د لاسرسۍ وړ لېنکونه

تازه خبر
چهارشنبه ۱۲ لیندۍ ۱۳۹۹ کابل ۱۰:۳۰

خبرونه

د کوسوو ولسمشر هاشم تاچي له دندې استعفا وکړه

د کوسوو ولسمشر هاشم تاچي

د کوسوو ولسمشر هاشم تاچي وروسته تر دې له دندې استعفا وکړه چې خبر شو په جنګي او بشر ضد جرمونو تورن شوی دی.

تاچي په ۱۹۹۰ مه لسیزه کې له صربیا نه د ازادۍ غوښتلو په جګړه کې د چریکیانو یو مشر و.

نوموړي نن د نومبر په پنځمه پریستینا کې خبریالانو ته وویل، سرچینو یې ملعومات ورکړي چې د کوسوو د متخصصانو خونې پر ده لګول شوي تورونه تصدیق کړي دي.

ده له وړاندې ژمنه کړې وه چې که تورن وپیژندل شي، استعفا ورکوي.

بل لورته ټاکل شوې د کوسوو د پارلمان پخوانی مشر به په هاګ کې د جنګي جرمونو او بشرضد جنایتونو له رسمي تور سره مخامخ شي.

یاکوب کراسنیکي چې پخوا جګړه کې د چریکیانو رهبر هم پاتې شوی، له نیول کېدو وروسته هاګ ته لیږدول شوی دی.

د هاګ د جنګي جرمونو څارنوالانو د ځایي پولیسو په همکارۍ پرون د نومبر په څلورمه یاکوب توقیف کړ.

یاکوب د کوسوو د ازادي غوښتونکي پوځ ویاند و او د خپلواکۍ له اخیستو وروسته د پارلمان مشر او کم وخت لپاره سرپرست ولسمشر هم پاته شوی.

پر نوموړي تور دی چې د ۱۹۹۸ او ۱۹۹۹ کلونو پر مهال جګړه کې یې جنګي جنایات کړي دي.

د ورځې تازه خبرونه دلته ولولئ

رسنۍ: ټرمپ د ټاکنو له ورځې تر ۱۵۰ میلیون ډالرو ډېرې پیسې راټولې کړي

ډونالد ټرمپ

امریکايي رسنیو راپور ورکړی چې د متحده ایالاتو ولسمشر ډونالد ټرمپ د ټاکنو له ورځې د خپل کمپاین او سیاسي هڅو لپاره تر ۱۵۰ میلیون ډالرو ډېرې پیسې راټولې کړې دي.

رسنۍ وايي ولسمشر ټرمپ دغه پیسې په نومبر میاشت کې وروسته له هغې راټولې کړي چې خپلو پلویانو ته‌یې له تندو الفاظو ډکې ویناوې کولې او په عین حال کې یې په ټاکنو کې د درغلیو بې‌اساسه ادعا هم کړې وه.

نیویارک ټایمز د دوشنبې په ورځ راپور ورکړی چې ټرمپ هغه میاشت د مالي مرستې له بېړنۍ غوښتنې سره سم ۱۷۰ میلیونه بسپنه ټوله کړه.

واشنګتن پوسټ ورځپاڼې بیا مخکې د پیسو دغه اندازه ۱۵۰ میلیون ډالره ښوولې وه.

ورځپاڼو دغه راپور د هغو کسانو په حواله برابر کړی چې د بسپنې دا موضوع‌یې تأیید کړې، خو خپل هویت‌یې په ډاګه کړی نه‌دی.

جرمني کې یوه موټر چلوونکي ۴ تنه وژلي او ۷ نور ټپیان کړي

تریر ښار کې پولیس او سیمه کې عام خلک

د جرمني پولیس وايي لږ تر لږه څلور کسان هغه وخت مړه او ۷ نور ټپیان شول چې په غربي ښار تریر کې د لوکزامبورګ پولې ته نږدې یوه موټر ووهل.

د جرمني رسنۍ وايي پېښه پرون د دغه ښار په داسې ساحه کې شوې چې د خلکو د تګ راتګ لار ترې تېره شوې ده.

