د لاسرسۍ وړ لېنکونه

تازه خبر
جمعه ۲۶ مرغومی ۱۳۹۹ کابل ۰۶:۵۷

نړۍ

د قرغزستان د پخواني صدراعظم ۱۸ کلن بند حکم لغوه شوی

صفراسحاقوف

د قرغزستان سترې محکمې د دې هېواد د پخواني صدراعظم صفراسحاقوف د اتلس کلن بند حکم لغوه کړی دی.

نوموړی چې د فساد په تورمجرم پېژندل شوی و، ورته د دغه بند او د څه باندې درې میلیون ډالرو نغدي جریمې سزا ورکړل شوې وه.

محکمې نن وویل، چې دغه دوسیه یې بېرته د بیشکک یوې محکمې ته د بیا څېړنې لپاره استولې خو د دغې پریکړه په اړه یې نور دلایل نه دي څرګند کړي.

۴۳ کلن اسحاقوف چې د ۲۰۱۷ نه ۲۰۱۸ کال پورې یې د صدراعظم په توګه دنده ترسره کړې، پرځان د فساد لګول شوي تورونه ردکړي او هغه یې سیاسي انګېزه بللې ده. ​

د ورځې تازه خبرونه دلته ولولئ

په تونس کې د ډیموکراسۍ پلوه پاڅون لسمه کلیزه ولمانځل شوه

د تونس بيرغ

په تونس کې د ډیموکراسۍ پلوه پاڅون لسمه کلیزه پرون د کرونا وایروس د محدودیتونو له کبله په مختصره توګه ولمانځل شوه.

دغه پاڅون د دې سبب شو، چې د دغه هېواد زورواکی له واکه وپرځول شي او په عرب هېوادونو کې د ناکراریو څپه پیل شي.

په تونس کې د هغه څلور-ورځني ټولبند له کبله چې له پرونه نافذ شو، مظاهرې منع دي.

لس کاله مخکې د تونس ولسمشر، زین العابدین بن علي تر پراخو مظاهرو وروسته له واک څخه لیرې او په ۲۰۱۹م کال په جلاوطنۍ کې مړ شو.

دغه مظاهرې وروسته له هغې پیل شوې چې یوه نهیلي، ځوان هټیوال د پولیسو د زورزیاتي له کبله، ځان ته اور واچاوه.

د روسيې او سعودي چارواکو د سيمې امنیت او ايران په اړه بحث کړى

د عکس ښي لور ته د روسیې د بهرنیو چارو وزیر سرګي لاوروف او چپ لور ته د سعودي د بهرنیو چارو وزیر فيصل بن فرحان

د روسیې او سعودي عربستان د بهرنیو چارو وزیرانو د سیمې د امنیت او په تېره د خلیج له هېوادونو سره د تهران د اړیکو په اړه بحث وکړ.

سرګي لاوروف او فیصل بن فرحان پرون په مسکو کې سره ولیدل.

لاوروف له دې کتنې وروسته په یوه ګډه خبري غونډه کې وویل: "غواړو د دې شاهدان واوسو چې ایران او د خلیج هېوادونه په خپلو کې خبرې پیل کړي، د اعتماد او شفافیت د رامنځته کولو لپاره موافقه لیکونه لاسلیک کړي او په ټوله کې له یوبل سره همکار واوسي. د خلیج لپاره د یوه امنیتي تفاهم د پراختیا په مقصد زموږ وړاندیز دقیقا د همدې هدف لپاره دی."

د رویټرز خبري آژانس د راپور له مخې د سعودي د بهرنیوچارو وزیر له خپل روس سیال سره په کتنه کې، په منځنۍ آسیا کې د ده په وینا د ایران د مداخلې د پای ته رسولو غوښتنه کړې ده.

هغه همداراز ویلي، چې د سوریې د جګړې د پای ته رسولو پر وړاندې اساسي خنډ د ایران نیابتي وسله والې ډلې جوړوي.

په شمالي وزیرستان کې ٣ سرتېري وژل شوي

آرشیف

درې تنه پاکستاني سرتېري په شمالي وزیرستان کې په یوه نښته کې وژل شوي.

