د لاسرسۍ وړ لېنکونه

تازه خبر
جمعه ۲۶ مرغومی ۱۳۹۹ کابل ۰۷:۲۸

افغانستان

لوګر چارواکي: د کرنې او مالدارۍ په برخو کې د ١٧ پروژو چارې بشپړې شوې

د لوګر سيمه ييز چارواکي د پروژو د پرانيستې پرمهال

په لوګر کې د کرنې او مالدارۍ په برخه کې د درې سوه اتلس میلیونه افغانیو په لګښت د ۱۷ پروژو چارې بشپړې شوې.

دغه پروژې چې د کرنې او مالدارۍ په برخه کې رغول شوي، زیاتره یې د کرنې، مالدارۍ، بڼوالۍ، لبنیاتو او د اوبو لګولو په برخه کې بشپړې شوي دي.

د لوګر والي محمد اجمل شاپور د دغه پروژو بشپړېدل د کرنې او مالدارۍ د پیاوړتیا او معیاري کېدو په برخه کې د افغان حکومت ژمنتیا څرګندوي.

هغه زياتوي: "په یوه غریب هېواد او ولایت کې د زراعت په سکټور کې د څه باندې درې سوه میلیونه افغانیو په لګښت د دومره پروژو پلي کېدل، دا دې دولت د ژمنو عملي کېدل دي، چې تاسې سره یې کړي دي."

د لوګر د کرنې او مالدارۍ رئیس عبدالله تسل وایي، چې د یادو پروژو لګښت د کرنې او مالدارۍ وزارت، مالیې وزارت او د یو شمېر نړیوالو ادارو او موسساتو لخوا ورکړل شوی دی.

ددې ولایت بزګران د دې پروژو پلي کیدا د کرنې او مالدارۍ د پرمختګ او د دوی د یو شمېر ستونزو هواري لپاره اغېزناکې وبللې او وایي، په دې سره به یې کرنه پیاوړې او د تولیداتو کچه زیاته شي.


د لوګر د کرنې ریاست مسولینو په غونډه کې بزګرانو او ګډونوالو ته د زېري په ډول په راتلونکي نوي کال کې د کرنې او مالدارۍ وزارت له لورې د ۱۵۵ میلیونه افغانیو په مالي لګښت د ورته نورو پروژو د پلي کېدو خبر هم ورکړ.

د ورځې تازه خبرونه دلته ولولئ

افغان چارواکي: بلخ کې لسو طالبانو ته مرګ ژوبله اوښتې

آرشیف

افغان چارواکي په بلخ ولایت کې له افغان ځواکونو سره په نښته کې لسو طالبانو ته د مرګ ژوبلې اړولو ادعا کوي.

۲۰۹ شاهین قول اردو په یوه بیان کې وايي، چې افغان ځواکونه تېره شپه د بلخ ولسوالۍ په هېواد او پلاس سیمو کې له طالبانو سره ونښتل چې په نتیجه کې یې څلور طالبان وژل شوي او شپږ نور ټپیان دي.

بیان زیاتوي، چې په نښته کې لس نور وسله وال نیول شوي دي.

طالبانو تراوسه په دې اړه څه نه دي ویلي.

چارواکي: په غزني کې ۱۲ وسله وال طالبان وژل شوي

د غزني ښار يوه څنډه. ارشيف

تندر قول اردو په غزني ولایت کې د ۱۲ وسله والو طالبانو د وژل کېدو ادعا وکړه.

د دې قول اردو په خبره یوه ډله وسله والو طالبانو غوښتل تېره شپه په اندړو او قره باغ ولسوالیو کې د امنیتي ځواکونو پر پوستو حملې وکړي.

د تندر قول اردو ویاند، اېمل خان مومند نن سهار رسنیو ته وویل، پر دغو وسلوالو هوايي حملې وشوې.

هغه زياتوي: "په اندړو ولسوالۍ کې ۸ تنه وسله وال طالبان وژل شوي او یو تن یې ټپي شوی، همدارنګه په قره باغ ولسوالۍ کې د یوه ډلمشر په ګډون درې تنه طالبان وژل شوي او یو عراده فولډر [موټر] یې هم له منځه وړل شوی دی."

وسله والو طالبانو د دې پېښې په اړه رسماً څرګندونې نه دي کړي.

