د لاسرسۍ وړ لېنکونه

تازه خبر
سه شنبه ۳۰ مرغومی ۱۳۹۹ کابل ۰۹:۰۹

خبرونه

لغمان چارواکي: طالبانو د یوه کور ۳ تنه وژلي او ۹ نور یې ټپیان کړي

د افغانستان په نقشه کې د لغمان ولایت

د لغمان چارواکي د دغه ولایت په اليشنګ ولسوالۍ کې د درې ملکیانو د وژل کېدو خبر ورکوي.

د لغمان د والي ویاند اسدالله دولتزي نن دوشنبه (د لېندۍ ۲۴مه) ازادي راډيو ته وویل چې تېره ورځ د الیشنګ ولسوالۍ په مربوطاتو کې د وسله والو طالبانو له لوري پر یوه کور د هاوان مرمۍ وتوغېده چې له امله یې د یوې نجلۍ په ګډون درې تنه وژل شوي او ۹ نور ټپیان دي.

دولت زی وایي چې ټپي شوي ملکیان تر درملنې لاندې دي او روغتیایي وضعیت یې د ډاډ وړ دی.

د لغمان د والي ویاند همداشان زیاتوي چې وسله والو طالبانو هم مهاله په اليشنګ ولسوالۍ کې د افغان ځواکونو پر پوستو بریدونه وکړل چې له امله یې له ځایي افغان ځواکونو سره نښته رامنځته شوه.

دی اعا کوي چې په دغه نښته کې د عبدالمالک په نوم د طالبانو یو مهم غړی ووژل شو او ګڼ نور ټپیان شوي دي.

د ښاغلي دولتزي په وینا، په نښتو کې دوه تنه افغان سرتېري هم سطحي ټپیان شوي دي.

وسله والو طالبانو بیا تر دې دمه رسنیو ته څه نه دي ویلي.

الیشنګ د لغمان یوه له ناامنو ولسوالیو ده چې وخت ناوخت ترې د افغان ځواکونو او وسله والو طالبانو د نښتو او بریدونو راپورونه ورکول کېږي.

د ورځې تازه خبرونه دلته ولولئ

د هلمند والي: د واشېر د وژل شوي ولسوال د وژنې پېښه څېړل کېږي

آرشیف

د هلمند والي، په مرکز لښکرګاه کې د واشېر د ولسوال محمد ظاهر حقیار د وژل کېدو د پېښې د څېړنې سپارښتنه وکړه.

والي عبدالنبي الهام تېر ماښام د خواشینۍ په یوه پیغام کې هغه وسله والو حمله تروریستي وبلله چې په نتیجه کې یې ولسوال محمد ظاهر حقیار ووژل شو او دوه ساتونکي یې ټپیان شول.

ښاغلي الهام وویل، د دې وژنې غچ به واخیستل شي.

هغه زياتوي: "موږ به هېڅ وخت ارام کېننو، چې د ظاهر حقیار قاتل مو نه وي پیدا کړی او د قانون منګولو ته نه وي سپارلی. موږ به دوی همېشه خپل ملت ته افشا کوو. زموږ ملت به د دوی دغه ظالمانه او خاینانه عمل تقبیح کوي."

بلخوا پرون په غزني کې د چاپېریال ساتنې رئیس عبدالولي ارمان له خپل یوه ساتونکي سره یو ځای په وسله وال برید کې ټپي شوی دی.

د غزني د والي ویاند واحداله جمعه زاده پرون دوشنبه ازادۍ راډیو ته وویل، پر رئیس د ریاست مخې ته حمله شوې ده.

چارواکي: افغان ځواکونو د بدخشان د ارګو څو کلي له وسله والو تصفیه کړل

افغان ځواکونه د عملیاتو پرمهال. ارشيف

د افغانستان د ملي دفاع وزارت وايي، دفاعي او امنیتي ځواکونو پرون د بدخشان ولایت د ارګو ولسوالۍ څو کلي له وسله والو طالبانو په بشپړ ډول تصفیه کړل.

