افغانستان
د کونړ په غازي اباد کې چاودنې ۳ ملکیان ټپیان کړل

د کونړ په غازي اباد ولسوالۍ کې د ماین چاودنې ۳ تنه ملکیان ټپیان کړل.
د امنیه قوماندانۍ ویاند فریدالله دهقان وایي، چاودنه نن سهار ۱۰ بجې د همدې کسانو پر موټر وشوه: "د وطن، خاورې او خلکو دښمنانو په لویه لاره کې ماین خښ کړی و، د ملکیانو سراچه ډوله موټر پرې برابر شو چې درې تنه په کې ژوبل شوي دي."
د سیمې اوسیدونکو بیا ازادي راډیو ته ویلي چې ماین چاودنه کې ۸ تنه ټپیان شوي دي.
تراوسه چا د دغې چاودنې مسولیت نه دی منلی.
د ورځې تازه خبرونه دلته ولولئ
د یوناما مشره: د فرهنګي ارزښتونو او میراثونو د ساتنې په اړه دې خلکو ته پوهاوی ورکړل شي

په افغانستان کې د ملګروملتونو د مرستندویه ماموریت یا یوناما مشرې روزا اوتانبایوا د طالبانو د حکومت د اطلاعاتو او کلتور وزیر خیرالله خیرخواه سره کتلي.
د طالبانو تر واک لاندې باختر خبري اژانس د چهارشنبې په ورځ د (فبرورۍ۱۹مه) پر خپلې ایکس پاڼې/پخواني ټویټر د دې کتنې خبر ورکړی او ویلي دي، دواړو خواوو په افغانستان کې د فرهنګي ارزښتونو او میراثونو د ساتنې په اړه خبرې کړي.
د یوناما د مشرې په ټکو، له فرهنګي ارزښتونو د خلکو خبرتیا او پوهای کولی شي، د دې ارزښتونو په ساتنه کې مرسته وکړي.
بل پل، باختر خبري اژانس بیا د خیرخواه په حواله ویلي، د اطلاعاتو او کلتور وزارت له نورو هېوادونو سره د اړیکو او تعامل په رامنځته کولو کې مهم رول لري.
د خیرخواه په ټکو، طالبانو غواړي له نړۍ سره مثبت تعامل او راکړه ورکړه وکړي.
نژدې څلور کاله کیږي چې طالبان بیا پر افغانستان واکمن شوي، خو تراوسه هیڅ هېواد د دوی حکومت په رسمیت نه دی پیژندلی.
طالبانو د عدلیې وزیر عبدالحکیم شرعي د استعفا راپورونه رد کړل

د طالبانو د حکومت د عدلیې وزارت وايي، د دغې وزارت له سرپرستۍ د عبدالحکیم شرعي د استعفا په اړه راپورونه ناسم دي.
د دې وزارت ویاند برکت الله رسولي چهارشنبې ناوخته په یوې خبرپاڼې ویلي، "د عدلیې وزیر د اسلامي امارت د مشر د حکم پر بنسټ د درملنې په موخه د دویم ځل لپاره متحده عربي اماراتو ته تللی دی ".
د رسولي په ټکو، شرعي به ډیر ژر بیرته افغانستان ته راستون شي.
د طالبانو له خوا د شرعي د استعفا د رد خبرونه وروسته له خپریږې چې په کابل کې یوې سرچینې د چهارشنبې په ورځ ازادي راډیو ته تایید کړې وه چې د طالبانو د مشر د پریکړو، په تیره بیا د نجونو د زده کړو د مخنیوي په اړه د دریځ له کبله د کابینې ډیر شمیر وزیران خوابدي شوي او استعفاوي یې کړي.
دې سرچینې دا هم تایید کړې وه، چې د شرعي په ګډون د ورکړو شویو وزیرانونو استعفاوې نه دي منل شوي.
دطالبانو د عدلیې وزارت په خبرپاڼه کې د شرعي استعفا رسنیزې ګنګونسې او شایعات بللي شوي.
چمپینز ترافي، نیوزلنډ پاکستان ته ۳۲۱ منډې هدف ورکړ

