د لاسرسۍ وړ لېنکونه

تازه خبر
یکشنبه ۱۶ لیندۍ ۱۳۹۹ کابل ۰۵:۰۸

افغانستان

ارګ: له افغان سرتېرو د امریکا د ملاتړ په اصل کې بدلون نه دی راغلی

ارشیف، افغان سرتیري

د افغانستان ولسمشرۍ ماڼۍ وايي، له افغان امنیتي او دفاعي ځواکونو د امریکایي عسکرو د ملاتړ په ماهیت یا اصل کې بدلون نه دی راغلی.

د ولسمشر ویاند صدیق صدیقي وایي، امریکا او ناټو د دوامداره ملاتړ په چوکاټ کې د افغان ځواکونو تر شا ولاړ دي.

دی زیاتوي: "که زموږ ځواکونه ځینو اساسي او بنسټیزو برخو، لکه هوایي عملیاتو کې کومه اړتیا ولري، له شک پرته افغانستان کې د نړیوالو ځواکونو وړتیاوې شته چې زموږ له عسکرو ملاتړ وکړي."

دا څرګندونې تر دې وروسته کېږي چې امریکا ویلي، تر دوو میاشتو پورې دوه زره نور سرتیري له افغانستانه باسي.

تېره شپه د امریکا د دفاع سرپرست وزیر کریسټوفر مېلر وویل، د راتلونکي جنورۍ میاشتې له ۱۵مې وروسته به یې ۲۵۰۰ عسکر افغانستان کې پاتې شي.

امریکا دا مهال افغانستان کې څلورنیم زره عسکر لري.

د ورځې تازه خبرونه دلته ولولئ

چارواکي: د ارزګان دهراود کې ۴۹ وسله وال طالبان وژل شوي

ارشیف

د ارزګان لایت سیمه ییز چارواکې وايي، د دغه ولایت په دهراود ولسوالۍ کې تېره شپه او نن ورځ لسګونه وسله والو طالبانو ته مرګ ژوبله اوښتې ده.

په دهراود ولسوالۍ د افغان کمانډوځواکونو قوماند کبیرخان نن ازادي راډيوته وویل، چې تېره شپه افغان هوايي، د یادي ولسوالۍ په لنډیاني سیمه کې د وسله والوطالبانو پر پټنځایونو بریدونه کړي چې پرمهال يي ۲۶ وسله وال طالبان وژل شوي.

نوموړي وايي، همدا نن ورځ افغان ګډو هوايي او ځمکنیو ځواکونو د وسله والوطالبانو د ځپلو په موخه عملیات تر سره کړي دي چې پرمهال يي ۲۳ وسله وال طالبان وژل شوي دي.

هغه زیاتوي: "د هراود ولسوالۍ مکمل زموږ په لاسونو کې ده، دا دښمن تبلیغات دي چې وايي، دوي لاهم په بازار او ولسوالۍ زموږ په لاسونو کې ده، دښمن درواغ وايي، لکه مخکي چې څو کلونه مخکي دا ولسوالۍ د دولت په لاس کې ده اوس هم هغو مره ده."

کبیرخان ازادي راډيوته وویل د ۱۴ وژل شویو طالبانو جسدونه هم دافغان پوځیان لاسونو کې دي او په خبر چې افغان سرتيرو ته کوم زیان نه دی اوښتی.

په ورته مهال د ارزګان د والي ویاند احمد شاه ساحل ازادي راډيو ته وویل چې په وژل شویو طالبانو کې د ارزګان ولایت لپاره د وسله والوطالبانو د نومول شوي والي مرستیال هم شامل دی.

طالبانو تر اوسه په دې اړه څه نه دي ویلي.

په افغانستان کې د امریکايي ځواکونو د ناببره کمښت مخه نیول شوې

ډونالډ ټرمپ

د امریکایۍ سټارس انډ سټرایپس ورځپاڼې د راپور له مخې، د امریکا د استازو جرګې د ولسمشر ډونالډ ټرمپ ادارې د هغه اقدام مخه ونیوله، چې غوښتل یې په افغانستان کې د امریکايي ځواکونو شمېر ناببره کم کړي.