پولیسو په ټویټر کې لیکلي، یو کس له موټر سره نیول شوی دی.

د پولیسو په لومړنیو راپورونو کې ویل شوي چې څلور کسان مړه شوي او پولیسو سیمه کلابنده کړې ده.

یوه عیني شاهد یوې جرمنۍ ورځپاڼې ته ویلي، یو موټر چې ډېر تېز روان و، پر خلکو وربرابر شو.

اطلاعاتو او فرهنګ وزارت: د 'لاجورد' هدف د خصوصي فلمونو تولیدوونکو هڅول و

د لاجورد په نوم د فلمونو فستیوال

د افغانستان د اطلاعاتو او فرهنګ وزارت وايي د لاجورد په نوم د فلمونو د فستیوال عمده هدف د خصوصي فلمونو د تولیدوونکو هڅول و.

په کابل کې دغه فستیوال ۱۰ ورځې مخکې پیل شوی و چې په لسګونه هنري، مستند او نور فلمونه په‌کې نندارې ته وړاندې شول.

د اطلاعاتو او فرهنګ وزارت ویاند صابر مومند پرون سې شنبه دغه فستیوال د خصوصي فلم جوړوونکو لپاره مهم وباله: "موږ دغه جشنواره د همدې لپاره پیل کړه چې په خصوصي برخه کې سینماګران او د فلم مخکښان خپلو دندو ته متوجې او وهڅول شي. زیات فلمونه او مستند وو چې خصوصي پروډکشنونو جوړ کړي وو. د هیئت تر ارزونې وروسته هغوی ته په بېلابېلو برخو کې جایزې ورکړل شوې."

په دغه فستیوال کې د ۲۱۰ فلمونو له ډلې ۵۵ غوره فلمونه د اصلي سیالۍ لپاره غوره شوي وو چې د کابل په ۹ سالونونو کې نندارې ته وړاندې شول.

افغان فلم پرون په یوه اعلامیه کې وویل، نږدې ۵،۰۰۰ کسانو دغه فلمونه وکتل.

"فاریاب کې په وسله‌واله نښته کې ۲ وسله‌وال ووژل شول او ۸ نور ټپیان دي"

ارشیف، فاریاب کې امنیتي ځواکونه

د ملي اردو چارواکي وايي د فاریاب ولایت په پښتونکوټ ولسوالۍ کې په وسله‌واله نښته کې ۲ وسله‌وال ووژل شول او ۸ نور ټپیان شول.

د ۲۰۹ شاهین قول اردو ویاند محمد حنیف رضايي پرون ناوخته ازادي راډیو ته وویل، دا نښته نږدې نیم ساعت روانه وه.

ښاغلی رضايي زیاتوي: "په دې نښته کې ۲ ترورېست طالبان وژل شوي، ۸ تنه نور یې ټپیان شوي دي. د دوی وسلې او مهمات له‌منځه وړل شوي او دوه موټرسایکلونه چې له دوی سره وو، هم تخریب کړای شوي دي."

وسله‌والو طالبانو د دې پېښې په اړه تبصره نه‌ده کړې.

ښاغلی رضايي وايي په دې نښته کې افغان امنیتي ځواکونو ته زیان نه‌دی اوښتی.

چارواکي: د ګېزاب او دهراوود زرګونه بې‌ځایه شویو ته عاجلې مرستې پیل شوي

د ارزګان د ګېزاب ولسوالۍ یوه بې‌ځایه شوې کورنۍ

د ارزګان د والي ویاند وايي په ګېزاب او دهراوود ولسوالیو کې له جګړو زرګونو بې‌ځایه شویو ته د عاجلو مرستو لړۍ پیل شوې ده.

په ګېزاب او دهراوود ولسوالیو کې له تېرو دوو میاشتو د سختو جګړو له کبله د اټکل له مخې ۵،۰۰۰ کورنۍ بېلابېلو سیمو ته بې‌ځایه شوې دي.