د ناټو ملکي استازى: هدفي وژنې هېڅ راز توجیه نه لري

د عکس ښي لور ته د افغانستان د ملي امنیت شورا سلاکار حمدالله محب او چپ لور ته د ناټو ملکي استازى

په افغانستان کې د ناټو ملکي استازی وايي، د افغانستان د ملي امنیت له سلاکار حمدالله محب سره په خبرو کې یې د سولې د بهیر او په دې هېواد کې د امنیتي وضعیت په اړه بحث وکړ.

ستیفانو پونتې کوروو پر ټویټر په یوه بیان کې چې پرون ماښام خپور شو ویلي، ناټو په افغانستان کې د جګړې د ختمولو لپاره له طالبانو سره د افغان دولت د سولې د خبرو ملاتړ کوي.

هغه وروستیو هدفي وژنو ته د اشارې په ترڅ کې ويلي، چې دا حملې هېڅ راز توجیه نه لري او ګټه یې هېچا ته نه رسېږي.

د ناټو ملکي استازی په داسې حال کې په افغانستان کې هدفي وژنو ته اشاره کوي، چې په قطر کې د سولې د مستقیمو خبرو له پیلېدو سره سره په وروستیو څه باندې دوو میاشتو کې د دې حملو په شمېر کې زیاتوالی راغلی او په دې ترڅ کې ډېر خبریالان، مدني فعالان او دولتي چارواکي وژل شوي دي.

افغان حکومت غور ته د وروستي پېښې د څېړلو لپاره پلاوى لېږي

عزت‌الله بیک

د افغانستان د ملي امنیت شورا وايي، چې له امنیتي ځواکونو سره په نښته کې د غور د ولایتي شورا د غړي عزت الله بیګ د وژل کېدو په اړه د څېړنو په مقصد، د ولسمشراشرف غني د حکم په اساس غور ولایت ته یو پلاوی استوي.

د ملي امنیت شورا دفتر په یوه خبرپاڼه کې چې تېرماښام خپره شوه ویلي دي، چې د ملي امنیت شورا د دفتر د پوځي سرمفتش په مشرۍ پلاوی به غور ولایت ته سفر وکړي او د دې پېښې د څرنګوالي په اړه به څېړنې وکړي.

د ملی امنیت شورا پرون له دې مخکې پر ټویټر لیکلی و، چې د ملي امنیت ځانګړو ځواکونو غوښتل د ولایتي شورا غړی عزت الله بیګ د ولایتي شورا د مرستیال عبدالرحمان عطشان او د غور غږ راډیو د خبریال بسم الله ایماق د وژنې په تور ونیسي خو هغه پر امنیتي ځواکونو ډزې وکړې او په نتیجه کې ووژل شو.

ايران: د پخوا په څېر د افغانستان اساسي قانون پر بنسټ د سولې ملاتړ کوو

د عکس ښي لور ته میرویس ناب او چپ لور ته بهادر امينيان

په کابل کې د ایران سفیر بهادر امینیان وايي، چې هېواد یې په افغانستان کې د اساسي قانون پربنسټ او د تېرو شلو کلونو د لاسته راوړنو د خوندي ساتلو په صورت کې د پخوا په څېر د افغانستان د سولې د خبرو ملاتړ کوي.

ښاغلي امینیان دا څرګندونې پرون د افغانستان د بهرنیوچارو له سیاسي معین میرویس ناب سره د کتنې پرمهال کړې دي.

د افغانستان د بهرنیوچارو وزارت په یوه بیان کې د ایران د سفیر له قوله ویلي، چې تهران د سولې د بهیر د ملاتړ ترڅنګ په افغانستان کې دایمي سوله او د اوربند ټینګېدل غواړي.

د بیان له مخې په دې کتنه کې د افغانستان او ایران ترمنځ د سیاسي، اقتصادي او سوداګریزو اړیکو او د ترانزیتي همکارۍ د پراختیا په اړه هم بحث وشو.

له دې مخکې تل د ایران او طالبانو د نږدې اړیکو په اړه راپورونه ورکړل شوي او ادعا شوې ده، چې تهران د دې ډلې ملاتړ کوي.

ایران د طالبانو د ملاتړ تورونه بې بنسټه بللي دي.

د افغانستان او آیرلنډ ترمنځ د کرکټ سیالۍ راتلونکې اونۍ پيلېږي

آرشیف

په پام کې ده چې د افغانستان او آیرلنډ د کرکټ لوبډلو ترمنځ د یو ورځنیو لوبو لړۍ د راتلونکې اونۍ د پنجشنبې په ورځ په متحده عربي اماراتو کې پیل شي.

