د لاسرسۍ وړ لېنکونه

تازه خبر
پنجشنبه ۶ لیندۍ ۱۳۹۹ کابل ۰۴:۵۶

خبرونه

افغان چارواکي: د هوايي دهلیزونو له لارې ۱۵ صادرات زیات شوي

د افغانستان د سوداګرۍ او پانګونې خونې چارواکي وايي، د هوايي دهلیزونو له لارې په صادراتو کې د تېر په پرتله ۱۵ سلنه زیاتوالی راغلی دی.

د دغې خونې مرستیال محمد یونس مومند نن سې شنبه (د لړم ۲۷مه) ازادي راډيو ته وویل چې په تېرو ۹ میاشتو کې د کرونا ویروس د بندیزونو سره ـ سره هم د تېر کال پرتله صادرت زیات شوي دي.

نوموړي وویل چې په ۲۰۱۹ میلادي کال کې ٢٧٠٠ ټنه کالي صادر شوي.

دا په داسې حال کې ده چې په ۲۰۲۰ میلادي کال کې د ٨٣ میلیونه ډالرو په ارزښت٣٨٠٠ ټنه کالي صادر شوي دي، خو د سوداګرۍ خونه وايي، یو شمېر ستونزې موجودې دي چې باید ورته رسېدنه وشي.

د دوی په وینا، لا هم الوتنې منظمې نه دي او دوی نه شي کولی د الوتکو د کم ظرفیت له امله لوی مقدار توکي صادر کړي.

د ورځې تازه خبرونه دلته ولولئ

کابل کې د زورخانه يي سياليو ۶مه دوره لوبې پای ته ورسېدې

ارشیف، عکس تئزیني بڼه لري

په کابل کې د زورخانه يي سياليو شپږمه دوره لوبې تېره ورځ پای ته ورسېدې.

د افغانستان د المپيک ملي کمېټې د مطبوعاتو برخې مسؤل مجيب قاري زاده نن پنجشنبه (لېندۍ ۶مه) ازادي راډيو ته وويل، دغه سيالۍ روانه اوونۍ د دوشنبې په ورځ پيل شوې وې، هغه وویل په دې سیالیو کې ۱۲۰ لوبغاړو ګډون درلود چې ۴۰ يې د کابل ملي لوبډلې لپاره غوره شوه.

د ښاغلي قاري زاده په خبره، دغو لوبغاړو درې ورځې د يو بل پر وړاندې سيالۍ وکړې.

هغه وايي، په دې سياليو د کابل له ۱۳ کلپونو لوبغاړو ګډون کړی وو‌.

د وژل شوي داعي کورنۍ د حکومت پر ځنډني پلټنو انتقاد کوي

په هلمند کې د ازادي راډیو وژل شوی خبریال الیاس داعي

په هلمند کې د ازادي راډیو د خبریال محمد الیاس داعي کورنۍ د نوموړي د وژنې په تړاو د حکومت پر ځنډني پلټنو انتقاد کوي.

د محمد الیاس داعي د وژل کېدو شاوخوا دوه اوونۍ پوره شوې، خو حکومت تراوسه په دې اړه پلټنو کې پرمختګ نه لري.

د ښاغلي داعي ورور مدثر دعوت ازادي راډیو ته په مرکې کې وویل چې حکومت باید د الیاس داعي قاتلین ونیسي او سزا ورکړي: "په لومړیو ورځو کې چې موږ له دوی سره اړیکې ټینګولې دوی پر ځینو ځایونو او کسانو باندې شک ښوده. موږ ته یې ویل چې پر ځینو کسانو شک لري، خو زموږ غوښتنه دا وه چې باید هغه کسان ونیول شي او یا سزا ورکړل شي چې د دې پېښې عاملین دي، خو لاهم تر اوسه په دې اړه هېڅ پرمختګ نه دی شوی چې چا دا کار کړی او ولې یې کړی دی."

وسله والو طالبانو هم وړاندې ویلي و چې د ښاغلي داعي د وژنې په اړه پلټنې کوي.

