

د افغانستان د مالیې وزارت وايي چې د ۱۴۰۰ مالي کال بودجې په درېیمه مسوده کار روان دی او د رارونې اوونۍ په پيل کې به د تصویب لپاره ولسي جرګې ته واستول شي.

د مالیې وزارت مرستیال عبدالحبیب ځدراڼ وايي چې د دغه وزارت تخنیکي ډلې ۱۷ ولایتونو ته سفرونه کړي او د دې ولایتونو له مدني ټولنو، د سیمې له خلکو، دیني علماوو، خصوصي سکټور او ولایتي چارواکو سره‌یې په ملي بودجه کې د هغوی د اړتیاوو او لومړیتوبونو شاملولو په موخه سلا مشورې کړې دي.

دا په داسې حال کې ده چې له دې وړاندې د ولسي جرګې په بودجه کې د ناانډولۍ، په پروژو کې ولایتونو ته کم او د دولتي کارکوونکو د معاشونو ترمنځ توپير له امله د ۱۴۰۰ مالي کال بودجه دوه ځلې رد کړې ده.

دفاع وزارت: هلمند کې د طالبانو پر یوه زندان عملیاتو کې ۲۷ کسان خوشې شول

ارشیف، هلمند کې د افغان ځواکونو عملیات

تېره شپه ځانګړو کمانډو ځواکونو د هلمند ولایت "نهرسراج" ولسوالۍ کې د طالبانو پر یوه زندان عملیات ترسره کړي چې په پایله کې یې د یوه پخواني پوځي په ګډون ۲۷ کسان خوشې شول.

دفاع وزارت نن په یوه خپره کړې خبرپاڼه کې ویلي چې له دغو زندانیانو سره چې نه‌دي ویل شوي هغه څوک دي، د طالبانو له لوري د اسلامي اصولو او بشري حقونو خلاف بد چلند شوی، سخت شکنجه شوي او ځورول شوي دي.

د خبرپاڼې له مخې د دغو عملیاتو په ترڅ کې د طالبانو د زندان یو ساتونکی وژل شوی او یوه اندازه وسلې او مهمات هم د افغان ځواکونو لاس ته ورغلي دي.

طالبانو تر اوسه په دې اړه څه نه‌دي ویلي.

په افغانستان کې یو البانیايي سرتېری ووژل شو

ارشیف، په ۲۰۱۲ کال کې په افغانستان کې یو وژل شوی البانیایی سرتېری

د البانیا دفاع وزارت په افغانستان کې د خپل یوه سرتېري وژل تأیید کړل.

دې وزارت په یوه خبرپاڼه کې چې پرون چهارشنبه‌یې خپره کړې ویلي چې وژل شوي سرتېري یې په افغانستان کې د ناټو د غوڅ ملاتړ مأموریت کې دنده ترسره کوله.

دفاع وزارت یوازې دومره ویلي چې دا پېښه د سې شنبې په ماښام شوې، خو د ځای او څرنګوالي په اړه‌یې نور جزئیات نه‌دي ورکړي.

دا د البانیا چې په ۲۰۰۹ کال د ناټو غړې شوې، دوهم سرتېری دی چې د سوله‌ساتو ځواکونو په نړیوال مأموریت کې وژل کېږي.

البانیا په افغانستان کې ۹۹ سرتېري لري چې د کابل او هرات په اډو کې دېره دي.

ناټو: افغانستان کې د سولې "تاریخي" فرصت باید له لاسه ونه‌وځي

په افغانستان کې د ناټو ملکي استازی ستیفانو پونتېکورو

په افغانستان کې د ناټو ملکي استازی د سولې لپاره رامنځته شوی فرصت "تاریخي" بللی او ټینګار یې کړی چې دا موقع باید له لاسه ونه‌وځي.

ستیفانو پونتېکورو پر خپله ټویټرپاڼه لیکلي چې د سولې د داسې هر اړخیز تړون ملاتړ کوي چې په خبره‌یې د افغانستان مهمې لاسته راوړنې په‌کې خوندي شي.

پونتېکورو دا څرګندونې پرون ماښام له پخواني جهادي مشر عبدرب الرسول سیاف او د اسلامي وحدت ګوند له مشر محمد کریم خلیلي سره تر لیدو کتو وروسته کړې دي.

پونتېکورو له تېرو څو ورځو راهیسې له افغان چارواکو او یو شمېر سیاستوالو سره د سولې په تړاو د خبرو لړۍ پیل کړې ده.

