د لاسرسۍ وړ لېنکونه

تازه خبر
جمعه ۷ لیندۍ ۱۳۹۹ کابل ۰۷:۰۷

نړۍ

امریکا نن د خلاص آسمان له اتلس کلن تړونه وځي

مايک پومپیو

ټاکل شوې وچې د امریکا متحده ایالات نن رسماً د خلاص آسمان له اتلس کلن تړون څخه ووځي.

واشنګټن مسکو په کراتو کراتو له دغه تړون څخه چې پر وسلو د کنټرول او تایید یو تړون دی، په سرغړونه تورن کړی.

دا به د امریکا د د ولسمشر ډونالډ ټرمپ له خوا د وسله له نړیوالو تړونونو څخه د هغه ووتلو وروستي یوه بېلګه وي.

د امریکا د بهرنیو چارو وزیر مایک پومپیو پرون شنبې اعلان وکړي چې متحده ایالات غواړي له دغه تړونه ووځي او د هغه د مقرراتو له مخې یې شپږمیاشتې له مخکې د دې تړون نورو ۳۴ لاسلیک کونکو ته په دې اړه خبر ورکړی دی.

د امریکا د بهرنیو چارو وزارت تراوسه نه ده تایید کړه چې ایا متحده ایالات نن رسماً له دغه تړون څخه ووت که څنګه؟

د روسیې د بهرنیو چارو وزارت د امریکا دغه پرېکړه غندلې ده.

د ورځې تازه خبرونه دلته ولولئ

شمالي وزیرستان کې د پاکستان د پوځ ۴ کار کوونکي وژل شوي

ارشیف، عکس تئزیني بڼه لري

د شمالي وزیرستان په میرعلي کې د پاکستان د پوځ د انجینرۍ څلور کارکوونکي وژل شوي دي.

چارواکي او ځایي اوسېدونکي وایي، دغه کسان پرون له کاره کور ته روان و چې د میرعلي له څلور لارې لږ ها خوا یې وسله والو مخه ونیوله او ډزې ېې پرې وکړې.

د پولیسو چارواکي وايي، په وژل شویو کې یو د اېبټ اباد، بل د ډېره اسماعیل خان، یو د ګوجرانوالې او یو د شمالي وزیرستان اوسېدونکی و.

د پاکستان پوځ د ۲۰۱۴ میلادي کال په نیمايي کې په شمالي وزیرستان کې د وسله والو ډلو پر ضد عملیات پیل کړل چې له وجې یې شاوخوا ۱۰ لاکه خلک کډوال شول.

د پیښې مسولیت تراوسه کومې وسله والې ډلې نه دی منلی.

بلجیم کې د یوه ایراني دیپلومات او ۳ نورو کسانو د محاکمې غونډه جوړیږي

آرشیف

په بلجیم کې نن جمعه(د لېندۍ ۷مه) د یوه ایراني دیپلومات او درې نورو کسانو د محاکمې غونډه جوړیږي.

پر ديپلومات اسدالله اسدي او درې نورو تورنو کسانو شک دی چې ۲۰۱۸ میلادي کال کې یې پاریس کې د مجاهدین خلق په یوه غونډه کې د ماین چاودنه پلان کړې وه.

اسدي په اتریش کې د ایران سفارت درېیم مرستیال و چې جرمني ته د یوه سفر پر مهال ونیول شو.

د بلجیم لویې څارنوالۍ دوه میاشتې وړاندې اسدي او درې نور کسان ترهګریزو چارو کې په لاس لرلو تورن کړل.

د ایران د مقاومت ملي شورا چې د مجاهدین خلق سازمان یې یوه لویه برخه ده ویلي، داسې شواهد لري چې د ایران مذهبي مشر ایت الله علي خامنه یي پاریس کې د دوه کاله مخکې دغه برید امر ورکړی دی.

خو ایران دغې پیښه کې هر ډول لاس لرل رد کړي دي.

د قزاقستان سوسیال دیموکرات ګوند راتلونکې پارلماني ټاکنې تحریموي

د قزاقستان ملي بیرغ

د قزاقستان سوسیال دیموکرات ګوند اعلان کړی چې راتلونکې پارلماني ټاکنې تحریموي.