په هلمند کې د ازادي راډیو خبریال محمد الیاس داعي د نومبر د میاشتې په ۱۲مه په لښکرګاه ښار کې د ده په موټر کې د ځای پرځای شوي بم په چاودنه کې ووژل شو او یو ورور یې ټپي شو.

دغې پیښې په کور دننه او بهر پراخ غبرګونونه راوپارول.

بلخ چارواکي: د سیمه ییزو پولیسو یو قوماندان وژل شوی

ارشیف

د بلخ امنیه قوماندانۍ تأیید کړه چې د چمتال ولسوالۍ د سیمه ییزو پولیسو یو قوماندان د نامعلومو وسله والو لخوا وژل شوی دی.

د بلخ د امنیه قوماندانۍ ویاند عادل شاه عادل ازادي راډیو ته وویل چې دغه قوماندان امیرګل نومېده او تېره شپه د مزارشریف ښار د پنځمې حوزې اړوند سیمو کې د نامعلومو کسانو په ډزو ووژل شو.

ښاغلي عادل وویل چې د دې پېښې په اړه څېړني پیل شوي دي، خو تر اوسه په دې تړاو څوک نه دي نیول شو.

د دې پېښې مسؤلیت تر اوسه چا نه دی منلی.

د نورستان د کلیو د پراختیا او بیارغونې چارو تښتول شوی رئیس راخوشې شو

ارشیف

د نورستان د کلیو د پراختیا او بیارغونې چارو رئیس د وسله والو له منګولو راخوشې شو.

انجنیر سید معصوم سیدي یوه اوونۍ وړاندې د کونړ ولایت د چپې درې ولسوالۍ په مربوطاتو کې وسله والو کسانو تښتولی و.

د نورستان د حج او اوقافو رئیس او د قومي جرګې مشر مولوي محمد انور ازادي راډیو ته وویل چې ښاغلی سیدي د قومي جرګې په هڅو تېره شپه راخوشې شو.

دی وايي: "د نورستان د انکشاف دهات رئیس چې څه موده وړاندې نا معلومو وسله والو له ځانه سره بیولی وو، د ولسونو او ځایي مشرانو په هڅه خوشې شوی دی."

سید معصوم سیدي د نورستان مرکز پارون ته روان وو چې په کمین برابر شو، د برید پر مهال د سیدي یو ملګری وژل شوی و.

امریکا کې کرونا؛ تېرو ۲۴ ساعتونو کې ۲۴۰۰ تنه مړه کړي

ارشیف

د امریکا متحده ایالاتو په تېرو ۲۴ ساعتونو کې د کوویډ – ۱۹ ناروغۍ له امله د ۲۴۰۰ نویو مړینو د ثبتیدو خبر ورکړ چې دا په تېرو شپږو میاشتو کې په یوه شپه او ورځ کې د مړینو تر ټولو لوړه شمېره ده.

د کورونا له امله په دې شمېر مړینې داسې مهال ثبتېږي چې نن پنجشنبې (د لېندۍ ۶) په امریکا کې کورنۍ سره راټولېږي اود "تنکس ګیوینګ" یا شکرانې مذهبې مراسم پرځای کوي.

د امریکا منتخب ولسمشر​ جو بایډن تېره شپه د شکرانې د ورځې په مناسب وینا کې د امریکا له خلکو وغوښتل چې له کرونا سره مبارزه شدیده او د دغې ورځې د لمانځلو په مهال د ټولنیز واټن د مراعاتولو په ګډون ډېر احتیاط وکړي.

هغه زیاته کړه چې له کرونا سره په جنګ یو نه له یو بل سره.

روحاني: ایران او امریکا د ۲۰۱۷ شرطونو ته ورګرځېدای شي

د ایران ولسمشر حسن روحاني

د ایران ولسمشر حسن روحاني وایي، ایران او د امریکا متحده ایالات که وغواړي کولای شي د ۲۰۱۷ میلادي کال د جنوري تر شلمې مخکې شرطونو ته چې دواړو هېوادونو پرې موافقه کړې وه، بېرته ور وګرځي.

یعنې مخکې له دې چې ډونالډ ټرمپ د امریکا د ولسمشر په توګه کار پیل کړي.

