د لاسرسۍ وړ لېنکونه

تازه خبر
شنبه ۲۷ مرغومی ۱۳۹۹ کابل ۰۳:۲۳

نړۍ

امریکايي سناتور رامني: وروستيو سایبري بریدونو ته باید ځواب وویل شي

جمهوري‌پال سناتور میټ رامني

دوو لوړپوړو امریکايي سناتورانو ویلي پراخو سایبري بریدونو ته چې د چارواکو په خبره روسي هکرانو کړي، باید ځواب وویل شي.

جمهوري‌پال سناتور میټ رامني پرون ویلي دا هکېنګ یا کمپیوټري سیستمونو باندې بریدونه ورته سایبري عمل ته اړتیا لري.

ښاغلي رامني زیاته کړې: "دا داسې یو کار دی چې یو څوک‌یې په جنګي حالاتو کې کوي. ډېر خطرناک او زموږ په حاکمیت نه‌منونکی برید دی. باید ډېر قوي ځواب ورکړل شي. په ورته سایبري عمل یا تر هغې هم قوي ځواب ورکړل شي."

سناتور مارک وارنر هم ویلي چې دا سایبري بریدونه ښايي دوام ولري او باید چارواکي یې عمق معلوم کړي.

د امریکا د بهرنیو چارو وزیر مایک پومپيو روسیه تورنه کړې چې د نړۍ په ګوټ ګوټ کې د امریکا پر ادارو او تجارتي مرکزونو په سایبري بریدونو کې لاس لري.

د ورځې تازه خبرونه دلته ولولئ

په اندونيزيا کې شديدې زلزلې لسګونه کسانو ته مرګ اړولې

ژغورونکې ډلې له ويجاړيو مړي راباسي

په اندونیزیا کې یوې شدیدې زلزلې لږترلږه ۳۴ کسان وژلي او سلګونه نور یې ټپیان کړي دي.

د امریکا د جیولوژۍ سروې ادارې ویلي، چې د دې زلزلې مرکز د سولاوېسي ټاپو په جنوب کې او شدت یې د رېښتر په کچه ۶،۲ درجې و، چې په نتیجه کې یې زرګونه کسان د خپلو کورونو پرېښودو ته اړ شوي دي.

سیمه ييزو چارواکو ویلي، چې زلزلې او له هغه وروسته ټکانونو د استوګنې ۶۰ کورونه او دوه هوټلونه ونړول، برېښنا یې قطع کړه او پلونه یې ویجاړ کړل.

په سولاویسي کې پرون هم ۵،۹ درجې زلزله وشوه خو انساني تلفات یې نه لرل.

په اندونیزیا کې چې د وګړو نفوس یې ۲۶۰ میلیون ته رسېږي ډېر وخت زلزلې او اتشفشانونه کېږي چې کله ناکله د سمندري توپان یا څونامي باعث هم کېږي.

افغانستان پر دې پېښه خواشیني ښودلې او د بهرنیوچارو وزیر حنیف اتمر په یوه بیان کې خپل سیال ریتنو ال پي مارسودي ته د تسلیت وړاندې کړی دی.

د بې پولې خبریالانو ټولنه د پاکستان له حکومته نوې غوښتنه کړې

آرشیف

د بې پولې خبریالانو ټولنې د پاکستان پر حکومت غږ کړی، چې د دوو برتانوي رسنیو پر وړاندې د بدنامولو او د کرکې کمپاین بند کړي او له هغو کسانو سره قانوني چلند وکړي چې د دې رسنیو ژورنالیستان یې ګواښلي دي.

دې ټولنې چې مرکز یې په پاریس کې دی په یوه بیان کې ویلي، په تېرو دوو اونیو کې د انټرنټ زرګونه کاروونکو د بي بي سي د اردو سرویس او د انډیپینډنټ ورځپاڼې د تحریمولو غوښتنه کړې او د هغو خبریالان یې ګواښلي دي.