د دغه وزارت یوه ویاند فواد امان پرون ناوخته ازادۍ راډیو ته وویل: "د افغانستان امنیتي او دفاعي ځواکونو د عملیاتو پر مهال په دې ولسوالۍ کې ۸ کلي په بشپړ ډول له وسله والو طالبانو تصفیه کړل. طالبانو ته درنه مرګ ژوبله واوښته او د طالبانو له ماینونو هم زیاتې سیمې پاکې شوې."

وزارت پرون په دغو عملیاتو کې د څلورو طالبانو د وژل کېدو او درېیو نورو د ټپي کېدو خبر ورکړی و.

که څه هم طالبانو په ارګو ولسوالۍ کې د شویو عملیاتو په اړه څه نه دي ویلي، خو په یوه اعلامیه کې یې ادعا کړې چې وړمه شپه یې په یاوان ولسوالۍ کې یوه پوسته نیولې، څلور سرتېري یې وژلي او ۷ سرتېري یې ژوندي نیولي دي.

کونړ، لغمان او خوست ته د کوېډ١٩ د معایناتو لپاره وسايل استول شوي

آرشیف

په افغانستان کې د روغتیا نړیوال سازمان وايي، کونړ، لغمان او خوست ولایتونو ته د کوېډ١٩ ناروغۍ د معایناتو لپاره د لابراتوارونو تجهیزات او وسایل واستول شول.

دغه سازمان پرون په یوه ټویټ کې ویلي، د دغو وسایلو او تجهیزاتو په برابرولو کې د اروپايي ټولنې د بشري مرستو دفتر، د کرونا وبا د اضطراري حالاتو مرستندوی صندوق او نړیوال بانک مالي مرسته کړې ده.

په افغانستان کې په کرونا ویروس د اخته کسانو شمېر تر څلورپنځوسو زرو اوښتی او د مړو شمېر ۲۳۴۶ ته رسېدلی دی.

روسي مخالف "الکسي ناوالني" له خپلو پلويانو د اعتراضونو غوښتنه کړې

الکسي ناوالني

د روسیې د حکومت سرسخت سیاسي مخالف، الکسي ناوالني له خپلو پلویانو غوښتنه وکړه، چې حکومت-ضد اعتراضونو ته دوام ورکړي.

ناوالني پرون دوشنبه د مسکو په خیمکي ښارګوټي کې د پولیسو له ماموریت څخه په یوه ویډیويي پیغام کې وویل، حکومتي چارواکو ورته ویلي، که څوک غلی نه شي، وبه وژل شي.

هغه وویل: "له تاسو غواړم چې غلي نه شئ. مقاومت وکړئ. لارو سړکونو ته راووځئ. له موږ پرته بل څوک زموږ ساتنه نه کوي. زموږ شمېر خورا زیات دی، هر هغه څه به ترلاسه کړای شو، چې د ترلاسه کولو غوښتنه یې لرو."

الکسي ناوالني د یکشنبې ناوخته له جرمني مسکو ته له رسېدو سره سم د مسکو په هوايي ډګر کې ونیول شو.

یوه قاضي امر کړی چې ناوالنې دې د ۳۰ ورځو لپاره په توقیف کې وساتل شي.

ځینو هېوادونو او نړیوالو سازمانونو د ناوالني د سمدستي خوشې کېدو غوښتنه کړې ده.

روسیې د کرونا ضد واکسین پروګرام پیل کړ

آرشیف

روسیې د کرونا-ضد واکسین د تطبیقولو پروګرام پیل کړ.

راپورونه وايي، د پلازمېنې مسکو ځینې اوسېدونکي پرون دوشنبه په کتارونو کې ولاړ وو، چې واکسین شي.

روسیې د نورو محدودیتونو له لګولو پرته، د کرونا ویروس ضد واکسین د نوي پروګرام د تطبیق اعلان کړی دی.