حسن روحاني پرون چهارشنبې په تهران کې د کابینې غونډې ته په وینا کې وویل، ایران دې کار ته لېواله که امریکا هم ورته لېوالتیا ولري: "موږ هیله من یو چې د امریکا راتلونکې اداره د لومړي ګام په توګه هغه پالیسۍ په کلکه وغندي چې ډونالډ ټرمپ د ایران پر وړاندې غوره کړې ـ هغه پالیسي باید وغندي چې د بشر له حقونو سره په تضاد کې او د ترهګري پر اقداماتو ولاړه ده."

حسن روحاني دغه راز وویل چې د امریکا نوی حکومت باید هغه خرابه سیاستونه چې د ټرمپ ادارې د ایران په مخ کې نیولي و، جبران کړي.

ولسمشر ټرمپ په ۲۰۱۸ میلادي کال د نړۍ له قدرتونو سره د ایران له اټمي تړونه ووت او له هغې وروسته یې پر دې هېواد د بندیزونو لګولو ته مخه کړې ده.

په داسې حال کې چې د امریکا د ولسمشر په توګه د ډونالډ ټرمپ د دندې پای ته رسېدو ته شاوخوا دوه میاشتې پاتې دي، د هغه اداره په پام کې لري چې پر ایران د زیاتو فشارونو لپاره پر دې هېواد نوي بندیزونه ولګوي.

د ایران لپاره د امریکا جګ پوړي استازي ایلیت ابرامز پرون اعلان وکړ چې د ولسمشر ټرمپ د بندیزونو ستراتیژي به د وسلو، د ډله ییزې وژنې د وسلو او د بشري حقونو د مسایلو په اړه دې هېواد ته د سزا ورکولو په نوېو اقداماتو سره د هغه د ولسمشرۍ د دورې تر ختمېدو روانه وي.

کندهار چارواکي: هوايي ډګر کې مسافرو ته اسانتیاوې په بشپړېدو دي

د کندهار هوايي ډګر

د کندهار چارواکي وایي، د احمدشاه بابا نړیوال هوایي ډګر کې مسافرو او د هغوی ښه راغلاست ویوونکو ته لازمې اسانتیاوې د بشپړېدو په حال کې دي.

د کندهار د ولایت د مطبوعاتي دفتر مسؤل احمد بهیر احمدي تېره شپه ناوخته ازادي راډیو ته وویل: "له تېرو څو میاشتو راهیسې د احمدشاه بابا په نړیوال هوایي ډګر کې د مسافرو او د هغوی د ښه راغلاست ویونکو لپاره د ټرانسپورټ، هلته د رسټورانټ، د جومات، تشنابونو او د موټرو د تم ځای او همدارنګه د میدان داخل ته له موټرو سره د اجازې ورکولو اړوند لازمو اسانتیاوو برابرولو په موخه د ولایتي ادارې هڅې پیل شوې دي."

پرون چهارشنبې هم د احمدشاه بابا په نړیوال هوایي ډګر کې د ناټو د غوڅ ملاتړ ملاتړ د ماموریت د سلاکارانو په ګډون د دې ولایت پوځي او ملکي مسولینو په یوه غونډه کې د رغونې چارې وارزولې، څو هر څومره ژر مسافرین په دې هوایي ډګر کې له لازمو اسانتیاوو برخمن شي.

ایران کایلي مور ګیلبرټ له بنده خوشې کړه

کایلي مور ګیلبرټ

ایران د بریتانیا او استرالیا تبعه کایلي مور ګیلبرټ له بنده خوشې کړه.

د ایران دولتي ټلوېزیون خبر ورکړ، مور ګیلبرټ چې اسرائیل ته د جاسوسۍ په تور په ایران کې زنداني وه د درېیو ایرانيانو په بدل کې ازاده شوه.

د ایران د دولتي اژانس د وېب‌پاڼې د خبر له مخې یو سوداګر او دوه نور ایرانیان چې په بهر کې په درواغو تورن شوي وو د مور ګیلبرټ په بدل کې خوشې شول.