د بې پولې خبریالانو ټولنې د آسیا- پاسیفیک څانګې مشر دانیل باسټارډ ویلي، د کرکې د پارونو دا آنلاین کمپاین، چې د پوځي قوماندې له لوړو کړیو سره په همغږۍ کې تنظیمېږي نه یوازې په پاکستان کې د رسنیو آزادي ګواښي بلکې د هغو خبریالانو ژوند له خطر سره مخامخ کوي چې په مرګ ګواښل شوي.

د بې پولې خبریالانو ټولنه هغه ویډیو د مثال په توګه یادوي چې د جنوري په دوهمه نېټه د واکمن ګوند او پوځ پلوي ویبپاڼې سیاست پاک خپره کړه او په هغه کې د بې بي سي اردو د خبریالانو پر شخصي نظریاتو برید شوی.

په ویدیو کې پر BBC تور لګېدلی چې د حکومت او پوځ ضد خپرنیزه پالیسي تعقیبوي.

د بې پولې خبریالانو د ټولنې د ۲۰۲۰ کال په انډېکس کې پاکستان د رسنیو د آزادۍ له پلوه د نړۍ په ۱۸۰ هېوادونو کې ۱۴۵ ځای لري.

شمالي کوریا د بالستیک ميزايلو ته ورته توغندي نندارې ته وړاندې کړي

د شمالي کوریا د بالستیک ميزايلو ته ورته توغندي

شمالي کوریا په یوه پوځي پرېډ کې هغه څه نندارې ته وړاندې کړي چې له اوبتل څخه د بالستیک میزایل توغوونکې وسیلې ته ورته ښکارېږي.

دا په داسې حال کې ده چې د جنوري په شلمه نېټه د امریکا د نوي ولسمشر جوبایډن د لوړې مراسمو ته د ګوتو په شمار ورځې پاتې دي.

په څو تصویرونو کې چې دولتي رسنیو خپاره کړي دي د شمالي کوریا رهبر کېم جونګ اون په هغو مراسمو کې ښکاري چې موسېږي او خپل لاسونه خوځوي.

دا مراسم پرون ناوخته د پلازمېنې پیونګ یانګ په کېم ایل سونګ چوک کې جوړ شوي وو.

په پرېډ کې د سرتېرو، ټانکونو او د هغو میزایلونو لیکې د تېرو په حال کې لیدل کېږي چې د کارپوهانو په اند د منځني واټن ویشتونکو توغندیو نوې بڼه به وي.

د شمالي کوریا رسنیو دا د نړۍ تر ټولو ځواکمنې وسلې بللې دي.

په امریکا کې د نشه يي توکو يو قاچاقبر اعدام شو

آرشیف

په امریکا کې د نشه يي توکو هغه قاچاقبر اعدام شو چې سترې محکمې یې له کوېډ١٩ ناروغۍ تر رغېدو پورې د مهلت غوښتنه رد کړې وه.

۵۲ کلن کاري جانسن پرون د جنوري په ۱۴مه نېټه د اندیانا په فدرال محبس کې د وژونکې پېچکارۍ په وسیله ووژل شو.

په امریکا کې د اعدام سزا له اولس کلن ځنډ وروسته تېرکال بیا پیل شوه او له هغه راهیسې جانسن ۱۲ مجرم دی چې حکومت یې اعداموي.

د جانسن مدافع وکیل اعتراض کاوه چې د وژونکې پېچکارۍ په وسیله مړینه به نوموړی، چې سږي یې د کووید۱۹ ناروغۍ له کبله زیانمن شوي، ډېر وځوروي.

خو سترې محکمې د جانسن او یوه بل مجرم لپاره چې نن اعدامېږي، د رغېدو تر وخته د مهلت غوښتنه رد کړه.

ماليزيا د پاکستان د هوايي شرکت يوه الوتکه درولې

د پاکستان د هوايي شرکت الوتکه

مالیزیايي چارواکو د پاکستان د هوايي شرکت PIA یوه الوتکه په بریتانیا کې د یوې حقوقي دعوې له کبله درولې ده.

PIA په یوه خبرپاڼه کې ويلي، چې د مالیزیا یوې سیمه ایزې محکمې د دې شرکت او د دعوې د مقابل لوري ترمنځ چې برتانوۍ محکمې ته عارض شوی دی، په یواړخیز ډول د دې الوتکې د درولو حکم ورکړی دی.

