د لاسرسۍ وړ لېنکونه

تازه خبر
سه شنبه ۱۲ کب ۱۳۹۹ کابل ۰۶:۵۸

افغانستان

د ناټو د غړو هېوادونو بهرنیو چارو وزیران غونډه کوي

د ناټو بيرغ

د ناټو د بهرنیو چارو وزیران نن د ویډیو کنفرانس له لارې غونډه کوي.

دا دوه ورځنۍ غونډه په داسې حال کې پیلېږي، چې د دغه پوځي تړون ماموریت په افغانستان کې ستونزمن شوی دی، ځکه چې د دې تړون مهم غړی د امریکا متحد ایالات غواړي چې د جنوري تر پنځلسمې له خپلو څلور نیم زره پوځیانو څخه دوه زره له افغانستانه وباسي.

د ناټو سرمنشي ینس ستولتنبرګ تر غونډې یوه ورځ مخکې وویل: "هیڅوک نه غواړي چې په افغانستان کې تر اړتیا زیات پاتې شي، په راتلونکو میاشتو کې به خپل حضور حالاتو ته په کتو وارزوو، په یوه سخته دوه لارې کې یوو."

ښاغلي ستولتنبرګ زیاته کړه، که ځواکونه له افغانستانه باسي، دا خطر شته چې دا سیمه د نړیوالو ترهګرو په پناهځای بدله شي او که پاتې شي دا وېره شته چې یو اوږد ماموریت به یې له شخړو سره مل وي.

امریکایي ځواکونه د ناټو د پوځیانو هوایي ملاتړ کوي او د ترانسپورت او لوژیستیک په برخو کې مرسته ورسره کوي.

ناتو په افغانستان کې اوس نژدې یولس زره سرتیرې لري.

د ورځې تازه خبرونه دلته ولولئ

دفاع وزارت: کاپیسا کې د القاعده د ۴ غړو په شمول ۱۳ طالبان ووژل شول

ارشیف، افغان ځواکونه

افغان ځواکونه د کاپیسا په نجراب ولسوالۍ کې د القاعده شبکې د څلورو غړو د وژل کېدو خبر ورکړ.

دفاع وزارت په یوه اعلامیه کې چې نن‌یې خپره کړه، وویل چې د نجراب ولسوالۍ په افغانیه دره کې د عملیاتو په ترڅ کې د القاعده مربوط د څلورو پاکستاني ترهګرو په ګډون ۱۳ طالبان وژل شوي او ۱۱ تنه‌یې ټپیان شوي دي.

طالبانو تر اوسه په دې اړه څه نه‌دي ویلي.

پروان کې ۲ تنه د ۲ ډاکترانو د برمته کولو په جرم په بند محکوم شول

ارشیف

په پروان کې دوه تنه د دوو ډاکترانو د برمته کولو په جرم په ۱۵ کاله بند محکوم شول.

دا ډاکتران نږدې یوه میاشت مخکې برمته شوي وو او د غره په یوه غار کې ساتل کېدل چې له هغه ځایه تښتېدلي و او د ملي اردو یوې پوستې ته‌یې ځانونه رسولي وو.

د پروان د ښاري محکمې رئیس قضاوتیار فدا محمد عرفان ازادي راډیو ته وویل، عدلي بنسټونو د علني محاکمې په ترڅ کې قنداغا او دستګیر د بګرام په ولسوالۍ کې د سرصیاد اېمرجنسي کلینیک د دوو ډاکترانو د اختطاف په جرم په ۱۵ کاله بند محکوم کړل.

د عرفان په وینا، د دې دوو تنو د جرم د شریکانو په اړه حکم نه‌دی اعلان شوی، ځکه چې هغوی تښتېدلي دي.

ننګرهار کې د انعکاس سیمه‌ییز ټلوېزیون درې ښځینه کارکوونکې ووژل شوې

ارشیف، ننګرهار کې د یوې حملې په سیمه کې پولیس

په دوو جلا حملو کې، د انعکاس سیمه‌ییز ټلوېزیون درې ښځینه کارکوونکې په جلال‌اباد ښار کې په ډزو ووژل شوې.

