د لاسرسۍ وړ لېنکونه

تازه خبر
چهارشنبه ۱ سلواغه ۱۳۹۹ کابل ۰۷:۱۴

نړۍ

د پاکستان ډيموکراټیک خوځښت لاهور کې د حکومت ضد غونډه کوي  

ارشیف، د پاکستان لاهور ښار یو جومات

د پاکستان ډيموکراټیک خوځښت نن په لاهور کې د حکومت ضد غونډه کوي.

د یوولسو ګوندونو د ګډ ائتلاف ویاند میا افتخار حسېن د ازادې اروپا/مشال راډیو ته وویل په دې سربېره چې کورنیو چارو وزارت ورته د غونډې اجازه نه ده ورکړې دوی به د لاهور په مېنار کې خپله غونډه ترسره کړي.

حسین وویل، اکثر مشران دې سیمې ته رسیدلي او ټول چمتووالی نیول شوی دی.

د پنجاب اعلی وزير عثمان بزادار په لاهور کې خبريالانو ته وويل چې د کرونا ویرس له کبله حالات ښه نه دي نو ځکه د اپوزیسیون ګوندونو ته د غونډې اجازه نه ورکوي.

عثمان بزادار زياته کړه چې د کرونا ویرس مثبتو پېښو شمېر ورځ تر بلې زياتيږي. د ده په وینا، که اپوزیسیون غونډه وکړه پرضد به یې قانوني چلند وشي.

پاکستان ډيموکراټیک خوځښت تر اوسه د پنجاب په ګوجرنواله او ملتان، د سیند په کراچۍ، د بلوچستان په کوټه او د خېبر پښتونخوا په پېښور کې د حکومت ضد جلسې کړې دي.

یاد ائتلاف د عمران خان استعفا او د رڼو انتخاباتو ترسراوی غواړي هغه غوښتې چې عمران خان او د هغه حکومت په کلکه رد کړي.

د ورځې تازه خبرونه دلته ولولئ

کرملېن: د ناوالني نیول کېدل د روسیې یوه کورنۍ موضوع ده

د کرملېن ویاند ډیمیټري پېسکوف

کرملېن نن سې شنبه (د مرغومي ۳۰مه) ویلي چې د نوېو اقتصادي بندیزونو د لګولو په اړه د یو شمېر لویدیځو هېوادونو څرګندونې ورته د پام وړ نه دي.

لېتوانیا، لاتویا او استونیا ویلي، دوی د اروپایي ټولنې له بهرنیو چارو وزیرانو غوښتي چې د کرملېن د منتقد الکسي ناوالني د نیولو له کبله دې دغه ټولنه پر روسیې د اقتصادي بندیزونو په اړه بحث وکړي.

د کرملېن ویاند ډیمیټري پېسکوف نن په یوې خبري غونډي کې ویلي چې د ناوالني نیول کېدل د روسیې یوه کورنۍ موضوع ده.

نوموړي دا هم ویلي چې د ناوالني د پلویانو د اعتراضونو څخه هم وېره نه لري.

الکسي ناوالني د دوشنبې په ورځ په مسکو کې د پولیسو له ماموریته په یوه ویډیويي پیغام کې له خپلو پلویانو غوښتنه وکړه چې حکومت-ضد اعتراضونو ته دوام ورکړي.

هغه وویل:"له تاسو غواړم چې غلي نه شئ. مقاومت وکړئ. لارو سړکونو ته راووځئ. له موږ پرته بل څوک زموږ ساتنه نه کوي. زموږ شمېر خورا زیات دی، هرهغه څه به ترلاسه کړای شو چې د ترلاسه کولو غوښتنه یې لرو."

ناوالني د یکشنبې ناوخته له جرمني څخه مسکو ته له رسېدو سره سم د مسکو په هوايي ډګر کې ونیول شو.

یوه قاضي امر کړی چې ناوالنې دې د ۳۰ ورځو لپاره په توقیف کې وساتل شي.

ځینو هېوادونو او نړیوالو سازمانونو د ناوالني د سمدستي خوشې کېدو غوښتنه کړې ده.

