د لاسرسۍ وړ لېنکونه

تازه خبر
سه شنبه ۴ لیندۍ ۱۳۹۹ کابل ۰۳:۰۳

خبرونه

د سولې ولسي حرکت غړي د(لړم ۱۶مه) د امریکا سفارت مخې ته خیمه دروي

د سولې ولسي حرکت غړي سبا جمعه(د لړم ۱۶مه) په کابل کې د امریکا سفارت مخې ته خیمه دروي. دوی نن پنجشنبه (د لړم ۱۵مه) له ننګرهار څخه کابل ته ورسېدل.

ددې حرکت مشر اقبال خیبر وايي، له ننګرهار څخه د ګڼ شمېر قومونو مشران له دې حرکت سره یوځای شوي او سبا به د امریکا سفارت مخې ته د پرلت خیمه ودروي.

ښاغلی اقبال وايي، دوی سبا د امریکا سفارت مخې ته له دغه هېواد څخه په افغانستان کې د اوربند غوښتنه کوي.

د هغه په خبره، افغان حکومت او طالبان دې د جګړې د درېدو لپاره له سخت دریځۍ څخه لاس واخلي او د افغان وژنې روانه لړۍ دې ودروي.

د ننګرهار یو شمېر قومي مشران چې د دې حرکت سره یوځای شوي وايي، طالبان او افغان حکومت د اوربند په ټینګښت کې پاتې راغلي او اوس دې امریکا په دې برخه کې لاس په کار شي.

دوی همدا راز له ښکېلو خواوو د تاوتریخوالي د کمېدو غوښتنه هم وکړه.

ددغه حرکت غړي په داسې حال کې کابل ته رسیدلي چې د خپاره شویو راپورونو پر بنسټ د جګړې د ښکېلو خواوو له لوري د تاوتریخوالي کچه له پخوا ډېره شوې.

د ورځې تازه خبرونه دلته ولولئ

په پاکستان کې ښوونیزې ادارې به یوه میاشت نور هم بندې وي

پاکستان کې د یوه ښوونځي زده کوونکي

په پاکستان کې به د زده کړې موسسې په دې هېواد کې د کرونا وبا د زیات خپراوي له امله څه باندې یوه میاشت نورې هم بندې وې.

د پاکستان د ښوونې وزیر شفقت محمود نن د ایالتونو د ښوونې له وزیرانو سره تر غونډې وروسته په اسلام آباد کې په یوه خبري کنفرانس کې وویل چې زده کونکي به د ژمنیو لسو ورځو رخصتیو له پیلېدو مخکې د ډسمبر تر ۲۴ مې پورې، له کوره په انلاین بڼه زده کړې مخ ته وړي.

هغه وویل، د جنوري د میاشتې په لومړۍ اونۍ کې به وضعیت بیا وڅېړي او هیله من دي چې وکولای شي د جنوري له یولسمې د ښوونې موسسې بېرته پرانېزي.

په پاکستان کې د کرونا نږدې ۳۷۷ زره مثبتې پېښې ثبت شوي او له امله یې نږدې ۷۷۰۰ کسان مړه شوي دي.

اسټرازینیکا شرکت: جوړ شوی واکسین د "کویډ۱۹" پر وړاندې ۹۰ سلنه اغېزمن دی

استرازینیکا شرکت له لوري جوړ شوی واکسین

د کرونا یروس پر وړاندې د واکسینونو د جوړولو د هڅو په ترڅ کې اسټرازینیکا شرکت وایي، جوړ شوی واکسین یې د کرونا ویروس پر وړاندې تر نوي په سلو کې اغېزمن دی.

تر اوسه له ۵۸ میلیونو زیات وګړي په نړۍ کې پر کرونا اخته شوي او نږدې یو ملیون څلور لکه یې له امله مړه شوي دي.

د اکسفورډ له خوا جوړ شوي د دغه واکسین د لومړنیو آزموینې په نتیجه کې چې نن خپرې شوې معلومه شوي چې د یوې میاشتې په موده کې لومړی د دغه ویروس نیمایي او بیا بشړ دوزه د کرونا ویروس پر وړاندې په سلو کې نوي اغېز درلودلی دی.