د چمپینز ټرافي لوبلړۍ په لومړۍ لوبه کې نن نیوزلنډ او پاکستان لوبه لري.
نیوزلنډ په ټولو پنځوسو اورونو کې د پنځو لوبغاړو په سوځیدو د پاکستان لوبډلې ته ۳۲۱ منډې هدف ورکړ.
پاکستان چې د نننۍ لوبې پچه یې ګټلې وه، لږ وروسته خپل بیټینګ پيلوي.
افغانستان په دې لړۍ کې د لومړي ځل لپاره برخه اخلي او د جنوبي افریقا، انګلستان او آسټرالیا له ځواکمنو لوبدلو سره په B ګروپ کې لوبېږي.
د افغان لوبډلې لومړۍ لوبه د جمعې په ورځ د فبروري په ۲۱مه له جنوبي افریقا سره پلان شوې، دوهمه لوبه به یې د فبروري په ۲۶مه له انګلستان او دریمه به یې د فبروري په ۲۸مه له اسټرالیا سره وي.
د چمپینز ټرافي لوبې دا ځل په دوو هېوادونو، پاکستان او متحده عربي اماراتو کې ترسره کېږي ځکه د هند لوبغاړو نه غوښتل پاکستان ته ولاړ شي.
پاکستاني چارواکي: د افغانستان واکمنان دې د کډوالو منلو او ادغام ته زمینه برابره کړي

د پاکستان د بهرنیو چارو وزارت وایي، د طالبانو حکومت باید په افغانستان کې داسې شرایط رامنځته کړي چې ورستانه شوي کډوال په کې بشپړ مدغم شي.
د دغه وزارت د ویاند دفتر په اسلام اباد کې د طالبانو د شارژدافیر د خبرو په غبرګون کې یوه اعلامیه ورکړې او په کې یې ویلي، هلته له افغان کډوالو سره د ناوړه چلند خبره واقعیت نه لري.
په دغې خبرپاڼه کې چې نن چهارشنبه ( د کب په لومړۍ نیټه) خپره شوې راغلي چې پاکستان لسیزې د میلیونونه افغانانو کوربه توب کړی خو زیاته شوې چې اوس دوی له افغان واکمنانو سره په ګډه کار کوي چې د هغوی ستنیدو ته هوسا شرایط برابر کړي.
دغه څرګندونې وروسته تر هغه کیږي چې په اسلام اباد کې د طالبانو شارژدافیر وویل، اسلام اباد او راولپنډۍ کې افغان اتباع د پولیسو له لوري نیول او پلټل کیږي.
سردار احمد شکیب ویلي دغه پروسه په نا اعلان شوي شکل پیل شوې او په اسلام آباد کې د افغانستان سفارت ته هم په دې اړه کومه رسمي مکتوبي اطلاع نه ده ورکول شوې.
هغه زیاته کړې چې له اسلام اباد او راولپنډۍ څخه د افغانانو اخراج پیل شوی او نژدې راتلونکې کې به د پاکستان نورو سیمو ته هم وغځیږي.
د چمپینز ټرافي لومړنۍ لوبه، پاکستان او نیوزلنډ د سیالۍ ډګر ته ښکته شوي

د چمپینز ټرافي لوبلړۍ نن- د فبروري ۱۹مه د پاکستان په کراچۍ ښار کې پیل شوه.
په لومړۍ لوبه کوربه پاکستان او نیوزلنډ سره مخامخ شوي دي.
د نننۍ لوبې پچه پاکستان وګټله او د توپ اچونې یا باولینګ پریکړه یې وکړه.
افغانستان په دې لړۍ کې د لومړي ځل لپاره برخه اخلي او د جنوبي افریقا، انګلستان او آسټرالیا له ځواکمنو لوبدلو سره په B ګروپ کې لوبېږي.
د افغان لوبډلې لومړۍ لوبه د جمعې په ورځ د فبروري په ۲۱مه له جنوبي افریقا سره پلان شوې، دوهمه لوبه به یې د فبروري په ۲۶مه له انګلستان او دریمه به یې د فبروري په ۲۸مه له اسټرالیا سره وي.
د چمپینز ټرافي لوبې دا ځل په دوو هېوادونو، پاکستان او متحده عربي اماراتو کې ترسره کېږي ځکه د هند لوبغاړو نه غوښتل پاکستان ته ولاړ شي.
د پاکستان مرستیال صدر اعظم له افغانستان د ترهګرۍ ګواښ ته اندیښمن دی