د والي ویاند احمدشاه ساحل پرون ناوخته ازادي راډیو ته وویل: "تېره اوونۍ په ګېزاب ولسوالۍ کې څه کم ۹۰۰ کورنیو ته د خوراکي او غیر خوراکي توکو مرسته ووېشل شوه. سبا (چهارشنبه) او بل سبا په دهراوود ولسوالۍ کې ۱،۰۵۷ کورنیو ته د خوراکي او غیر خوراکي توکو وېش پیلېږي."

د والي ویاند وايي مرکز ترینکوټ ته د بې‌ځایه شویو لپاره هم له یوې میاشتې د همکارو مرستندویو ادارو په مرسته د بشري مرستو لړۍ روانه ده.

ناټو: راتلونکی کال به افغانستان کې د خپلو پوځیانو په اړه پرېکړه وکړو

د ناټو سرمنشي ینس سټولټنبرګ

د ناټو سرمنشي وايي د ناټو غړي هېوادونه او شریکان به راتلونکی کال وضعیت ته په کتو له افغانستانه د وتلو، یا هم هلته د خپلو پوځیانو د کمولو پرېکړه کوي.

ینس سټولټنبرګ دا خبره تېره شپه د ناټو د بهرنیو چارو وزیرانو له پرونۍ غونډې وروسته یوه انلاین خبري کنفرانس ته وکړه: "دا چې په افغانستان کې خپل پوځیان نور کم کړو، یا په تدریجي ډول له افغانستانه ووځو که پاتې شو؟ دا پرېکړه به راتلونکی کال وضعیت ته په کتو کېږي. دا پرېکړه به د ناټو د ټولو شریکانو تر سلا مشورې وروسته کېږي. په راروانه فبرورۍ میاشت کې به د ناټو د دفاع وزیرانو غونډه مهمه وي."

په دې وروستیو کې د امریکا متحده ایالاتو اعلان کړی چې د جنورۍ تر نیمايي پورې به په افغانستان کې د خپلو پوځیانو شمېر له ۴،۵۰۰ څخه ۲،۵۰۰ ته راکم کړي.

ارزګان چارواکي: نږدې ۲۰ طالبان وژل شوي

ارشیف، وسله وال طالبان

په ارزګان کې افغان چارواکي د نژدې شل تنه طالبانو د وژلو ادعا کوي.

د ارزګان د والي ویاند احمد شاه ساحل نن سې شنبه (د لېندۍ ۱۱مه) ازادي راډیو ته وویل چې د هوایي او پلیو ځواکونو د عملیاتو پر مهال په تېرو ۲۴ ساعتونو کې دا طالبان په دهراود ولسوالۍ کې وژل شوي او ۱۱ تنه یې ټپیان شوې هم دي.

طالبانو تر اوسه په دې اړه څه نه دې ویلي.

جوزجان کې ٧ لوبغالي جوړ او ګټې اخیستنې ته وسپارل شول

په جوزجان ولایت کې ٧ لوبغالي جوړ او ګټې اخیستنې ته وسپارل شول.

په دغه ولایت کې د اکټیډ دفتر مسول امان الله امین ازادي راډیو ته وویل چې دغه میدانونه د منډې وهلو، باسکټبال، والیبال او فوتسال دي.

ښاغلی امین زیاتوي چې څلور میدانونه په مرکز شبرغان، دوه په اقچې او یو یو په خانقاه او خواجه دوکوه ولسوالیو کې جوړ شوي چې درې میلیونه افغانۍ لګښت پرې راغلی دی.

کابل کې د سنوکر اووم پړاو سیالۍ پیل شوې 

آرشیف، عکس تئزیني بڼه لري

په کابل کې نن سې شنبه (د لېندۍ ۱۱مه) د سنوکر اووم پړاو سیالۍ پیل شوې.

د ملي المپیک کېمټې له لوري په خپره شوې اعلامیه کې ویل شوي چې په دغو سیالیو کې له ١٢ ولایتونو ١٣٢ لوبغاړو ګډون کړی وو او هدف یې د سنوکر ملي ټیم لپاره د غوره څېرو معرفي کول دي.

په اعلامیه کې راغلي چې په سټنډرډ او معیاري ډول دغه سیالۍ به ٧ ورځې دوام وکړي.