سیمه‌ییز چارواکي ازادي راډیو ته وايي چې لومړۍ حمله نن مازیګر شاوخوا څلور بجې د افغانستان ختیځ د ننګرهار مرکز جلال‌اباد ښار زرګرانو سیمه کې وشوه چې په‌کې د دغه سیمه‌ییز ټلوېزیون دوه کارکوونکې ووژل شوې.

کابو هم‌مهاله، د دغه ټلوېزیون یوه بله کارکوونکې د قصبې په سیمه کې په نښه شوه.

تر اوسه چا د پېښې مسؤلیت نه‌دی منلی.

ډسمبر میاشت کې، د انعکاس ټلوېزیون یوه ویانده ملاله میوند ووژل شوه. د هغې پېښې مسؤلیت داعش ډلې منلی و.

بدخشان کې د پور او سپما ۵ کلیوالې ټولنې جوړې شوې

د افغانستان په نقشه کې د بدخشان ولایت

په بدخشان ولایت کې د پور او سپما کلیوالې ټولنې جوړې شوې.

د کلیو د بیارغونې او پراختیا وزارت ویاند محمد رفیق جنبش نن سې شنبه (د کب ۱۲مه) ازادي راډیو ته وویل چې د کلیوالي اقتصاد د پياوړتیا ملي پروګرام، د بدخشان ولایت په مرکز فیض اباد کې د پور او سپما پنځه کلیوالې ټولنې جوړې کړې دي.

نوموړي دغه شان وویل چې په دې ولسوالۍکې یې درې ښځینه سپما ګروپونه د ۲۴کلیوالو مېرمنو په غړیتوب جوړ کړي دي.

دغه پروګرام ښځو ته فرصت برابروي، څو د سپما له لارې اقتصادي ځان بسیاینې ته ورسېږي.

د یادونې وړ ده چې دې ولسوالۍکې ۱۵ سپما ګروپونو ته د ټولنو د تشکیل او د تولیدي ګروپونو د جوړولو په اړه هم روزنه ورکړل شوې ده.

ننګرهار کې د نِکلي لوښو تولید د پاکستاني تولید مخه نیولې

ارشیف، عکس تئزیني بڼه لري

په ننګرهار ولایت کې د نِکلي لوښو تولید د پاکستاني تولید مخه نیولې ده.

د یادې فابریکې مسؤول خان ولي نن سې شنبه (د کب ۱۲مه) ازادي راډیو ته وویل چې پر فابرېکه یې ۹۰ زره امریکایي ډالر پانګونه کړې او له شااوخوا پنځه کالونو راهیسې يې په فعالیت پیل کړی چې لسګونه تنه ورسره په فني او غیر فني توګه په کار بوخت دي.

د ننګرهار ولایت سره رود ولسوالۍ دو سرکې سیمه کې د نِکلي لوښو دغه تولیدي فابریکه۴۰ ډوله نِکلي لوښې تولیدوي چې په دې توګه یې د پاکستاني نِکلي تولیداتو مخه نیولې ده.

ښاغلی خان ولي زیاتوي چې پخوا به دا لوښي په ډېرې سختۍ له پاکستانه را واردېدل، خو اوس له نېکه مرغه دا لوښي دلته تولیدیږي او د ننګرهار د ۲۲ ولسوالیو په ګډون کونړ، لغمان، کابل، خوست، غزني او نورو ولایتونو ته هم خپل تولیدات صادروي.

د یادې فابریکي مسوول خان ولي امنیتي او برېښنایي ستونزې، د خامو موادو نشتوالی او د یو سم او مناسب ځای نشتوالی د ستونزو په توګه یادوي.

په ننګرهار کې یو شمېر نورې فابریکې هم شته چې د دېګ بخارونو یا نورو اړتیا وړ پخلي توکو د تولید برخه کې کار کوي او تولیدات یې د سیمې هېوادونو ته هم صادریږي.

سیګار: افغانستان کې د امریکا ۲٫۴ میلیارډه ډالره ضایع شوي

ارشیف، سیګار

د افغانستان د بیارغونې پر چارو د امریکا د حکومت د ځانګړي سر مفتش دفتر یا سیګار وايي، د ۲،۴ میلیارد ډالرو په ارزښت په افغانستان کې د امریکا په پیسو له جوړو شوېو تاسیساتو یا کار نه اخېستل کېږي او یا ضایع شوي دي.