مور ګیلبرټ چې د میلبرن په پوهنتون کې د اسلامي زده‌کړو استاده وه د ۲۰۱۸ کال په سپټمبر کې په ایران کې په ۱۰ کاله بند محکومه شوه.

په وروستیو میاشتو کې پر ایران د اغلې ګیلبرټ د خوشې کېدو لپاره نړیوال فشارونه وروسته تر دې زیات شول چې په زندان کې د دې د روغتیایي وضعیت د خرابي راپورونه خپاره شول.

متحده اماراتو افغانانو او د ۱۲ نورو هېوادونو وګړو ته پر ویزو بندیز ولګاوه

ارشیف، متحده عربي امارات

متحده عربي اماراتو افغانانو ته د نویو ویزو پر ورکړه بندیز ولګاوه.

روېټرز اژانس د یوې سرچینې په استناد خبر ورکړ چې دا ویزې د افغانستان په ګډون د ۱۳ هېوادونو اتباعو ته په موقتي ډول بندې شوې دي.

له دې ډلې اکثر اسلامي هېوادونه دي او پاکستان او ایران هم په‌کې شامل دي.

د متحده عربي اماراتو د نویو ویزو د بندیز علت امنیت ته اندېښنې یادې شوې دي، خو په دې برخه کې نور توضېحات نه‌دي ورکړل شوي.

دا بندیز نږدې دوه میاشتې وروسته تر دې لګېدلی دی چې ابوظبي له اسرائیل سره ډیپلوماتیکې اړیکې عادي کړې.

اذربایجاني سرتېري د نګورنو قره‌باغ کلبجر سیمې ته داخل شول

اذربایجاني پوځیان په نګورنو قره‌باغ کې پر یوه سړک د واورو پر سر د ماینونو پلټنه کوي.

اذربایجاني سرتېري په نګورنو قره‌باغ کې د کلبجر سیمې ته داخل شول. دا هغه سیمه ده چې ارمنستان له اذربایجان سره د شوي تړون له مخې د هغې د سپارلو موافقه کړې وه.

د نګورنو قره‌باغ پر سر د دواړو هېوادونو ترمنځ شپږ اوونۍ جګړه وشوه.

تر دې وروسته د اذربایجان او ارمنستان ترمنځ روانه میاشت د روسیې په منځګړیتوب د سولې تړون وشو چې د هغې له مخې دا په نګورنو قره‌باغ کې درېیمه ولسوالي ده چې اذري پوځیانو ته سپارل کېږي.

د اذربایجان دفاع وزارت پرون داسې تصویرونه خپاره کړل چې پوځیان‌یې په نګورنو قره‌باغ کې پر یوه سړک د واورو پر سر د ماینونو پلټنه کوي.

د نړۍ د فوټبال یو بې‌ساری لوبغاړی دیګو مرادونا مړ شو

دیګو مرادونا

د نړۍ د فوټبال یو بې‌ساری لوبغاړی دیګو مرادونا د ۶۰ کلونو په عمر مړ شو.

د ارجنټاین د پخواني کپټان، مرادونا زړه پرون په پلازمېنه بونیس ایرس کې ودرېد.

ارجنټاین چې په ۱۹۸۶ کال کې د فوټبال نړیوال جام خپل کړ، مرادونا یې کپټان و.

په ۱۹۹۰ کال کې هم مرادونا د ارجنټاین د ملي ټیم کپټان و چې دا لوبډله تر فاینل ورسېده او له جرمني څخه‌یې پابلوبه بایلوده.

کندهار کې د اصلاح شویو غنمو د تخمونو د وېش پروګرامونه پیل شول

ارشیف

د اصلاح شویو غنمو د تخمونو د وېش دوه پروګرامونه په کندهار کې پيل شول.

یو پروګرام د کرنې، مالدارۍ او اوبو لګولو وزارت له انکشافي بودجې تمویلېږي.

د کندهار د زراعت رئیس سید حفیظ‌الله سیدي ازادي راډیو ته وویل: "په دې کې ۶۶۸ مټرک ټنه غنم او اصلاح شوي تخمونه بزګرانو ته په ۱۵ ولسوالیو کې توزېع کوو."