د راپورونو له مخې دا دعوه چې شپږ میاشتې مخکې په برتانوۍ محکمه کې ثبت شوې ده د پاتې پیسو یوه اړونده قضیه ده.

PIA نه دي ویلي چې دا الوتکه په کوم ځای کې نیول شوې خو یادونه یې کړې چې د الوتکې مسافر سم ساتل کېږي او د پاتې سفر چارې یې تنظیم شوې دي.

په تونس کې د ډیموکراسۍ پلوه پاڅون لسمه کلیزه ولمانځل شوه

د تونس بيرغ

په تونس کې د ډیموکراسۍ پلوه پاڅون لسمه کلیزه پرون د کرونا وایروس د محدودیتونو له کبله په مختصره توګه ولمانځل شوه.

دغه پاڅون د دې سبب شو، چې د دغه هېواد زورواکی له واکه وپرځول شي او په عرب هېوادونو کې د ناکراریو څپه پیل شي.

په تونس کې د هغه څلور-ورځني ټولبند له کبله چې له پرونه نافذ شو، مظاهرې منع دي.

لس کاله مخکې د تونس ولسمشر، زین العابدین بن علي تر پراخو مظاهرو وروسته له واک څخه لیرې او په ۲۰۱۹م کال په جلاوطنۍ کې مړ شو.

دغه مظاهرې وروسته له هغې پیل شوې چې یوه نهیلي، ځوان هټیوال د پولیسو د زورزیاتي له کبله، ځان ته اور واچاوه.

د روسيې او سعودي چارواکو د سيمې امنیت او ايران په اړه بحث کړى

د عکس ښي لور ته د روسیې د بهرنیو چارو وزیر سرګي لاوروف او چپ لور ته د سعودي د بهرنیو چارو وزیر فيصل بن فرحان

د روسیې او سعودي عربستان د بهرنیو چارو وزیرانو د سیمې د امنیت او په تېره د خلیج له هېوادونو سره د تهران د اړیکو په اړه بحث وکړ.

سرګي لاوروف او فیصل بن فرحان پرون په مسکو کې سره ولیدل.

لاوروف له دې کتنې وروسته په یوه ګډه خبري غونډه کې وویل: "غواړو د دې شاهدان واوسو چې ایران او د خلیج هېوادونه په خپلو کې خبرې پیل کړي، د اعتماد او شفافیت د رامنځته کولو لپاره موافقه لیکونه لاسلیک کړي او په ټوله کې له یوبل سره همکار واوسي. د خلیج لپاره د یوه امنیتي تفاهم د پراختیا په مقصد زموږ وړاندیز دقیقا د همدې هدف لپاره دی."

د رویټرز خبري آژانس د راپور له مخې د سعودي د بهرنیوچارو وزیر له خپل روس سیال سره په کتنه کې، په منځنۍ آسیا کې د ده په وینا د ایران د مداخلې د پای ته رسولو غوښتنه کړې ده.

هغه همداراز ویلي، چې د سوریې د جګړې د پای ته رسولو پر وړاندې اساسي خنډ د ایران نیابتي وسله والې ډلې جوړوي.

په شمالي وزیرستان کې ٣ سرتېري وژل شوي

آرشیف

درې تنه پاکستاني سرتېري په شمالي وزیرستان کې په یوه نښته کې وژل شوي.

د پاکستان پوځ په یوه بیان کې وايي، چې دا سرتېري پرون په دې قبایلي سیمه کې له وسله والو سره په نښته کې ووژل شول.

سیمه يیزو چارواکو د آزادۍ راډیو مشال څانګې ته وویل، چې دا پوځي عملیات د شمالي وزیرستان په دته خېلو سیمه کې شوي دي.

په بیان کې همداراز په دوو جلا عملیاتو کې د دریو وسله وال د وژل کېدو ادعا هم شوې ده.

له دې نښتې دوه ورځې مخکې په شمالي وزیرستان کې پر یوه امنیتي پوسته د وسله والو په برید کې دوه پاکستاني سرتېري مړه او درې نور ټپیان شول.