تردې مخکې د امریکایي فیزر او مودیرنا کمپنیو له خوا جوړو شویو واکسینونو ښودلې چې له کرونا څخه د خوندي کېدو اغېزمنتوب یې په سلو کې څه باندې ۹۰ دی.

په برلین کې د ایران د ۲۰۱۵ کال د اټومي تړون په اړه خبرې کېږي

نتنز اټومي تاسیسات

د جرمني، بریتانیا او فرانسې د بهرنیو چارو وزیران به نن په برلین کې په غونډه کې د ایران د ۲۰۱۵ کال د اټومي تړون په اړه خبرې وکړي.

دا غونډه څوورځې وروسته تردې جوړېږي چې د ملګروملتونو د اټومي انرژې د څارنې ادارې وویل چې تهران بیا له دغه تړون څخه سرغړونه کړې ده.

د جرمني د حکومت یوې ویاندې وویل، له خپلو شریکانو سره په ګډه به له ایرانه وغواړو چې له دغه تړونه نور سرغړونې ونه کړي او بېرته په کې کړو ژمنو ته ور وګرځي.

د ملګروملتونو د اټومي څارنې ادارې د نومبر په اتلسمه ویلي وچې د ایران ترځمکې لاندې مهمو د نتنز په اټومي تاسیساتو کې د یورانیمو د پخولو سنټریفیوژیونه فعال شوي دي.

د اسراییل صدراعظم په پټه سعودي کې له محمد بن سلمان او پومپیو سره کتلي

د عکس ښي لور ته د اسراییل صدراعظم او چپ لور ته د امریکا د بهرنیو چارو وزیر مایک پومپیو

د اسراییل د یو شمېر رسنیو د راپورونو له مخې د اسراییل صدراعظم بینامین نتانیاهو پرون یکشنبې په پټه له سعودي عربستان څخه کتنه ترسره کړې او د هغه هېواد له ولیعهد محمد بن سلمان او د امریکا د بهرنیو چارو له وزیر مایک پومپیو سره کتلي دي.

د اسراییل کان عامه راډیو ته اسراییلي چارواکو چې نومونه یې نه دي په ډاګه شوي، تایید کړې چې نتانیاهو او د اسراییل د جاسوسۍ د ادارې موساد مشر یوسي کوهین د سعودي د سره سمندرګي په غاړه نیوم ښار کې له محمد بن سلمان او مایک پومپیو سره خبرې کړې دي.

د اسراییل یو شمېر نورو رسنیو هم ورته خبر ورکړی دی.

د اسراییل د ښوونې وزیر یواو ګالانت نن دوشنبې په سعودي عربستان کې د نتانیاهو کتنه تایید کړه او هغه یې یوه فوق العاده لاس ته راوړنه وبلله.

ګالانت د اسراییل د پوځ راډیو ته وویل چې دا حقیقت لري چې دغه غونډه شوې.

د ده په وینا که څه هم هغه نیمه رسمي و خو اهمیت یې ډير زیات دی.

د نتانیاهو دفتر او په بیت المقدس کې د امریکا سفارت تراوسه د دغو راپورونو په اړه څرګندونې نه دي کړي.

که دا مسئله تایید شي دا به سعودي عربستان ته د اسراییل د یوه صدرعظم لومړنی سفر وي.

د دغې کتنې په اړه خبرونه داسې مهال خپرېږي، چې اسراییل په خلیج کې د سعودي عربستان له دوو متحدینو، متحده عربي اماراتو او بحرین سره د اړیکو د عادي کېدو تاریخي موافقې کړې دي.

تر ډېره د ایران په اړه اندېښنې له عربي هېوادونو سره د اسراییل د اړیکو عادي د کېدو چې د امریکا د ولسمشر ډونالډ ټرمپ ادارې یې منځګړیتوب کړی، محور جوړوي.

یونیسف: راتلونکى کال ۹۲ هېوادونو ته د کرونا دوه میلیارډ ډوزه واکسین لېږو

ارشيف

د ملګرو ملتونو د ماشومانو د ملاتړ اداره یونیسف وایي، په پام کې لري چې راتلونکی کال د ودې په حال کې ۹۲ هېوادونو ته د کرونا دوه میلیارډ ډوزه واکسین او یو میلیارډ سورنجونه یا ستنې ولیږي.

