لوېدیځ ورځپاڼو د امریکا متحده ایالاتو د دفاع وزیر د دې اعلان په اړه لیکنې خپرې کړې دي چې د جنوري میاشتې تر نیمایي به په افغانستان او عراق کې د امریکایي ځواکونو شمېر کم کړي.
- ګارډین
ګارډین ورځپاڼه لیکي، د سپټمبر له میاشتې راپه دې خوا چې د افغانستان د دولت او طالبانو ترمنځ د قطر په پلازمېنه دوحه کې خبرې پيل شوې دي په افغانستان کې بریدونه شاوخوا ۵۰ په ۱۰۰ کې زیات شوي دي.
د دې بریتانیایي ورځپاڼې په باور، په افغانستان کې د غوڅ ملاتړ مأموریت قوماندان سکاټ مېلر چې په سیمه کې حضور لري، خبرداری ورکړی دی چې د یاغیانو د بریدونو زیاتوالی د امریکا او طالبانو ترمنځ د فبرورۍ میاشتې له تړون سره سم نهدی او د افغانستان د سولې خبرې کمزورې کوي.
د راپور له مخې دا شخړې د افغان ځواکونو د روحیې د کمزورېدو باعث شوې دي ځکه چې د سولې په بهیر کې د پرمختګ په خاطر په دفاعي حالت کې دي.
د ګارډین په مقاله کې راغلې دي چې د افغانستان د حکومت د اوربند یا د شخړو د کمېدو د بیا بیا غوښتنې سربېره د یاغیانو له لوري د دوحې د خبرو پر مهال د ښه نیت نښه نهلیدل کېږي او دې تهیې پاملرنه نهده کړې.
یو شمېر کارپوهان په دې باور دي چې له افغانستانه د امریکایي ځواکونو ژر وتل به په دوحه کې د سولې روانې خبرې اغېزمنې کړي.
د امریکا د دفاع وزارت سرپرست کریسټوفر مېلر د سې شنبې په ورځ وویل چې په افغانستان کې به د شاوخوا ۴،۵۰۰ پوځیانو شمېر دوهنیم زرو او په عراق کې له درې زرو دوهنیم زرو ته راکم شي.
- فورس انلاین
فورس انلاین خپرونې هم په یوه مقاله کې له افغانستانه د امریکایي ځواکونو د وتلو مسئله څېړلې ده او په یوه برخه کې یې لیکي: "امریکایي پوځیان له ۲۰۰۱ کال راپه دې خوا په افغانستان کې دي او په فبروري کې چې کله امریکایانو او طالبانو موافقه وکړه، د سولې خبرې مهم پړاو ته ورسېدې.
د خپرونې په باور، د افغانستان د امنیتي او دفاعي ځواکونو جګپوړو چارواکو بیا بیا طالبان تورن کړي چې پر افغان ځواکونو د بریدونو د کمېدو لپارهیې کافي هڅې نهدې کړي.
فورس انلاین لیکي، د ملګرو ملتونو د کډوالو چارو ادارې هم خبرداری ورکړی دی چې د افغانستان د سولې د بهیر ماتې به یو انساني ناورین رامنځته کړي.
خپرونه لیکي، د ملګرو ملتونو د کډوالو چارو د ادارې کمېشنر فیلیپو ګراندي خبرداری ورکوي، که چېرته په افغانستان کې جګړه ادامه پيدا کړي، ډېر خلک به د خپلو کورونو پرېښودو ته مجبوره شي.
فورس انلاین د فیلیپو ګراندي په وینا لیکي، که چېرته د سولې هڅې ناکامه شي، افغانستان به له یوه ستر انساني ناورین سره مخامخ شي، خو ده هیله څرګنده کړه چې داسې به ونهشي.