د لاسرسۍ وړ لېنکونه

تازه خبر
سه شنبه ۷ سلواغه ۱۳۹۹ کابل ۰۴:۵۶

افغانستان

ننګرهار کې سلګونه کسان د رضاکارو ښوونکو په توګه همکاري کوي

آرشیف

په لومړي ځل په ننګرهار کې دوه اونۍ وړاندې د پوهنې ریاست په نوښت د دغه ولایت د دولتي او خصوصي پوهنتونو، علمي او تحصیلي بنسټونو او مدني ټولنو په مټ د پوهنې د تدریس په نوم یو اشر پیل کړ.

دغه ریاست په دې برخه کې له یو شمېر دولتي او خصوصي پوهنتونو او مدني ټولنو سره هوکړه لیکونه هم کړي، چې ښوونځیو ته به رضاکار ښوونکي ورپېژني.

د ننګرهار د پوهنې ریاست د معلوماتو له مخې، په دغه اشر کې تر دې دمه سلګونو لوستو ځوانانو په رضاکارانه ډول د تدریس لپاره چمتووالی ښودلی دی.

د ننګرهار د پوهنې رئیس حسیب الله شینواري ازادي راډيو ته وویل، د ښوونکو د کمښت له امله دوی دېته اړ شول، چې د ننګرهار په لوستو ځوانانو په رضاکار ډول د تدریس غږ وکړي.

شینواری وایي، اوس چې په پراخه توګه لوستو ځوانانو په دغه اشر کې برخه اخیستې، نو ډاډه دی چې د په ښوونځيو کې به د ښوونکو د کمښت تشه به ورسره ډکه شي.

هغه زياتوي: "دغه کمپاین د ننګرهار په ټولو ولسوالیو کې عملاً پیل شوی، په ځانګړې توګه په هغو ولسوالیو کې ګرمسېر دي او همدا اوس په کې ښوونځي فعال دي، تدریس به په کې کېږي او چارې به یې پیلېږي او هغه ولسوالۍ چې سردسېرې دي، د نوي کال په پیلېدو سره به هلته هم دغه کمپاین غځېږي."

د ننګرهار د پوهنې رئیس په خبره، له دې موقع په استفادې چې د کرونا ویروس د انتقال د مخنیوي په په خاطر په ننګرهار کې پوهنتونونه رخصت او محصلین اوزګار دي، نو له دې چارې به بریالي ووځي.

دا په داسې حال کې ده چې د ننګرهار د پوهنې ډګر دمګړۍ د ۷زره ښوونکو د کمښت له ستونزې سره مخ دی.

دغه راز شااوخوا درې میاشتې وړاندې د ننګرهار والي ضیاءالحق امرخېل د دغه ولایت د والي په توګه په لومړۍ ورځ له ولسونو سره په یوه لویه غونډه کې زېرى ورکړ، چې ولسمشر ورسره د ننګرهار لپاره د دوه نیم زرو ښوونکو د ګمارنې ژمنه کړې ده.

د والي په خبره، دغه ژمنه یې د نوي لمریز کال لپاره کړې او د پیل کېدو سره سم به د دغو ښوونکو د ګمارنې چاره پیل کړي.

د یادونې وړ ده چې په ټول ننګرهار کې دمګړۍ ۹۰۲ بابه ښوونځي دي چې په کې ۱۶زره ښوونکي د تدریس په چارو بوخت دي.

د ورځې تازه خبرونه دلته ولولئ

اریانا شرکت: تېرکال۵۶۰ زره کیلوګرامه توکي ځېنې هېوادونو ته لېږدول شوي

د اریانا هوايي شرکت یوه الوتکه

د اریانا افغان هوايي شرکت مسولین وايي، په تېر مالي کال کې یې شااوخوا ۵۰۰ او ۶۰ زره کیلو ګرامه سوداګریز توکي د هوايي دهلېزونو له لارې د شااوخوا ۲۰۰ پروازونو په ترسره کولو سره د نړۍ بېلابېلو هېوادونو ته انتقال کړي.

