د لاسرسۍ وړ لېنکونه

تازه خبر
چهارشنبه ۵ لیندۍ ۱۳۹۹ کابل ۰۸:۴۴

نړۍ

د اذربایجان او ارمنستان ترمنځ له اوربند سره سره بیا جګړه شوې

په نګورنو قره‌باغ کې د اذربایجان او ارمنستان جګړه

د نګورنو قره‌باغ جلاغوښتونکې سیمې پوځي چارواکي وایي چې د امریکا په منځګړیتوب له ټینګ شوي اوربند سره سره د اذربایجان له ځواکونو سره په نښتو کې یې ۱۱ سرتېري وژل شوي دي.

د وژل شویو په هغه فهرست کې چې د پوځ د رسنیو څانګې پرون (دوشنبه) خپور کړی، د نګورنو قره‌باغ د دفاعي ځواکونو د قوماندانۍ مرستیال ډګروال ارټور سرکیسیان هم شامل دی.

په دې سره د سپټمبر له ۲۷مې راهیسې چې پر دې لانجمنې سیمې د اذربایجان او په سیمه کې د ارمني ټبرو چې د ارمنستان له ملاتړه برخه‌من دي، جګړه پیل شوې، د نګورنو قره‌باغ د ادارې د وژل شویو پوځیانو شمېر ۱۷۷ ته ورسېد.

د اذربایجان ولسمشر الهام علییف پرون دوشنبه په یوه ټویټ کې وویل چې ځواکونو یې په سیمه کې اته نور کلي هم تر خپلې ولکې لاندې راوستي دي.

دغه‌راز د اذربایجان دفاع وزارت بیا د هېواد دننه په تارتار سیمه کې د ارمني ځواکونو په ډزو کې د یو شمېر ولسي وګړو د وژل کېدو خبر ورکړی دی.

په نګورنو قره‌باغ کې چې نړیوال‌یې د اذربایجان د خاورې یوه برخه بولي، مېشت اکثریت ارمن ټبري واکمن دي چې د اذربایجان واکمني په رسمیت نه‌پېژني.

د ورځې تازه خبرونه دلته ولولئ

سوریه کې اسرائیل لږ تر لږه ۸ ایران پلوه جنګیالي وژلي

ارشیف

په سوریه کې د اسرائیل هوایي بریدونو کې لږ تر لږه ۸ ایران پلوه جنګیالي وژل شوي دي.

د روسیې پر بشري حقونو د څار بنسټ چې مرکز یې بریتانیا کې دی وايي، د تېرې شپې دغه بمبار کې د دمشق ښار په څنډه کې د لبنان حزب الله ډلې اته غړي وژل شوي او د وسلو او مهماتو یوه زېرمه یې له منځه وړل شوې ده.

تردې وړاندې د سوریې دولتي خبري اژانس سانا ویلي و چې د دمشق په جنوب کې اسرائیلي ځواکونو یوه سیمه په نښه کړې ده.

د اسرائیل پوځ په دې اړه له څه ویلو ډډه کړې.

د لبنان حزب الله ډله د ایران ملاتړ له ځان سره لري او ایران په سوریه کې د بشارالاسد د رژیم کلک ملاتړی هم دی.

اسرائیل بیا ژمنه کړې چې سوریه کې به د ایران د نظامي پیاوړتیا مخه نیسي او تراوسه یې په سوریه کې سلګونه بریدونه کړي دي.

د نیوزلنډ سواحلو کې نژدې سل نهنګان او ډولفینان مړه شوي

د نیوزلنډ چارواکي وایي، په سواحلو کې نژدې سل نهنګان او ډولفینان مړه شوي دي.

د نیوزلنډ چارواکي وایي، د دغه هېواد په سواحلو کې نژدې سل نهنګان او ډولفینان مړه شوي دي.

د نیوزلېنډ د چاپریال ساتنې وزارت نن چهارشنبه (د لېندۍ ۵مه) وویل، دغه ژوي د لېرو پرتو چاتهام ټاپوګانو سواحلو کې د بند پاتې کېدو او ډبرو سره د ټکر له کبله مړه شوي دي.