پاکستان کې د ۹ ګوندونو ائتلاف: د نوېو اعتراضونو لړۍ به پیل کړو

د پاکستان په مرکز اسلام اباد کې وتلی لاریون

په پاکستان کې د حکومت د نهو مخالفو ګوندونو ائتلاف اعلان کړی چې په ټول هېواد کې به د نوېو اعتراضونو لړۍ پیل کړي او دا فشارونه به له واکه د صدراعظم عمران خان تر لېرې کېدو پورې دوام وکړي.

د پاکستان ډیموکراټیک غورځنګ مشرانو د جنورۍ په ۱۸مه اعلان کړی چې د دولت ضد د نوېو لاریونونو او اعتراضونو پر پلان یې موافقه کړې ده.

د دوی په وینا دغه اعتراضونه به د روان کال په جنورۍ او فبرورۍ میاشتو کې د پاکستان په څو ښارونو کې ترسره شي.

نننۍ مظاهرې په اسلام اباد کې د پاکستان د انتخاباتو کمېسیون د ودانۍ مخته ترسره کېږي.

په تېر نوومبر او ډسمبر میاشتو کې هم لسګونه زرو کسانو د اپوزسیون په پلوۍ د پاکستان په لویو ښارونو کې لاریونونه وکړي.

هغوی د عمران خان د لېرې کېدو او نوېو شفافو انتخاباتو د ترسره کېدو غوښتنه کړې وه.

د اپوزسیون مشران ادعا کوي چې عمران خان د پاکستان د پوځ په مرسته او په تقلبي رایو سره د ۲۰۱۸ میلادي کال په انتخاباتو کې واک ته رسیدلی دی.

دغه مخالفین د پاکستان پوځي تشکیلات په ملکي چارو کې په مداخلې تورنوي.

په امریکا کې د "کوېډ١٩" له کبله د مړینو شمېر له څلور لکو واوښت

امریکا کې د کرونا ويروس له امله د مړ شوي کس جسد.

په امریکا کې د کوېډ١٩ ناروغۍ له کبله د مړینو شمېر له څلور لکو او په دې ویروس د اخته کسانو شمېر له ۲۴ میلیونو اوښتی دی.

د جانز هاپکنز پوهنتون د شمېرنو له مخې پرون ماسپښین د دې وبا له کبله د مړو کسانو شمېر ۴۰۰۷۳۳ ته ورسېد.

کلیفورنیا لومړنی ایالت و، چې د کوېډ١٩ د ناروغانو شمېر یې پرون دوشنبې له درې میلیون واوښت.

د ژمي له رارسېدو سره د امریکا له دریو په دوه برخې ایالتونو کې د کرونا ویروس مثبت موارد زیات شوي دي.

په عین حال کې چارواکو د کرونا د هغې نوې بڼې په اړه خبرداری ورکړی چې د پخواني هغې پرتله په چټکۍ سره خپرېږي.

روسي مخالف "الکسي ناوالني" له خپلو پلويانو د اعتراضونو غوښتنه کړې

الکسي ناوالني

د روسیې د حکومت سرسخت سیاسي مخالف، الکسي ناوالني له خپلو پلویانو غوښتنه وکړه، چې حکومت-ضد اعتراضونو ته دوام ورکړي.

ناوالني پرون دوشنبه د مسکو په خیمکي ښارګوټي کې د پولیسو له ماموریت څخه په یوه ویډیويي پیغام کې وویل، حکومتي چارواکو ورته ویلي، که څوک غلی نه شي، وبه وژل شي.

هغه وویل: "له تاسو غواړم چې غلي نه شئ. مقاومت وکړئ. لارو سړکونو ته راووځئ. له موږ پرته بل څوک زموږ ساتنه نه کوي. زموږ شمېر خورا زیات دی، هر هغه څه به ترلاسه کړای شو، چې د ترلاسه کولو غوښتنه یې لرو."