د دې شرکت سرپرست کپتان عبدالمعروف سکندري په کابل کې ملت ته د حکومت ادارو د حساب ورکونې په پروګرام کې وویل، له انتقال شوېو سوداګریزو توکو یوازې شااوخوا ۶۰ زره یې د ۹ پروازونو په ترسره کولو سره هندوستان ته انتقال شوي.

ښاغلي سکندري زیاته کړه: "په ټوله کې ۵ لکه ۶۰ زره او ۴۴ کیلوګرامه سوداګریز توکي د ۲۵۲ پروازونو په ترسره کولو سره د نړۍ یو شمېر هېوادونو ته انتقال شوي. د کارګو له لارې موږ هم صادارتي کارګو درلوده او هم وارداتي کارګو."

د دې شرکت د معلوماتو له مخې د اریانا افغان هوايي شرکت په تېر مالي کال کې یوازې ۱۴ میلیونه افغانۍ مالیه حکومت ته ورکړې.

دغه شرکت اوس مهال څلور فعالې الوتکې لري چې د نړۍ څو لویو ښارونو لکه چین، هندوستان، ترکیه، دوبۍ او منځنۍ اسیا هېوادنو ته پروازونه کوي.

تېر مالي کال ۳۳ میلیارده افغانۍ نوي بانک نوټونه بازار ته وړاندې شوي

آرشیف

د افغانستان بانک مسوولین وايي، په تېر مالي کال کې یې ۳۳ میلیارده افغانۍ نوي بانک نوټونه بازار ته وړاندې کړي.

د دې بانک د تادیاتو برخې مشر میر عزیز برکي په کابل کې ملت ته د حکومتي ادارو د حساب ورکونې په پروګرام کې وویل، په تېر مالي کال کې که څه هم د کرونا ویروس خپور و خو بیا هم بانکي سکټور ته د خلکو علاقه مندي ډېره و.

هغه زياتوي: "د خلکو علاقمندي د اسلامي او نور بانکدارۍ سره ډېره وه. خلکو هڅه کوله خپل ټول قیمتي توکي له بانک سره خوندي کړي، او هغه کسانو چې خپل امانتونه بانک ته سپارل په شمېر کې زیاتوالی راغلی و، زموږ د معلوماتو له مخې ۴،۳ میلیونو ته د دوي شمېر رسېدلی و."

د دې بانک د چارواکو په خبره، تېر مالي کال کې د بانکي سکټور په دارايي برخه کې ۱۳ میلیارده افغانۍ زیاتوالی راغلی.

د دوي په وینا، خلک په بانکونو کې د خپلو پېسو د سپما چاره چټکه کړې او بانکي خدمتونو ته یې لېوالتیا ډېره وه.

د ننګرهار په بهسودو کې لسګونه شنې خونې ګټې اخیستنې ته وسپارل شوې

آرشیف

د ننګرهار په بهسودو ولسوالۍ کې ۱۹۲ شنې خونې ګټې اخیستنې ته وسپارل شوې.

د کرنې وزارت ویاند اکبر رستمي نن ازادي راډیو ته وویل، چې دغه شنې خونې د څه باندې ۱۰۰ میلیونه افغانیو په لګښت جوړې شوي دي.

نوموړي وویل، چې د دغو شنو خونو د جوړولو ۸۵ سلنه لګښت د کرنې وزارت او یوازې ۱۵ سلنه لګښت یې د برخمن شويو کسانو له خوا ورکړل شوی دی.

د افغانستان د کرنې وزارت د معلوماتو پر بنسټ په ۱۳۹۹یم مالي کال کې د کرنې وزارت د ننګرهار ولایت د کرنې، مالدارۍ، اوبولګولو او بڼوالۍ په بېلابېلو برخو کې څه باندې ۷۵۸ میلیونه افغانۍ لګولي دي.

دغه وزارت دغه شان په ننګرهار ولایت کې د مېوه لرونو ونو د نیالګیو کېنولو کمپین هم پیل کړی دی.