امریکايي چارواکو تر دې مخکې ویلي وو، چې د جنورۍ تر نیمايي پورې به په افغانستان کې د دېره امریکايي پوځیانو شمېر له ۴۵۰۰ څخه ۲۵۰۰ ته راکم شي.

خو د امریکا د ۲۰۲۱م کال د ملي دفاعي جواز قانون له مخې، د امریکايي پوځیانو د شمېر کمولو پرېکړه، د امریکا د نورو ادارو تصویب ته هم اړتیا لري.

د امریکا ولسمشر ډونالډ ټرمپ په ۲۰۱۶م کال کې د ولسمشرۍ ټاکنو د کمپاینونو پر مهال ژمنه کړې وه، چې د امریکا پوځیان به د دغه هېواد تر ټولو له اوږدې جګړې وباسي.

د پکتيکا چارواکي: د اورګون زون د سيمه ييزو پولیسو قوماندان ووژل شو

عید محمد

د پکتيکا امنیه قوماندانۍ وايي، د اورګون زون د سيمه ييزو پولیسو یو قوماندان په وسله واله نښته کې ووژل شو.

نښته تېره شپه هغه وخت وشوه، چې قوماندان عید محمد خان له پولیسو سره په ملتیا له اورګون نه، ګیانې ولسوالۍ ته اکمالات کول.

د پکتیکا د امنیې قوماندانۍ ویاند شاه محمد ارین نن رسنیو ته وویل، نښته د سهار تر شپږو بجو روانه وه.

هغه زياتوي: "د اورګون زون لپاره د محلي پولیسو قوماندان ښاغلی عید محمد خان هم په دغه نښته یعنې مخامخ جګړه کې شهید شوی دی."

ښاغلي ارین تر دې مخکې په دې نښته کې د ۱۷ وسله والو طالبانو د وژل کېدو خبر هم ورکړی و.

وسله والو طالبانو د دې پېښې په اړه رسما څه نه دي ویلي.

کابل کې د "الیاس داعي" د هڅو د درناوي لپاره ځانګړې غونډه جوړه شوه

محمد الیاس داعي

د افغانستان د اطلاعات او فرهنګ وزارت نن د ازادي راډیو د وژل شوي خبریال محمد الیاس داعي د هڅو د درناوي لپاره ځانګړې غونډه جوړه کړه.

د دغه وزارت ویاند صابر مومند ازادۍ راډیو ته وویل، په دې غونډه کې د الیاس داعي له کورنۍ سره د مرستو پردوام خبرې وشوې.

هغه زياتوي: "په مجموع کې خبرې پر دې راغونډې وې، چې د شهید داعي له کورنۍ سره دې دوامداره مرستې وشي او د ویناوالو غوښتنه دا وه چې حکومت دې دوی ته په کابل کې یو کور ورکړي."

محمد الیاس داعي څه باندې درې اونۍ مخکې د هلمند په مرکز لښکرګاه کې د ده په موټر پورې د نښلول شوي مقناطیسي ماین په چاودنه کې ووژل شو.

حکومت او وسله والو طالبانو دواړو د دې پېښې د څېړنې ژمنه کړې ده، خو تر اوسه د عاملانو په مجازاتو کې د کوم پرمختګ خبر نه دی ورکړل شوی دی.

"په کابل کې د مقناطیسي ماین چاودنو او د چارواکو د ترور شبکه نیول شوې"

آرشیف

د ولسمشر د لومړي مرستیال دفتر وايي، په کابل کې د مقناطیسي ماین د چاودنو او د دولتي چارواکو د ترور یوه شبکه نیول شوې ده.