د دغه ګوند مشر اشقت رحیم ژانوف چې ځان د قزاقستان د رژیم مخالف بولي وایي، د ګوند نوماندان یې د راتلونکي کال د جنورۍ لسمې ټاکنو کې ګډون نه کوي.

د قزاقستان د سوسیال دیموکرات ګوند اکثرو غړو نن جمعه (د لېندۍ ۷مه) په خپلمنځي غونډه کې دې ته رایه ورکړه چې دا ټاکنې چې یو نیمه میاشت وروسته کېږي باید تحریم شي.

په قزاقستان کې دا مهال پخوانی ولسمشر نورسلطان نظربایف چې تېره مارچ میاشت کې له واکه لېرې شو، پیاوړې سیاسي څېره ده.

دا مهال د ده ګوند د پارلمان د ۱۰۷ څوکیو له ډلې ۸۴ هغه له ځان سره لري.

ازبکستان له یوې کمپنۍ سره هوکړې کړې چې هېواد کې یې طبي بنګ وکري

ازبکستان د مالټا له یوې کمپنۍ سره قرارداد لاسلیک کړ چې د منځنۍ اسیا په دې هېواد کې طبي بنګ وکري.

د دې قرارداد پر اساس به د مالټا میلابیس (Melabis) شرکت د ازبکستان د سیردریا ولایت په سردابه ولسوالۍ کې پر ۳ زره هکتاره کرنیزه ځمکه بنګ وکري.

دا لومړی ځل دی چې ازبکستان داسې یو قرارداد لاسلیکوي. په دغه هېواد کې مخدر مواد منع دي.

د ازبکستان د ځايي رسنیو د راپور له مخې، له بنګو څخه به یوازې په طبي درملو کې کار اخېستل کېږي او ورڅخه جوړ شوي درمل به بهرنیو هېوادونو ته صادر شي.

اسټرالیا او بریتانیا د ایران له لوري د مورګیلبریټ د خلاصون هرکلی وکړ

د اسټرالیايي- بریتانیايي څېړونکې کایلي مورګیلبریټ

د اسټرالیا او بریتانیا چارواکو د ایران له لوري د اسټرالیايي- بریتانیايي څېړونکې کایلي مورګیلبریټ د خلاصون هرکلی وکړ.

نوموړې ایران ته د سفر په ترڅ کې نیول شوې وه.

ایراني رسنۍ وايي چې کایلي مورګیلبریټ اسرائیل ته د جاسوسۍ په تور نیول شوې وه او د درېيو ایراني سوداګرو د خلاصون په بدل کې خوشې شوه.

د اسټرالیا د بهرنیو چارو وزیرې ماریس پاین په یوه بیان کې ویلي چې د نوموړې خلاصون د اسټرالیا د حکومت لپاره یو لومړیتوب و.

د بریتانیا د باندنیو چارو وزیر دومنیک راب هم په یوه ټویټ کې د کایلي مور ګیلبریټ د خلاصون او اسټرالیا ته د هغې د ستنېدو هرکلی کړی دی.

روسیه لوېدیځ د بېلاروس په کورنیو چارو کې په لاسوهنې تورن کړ

د روسیې د بهرنیو چارو وزیر سرګي لاوروف (چپ) د الکساندر لوکاشینکو سره

د روسیې د بهرنیو چارو وزیر لوېدیځ د بېلاروس په کورنیو چارو کې په لاسوهنې تورن کړ.

سرګي لاوروف دا تور په مېنسک کې د بېلاروس له باندنیو چارو وزیر الکساندر لوکاشینکا سره په کتنه کې ولګاوه.

په دې هېواد کې د اګسټ د میاشتې د ولسمشرۍ د لانجمنو انتخاباتو په اعتراض کې مظاهرې روانې دي.

زرګونه مظاهره چیان د اګسټ له ۹مې نېټې راپه دې خوا د هرې اوونۍ په پای کې واټونو ته راوځي او د الکساندر لوکاشینکو د استعفا غوښتنه کوي.

اعتراض کوونکي باور لري چې د اپوزیسیون ۳۸ کلنه کاندیده سسفیاتلانا څیخانوسکایا (Svyatlana Tsikhanouskaya) د انتخاباتو اصلي ګټونکې ده.