د کرنې وزارت وایې، په ۱۴۰۰ ام مالي کال کې، د ننګرهار ولایت په بېلابېلو ولسوایو کې د سټروسو، املوکو، شفتالو او نورو مېوو دوه زره جریبه بڼونه جوړوي.

ددغو بڼونو د جوړولو ټولیز لګښت، ۷۷ میلیونه افغانۍ ښودل شوی دی.

افغان چارواکي: په راتلونکي لمریز کال کې د اقتصادي ودې کچه ٣ سلنه لوړېږي

د کابل ښار يوه څنډه

د افغانستان د اقتصاد وزارت وايي، په راتلونکي ١۴۰۰ لمریز کال کې به د افغانستان د اقتصادي ودې کچه ٣ سلنه لوړه شي.

د دغه وزارت ویاند صبور نریمان نن ازادي راډیو ته وویل، چې د اقتصادي ودې کچه چې ۱،۱ وه، په ١٣٩٩ مالي کال کې ۲،۲ ته لوړه شوه، چې راتلونکي کال به ٣ سلنه لوړه شي.

نوموړی وايي، د بې وزلۍ کمولو لپاره يې اړین پروګرامونه ترلاس لاندې نېولې دي.

د ښاغلي نريمان په خبره، په ١٣٩٩ لمریز کال کې په بیلابیلو برخو کې ۴۵۵ پروژې پلي شوي چې له دې لارې په مستقیم او غیر مستقیم ډول څه باندې ‌۳ میلیونه وګړي برخمن شوي دي.

نوموړی دا هم وايي، چې دغه پروژې د هېواد په ٣٤ ولایتونو کې پلي شوي دي.

امنیتي چارواکي: په کندز کې ٧ طالبانو ته مرګ ژوبله اوښتې

افغان هوايي ځواک د عملیاتو پرمهال. ارشيف

پامیر قول اردو په کندز ولایت کې په هوايي حملو کې د پنځو طالبانو د وژل کېدو او د دوو نورو د ټپي کېدو خبر ورکوي.

۲۱۷ پامیر قول اردو په یوه بیان کې وايي، دا ډله طالبان پرون مازیګر وروسته له هغه په دریو هوايي حملو کې په نښه شول چې د ارچي ولسوالۍ په عابدي سیمه کې یې د افغانستان پر ملي دفاعي ځواکونو د حملو پلان جوړاوه.

طالبانو د افغان چارواکو د دې ادعاوو په اړه تراوسه څه نه دي ویلي.

د افغانستان او پاکستان د بهرنیو چارو وزیرانو پر سوله او سوداګرۍ بحث کړى

د عکس ښي لور ته د پاکستان د بهرنیو چارو وزیر شاه محمود قریشي او چپ لور ته د افغانستان د بهرنیو چارو وزیر محمد حنیف اتمر

د افغانستان او پاکستان د بهرنیو چارو وزیرانو پر دوه اړخیز تجارت او د افغانستان د سولې پر پروسه بحث وکړ.

د پاکستان د بهرنیو چارو وزیر شاه محمود قریشي پرون ناوخته په یوه ټویټ کې ویلي، چې له محمد حنیف اتمر سره یې د سیمې د ثبات لپاره د همکارۍ پر دوام هم خبرې وکړې.

دا ټلیفوني خبرې په داسې حال کې کېږي، چې د افغانستان د بهرنیو چارو وزارت د شاه محمود قریشي پر تازه څرګندونو انتقاد کړی و.

شاه محمود قریشي تېره اوونۍ په یوه مرکه کې ویلي وو: "د پاکستان حکومت هیله من دی، چې د امریکا نوی حکومت به د افغانستان سولې د خبرو بهیر او له افغانستانه د امریکايي ځواکونو د ویستلو لړۍ روانه وساتي."

د افغانستان د بهرنیو چارو وزارت ویلي وو، د پاکستان حکومت باید طالبان د تاوتریخوالي د کمولو د ژمنې عملي کولو او سراسري اوربند ته وهڅوي.

