د لاسرسۍ وړ لېنکونه

تازه خبر
یکشنبه ۹ لیندۍ ۱۳۹۹ کابل ۱۱:۳۵

نړۍ

اوباما خپل نوي کتاب کې پوتین د جنایت‌کارانو له ډلې جوړ مشر یاد کړی

بارک اوباما او ولادیمیر پوتین

د امریکا متحده ایالاتو پخواني ولسمشر بارک اوباما په خپل نوي کتاب کې د روسیې پر ولسمشر ولادیمیر پوتین سخت انتقاد کړی او هغه‌یې د جنایت‌کارانو له ډلې جوړ د یوه حکومت مشر یاد کړی دی.

د پرامیسډ لانډ «A Promised Land» په نوم دغه کتاب کې چې لومړني ټوکي یې د سې شنبې په ورځ خپاره شوي، اوباما ویلي، پوتین ده ته هغه سیاسي فاسد مشران په یاد وروړي چې د ۱۹مې پېړۍ په وروستیو او د ۲۰مې هغې په پیل کې یې د امریکا پر ښارونو حکومت کاوه.

اوباما وایي، دغو مشرانو رشوت او ملاتړ د سوداګرۍ قانوني وسیلې بللې.

اوباما ویلي چې پوتین داسې یو هېواد جوړ کړی چې سړی ترې بېرېږي او ښایي د ودې په حال کې هېوادونو ډېر کم خلک وغواړي چې هغه د ځان لپاره یوه بېلګه وبولي.

کرملېن تر اوسه د اوباما د دغو انتقادونو په اړه څه نه‌دي ویلي.

د ورځې تازه خبرونه دلته ولولئ

روسیه کې د بندیزونو نه‌رعایتولو په خاطر تر یو میلیون ډېر کسان جریمه شوي

روسیه کې روغتیايي کارکوونکی

د روسیې پولیسو تر یو میلیون ډېر خلک په دې خاطر جریمه کړي چې د کرونا ویروس د نه‌خپرېدو لپاره بندیزونه‌یې نه‌دي رعایت کړي.

د روسیې د کورنیو چارو وزارت پرون (شنبه) تاس خبري اژانس ته وویل، قانون نافذوونکو د قرنطین د مقرراتو د نه‌رعایتولو په خاطر یو میلیون او ۱۰۰ زره کسان جریمه کړي دي.

د کرونا ویروس د بندیزونو د نه‌رعایتولو په خاطر په روسیه کې لږترلږه جریمه زر روبله ده چې ۱۳ ډالره کېږي.

روسیه په نړۍ کې د کرونا د مثبتو پېښو د ډېروالي له نظره څلورم هېواد دی.

تر اوسه په دغه هېواد کې ۲ میلیونه او ۲ لکه تنه په کرونا ویروس اخته شوي او ۳۹ تنه ورڅخه مړه شوي دي.

په اروپا کې په کرونا ویروس د مړینو شمېر تر ۴ لکو واوښت

اسپانیا کې د کرونا ویروس له امله د مړه شويو کسانو د خښولو لړۍ

د اروپا د ناروغیو د مخنیوي او کنټرول د مرکز د شمېرو پر اساس، په تېرو ۸ میاشتو کې چې کرونا وبا خپره شوې ده، په اروپا کې ۴ لکه ۹۵۰ تنه مړه شوي دي.

تر ټولو ډېر کسان په پنځو هېوادونو؛ لکه بریتانیا، ایټالیا، فرانسې، اسپانیا او روسیه کې مړه شوي دي.

د امریکا په متحده ایالاتو کې بیا یوازې په نومبر میاشت کې ۴ میلیونه مثبتې پېښې ثبت شوي چې د ورتېرې میاشتې دوه برابره دي.

په دې هېواد کې د ورځې په متوسط ډول نږدې یو نیم زر تنه مري او د دې ویروس د خپرېدو له پیله تر اوسه څه باندې ۲ لکه ۶۶ زره تنه مړه شوي دي.