په روسیه کې دغه واکسین لومړی روغتیايي کارکوونکو، ښوونکو او هغو کسانو ته ورکول کېږي، چې ضمني ناروغۍ ولري.

په کرونا ویروس تر درې نیم میلیون د زیاتو کسانو د اخته کېدو له کبله روسیه په نړۍ څلورم ځای لري.

د امریکا د ټاکلي ولسمشر د لوړې ازمایښتي مراسم وځنډېدل

دغه اور د کانګرس ودانۍ نږدې لګېدلى و

د امریکا د متحدو ایالتونو د ټاکلي ولسمشر جو بایډن د لوړې ازمایښتي مراسم وروسته له هغې وځنډول شول، چې د امریکا د کانګرس ودانۍ ته نږدې اور ولګېد.

په پام کې وه، ازمېښتي مراسم سبا شپې ته عملي شي، خو د کانګرس له ودانۍ لیرې د بې سرپناه کسانو په کمپ کې د اورلګېدو پېښې دغه مراسم وځنډول.

جو بایډن سبا چهارشنبه لوړه کوي.

په ازمايښتي پروګرام کې د موسیقۍ ډلې او ځینې پوځیان تر اصلي مراسمو مخکې تمرین کوي.

دا مهال په پلازمېنه واشنګټن ډي. سي کې د ولسمشر جو بایډن د لوړې په مراسمو کې د احتمالي تاوتریخجنو اعتراضونو د مخنیوي په هدف په لوړه کچه اضطراري حالت نافذ دی.

د کانګرس د ودانۍ شا و خوا د ملي ګارډ، محلي او فډرال پولیسو تر ۲۰ زرو زیات کسان ګمارل شوي دي.

دا وروسته له هغې چې د جنورۍ میاشتې پر شپږمه د ډونالډ ټرمپ یوه ډله پلویانو د کانګرس پر ودانۍ یرغل وروړ او وروسته په شخړو کې د یوه پولیس په ګډون ۵ کسان ووژل شول.

سټولټنبرګ: په افغانستان کې د ناټو حضور شرایطو پورې تړلی

د ناټو سرمنشي ينس سټولټنبرګ

د ناتو عمومي منشي ینس سټولټنبرګ وایي، له افغان ولسمشر اشرف غني سره یې د سولې د پروسې په اړه خبرې کړې او هغه ته یې ویلي چې د ناتو دریځ نه دی بدل شوی او په افغانستان کې یې حضورپه شرایطو پورې تړلی دی.

ښاغلي سټولټنبرګ دا خبره نن په یوه ټویټ کې کړې او ویلي یې دي چې ناتو د افغان امنیتي ځواکونو ملاتړ ته دوام ورکوي تر څو افغانستان بیا هیڅکله هم د نړیوال تروریزم په خوندې ځای بدل نه شي.

په عین حال کې په افغانستان کې د ناټو د غوڅ ملاتړ ماموریت په یوه ټویټ کې ویلي، چې په دې ماموریت کې د شاملو ۳۸ هېوادونو شاوخوا لس زره سرتېري به د افغان ځواکونو چې د خپل هېواد امنیت ساتي، د روزنې، هغوی ته د سلا ورکولو او مرستو چارو ته دوام ورکړي.

په یوه بله ټویټ کې لیکل شوي، چې د دې ماموریت یوه جګپوړي قومندان ایټالوي جنرال البرتو ویزولي په هرات کې د ناټو یو مډال هغو سرتېرو ته ورکړ چې د افغان ځواکونو د روزنې په دې ماموریت کې یې ونډه اخیستې ده.

پاکستاني پوځ په جنوبي وزیرستان کې دوه طالبان وژلي

آرشیف

د پاکستان پوځ په جنوبي وزیرستان کې د عملیاتو په ترڅ کې د دوو طالبانو د وژل کېدو خبر ورکوي.