یونیسف، چې د نړۍ په کچه د واکسین پېرلو تر ټولو لویه اداره ده، هر کال نږدې سلو هېوادونو کې د ویروسونو د خپرېدو د مخنیوي او د کتلوي معافیت په هدف څه باندې دوه میلیارډ ډوزه واکسینونه پېري.

د ودې په حال کې هېوادونو ته په دغه شمېر د کرونا واکسین لېږل اسانه هم نه دى، خو یونیسف وایي، چې له بار وړونکو په سلګونو هوایي او سمندري شرکتونو او د لوجستیک له نړیوالو شریکانو سره په دې برخه کې کار کوي.

په عین حال کې د نړۍ د لویو شلو اقتصاد لرونکو هېوادونو مشرانو د ریاض په سرمشریزه کې ژمنه وکړه چې هیڅ ډول هڅه به ونه سپموي څو دا مسئله یقیني شي چې د کوویډ۱۹ ناروغۍ پر وړاندې واکسین ټولو خلکو ته یوشان ورسېږي او د هغو هېوادونو، چې د کرونا خپرې شوې وبا یې اقتصادونه ډېر ځپلي، لاس نیوی وشي.

د امریکا او اروپا د درمل جوړولو یو شمېر لویو شرکتونو له دې وړاندې ویلي چې د کرونا ضد واکسینونه یې په پراخه پیمانه تولید ته نږدې شوي دي.

د امریکایي فیزر او مودیرنا کمپنیو له خوا جوړو شویو واکسینونو ښودلې چې له کرونا څخه د خوندي کېدو اغېزمنتوب یې په سلو کې څه باندې ۹۰ دی.

"د ۲۰۰۵ او ۲۰۱۹ کلونو ترمنځ تر ۲۶ زرو زیاتو ماشومانو ته مرګ ژوبله اوښتې"

ارشيف

د ملګروملتونو د ماشومانو د ملاتړ اداره یونیسف وایي، له ۲۶ زرو زیات ماشومان په افغانستان کې د ۲۰۰۵ او ۲۰۱۹ کلونو ترمنځ جګړو کې مړه یا ټپیان شوي دي.

یونیسف دا خبره په هغه راپور کې چې نن دوشنبې یې خپور کړی کړې او ویلي یې دي چې یوازې تیر۲۰۱۹ کال ۸۷۴ ماشومان په افغانستان کې وژل شوي او ۲۲۷۵ ټپیان شوي دي.

یونیسف وایي، دا په نړۍ کې د جګړو په سیمو کې د ټولو وژل شویو او معلول شویو ماشومانو په سلو کې دیرش دی.

د راپورپه اسناد دغه ماشومان د حکومتي ځواکونو او د وسله والو مخالفانو ترمنځ مخامخ جګړو په نتیجه مړه یا ټپیان شوي دي.

د افغانستان لپاره د ملګروملتونو مرستندویه ماموریت یوناما په وروستي راپور کې ویلي چې د روان کال په لومړیو شپږو میاشتو کې ټول ټال ۵۹۳۹ کسان وژل شوي یا ټپیان شوي چې په سلو کې څه باندې ۳۰ یې ماشومان دي.

فیلیپو ګراندې: نړیواله ټولنه دې له افغانستان سره مرستو ته دوام ورکړي

د کډوالو په چارو کې د ملګروملتونو د عالي کمېشنرۍ مشر فیلیپو ګراندې

د کډوالو په چارو کې د ملګروملتونو د عالي کمېشنرۍ مشر فیلیپو ګراندې له نړیوالې ټولنې غوښتي چې له افغانستان سره دې مرستو ته دوام ورکړي کنه نه د ورانونکو عواقبو له خطر سره به مخ شي.

ګراندې په یوه خپره کړې خبرپاڼه کې وویل، د میلیونونو افغانانو راتلونکې په دې هېواد کې د سولې د خبرو په نتیجې او د دې هېواد د پرمختیا لپاره د جنیوا د دوه ورځني کنفرانس په ګډون د نړیوالې ټولنې د ملاتړ پر ژمنو پورې تړلې ده.