د پاکستان پوځ په یوه بیان کې وايي، چې دا سرتېري پرون په دې قبایلي سیمه کې له وسله والو سره په نښته کې ووژل شول.

سیمه يیزو چارواکو د آزادۍ راډیو مشال څانګې ته وویل، چې دا پوځي عملیات د شمالي وزیرستان په دته خېلو سیمه کې شوي دي.

په بیان کې همداراز په دوو جلا عملیاتو کې د دریو وسله وال د وژل کېدو ادعا هم شوې ده.

له دې نښتې دوه ورځې مخکې په شمالي وزیرستان کې پر یوه امنیتي پوسته د وسله والو په برید کې دوه پاکستاني سرتېري مړه او درې نور ټپیان شول.

د پاکستان پوځ په ۲۰۱۶ کال کې ادعا وکړه، چې له درې میاشتنیو پوځي عملیاتو وروسته یې په وزیرستان کې د افراطي وسله والو اډې له منځه وړې دي.

ملګري ملتونه: ٢٠٢٠ د روانې لسيزې تر ټولو تود کال و

آرشیف

ملګري ملتونه وايي، چې ۲۰۲۰ کال له ۲۰۱۶ کال وروسته د روانې لسیزې ترټولو تود کال و.

دا سازمان خبرداری ورکوي، چې نړۍ ښايي سږکال د تودوخې د لوړېدو له کبله له سخت ناورین سره مخامخ شي.

د ملګروملتونو راپور چې پرون- د جنوري په ۱۴مه خپور شو، په را روان کال کې د تودوخې د لوړېدو خبرداری ورکوي او وايي چې توده هوا ښايي په ځینو سیمو کې حتی د خلکو ژوند له خطر سره مخامخ کړي.

په راپور کې راغلي، چې ۲۰۱۶ کال له هغه راهیسې چې انسانانو د تودوخې د درجې ثبتول پیل کړي دي، تر ټولو تود کال و.

د ملګروملتونو سرمنشي انتونیو ګوتېرېش د دې راپور د اعلان پرمهال وویل، چې بشر په روانه پېړۍ کې د سانتيګراد د ۳ او ۵ درجو ترمنځ د تودوخې د لوړېدو پر لور روان دی.

راپور زیاتوي چې په ۲۰۲۰ کال کې د ځمکې د کرې د تودوخې اوسط د سانتيګراد ۱۴،۹ درجو ته ورسېده چې دا په ۱۸۵۰ کال کې له صنعتي دورې په راوروسته موده کې د تودوخې له ثبت شوې کچې د سانتيګراد ۱،۲ درجې زیاتوالی ښيي.

له ارمنستان او اذربایجانه د بښنې د نړیوال سازمان غوښتنې

ارشیف

د بښنې نړیوال سازمان له ارمنستان او اذربایجانه غوښتي چې د ګڼې ګوڼې په ځایونو کې په (ناسم او ړنده بڼه) د وسلو د استفادې په اړه څېړنه وکړي.

دغه سازمان ویلي، د نګورنو قره باغ لانجمنې سیمې پر سر جګړه کې د وسلو کارونه له نړیوالو قوانینو سرغړونه وه او ملکیان یې زیانمن کړي دي.

امنیستي انټرنشنل چې مرکز یې په بریتانیا کې دی پرون په یوه راپور کې وویل، دغلته د جګړې دواړو خواوو د ملکیانو هدف ګرځول رد کړي، خو دغه سازمان ویلي، موثق اسناد یې موندلي چې منعه شوې وسلې او چاودیدونکي توکي کارول شوي دي.

د بښنې په نړیوال سازمان کې د ختیځې اروپا او مرکزي اسیا د څانګې مشرې ماري سترادرز ( Marie Struthers) په یوه اعلامیه کې ویلي:" ملکي کسان وژل شوي، کورنۍ بې ځایه شوي او بې شمېره کورونه ویجاړ شوي دي".

د بښنې نړیوال سازمان وایي، د ارمنستان او اذربایجان د ځواکونو ۱۸ بریدونه یې ارزولي چې هغو کې ملکیانو ته مرګ ژوبله اوښتې.

د دوی څېړونکو د نومبر له لسمې وروسته د نګورنو قره باغ سیمه له نژدې کتلې، له همدې نېټې وروسته دغلته د مسکو په منځګړیتوب اوربند نافذ شوی دی.