چارواکي: په بلخ کې ۹ طالبان وژل شوي

افغان هوايي ځواک د عملیاتو پرمهال

شاهین قول اردو په بلخ ولایت کې د افغان هوايي ځواک په بمبارۍ کې د نهو طالبانو د مړینې او د څلورو نورو د ټپي کېدو خبر ورکوي.

د ۲۰۹ شاهین قول اردو مطبوعاتي دفتر په یو بیان کې وايي، دا هوايي حمله پرون ماسپښین د چاربولک ولسوالۍ په خان آباد کلي کې د طالبانو د راټولېدو پر یوه مرکز وشوه.

په بیان کې یادونه شوې چې د طالبانو دې ډلې پر افغان ځواکونو د حملو پلان درلود.

افغانستان او ایرلنډ د کرکټ ملي ټیمونه نن درېیمه یو ورځنۍ لوبه کوي  

د ايرلنډ او افغانستان د کرکټ ملي لوبډلې لوبغاړي

افغانستان او ایرلنډ د کرکټ ملي ټیمونه نن سې شنبه په خپلو کې درېیمه یو ورځنۍ یا پنځوس اووره نړیواله مسابقه کوي.

د کرکټ بورډ ویاند فرید هوتک نن ازادۍ راډیو ته وویل، د افغانستان لوبغاړي دغسې مسابقې ته چمتووالی لري.

هغه زياتوي:*"ټاکل شوې نن د افغانستان د کرکټ ملي لوبډله د ایرلنډ د کرکټ له ملي لوبډلې سره د کاردان پوهنتون جام سیالیو درېیمه نړیواله پنځوس اووره سیالي ترسره کړي. ټولې لوبې د افغانستان په کوربه توب کېږي. افغان لوبغاړي نننۍ مسابقې ته پوره چمتووالی لري."

د افغانستان د کرکټ ملي ټیم دغه لوبلړۍ چې په متحد عرب اماراتو کې ترسره کېږي، د دوو مخکنیو مسابقو په ګټو سره ګټلې ده.

ارغندیوال: پر ما لګېدلي تورنه ټول بې اساسه دي

عبدالهادي ارغندیوال

د افغانستان د مالیې وزارت لرې شوی وزیر عبدالهادي ارغندیوال وايي، په ده لګېدلي تورنه ټول بې اساسه دي.

نوموړي په کابل کې د یوې خبرې ناستې پرمهال وویل، د افغان جمهور رییس تر څنګ یو حلقه فعالیت لري چې هر کله یې ګټي په خطر کې شي دغه ډول دسیسې جوړوي.

هغه وايي، اوسنی حالت سم نه دی او په دې وضیعت کې کار کول ډېر سخت دی.

نوموړي زياته کړه: "زموږ خلکو ته هم دغه واقعیت معلوم دی چې یوې حلقې د جمهور رییس شاوخوا محاصره کړې او له بده مرغه رییس جمهور هم ډېری وخت له واقعیتونو نه خبرېږي، کله چې ددغې حلقې ګټې په خطر کې شي بیا په داسې کارونو لاس پورې کوي."

ولسمشرۍ مانۍ تر اوس په دې اړه څه نه دي ویلي.

د افغانستان جمهور رییس محمد اشرف غني دوه ورځې وړاندې د مالیې وزیر عبدالهادي ارغندیوال د مدیریتي ضعف، غیر قانوني مقرریانې او د غیر قانوني کړنو په تور له دې دندې لرې کړ.

عبدالهادي ارغندیوال څو مودې وړاندې د ولسي جرګې لخوا د باور رایو په اخیستو څخه وروسته د مالیې وزیر شوى و.

په غزني کې وسله والو د سرې مياشتې ټولنې ٢ کارکوونکي ټپیان کړي

د سرې مياشتې ټولنې پر موټر بريد کې دوه کسان ټپیان شوي

په غزني کې د سرې میاشتې د ټولنې پرکارکونکو په وسله وال برید کې د دې ټولنې دوه تنه کارکوونکي ټپیان شوي دي.