ګراندې دغه راز خبرداری ورکړ چې که په هره برخه کې هڅې ناکامه شي نوپه لویه پیمانه به د خلکو د بې ځایه کېدو په ګډون د دې هېواد لپاره ورانونکې نتیجې ولري.

هغه وویل چې روان کال په افغانستان کې د ننه د شخړو له امله نږدې درې لکه کسان بې ځایه شوي چې عاجلو بشري مرستو ته اړتیا لري.

اتمر: د سولې ټینګښت د افغانستان د دولت لپاره ستر لومړیتوب دی

محمد حنیف اتمر

د افغانستان د بهرنیو چارو وزیر محمد حنیف اتمر د جنیوا کنفرانس ته په پرانستونکې وینا وویل چې د سولې ټینګښت د افغانستان د دولت لپاره ستر لومړیتوب دی.

هغه زیاته کړه: "په جنیوا کې د افغانستان د کنفرانس پر مهال چې له نړیوالې ټولنې سره د افغانستان د دوامداره مشارکت یوه مهمه غونډه ده، تر پایداره سولې جوړونې پرته په کومې بلې مهمې فکر نه شم کولای، سوله اوس وخت په اساسي توګه له سیمه ییزو او نړیوالو متحدینو سره د مشارکت په برخه کې د افغانستان په یوه مهمه تګلاره بدله شوې ده."

ښاغلي اتمر د سولې د لومړیتوب خبره داسې مهال کوي چې د طالبانو او افغان دولت د مرکچي پلاوو ترمنځ له شاوخوا دونیمو میاشتو راهیسې پیل شویو خبرو تراوسه د پام وړنتیجه نه ده ورکړې او هغه په ټپه درېدلي ښکاري.

له افغانستان سره د جنیوا په دغه لوی مرستندویه کنفرانس کې به چې سبا به هم دوام کوي او د نړۍ د شاوخوا اویا هېوادونو او نړیوالو سازمانونو استازیو حضوري یا په انلاین بڼه ګډون کړې، تر۲۰۲۴ کال پورې له دې هېواد سره د ملیارډونو ډالرو نویو مرستو ژمنې وکړي.

ټاکل شوې چې افغان ولسمشر اشرف غني هم سبا دې کنفرانس ته مجازي وینا وکړي.

جوبایډن "انټوني بلینکن" د امریکا د بهرنیو چارو وزیر په توګه نوموي

انټوني بلینکن

د امریکایي رسنیو د راپورونو له مخې تمه ده چې د امریکا منتخب ولسمشر جوبایډن به د خپلې اوږدې مودې سلاکار او باتجربه ډیپلوماټ انټوني بلینکن د بهرنیو چارو د وزیر په توګه ونوموي.

که هغه دې چوکۍ ته ونومول شي او سنا یې هم تایید کړي، د بلینکن دنده به د امریکا د اوسنۍ ولسمشر ډونالډ ټرمپ له څلورکلنې دورې وروسته چې شعارې یې و، لومړۍ امریکا او دغه پالیسي یې له نړیوالو سازمونود لیرې والي او له خپلو متحدانو او رقیبانو سره د یوشان نښتو ښکارندوي کوله، د امریکا د ډیپلوماسۍ او نړیوالو اړیکو بیا احیا کول وي.

تمه ده چې بایډن به سبا د خپلې کابینې یو شمېر غړي اعلان کړي.

ویل کېږي، بایډن به جک سولیوان چې د امریکا د بهرنیو چارود پخوانۍ وزیرې هیلري کلینټن نږدې همکارو، خپل د ملي امنیت د سلاکار په توګه ونوموي.

بایډن د خپلې راتلونکې ادارې اساس داسې مهال ږدي چې د هغه سیال اوسنی ولسمشرډونالډ ټرمپ ډیره هڅه کوي چې د نومبرد دریمې د ولسمشرۍ د ترسره شویو انتخاباتو نتیجه چې بایډن یې ګټونکی اعلان شوی، باطله کړي.

ټرمپ په دغو انتخاباتو کې خپله ماتې تراوسه نه ده منلې.

