د امریکا ولسمشر ډونالډ ټرمپ تایید کړه چې د روسیې له ولسمشر ولادیمیر پوتین سره یې د اوکراین د جګړې د پای ته رسولو په اړه ټیلیفوني خبرې کړې دي.

ده وویل، نه غواړي څرګنده کړي چې دا خبرې یو ځل شوي او که څو ځله، او د مشخصې نېټې یادونه یې هم ونه کړه.

ښاغلي ټرمپ "نیویارک پوسټ" ورځپاڼې ته وویل چې د جګړې د پای ته رسولو لپاره مشخصه طرحه شته، خو نور جزییات یې ورنه کړل.

وروستی ځل چې د امریکا یوه ولسمشر له خپل روسي سیال سره خبرې کړې وې، درې کاله وړاندې د روسیې د یرغل تر پیل لږ مخکې و، کله چې جو بایډن له پوتین سره خبرې وکړې، خو پوتین بیا هم پر اوکراین برید وکړ.

د کرملین ویاند، دیمتري پسکوف، د یکشنبې په ورځ (د سلواغې ۲۱ مه) وویل چې د ولادیمیر پوتین او ډونالډ ټرمپ ترمنځ د ټیلیفوني خبرې نه تاییدوي او نه یې ردوي.

ډونالډ ټرمپ په تېرو دریو کلونو کې څو ځلي ویلي چې که دی په واک کې پاتې وای، روسیې به هېڅکله پر اوکراین برید نه وای کړی.

نوموړي د خپل انتخاباتي کمپاین پر مهال ژمنه کړې وه چې که واک ته ورسېږي، په یوه ورځ به د روسیې او اوکراین جګړه پای ته ورسوي.

د غزې د اوربند د موافقې له مخې، اسراییلي ځواکونه به د غزې د تړانګې له مرکزي لارې، د نتساریم له دهلیزه، شاتګ وکړي.

د اوربند د موافقې له مخې، اسراییلي ځواکونه باید د اوربند په یوویشتمه ورځ ووځي.

اسراییلي رسنیو راپور ورکړی چې د دغو ځواکونو شاتګ له تېرې شپې (د یکشنبې، د سلواغې ۲۱مې، د سهار لومړیو ساعتونو) راهیسې روان و او تمه ده چې تر نن (یکشنبې) سهاره به بشپړ شوی وي.

د اسراییلي پوځ له خوا تر اوسه په رسمي ډول د دې شاتګ په اړه څه نه دي ویل شوي.

اسراییلي پوځ د نتساریم دهلیز شمالي برخه تیره اوونۍ پرېښوده، او فلسطیني کډوالو ته اجازه ورکړل شوې وه چې د غزې تړانګې شمال ته ستانه شي.

سره له دې، اسراییلي ځواکونه لا هم اسراییل ته په نژدې سیمو کې حضور لري.

د ایران د بهرنیو چارو وزیر عباس عراقچي وایي، ایران چمتو و چې له متحدو ایالتونو سره خبرې وکړي خو نه د ولسمشر ډونالډ ټرمپ د سختې ستراتیژۍ تر فشار لاندې.

ښاغلي عراقچي د شنبې په ورځ پر ټلګرام چینل په یوه بیان کې وویل چې د خبرو لپاره اړتیا ده چې بندیزونه لیرې شي، خو نه دا چې هغه دې د سختې ډیپلوماسۍ تر فشار لاندې ترسره شي چې د هغه په خبره دا به د تسلیمۍ په معنا وي.

د ایران د بهرنیو چارو وزیر دغه څرګندونې وروسته له هغې کوي چې د ایران ستر مشرایت الله علي خامنه یي له حکومت څخه وغوښتل چې له واشنګټن سره خبرې ونه کړي او دا ډول یوه تګلاره یې بې پروایي وبلله.

د امریکا ولسمشر ډونالډ ټرمپ د چهارشنبې په ورځ له ایران سره د تایید شوي سوله ییز اټومي تړون غوښتنه وکړه او زیاته یې کړه چې ایران باید اتومي وسلې ترلاسه نه کړي. خو تهران تل ټینګار کړی چې اتومي پروګرام یې سوله ییز دی. ولسمشر ټرمپ د جمهوري ریاست په مخکینۍ دوره کې په ۲۰۱۸ کال کې واشنګټن له هغه تړون څخه وایست او پر ایران یې بیرته سخت بندیزونه ولګول چې متحدو ایالتونو، فرانسې، جرمني، بریتانیا، چین او روسیې له ایران سره په ۲۰۱۵ کال کې لاسلیک کړی و.

د لبنان په ختیځ کې پرون (شنبې) د اسراییل په یوه هوایي برید کې شپږ کسان ووژل شول.

د لبنان دولتي خبري آژانس NNA د لبنان په ختیځ کې جنتا ښار ته نژدې په الشعاره سیمه کې د دښمن د بې پیلوټه الوتکې برید یاد کړی او ویلي یې دي چې په نتیجه کې د شپږو کسانو پر وژل کیدو سربیره دوه تنه نور ټپیان شوي دي. د اسراییل پوځ پرون د ورځې په پیل کې وویل چې اسراییلي جنګي الوتکو د لبنان په بقاع سیمه کې د استخباراتي معلوماتو پربنسټ د حزب الله د فعالانو یوځای په نښه کړی و.