بل پروګرام د کرنې، مالدارۍ او اوبو لګولو وزارت د ملګرو ملتونو د خوراک او کرنې ادارې (FAO) په مرسته پلی کوي چې په درېیو ولسوالیو کې د غنمو اصلاح شوي تخمونه او کیمیاوي سره وېشي.

کندهار د افغانستان یو له هغو ولایتونو څخه دی چې په وروستیو کلونو کې یې زراعت وچکالۍ اغېزمن کړی دی.

"کندهار کې له ښځو سره د تاوتریخوالي ۱۳۸ قضیې ثبت شوي"

ارشیف

په کندهار کې د ښځو چارو ریاست په وینا سږ کال تر اوسه له ښځو سره د تاوتریخوالي ۱۳۸ قضیې ثبت شوي چې اجباري ودونه، وهل او په بدو کې ورکول او یو شمېر نور ناوړه دودنه په‌کې شامل دي.

له ښځو سره د تشدد د مخنیوي په هدف د کندهار د ښځو چارو د ریاست او «یو اېس اې ای ډي» مؤسسې په همکارۍ د ګډ ورکشاپ په ترڅ کې چارواکو دا خبره وکړه.

دا ورکشاپ د ۱۶ ورځو په مخه و چې پرون پای ته ورسېد.

د کندهار د ښځو چارو رئیسې رقیه اڅکزۍ وویل چې روان کال د ښځو د حقونو د خوندیتوب او ورکړې په هدف ۱،۲۰۰ ښځو او نارینه‌وو د عامه پوهاوي په ورکشاپونو کې برخه اخیستې ده او دا لړۍ دوام لري.

جنوبي کوریا له افغانستان سره د روغتیایي موادو د یوې بستې مرسته وکړه

ارشیف، د جنوبي کوریا بیرغ

جنوبي کوریا له افغانستان سره د روغتیایي موادو د یوې بستې مرسته وکړه چې ۲۷۷ زره ماسکونه په‌کې دي.

په کابل کې د جنوبي کوریا سفیر ژا هوینګ د چهارشنبې په ورځ وویل، له کرونا وبا سره په افغانستان کې د مبارزې په هدف سیول دا مرسته کړې ده.

جنوبي کوریا په تېرو نږدې ۲۰ کلونو کې له افغانستان سره په بېلابېلو برخو کې مرستې کړې دي چې د ښاغلي هوینګ په وینا د دې مرستو کچه نږدې یو میلیارد ډالرو ته رسېږي.

د افغانستان د روغتیا وزارت د شمېرو له مخې چې د چهارشنبې په ورځ‌یې خپرې کړې د کرونا ټولې مثبتې پېښې په هېواد کې ۴۵ زره ۴۹۰ ته رسېدلې دي.

"افغانستان کې د ښځو د وضعیت ښه والي ته پام نه دی شوی"

ارشیف، عکس تئزیني بڼه لري

د افغانستان د بشري حقونو خپلواک کمېسیون وایي، دغه هېواد کې د ښځو د وضعیت ښه والي ته جدي پام نه دی شوی.

کمېسیون پر خپله ټویټرپاڼه لیکلي چې دغلته ښځې له ډول ډول تاوتریخوالي لکه له کوره شړلو، جبري او کم عمر کې ودولو، د ژوند د ملګري د نه انتخاب، په بدو کې ورکړې او ورته نورو ټولنیزو ستونزو سره مخامخې دي.

کمېسیون ویلي، افغانستان د ښځو د حقونو په برخه کې لاسته راوړنې هم لري چې د دوی په وینا کافي نه دي.

کمېسیون دغه څرګندونې د نومبر د ۲۵مې، یا د ښځو په وړاندې د تاوتریخوالي د له منځه وړلو نړیوالې ورځې په مناسبت کړي دي.

له دې وړاندې یوناما، په افغانستان کې د ناټو ماموریت او بېلابېلو نورو ډيپلوماتیکو ادارو د افغان ښځو د حقونو په ټینګښت ټینګار کړی دی.

نور راوښيه

XS
SM
MD
LG