ګاسمن: نړیوال مرستندویان دې د افغانانو لومړیتوب ته پام وکړي

پاتریشیا ګاسمن

د بشر د حقونو د څار سازمان هیومان رایټس واچ د افغانستان په نړیوالو مرستندویانو غږ کړی چې له دې هېواد سره د کېدونکو مرستو په ژمنو کې باید دې ته لومړیتوب ورکړي چې بسپنې یې د ښوونې او روغتیا په تېره بیا د نجونو او ښځو لپاره په خدمتونو او خپلواکو رسنیو ولګېږي.

د بشر د حقونو دغه نیویارک میشتي سازمان دا غوښتنه د افغانستان په اړه د جنیوا له کنفرانس سره چې ټاکل شوې نن پیل شي، په یوه وخت کړې ده.

پاتریشیا ګاسمن چې د دې سازمان د آسیا د چارو مشره ده، ویلي چې د جنیوا کنفرانس یو مهم فرصت دی چې په افغانستان کې د بشري حقونو په برخه کې شوي پرمختګونه خوندي او عامو افغانانو په تېره بیا ښځو او نجونو ته د دې زمینه برابره شي چې پراخې آزادي ولري اوله ښې ښوونې او روغتیایي خدمتونو برخمنې شي.

ګاسمن ټینګار کړی چې په دې هېواد کې د جګړې د پای ته رسېدو لپاره د سولې روانې خبرې باید د دې لامل نه شي چې نړیوال د افغانستان له ترټولو ډېرو زیانمنونکو ټولنو سره مرستې کمې کړي.

د هغې په وینا د افغانستان راتلونکې، د یوه سوله ییزاو حقونو ته په درناوي ولاړهېواد په توګه په دې پورې تړلې چې دا هېواد لوستی او سالم نفوس ولري.

د افغانستان حکومت هیله من دی چې د جنیوا په دغه دوه ورځني کنفرانس به نړیوال بسپنه ورکونکي له دې هېواد سره د راتلونکو څلورو کلونو په مخه د میلیارډونو ډالرو نویوو مرستو ژمنې وکړي.

دغه کنفرانس چې د افغانستان، فنلنډ او ملګروملتونو په ګډ مشرتابه ترسره کېږي په کې له څه باندې د اویاوو هېوادونو او نړیوالو سازمانونو استازي حضوري او په انلاین بڼه ګډون کوي.

کلیفورنیا کې د چړو په ګوازرونو ۲ کسه وژل شوي

ارشیف

د امریکا د کلیفورنیا ایالت د سان هوزي په یوه کلیسا کې دوه تنه د چړو د ګوزارنو په نتیجه کې مړه شوي دي.

د سان هوزي د پولیسو دفترپه یوه ټویټ کې ویلي چې دا پېښه په دې کلیسا کې پرون یکشنبې د ورځې ناوخته وشوه او پولیس هم په وخت د پېښې ځای ته ورسېدل.

پولیس وایي چې په دې پېښه کې یو زیات شمېر کسان ټپیان شوي چې د ځنیو روغتیایي وضعیت یې خطرناک دی.

پولیسو داهم ویلي، چې په کلیسا کې مذهبي مراسم نه وو، بلکې ډېرو هغو کسانو چې کورونه نه لري، ورته د دې لپاره پناه وروړې وه چې له یخنۍ ځان وژغوري.

د دې پېښې د څرنګوالي په اړه تراوسه نورجزییات نه دي څرګند شوي.

د کوچنیو متشبثاتو او ځوانو کارموندونکو د ملاتړ هڅې ګړندۍ شوي

ارشيف
د افغانستان د صنعت او سوداګرۍ وزارت د کوچنیو متشبثاتو او ځوانو کارموندونکو د ملاتړ په موخه پنځه کلن پروګرام اعلان کړ.

د دغه وزارت ویاند جواد دبیر ازادي راډیو ته وویل چې دغه پلان پنځه ستراتیژیکې برخې رانغاړي چې په کې بنسټیزې برخې، بازارونو ته لاسرسی، مالي ملاتړ، نوې ټکنالوجۍ ته لاسرسی او ظرفیت لوړونه شاملې دي.