ناټو له دې وړاندې ویلي، له افغانستانه شرایطو ته په کتو خپل سرتېري باسي، دا په داسې حال کې ده چې امریکا دغه هېواد کې تازه د خپلو ځواکونو شمېر دوه نیم زرو ته راټیټ کړی دی.

د افغانستان او ایرلنډ کرکټ لوبډلې نن لومړنۍ سیالۍ کوي

د افغانستان او ایرلنډ د کرکټ لوبډلې

د افغانستان او ایرلنډ د کرکټ لوبډلې نن د درېیو یو ورځنیو لوبو لومړنۍ سیالۍ ترسره کوي.

کرکټ بورډ وایي، افغان لوبغاړو دغې سیالۍ ته پوره چمتووالی نیولی او تمرینونه‌یې ورته کړي دي.

دا سیالۍ د افغانستان په وخت د سهار په لس نیمو بجو په متحده عربي اماراتو کې ترسره کېږي.

دا په تېر نږدې یوه کال کې چې نړۍ کې د کرونا وبا خپره شوې، د افغانستان د کرکټ ملي لوبډلې لومړنۍ نړیواله سیالۍ ده.

د افغانستان او ایرلنډ ترمنځ د دغه سریز دوهمه او درېیمه لوبه د جنورۍ په ۲۴مه او ۲۶مه نېټه ترسره کېږي.

د کاناډا صدراعظم: خپلواک او ولسواک افغانستان ته له رسوونکې سولې ملاتړ کوو

د کاناډا صدراعظم جستن ترودو

د کاناډا صدراعظم جستن ترودو وایي، هېواد یې افغانستان کې د داسې سولې ملاتړ کوي چې له مخې یې دغه هېواد باثباته او خپلواک شي او ولسواک نظام ولري.

ترودو دغه څرګندونې پرون ماښام له افغان ولسمشر محمد اشرف غني سره په ټیلیفوني خبرو کې وکړې.

د ارګ خبرپاڼه وایي چې ترودو له ښاغلي غني سره په دغو خبرو کې افغانستان کې د تاوتریخوالي پر زیاتوالي اندېښنه وښوده.

دواړو لورو د ناټو د دفاع وزیرانو په راتلونکې غونډه چې فبروري کې جوړېږي، هم خبرې وکړې او ویې‌ویل چې دې غونډه کې باید د افغانستان پر وړاندې ګډ او همغږی سیاست رامنځته شي چې له مخې یې د سولې خبرې مطلوب هدف ته ورسېږي.

افغان ولسمشر پرون په کابل کې د امریکا سفارت له شارژدافیر راس وېلسن او د ناټو د غوڅ ملاتړ مأموریت له قوماندان سکاټ مېلر سره هم د سولې پر بهیر او د امریکا له نوي حکومت سره د اړیکو په اړه (مفصلې) خبرې کړې دي.

د ټولګټو وزارت د خپلو ۱۹۲ کار کوونکو د دندو ځای بدل کړ

‎د افغانستان د ټولګټو وزارت د خپلو ۱۹۲ کار کوونکو د دندو ځای بدل او ځینې يې د تنخواګانو په خونديتوب سره کار ته په تمه وګرځول.

‎د دغه وزارت چارواکي وایي، یاد وزارت دا چاره د ظرفیت لوړونې او فساد سره د مبارزې لپاره تر سره کړې ده.

‎د دغه وزارت ویاند خلیل الرحمن امید ازادي را‌‌‌‌‌‌ډیو ته وویل چې له دې شمېر کار کوونکو ۴۰ تنه ښځینه کار کوونکې یې بېرته په وزارت کې په دندو ساتلي دي.

‎خو بل خوا معترض کارکوونکي وایي چې ياد وزارت دا کار غیر قانوني کړی دی.

‎يو شمېر دغو معترضین ازادي را‌‌‌‌‌‌ډیو سره په خبرو کې نیوکې کړي چې کلونه یې په ټولګټو وزارت کې کار کړی، خو اوس بې دلیله منفصل کېږي.

‎د دغو کار کوونکو د څرګندونو په اړه بیا د ټولګټو وزارت مسوولین وایي چې د دوی دا پرېکړه په اداري پروسېجر او قانون کې شته او په دې سره غواړي چې یاد وزارت کې اصلاحات رامنځته کړي.

ارزګان کې ماین چاودنې یو ماشوم وژلی او ۳ ښځې یې ټپیانې کړي

د ارزګان ولایت روغتون

د ماین چاودنې په ارزګان ولایت کې یو ماشوم وژلی او درې ښځې یې ټپیانې کړي دي.