د پاکستان پوځ په ۲۰۱۶ کال کې ادعا وکړه، چې له درې میاشتنیو پوځي عملیاتو وروسته یې په وزیرستان کې د افراطي وسله والو اډې له منځه وړې دي.

ملګري ملتونه: ٢٠٢٠ د روانې لسيزې تر ټولو تود کال و

آرشیف

ملګري ملتونه وايي، چې ۲۰۲۰ کال له ۲۰۱۶ کال وروسته د روانې لسیزې ترټولو تود کال و.

دا سازمان خبرداری ورکوي، چې نړۍ ښايي سږکال د تودوخې د لوړېدو له کبله له سخت ناورین سره مخامخ شي.

د ملګروملتونو راپور چې پرون- د جنوري په ۱۴مه خپور شو، په را روان کال کې د تودوخې د لوړېدو خبرداری ورکوي او وايي چې توده هوا ښايي په ځینو سیمو کې حتی د خلکو ژوند له خطر سره مخامخ کړي.

په راپور کې راغلي، چې ۲۰۱۶ کال له هغه راهیسې چې انسانانو د تودوخې د درجې ثبتول پیل کړي دي، تر ټولو تود کال و.

د ملګروملتونو سرمنشي انتونیو ګوتېرېش د دې راپور د اعلان پرمهال وویل، چې بشر په روانه پېړۍ کې د سانتيګراد د ۳ او ۵ درجو ترمنځ د تودوخې د لوړېدو پر لور روان دی.

راپور زیاتوي چې په ۲۰۲۰ کال کې د ځمکې د کرې د تودوخې اوسط د سانتيګراد ۱۴،۹ درجو ته ورسېده چې دا په ۱۸۵۰ کال کې له صنعتي دورې په راوروسته موده کې د تودوخې له ثبت شوې کچې د سانتيګراد ۱،۲ درجې زیاتوالی ښيي.

له ارمنستان او اذربایجانه د بښنې د نړیوال سازمان غوښتنې

ارشیف

د بښنې نړیوال سازمان له ارمنستان او اذربایجانه غوښتي چې د ګڼې ګوڼې په ځایونو کې په (ناسم او ړنده بڼه) د وسلو د استفادې په اړه څېړنه وکړي.

دغه سازمان ویلي، د نګورنو قره باغ لانجمنې سیمې پر سر جګړه کې د وسلو کارونه له نړیوالو قوانینو سرغړونه وه او ملکیان یې زیانمن کړي دي.

امنیستي انټرنشنل چې مرکز یې په بریتانیا کې دی پرون په یوه راپور کې وویل، دغلته د جګړې دواړو خواوو د ملکیانو هدف ګرځول رد کړي، خو دغه سازمان ویلي، موثق اسناد یې موندلي چې منعه شوې وسلې او چاودیدونکي توکي کارول شوي دي.

د بښنې په نړیوال سازمان کې د ختیځې اروپا او مرکزي اسیا د څانګې مشرې ماري سترادرز ( Marie Struthers) په یوه اعلامیه کې ویلي:" ملکي کسان وژل شوي، کورنۍ بې ځایه شوي او بې شمېره کورونه ویجاړ شوي دي".

د بښنې نړیوال سازمان وایي، د ارمنستان او اذربایجان د ځواکونو ۱۸ بریدونه یې ارزولي چې هغو کې ملکیانو ته مرګ ژوبله اوښتې.

د دوی څېړونکو د نومبر له لسمې وروسته د نګورنو قره باغ سیمه له نژدې کتلې، له همدې نېټې وروسته دغلته د مسکو په منځګړیتوب اوربند نافذ شوی دی.

اندونیزیا کې په یوه سمڅه کې د یوه حیوان انځور موندل شوی

اندونیزیا کې د یوه حیوان انځور

په اندونیزیا کې لرغون پوهانو په یوه سمڅه کې د یوه حیوان انځور موندلی چې په ظاهره تر ټولو پخوانۍ نقاشي ښيي.