د افغانستان کرکټ بورډ وايي دا درې لوبې به د روانې جنوري میاشتې په ۲۱مه، ۲۴مه او ۲۶ مه نېټه ترسره شي.

د افغانستان د کرکټ بورډ ویاند فرید هوتک تېر ماښام آزادۍ راډیو ته د دې لوبو پر اهمیت خبرې وکړې.

هغه وویل: "دا لوبې د دواړو هېوادونو لپاره خورا ارزښتناکې او مهمې لوبې دي.

د افغانستان د کرکټ ملي لوبډلې له څو ورځو را په دې خوا په متحده عربي اماراتو کې خپل تمریناتي کمپ پیل کړی دی. انشاالله له ښه چمتووالي سره به د آیرلنډ پروړاندې د لوبو ډګر ته ووځي."

د افغانستان او نړۍ د کرکټ نامتو لوبغاړی راشدخان په دې لوبو کې د ګډون لپاره پرون متحده عربي اماراتو ته ورسېد او محمدنبي، مجیب ځدراڼ او د ملي لوبډلې نور غړي له دې مخکې هلته ته رسېدلي دي.

دا لوبې د پلازمېنې ابوظبي د شېخ زاهد په کرکټ لوبغالي کې پلان شوې دي.

کورنیو چارو وزارت د خبریالانو خوندیتوب ته ګامونه اوچت کړي

د افغانستان د کورنیو چارو وزارت ویاند طارق ارین

د افغانستان د کورنیو چارو وزارت وایي، له اړوندو نورو ادارو سره یې د خبریالانو خوندیتوب ته ګامونه اوچت کړي دي.

د دغه وزارت ویاند طارق ارین رسنیو ته ویلي، دوی د یوې نوې تګلارې له مخې دا چاره پيل کړې او په خبره یې د خبریالانو په وړاندې هر ډول ګواښونه ثبت او تعقېبیږي.

ارین زیاتوي: "کورنیو چارو وزارت تاوتریخوالي ته د رسېدو د همغږۍ مرکز له لارې خبریالانو او مدني فعالانو ته ور پېښ ګواښونه څیړي، موږ ته د ټولو هېوادوالو په ځانګړي توګه خبریالانو امنیت مهم دی او دې برخه کې له خبري بنسټونو او مدني ټولنو سره کار کوو."

په تېرو څو میاشتو کې هلمند کې د ازادي راډیو د خبریال په ګډون پنځه خبریالان او درسنیو کار کوونکي په مستقیو بریدونو او چاودنو کې وژل شوي.

کورنیو چارو وزارت وایي، د دغو وژنو پیښې څیړي.

حنیف اتمر: روان تاوتریخوالي او د ملکیانو وژنې د سولې پر خبرو باور کم کړی

حنیف اتمر او د سویډن د بهرنیو چارو وزیره ان لینده

د افغانستان د بهرنیو چارو وزیر وایي، روان تاوتریخوالي او د ملکیانو وژنو دوحه کې د سولې پر خبرو د افغانانو باور کم کړی دی.

حنیف اتمر د سویډن د بهرنیو چارو له وزیرې ان لینده (Ann Linde) سره ټیلیفوني خبرو کې دا اندېښنه ښودلې او ویلي دي چې دا وضعیت د سولې پایله "له ستونزو او جدي ننګونو" سره مخ کولای شي.

دواړو خواوو د خبریالانو او فعالانو د هدفي وژنو پر زیاتېدو هم اندېښنه ښودلې او ښاغلي اتمر هیله څرګنده کړې چې سویډن له نورو هېوادونو سره په ګډه افغانستان کې د تاوتریخوالي د کمولو او اوربند په چارو کې همکاري وکړي.

ښاغلي اتمر پرون کابل کې د اروپایي ټولنې له سفیر سره هم ورته اندېښنې شریکې کړې وې.

دا لیدنې کتنې د افغان حکومت د هغې تګلارې یوه برخه ده چې غواړي د سولې خبرو د بریا لپاره د سیمې او نړۍ اجماع او نظرونه سره یو کړي.

د افغانستان او ترکمنستان ترمنځ درې مهمې پروژې پرانیستل شوې

د افغانستان او ترکمنستان ترمنځ د اقتصادي پروژو د پرانیستې مراسم

د افغانستان او ترکمنستان ترمنځ درې مهمې اقتصادي پروژې پرانیستل شوې.