د ارزګان والي محمد عمر شېرزاد نن چهارشنبه (د سلواغې لومړۍ نېټه) ازادي راډیو ته وویل چې دا پېښه پرون د دې ولایت په ګېزاب ولسوالۍ کې شوې ده.

ښاغلي شېرزاد زیاته کړه: "ګېزاب لسوالۍ کې د ملکي وګړو په کورونو کې طالبانو ماینونه ښخ کړي وو چې له بده مرغه پر یوې کورنۍ د دوی په کور کې وچاودېد، یو ماشوم په کې ووژل شو او درې ښځې یې ټپیانې کړې."

وسله والو طالبانو تراوسه په دې اړه څه نه دي ویلي.

افغان ځواکوانو یادې ولسوالۍ کې په نوېو تصفیوي عملیاتو کې د طالبانو څخه ګڼې سیمې پاکې کړې او زیات شمېر کورنۍ خپلو کورونو ته راغلې.

د ارزګان والي وایي، لسګونه ماینونه یې شنډ کړي چې د ده په وینا د خلکو کورونو کې ځای پر ځای شوي وو.

کندهار کې د دهلې بند د رغنیزو چارو د پيلېدو هڅې روانې دي

د کندهار دهلې بند

د کندهار محلي چارواکي وايي د دهلې بند د استملاک چارې له بشپړېدو سره به د زرګونه کرنیزې ځمکو خړوبېدو ته زمینه برابره شي.

د دغه بند د استملاک چارې په دې وروستیو کې چټکې شوې او په ځینو ساحو کې د پرتو ستونزو پر حل بحثونه شوي دي.

د والي ویاند احمد بهیر احمدي ازادي راډیو ته وویل، په وروستیو تعقیبي غونډو کې پر همدې موضوع بحث شوی دی: "پر هغو مواردو بحث وشو چې د استملاک چارو د ټکنۍ کېدو سبب شوي وو. هڅه مو دا ده د افغانستان په کچه د دغې لویې پرمختیايي پروژې رغنیزې چارې ژر تر ژره پیل کړو چې د کندهار پر کرنه به د ۴۰۰ کلونو لپاره مستقیم اغېز ولري."

د دهلې بند د بیارغونې او احیا تفاهم‌لیک د ۱۳۹۷ل کال د لړم/ عقرب پر ۱۷مه په کابل کې لاسلیک شوی و او پلان دا و چې تېر کال دغه چارې په څلورو پړاوونو کې بشپړې شي، خو د ځینو تخنیکي ستونزو له کبله دغه چارې بشپړې شوې نه‌دي.

د بند بیارغونې ته ۴۰۰ ملیونه امریکايي ډالره ځانګړي شوي وو چې د اسیا پراختیايي بانک‌یې د ورکړې ژمنه کړې وه.

دهلې بند د افغانستان په جنوب کې د اوبو دوهم لوی بند دی چې د کندهار ښار ترڅنګ د ۷ ولسوالیو ځمکې خړوبوي.

د بلخ والي: مزار شریف کې د تښتول شوي ماشوم په تړاو ۲۱ کسان نیول شوي

د بلخ والي فرهاد عظیمي

د بلخ والي وايي د یوه تښتول شوي ماشوم د موندنې د عملیاتو په لړ کې د یوې مشکوکې ښځې په ګډون ۲۱ کسان نیول شوي دي.

دغه ماشوم درې میاشتې مخکې په مزار شریف ښار کې وتښتول شو چې تر اوسه‌یې د موندلو لپاره هڅو نتیجه نه‌ده ورکړې.

د بلخ والي فرهاد عظیمي پرون ازادي راډیو ته وویل: "دې قضیې زیات پرمختګ کړی، تر ۲۰ زیات کسان مخکې نیول شوي وو، یوه ښځه چې موږ ورباندې شکمن وو، په وروستیو ورځو کې نیول شوې ده. هیله‌من یو د هغې په مرسته د نورو تښتوونکو څرک ولګوو."

د تښتول شوي ماشوم عبدالرؤف پلار محمد نبي وايي، تښتوونکو ورڅخه د یو نیم ملیون ډالرو غوښتنه کړې ده.

جمهوري ریاست تېره شنبه وویل چې ولسمشر محمد اشرف غني د بلخ چارواکو ته خبرداری ورکړی، که دغه ماشوم پیدا نه‌کړي، ټول به له دندو لیرې کړای شي.

د تښتونې د دې قضیې په تړاو د بلخ ترڅنګ په کابل کې هم ګڼو کسانو مظاهرې کړې دي.

نور راوښيه

XS
SM
MD
LG