له روسیې څخه جرمني ته د 'نارد ستریم ۲' نل‌لیکې د جوړولو کار بیا پیلېږي

دا نل‌لیکه د بالتیک سمندرګي په تل کې تېرېږي.

له روسیې څخه جرمني ته د 'نارد ستریم ۲' په نوم د نل‌لیکې د جوړولو کار به د امریکا د بندیزونو له کبله له یو کال ځنډه وروسته د ډسمبر په لومړیو کې پیل شي.

دا نل‌لیکه د بالتیک سمندرګي په تل کې تېرېږي.

'نارد ستریم ۲' کمپنۍ پرون (شنبه) وویل، تر سمندر لاندې د نل‌لیکې د اېښودلو کار به ژر پیل کړي.

د جرمني 'اېن ډي ار ۱' راډیو وویل چې د دې پایپ لاین د جوړولو کار به د ډسمبر په پنځمه پیل شي.

د دې نل‌لیکې د جوړولو کار د ۲۰۱۹ په ډسمبر کې وروسته له دې وځنډول شو چې امریکا پر دې پروژې بندیزونه ولګول.

د دې پروژې د بشپړېدو په صورت کې به جرمني ته د روسیې د ګازو صادرات دوه برابره شي.

سبا د شانګهای د همکارۍ تړون د دایمي او څارونکو غړو سرمشریزه دایرېږي

ارشیف، بیجنګ کې د شانګهای د همکارۍ تړون سرمشریزه

د شانګهای د همکارۍ تړون د دایمي او څارونکو غړو سرمشریزه سبا (دوشنبه) د هند په کوربه‌توب په انلاین یا مجازي ډول دایرېږي.

په دې غونډه کې به د افغانستان ولسمشر اشرف غني هم وینا وکړي.

ټاکل شوې ده چې په دې سرمشریزه کې چې د کرونا ویروس د خپرېدو له کبله په انلاین ډول جوړېږي، د ۸ غړو او ۴ څارونکو هېوادونو مشران ګډون وکړي.

چین، روسیه، قرغزستان، قزاقستان، ازبکستان، تاجکستان، هند او پاکستان د دې تړون دایمي غړي دي.

افغانستان، ایران، بلاروس او منګولیا یې څارونکي غړي دي.

دا ځل به د هند په بلنه ترکمنستان هم د ځانګړي مېلمه هېواد په توګه په دې کنفرانس کې ګډون ولري.

پاپ فرانسېس ۱۳ نوي کاردینالونه وټاکل

د نړۍ د کاتولیک عیسویانو مشر پاپ فرانسېس

د نړۍ د کاتولیک عیسویانو مشر ۱۳ نوي کاردینالونه وټاکل.

پاپ فرانسېس دوی ته پرون شنبه په واتیکان ښار کې د کرونا ویروس له کبله په محدودو مراسمو کې ګوتمۍ او ځانګړې خولۍ ورکړې.

کاردینال تر پاپ وروسته دوهم مقام لري چې د پاپ د ټاکلو صلاحیت هم لري.

پخوا به په سنټ پیټر کلیسا کې په زرګونه کسانو په دغسې مراسمو کې برخه اخیسته، خو پرون د هر کاردینال ۱۰ مېلمنو ګډون کړی و.

په دغو مراسمو کې له پاپ فرانسېس پرته نورو ماسکونه کارولي وو او له یو بله‌یې فاصله درلوده.

پاپ فرانسېس تر اوسه د ۱۲۸ کاردینالونو له ډلې ۵۷ فیصده‌یې ټاکلي دي.

زلنسکي: د ستالین د دورې کاختي د اوکراین د وګړو نسل وژنه وه

د اوکراین ولسمشر ولادیمیر زلنسکي

د اوکراین ولسمشر د ستالین د دورې کاختي یا (هولو دومور) د اوکراین د وګړو نسل وژنه وبلله.