دغو کې یوه پروژه د اقینې-اندخوی ترمنځ د رېل پټلۍ ده چې د جوړېدو کارونه‌یې تازه بشپړ شوي او دوه نورې پروژې د (۵۰۰ کیلو ولټه) په ظرفیت د برښنا د لېږد او نوري فایبر دي.

د افغانستان او ترکمنستان ولسمشرانو محمد اشرف غني او قربان قلي بردي محمدوف د دغو پروژو پرانیسته د دواړو هېوادونو ترمنځ د سوداګریزو او اقتصادي اړیکو د پیاوړتیا لپاره مهمه وبلله.

شاوخوا میاشت وړاندې د ایران او افغانستان ترمنځ د هرات-خواف د رېل پټلۍ هم پرانیستل شوه چې ۲۲۵ کیلو متره اوږدوالی یې درلود.

افغان حکومت د موټرو له نمبر پلېټ نه د ۳۹ شمېره لیرې کوي

ارشیف

د افغانستان حکومت پرېکړه وکړه چې د موټر له نمبر پلېټ نه به د ۳۹ شمېره لیرې کوي.

دا پرېکړه نن سهار د ولسمشر لومړي مرستیال امرالله صالح اعلان کړه او ویې‌ویل، دې شمېرې د ترافیکو ریاست کې رشوت اخیستو ته زمینه برابره کړې وه.

ښاغلي صالح ویلي، دا موضوع ځینو کسانو ته د شیدو په غوا بدله شوې او ترافیکو ریاست ته‌یې هدایت ورکړی چې په دایمي ډول دا شمېره له پلېټونو حذف کړي.

ده ویلي، ژر به دا موضوع ولسمشرۍ مقام ته وړاندیز شي او زیاته کړې یې ده چې له راتلونکې شنبې وروسته هېڅوک باید دې پلېټونو پسې سرګردانه نه‌شي.

په پلېټونو کې ۳۹ شمېرې موجودیت په بازارونو کې د موټرو اصلي بیه کموله.

د دغې ټولنیزې ستونزې د لیرې کولو لپاره که څه هم په وار وار کمپاینونه وشول، خو کومه پایله‌یې ورنه‌کړه.

د افغانستان او ترکمنستان ولسمشران درې مهمې پروژې پرانیزي

د اقینې-اندخوی د رېل پټلۍ

ټاکل شوې د افغانستان او ترکمنستان ولسمشران نن د دواړو هېوادونو ترمنځ درې مهمې پروژې پرانیزي.

دغو کې یوه پروژه د اقینې-اندخوی ترمنځ د رېل پټلۍ ده چې د جوړېدو کارونه‌یې تازه بشپړ شوي او دوه نورې پروژې د برښنا د لېږد او نوري فایبر دي.

محمد اشرف غني او قربان قلي بردي محمدوف د وېډیو کنفرانس له لارې د پرانیستې دغو مراسمو کې برخه اخلي او ویناوې هم کوي.

د تېرې جمعې په ورځ د ترکمنستان د بهرنیو چارو وزیر د همدغو پروژو په تړاو د بحث لپاره په یوه دوه ورځني سفر کابل ته راغلی و.

شاوخوا یوه میاشت وړاندې د ایران او افغانستان ترمنځ د هرات-خواف د اوسپنې پټلۍ هم پرانیستل شوه چې ټولټال ۲۲۵ کیلو متره اوږدوالی لري.

د خبریالانو او د بشري حقونو د فعالانو پر هدفي وژنو د حنیف اتمر اندېښنه

د حنیف اتمر او د اروپایي ټولنې له سفیر اندریس وان برنت لیدنه

د افغانستان د بهرنیو چارو وزیر محمد حنیف اتمر د خبریالانو او د بشري حقونو د فعالانو پر هدفي وژنو سخته اندېښنه ښودلې ده.

ښاغلي اتمر تېره ورځ په دې اړه په کابل کې د اروپایي ټولنې له سفیر اندریس وان برنت سره وکتل او د ډیموکراتیکو ادارو د ملاتړ په برخه کې یې د دغې ټولنې رول وستایه.

د بهرنیو چارو وزارت په یوه خبرپاڼه کې د اروپایي ټولنې د سفیر په حواله راغلي چې دوی د افغانستان پر روان وضعیت خبر دي او سولې ته د رسېدو په برخه کې د سیمه‌ییزې او نړیوالې اجماع ملاتړ کوي.