د امر اله صالح د رسنیو او عامه ارتباطاتو ريیس رضوان مراد نن ازادۍ راډیو ته وویل: "هغه شبکه چې د دولتي منسوبینو په ترور کې ښکېله وه او مقناطیسي ماینونه یې کابل ته انتقالول، امنیتي ځواکونو نیولې او متاسفانه چې ده یوه نانوايي جوړه کړې وه، چې جعلي وه، په ظاهراً یې خلکو ته ښووله چې نانوايي ده، خو ده پخې ډوډۍ راوړلې او هلته یې خرڅولې.

په کابل کې د جنايي پېښو او ناامنیو تر زیاتېدو وروسته د ولسمشر لومړي مرستیال امر اله صالح د تلې/ میزان پر ۲۵مه د څو اوونیو لپاره د کابل د امنیتي چارو مسوولیت پرغاړه واخیست.

کونړ کې د ډاکترانو کاري اعتصاب څلورمې ورځې ته وغځېد

کونړ کې د سيمه ييز روغتون ډاکترانو کاري اعتصاب

د کونړ مرکزي روغتون ډاکترانو د کاري اعتصاب څلورمه ورځ ده، خو لا يې هم غوښتنې نه دي منل شوي.

د یاد کار بندیز له امله ناروغان ګڼو ستونزو سره مخ دي.

د اسعد اباد مرکزي روغتون ته له لېرې لېرې ځایونو په لسګونو ناروغان د درملنې لپاره راغلي، خو ډاکترانو کاري اعتصاب کړی او د روغتون اکثره خونو ته قلفونه پراته دي.

ډاکتران وايي، د خپل معاش د پوره اخیستلو لپاره يې له ولایته نیولې تر وزارته دروازې ټکولې، خو چا يې غوښتنو ته مثبت ځواب نه دی ورکړی.

يو تن ډاکتر مولا داد وويل: "موږ ولایت، ولایتې شورا او وزارت ته عارض شوي یو، د شکایت يو ځاى نه دی پاتې شوی، نو مجبور شو کار بندیز مو وکړ، په ټول افغانستان چې په کوم سیستم معاشونه ورکول کېږي په هغه حساب دې له موږ هم یو سلنه پیسې وګرځوي، خو زموږ يې پنځه سلنه معطل کړی دی."

خو د کونړ والي محمد اقبال سعید ازادۍ راډیو ته وویل کابل ته تللی څو د عامې روغتیا وزارت چارواکو او اړوندې موسسې سره د ډاکترانو لخوا د پیل شوي کاري اعتصاب پاى ته رسولو لپاره حللاره پیدا کړي.

ډاکتران وايي، د هېواد اکثره روغتونونه او روغتیايي مرکزونه همکارو موسسو ته سپارل شوي، چې ډېری يې خپلې دندې په سمه توګه نه شي ترسره کولی او له امله يې روغتیايي کار کوونکي او ناروغان ستونزو سره مخ وي.

له دې وړاندې د نورستان روغتیايي کار کوونکو د معاشونو د نه ورکړې په غبرګون کې له دوه میاشتو زیات کاري اعتصاب کړى و.

په خوست کې د اوبو د ۹ بندونو د جوړولو کار پیل شو

د اوبو د يوه ذخیروي بند د جوړولو انځور

نن د شنبې په ورځ د خوست په مرکز او ۵ ولسوالیو کې د ۹۲ میلیونه افغانیو په ارزښت د اوبو د ۹ وړو ذخیروي بندونو د جوړولو کار پیل شو.

د خوست په مرکز او پنځو ولسوالیو تڼیو، ځاځي میدان، ګربزو، باک او اسماعیل خېل او مندوزیو کې د اوبو د ۹ وړو ذخیروي بندونو د جوړولو کار د خوست د مرکز اړوند د څړبني پر خوړ د یو ذخیروي بند د بنسټ ډبرې په کېښودو پیل شو.

د کار په پیل ځای کې د خوست د شمل خرم د فرعي حوزې رئیس انجینر ذین الله نسیمي مشال راډیو ته وویل، د دې بندونو په جوړولو چې د اوبو د چارو د تنظیم اداره ۹۲ میلیونه افغانۍ ورباندې لګښت کوي، ۶لکه ۱۶۵۰۰ متر مکعب اوبه ذخیره شي.