د پاکستان د صدر اعظم مرستیال او د بهرنیو چارو وزیر اسحاق دار له ملګرو ملتونو غوښتي چې افغانستان کې له ترهګرۍ سره د مبارزې ملاتړ وکړي.
د پاکستان بهرنیو چارو وزارت نن ( د کب په لومړۍ نیټه) یوه خبرپاڼه کې ویلي چې دار دغه غوښتنه په نیویارک کې د ملګرو ملتونو له سرمنشي انتونیو ګوتیریش سره په کتنه کې کړې ده.
خبرپاڼه کې راغلي چې ملګري ملتونه باید په افغانستان کې دننه او دغه راز هغو ترهګرو په وړاندې د مبارزې ملاتړ وکړي چې له افغانستانه بهر نورو هېوادونو ته ګواښ پیښوي.
خبرپاڼه کې د کومې ترهګرې ډلې نوم نه دی اخیستل شوی، خو اسلام اباد پخوا ویلي چې (ټي ټي پي) یا تحریک طالبان پاکستان د افغانستان له خاورې د دوی په ضد فعالیتونه کوي.
د طالبانو حکومت تراوسه د ښاغلي دار د دغو څرګندونو په اړه څه نه دي ویلي، خو مخکې یې افغانستان کې د ټي ټي پي حضور رد کړی او ویلې يې دي، هیچا ته اجازه نه ورکوي چې د افغانستان خاوره د نورو په ضد وکاروي.
د ملګرو ملتونو د امنیت شورا پر بندیزونو د څار کمیټې شپږ میاشتې مخکې په یوه راپور کې ویلي و چې افغانستان کې د ترهګرۍ پراختیا به سیمه او له سیمې هاخوا د ناامنۍ یو مهم لامل شي.
اسلام اباد کې افغان سفارت: له پاکستانه د ټولو کډوالو اخراج حتمي دی

په اسلام اباد کې د افغانستان سفارت د پاکستاني چارواکو په حواله ویلي چې له هغه هېواده د ټولو افغان کډوالو د ایستلو پلان " قطعي او حتمي" دی.
دغه سفارت چې د طالبانو په واک کې دی، نن چهارشنبه ( د کب په لومړۍ نیټه) په یوه خبرپاڼه کې دغه خبر ورکړی دی.
د خبرپاڼې له مخې، له دغې پریکړې یوازې هغه افغانان استثنا دي چې د پاکستان قانوني ویزه ولري.
نور هغه افغانان چې د ( ACC ) او ( PoR ) په نوم کارتونه لري، د اخراجېدونکو په ډله کې دي.
په خبرپاڼه کې راغلي چې د اخراج لړۍ به نژدې راتلونکې کې له اسلام اباد او راول پنډۍ څخه پيلیږي او بیا به ټول پاکستان ته غځیږي.
اسلام اباد کې طالب ډيپلوماتانو ویلي چې دوی د پاکستان د دغې سملاسي پریکړې په اړه خپله اندیښنه څرګنده کړې ده.
پرون د کډوالو په چارو کې د ملګرو ملتونو عالي کمشنري د پاکستاني چارواکو په حواله وویل، ټول افغانان پرته له هغو چې معتبرې ویزې لري، د ۲۰۲۵ کال د فبرورۍ تر وروستۍ نیټې باید له اسلام اباد او راول پنډۍ څخه ووځي.
هغه افغانان چې دریمو هېوادونو ته د تګ په تمه دي، د مارچ تر ۳۱مې پورې پاکستان کې د اوسیدو وخت ورکړل شوی دی.
د چمپینز ټرافي لوبې د افغانستان په ګډون نن د پاکستان په کراچۍ ښار کې پیلېږي