هدفي وژنو چې د کابل په ګډون بېلابېلو ښارونو کې زیاتې شوې دي، د بشري حقونو د ملاتړو او نورو بېلابېلو سازمانونو غبرګون هم پارولی دی.

حکومت څو ځله وویل چې دا وژنې د طالبانو له‌خوا کېږي، خو طالبان بیا وایي، دوی یوازې پوځي اهداف په نښه کوي او د خبریالانو او مدني فعالانو په وژنو کې لاس نه‌لري.

د تښتول شوي عبدالرؤف پلار: که حکومت ناغېړي وکړي، له طالبانو مرسته غواړم

بلخ کې د عبدالرؤف د ژغورلو لپاره اعتراضونه او غوښتنې

په بلخ کې د یوه تښتول شوي نهه کلن ماشوم پلار وایي، که حکومت‌یې د زوی په ژغورلو کې همداسې ناغېړي وکړي، دی به له وسله‌والو طالبانو مرسته وغواړي.

د عبدالرؤف په نوم دغه نهه کلن ماشومان نږدې درې میاشتې مخکې تښتول شوی او اختطاف کوونکو یې د خوشې کېدو لپاره د یو میلیون ډالرو غوښتنه کړې ده.

د عبدالرؤف پلار محمد نبي پرون په بلخ کې خبریالانو ته وویل، حکومت‌یې د زوی د اختطاف په تور څو کسان ونیول، خو وروسته‌یې بیرته په ضمانت خوشې کړل.

په همدې تړاو له څه مودې راهیسې د دغه ماشوم کورنۍ او خپل خپلوانو د بلخ ولایت مخې ته په اعتراضي ډول د پرلت خېمه وهلې ده.

چارواکو له دې وړاندې ویلي، د تښتوونکو د پلټنې لپاره‌یې هڅې دوام لري.

د افغانستان دفاع وزارت: فاریاب کې د موټر بم او ډله‌ییز برید مخه ونیول شوه

ارشیف، فاریاب کې د افغان ځواکونو عملیات

د افغانستان دفاع وزارت وایي، د فاریاب قیصار ولسوالۍ کې یې د موټر بم او ډله‌ییز برید مخه نیولې ده.

د دغه وزارت مطبوعاتي دفتر ویلي، د ملي اردو ځواکونو پرون له چاودېدونکو توکو هغه ډک موټر هدف ته له رسېدو مخکې پېژندلی چې ۷ تنه په ځان مرګو واسکټونو سمبال برید کوونکي په‌کې ناست وو.

د وزارت په خبرپاڼه کې راغلي، برید کوونکو چې دوی طالبان یاد کړي دي، له افغان ځواکونو سره جګړه کړې چې له امله‌یې ۷ واړه وژل شوي دي.

طالبانو تر اوسه په دې اړه څه نه‌دي ویلي.

کابل کې د امریکا سفارت: امریکا د مؤقت حکومت د جوړېدو پلوي نه کوي

په کابل کې د امریکا د سفارت شارژدافیر راس وېلسن

په کابل کې د امریکا د سفارت شارژدافیر وایي، هېواد یې په افغانستان کې د مؤقت حکومت د جوړېدو پلوي نه کوي.

راس وېلسن نن چهارشنبه (د مرغومي ۲۴مه) پر خپل ټویټر دغه راز لیکلي چې د افغانستان د سولې مذاکراتو پایلې په افغانانو پورې اړوندې دي.

د ده په وینا امریکا په دې باور ده چې د دغو مذاکراتو پایلې باید د افغانستان د خلکو هیلې منعکسې کړي.

دا څرګندونې داسې مهال کېږي چې اوس- اوس د یوه مؤقت حکومت د جوړېدو په اړه بحثونه کېږي او انګېرنه دا ده چې ګواکې دا له طالبانو سره د سولې توافق زمینه برابرولی شي.

د افغانستان د دولت د مرکچي پلاوي یوه غړي حفیظ منصور تېره اوونۍ وویل چې یو شمېر هېوادونه په افغانستان کې د مؤقت حکومت جوړېدل غواړي، خو د هېڅ هېواد نوم یې وانه خېست.

د افغانستان حکومت او په قطر کې د طالبانو سیاسي دفتر بیا ازادي راډیو ته ویلي چې د مؤقت حکومت د جوړېدو موضوع اصلا ًپه خبرو کې مطرح شوې نه ده.

نور راوښيه

XS
SM
MD
LG