پوځ نن په یوه خپره کړې خبرپاڼه کې ويلي، چې په دغو عملیاتو کې چې وخت او مشخصه سیمه یې نه ده یاده کړې او یوازې دومره یې ویلي چې استخباراتي معلوماتو پر اساس ترسره کړي، په وژل شویو کې هغه مشکوک کس هم شامل دی چې د پوځ پر سرتېرو د اکتوبر د میاشتې په برید کې یې لاس درلود.

په دغه برید کې شپږ سرتېري وژل شوي وو.

پوځ د دغو عملیاتو په پایله کې د دریم مشکوک کس د نیولو خبره هم کړې ده.

استرالیا کې د تېنس لږترلږه ۷۲ لوبغاړي قرنطین شول

ارشیف

په استرالیا کې د تېنس د لوی تورنمنت د پیلېدو په درشل کې لږترلږه ۷۲ لوبغاړي وروسته تر هغې سخت قرنطین شوي چې دې تورنمنت ته د لوبغاړو، روزونکو او چارواکو د لېږدولو په چارټر الوتکو کې د یو شمېر سپرلیو د 'کووېډ-۱۹' مثبتې پېښې ثبت شوې دي.

د دغو لوبو تنظیموونکو پرون یکشنبه تایید کړه چې د قطر له پلازمېنې دوحې څخه ملبورن ته په تللې الوتکه کې د یو مسافر د کرونا مثبته پېښه ثبت شوې ده.

که څه هم دغه مسافر د دغه ورزشي ټیم غړی نه‌دی، خو د ۲۵ لوبغاړو په ګډون د دې الوتکې ټولې ۵۸ سپرلۍ اجازه نه‌لري چې په هوټل کې له خپلو خونو ووځي او هم نه‌شي کولای چې تر۱۴ ورځو پورې تمرین وکړي.

تر دې مخکې د دغه تورنمنت ۴۷ نور لوبغاړي وروسته له هغې قرنطین شول چې له لاس انجلس څخه په یوه چارټر الوتکه کې د درېیو تنو او له ابوظبي هم په یوه الوتنه کې د یوه د کرونا مثبتې پېښې تثبیت شوې وې.

ټاکل شوې ده چې د استرالیا اوپین د تېنس لوبو سیالۍ د فبرورۍ په اتمه پیل شي. د دې لوبو د تنظیم د چارو مشر ویلي چې لوبې به په خپل وخت پیل شي.

چارواکي: تخار او کندهار کې د طالبانو د بریدونو مخه ونیول شوه

ارشیف، کندهار کې د افغان ځواکونو عملیات

په تخار او کندهار کې چارواکي د طالبانو د حملو د په شا تمبولو او دې ډلې ته د زیانونو د اړولو خبر ورکوي.

د تخار د امنیه قوماندانۍ ویاند عبدالخلیل ازادي راډیو ته وویل چې افغان امنیتي ځواکونو د دې ولایت په خواجه غار ولسوالۍ کې د طالبانو د یوې حملې مخه ونیوله.

نوموړي طالبانو ته د اوښتې مرګ‌ژوبلې په اړه وویل: "د صادق په نوم چې د لایزري قطعې مرستیال دی، په ګډون پنځه طالبان وژل شوي او څو تنه هم ټپیان دي."

ښاغلي اسیر په دغو نښتو کې خپل لور ته د یوه سرتېري د ټپي کېدو خبره وکړه.

په عین حال کې د افغانستان دفاع وزارت وایي، په کندهار کې یې د وسله‌والو طالبانو د پراخو بریدونو مخه نیولې او د دې ډلې له ۲۰ زیات وسله‌وال یې وژلي دي.

دې وزارت نن په یوه خپره کړې خبرپاڼه کې ویلي چې تېره ورځ طالبان د کندهار ولایت "ژړۍ" او " ارغنداب" ولسوالیو کې د دفاعي او امنیتي ځواکونو پر پوستو د برید په موخه راټول شوي وو چې دفاعي او امنیتي ځواکونو د فعالې دفاع په چوکاټ کې پرې بریدونه وکړل.

