د لاسرسۍ وړ لېنکونه

تازه خبر
دوشنبه ۶ سلواغه ۱۳۹۹ کابل ۰۹:۰۳

نړۍ

د ملیونونو امریکایانو لپاره د بې‌کارۍ د اضافي پیسو ورکړه وځنډول شوه

واشنګټن کې یو شمېر امریکایان

د ملیونونو امریکایانو لپاره د بې‌کارۍ د اضافي پیسو ورکړه وروسته له هغې وځنډول شوه چې د متحده ایالاتو ولسمشر ډونالد ټرمپ د 'کووېډ-۱۹' ناروغۍ له امله د مرستې او د حکومت د لګښتونو د لایحې چې کانګرس د تېرې اوونۍ په پیل کې تصویب کړې، له توشېح کولو ډډه وکړه.

ټرمپ په دې خبرې سره چې دی به د ۹۰۰ میلیارد ډالرو اقتصادي مرستې لایحه توشېح نه‌کړي، کانګرس حیران کړی او هم‌یې دغه لایحه له مبهم برخلیک سره مخامخ کړې ده.

وروسته له هغې جمهوري‌پالو مشرانو وویل چې ټرمپ د دغې لایحې ملاتړ کوي، د کانګرس دواړو جرګو دغه لایحه د ډسمبر په ۲۲مه په چټکۍ تصویب کړې وه.

په دغه لایحه کې د هغو کسانو لپاره په اوونۍ کې د بې‌کارۍ ۳۰۰ ډالره نغدي مرسته هم شامله ده چې د کرونا له امله بې‌کاره شوي. له شاوخوا ۱۱ ملیونه کسانو سره دغه اضافي مرسته د شنبې په ورځ یعنې د ډسمبر په ۲۶مه پای ته ورسېده چې په دې سره خلک له اقتصادي پلوه له یوه ناڅرګند برخلیک سره مخامخ شوي دي.

د مرستې په دغه لایحه کې له یو شمېر امریکایانو سره چې عاید یې کم دی، په یو وار د ۶۰۰ ډالرو مرسته هم شامله ده. ولسمشر ټرمپ ویلي چې دا مرسته ډېره کمه ده او غوښتنه‌یې وکړه چې باید د دغه یو ځلي مرستو اندازه ۲،۰۰۰ ډالره وي.

د امریکا منتخب ولسمشر جو بایډڼ ټرمپ ټورن کړ چې له مسؤلیته اوږې خالي کوي چې دا به د ده په وینا ورانوونکي عواقب ولري.

د ورځې تازه خبرونه دلته ولولئ

د بې پولې خبریالانو ټولنې د پاکستاني چارواکو وروستى بربنډ سانسور غندلی

آرشیف

د بې پولې خبریالانو ټولنې د پاکستاني چارواکو هغه بربنډ سانسور غندلی چې په نتیجه کې یې بي بي سي له یوه خصوصي پاکستاني ټلویزیوني چینل سره په اردو ژبه د خبرونو خپرېدل درولي دي.

بي بي سي ویلي، چې چارواکو د دوی په خپرونو کې مداخله کوله.

د بې پولې خبریالانو د آسیاپسفیک د څانګې مشر ډانیل بسټارډ نن په یوه خپاره کړي بیان کې وویل چې له AAJ ټلویزیون سره د بي بي سي د قرارداد د لغوه کولو پرېکړه دا مانا لري چې بي بي سي له دې ډډه کړې چې پر دغه چینل د پاکستاني چارواکو له خوا لګول شویو بندیزونو ته په ګونډو شي.

هغه د پاکستان پرحکومت غږ وکړ، چې د خبري رسنیو د ایډیټوریال په چارو کې له مداخلې لاس واخلي او زیاتوي دا ډول مداخله د ډیموکراتیکو اساسي اصولو خلاف او هغه په پاکستان کې د پوځي د یکتاتورۍ دورو د تجربې ښکارندويي کوي.

