پر کابل پوهنتون پرونۍ حملې د نړۍ د ګڼو چاپي او تصویري رسنیو پام ځان ته اړولی دی.
- بلومبرګ
بلومبرګ خپرونې د هغو محصلانو عکسونه خپاره کړي چې له کابل پوهنتونه تښتي.
تر دې یوه اوونۍ وړاندې د کابل په لوېدیځ کې پر کوثر تعلیمي مرکز حمله شوې وه چې لږترلږه ۲۲ تنه پهکې ووژل شول او ۷۰ نور ژوبل شول.
د دې نشریې له لیکنې سره سم، په افغانستان کې د سولې لپاره د دولت او طالبانو له خبرو سره سره په دې هېواد کې تاوتریخوالی په زیاتېدو دی.
بلومبرګ زیاتوي، په دوحه کې خبرو په افغانستان کې د جګړو پر کمېدو هم هېڅ اغېز نهدی کړی.
همدا اوس د افغانستان په ګڼو سیمو کې طالبان له دولتي ځواکونو سره په جګړو کې ښکېل دي.
- نیویارک ټایمز
نیویارک ټایمز ورځپاڼې د کابل-کندهار پر لویه لار د طالبانو له لوري له موټر چلوونکو د پیسو اخیستو په اړه لیکنه خپره کړې ده.
ورځپاڼه وايي، په داسې حال کې چې امریکايي پوځیان له افغانستانه په وتلو دي، طالبان د دغه هېواد لویو لارو ته راوځي او له باري او نورو موټرو په غیر قانوني ډول د میلیونونو ډالرو معادل پیسې ټولوي.
ورځپاڼه زیاتوي، موټر چلوونکي او د لویو لارو مسافر شکایت کوي چې پولیس او نور امنیتي ځواکونه له خپلو پوستو نه راوځي او طالبانیې پرېښي چې له خلکو پیسې اخلي.
ورځپاڼې ته د هرات د سوداګرۍ د خونو مرستیال احمد سید عظیمیان ویلي چې طالبان د هرات-کابل په لویه لار کې د ورځې د یو لک او ۵۵ زره او یو لک او ۹۵ زره ډالرو ترمنځ پیسې ټولوي.
په سمنګان ولایت کې یوه ولسوال عبدالیقین احمدي بیا ویلي چې طالبان له موټرو څخه د دې لپاره پیسې ټولوي چې په شمالي ولایتونو کې خپله جګړه پرې تمویل کړي.
د ده په باور طالبان د ورځې شاوخوا ۲۶ زره ډالر له موټر چلوونکو اخلي.
د نیویارک ټایمز د دې لیکنې پر اساس، د دې لپاره چې د فبرورۍ د ۲۹مې نېټې د موافقې پر اساس امریکايی پوځیان پر طالبانو بریدونه نهکوي، دا ډله اوس له هوايي بریدونو نهبېرېږي او بېغمه لویو لارو ته راوځي او پیسې ټولوي.