اندونیزیا کې په یوه سمڅه کې د یوه حیوان انځور موندل شوی

اندونیزیا کې د یوه حیوان انځور

په اندونیزیا کې لرغون پوهانو په یوه سمڅه کې د یوه حیوان انځور موندلی چې په ظاهره تر ټولو پخوانۍ نقاشي ښيي.

دا د دغې سمڅې پر دیوال د وحشي خوګ انځور دی چې د ساینس اډوانس مجلې د معلوماتو له مخې، د حیوان له اصلي بڼې سره ډېر توپیر نه لري.

دغه رسامي په یوې لېرې پرتې 'سولاویسي' درې کې موندل شوې او دغې سیمه کې د انسانانو د اوسیدونکو لرغونی سند بلل کېږي.

د اتریش د ګریفیټ پوهنتون یوه څیړونکي ماکسیم اوبرت چې دغه راپور یې لیکلی ویلي، کومو کسانو چې دغه انځور ایستلی، د اوسنیو انسانانو په څېر متمدن وو او د اوسنۍ نقاشۍ ټول وسایل یې درلودل.

دا انځور د نقاشۍ قدیمي بڼه نه ده چې انسانانو موندلې ده.

تر دې وړاندې په جنوبي افریقا کې هشتګ ته ورته خط خطې نقاشي پیدا شوې چې ویل کېږي ۷۳ زره کاله لرغونی دی.

ډونالد ټرمپ پر کانګرس یرغل او په‌کې تاوتریخوالی وغانده

د امریکا ولسمشر ډونالد ټرمپ

د امریکا ولسمشر ډونالد ټرمپ ملت ته په یوه وېډیویي پیغام کې چې بېګا شپه‌یې خپور کړی، پر کانګرس د تېرې اوونۍ یرغل او په‌کې تاوتریخوالی غندلی، خو د استازو جرګې د هغه اقدام یادونه‌یې نه‌ده کړې چې نوموړی یې پرون د ورځې په لومړیو کې استیضاح کړ.

ټرمپ دغه وېډیويي پیغام داسې مهال خپور کړ چې د استازو جرګې مشرې نانسي پلوسي د ټرمپ د استیضاح په اړه له رأی ګیري وروسته چې د دې جرګې ۲۳۲ غړو د ۱۹۷ په مقابل کې مثبتې رایې ورکړې، هغه سند لاسلیک کړ چې ټرمپ د پاڅون په لمسونې تورنوي.

په استازو جرګه کې ډیموکراتان اکثریت دي، ۱۰ جمهوري غوښتونکو هم د ټرمپ د استیضاح په پلوي رایې ورکړي.

ټرمپ په دغه وېډیویي پیغام کې تاوتریخوالی په کلکه غندلی او ویلي یې دي چې دا هر څه د ده د مفکورې او د دوی د غورځنګ ضد دي او زیاتوي چې د ده هېڅ یو رښتینی ملاتړی سیاسي تاوتریخوالي ته لمن نه‌وهي.

دا د امریکا په تاریخ کې لومړنی ولسمشر دی چې د واک پر مهال دوه ځله استیضاح کېږي.

اوس به د امریکا په سنا جرګه کې چې د ټرمپ پلویان په‌کې اکثریت دي، د ټرمپ د استیضاح لپاره محکمه جوړېږي، خو اټکل دا دی چې سنا به د جنوري تر ۲۰مې یا د ټرمپ د واک تر پای ته رسېدو مخکې د محکمې بهیر پیل نه‌کړي.

د روغتیا نړیوال سازمان څېړونکي د کرونا په اړه څېړنو لپاره ووهان ته ورسېدل

ووهان کې د خوراکي توکو هغه مارکېټ چې په‌کې د لومړي ځل لپاره کرونا ویروس خپور شو.

د روغتیا نړیوال سازمان (WHO) څېړونکي د چین ووهان ښار ته رسېدلي چې د کرونا ویروس د خپرېدو په اړه څېړنه کوي.

دغه ویروس د لومړي ځل لپاره د ۲۰۱۹ کال په وروستیو کې له همدې ښاره خپور شوی و.