د دغو بریدونو په پایله کې ۲۵ طالبان ووژل شول او ۸ نور ټپیان شول.

د خبرپاڼې له مخې د نښتو په پایله کې د طالبانو دوه پټنځایونه او یوه اندازه وسلې او مهمات له‌منځه یوړل شول.

طالبانو په تخار او کندهار کې دې ډلې ته د اړول شویو زیانونو په اړه د دغو ادعاوو په اړه تر اوسه څه نه‌دي ویلي.

د جنوبي کوریا یوې محکمې د سامسونګ کمپنۍ مرستیال مشر په بند محکوم کړ

ارشیف

د جنوبي کوریا یوې محکمې د الکترونیکي وسایلو د سترې کمپنۍ سامسونګ مرستیال مشر د فساد په تور په دوه‌نیم کلونو بند محکوم کړی دی.

۵۲ کلن لیي جای یونګ مخکې د جنوبي کوریا د ولسمشرې پارک ګیون هي یو همکار ته د رشوت ورکولو په تور په ۲۰۱۷ کال کې په پنځو کلونو بند محکوم شوی و.

هغه ویلي چې کوم غلط کار یې نه‌دی کړی چې وروسته‌یې سزا کمه شوه او د استېناف غوښتنې په نتیجه کې په زندان کې د یوه کال بند له تېرولو وروسته خوشې شوی و.

سترې محکمې د هغه دوسیه بېرته د سئول عالي محکمې ته استولې وه چې نن‌یې دغه نوی حکم صادر کړ.

د سامسونګ کمپنۍ عواید د جنوبي کوریا د کورنیو ناخالصو عوایدو په ۱۰۰ کې ۲۰ جوړوي.

پولیسو د کابل ښار د ګذر یو وکیل له مهماتو او پوځي تجهیزاتو سره ونیوه

په کابل کې د ګذر نیول شوی وکیل

د افغانستان د کورنیو چارو وزارت وایي، پولیسو یې د کابل ښار د ګذر یو وکیل له دوو کلاشینکوفونو او یوې اندازې مهماتو او پوځي تجهیزاتو سره نیولی دی.

د وزارت ویاند طارق ارین پر خپله ټویټرپاڼه لیکلي چې دغه مهمات په ۱۳ حوزه کې د ګذر له وکیل څخه ترلاسه شوي دي.

ارین وایي، په دې اړه د پولیسو پلټنه روانه ده.

دا په داسې حال کې ده چې پلازمېنه کابل کې نا امنیو او هدفي وژنو خلک اندېښمن کړي دي.

همدا نن سهار هم د ملي شورا سړک ته نږدې او د ۱۱مې حوزې په مربوطاتو کې پر دوو موټر د مقناطیسي ماین چاودنه شوې چې د کابل امنیه قومانداني وایي، مرګ‌ژوبله نه‌لري.

پرون دغه ښار کې ناپېژانده وسله‌والو د سترې محکمې دوه قاضیانې په ډزو ووژلې.

د ډونالد ټرمپ پلویانو بیا د اعتراض څو وړې غونډې وکړې

ارشیف، د ټرمپ د پلویانو اعتراض

په واشنګټن کې د سختو امنیتي تدابیرو په ترڅ کې پرون (د جنورۍ په ۱۷مه) د ډونالد ټرمپ پلویانو د اعتراض څو وړې غونډې وکړې، خو د تاوتریخوالي کوم راپور ورنه‌کړل شو.

یوه چارواکي وویل، په دغې ورځ (هېڅ ډول پېښه) نه‌ده رامنځته شوې.

واشنګټن کې وروسته تر هغه وضعیت کړکېچن شوی چې د جنورۍ په شپږمه د ټرمپ پارېدلو پلویانو د کانګرس پر ودانۍ یرغل ورووړ.

ټرمپ ادعا کوي چې د ټاکنو پایله غلا شوې او دی ګټونکی دی، خو دا ادعا یې څو ځله د امریکا په محکمو کې رد شوې ده.