ولادیمیر زلنسکي پرون (د نومبر ۲۸مه) د «هولو دومور» د قربانیانو په یاد په یوه وېډیويي پیغام کې وویل: "هولو دومور چې د ستالین د استبدادي رژیم له‌خوا زموږ د خلکو د نسل وژنې لپاره پیل شو، د اوکراین د ملیونونو وګړو د مړینې سبب شو. دا د اوکراین له هغه شمېر وګړو سره چې په دوهمه نړیواله جګړه کې وژل شوي وو، برابر دي. موږ هغه پېښه نه‌هېروو او نه‌یې بخښلی شو."

اټکل کېږي چې له ۱۹۳۲ څخه تر ۱۹۳۳م کلونو پورې له دوه‌نیم میلیونو تر اووه‌نیم میلیونو پورې اوکراینیان د ستالین تر رهبرۍ لاندې د پخواني شوروي اتحاد پر مهال مړه شوي وو.

نګورنو قره‌باع کې ماین چاودنې څلور ملکیان ووژل

نګورنو قره‌باغ کې اذربایجاني ځواکونه د ماین پاکۍ پر مهال

د اذربایجان لویه څارنوالي وايي څلور ملکیان‌یې هغه وخت ووژل شول چې موټر یې پر یوه ټانک ضد ماین وربرابر شو.

د څارنوالۍ په وینا، دغه چاودنه پرون د لانجمنې سیمې نګورنو قره باغ په فیزولي سیمه کې وشوه.

د اذربایجان لویې څارنوالۍ په یوه اعلامیه کې ویلي، د پېښې په اړه څېړنې پیل شوې دي.

د ارمنستان او نګورنو قره‌باغ چارواکو تر اوسه د دې پېښې په اړه څه نه‌دي ویلي.

په هغه جګړه کې چې د ارمنستان او اذربایجان د ځواکونو ترمنځ د سپټمبر میاشتې په وروستیو کې پیل شوه او شپږ اوونۍ یې دوام وکړ، اذربایجان پر فیزولي سیمه ولکه ټینګه کړه.

د روسیې په منځګړیتوب هغه اوربند چې د روانې میلادي میاشتې په لومړیو کې ورباندې موافقه وشوه، دا جګړه ختمه کړه.

خامنه يي د "محسن فخري زاده" د وژل کېدو غچ اخیستل وغوښتل

د فخري زاده د وژنې سيمه

د ایران مذهبي مشر آیت الله علي خامنه يي د دې هېواد د یوه وتلي اټومي ساینسپوه محسن فخري زاده د وژل کېدو د غچ اخیستو غوښتنه کړې ده.

خامنه يي نن پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسراییل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "يو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

حسن روحاني نن د ایران د کابینې په غونډه کې وویل: "هم صهیونیستي رژیم او هم هغه کسان چې د ایران پر ضد دي، په دې باید پوه شي چې زموږ د ملګري فخري زاده په تلو سره به نور ډېر فخري زاده ګان ملا وتړي."

محسن فخري زاده د نومبر پر ۲۷ / پرون تهران ته نږدې په یوه وسله وال کمین کې ووژل شو.

د ایران د اټومي ادارې مشر علي اکبر صالحې نن ویلي، چې د فخري زاده وژنه به د ایران د اټومي پروګرام چاري اغېزمنې نه کړي.

د هند تر ولکې لاندې کشمیر کې د پرمختيايي شوراګانو ټاکنې ترسره کېږي

آرشیف، د کشمیر يوه سيمه

د هند تر ولکې لاندې کشمیر کې زرګونه کسان د سختو امنیتي تدابیرو او سړې هوا سره د سیمه ييزو پرمختیایې شوراګانو ټاکنو کې رایې ورکوي.