اکسفام: د خپرې شوې کرونا وبا له امله په نړۍ کې ١٠ کسان شتمن شوي

د فیسبوک موسس مارک زاکربرګ

اکسفام چې په نړۍ کې له بېوزلۍ سره مبارزه کوي، وایي، د خپرې شوې کرونا وبا له برکته په نړۍ کې لس کسان دومره شتمن شوي چې پیسې یې د ټولې نړۍ وګړو ته د کوویډ۱۹ ناروغۍ ضد واکسین له پېرلو هم زیاتې دي.

دغې نړیوالې مرستندویه ټولنې په یوه راپور کې چې نن یې خپور کړی، د ډېرو شتمن شویو کسانو په ډله کې د امازون د کمپنۍ مشرجیف بیزوس، د فیسبوک موسس مارک زاکربرګ او د تیسله کمپنۍ موسس ایلون مسک ښودلي چې د دغې وبا له برکته یې ټوله شتمني ۵۴۰ ملیارډ ډالره زیاته شوې ده.

اکسفام دغه راز ویلي، دا دومره شتمني ده چې د نړۍ وګړو ته د کوویډ ۱۹ ناروغۍ ضد واکسین د برابرولو ترڅنګ دا مسله یقیني کولای شي، چې هیڅوک د دغې وبا له امله له بېوزلۍ سره مخامخ نه شي.

اکسفام اټکل کړی، چې په نړۍ کې د دغې وبا د خپرېدو په نتیجه کې د هغو کسانو چې په بېوزلۍ کې ژوند کوي، نور پنځه سوه ميليونه ور اضافه شوي دي.

په عربستان کې ښځینه موډلانو د جامو ننداره وړاندې کړه

آرشیف

د سعودي عربستان موډلانو پرون د دې هېواد په پلازمېنه ریاض کې د بلجیم د سفارت په انګړ کې د لامبو د یوه حوض په غاړه د جامو یوه ننداره یا فیشن شو اجراکړه.

دغه موډلانې چې دودیزې عبایا جامې یې په تن وې، په نوې بڼه د یوې عصري مېرمنې لپاره د دغو جامواغوستل یې نندارې ته وړاندې کړل.

د بلجیم د سفارت له خوا تنظیم شوې دغه ننداره کې د سعودي د ملکې صفیه حسین له خوا ډیزاین شوې جامې چې د سعودي د کلتور تر نفوذ لاندې د لویدیځ د مختلفو ډولونو یوګډ ترکیب دی، وښودل شوې.

د سعودي عربستان د ولیعهد شهزاده محمد بن سلمان له خوا پر ښځو د موټرچلولو د بندیز د لیرې کولو په ګډون ټولنیز چټکو بدلونونو چې په دې وروستیو کلونو کې عملي شوي، په دې هېواد کې د ښځو له خوا د جامو دا ډول نندارې ته لاره پرانیستې ده.



په بېلاروس کې لسګونه اعتراض کوونکي نیول شوي

د بېلاروس امنیتي ځواکونه د اعتراض کوونکو د نيولو پر مهال

په بېلاروس کې د الکساندر لوکاشينکا پر ضد د اعتراضونو په دوام د تیرې ورځې په اعتراضونو کې نږدې ۱۶۰ کسان نیول شوي دي.

دغه اعتراضونه په اګست میاشت کې د ولسمشرۍ د شپږمې دورې لپاره د لوکاشينکا د بیا ټاکل کېدو په وړاندې په بېلاروس کې پیل شوي دي.

معترضان ادعا کوي، چې په دغو انتخاباتو کې درغلي شوې ده.

د بېلاروس چارواکو د دغو اعتراضونو په ترڅ کې په زرګونو کسان نیولي دي.

اندونیزیا د تېلو یو ایرانی ټانکر او د پاناما یوه بېړۍ ضبط کړي

اندونیزیا کې نیول شوې ایرانۍ او د پانامه بېړۍ

اندونیزیا وایي، د دې هېواد په جنوب ختیځو اوبو کې یې د تېلو یو ایرانی ټانکر او د پاناما یوه بېړۍ چې په غیر قانوني توګه‌یې تېل لیږدول، ضبط کړي دي.