د دغه وزارت په خبره، دغه سمندري ژويي وروستیو اونیو کې سرګردان و او د ژغورنې هڅې یې ځکه له ستونزو سره مخ وې چې دغه ټاپو لېرې پروت دی.

په ۱۹۱۸ کال کې هم شاوخوا زر نهنګان او نور سمندري ژوي د همدې ټاپو ګانو په سواحلو کې مړه شوي وو.

روسیه وايي، د داعش سخت دریځو یو پلان یې شنډ کړی

د روسیې د فدرالي امنیت ادارې سرتیري

د روسیې امنیتي چارواکي وایي، د اسلامي دولت یا داعش سخت دریځو وسله والو یو پلان یې شنډ کړی دی.

د روسیې د فدرال امنیت ادارې "ایف.ایس.بي" نن (د نومبر ۲۵مه) په یوه خبرپاڼه کې وویل، دغې ډلې نیت درلود چې د مسکو په یوې سیمه کې " تخریبي او ترهګریز" فعالیتونه وکړي.

دغې ادارې ویلي، د څېړنو او تالاشۍ پر مهال د یادې ډلې یو غړی د مسکو په ختیځ کې له جوړ شوي ماین سره نیول شوی دی.

خبرپاڼه کې راغلي، د داعش د دغې کړۍ یو بل هدف دا و چې نوي کسان جذب او ترهګرو ته مالي ملاتړ پیدا کړي.

د روسیې سترې محکمې د ۲۰۱۴ میلادي کال دسمبر کې داعش یوه ترهګریزه ډله وبلله او پر فعالیت یې بندیز ولګاوه.

"جوبایډن" ته د ورځنيو محرمو استخباراتي راپورونو لېږل پيل شول

جوبایډن

سپینې ماڼۍ اجازه ورکړه چې منتخب ولسمشر جوبایډن ته ورځني محرم استخباراتي راپورونه ولېږل شي.

ورځني امنیتي راپورونه ولسمشر ته وړاندې کېږي خو په امریکا کې منتخب ولسمشر هم د دې حق ترلاسه کوي چې دغو راپورونو ته لاسرسی ولري.

په دغو راپورونو کې ملي امنیت ته د ورپېښو ګواښونو په اړه معلومات شامل وي.

منتخب ولسمشر جوبایډن ته د ورځني راپور د لېږلو لړۍ وروسته له هغه پيل شوه چې پرون د ټرمپ ادارې وویل د بایډن ادارې ته د انتقال رسمي بهیر پیلېدای شي.

ولسمشر ټرمپ خپله ماته نه ده منلې او تور یې لګولی چې په ټاکنو کې پراخې درغلۍ شوي دي.

اذربایجاني ځواکونه په نګورنو قره باغ کې "چلبجر" سيمې ته هم ننوتل

نګورنو قره باغ کې د چلبجر سيمه

اذربایجاني ځواکونو د نګورنو قره باغ هوکړې له مخې یوه بله سیمه هم په خپل کنټرول کې راوسته.

د هوکړې له مخې ارمنستان د دریو سیمو پرېښودو ته اړ ایستل شوی.

د اذربایجان د دفاع وزارت نن ویلي د دوی پوځیان د هغې هوکړې له مخې چې د ارمنستان، اذربایجان او روسیې تر منځ لاسلیک شوې د چلبجر سیمې ته ننوتلي دي.

کروچر چې اذربایجان یې چلبجر یادوي باید د نومبر په پنځلسمه تسلیم شوې وای خو د بشري دلایلو په سبب دا کار ځنډېدلی و.

د اذربایجان او ارمنستان تر منځ د خونړۍ جګړې د درولو لپاره روسیې منځګړیتوب وکړ او دوی یې هوکړې ته سره ورسول چې له مخې یې ارمنستان د اګدام، چلبجر یا کروچر او لاچین سیمې پرېښودو ته اړ شو.

اګدام د نومبر په شلمه او چلبجر هم په پنځه ویشتمه تسلیم شو.