دا د دغې سمڅې پر دیوال د وحشي خوګ انځور دی چې د ساینس اډوانس مجلې د معلوماتو له مخې، د حیوان له اصلي بڼې سره ډېر توپیر نه لري.

دغه رسامي په یوې لېرې پرتې 'سولاویسي' درې کې موندل شوې او دغې سیمه کې د انسانانو د اوسیدونکو لرغونی سند بلل کېږي.

د اتریش د ګریفیټ پوهنتون یوه څیړونکي ماکسیم اوبرت چې دغه راپور یې لیکلی ویلي، کومو کسانو چې دغه انځور ایستلی، د اوسنیو انسانانو په څېر متمدن وو او د اوسنۍ نقاشۍ ټول وسایل یې درلودل.

دا انځور د نقاشۍ قدیمي بڼه نه ده چې انسانانو موندلې ده.

تر دې وړاندې په جنوبي افریقا کې هشتګ ته ورته خط خطې نقاشي پیدا شوې چې ویل کېږي ۷۳ زره کاله لرغونی دی.

ډونالد ټرمپ پر کانګرس یرغل او په‌کې تاوتریخوالی وغانده

د امریکا ولسمشر ډونالد ټرمپ

د امریکا ولسمشر ډونالد ټرمپ ملت ته په یوه وېډیویي پیغام کې چې بېګا شپه‌یې خپور کړی، پر کانګرس د تېرې اوونۍ یرغل او په‌کې تاوتریخوالی غندلی، خو د استازو جرګې د هغه اقدام یادونه‌یې نه‌ده کړې چې نوموړی یې پرون د ورځې په لومړیو کې استیضاح کړ.

ټرمپ دغه وېډیويي پیغام داسې مهال خپور کړ چې د استازو جرګې مشرې نانسي پلوسي د ټرمپ د استیضاح په اړه له رأی ګیري وروسته چې د دې جرګې ۲۳۲ غړو د ۱۹۷ په مقابل کې مثبتې رایې ورکړې، هغه سند لاسلیک کړ چې ټرمپ د پاڅون په لمسونې تورنوي.

په استازو جرګه کې ډیموکراتان اکثریت دي، ۱۰ جمهوري غوښتونکو هم د ټرمپ د استیضاح په پلوي رایې ورکړي.

ټرمپ په دغه وېډیویي پیغام کې تاوتریخوالی په کلکه غندلی او ویلي یې دي چې دا هر څه د ده د مفکورې او د دوی د غورځنګ ضد دي او زیاتوي چې د ده هېڅ یو رښتینی ملاتړی سیاسي تاوتریخوالي ته لمن نه‌وهي.

دا د امریکا په تاریخ کې لومړنی ولسمشر دی چې د واک پر مهال دوه ځله استیضاح کېږي.

اوس به د امریکا په سنا جرګه کې چې د ټرمپ پلویان په‌کې اکثریت دي، د ټرمپ د استیضاح لپاره محکمه جوړېږي، خو اټکل دا دی چې سنا به د جنوري تر ۲۰مې یا د ټرمپ د واک تر پای ته رسېدو مخکې د محکمې بهیر پیل نه‌کړي.

د روغتیا نړیوال سازمان څېړونکي د کرونا په اړه څېړنو لپاره ووهان ته ورسېدل

ووهان کې د خوراکي توکو هغه مارکېټ چې په‌کې د لومړي ځل لپاره کرونا ویروس خپور شو.

د روغتیا نړیوال سازمان (WHO) څېړونکي د چین ووهان ښار ته رسېدلي چې د کرونا ویروس د خپرېدو په اړه څېړنه کوي.

دغه ویروس د لومړي ځل لپاره د ۲۰۱۹ کال په وروستیو کې له همدې ښاره خپور شوی و.

د چین دولتي رسنۍ ووهان ته د روغتیا د نړیوالې ادارې د ۱۰ څېړونکو د رسېدو خبر ورکړی او ویلي یې دي چې دوی به شاوخوا یوه میاشت په دې ښار کې تېر کړي.