له دې مخکې ایران تورن شوی چې پر دې هېواد د امریکا له‌خوا له لګول شویو بندیزونو څخه د ځان تېر ایستلو لپاره د تېل وړونکو بېړیو د رادار سیستمونه غیر فعال کوي.

د اندونیزیا د سمندري چارو د امنیت ادارې نن وویل چې د اومه تېلو دغه سترې لېږدونکې کښتۍ یې چې پر یوې د ایران بیرغ او پر بلې د پاناما بیرغ رپېده، یوه ورځ مخکې د کالمانتان ولایت په سواحلو کې ضبط کړي.

دې ادارې ویلي چې په دې اړه پلټنه پیل شوې. د دغو کښتیو ۶۱ عمله هم نیول شوې ده.

د ایران د بهرنیو چارو وزارت ویاند سعید خطیب زاده په تهران کې په یوه خبري غونډه کې وویل چې د اندونیزیا له چارواکو یې غوښتي دي چې د ضبط شویو کښتیو په اړه ورسره نور جزئیات شریک کړي.

کوبیا له متحدانو سره د اړیکو اعاده کېدو په اړه د بایډن د څرګندونو هرکلی وکړ

د افغانستان لپاره د اروپایي ټولنې ځانګړی استازی رولاند کوبیا

د افغانستان لپاره د اروپایي ټولنې ځانګړي استازي رولاند کوبیا د امریکا د نوي ولسمشر جو بایډن د هغو څرګندونو هرکلی کړی چې د لوړې په مراسمو کې یې په نړۍ کې له خپلو متحدانو سره د اړیکو د بېرته اعاده کېدو په اړه کړې وې.

کوبیا پرون په یوه ټویټ کې د بایډن دې خبرې ته چې ویلي یې دي موږ به خپل ائتلافونه بېرته ترمیم کړو ويلي، دا به په افغانستان کې نړیوالې هڅې چې د دې هېواد د وګړو د ښه ملاتړ لپاره د ګډو پرېکړو او په عملي چارو کې د همغږۍ لپاره ورته اړتیا ده، له سره تنظیم کړي.

ښاغلی کوبیا دا څرګندونې داسې مهال کوي چې نړیوالې ټولنې تېر کال د جنیوا په کنفرانس کې د افغانستان له حکومت سره تر۲۰۲۴ کال پورې د څه باندې ۱۰ میلیارده ډالرو نویو مرستو چې ځینې مشروط دي، ژمنې وکړې.

په عین حال کې د پوځي هڅو په ترڅ کې ټاکل شوې ناټو د راتلونکې فبرورۍ میاشت کې د دفاع وزیرانو په غونډه کې په دې اړه چې ایا دا تړون په افغانستان کې خپل حضور ته دوام ورکړي او که‌یې پای ته ورسوي، پرېکړه وکړي.

د هالند دوو ښارونو کې د کرونا له کبله د لګول شویو بندیزونو ضد مظاهرې وشوې

هالند کې مظاهرې او د پولیسو او معترضانو اخ‌وډب

د هالند په دوو ښارونو کې پرون خلکو د کرونا له کبله د لګول شویو بندیزونو پر ضد مظاهره وکړه او له پولیسو سره ونښتل.

د جنوبي ښار ایندهوون (Eindhoven) مرکز کې سلګونه مظاهره‌چیانو اورونه بل کړل او پولیس‌یې په ډبرو ویشتل.

پولیسو د مظاهرې د تیت او پرک کولو لپاره اوښکې بهوونکی ګاز او د اوبو توپونه وکارول او لسګونه مظاهره‌چیان یې ونیول.

د ټول‌بند پر ضد د هالند پلازمېنه امستردام کې هم مظاهره وشوه چې څه باندې ۱۰۰ تنه ترې ونیول شول.