اذربایجان ته د لاچین د سپارلو نېټه د ډسمبر لومړۍ یاده شوې.

چلبجر وروسته له هغه اذربایجاني ځواکونو ته وسپارل شو چې د روسیې ولسمشر ولادیمیر پوتین بېګاه د اذربایجان له ولسمشر الهام علییف او د ارمنستان له صدراعظم نیکول پاشینیان سره خبرې وکړې.

انګلستان د کرسمس پرمهال محدودیتونه کموي

انګلستان کې د کرسمس لپاره د چمتوالي یو انځور

د انګلستان څلور واړو هېوادونو د سې شنبې په ورځ موافقه وکړه چې د کرسمس پر مهال به د کویډ۱۹ محدودیتونه کم شي او پنځه ورځې به تر درو پورې کورنۍ وکړای شي چې په یوه کور کې سره وویني.

انګلنډ، سکاټلنډ، وېلز او شمالي ایرلنډ د کویډ۱۹ د مخنیوي لپاره له یو بل څخه بېل پلانونه عملي کړي خو د کرسمس د لمانځلو په خاطر د سې شنبې په ورځ له لندن سره موافقې ته ورسېدل.

پر سفر محدودیت به هم لیرې شي او خلک به وکړای شي له شمالي ایرلنډ څخه یا دې هېواد ته سفر وکړي.

ټاکل شوې ده راتلونکې اوونۍ په انګلنډ کې د کرونا ویروس له کبله وضع شوی محدودیت پای ته ورسېږي.

د فرانسې ولسمشر امانویل مکرون هم د سې شنبې په ورځ وویل چې په هېواد کې يې د کویډ۱۹ دوهمه څپه پای ته رسېدونکې ده.

مکرون وویل چې د کویډ۱۹ له کبله لګېدلی محدودیت به په څو ورځو کې پای ته ورسېږي او تر کرسمس پورې چې د ډسمبر په ۲۵مه نېټه دی، دوکانونه، تیاترونه او سینماوې هم پرانیستل شي.

ده زیاته کړه چې خلک به وکړای شي له خپلو کورنیو سره دا رخصتۍ ولمانځي.

راپور: قزاقستان د چین د شینجن یو مدافع په غیر قانوني توګه نښه کړی

سریکژان بیلاش

د ملګرو ملتونو راپور وايي چې قزاقستان د چین د شینجن سیمې د ځايي خلکو مدافع په غیر قانوني توګه په نښه کړی.

پر خپل سر د بندي کولو پر وړاندې د ملګرو ملتونو کاري ډله وايي چې د قزاقستان حکومت تېر کال د فعال سریکژان بیلاش په نیولو سره د بشري حقونو له نړیوال قانونه سرغړونه کړې.

د دې ادارې په وینا بیلاش د چین په شمال لویديځ سیمه شینجن کې د ځايي خلکو د ځپنې پر وړاندې فعالیت کاوه.

د (اوس ازادي) په نوم واشنګټن مېشتې بشري حقونو د یوې ډلې غوښتنلیک ته په ځواب کې ملګرو ملتونو ویلي چې قزاقستان په غیر قانوني توګه ښاغلی بیلاش هدف ګرځولی او هغه یوازي د بیان ازادي عملي کوله.

د قزاقستان چارواکو د ۲۰۱۹م کال په مارچ میاشت کې بیلاش توقیف کړ چې په شینجن سیمه کې يې تش په نوم د روزنې له کمپونو د قزاق نژاده وګړو د ازادۍ غوښتنه کوله.

د ۲۰۱۸م کال په اګست میاشت کې ملګرو ملتونو په یوه راپور کې وویل چې چین په شینجن سیمه کې د تروریزم پر وړاندي د مبارزې په نوم کمپونو کې د مسلمانانو په ګډون شا او خوا یو ملیون اویغور وګړي نیولي دي.

چین وایي په دغو کمپونو کې خلکو ته بېلابېل مهارتونه ورزده کوي او له خلکو سره مرسته کوي چې له سخت دريځۍ لیرې شي.