سیګار په یوه راپور کې چې پرون خپور شو ویلي، دا پروژې چې ښوونځي، سړکونه، محبسونه، روغتونونه، پلونه، یو هوټل او د افغان ځواکونو تاسیسات په کې دي او لګښت یې د امریکا دفاع وزارت، د امریکا د نړیوال پرمختګ ادارې USAID ، OPIC او د بهرنیو چارو وزارت ورکړی یا کار نه دی ترې اخېستل شوی، یا له ټاکلي هدف سره سمه استفاده نه ده ترې شوې، یا سم نه دي ساتل شوي او یا ګردسره ویجاړ شوي دي.

خو برعکس له ټولو لګېدلو ۷،۸ میلیارد ډالرو څخه د سیګار په وینا یوازې د څه باندې ۳۴۳ میلیونه ډالرو په ارزښت د جوړو شویو تاسیسات وضعیت سم و.

د سیګار راپور زیاتوي چې له ډېری دې تاسیساتو یا سمه استفاده نه ده شوې، یا ترمیم شوي نه دي او یا پرېښودل شوې دي.

سیګار وايي چې د دې پروژو د رغونې پر مهال دې ته پاملرنه نه وه شوې چې ایا افغان حکومت دې تاسیساتو ته اړتیا لرله او ایا د هغو د ساتنې لپاره یې مالي او تخنیکي امکانات درلودل که نه؟

سیګار په افغانستان کې د امریکا د حکومت د بیارغونې د لګښتونو د څرنګوالي په اړه وخت ناوخت راپورونه خپروي.

ارګ: ولسمشر غني د لوی څارنوال فرید حمیدي استعفی ومنله

لوی څارنوال فرید حمیدي

د افغانستان جمهوري ریاست وايي، ولسمشر محمد اشرف غني د لوی څارنوال استعفی ومنله.

د جمهوري ریاست مرستیال ویاند دوا خان مینه پال ازادي راډیو ته وویل، فرید حمیدي پرون دوشنبه (د کب ۱۱مه) د شخصي ملحوظاتو له مخې استعفی ورکړې ده: "ولسمشر د لوی څارنوال محترم فرید حمیدي استعفی ومنله. حمیدي صاحب د کورنیو او شخصي ستونزو له کبله خپله استعفی وړاندې کړه، ولسمشر یې د خدمتونو د درناوي تر څنګ استعفی ومنله."

فرید حمیدي د ۱۳۹۵لمریز کال د وري/ حمل میاشتې پر ۲۰مه له ولسي جرګې د ۱۱۳ رایو په ترلاسه کولو د باور رایې اخېستې وې او د لوی څارنوال په توګه ټاکل شوی و.

چارواکي: د کجکي بند د دوهم فاز د رغونې چارې ۲۷ سلنه مخ­ته تللي

په هلمند کې د کجکي د برېښنا بند

د افغانستان د اوبو د تنظیم ملي اداره وايي، په هلمند کې د کجکي د برېښنا د تولید بند د دوهم فاز د رغونې چارې ۲۷ فیصده مخ­ته تللي دي.

د دې ادارې ویاند نظام الدین خپلواک پرون دوشنبه (د کب ۱۱مه) ناوخته ازادي راډیو ته وویل: "اوس­مهال د دغه بند د دوهم فاز د رغونې چارې په چټکۍ سره روانې دي چې تر ۲۷ سلنو پورې یې چارې مخ­ته تللي دي. پر دغه فاز به تر ۲۰۹ میلیون امریکايي ډالره لګښت راځي. دغه بند به په ټوله کې د ۱۵۱ مېګاواټه برېښنا د تولید ظرفیت ولري."

ښاغلی نظام وايي، د کجکي د بند لومړی فاز د ۵۱ مېګاواټه او دوهم فاز چې کار یې روان دی د ۱۰۰ مېګاواټه برېښنا د تولید ظرفیت لري.

د اوبو د تنظیم ملي اداره وايي، د کجکي بند به په ټوله کې د یو میلیارد متر مکعب اوبو د ذخیره کولو وړتیا پیدا کړي.