وروسته تر دې چې د هند صدراعظم نریندرا مودي تېر کال د دې سیمې نیمه خپلواکي او د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کېږي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

خامنه يي: د ساینس پوه 'فخري‌زاده' د وژلو د غچ دې واخیستل شي

د ایران ولسمشر وايي یو ځل بیا د نړیوالو اشرارو لاسونه د ایران د یوه بچي په وینو ولړل شول.

د ایران مذهبي مشر ایت الله علي خامنه يي د دې هېواد دیوه وتلي اټمي ساینس پوه محسن فخري زاده د وژل کېدو د غچ غوښتنه کړې ده.

خامنه یې نن شنبه (د لیندۍ ۸مه) پر خپله رسمي ویب پاڼه د دې قتل د تعقیب او عاملینو ته یې د سزا ورکولو غوښتنه کړې.

په همدې ورځ د ایران ولسمشر حسن روحاني هم د دې پېښې په تړاو اسرائیل تورن کړ چې د امریکا د مزدور په توګه عمل کوي.

روحاني پر خپله رسمي ویب پاڼه لیکلي: "یو ځل بیا د نړیوالو اشرارو لاسونه د مزدور صهیونستي رژیم د دسیسې له کبله د دې هېواد د یوه بچي په وینو ولړل شول."

محسن فخري زاده د نومبر پر ۲۷ مه پرون جمعه(د لیندۍ ۷مه) تهران ته نژدې په یوه وسله وال کمین کې ووژل شو.

د ایران د اټمي ادارې مشر علي اکبر صالحې نن ویلي چې د فخري زاده وژنه به د ایران د اټمي پروګرام چارې اغیزمنې نه کړي.

هندي کشمیر کې د سیمه ییزو پرمختیایي شوراګانو ټاکنې پیلېږي

ارشیف، کشمیر ، دا عکس تئزیني بڼه لري

د هند تر واک لاندې کشمیر کې نن د سیمه ییزو پرمختیایي شوراګانو ټاکنې پیلېږي.

وروسته تر دې چې د هند صدراعظم ناریندرا مودي د دې سیمې نیمه خپلواک واک تېر کال وګرځاوه، د دې سیمې بیل اساسي قانون یې لغوه کړ او دا سیمه یې په دوو فدرالي سیمو وویشله، دا لومړي انتخابات دي چې په کې ترسره کیږي.

د رای ورکوونکو د ساتنې لپاره په لسګونو زره اضافي سرتیرې سیمې ته استول شوي دي.

بیلتون غوښتونکو وار له مخه له دې انتخاباتو سره مخالفت څرګند کړی دی.

دا انتخابات د سیمه ییزو پرمختیایي شوراګانو د ۲۸۰ څوکیو لپاره دي چې په اتو پړاوونو کې به ترسره شي او د ډسمبر په ۱۹مه به پای ته ورسېږي.

عراق کې د الصدر پلویانو د حکومت د مخالفینو درې تنه وژلي

ارشیف، عکس تئزیني بڼه لري

په عراق کې د شیعه ګانو د رهبر مقتدا الصدر پلویانو د حکومت د مخالفینو په یوه کمپ باندې په برید سره درې تنه ووژل او لسګونه نور یې ټپيان کړل.

د حکومت مخالفینو په جنوبي ښار ناصریه کې کمپ جوړ کړی و.

د دې پېښې عیني شاهدانو او روغتیاپالانو د خلکو د وژنې او ټپي کېدو معلومات رسنیو ته ورکړي.

د تُندلاري شیعه رهبر مقتدا الصدر پلویانو د جمعې ترلمانځه وروسته د الحبوبي مرکزي میدان په لور ورغلل چېرته چې د حکومت مخالفین مظاهره چیان له اکتوبر راهیسې پرلت او لاریون کوي.

د پېښې شاهدانو ویلي چې د الصدر پلویانو د مظاهره چیانو په خیمو باندې ډزې وکړې او پترولي بمونه یې ور وغورځول او مظاهره چیان هم اړ شول چې غبرګون وښيي.