پوځ ویلي چې دغه برید وروسته له هغې وشو، چې ترهګرو د تروریستي سازمان اړوند د ستراتیژیکو وسلو د تولید او ذخیرې په دې ځای کې فعالیتونه ترسره کول.

پوځ همدارنګه ویلي چې د اسراییل په وړاندې د هر ډول ګواښونو د له منځه وړلو لپاره به عملیاتو ته دوام ورکړي او د اوربند د توافق له مخې به پرینږدي چې حزب الله بیرته خپل ځواک راټول کړي.

سپینې ماڼۍ ویلي چې د ایران له ملاتړې حزب الله او د اسراییل ترمنځ اوربند چې د تیر کال په نوومبر میاشت کې پرې موافقه شوې وه، د فبرورۍ تر اتلسمې پورې غزیدلی دی.

د اوکراین ولسمشر ولودیمیر زیلینسکي تایید نه کړه چې دی به روانه اوونۍ د امریکا له ولسمشر ډونالډ ټرمپ سره وګوري خو ویې ویل چې دا اوونۍ به د ډیپلوماسۍ یوه ډیره بوخته اوونۍ وي.

ولسمشر ټرمپ د جمعې په ورځ وویل چې دی ممکن روانه اوونۍ له زیلینسکي سره وویني او د کتنې ځای یې هم واشنګټن ښودلی او ویلي و چې کییف ته به لاړنه شي.

د ټرمپ له دې څرګندونو وروسته زیلینسکي وویل چې دوی تل له ولسمشر ټرمپ سره کار کول ستایي او هڅه کوي چې دا اوونۍ هغه کارونه سرته ورسوي چې اغیزمن او ګټور وي.

نوموړي همدارنګه وویل چې د ټیمونو په کچه غونډې پلانوي او په اوس وخت کې د دواړو هیوادونو ټیمونه یې پرجزییاتو کارکوي. زیلینسکي زیاته کړه چې یوه تلپاتې او ټینګه سوله را نژدې ده.

په دې کار سره د شوروي دورې د بریښنا لیږد شبکې څخه چې روسیه، بیلاروس او د روسیې کالینینګراد سیمه سره نښلوي، د دغو دریو هېوادونو ارتباط پرې شو.

د یادو دریو هیوادونو لپاره، چې د شوروي اتحاد له ړنګیدو وروسته د ۱۹۹۰ لسیزې په لومړیو کې د خپلواکو دولتونو په توګه راڅرګند شول او په ۲۰۰۴ کې د اروپایي اتحادیې او ناټو سره یوځای شول، د بریښنا دا شبکه د روسیې سره یوازینۍ پاتې اړیکه وه.

د اروپايي ټولنې درې غړي هېوادونه، لاتویا، لیتوانیا او ایستونیا، د اروپايي برېښنا شبکې سره یوځای کېدو ته چمتو دي، چې د اروپا ډیره برخه پکې شامله ده. د اروپا د بریښنا شبکه په لویدیځ کې له پرتګال څخه په ختیځ کې تر ترکیې او اوکرایین دا هېوادونه پکې نغاړي.

د بالتیک حوزې یاد هېوادونه د اروپا د بريښنا له شبکې سره د لا ښه اتحاد او امنیت په هدف یوځای شوي.

د راشدخان په لوبډلمشرۍ ممبۍ انډینز کېپ ټاون لوبډله د جنوبي افریقا د شل اووریز لیګ اتلولي وګټله.
د کېپ ټاون ټيم د شنبې په شپه د جنوبي افریقا په شل اووریز تجارتي لیګ کې له سنرایزر ایسټرن کپ سره مخ وو.
د راشدخان ټیم خپلې سیالې لوبډلې ته په شلو اوورونو کې د ‍۱۸۲ منډو هدف ټاکلی وو.

ایسټرن کېپ لوبډله هدف ته په رسېدو پاتې راغله. دغه ټیم د ۷۶ منډو په توپیر لوبه وبایلوده او ټول لوبغاړي یې په ۱۰۵ منډو وسوځېدل.

د جنوبي افریقا د شل اووریز تجارتي لیګ کې شامل ټیمونه د هند د کرکټ د غوره لیګ آی پي ایل د لوبډلو د مالکانو دي چې د نړۍ مشهوره لوبغاړي پکې لوبیږي.

په همدې سبب هم د دغو ټيمونو د نومونو په سر کې د هند د غوره لیګ د شاملو ټيمونو نومونه راځي.

د راشدخان تر څنګ په ممبۍ انډینز کېپ ټاون ټيم کې د افغانستان دوه نور لوبغاړي صدیق الله اتل او عظمت الله عمرزی هم لوبېدل.

د ایران سترمشر ایات الله علي خامنه یي نن (د سلواغې ۲۰مه) په تهران کې د فلسطینۍ حماس ډلې له سرپرست مشر خليل الحية او د دې ډلې له دوو نورو چارواکو سره وکتل.