د چمپینز ټرافي لوبلړۍ نن- د فبروري ۱۹مه د پاکستان په کراچۍ ښار کې پیلېږي. په لومړۍ لوبه کې به چې د کابل په وخت د ماسپښین په یوه نیمه بجه پیلېږي، د کوربه پاکستان لوبډله د نیوزیلنډ له سیالې لوبډلې سره مخامخ شي.
افغانستان په دې لړۍ کې د لومړي ځل لپاره برخه اخلي او د جنوبي افریقا، انګلستان او آسټرالیا له ځواکمنو لوبدلو سره په B ګروپ کې لوبېږي.
د افغان لوبډلې لومړۍ لوبه د جمعې په ورځ د فبروري په ۲۱مه له جنوبي افریقا سره پلان شوې، دوهمه لوبه به یې د فبروري په ۲۶مه له انګلستان او دریمه به یې د فبروري په ۲۸مه له اسټرالیا سره وي.
د چمپینز ټرافي لوبې دا ځل په دوو هېوادونو، پاکستان او متحده عربي اماراتو کې ترسره کېږي ځکه د هند لوبغاړو نه غوښتل پاکستان ته ولاړ شي.
سرچینې وايي، د امریکا د بهرنیوچارو وزات د افغانانو د مېشتېدنې د پروګرام د بندولو خبر ترلاسه کړی دی

رویټرز خبري آژانس راپور ورکړی چې د امریکا د بهرنیوچارو وزارت په دې هېواد کې د افغانانو د مېشتېدنې د پروګرام د بندولو خبر ترلاسه کړی دی.
یوه امریکايي چارواکي، د افغانانو د مېشتېدنې د پروګرام یوه مخکښ مدافع او دوو باخبره سرچینو رویټرز آژانس ته ویلي چې د بهرنیوچارو وزارت هغې ادارې ته چې په متحدوایالتونو کې د افغانانو دمېشتېدنې پر بهیر څار کوي ویل شوي دي چې تر راروانې اپریل میاشتې د دې پروګرام د بندولو پلان برابر کړي.
د دې پروګرام د بندېدو په صورت کې به شاوخوا دوه لکه افغانان، له هغې ډلې د پخوانیو پوځیانو او د هغوی د کورنیو غړي، چې له خپلو میندو پلرونو سره د یوځای کېدو په تمه دي، امریکا ته له تلو محروم شي.
د ولسمشر ډونالډټرمپ ادارې مخکې له دې په متحدوایالتونو کې د افغانانو د پناه غوښتنې او د مهاجرت د ځانګړو ویزو یا SIV غوښتنلیکونه هم د ۹۰ ورځو په مخه ځنډولي دي.
د رویټرز د راپور له مخې د دې پروګرام د پوره ځنډولو په صورت کې په قطر او البانیا کې د افغان کډوالو د څېړنو او تحقیقاتو مرکزونه هم بندېږي او زرګونه انسانان له نامعلوم برخیک سره مخامخ کېږي.
د افغان ایوک په نوم د افغان کډوالو د مرستندویې ټولنې موسس شان ونډایور ویلي دي چې د دې ادارې بندول به یوه ملي رسوايي او له هغو متحدانو سره چې د امریکا لپاره یې جګړه کړې ده او د امریکا له ژمنو سره خیانت وي.
سپینې ماڼۍ او د بهرنیوچارو وزارت تراوسه په دې اړه څه نه دي ویلي.
د یوناما مشره: د طالبانو بندیزونه اوږدمهاله زیان اړولی

د افغانستان لپاره د ملګرو ملتونو د سرمنشي ځانګړې استازې او د یوناما مشره روزا اتونبایوا وایي، پر افغان ښځو او نجونو د طالبانو بندیزونو اوږدمهاله زیان رامنځته کړی.
یوناما پر خپله ایکس پاڼه یا پخواني ټویټر لیکلي چې میرمن اوتوبایوا پرون سه شنبه په دې اړه په کابل کې د اسلامي همکاریو سازمان له پلاوي سره رغوونکي بحثونه درلودل.
اوتونبایوا زیاته کړې چې د افغانستان د وضعیت په اړه لا تعامل او بیړنیو عملي ګامونو ته اړتیا لېدل کیږي.
د اسلامي همکاریو سازمان مرستیال او د افغانستان لپاره د دې سازمان استازی طارق بخیت افغانستان کې دی او هلته یې له یوشمېر طالب چارواکو سره هم کتلي دي.