د کجکي د برېښنا بند د دوهم فاز د رغونې تړون په ۱۳۹۵ لمریز کال کې لاسلیک شو چې باید په څلورو کلونو کې یې چارې بشپړې شوې وای.

چارواکي: د لوګر له مس عینکه ۲۵۰۰ قلمه اثار کابل ته راوړل شول

ارشیف، لوګر کې د مس عینک کان

د افغانستان د اطلاعاتو او فرهنګ وزارت وايي، د لوګر له مس عینک کان څخه شااوخوا ۲۵۰۰ قلمه موندل شوي لرغوني اثار کابل ته ولېږدول شول.

د دغه وزارت ویاند صابر مومند پرون دوشنبه(د کب ۱۱مه) ناوخته ازادي راډیو ته وویل:

"د لوګر له مس عینک څخه شاا و خوا ۲۵۰۰ قلمه اثار کابل ته انتقال شوي دي. په دغو اثارو کې ۵۰۰ یې هغه اثار دي چې خټین او مسي لوښي شامل دي او باقي یې ټولې سکې دي."

ښاغلی مومند وايي، موندل شوي لرغوني لوښي ملي موزیم ته لېږدول شوي او پاتې ۲۰۰۰ اثار چې زیاتره یې سکې دي، د لرغونپوهنې ریاست ته وړل شوي چې په لابراتوار کې تر مسلکي پاککارۍ وروسته ملي موزیم ته وسپارل شي.

د ولسمشر غني او خلیلزاد لیدنه؛ واشنګټن به د سولې پروسه کې اغېزمن رول ولوبوي

د ولسمشر غني او زلمي خلیلزاد د تېر ځل لیدنه، د ۲۰۲۰ کال د فبروري ۲۰مه.

د افغانستان جمهوري ریاست وایي، د افغانستان د سولې لپاره د امریکا ځانګړي استازي زلمي خلیلزاد له ولسمشر اشرف غني سره په کتنه کې ډاډ څرګند کړ چې واشنګټن به د سولې په پروسه کې اغېزمن رول ولوبوي.

ارګ په خپره کړې خبرپاڼه کې ویلي چې ولسمشر او ښاغلي خلیلزاد په دې کتنه کې چې نن له غرمې مخکې یې ترسره کړه، په دې اړه چې د سولې د پروسې د پرمختګ لپاره وړاندې څه ډول ګامونه اوچت شي، خبرې وکړې.

ښاغلي خلیلزاد چې د امریکا د ولسمشر جو بایډن له ادارې وروسته‌یې د لومړي ځل لپاره افغانستان، قطر او د سیمې یو شمېر نورو هېوادونو ته نوی سفر پیل کړی، په کابل کې دغه‌راز د افغانستان د ملي مصالحې عالي شورا له مشر عبدالله عبدالله سره هم وکتل.

د ښاغلي عبدالله ویاند فریدون خوځون وویل چې ښاغلي عبدالله له خلیلزاد سره د سولې پر بهیر، د دوحې پر مذاکراتو، د دوحې پر تړون د امریکا پر روانې بیاکتنې او په هېواد کې د روان تاوتریخوالي د پای ته رسولو پر لارو چارو خبرې وکړې.

خلیلزاد داسې مهال د سیمې له هېوادونو څخه د کتنې دغه نوې لړۍ پیل کړې چې پرون پر هغه تړون چې ده له طالبانو سره لاسلیک کړی، یو کال واوښت.

د دغه تړون له مخې باید ټول امریکایي ځواکونه د طالبانو له لوري د ځینو ضمانتونو په بدل کې تر مې میاشتې له افغانستانه ووځي، خو د بایډن ادارې ویلي چې طالبانو خپلې ژمنې نه‌دي پر ځای کړي او پر دې او په توله کې پر دغه تړون له سره کتنه کوي.

طالبانو د دغه تړون په بشپړ عملي کېدو ټینګار کړی دی.

روغتیا وزارت: له ۱۲ زرو زیات افغان روغتیا پالان د کرونا ضد واکسین شوي

ارشیف، هرات کې یوه روغتیا پال ته د کرونا ویروس تطبیق

د افغانستان عامې روغتیا وزارت چارواکي وایي، تر اوسه‌يې له ۱۲ زرو زیاتو روغتیا پالانو ته د کرونا ضد واکسین تطبیق کړی دی.