حماس د امریکا او اروپایي ټولنې له خوا د یوې تروریستي ډلې په توګه پیژندل شوې ده. د ایراني رسنیو د راپورونو له مخې د دغې کتنې په اړه نورجزیېات نه دي خپاره شوي خو یوازې له الحية، د حماس د مشرتابه شورا له مشر محمد درویش او د دې ډلې له بل چارواکي نزار عوض الله سره د خامنه یي تصویرونه خپاره شوي دي.

ایران له اسراییل سره په جګړه کې د حماس ملاتړ کړی او دا فلسطینۍ ډله پر منځني ختیځ د اسراییل او لویدیځ د نفوذ پر وړاندې د خپلې پراخې ستراتیژۍ یوه اصلي متحده بولي.

د حماس ډلې مشران له تهران څخه داسې مهال کتنه ترسره کوي چې د دې ډلې پخوانی سیاسي مشر اسماعیل هنیه د ۲۰۲۴ کال د جولای په ۳۱ مه په تهران کې په یوه برید کې ووژل شو.

د راپورونو له مخې نوموړی د دې لپاره تهران ته تللی و، چې د ایران د ولسمشر مسعود پزشکیان د لوړې په مراسمو کې ګډون وکړي.

د اسراییل دفاع وزیر اسراییل کاتز د تیرکال په ډسمبر میاشت کې په ښکاره دا ومنله چې د اسماعیل هنیه په وژلو کې اسراییل لاس درلود.

د خيبر پښتونخوا په بنو کې پرون (د سلواغې ۱۹مه) په دوو بېلا بېلو بريدونو کې د دوو پوليسانو په ګډون پينځه تنه وژل شوي او پينځه نور ژوبل شوي دي.

د بنو د پوليسو وياند حنظله نن مشال راډيو ته وویل چې وسله والو تېره شپه ناوخته د بنو د فتح خېل سیمې د پولیسو پر تاڼې بريد وکړ چې په نتيجه کې يې دوه پوليس سرتيري وژل شوي او دري نور ژوبل شوي دي.

ځايي اوسیدونکو او پوليس چارواکو همداراز وویل چې د وسله والو په یوه بل برید کې چې د بنو ګربز په سيمه کې یې د امن کميټۍ دفتر په نښه کړی و، دري کسان وژل شوي او دري نور ژوبل شوي دي.

د دې کميټۍ يوه غړی د نوم نه خپرولو په شرط د آزادۍ راډیو مشال څانګې ته وويل چې له ۳۰ تر ۴۰ پورې وسله والو د دوی پر دفتر بريد کړی و.

د دواړو بريدونو مسولیت تراوسه پورې کوم کس یا وسله والې ډلې نه دی منلی خو په سیمه کې د تحریک طالبان پاکستان په ګډون یوشمیرسخت دریځې ډلې فعالې دي چې په دې وروستیو کې یې د پاکستان د حکومت اړوند هدفونو باندې بریدونه زیات کړي دي.

ټاکل شوې چې فلسطینۍ حماس ډله نن (د سلواغې ۲۰مه) درې نور یرغمل آزاد کړي چې اسراییل به یې هم په بدل کې لسګونه فلسطیني بندیان خوشې کړي.

حماس چې امریکا او اروپايي ټولنه یې تروریستي ډله بولي پرون د دې یرغملو نومونه اعلان کړل او د اسراییل د صدراعظم دفتر تایید کړه چې د یرغملو نومونه ورسپارل شوي او د هغوی کورنیو ته هم خبر ورکړل شوی دی.

د اسوشیتید پرس خبري آژانس د راپورله مخې خوشې کیدونکي یرغمل ټول نارینه او عمرونه یې د ۳۴ او ۵۶ کلونو ترمنځ دي.

د اسیرانو نننۍ تبادله به د حماس او اسراییل ترمنځ د یرغملو او بندیانو د خوشې کولو پنځم پړاو وي چې په غزه کې د جنوری په نولسمه د نافذ شوي اوربند د موافقې له مخې ترسره کیږي.

اسراییل به هم په بدل کې نن له خپلو زندانونو ۱۸۳ فلسطیني بندیان خوشې کړي. د فرانسپرس خبري آژانس د راپورله مخې د فلسطیني بندیانو یوې مدافع ټولنې ویلي چې د اسراییل له خوا په خوشې کیدونکو فلسطیني بندیانو کې ۱۸ تنه هغه بندیان هم دي چې په عمري بند محکوم شوي وو، ۵۴ تنه یې د اوږده قید بندیان ښودل شوي او ۱۱۱ تنه نور یې د غزې هغه اوسیدونکي دي چې پراسراییل د ۲۰۲۳ کال د اوکتوبر د اومې له برید وروسته د اسراییل د پوځي عملیاتو په ترڅ کې نیول شوي وو.

د دواړو لورو ترمنځ د یرغملو او بندیانو د تبادلې د تیرو څلورو پړاوونو په ترڅ کې حماس ۱۳ تنه اسراییلي او ۵ تنه ټایلنډي یرغمل او اسراییلو شاوخوا ۵۸۳ تنه فلسطیني بندیان آزاد کړي دي.