الکسي ناوالني د یکشنبې ناوخته له جرمني مسکو ته له رسېدو سره سم د مسکو په هوايي ډګر کې ونیول شو.

یوه قاضي امر کړی چې ناوالنې دې د ۳۰ ورځو لپاره په توقیف کې وساتل شي.

ځینو هېوادونو او نړیوالو سازمانونو د ناوالني د سمدستي خوشې کېدو غوښتنه کړې ده.

روسیې د کرونا ضد واکسین پروګرام پیل کړ

آرشیف

روسیې د کرونا-ضد واکسین د تطبیقولو پروګرام پیل کړ.

راپورونه وايي، د پلازمېنې مسکو ځینې اوسېدونکي پرون دوشنبه په کتارونو کې ولاړ وو، چې واکسین شي.

روسیې د نورو محدودیتونو له لګولو پرته، د کرونا ویروس ضد واکسین د نوي پروګرام د تطبیق اعلان کړی دی.

په روسیه کې دغه واکسین لومړی روغتیايي کارکوونکو، ښوونکو او هغو کسانو ته ورکول کېږي، چې ضمني ناروغۍ ولري.

په کرونا ویروس تر درې نیم میلیون د زیاتو کسانو د اخته کېدو له کبله روسیه په نړۍ څلورم ځای لري.

د امریکا د ټاکلي ولسمشر د لوړې ازمایښتي مراسم وځنډېدل

دغه اور د کانګرس ودانۍ نږدې لګېدلى و

د امریکا د متحدو ایالتونو د ټاکلي ولسمشر جو بایډن د لوړې ازمایښتي مراسم وروسته له هغې وځنډول شول، چې د امریکا د کانګرس ودانۍ ته نږدې اور ولګېد.

په پام کې وه، ازمېښتي مراسم سبا شپې ته عملي شي، خو د کانګرس له ودانۍ لیرې د بې سرپناه کسانو په کمپ کې د اورلګېدو پېښې دغه مراسم وځنډول.

جو بایډن سبا چهارشنبه لوړه کوي.

په ازمايښتي پروګرام کې د موسیقۍ ډلې او ځینې پوځیان تر اصلي مراسمو مخکې تمرین کوي.

دا مهال په پلازمېنه واشنګټن ډي. سي کې د ولسمشر جو بایډن د لوړې په مراسمو کې د احتمالي تاوتریخجنو اعتراضونو د مخنیوي په هدف په لوړه کچه اضطراري حالت نافذ دی.

د کانګرس د ودانۍ شا و خوا د ملي ګارډ، محلي او فډرال پولیسو تر ۲۰ زرو زیات کسان ګمارل شوي دي.

دا وروسته له هغې چې د جنورۍ میاشتې پر شپږمه د ډونالډ ټرمپ یوه ډله پلویانو د کانګرس پر ودانۍ یرغل وروړ او وروسته په شخړو کې د یوه پولیس په ګډون ۵ کسان ووژل شول.

پاکستاني پوځ په جنوبي وزیرستان کې دوه طالبان وژلي

آرشیف

د پاکستان پوځ په جنوبي وزیرستان کې د عملیاتو په ترڅ کې د دوو طالبانو د وژل کېدو خبر ورکوي.

پوځ نن په یوه خپره کړې خبرپاڼه کې ويلي، چې په دغو عملیاتو کې چې وخت او مشخصه سیمه یې نه ده یاده کړې او یوازې دومره یې ویلي چې استخباراتي معلوماتو پر اساس ترسره کړي، په وژل شویو کې هغه مشکوک کس هم شامل دی چې د پوځ پر سرتېرو د اکتوبر د میاشتې په برید کې یې لاس درلود.

په دغه برید کې شپږ سرتېري وژل شوي وو.

پوځ د دغو عملیاتو په پایله کې د دریم مشکوک کس د نیولو خبره هم کړې ده.