په سیمه کې د دغې ټولنې رييس سمیع الله صدیق نن ازادي راډیو ته وویل، چې دغه برید نن غرمه مهال د دوی د هغو کارکونکو د موټرو پر کاروان شوی چې په قره باغ ولسوالۍ کې د بشرپالنې د خدمتونو تروړاندې کولو وروسته بېرته راګرځېدل.

هغه زياتوي: "د کابل ـ کندهارپه عومي سړک باندې، غزني ښار ته څېرمه د نوغي په کلي کې پرې وسله وال برید شوی چې له بده مرغه زموږ دوه تنه همکاران ټپیان دي او موټرو ته هم زیان رسېدلی دی."

ښاغلی صدیق زیاتوي، چې کارکونکي یې سیمې ته له دواړو اړخونو، حکومت او طالبانو سره له همغږۍ وروسته تللي و او په دې اړه چې دغه برید چا یا کومې ډلې پرې کړی، پلټنه کوي.

په افغانستان کې ډیجیټل او انټرنېټي ټلویزیوني خپرونو ته زمینه برابرېږي

د افغانستان رسنۍ

د مخابراتي خدمتونو د تنظیم اداره يا اترا وایي، ډېر ژر به په افغانستان کې ډیجیټل او آی پي یعنې انټرنېټي ټلویزیوني خپرونو ته زمینه برابره کړي.

د دې ادارې ویاند سعید شینواري ازادي راډیو ته په دې اړه چې دا به د ټلویزیونې خپرونو په برخه کې څه ډول اسانتیاوې رامنځته کړي، وویل: "په دې سره به په افغانستان کې خلک په نوې بڼه، په ښه کیفیت ټلویزیوني نشراتو او هم د آی پي له لارې نشراتو ته لاسرسی ولري. په دې سره به د ټلویزیونو عواید هم ښه شي."

تر دې مخکې د مخابراتي خدمتونو د تنظیم ادارې يا اترا رئیس عمر منصور انصاري په کابل کې د رسنیو له یوه ګروپ سره په خبرو کې ویلي و چې ادارې یې د تصویري او راډیويي رسنیو د فریکونسۍ د ډیجیټلي کولو لپاره هڅې پیل کړې چې په نتیجه کې یې خلک ډېر ژر په ښه کیفیت تصویري او غږیزو نګورنو نشراتو څخه برخمن شي.

په افغانستان کې په اوس وخت کې په سلګونو صوتي او غږیزې رسنۍ فعالیت کوي.

شاهین قول اردو: بلخ کې ۱۱ وسله‌وال طالبان ووژل شول

ارشیف، بلخ کې د شاهین قول اردو عملیات

د ۲۰۹ شاهین قول اردو په بلخ کې طالبانو ته د مرګ‌ژوبلې خبر ورکوي.

دې قول اردو نن په یوه خپره کړې خبرپاڼه کې ویلي چې تېره شپه طالبانو د دې ولایت په شولګره ولسوالۍ کې د افغان امنیتي ځواکونو پر پوستو بریدونه وکړل چې د درېیمې لوا د کمانډو د درېیم کنډک پوځیانو هغه په شا وتمبول او د نښتو په پایله کې ۱۱ طالبان ووژل شول او ۶ نور یې ټپیان شول.

حمد الله محب: ځینو هېوادونو د طالبانو د مذاکراتي ډلې کورنۍ برمته کړي

د افغانستان د ملي امنیت سلاکار حمد الله محب

د افغانستان د ملي امنیت سلاکار وايي، د طالبانو د مذاکراتي ډلې غړي خپلواکي نه‌لري.

حمد الله محب پرون د هوايي ځواکونو په قول اردو کې د وینا پر مهال وویل، د طالبانو د مذاکراتي ډلې د دغو غړو کورنۍ د ځینو هېوادونو له‌خوا برمته شوي دي.

ښاغلی محب زیاتوي: ​"دا شی یې واضح کړ چې دوی خپل استقلالیت نه‌لري. محاصره دي او ګروګان نیول شوي دي. د دوی فامیلونه په پردي مملکت کې اوسېږي. هغه هېواد دوی ته لارښوونه کوي چې دلته ترورېستي اعمال او اقدامات وکړي."