د نړۍ د موټر ځغاستې د فورمول اتل "همیلټون" په کرونا ویروس اخته شو

لویس همیلټون

د نړۍ د موټر د ځغاستې د فورمول یو اتل لویس همیلټون په کرونا ویروس اخته شوی دی.

همیلټون به اوس د اونۍ په پای کې په بحرین کې د موټر د ځغاستې په وروستیو لوبو کې له ګډون کولو بې برخې شي.

د همیلټون د کرونا ازموینه تېره اونۍ درې ځله وشوه او هرځل منفي وه، خو د دوشنبې په سهار ده له خوبه تر راویښېدو وروسته د کرونا ويروس نښې لرلې او چې کله یې معاینات وشول، ټسټ یې مثبت و.

پنځه دېرش کلن همیلټون په وروستیو کې د فورمول یو موټرو اتلولي د اووم ځل لپاره خپله کړه چې دا په نړۍ کې بیسارې ده.

تېر کال ټوله نړۍ کې ١٢ ميليونه کسان پر ايډز اخته شوي

آرشیف

د ایډیز نړیواله ورځ نن په داسې وخت کې لمانځل کېږي، چې په نړۍ کې یو مخ متفاوته وبا خپره شوې ده.

د ایچ ای وي او ایډز لپاره د ملګرو ملتو اجراییي مشره وایي، د خلکو باید د ایچ ای وي تجربه په یاد وي چې دوی د کويډ١٩ ناروغۍ د واکسین ژمنې کوي او ډاډ ورکوي چې دا یوازې د بډایه خلکو لپاره نه دی.

واني بینیما په یوه بیان کې وویل، چې نړۍ باید له هغې تیروتنې زده کړه وکړي چې د ایچ ای وي په وخت په میلیونونه کسان په مخ په وده هېوادونو کې درملنې ته د انتظار لپاره مړه شول.

د ملګرو ملتو د راپور له مخې چې تېره اونۍ یې خپور کړ، پروسږکال دولس میلیونه کسان چې په ایچ ای وي اخته وو درملنه یې ترلاسه نه کړه.

په ټوله نړۍ کې تر اته دېرش میلیونه ډېر کسان اوس په ایچ ای وي اخته دي.

د اتیایمې میلادي لسیزې له پیله چې د ایډز ناروغي پیل شوې ده تر اوسه یې په نړۍ کې نږدې درې دېرش میلیونه کسان وژلي دي.

له نولس سوه اته اتیایم کال راهیسې د ایډز نړیواله ورځ هر کال د ډسمبر په لومړۍ لمانځل کېږي.

چارواکي: د سمنګان - بغلان پر لاره ٢ مخالف وسله وال وژل شوي

آرشیف

د بغلان پولیس وایي، د سمنګان-بغلان د لارې په اوږدو دوه تنه مخالف وسله وال وژل شوي او شپږ تنه ټپیان شوې دي.

د بغلان د امنیه قومانداني ویاند احمد جاوید بشار ازادي راډیو ته وویل، پر دې کسانو امنیتي ځواکنو پرون ناوخته هغه وخت برید وکړ چې دوی د مسافرو له موترو پیسې اخیستې.

د بغلان-سمنګان لاره په شمال کې یوه له ناامنه لارو څخه ده.

د ناټو د غړو هېوادونو بهرنیو چارو وزیران غونډه کوي

د ناټو بيرغ

د ناټو د بهرنیو چارو وزیران نن د ویډیو کنفرانس له لارې غونډه کوي.

دا دوه ورځنۍ غونډه په داسې حال کې پیلېږي، چې د دغه پوځي تړون ماموریت په افغانستان کې ستونزمن شوی دی، ځکه چې د دې تړون مهم غړی د امریکا متحد ایالات غواړي چې د جنوري تر پنځلسمې له خپلو څلور نیم زره پوځیانو څخه دوه زره له افغانستانه وباسي.