استرالیا کې د تېنس لږترلږه ۷۲ لوبغاړي قرنطین شول

ارشیف

په استرالیا کې د تېنس د لوی تورنمنت د پیلېدو په درشل کې لږترلږه ۷۲ لوبغاړي وروسته تر هغې سخت قرنطین شوي چې دې تورنمنت ته د لوبغاړو، روزونکو او چارواکو د لېږدولو په چارټر الوتکو کې د یو شمېر سپرلیو د 'کووېډ-۱۹' مثبتې پېښې ثبت شوې دي.

د دغو لوبو تنظیموونکو پرون یکشنبه تایید کړه چې د قطر له پلازمېنې دوحې څخه ملبورن ته په تللې الوتکه کې د یو مسافر د کرونا مثبته پېښه ثبت شوې ده.

که څه هم دغه مسافر د دغه ورزشي ټیم غړی نه‌دی، خو د ۲۵ لوبغاړو په ګډون د دې الوتکې ټولې ۵۸ سپرلۍ اجازه نه‌لري چې په هوټل کې له خپلو خونو ووځي او هم نه‌شي کولای چې تر۱۴ ورځو پورې تمرین وکړي.

تر دې مخکې د دغه تورنمنت ۴۷ نور لوبغاړي وروسته له هغې قرنطین شول چې له لاس انجلس څخه په یوه چارټر الوتکه کې د درېیو تنو او له ابوظبي هم په یوه الوتنه کې د یوه د کرونا مثبتې پېښې تثبیت شوې وې.

ټاکل شوې ده چې د استرالیا اوپین د تېنس لوبو سیالۍ د فبرورۍ په اتمه پیل شي. د دې لوبو د تنظیم د چارو مشر ویلي چې لوبې به په خپل وخت پیل شي.

د جنوبي کوریا یوې محکمې د سامسونګ کمپنۍ مرستیال مشر په بند محکوم کړ

ارشیف

د جنوبي کوریا یوې محکمې د الکترونیکي وسایلو د سترې کمپنۍ سامسونګ مرستیال مشر د فساد په تور په دوه‌نیم کلونو بند محکوم کړی دی.

۵۲ کلن لیي جای یونګ مخکې د جنوبي کوریا د ولسمشرې پارک ګیون هي یو همکار ته د رشوت ورکولو په تور په ۲۰۱۷ کال کې په پنځو کلونو بند محکوم شوی و.

هغه ویلي چې کوم غلط کار یې نه‌دی کړی چې وروسته‌یې سزا کمه شوه او د استېناف غوښتنې په نتیجه کې په زندان کې د یوه کال بند له تېرولو وروسته خوشې شوی و.

سترې محکمې د هغه دوسیه بېرته د سئول عالي محکمې ته استولې وه چې نن‌یې دغه نوی حکم صادر کړ.

د سامسونګ کمپنۍ عواید د جنوبي کوریا د کورنیو ناخالصو عوایدو په ۱۰۰ کې ۲۰ جوړوي.

د ډونالد ټرمپ پلویانو بیا د اعتراض څو وړې غونډې وکړې

ارشیف، د ټرمپ د پلویانو اعتراض

په واشنګټن کې د سختو امنیتي تدابیرو په ترڅ کې پرون (د جنورۍ په ۱۷مه) د ډونالد ټرمپ پلویانو د اعتراض څو وړې غونډې وکړې، خو د تاوتریخوالي کوم راپور ورنه‌کړل شو.

یوه چارواکي وویل، په دغې ورځ (هېڅ ډول پېښه) نه‌ده رامنځته شوې.

واشنګټن کې وروسته تر هغه وضعیت کړکېچن شوی چې د جنورۍ په شپږمه د ټرمپ پارېدلو پلویانو د کانګرس پر ودانۍ یرغل ورووړ.

ټرمپ ادعا کوي چې د ټاکنو پایله غلا شوې او دی ګټونکی دی، خو دا ادعا یې څو ځله د امریکا په محکمو کې رد شوې ده.

په واشنګټن او د لسګونه نورو ایالتونو په مرکزونو کې د ملي ګارد سرتېري چې د مظاهرې د مخنیوي په وسایلو سمبال دي، ځای پر ځای شوي دي.