د دې وزارت ویاند او د کتلوي معافیت پروګرام مشر غلام دستګیر نظري روېټرز خبري اژانس ته ویلي چې دغه روغتیا پالان‌یې د افغانستان په ټولو ۳۴ ولایتونو کې واکسین کړي او دغه لړۍ دوام لري.

د افغانستان روغتیا وزارت ویلي چې د کرونا ضد واکسین د تطبیق په دې مرحله کې د استرازینیکا واکسین، روغتیا پالانو، د افغان امنیتي ځواکونو غړو او نورو هغو ته چې عمرونه‌یې زیات دي، یا د دغې ناروغۍ په وړاندې یې د بدن معافیت کم دی، لومړي دوزه تطبیق کوي.

هند د دې واکسین پنځه لکه دوزه افغانستان ته ورکړي دي.

د ښاغلي نظري په وینا چین هم ورسره د سینوفارم واکسین د دوه لکه نورو دوزو مرستې ژمنه پرون وکړه چې په دې سره له افغانستان سره د چین د واکسین د مرستو ژمنه څلور لکو دوزو ته رسېږي.

خو هغه وویل، تر اوسه دا نه‌ده څرګنده چې چین به دغه واکسین چې د روغتیا نړیوال سازمان تأیید کړی، کله افغانستان ته ورکوي.

د وروستیو شمېرو له مخې په افغانستان کې د کرونا له امله د مړو شویو شمېر نږدې دوه‌نیم زرو او پرې د اخته شویو نږدې ۵۶ زره کسانو ته رسېږي.

زلمي خلیلزاد کابل کې له افغان چارواکو سره لیده کاته پيل کړل

د افغانستان د ملي مصالحې عالي شورا مشر عبدالله عبدالله او د افغان سولې لپاره د امریکا ځانګړي استازي زلمي خلیلزاد نننۍ لیدنه

د افغانستان د سولې لپاره د امریکا ځانګړی استازی زلمی خلیلزاد کابل ته رسېدلی او له افغان چارواکو سره‌یې لیده کاته پيل کړي دي.

د ملي مصالحې عالي شورا مشر عبدالله عبدالله ویلي، ده له خلیلزاد او د هغه له ټیم سره د سولې پر بهیر، د دوحې پر مذاکراتو، د امریکا پر روانې بیاکتنې او راتلونکو ګامونو خبرې کړې دي.

عبدالله څو شېبې وړاندې پر خپله ټویټرپاڼه ولیکل "موږ د تاوتریخوالي د بېړني پای ته رسولو او د سولې خبرو ته د سرعت ورکولو غوښتنه بیا وکړه".

د امریکا د بهرنیو چارو وزارت په یوه خبرپاڼه کې ویلي، ښاغلی خلیلزاد به دوحې او یو شمېر نورو پلازمېنو ته هم سفر وکړي.

خلیلزاد یو کال وړاندې له طالبانو سره په دوحه کې افغانستان ته د سولې راوستلو تړون لاسلیک کړ.

افغان دولت د دوحې هوکړه ګټوره نه‌بولي او ویلي یې دي، دغې هوکړې له وخت ضایع کولو پرته افغانانو ته بل څه نه‌‍دي ورکړي.

طالبان بیا دا هوکړه ګټوره بولي او وایي، امریکایي لوری باید پرې ودرېږي.

زلمی خلیلزاد دوحې، کابل او یو شمېر نورو ښارونو ته تازه سفر پيلوي

د افغان سولې لپاره د امریکا ځانګړی استازی زلمی خلیل‌زاد

د افغانستان د سولې لپاره د امریکا ځانګړی استازی زلمی خلیلزاد دوحې، کابل او یو شمېر نورو ښارونو ته تازه سفر پيلوي.

دا خبره د امریکا د بهرنیو چارو وزارت پرون په یوه خبرپاڼه کې کړې ده.