دا مظاهرې یوه ورځ وروسته تر دې وشوې چې چارواکو د پخوانیو بندیزونو په دوام دغلته د شپې له نهو د سهار تر څلور نیمو بجو ګرځ‌بندیز اعلان کړ.

د اروپا په یو شمېر نورو هېوادونو کې هم د کرونا له کبله لګول شوي بندیزونه جدي شوي دي.

فرانسه له خپلو ګاونډیو ورتلونکو کسانو نه د کرونا منفي معاینه غواړي او سویډن ویلي، له ناروې د خلکو ورتګ بندوي، ځکه چې اوسلو کې د کرونا ویروس د نوې بڼې پېښې لیدل شوې دي.

امریکا له اقلیمي بدلون سره د مبارزې په تړاو د نړۍ له مشرانو سره غونډه کوي

د امریکا ولسمشر جو بایډن او د جان کري په شمول ځیني نور چارواکي

امریکا به له اقلیمي بدلون سره د مبارزې هڅو ته بېرته ستنېدل، نن (د جنورۍ په ۲۵مه) په همدې تړاو د لوړې کچې یوې غونډه کې د ګډون له لارې وښيي.

د امریکا د بهرنیو چارو پخوانی وزیر جان کري به چې د اقلیم په برخه کې د ځانګړي استازي په دنده ګمارل شوی، د اقلیم د بدلون په اړه د نړۍ د یو شمېر مشرانو په غونډه کې ګډون وکړي.

دغې غونډه کې د چین مرستیال صدراعظم هن ژینګ، د جرمني صدراعظمه انګلا مېرکل، د فرانسې ولسمشر امانوئل مکرون، د بریتانیا صدراعظم بورېس جانسون او یو شمېر نور مشران برخه اخلي.

په انلاین ډول د دغې جوړېدونکې غونډې هدف دا ښودل شوی چې تر ۲۰۳۰ کال پورې د اقلیم بدلون ته د مبارزې لپاره عملي لارې چارې ومومي.

له دې غونډې مخکې د نوبل جایزې د پنځو ګټونکو په ګډون څه باندې درې زره ساینس‌پوهانو د نړۍ له مشرانو غوښتي چې د ځمکې د کرې له تودېدو خلک خوندي کړي.

دوی ویلي، نړۍ لا له مخکې د وچکالۍ، اورونو، تودو څپو او سېلابونو له کبله لویې ویجاړۍ تجربه کوي.

د ملګرو ملتونو کارکوونکو ته خبرداری: پاکستان کې راجستر الوتکو کې سفر مه‌کوئ

ارشیف، د پاکستان د نړیوال هوايي شرکت الوتکه

ملګرو ملتونو خپلو کارکوونکو ته اطلاع ورکړې چې په پاکستان کې د راجستر شویو هوايي شرکتونو په الوتکو کې دې سفرونه نه‌کوي.

دا خبرداری په داسې حال کې ورکول کېږي چې اندېښنې شته د پاکستان د هوايي شرکت ځیني پیلوټان ښايي د الوتنو پر شرایطو برابر نه‌وي.

د ملګرو ملتونو د امنیتي مدیریت ادارې په هغه یادښت کې چې د شنبې په ورځ پاکستاني رسنیو ته هم یوه کاپي په لاس ورغلې ویلي: "د پیلوټانو د مشکوکو جوازونو په اړه د روانې څېړنې له کبله په پاکستان کې راجستر شویو الوتکو کې د سفر لپاره د احتیاط سپارښتنه کېږي."

دا لا معلومه نه‌ده چې ملګرو ملتونو دغه اطلاعیه کله خپلو کارکوونو ته خپره کړې ده.

پاکستان په جون میاشت کې اعلان وکړ چې د ۲۶۲ پیلوټانو دندې یې تر پلټنې وروسته ځنډولې دي.

دا پرېکړه په مې میاشت کې د یوې الوتکې تر نسکورېدو وروسته وشوه چې په نتیجه کې یې ۹۷ کسان مړه شول.