د ملي امنیت سلاکار وايي، په قطر کې د طالبانو د مذاکراتي ډلې هر غړی جلا جلا غوښتنې مطرح کوي.

په قطر کې د طالبانو سیاسي دفتر او یا د مذاکره کوونکي پلاوي غړو تر اوسه د ښاغلي محب د تازه څرګندونو په اړه څه نه‌دي ویلي.

په قطر کې د مذاکرو د دوهم پړاو خبرو ۲۰ ورځې کېږي، خو تر اوسه په دغو مذاکرو کې د کوم ځانګړي پرمختګ خبر نه‌دی ورکړل شوی.

د کورنیو چارو وزارت: طالبانو د خپلو جنایتونو لپاره بېلابېلې لارې غوره کړي

هغه مستري‌خونه چې د کورنیو چارو وزارت په وینا مستري یې په موټرو کې ماینونه ځای پر ځای کول.

د کورنیو چارو وزارت ویاند وايي طالبانو د خپلو جنایتونو د عملي کولو لپاره بېلابېلې لارې خپلې کړې دي.

طارق ارین پرون ناوخته په یوه ټویټ کې ویلي، پولیسو د کابل په اتمه حوزه کې یو مستري نیولی چې په دولتي موټرو کې یې ماینونه ځای پر ځای کړي.

ښاغلي ارین له خلکو غوښتنه کړې، کله چې خپل موټرونه مستریانو ته بیايي باید دقت وکړي.

د کورنیو چارو وزارت ویاند وايي د دولت دښمن د خلکو د په نښه کولو لپاره بېلابېلې لارې کاروي چې د نانوای، د لیني موټرو د چلوونکي، کراچۍ چلوونکي او مستریانو په بڼه خپل فعالیتونه کوي.

دا څرګندونې په داسې حال کې کېږي چې د کابل په ګډون په ځینو ولایتونو کې هدفي وژنې زیاتې شوې دي.

د افغانستان د کرکټ ملي ټیم د ایرلنډ پر وړاندې دوهمه لوبه هم وګټله

د افغانستان د کرکټ ملي لوبډلې لوبغاړي

د افغانستان د کرکټ ملي ټیم د ایرلنډ په وړاندې دوهمه لوبه هم وګټله.

د یکشنبې په لوبه کې د ابوظبي په شیخ زاید سټډیوم کې وشوه افغان لوبغاړو د ایرلنډ ۲۶۰ منډې هدف په ۴۵ اوور کې پوره کړ.

د لوبې غوره لوبغاړی رحمت شاه و چې ۱۰۳ منډې یې جوړې کړې.

هغه وویل: "واقعاً څه پلان چې ما ته کوم پلان د روزونکي او کپټان له خوا راکړل شوی و چې خپله طبیعي لوبه به کوې ما ته توپ ډېر ښه جوړېده. خپل شاټونه مې نه دي درولي، کامیابه شوم او سلیزه مې ووهله. هر ټیم دا غواړي چې نړیوال جام ته ووځي موږ هم انشاالله کوښښ کوو څومره نورې لوبې چې زموږ پاتې دي هغه هم وګټو او نړیوال جام ته لار پیدا کړو."

د بالرانو په برخه کې هم نوین الحق څلور ویکټې، مجیب الرحمن دری او ګلبدین او راشد یوه یوه وېکټه واخیسته.

د دې لوبې په بریا سره افغان ټیم د ایرلنډ په وړاندې د دریو لوبو لړۍ که څه هم وروستۍ یوه دوه ورځې وروسته کېږي وګټله.

د افغانستان او ایرلنډ دا لوبې د ۲۰۲۳ کال د نړیوال جام د سوپرلیګ په لړ کې دي چې د هرې لوبې بریا په نړیوال جدول کې ګټونکي ته لس نمرې ور زیاتوي.

نور راوښيه

XS
SM
MD
LG