خبرپاڼه کې راغلي، خلیلزاد به له افغان چارواکو، مشرانو، طالب استازو او د هغو هېوادونو له چارواکو سره خبرې له سره پيل کړي چې د افغانستان په عادلانه او دوامداره سیاسي جوړجاړي او دایمي او هر اړخیز اوربند کې یې ګټې نغښتې دي.

خلیلزاد یو کال وړاندې په دوحه کې د طالبانو له مرستیال او د سیاسي دفتر له مشر ملا عبدالغني برادر سره (افغانستان ته د سولې راوستلو) په نوم د دوحې هوکړه لاسلیک کړه.

د نوموړي دا سفر داسې مهال پیلېږي چې افغان دولت د دوحې هوکړه ګټوره نه‌بولي او ویلي یې دي، دغې هوکړې له وخت ضایع کولو پرته افغانانو ته بل څه نه‌دي ورکړي.

طالبان بیا دا هوکړه ګټوره بولي او وایي، امریکایي لوری باید پرې ودرېږي.

چین له افغانستان سره د کرونا ضد دوه لکه دوزه نور واکسین مرسته کوي

د چین کرونا ویروس ضد سینوفارم واکسین

د افغانستان عامې روغتیا وزارت وایي، چین پرون ورسره د نورو کرونا ضد دوه لکه دوزه واکسین د مرستې ژمنه وکړه.

دا خبره د دې وزارت مرستیال ویاند میرویس عليزي تېره شپه ازادي راډیو ته وکړه او ویې‌ویل: "د چین سفیر چې د افغانستان د عامې روغتیا له وزیر سره ناسته درلوده، له افغانستان سره‌یې د ۲۰۰ زره نورو واکسینو د مرستې ژمنه وکړه چې په دې سره د هغو واکسینو چې چین‌یې له افغانستان سره د مرستې ژمنه کوي، څلور لکه دوزو ته رسېږي."

له دې مخکې د کواکس نړیوال ائتلاف هم له افغانستان سره د درې ملیون دوزه واکسین د مرستې ژمنه کړې ده.

د علیزي په وینا تر اوسه پورې یې له اتو زرو زیاتو کسانو ته د کرونا ضد واکسین لومړي دوزه ورکړي دي.

دا د استرازینیکا د واکسین هغه پنځه لکه دوزه دي چې هند له افغانستان سره مرسته کړې ده.

ترکیه او افغانستان د خپلو ډیپلوماتیکو اړیکو سلمه کلیزه لمانځي

د افغانستان او ترکیې بیرغونه

ترکیه او افغانستان په خپلو کې د ډیپلوماتیکو اړیکو سلمه کلیزه لمانځي.

د هغې اعلامیې له مخې چې د ترکیې د بهرنیو چارو وزارت پرون یکشنبې خپره کړې، ویل شوي چې د ترکیې د بهرنیو چارو وزیر مولود چاوش اوغلو به نن دوشنبه په انقره کې د افغانستان له سفیر امیر محمد رامین سره په ګډه د دې سفارت په انګړ کې نیالګي چې د دواړو هېوادونو د ملګرتیا سمبول دی، کېنوي.

د ترکیې د انادولیا خبري اژانس د راپور له مخې اوغلو به له هغې وروسته د وېډیو کنفرانس له لارې له کابل سره په دې مناسبت جوړو شویو مراسمو ته چې د هغه سیال د افغانستان د بهرنیو چارو وزیر حنیف اتمر به هم په‌کې ګډون کوي، وینا وکړي.

د افغانستان او ترکیې ترمنځ ډیپلوماتیکې اړیکې د ۱۹۲۱ کال د مارچ په لومړۍ نېټه د دواړو هېوادونو ترمنځ د یوه ائتلاف د تړون په لاسلیک کېدو سره ټینګې شوې.

ترکیه هم لومړنی هېواد و چې په ۱۹۱۹ کال د افغانستان له خپلواکۍ وروسته‌یې په کابل کې سفارت پرانیست.

د راپور له مخې افغانستان هم دوهم هېواد دی چې هغه مهال چې ترکیې د خپلواکۍ لپاره جګړه مخ ته وړله د ترکیې عالي ملي اسامبله‌یې په رسمیت پېژندلې وه.

نور راوښيه

XS
SM
MD
LG