د روغتیا نړیوال سازمان مشر تدروس ادهانوم ګبریاسوس تېره اوونۍ د دغو څېړونکو د سفر پر ځنډېدو مایوسي څرګنده کړې او ویلي و چې ډېر دغه ساینسپوهان چین ته د تلو په هدف له خپلو هېوادونو وتلي، خو چینایي چارواکو یې د اجازې چارې نه‌دي بشپړې کړي.

هغه زیاته کړه چې دغه ساینسپوهان به پر دې تمرکز کوي چې دغه ویروس د لومړي ځل لپاره په څه ډول خلکو ته انتقال شو.

د چین حکومت ویلي چې ښایي دغه ویروس له وارد شویو سمندري خوړو سره دې هېواد ته داخل شوی وي، خو نړیوال ساینسپوهان او اړوندې ادارې دغه تیوري ردوي.

د ورلډومېټرز وېب‌پاڼې د وروستیو شمېرو له مخې په ټوله نړۍ کې نږدې ۹۳ ملیونه وګړي پر دغه ویروس اخته شوي او نږدې دوه ملیونه‌یې هم له امله مړه شوي دي.

امریکا د ایت‌الله خامنه‌یي اړوند پر دوو بنسټونو بندیزونه ولګول

د ایران مذهبي مشر ایت‌الله علي خامنه‌یي

د امریکا متحده ایالاتونو د چهارشنبې په ورځ د ایران د مذهبي مشر ایت‌الله خامنه‌یي اړوند دوه بنسټونو باندې بندیزونه ولګول.

د امریکا د خزانې وزارت وویل، د ایران واکمنان له دغو بنسټونو څخه په استفادې توانېدلي چې یو "فاسد" نظام‌یې د اقتصاد پراخې برخې په خپل لاس کې ولري.

د «آستان قدس رضوي» او «ستاد فرمان امام» په نوم د دغو بنسټونو پر مشرانو احمد مروي او محمد مخبر باندې هم بندیزونه ولګول شول.

د امریکا له‌خوا یوه اعلامیه کې راغلي چې استان قدس رضوي بنسټ د ایران د رژیم د مخالفانو او تبعید شویو ایرانیانو ملکیتونه غصب کړي او د هغوی او نورو اقلیتونو مذهبي حقونه‌یې نقض کړي دي.

د اعلامیې له مخې، هر څوک چې له دغو ایراني بنسټونو او چارواکو سره راکړه ورکړه وکړي، د بندیزونو له خطر سره مخامخېدای شي.

د اروپا امنیت او همکارۍ سازمان د قرغزستان ټاکنو ځینې ستونزې په ډاګه کړې

قرغزستان کې د ولسمشریزو ټاکنو رأی شمېرنه

د اروپا د امنیت او همکارۍ سازمان مشر د قرغزستان په وروستیو ولسمشریزو ټاکنو کې ځینو ستونزو ته اشاره کړې ده.

دغه ټاکنې چې د تېرې یکشنبې په ورځ ترسره شوې، دغه سازمان پرې څارنه درلوده.

د اروپا د امنیت او همکارۍ سازمان مشر توماس میزیریتس ویلي، د ستونزو یوازنی لامل دا و چې بشکېک په بېړه پرېکړه وکړه چې دغه ټاکنې او د نظام د څرنګوالي په اړه دې ټول‌پوښتنه هم‌مهاله ترسره شي.

ده ویلي، قرغزستان کې د ټاکنو بنسټونه له قانوني پلوه مناسب دي، خو په خبره‌یې د ټول‌پوښتنې په اړه کافي وضاحت نه‌دی موجود.

دغه ټاکنې ملي‌پال سیاستوال صدر جباروف چې پخوا زنداني و، په لوی تفاوت سره وګټلې.

رأی ورکوونکو دغلته بېرته د جمهوري نظام د ټینګښت پراخ ملاتړ کړی دی.

د اروپا د امنیت او همکارۍ سازمان څارونکو په لومړنۍ ارزونه کې ویلي، کاندیدانو تقریباً په ازاد ډول کمپاینونه ترسره کړل، خو په خبره‌یې ټاکنیزې منډې ترړې د یوه کاندید تر واک لاندې وې.

نور راوښيه

XS
SM
MD
LG