اخ او ډب تر شپې روان و او روغتیاپالانو ویلي چې ټپیان په مرمیو لګېدلي و.

مقتدا الصدر چې د عراق په پارلمان کې تر ټولو لویه ډله رهبري کوي تمه لري چې د دغه هېواد له وخت مخکې پارلماني ټاکنو کې مطلق اکثریت خپل کړي.

دی په دې سربېره چې له امریکا سره له ډېره وخت مخالفت پالي په عراق کې د ایران له نفوذ سره هم جوړ نه دی.

هندي پولیسو پر معترضو بزګرو اوبه او اوښلن ګاز کارولې

ارشیف، عکس تئزیني بڼه لري

د هند پولیس وايي چې پلازمېنې ته پر لار د معترضو بزګرو سره په لانجو کې له اوښکې بهوونکو ګازونو او اوبو کار اخېستی.

هندي بزګرو د دغه هېواد د کرنې په سکتور کې د نویو اصلاحاتو پر ضد مظاهره کړه ځکه ډاریږي چې ګواکې دا اصلاحات به دوی په لویو شرکتونو پورې وتړي.

له لانجو وروسته چارواکو بلآخره بزګر پلازمېنې نوې ډیلي ته پرېښودل خو پولیس پرې څار لري.

یوې محکمې د ډونالډ ټرمپ د کمپاین مخه نیولې ده

ولسمشر ټرمپ

یوې فدرالي استیناف محکمې د امریکا د برحاله ولسمشر ډونالډ ټرمپ د کمپاین مخه نیولې ده.

ولسمشر ټرمپ غوښتل چې په پنسلوانیا کې د منتخب ولسمشر جوبایډن د بریا د اعلان مخه ونیسي.

د محکمې دا اقدام به ټرمپ ته چې غواړي په دې ایالت کې د نوومبر درېیمې ولسمشرۍ ټاکنو پایله بدله کړي، یو ګوزار ورکړي.

د ولسمشر ټرمپ ټاکنیز کمپاین د همدې نومبر میاشت په پیل کې ځکه محکمې ته مراجعه کړې وه چې ویل یې د پنسلوانیا ایالت د ټاکنو سیمه ییزو چارواکو د پوستي رایو په شمېر کې دقت نه دی کړی او باید محکمه یې پایله ونه مني، خو پرون د نومبر په ۲۷مه قاضي سټیفانوس بایباس د درې ګونه قاضیانو د پلاوي په استازیتوب وویل چې هر ډول تور خاصې ادعا او مشخصو اسنادو ته اړتیا لري چې د ده په خبره دلته یو هم نه دی موجود.

موضوع دلته نه ختمیږي ښايي دا قضیه د امریکا سترې محکمې ته هم وړاندې شي.

شمالي وزیرستان کې د پاکستان د پوځ ۴ کار کوونکي وژل شوي

ارشیف، عکس تئزیني بڼه لري

د شمالي وزیرستان په میرعلي کې د پاکستان د پوځ د انجینرۍ څلور کارکوونکي وژل شوي دي.

چارواکي او ځایي اوسېدونکي وایي، دغه کسان پرون له کاره کور ته روان و چې د میرعلي له څلور لارې لږ ها خوا یې وسله والو مخه ونیوله او ډزې ېې پرې وکړې.

د پولیسو چارواکي وايي، په وژل شویو کې یو د اېبټ اباد، بل د ډېره اسماعیل خان، یو د ګوجرانوالې او یو د شمالي وزیرستان اوسېدونکی و.

د پاکستان پوځ د ۲۰۱۴ میلادي کال په نیمايي کې په شمالي وزیرستان کې د وسله والو ډلو پر ضد عملیات پیل کړل چې له وجې یې شاوخوا ۱۰ لاکه خلک کډوال شول.

د پیښې مسولیت تراوسه کومې وسله والې ډلې نه دی منلی.

نور راوښيه

XS
SM
MD
LG