د ترکیې یوې محکمې د پوځ ۳۳۷ غړي په عمرقید محکوم کړل

د ترکیې ملي بیرغ

د ترکیې یوې محکمې د پېلوټانو او قوماندانانو په ګډون د پوځ ۳۳۷ غړي په عمرقید محکوم کړل.

محکمې دا کسان د ۲۰۱۶ میلادي کال په جولای کې د ولسمشر رجب طیب اردوغان پر ضد په خونړۍ کودتا کې په لاس لرلو مجرم وپېژندل.

دا محاکمه په ۲۰۱۷ میلادي کال پیل شوې وه او تر ډېره د یې د هغو پوځیانو دوسیې وڅېړلې چې د انقرې په اکینچي هوايي اډه کې دېره وو.

ترک چارواکي دا اډه د کودتا اصلي سرچینه ګڼي.

د دوی د محاکمې په مهال په محکمه او پلازمېنه انقره کې سخت امنیتي تدابیر غوره شوي وو.

ځینې ډیموکراتانو له بایډنه غوښتي چې د امریکا پوځي بودجه کمه کړي

د امریکا منتخب ولسمشر جوبایډن

رویټرز خبري اژانس وايي، ځینې ډیموکراتان پر منتخب ولسمشر جوبایډن فشار راوړي چې د متحدو ایالتونو پوځي بودجه کمه کړي.

اوسني ولسمشر ډونالډ ټرمپ په وروستیو درېيو کلونو کې د امریکا بودجه له څه باندې ۶۱۹ میلیاردو ۷۴۰ میلیارد ډالرو یعنې شاوخوا ۱۹ فیصده لوړه کړه.

د سیپرې په نوم د ستوکهلم د سولې د نړیوالې تحقیقاتي موسسې د راپور له مخې چې د سږکال په ثور میاشت کې خپور شو، د کرونا ویروس د اقتصادي اغېزو له کبله ښايي په راتلونکې کې د هېوادونو د پوځي بودجو د زیاتېدو بهیر ودرول شي او دا امکان هم شته چې کمې شي.

ټرمپ: هغه وخت مخه ښه کوم که ټاکنیز کالجونه د بایډن بریا تایید کړي

ارشیف، ولسمشر ټرمپ

د امریکا د متحدو ایالتونو ولسمشر ډونالډ ټرمپ وايي، له سپینې ماڼۍ سره هغه وخت مخه ښه کوي، که ټاکنیز یا الکټورال کالجونه د منتخب ولسمشر جو بایډن بریا رسماً تایید کړي.

ښاغلي ټرمپ په عین حال کې ویلي چې د ټاکنو د نتیجو په اړه به خپله مبارزه روانه ساتي.

ډونالډ ټرمپ پرون په سپینه ماڼۍ کې خبریالانو ته د ټاکنیزو کالجونو د تایید د رسمیت پېژندنې په اړه د یوې پوښتنې په ځواب کې وویل: "که ټاکنیز کالجونه د ټاکنو نتایج تایید کړي، تاسې پوهېږئ چې یقیناً دا کار کوم."

تر دې مخکې په استازو جرګه کې د جمهوریپال ګوند غړو ویلي وو، ډونالډ ټرمپ د جنورۍ میاشتې پر ۲۰مه په هغه صورت کې له سپینې ماڼۍ سره مخه ښه کوي، که ټاکنیز کالجونه د ټاکنو نتیجه رسماً تایید کړي، خو دا اول وار دی، چې ډونالډ ټرمپ په خپله د دې موضوع په اړه څرګندونې کوي.

د امریکا د نومبر د درېیمې د ولسمشرۍ ټاکنو په نتیجه کې جوبایډن د ټاکنیزو کالجونو ۳۰۶ رایې خپلې کړي، خو ولسمشر ټرمپ ۲۳۲ رایې. د ټاکنو د ګټلو لپاره ۲۷۰ رایو ته اړتیا ده.

ټاکنیز کالجونه چې د سپینې ماڼۍ ګټونکی تاکي، د ډسمبر میاشتې پر ۱۴مه غونډه جوړوي، چې د جوبایډن بریا وټاکي.

ډونالډ ټرمپ تر اوسه په دغو ټاکنو کې خپله ماتې نه ده منلې.

د نړۍ مشهور فوټبالر ديګو مارادونا مړی خاورو ته وسپارل شو

د نړۍ مشهور فوټبالر ديګو مارادونا

د ارجنټاین د فوټبال د وتلي ستوري دییګو مارادونا مړی د لسګونو زره مینه والو د درناوي تر مراتبو وروسته خاورو ته وسپارل شو.