نوموړي وویل، چې دوی به ځوانان وهڅوي څو په لږه پانګونه بریالی کسب او کار جوړ کړي.

د صنعت او سوداګرۍ وزارت وایي، دوی د وړو متشبثاتو او ځوانو کارموندونکو لپاره د ملاتړ یو کلن او دوه کلن پروګرامونه په پام کې نیولي دي چې له مخې به یې لازمې اسانتیاوې ورته برابرې شي.

د راپورنو له مخې نن سبا په افغانستان کې ۵۲ سلنه خلک چې ډېری یې ځوانان دي د بې روزګارۍ له ستونزې سره مخ دي.

یونېسف ۹۲ مخ پر ودې هېوادونو ته د کرونا ویروس ضد واکسین لېږي

ارشیف، د کرونا ویروس ضد واکسین

یونېسف پلان لري چې راتلونکی کال ۹۲ مخ پر ودې هېوادونو ته د کرونا ویروس ضد دوه میلیارده ډوزه واکسین او یو میلیارد سورنجونه ولېږي.

د ملګرو ملتونو د ماشومانو د ملاتړ اداره (یونېسف) د نړۍ په کچه د واکسین اخیستلو تر ټولو لویه اداره ده.

دغه اداره هر کال نږدې ۱۰۰ هېوادونو کې د ویروسونو د خپرېدو د مخنیوي په هدف دوه میلیارده ډوزه واکسینونه اخلي.

مخ پر ودې هېوادونو ته د کرونا واکسین په دومره شمېر کې لېږد یوه ننګونه ده، خو یونېسف وایي، د بار وړلو له سلګونه هوایي او سمندري شرکتونو او د لوجستیک له نړیوالو شریکانو سره په دې برخه کې کار کوي.

په ریاض کې د جي شل هېوادونو غونډه کې هم د کرونا پر ضد د مبارزې پر لارو چارو خبري وشوې او ژمنه وشوه چې د واکسین لپاره به‌یې هېڅ ډول هڅې ونه‌سپمول شي.

د امریکا او اروپا د درملو جوړولو یو شمېر لویو شرکتونو له دې وړاندې ویلي چې د کرونا ضد واکسینونه‌یې جوړ او ازمویلي دي.

د امریکا برحاله ولسمشر ډونالد ټرمپ هم ویلي چې د راتلونکي کال تر اپرېل میاشتې پورې به دغه واکسین په پراخه کچه تولید شي.

میکداد فیصل د سوریې د بهرنیو چارو وزیر شو

فیصل میکداد (ښی) او د سوریې ولسمشر بشارالاسد

د سوریې د بهرنیو چارو وزارت مرستیال میکداد فیصل د سوریې د بهرنیو چارو وزیر شو.

میکداد چې با تجربه ډیپلوماټ بلل شوی د ولید المعلم ځای نیولی. المعلم تېره اوونۍ ومړ.

۶۶ کلن فیصل میکداد له ۲۰۰۶ کال راهیسې د سوریې د بهرنیو چارو وزارت د مرستیال په توګه دنده ترسره کوله.

جوبایډن د خپلې کابینې یو شمېر وزیران اعلانوي

د امریکا متحده ایالاتو منتخب جمهور رئیس جوبایډن

تمه ده چې سبا د امریکا منتخب جمهور رئیس جوبایډن د خپلې کابینې یو شمېر وزیران اعلان کړي.

دا خبره پرون د بایډن ستر سلاکار ران کلین اې بي سي ټلوېزیون ته کړې، خو د کاندید وزیرانو نومونه‌یې نه‌دي اخیستي.

روېټرز خبري اژانس هم د بایډن د ځینو نږدې متحدینو په حواله ویلي چې ښايي په همدې اوونۍ کې د بهرنیو چارو نوماند وزیر معرفي کړي. وړاندوینې داسې دي چې د امریکا د ملي امنیت پخوانۍ سلاکاره سوزان رایس او یو بل با تجربه ډیپلوماټ انتوني بلینکن تر نورو زیات د بهرنیو چارو د وزارت چانس لري.

کاندید وزیران باید د سنا باور رایه خپله کړي.

نور راوښيه

XS
SM
MD
LG