دغه ځواکونه هڅه کوي چې د جنورۍ په ۲۰مه د ټاکل شوي ولسمشر جو بایډن له لوړې مخکې د نارامۍ هر ډول هڅه شنډه کړي.

امریکا او جرمني د روسیې د سیاسي مخالف الکسي ناوالني نیول وغندل

نیول شوی الکسي ناوالني

د امریکا متحده ایالاتو او جرمني د روسیې د سیاسي مخالف الکسي ناوالني نیول غندلي دي.

۴۴ کلن ناوالني چې له تېرې اګسټ میاشتې راهیسې په جرمني کې تر درملنې لاندې و، پرون د مسکو هوایي ډګر ته له رسېدو سره سم پولیسو ونیو. د اخبره د هغه دوو ملګرو په ټویټونو کې کړې او ویلي یې دي چې ناوالني د خیمکي ښارګوټي کې د پولیسو یوه مرکز ته انتقال شوی دی.

د امریکا د بهرنیو چارو وزیر مایک پومپیو په یوه بیان کې د ناوالني د "بې‌قید او شرطه" خوشې کېدو غوښتنه کړې ده.

پومپیو د ناوالني د نیولو په اړه د امریکا اندېښنه په ډاګه کړې او دا ګام‌یې د روسیې له‌خوا د ناوالني او نورو هغو څېرو د غږونو غلي کول بللي چې د روسیې منتقدین دي.

د جرمني د بهرنیو چارو وزیر هایکو ماس هم د ناوالني په نیولو انتقاد کړی او د هغه د سمدستي خوشې کېدو غوښتنه‌یې کړې ده.

د امریکا د منتخب ولسمشر جو بایډن ادارې هم چې د چهارشنبې په ورځ کار پیلوي، د ناوالني د خوشې کېدو غوښتنه کړې.

لبنان له فایزر کمپنۍ سره د کرونا ضد واکسین د رانیولو موافقه وکړه

د فایزر شرکت کرونا ضد واکسین

لبنان پرون یکشنبه له فایزر کمپنۍ سره د ۲ ملیونه او یو لک دوزه واکسین د رانیولو موافقه نهايي کړه.

لبنان د کرونا ضد دغه واکسین په داسې حال کې رانیسي چې په کرونا ویروس د اخته کسانو د شمېر زیاتېدو یې د روغتیایي څارنې سیستم اغېزمن کړی دی.

د اسوشېټډ پرس خبري اژانس په حواله، د واکسینونو دا بستې به د فبرورۍ له لومړیو لبنان ته ورسول شي.

د لبنان حکومت ویلي د فایزر کمپنۍ د واکسین ۲،۷ ملیونه نور دوزونه به د ملګرو ملتونو د ملاتړ یوه پروګرام له لارې دغه هېواد ته ورسېږي.

دا لا معلومه نه‌ده چې دا دوهمه بسته به کله لبنان ته ورسېږي، خو د حکومت د اعلامیې له مخې په دې اړه موافقه په اکټوبر میاشت کې لاسلیک شوې وه.

په لبنان کې تر اوسه نږدې دوه نیم لکه کسان په کرونا ویروس اخته شوي او د مړو شمېر په‌کې ۱،۹۰۰ ته نږدې شوی دی.

د روسیې د اپوزېسیون مشر مسکو ته له رسېدو سره سم ونيول شو

مسکو کې نیول شوی د روسیې اپوزېسیون مشر الکسي ناوالني

د روسیې د اپوزېسیون مشر الکسي ناوالني له جرمني پرون ناوخته مسکو ته له رسېدو سره سم ونيول شو.

دی له څو میاشتو په جرمني کې د مسمومېدو له کبله چې روسي چارواکي په‌کې دخیل بلل شوي وو، تداوي کېده.

په پلازمېنه مسکو کې پولیسو په لسګونه هغه کسان هم ونیول چې په یونوکوفو (Vnukovo) هوايي ډګر کې د الکسي ناوالني راتګ ته انتظار وو.