ښاغلي نسیمي زیاته کړه: "دا ۹چک ډيمونه یا د واوبو واړه ذخیروي بندونه د خوست په اسماعیل خېلو مندوزیو، تڼيو، ګربزو، ځاځي میدان او باک ولسوالیو کې جوړېږي، په دې سره به د سیلابونو سرعت راکم شي، په ضمن کې به زیرزمیني اوبه تقویه شي او د ګل څخه به راپورته شي، پدې کې به ۵۰۰ کاریګر کار کوي، چارې به يې د اتو میاشتو په موده کې سرته ورسېږي، له دې چک ډیمونو به ۱۱ زره کورنۍ ګټه پورته کړي."

د خوست اوسیدونکي هم دې خوشاله دي، چې د کلونو-کلونو غوښتنو وروسته پدې ولایت کې د اوبو د بندونو د جوړولو کارونه پیلېږي.

خوست چې موسمي او شړکنده بارانونه لري، په ډېریو سیمو کې يې خوړونه او سیلابونه راوځي، چې نه یوازې کرنیزې ځمکې ورسره تخریبېږي، بلکې د خلکو کورونو او څارویو ته هم زیان رسوي.

بغلان کې د فوټبال لیګ؛ د 'حضرت عمر فاروق' لوبډله اتله شوه

ارشیف، عکس تئزیني بڼه لري

د 'حضرت عمر فاروق' لوبډله د بغلان ولایت د فوټبال غوره لیګ اتله شوه.

د بغلان د فوټبال فدراسیون رئیس فرید احمد سدید نن شنبه(د لېندۍ ۱۵مه) ازادي راډیو ته وویل چې د دغو سیاليو په پایلوبه کې 'عقابان' او 'حضرت عمر' راوتلې وې چې 'حضرت عمر فاروق' لوبډله سره مخ وې چې لوبه ۱-۲ پر وړاندې حضرت عمر فاروق لوبډلې وګټله .

ښاغلی سدید وايي چې د 'حضرت عمر فاروق' لوبډله د اتلولۍ په ګټلو سره د هېواد شمال ختیځ زون د اتلولۍ سیالیو ته لار پیدا کړه.

ویل کېږي چې دا سیالۍ یوه اوونۍ دمخه پیل شوې وې او نن شنبه پای ته ورسېدې چې شپږو لوبډلو په کې ګډون کړی وو.

د کابل د نجونو او هلکانو د باولینګ سیالۍ پای ته ورسېدې

ارشیف، عکس تئزیني بڼه لري

د کابل د نجونو او هلکانو د باولینګ وروستي پړاو سیالۍ نن شنبه (د لېندۍ ۱۵مه) پای ته ورسېدې.

د افغانستان د باولینګ ملي فدراسیون رئیس ادریس فاروقي نن ازادي راډیو ته وویل چې په یادو سیالیو کې شپږ نجونې او شپږ هلکان د کابل د باولينګ ملي لوبډلې ته غوره شول.

دا دوه ورځنۍ لوبې وې چې د سل غوره لوبغاړو له منځه وروستي پړاو ته دولس نجونو او دولس هلکانو لار موندلې وه.

ټاکل شوې چې باولینګ ملي لوبډلې لپاره د غوره لوبغاړو د ټاکلو په موخه سیالۍ هم تر راتلونکو لسو ورځو پورې په کابل کې تر سره شي.

پکتیکا چارواکي: اورګون کې د نښتې پرمهال ۱۷ وسله وال وژل شوي

ارشیف، د افغانستان په نقشه کې د پکتیکا ولایت

د پکتیکا امنیه قومانداني وايي، په اورګون ولسوالۍ کې د وسله والې نښتې په نتیجه کې ۱۷ وسله وال وژل شوي دي.