د ده مړی د پلازمېنې بوینس ایرس په مرکزي برخه کې د ده د مور و پلار د قبرونو تر څنګ خاورو ته وسپارل شو چې په دغو مراسمو کې د هغه نږدې خپلوانو ګډون کړی و.

تر پرون پورې په زرګونو کسانو د هغه مړي ته د درناوي مراتب پرځای کړل.

د فوټبال دغه پېژندل شوي ستوري چې په مکسیکو کې یې په ۱۹۸۶میلادي کال د نړیوال جام په ګټلو کې له ارجنټاین سره مرسته کړې وه، تېره چهارشنبه د ۶۰ کلونو په عمر د زړه د حملې له کبله په خپل کور کې مړ شو.

ده څو اوونۍ مخکې د مغزو عملیات کړي وو او په ښه کېدو و.

د مارادونا د مړینې له کبله د ارجنټاین ولسمشر البرتو فرنندیز پرون په دغه هېواد کې درې ورځنی ملي ماتم اعلان کړ.

اروپايي ټولنې او د روغتیا سازمان د ایډز د ټېسټونو زیاتېدو غوښتنه وکړه

د اروپايي ټولنې د ناروغیو د کنټرول ادارې او د روغتیا نړیوال سازمان د 'HIV' ایډز د ټیسټونو زیاتېدو غوښتنه وکړه.

دوی وايي، په ځانګړي توګه ختیځه اروپا، روسیه او مرکزي اسیا کې په ایډز د اخته کسانو تشخیص ډېر ناوخته کېږي.

دغو روغتيايي ادارو ویلي، د HIV ویروس ناوخته تشخیص چې د ایډز ناروغۍ سبب کېږي، دېته زمینه برابروي چې اخته کسان د ژوندي پاتې کېدو لپاره له تداوۍ بې برخې پاتې شي.

هغه راپور چې د اروپايي ټولنې د ناروغیو د کنټرول ادارې او د روغتیا نړیوال سازمان (WHO) پرون خپور کړ ښيي چې په ۲۰۱۹میلادي کال کې په اروپا کې تر یو لک او ۳۶۰۰۰ ډېر کسان په HIV ایډز اخته شوي دي.

راپور وايي، په سلو کې ۸۰ پېښې د ختیځې اروپا، روسیې او د مرکزي د اسیا د ګڼو هېوادونو په ګډون د WHO تر پوښښ لاندې په ختیځه ساحه کې ثبت شوي دي.

امریکا کې کرونا؛ تېرو ۲۴ ساعتونو کې ۲۴۰۰ تنه مړه کړي

ارشیف

د امریکا متحده ایالاتو په تېرو ۲۴ ساعتونو کې د کوویډ – ۱۹ ناروغۍ له امله د ۲۴۰۰ نویو مړینو د ثبتیدو خبر ورکړ چې دا په تېرو شپږو میاشتو کې په یوه شپه او ورځ کې د مړینو تر ټولو لوړه شمېره ده.

د کورونا له امله په دې شمېر مړینې داسې مهال ثبتېږي چې نن پنجشنبې (د لېندۍ ۶) په امریکا کې کورنۍ سره راټولېږي اود "تنکس ګیوینګ" یا شکرانې مذهبې مراسم پرځای کوي.

د امریکا منتخب ولسمشر​ جو بایډن تېره شپه د شکرانې د ورځې په مناسب وینا کې د امریکا له خلکو وغوښتل چې له کرونا سره مبارزه شدیده او د دغې ورځې د لمانځلو په مهال د ټولنیز واټن د مراعاتولو په ګډون ډېر احتیاط وکړي.

هغه زیاته کړه چې له کرونا سره په جنګ یو نه له یو بل سره.

روحاني: ایران او امریکا د ۲۰۱۷ شرطونو ته ورګرځېدای شي

د ایران ولسمشر حسن روحاني

د ایران ولسمشر حسن روحاني وایي، ایران او د امریکا متحده ایالات که وغواړي کولای شي د ۲۰۱۷ میلادي کال د جنوري تر شلمې مخکې شرطونو ته چې دواړو هېوادونو پرې موافقه کړې وه، بېرته ور وګرځي.