پاکستان په اضطراري ډول خپلو اتباعو ته د روسیې کرونا ضد واکسین تصویب کړ

د روسیې ساخت سپوتنیک وي کرونا ضد واکسین

پاکستان د کرونا وبا د لا خپرېدو د مخنیوي لپاره، خلکو ته په اضطراري ډول د روسیې ساخت واکسین ورکول تصویب کړل.

د سپوتنیک وي (Sputnik-V) په نوم د کرونا ضد واکسین ورکول په داسې حال کې تصویب شول چې پاکستان د اکسفورډ پوهنتون او استرازنیکا شرکت او د چین د یوه دولتي شرکت سینوفارم واکسینونو تطبیق ته هم رضایت ښوولی دی.

دا چې په پاکستان کې به سپوتنیک وي واکسین کله پیلېږي، کومه مشخصه نېټه نه‌ده اعلان شوې.

پاکستان چې د نړۍ په سطحه د نفوسو د شمېر له مخې پنځم ځای لري، په کرونا ویروس په‌کې څه باندې ۱۱ زره کسان مړه شوي دي.

سپوتنیک وي واکسین چې د خوندیتوب او اغېزناکتوب د تضمین لپاره‌یې پراخې کلینیکي ازموینې نه‌دي شوي، د اروپا د درملو شرکت او د روغتیا نړیوال سازمان له‌خوا نه‌دی تأیید شوی.

یو روسی پولیس افسر د ناوالني په پلوۍ له پیغام خپرولو وروسته له دندې وشړل شو

ارشیف، په روسیه کې د مظاهرو پر مهال مېشت پولیس

د روسیې یو پولیس افسر وروسته له هغې له دندې وشړل شو چې د کرملېن د توقیف شوي منتقد الکسي ناوالني په پلوي یې په ټولنیزو شبکو کې لنډ وېډیويي پیغام خپور کړ.

د روسلان اګیبالوف په نوم دغه پولیس، ناوالني او نور نیول شوي کسان "سیاسي بندیان" بللي وو.

اګیبالوف د مسکو د جنوب لوېدیځ په ۴۶۰ کیلومترۍ کې په دنده بوخت و چې تېره جمعه په یوټیوب کې د وېډیو تر خپرېدو څه کم یو ساعت وروسته له دندې وشړل شو.

تر دې یوه ورځ مخکې، د پنجشنبې په ورځ په روسیه کې په ملي سطحه د ناوالني په پلوي مظاهرې روانې وې.

ناوالني چې په جرمني کې یې درملنه کېده، تېره اوونۍ له ستنېدو سره سم د مسکو په هوايي ډګر کې تر نیول کېدو وروسته توقیف شو.

یونېسف: جګړه‌ځپلې سوریه کې تر نیمايي زیات ماشومان له زده‌کړو بې‌برخې دي

ارشیف، سوریه کې یو ټولګی

د ملګرو ملتونو د ماشومانو د ملاتړ اداره یا یونېسف وايي په جګړه‌ځپلې سوریه کې تر نیمايي زیات ماشومان له زده‌کړو بې‌برخې دي.

یونېسف پرون یکشنبه وویل، یو پر درېیمه برخه ښوونځي یا ویجاړ شوي یا هم د جنګیالیو له‌خوا د جنګي اهدافو لپاره کارول کېږي.

یونېسف وايي، په سوریه کې چې له نږدې ۱۰ کلونو راهیسې جګړه روانه ده دوه ملیونه او ۴۰۰ زره ماشومان له ښوونځيو بې‌برخې دي.

د اسوشیټډ پرس اژانس په حواله، له ۲۰۱۱م کال راهیسې د سوریې په جګړه کې تر درې لکه او ۸۷ زرو ډېر کسان وژل شوي او په لکهاوو نور بې‌ځایه شوي دي.

په چین کې د ایسارو کان کیندونکو له ډلې یو تن ژغورل شوی

په دغه کان کې دوه اونۍ وړاندې چاودنه شوې وه.

چین په شمال کې د سرو زرو په یوه کان کې د ایسارو کان کیندونکو له ډلې یو تن نن ژغورل شوی دی.