په نیول شویو کسانو کې د ناوالني د اداري فساد ضد بنسټ مدافع وکیل لیوبوف سوبول، د پروژو مدیر روسلان شاویدینوف او ځیني ژورنالېستان شامل دي.

پرون ناوخته د بلوا ضد ګڼ پولیس تر سترګو کېدل چې د راروانو مسافرو ترمینل ته‌یې د ناوالني د هغو پلویانو مخه نیوله چې شعار یې ورکاوه: فاشیستان!

ناوالني په داسې حال کې مسکو ته روان شو چې چارواکو یې د نیولو او د کلونو لپاره زندان ته د اچولو خبرداری ورکړی و.

جو بایډن د کرونا ویروس د لا خپرېدو مخنیوي لپاره بېړني اقدامات کوي

د امریکا منتخب ولسمشر جو بایډن

د امریکا متحده ایالاتو منتخب ولسمشر جو بایډن چې راروانه چهارشنبه لوړه کوي، په پام کې لري د کرونا ویروس د لا خپرېدو د مخنیوي لپاره بېړني اقدامات وکړي.

د ښاغلي بایډن د دفتر رئیس رونالډ کلېن دا خبره پرون خپلو لوړ رتبه همکارانو ته په یوه یادښت کې کړې ده.

په دغو اقداماتو کې د محصلانو د قرضو د ورکړې لپاره د وقفې تمدید او له هغو کسانو سره مرسته شامله ده چې د کرونا وبا پر مهال‌یې زیات کړاو ګاللی دی.

ټاکلی ولسمشر جو بایډن په پام کې لري چې د خپلې کاري دورې په لومړیو ۱۰۰ ورځو کې د امریکا ۱۰۰ ملیونه وګړو ته د کرونا ضد واکسین ورکړي، خو دا هغه هدف دی چې د کلېن په خبره ورته رسېدل ګران برېښي.

جو بایډن د ټاکنیزو کمپاینونو پر مهال د کرونا وبا په وړاندې د مبارزې لپاره د جدي او عملي اقداماتو ژمنه کړې وه.

د امریکا په متحده ایالاتو کې په کرونا ویروس د اخته کسانو شمېر ۲۴ ملیونه ته نږدې شوی دی.

د 'پي.ټي.اېم'مخکښه ثنا اعجاز: له بلوچستانه په زوره و ایستل شوم

د پښتون ژغورنې غورځنګ 'PTM'  مخکښه ثنا اعجاز

د پښتون ژغورنې غورځنګ 'PTM' مخکښه ثنا اعجاز وايي‌ چې د بلوچستان حکومت په زوره له دې ایالته ایستلې ده.

ثنا اعجاز د جنورۍ پر ۱۷مه د ازادې اروپا مشال راډيو ته وويل چې دا بلوچستان د پښتون مېشتې ولسوالۍ ژوب ته د یوه کتابتون پرانېستې ته ورغلې، خو پولیسو پرېنه ښوده.

نوموړې وویل: "دلته دومره ډير امنيتي کسان راغلي چې پاکستان کې ښايي په يو ترهګر پسې هم شايد ورنه شي. پولیسو او ټولو امنیتي کسانو راته ویلي چې یوه دقیقه خبرې به هم نه کوې او موږ یې را روان کړو او وايي چې د بلوچستان له حدودو به وځئ."

يو پولیس چارواکي چې رسنيو سره یې د خبرو اجازه نه درلوده، مشال راډيو ته د نوم نه خپرولو په شرط وويل چې د قانون له مخې د پښتون ژغورنې غورځنګ پر ځينو مشرانو د ورتګ بندېز دی، نو ځکه هغوی په بلوچستان کې فعاليت نه شي کولای.

مشال راډيو ته رسېدلي ويډيوز ښيي چې ثنا اعجاز د ليویز د ګڼو امنيتي اهلکارانو په منځ کې په موټر کې کښېنول کېږي.

ثنا اعجاز څو ورځې مخکې د لنډې مودې لپاره پولیسو بندي کړې هم وه.

نور راوښيه

XS
SM
MD
LG