د ناټو سرمنشي ینس ستولتنبرګ تر غونډې یوه ورځ مخکې وویل: "هیڅوک نه غواړي چې په افغانستان کې تر اړتیا زیات پاتې شي، په راتلونکو میاشتو کې به خپل حضور حالاتو ته په کتو وارزوو، په یوه سخته دوه لارې کې یوو."

ښاغلي ستولتنبرګ زیاته کړه، که ځواکونه له افغانستانه باسي، دا خطر شته چې دا سیمه د نړیوالو ترهګرو په پناهځای بدله شي او که پاتې شي دا وېره شته چې یو اوږد ماموریت به یې له شخړو سره مل وي.

امریکایي ځواکونه د ناټو د پوځیانو هوایي ملاتړ کوي او د ترانسپورت او لوژیستیک په برخو کې مرسته ورسره کوي.

ناتو په افغانستان کې اوس نژدې یولس زره سرتیرې لري.

ميدان وردګ چارواکي: طالبانو نيول شوي پاتې ١١ کسان خوشې کړل

آرشیف

د میدان وردګ چارواکي، د هغو پاتې یولسو کسانو د خوشې کېدو خبر ورکړی چې شاوخوا یوه اونۍ وړاندې له خپلو نورو ملګرو سره وسله والو کسانو له ځانه سره بیولي وو.

د میدان وردګ د والي ویاند محب الله شریفزي نن سهار آزادي راډیو ته قومي مشرانو د دغو کسانو په خوشې کېدو کې رول لوبولی دی.

هغه زياتوي: "تېره شپه د میدان وردګ ولایت د علماوو ، قومي مشرانو او مخورو په منځګړیتوب او ولایتي اداري په هڅو پاتې یوولس کسان هم له خپلو کورنیو سره یوځای شول."

د لیندۍ پر ۵ نېټه د میدان وردګ په جلریز ولسوالۍ کې ټول ۲۸ کسان چې کابل ته روان وو ، د وسله والو کسانو لخوا له موټره ښکته شوي وو چې یوه ورځ وروسته یې د قومي مشرانو په هڅه ۱۷ تنه خوشې شوي وو.

د دغه ولایت چارواکي وايي، دا ټول برمته شوي ملکي وګړي وو چې طالبانو نامعلومه ځای ته بیولي وو خو طالبانو تر اوسه د دې ادعا ځواب نه دی ویلی.

د ډونالډ ټرمپ يوه سلاکار استعفا وکړه

سکاټ اتلاس

هغه ډاکټر چې د کرونا ویروس د خطر د څرنګوالي په اړه یې د امریکا اوسني ولسمشر ډونالډ ټرمپ ته مشورې ورکولې، له دندې استعفی وکړه.

ولسمشر ټرمپ ته د ډاکټر سکاټ اتلاس مشورې په سپینې ماڼۍ کې د کرونا ویروس پر ضد د مبارزې ټیم له نظریو سره په ټکر کې وې.

نوموړي د کرونا ویروس د خپرېدو د کنټرول لپاره د قرنطین مودې پر اوږدولو، د ښونځیو پر تړلو او د ماسک اغوستلو پر اهمیت شک ښوده.

د امریکا د ساري ناروغیو وتلي متخصص انتونیو فوچې د ډاکټر اتلاس پر هغو معلوماتو انتقاد کاوه چې ولسمشر ټرمپ ته یې ورکول.

ښاغلي فوچي، هغه معلومات ناسم او ګمراه کوونکي بلل.

اتلاس د اعصابو ډاکټر وو او په پرله پسې ډول یې د ماسک اغوستل بې اهمیته ښودل.

ډاکټر اتلاس پر ټویټر د یوه لیک په خپرولو سره چې د ډسمبر لومړۍ نېټه ورکړل شوې وه، ولسمشر ته د خپلې استعفی د پرېکړې په اړه وویل.

نوموړي، چې ویل کېږي د عامي روغتیا او ساري ناروغیو په برخه کې یې رسماً تجربه نه درلوده ، څلور میاشتې د ولسمشر د سلاکار په توګه کار کړی او د موقت قرارداد نېټه یې روانه اونۍ ختمېدله.

نور راوښيه

XS
SM
MD
LG