د کیژیا سیمې د سرو زرو په کان کې څوارلس ورځې مخکې چاودنه شوې وه او تر اوسه پورې شاوخوا لس کان کیندونکي لا هم تر ځمکې لاندې ایسار پاتې دي.

د سرو زرو کان دا کان کیندونکي د ځمکې لاندې ۵۸۰ مترۍ کې په کار لګیا و چې چاودنه پرې وشوه او د وتلو لار یې بنده شوه.

په پېښه کې یو کان کیندونکی وژل شوی هم دی.

د چین دولتي ټلویزیون نن راپور ورکړی چې له دوه اونیو وروسته تر اوسه یو کس راژغورل شوی چې ډېر کمزوری شوی.

چارواکي وايي، ښايي دوه نورې اوونۍ هم وخت نیسي څو ژغورونکي ټیمونه لسو نورو کسانو ته چې د کان په یوه برخه کې ایسار دي لار خلاصه کړي.

د بشري حقونو فعالې کريمې بلوڅ مړی بلوچستان ته لېږدول شوی

د کریمي بلوڅ تصویر پر یوه اعتراضیه پاڼه "بلوڅان ان په کاناډا کې هم په امن کې نه‌دي"

د بشري حقونو فعالې، کريمې بلوڅ مړی بلوچستان ته لېږدول شوی او د تربت په تومپ کلي کې به خاورو ته سپارل کېږي.

د هغې ورور سمیر بلوڅ نن د ازادي راډيو ته وويل چې ځايي چارواکو د دوی په کلي کې ګرځبندیز لګولی او خلک نه‌پرېږدي چې تر جنازې وروسته په پلان شوې مظاهره کې برخه واخلي.

د پاکستان امنيتي ځواکونو تر اوسه په دې اړه څه نه‌دي ويلي.

کريمه بلوڅ د پاکستان پر پوځ د نيوکو لپاره پېژندل کېده.

هغه د کاناډا په تورانتو کې د ډسېمبر په ۲۰مه لادرکه او يوه ورځ ورسته‌یې مړی د يو سيند سره په خوا کې وموندل شو.

پولیسو رسنيو ته په لېږلو بيانونو کې ويلي چې د هغې مرګ جرمي اړخ نه‌لري، خو د هغې کورنۍ ويلي نوموړې ته له پاکستانه ګواښونه کېدل.

د دوی په وینا، له همدې وجې یې په کاناډا کې سياسي پناه اخیستې وه، نو ځکه بايد پوره پلټنې وشي.

د بخښنې نړیوال سازمان، د پاکستان بشري حقونو کمېسیون، بلوڅ ملت‌پالو او پښتون ژغورنې غورځنګ د بلوڅانو د حقونو فعالې کریمې بلوڅ پر مړینه خواشیني څرګنده کړې وه او د دې پېښې د پلټنو غوښتنه‌یې کړې ده.

پاکستان د احمدي فرقې د وېب‌پاڼې د بندولو امر وکړ

ارشیف، انځور تزئیني بڼه لري.

پاکستان د احمدي فرقې د وېب‌پاڼې د بندولو امر کړی دی، د دوی وېب‌پاڼه له امریکا خپرونې کوي.

د دې مذهبي فرقې د وېب‌پاڼې چلوونکی حارث ظفر وايي، د پاکستان د مخابراتي ادارې چارواکو د روانې میاشتې په پیل کې رسمي حکم صادر کړی چې د دوی وېب‌پاڼه باید په پاکستان کې سانسور شي.

ظفر د پاکستان د حکومت دا اقدام د بیان او دیني ازادیو خلاف کار وباله.

د پاکستان پارلمان په ۱۹۷۴ م کال احمدي فرقه نامسلمانه اعلان کړه او له هماغه مهاله د دې فرقې پر غړو په پاکستان کې د سخت‌دریځو ډلو له لوري په ځلونو بریدونه شوي دي.

نور راوښيه

XS
SM
MD
LG