د چین دولتي رسنۍ ووهان ته د روغتیا د نړیوالې ادارې د ۱۰ څېړونکو د رسېدو خبر ورکړی او ویلي یې دي چې دوی به شاوخوا یوه میاشت په دې ښار کې تېر کړي.

د روغتیا نړیوال سازمان مشر تدروس ادهانوم ګبریاسوس تېره اوونۍ د دغو څېړونکو د سفر پر ځنډېدو مایوسي څرګنده کړې او ویلي و چې ډېر دغه ساینسپوهان چین ته د تلو په هدف له خپلو هېوادونو وتلي، خو چینایي چارواکو یې د اجازې چارې نه‌دي بشپړې کړي.

هغه زیاته کړه چې دغه ساینسپوهان به پر دې تمرکز کوي چې دغه ویروس د لومړي ځل لپاره په څه ډول خلکو ته انتقال شو.

د چین حکومت ویلي چې ښایي دغه ویروس له وارد شویو سمندري خوړو سره دې هېواد ته داخل شوی وي، خو نړیوال ساینسپوهان او اړوندې ادارې دغه تیوري ردوي.

د ورلډومېټرز وېب‌پاڼې د وروستیو شمېرو له مخې په ټوله نړۍ کې نږدې ۹۳ ملیونه وګړي پر دغه ویروس اخته شوي او نږدې دوه ملیونه‌یې هم له امله مړه شوي دي.

امریکا د ایت‌الله خامنه‌یي اړوند پر دوو بنسټونو بندیزونه ولګول

د ایران مذهبي مشر ایت‌الله علي خامنه‌یي

د امریکا متحده ایالاتونو د چهارشنبې په ورځ د ایران د مذهبي مشر ایت‌الله خامنه‌یي اړوند دوه بنسټونو باندې بندیزونه ولګول.

د امریکا د خزانې وزارت وویل، د ایران واکمنان له دغو بنسټونو څخه په استفادې توانېدلي چې یو "فاسد" نظام‌یې د اقتصاد پراخې برخې په خپل لاس کې ولري.

د «آستان قدس رضوي» او «ستاد فرمان امام» په نوم د دغو بنسټونو پر مشرانو احمد مروي او محمد مخبر باندې هم بندیزونه ولګول شول.

د امریکا له‌خوا یوه اعلامیه کې راغلي چې استان قدس رضوي بنسټ د ایران د رژیم د مخالفانو او تبعید شویو ایرانیانو ملکیتونه غصب کړي او د هغوی او نورو اقلیتونو مذهبي حقونه‌یې نقض کړي دي.

د اعلامیې له مخې، هر څوک چې له دغو ایراني بنسټونو او چارواکو سره راکړه ورکړه وکړي، د بندیزونو له خطر سره مخامخېدای شي.

د اروپا امنیت او همکارۍ سازمان د قرغزستان ټاکنو ځینې ستونزې په ډاګه کړې

قرغزستان کې د ولسمشریزو ټاکنو رأی شمېرنه

د اروپا د امنیت او همکارۍ سازمان مشر د قرغزستان په وروستیو ولسمشریزو ټاکنو کې ځینو ستونزو ته اشاره کړې ده.

دغه ټاکنې چې د تېرې یکشنبې په ورځ ترسره شوې، دغه سازمان پرې څارنه درلوده.

د اروپا د امنیت او همکارۍ سازمان مشر توماس میزیریتس ویلي، د ستونزو یوازنی لامل دا و چې بشکېک په بېړه پرېکړه وکړه چې دغه ټاکنې او د نظام د څرنګوالي په اړه دې ټول‌پوښتنه هم‌مهاله ترسره شي.

ده ویلي، قرغزستان کې د ټاکنو بنسټونه له قانوني پلوه مناسب دي، خو په خبره‌یې د ټول‌پوښتنې په اړه کافي وضاحت نه‌دی موجود.

دغه ټاکنې ملي‌پال سیاستوال صدر جباروف چې پخوا زنداني و، په لوی تفاوت سره وګټلې.

رأی ورکوونکو دغلته بېرته د جمهوري نظام د ټینګښت پراخ ملاتړ کړی دی.