یعنې مخکې له دې چې ډونالډ ټرمپ د امریکا د ولسمشر په توګه کار پیل کړي.

حسن روحاني پرون چهارشنبې په تهران کې د کابینې غونډې ته په وینا کې وویل، ایران دې کار ته لېواله که امریکا هم ورته لېوالتیا ولري: "موږ هیله من یو چې د امریکا راتلونکې اداره د لومړي ګام په توګه هغه پالیسۍ په کلکه وغندي چې ډونالډ ټرمپ د ایران پر وړاندې غوره کړې ـ هغه پالیسي باید وغندي چې د بشر له حقونو سره په تضاد کې او د ترهګري پر اقداماتو ولاړه ده."

حسن روحاني دغه راز وویل چې د امریکا نوی حکومت باید هغه خرابه سیاستونه چې د ټرمپ ادارې د ایران په مخ کې نیولي و، جبران کړي.

ولسمشر ټرمپ په ۲۰۱۸ میلادي کال د نړۍ له قدرتونو سره د ایران له اټمي تړونه ووت او له هغې وروسته یې پر دې هېواد د بندیزونو لګولو ته مخه کړې ده.

په داسې حال کې چې د امریکا د ولسمشر په توګه د ډونالډ ټرمپ د دندې پای ته رسېدو ته شاوخوا دوه میاشتې پاتې دي، د هغه اداره په پام کې لري چې پر ایران د زیاتو فشارونو لپاره پر دې هېواد نوي بندیزونه ولګوي.

د ایران لپاره د امریکا جګ پوړي استازي ایلیت ابرامز پرون اعلان وکړ چې د ولسمشر ټرمپ د بندیزونو ستراتیژي به د وسلو، د ډله ییزې وژنې د وسلو او د بشري حقونو د مسایلو په اړه دې هېواد ته د سزا ورکولو په نوېو اقداماتو سره د هغه د ولسمشرۍ د دورې تر ختمېدو روانه وي.

ایران کایلي مور ګیلبرټ له بنده خوشې کړه

کایلي مور ګیلبرټ

ایران د بریتانیا او استرالیا تبعه کایلي مور ګیلبرټ له بنده خوشې کړه.

د ایران دولتي ټلوېزیون خبر ورکړ، مور ګیلبرټ چې اسرائیل ته د جاسوسۍ په تور په ایران کې زنداني وه د درېیو ایرانيانو په بدل کې ازاده شوه.

د ایران د دولتي اژانس د وېب‌پاڼې د خبر له مخې یو سوداګر او دوه نور ایرانیان چې په بهر کې په درواغو تورن شوي وو د مور ګیلبرټ په بدل کې خوشې شول.

مور ګیلبرټ چې د میلبرن په پوهنتون کې د اسلامي زده‌کړو استاده وه د ۲۰۱۸ کال په سپټمبر کې په ایران کې په ۱۰ کاله بند محکومه شوه.

په وروستیو میاشتو کې پر ایران د اغلې ګیلبرټ د خوشې کېدو لپاره نړیوال فشارونه وروسته تر دې زیات شول چې په زندان کې د دې د روغتیایي وضعیت د خرابي راپورونه خپاره شول.

متحده اماراتو افغانانو او د ۱۲ نورو هېوادونو وګړو ته پر ویزو بندیز ولګاوه

ارشیف، متحده عربي امارات

متحده عربي اماراتو افغانانو ته د نویو ویزو پر ورکړه بندیز ولګاوه.

روېټرز اژانس د یوې سرچینې په استناد خبر ورکړ چې دا ویزې د افغانستان په ګډون د ۱۳ هېوادونو اتباعو ته په موقتي ډول بندې شوې دي.

له دې ډلې اکثر اسلامي هېوادونه دي او پاکستان او ایران هم په‌کې شامل دي.

د متحده عربي اماراتو د نویو ویزو د بندیز علت امنیت ته اندېښنې یادې شوې دي، خو په دې برخه کې نور توضېحات نه‌دي ورکړل شوي.

دا بندیز نږدې دوه میاشتې وروسته تر دې لګېدلی دی چې ابوظبي له اسرائیل سره ډیپلوماتیکې اړیکې عادي کړې.

نور راوښيه

XS
SM
MD
LG