د امنیې قوماندانۍ ویاند شاه محمد ارین نن شنبه(د لېندۍ ۱۵مه) رسنیو ته وویل، دا نښته تېره شپه شوې ده: "د لومړنیو راپورونو له مخې په دغو نښتو کې د ترهګرو طالبانو ۱۷ غړي وژل شوي او همدا راز په نښته کې هوايي ځواک هم برخه اخیستې او درنه بمباري شوې، زموږ د تلفاتو راپورونه هم شته چې وروسته به له تاسو سره شریک شي."

ښاغلي ارین ونه ویل چې په دې نښته کې څو تنه افغان امنیتي ځواکونو ته مرګ ژوبله اوښتې ده.

وسله والو طالبانو د دې پېښې په اړه څه نه دي ویلي.

چارواکي: د کانونو برخه کې ۱،۶ میلیارده افغانۍ نوې پانګونه شوې

ارشیف، د هېواد یوه کاني سیمه

د افغانستان د کانونو او پټرولیم وزارت وایي، د کانونو په برخه کې ۱،۶ میلیارده افغانۍ نوې پانګونه شوې ده.

د دغه وزارت ویاند عبدالقدیر مطفي نن د شنبې (د لېندۍ ۱۵مه) په ورځ ازادي راډیو ته وویل چې له دغې پانګونې سره کابو څلور زره کسانو ته د کار زمینه هم برابره شوې ده.

دغه پانګونه د هېواد په شااوخوا ۲۲ ولايتونو کې په ۶۷ بېلابېلو کاني سيمو کې شوې ده.

نوموړي وویل، له دې لارې هرکال کابو ۴۰۰ میلیونه افغانۍ عواید هم را ټولیږي.

اسلام اباد کې د افغانستان-پاکستان د سوداګرۍ او ټرانزیټ ۸مه ناسته

ارشیف، عکس تئزیني بڼه لري

ټاکل شوې چې د افغانستان او پاکستان د سوداګرۍ او ټرانزیټ اتمه ناسته ډېر ژر په اسلام اباد کې جوړه شي.

د سوداګرۍ او صنعت وزارت ویاند فواد احمدي نن د شنبې (د لېندۍ ۱۵مه) په ورځ ازادي راډیو ته وویل چې دغه ناسته د 'اپټیکا' تړون د بریاليتوب او همغږۍ لپاره جوړېږي، خو نوموړي يې کره نېټه ونه ښوده.

د افغانستان او پاکستان د سوداګرۍ او ټرانزیټ اوومه ناسته د پاکستان لوري راغلي پلاوي په ګډون څه موده وړاندې په کابل کې جوړه شوه.

دغه ناستې په نوبتي ډول له تېرو شپږو کلونو راهیسې د افغانستان او پاکستان ترمنځ د سوداګریزو ستونزو د هواري په موخه جوړېږي.

هاخوا افغان سوداګر وايي، لا هم له پاکستان سره د ټرانزیټ او لوړو تعارفو په ګډون له ګڼو ستونزو سره مخ دي.

کندز چارواکي: پر کروندګرو اصلاح شوي تخمونه وېشي

آرشیف

په کندز کې د کرنې اوبو لګونې او مالدارۍ ریاست چارواکي وايي، سږکال په خزانې کمپاین کې د دې ولایت په مرکز او ۹ لسوالیو کې پر ۱۴۰۶۰ تنو ګروند ګرو ۷۰۳ ټُنه د غنمو اصلاح شوي تخمونه وېشي.

د دې ادارې د کرنیزو چارو امر عبدالمجید نافذ وايي، پر دې غنمو څه باندې ۳۱ میلیونه افغانۍ لګښت راغلی چې د کرنې او مالدارۍ وزارت له لورې ورکول کېږي.

هغه زياتوي: "موږ د غنمو اصلاح شوي تخمونه ترلاسه کړي دي، د دغو اصلاح شویو تخمونو ۶۰ سلنه لګښت د کرنې وزارت او یوازې ۴۰ سلنه لګښت یې بزګران ورکوي، یوه بورې غنم ۵۰ کيلو وزن لري او د ۸۸۸ اعشاریه ۳۶ افغانیو په بدل کې بزګرانو ته ورکول کېږي."