د اروپا د امنیت او همکارۍ سازمان څارونکو په لومړنۍ ارزونه کې ویلي، کاندیدانو تقریباً په ازاد ډول کمپاینونه ترسره کړل، خو په خبره‌یې ټاکنیزې منډې ترړې د یوه کاندید تر واک لاندې وې.

یوتیوب د ولسمشر ډونالډ ټرمپ رسمي چینل بند کړی

ولسمشر ډونالډ ټرمپ

یوټیوب وایي، د امریکا د اوسني ولسمشر ډونالډ ټرمپ رسمي چینل یې بند کړی دی.

د دې ټولنیزې شبکې مسؤلین وایي، دا اقدام له دې کبله شوی چې ولسمشر ټرمپ د تاوتریخوالي د پارېدو په برخه کې د یوټیوب له پالیسیو سرغړونه کړې ده.

تردې وړاندې ټویټر او فیسبوک هم د امریکا د کانګرس پر ودانۍ د ولسمشر ټرمپ د پلویانو تر یرغل وروسته ورته اقدام کړی وو.

په دې یرغل کې چې د جنورۍ پر شپږمه شوی د یوه پولیس په ګډون پنځه تنه ووژل شول.

ډونالډ ټرمپ چې د نوومبر په ولسمشرۍ انتخاباتو کې د درغلیو ادعا کوي، په لومړي سر کې د جنورۍ په شپږمې نېټې د خپلو پلویانو اقدام وستایه، خو وروسته یې تاوتریخوالی وغانده.

منتقدین وایي، ډونالډ ټرمپ د ناسمو او کرکجنو معلوماتو د خپرېدو او د تاوتریخوالي د پارېدو لپاره له ټولنیزو رسنیو کار اخستی دی.

د ایران پوځ په عمان خلیج کې پوځي تمرینات پیل کړل

ایراني سرتیري

د ایران پوځ په عمان خلیج کې د نژدې واټن ویشتونکو سمندري توغندیو پوځي تمرینات پیل کړل.

د ایران دولتي رسنیو داسې مهال دا راپور ورکړی چې د تهران او واشنګټن ترمنځ لانجې اوج ته رسیدلي دي.

په دغو راپورونو کې ویل شوي چې لوژستیکي جنګي بېړۍ ماکران چې د هلیکوپټرالوتکو د انتقال ظرفیت په درلودلو سره د ایران تر ټولو لویه پوځي کښتۍ بلل شوې او د توغندي ویشتونکي دستګاه وړونکې زرې هم په دې دوه ورځنیو تطبیقاتو کې ګډون کوي.

د ایران او امریکا ترمنځ اړیکې له ۲۰۱۸ میلادي کال راهیسې وروسته له هغه لانجمنې شوې چې د امریکا متحده ایالات د ایران د اټمي تړونه ووت.

امریکا له هغه وروسته پر ایران نور اقتصادي بندیزونه ولګول چې تهران په غبرګون کې په دې وروستیو کې د یورانیمو د بډاینې سطح تر شلو فیصدو پورې لوړه کړې ده.

د ایران ولسمشرحسن روحاني نن د کابینې په غونډه کې وویل، د امریکا بندیزونه به ناکام شي.

د کرملین منتقد الکسي ناوالني بېرته روسیې ته ځي

د کرملین منتقد الکسي ناوالني

د کرملین منتقد الکسي ناوالني وايي، روانه اوونۍ به بېرته روسیې ته ولاړ شي.

نوموړي نن چهارشنبه (د مرغومي ۲۴مه) په یوې ویډیویې اعلامیې کې ویلي چې په پام کې لري د جنورۍ په ۱۷مه روسیې ته ولاړ شي.

دی وايي: "وروستی کار چې د روسیې ولسمشر ولادیمیر پوتین یې کولی شي دا دی چې پر کرملین یوه لوحه کېږدي او پرې ولیکي چې الکسي په هېڅ صورت بېرته کورته مه راځه. جرمني ته راتګ زما انتخاب نه وو. زه په خپله خوښه دلته نه یم. دلته د دې لپاره یم چې هغوی غوښتل ما ووژني. هغه کسان اوس له دې کبله چې وېې نه شو کولی ما ووژني، ډېر خوابدې دي. زه ژوندی پاتې شوم او هغوی اوس ګواښ کوي چې بندي به مې کړي."