په واشنګټن او د لسګونه نورو ایالتونو په مرکزونو کې د ملي ګارد سرتېري چې د مظاهرې د مخنیوي په وسایلو سمبال دي، ځای پر ځای شوي دي.

دغه ځواکونه هڅه کوي چې د جنورۍ په ۲۰مه د ټاکل شوي ولسمشر جو بایډن له لوړې مخکې د نارامۍ هر ډول هڅه شنډه کړي.

امریکا او جرمني د روسیې د سیاسي مخالف الکسي ناوالني نیول وغندل

نیول شوی الکسي ناوالني

د امریکا متحده ایالاتو او جرمني د روسیې د سیاسي مخالف الکسي ناوالني نیول غندلي دي.

۴۴ کلن ناوالني چې له تېرې اګسټ میاشتې راهیسې په جرمني کې تر درملنې لاندې و، پرون د مسکو هوایي ډګر ته له رسېدو سره سم پولیسو ونیو. د اخبره د هغه دوو ملګرو په ټویټونو کې کړې او ویلي یې دي چې ناوالني د خیمکي ښارګوټي کې د پولیسو یوه مرکز ته انتقال شوی دی.

د امریکا د بهرنیو چارو وزیر مایک پومپیو په یوه بیان کې د ناوالني د "بې‌قید او شرطه" خوشې کېدو غوښتنه کړې ده.

پومپیو د ناوالني د نیولو په اړه د امریکا اندېښنه په ډاګه کړې او دا ګام‌یې د روسیې له‌خوا د ناوالني او نورو هغو څېرو د غږونو غلي کول بللي چې د روسیې منتقدین دي.

د جرمني د بهرنیو چارو وزیر هایکو ماس هم د ناوالني په نیولو انتقاد کړی او د هغه د سمدستي خوشې کېدو غوښتنه‌یې کړې ده.

د امریکا د منتخب ولسمشر جو بایډن ادارې هم چې د چهارشنبې په ورځ کار پیلوي، د ناوالني د خوشې کېدو غوښتنه کړې.

عبدالله: مذاکره کوونکې ډله هڅه کوي روانې مذاکرې په سرعت مخ ته لاړې شي

د افغانستان د ملي مصالحې عالي شورا مشر عبدالله عبدالله

د ملي مصالحې عالي شورا رئیس وايي، د افغانستان مذاکره کوونکې ډله هڅه کوي چې په قطر کې روانې مذاکرې په سرعت مخ ته لاړې شي

عبدالله عبدالله دا خبره په هغه دوهمه مجازي غونډه کې وکړه چې پرون د افغانستان د سولې له پروسې د اجماع د پیاوړتیا په هدف رابلل شوې وه.

ښاغلي عبدالله زیاته کړه: "تر هغه ځایه چې په موږ اړه لري، یو اصل چې زموږ مذاکره کوونکې ډله به‌یې تعقیبوي، تر خپله وسه روانو مذاکرو ته د سرعت بخښل دي. البته چې ټول‌شموله جوړجاړي ته رسېدل زموږ هدف دی."

په قطر کې د دولت او طالبانو مذاکراتي ډلو پرون ماښام په جلا جلا ټویټونو کې وویل چې د دواړو لورو د مذاکراتي ډلو مشرانو او غړو په خپلو کې غونډه وکړه چې د اجنډا ترڅنګ‌یې د راروانو غونډو په اړه بحث وکړ.

په قطر کې د طالبانو د سیاسي دفتر ویاند محمد نعیم ویلي چې د افغانستان د سولې لپاره د واشنګټن ځانګړي استازي زلمي خلیلزاد، وړمه ورځ یعنې د شنبې ماښام د طالبانو د سیاسي دفتر له مشر ملا عبدالغني برادر او د مذاکراتي ډلې له مشر عبدالحکیم حقاني سره د سولې پر موضوع خبرې وکړې.

نور راوښيه

XS
SM
MD
LG