ښاغلي نافذ وايي، تېر کال یې هم اصلاح شوې تخمونه په کروندګرو وېشلي وو، چې د ده په وینا د غنمو د حاصلاتو په زیاتیدو کې مرسته کړې وه.

خو کروندګر وايي، سږ کال د کرني ریاست د غنمو اصلاح شوی تخم په داسې وخت کې وېشي چې د غنمو د کر وخت تېر دی، او دوی سره مرسته نه شي کولی.

۳۰ کلن توریالي شینواری د کندز دګل تپې ولسوالۍ له بزګرانو څخه دی، هغه وايي، ډېرو کروندګرو د مني په سر کې غنم کرلي دي.

د کندز د کرنې او مالدارۍ د ادارې چارواکي وايي، که چېرې جګړې پای ته ورسېږي، کروندګر پر خپلو ځمکو کار وکړی او دوی هم وتوانېږي د کندز له کروندګرو سره د نویو تخمونو په رواجولو کې سمه مرسته وکړي، دا ولایت به یو ځل بیا خپل پخوانی هغه نوم تر لاسه کړي چې یو مهال د ټول افغانستان د غلو کندو بلل کېده.

د اطلاعات او فرهنګ وزارت د 'داعي' د ویر مراسم ترسره کوي

د ازاډي راډیو وژل شوی خبریال الیاس داعي

د افغانستان د اطلاعات او فرهنګ وزارت نن د شنبې (د لېندۍ ۱۵مه) په ورځ د ازادي راډیو د وژل شوي خبریال الیاس داعي د ویر مراسم ترسره کوي.

په دې غونډه کې چې ټاکل شوې ده تر غرمې وروسته، دوه بجې د دې وزارت د رسنیو په نړیوال تالار کې جوړه شي، حکومتي چارواکو او د هلمند مخورو ته د ګډون بلنه ورکړل شوې ده.

الیاس داعي څه باندې درې اوونۍ مخکې د هلمند په مرکز لښکرګاه کې هغه وخت ووژل شو چې د ده پر موټر د مقناطیسي ماین چاودنه وشوه.

ایران د افغانانو د ځپنې په اړه د یوې ويډیو منځپانګه رد کړه

ارشیف، د افغانستان او د ایران ګډ بیرغ

د ایران د بهرنیو چارو وزارت په دې هېواد کې د افغانانو د ځپنې په اړه د یوې ويډیو محتوا رد کړه.

تردې مخکې د افغانستان د بهرنیو چارو وزارت د پنجشنبې په ورځ اعلان وکړ چې د هغې ویډيو په اړه یې څېړنه پیل کړې چې په ایران کې د افغان کډوالو ځورونه ښکاري.

د افغانستان د بهرنیو چارو وزارت په همدې حال کې زیاته کړه چې د نړۍ په هېڅ هېواد کې له افغانانو سره "ناسم" چلند نه مني.

د ایران د بهرنیو چارو وزارت ویاند سعید خطیب زاده د دې اعلامیې په غبرګون کې وویل چې پر ټولنیزو رسنیو په خپره شوې ویډيو کې د افغانانو سپکاوی یو ناسم کار دی او دا پېښه په ایران کې نه ده شوې.

په دې وروستیو کې پر ټولنیزو رسنیو یوه ويډیو خپره شوه چې په کې داسي ښکاري چې ګواکي ځیني ایرانیان یو شمېر افغانان شکنجه کوي.

تر اوسه په ایران کې له افغان کډوالو سره د بد چلند ګڼې ويډیوګانې خپرې شوي چې د افغانانو او افغان حکومت له انتقاد سره مخامخ شوي.

ایران وايي، د افغانستان جګړه د دې لامل شوې چې شااوخوا دوه میلیونه افغانان په قانوني او غیرقانوني توګه ایران ته کډه شي.

نور راوښيه

XS
SM
MD
LG