ناوالني چې د زهري مسمومیت څخه ژوندی پاتې شو، پنځه میاشتې په جرمني کې د درملنې لپاره تېرې کړې.

د روسیې پر حکومت تور دی چې د الکسي ناوالني په مسمومیت کې لاس لري، خو مسکو دا تورونه ردوي.

ښايي د کانګرس پر ودانۍ د وروستي برید په خاطر ټرمپ استیضاح شي

د امریکا پر کانګرس د لاريون کوونکو د بريد يوه صحنه. Jan. 6, 2021

د امریکامتحده ایالتونو د کانګرس استازیو جرګه ښايي د کانګرس پر ودانۍ د مظاهره چیانو د برید په خاطر نن ولسمشر ډونالډ ټرمپ استیضاح کړي.

د امریکا کانګرس پر ولسمشر یا نورو چارواکو د تورونو د لګولو لپاره هغوی امپیچ کوي چې که پړ شي د لرې کولو لار یې برابرېږي.

د استازیو جرګې مشرې ننسي پلوسي ویلي، که د امریکا مرستیال ولسمشر مایک پنس د ولسمشرۍ څوکۍ لپاره ډونالډ ټرمپ نامناسب ونه بولي جرګه به ژر ان د جنورۍ دیارلسمه چې نن ده ټرمپ استیضاح کړي.

استازیو جرګه چې ډموکراټان پکې اکثریت لري په دې لټه کې ده چې ډونالډ ټرمپ ګوښه کړای شي.

دې جرګې پرون یو پریکړه لیک تصویب کړی او له اجرایه قوې یې غوښتي چې د اساسي قانون له مخې د ورکړل شویو واکونو په کارولو سره دې ولسمشر ډونالډ ټرمپ د کانګرس شاوخوا د رامنځته شویو پېښو په خاطر ګوښه کړي.

اخوا د امریکا مرستیال ولسمشر مایک پنس ویلي چې دی به د اساسي قانون د پنځه ویشتم تعدیل په اساس ټرمپ له واکه ګوښه نه کړي.

په ولسمشر ډونالډ ټرمپ باندې تر هغه وروسته فشارونه زیات شول چې د جنورۍ په شپږمه د ټرمپ په پلوۍ مظاهره چیان د کانګرس ودانۍ کپېټول هیل ته ننوتل او له پولیسو سره په اخ او ډب کې د یوه پولیس په شمول پنځه کسان ووژل شول.

امریکا د کرونا ویروس ضد واکسین پروګرام چټکوي

امریکا کې يوه کس ته د کرونا ويروس ضد واکسین تطبیقېږي

امریکا د کرونا ویروس د واکسین پروسه چټکوي ځکه چارواکو د کرونا له لاسه په یوه ورځ د نږدې څلور نیمو زرو کسانو د مړینې خبر ورکړی.

پخوا کله هم دومره ډېر کسان په یوه ورځ نه و مړه شوي.

د امریکا د نویو اقداماتو له مخې ټول هغه کسان چې متحده ایالتونو ته سفر کوي باید د کرونا ویروس د منفي معاینې سند وړاندې کړي.

سربېره په دې چې د کرونا ویروس د واکسین په اړه د ولسمشر ډونالډ ټرمپ د ادارې په پالیسیو انتقادونه روان دي امریکايي چارواکو له ۶۵ کلونو په ډېر عمر لرونکو باندې د واکسین تطبیق لازمي ګرځولی.

د امریکا د جانزهاپکنز پوهنتون د شمېرو له مخې په امریکا کې د کرونا مثبتې پېښې نږدې درویشتو میلیونو (۲۲۸۳۸۱۱۰) ته پورته شوي دي چې له ډلې یې څه باندې درې لکه او اتیا زره تنه ( ۳۸۰۶۷۰ ) مړه شوي.

په ټوله نړۍ کې بیا د کرونا د مثبتو پېښو شمېر له ۹۱ میلیون او پنځو لکو تېر شوی او له ډلې یې نږدې دوه میلیونه (۱۹۶۲۲۱۹) کسان مړه شوي.

نور راوښيه

XS
SM
MD
LG