روسیه: د امریکا یوه جنګ کښتۍ د لېرې ختیځ له اوبو په شا شوه

ارشیف، عکس تئزیني بڼه لري

د روسیې دفاع وزارت وایي، د متحد ایالتونو یوه جنګي کښتۍ وروسته له هغې د روسیې د لېرې ختیځ له اوبو په شا شوه چې خبرداری یې ورکړ.

د روسیې دفاع وزارت په بیان کې ویلي دي چې د "یو. اېس. اېس. جان اېس مککین" په نوم امریکایي بیړۍ د لوی پیټر په خلیج کې نن دوه کیلومتره د روسیې اوبو ته ننوتې وه چې د اډمیرال وینوګرادوف بیړۍ له خبرداري وروسته بیرته په شا شوه.

په ارام سمندر کې د امریکا سمندري خواکونو په یوه بیان کې پرته له دې چې دې پیښې ته اشاره وکړي ویلي دي چې دوی ازادانه خپل فعالیت ته ادامه ورکوي.

د بشري حقونو څار ډلې د روسیې له پارلمان نوې غوښتنه کړې

د روسیې د پارلمان يوه څنډه

د بشري حقونو د څار ډله ( هیومن رایټس واچ) وایي، د روسیې پارلمان باید دا نوې لایحه رد کړي چې چارواکو ته دا واک ورکوي چې هغه ویبپاڼې بلاک کړي چې د روسیې په دولتي رسنیو کې خپاره شوي معلومات سانسوروي.

د بشري حقونو د څار ډله وایي، که دا لایحه تصویب شي له دې سره به په روسیه کې سانسور زیات شي.

د اروپا او اسیا لپاره د بشري حقونو همغږه کوونکې انستیزیا زلوبینا په یوه بیان کې وویل، که دا لایحه تصویب شي خلک به د اطلاعاتو له ترلاسه کولو محروم شي.

دغه لایحه د نومبر په نولسمه پارلمان ته وړاندې شوه.

پاریس کې د یوه کمپ د تشولو لپاره اوښکې بهوونکی ګاز کارول شوى

ارشيف

د فرانسې پولیسو د پلازمېنې پاریس په مرکزي برخه کې د پناه غوښتونکو د یوه کمپ د تشولو لپاره اوښکې بهوونکی ګاز وکاراوه.

دغه سلګونه پناه غوښتونکي چې ډېری یې افغانان دي، مخکې د پاریس له یوې بلې برخې وایستل شول، خو بل ځای ورته مشخص نه شو.

رضاکارانو پرون دوشنبه د پاریس په مرکزي برخه کې دغو پناه غوښتونکو ته شا و خوا ۵۰۰ شنې خېمې برابرې کړې او ډېر ژر په پناه غوښتونکو ډکې شوې.

خو پرون د خیمو تر ډکېدو یو ساعت وروسته پولیس د کمپ د تشولو لپاره لاس په کار شول.

۳۴ کلن افغان پناه غوښتونکي شهاب الدین وویل، پولیسو ډېر زورزیاتی وکړ.

د فرانسې د کورنیو چارو وزیر ژرالد درمانیان چې د کمپ د تشولو عکسونه ټکان ورکوونکي بللي ویلي، چې له پولیسو یې د دې تصفیې د جزییاتو ورکولو غوښتنه کړې ده.

د "کويډ19" ضد واکسین د موندلو په صورت کې د کنتاس هوايي شرکت غوښتنه

د کويډ19 ضد واکسین

د اسټرالیا هوايي شرکت کنتاس وايي، کله چې د کرونا-ضد واکسین هر چا ته د موندلو وړ وي، له نړیوالو مسافرو به وغواړي چې باید د سفر پر مهال واکسین شوي وي.

د دغه شرکت اجرائیه رئیس الن جویس پرون وویل، د اسټرالیا هوايي شرکت په پام کې لري، چې دغه پالیسي عملي کړي او دا مقررات به په دغه شرکت کې عادي بڼه خپله کړي.

دغه زیاته کړه، په بازار کې د کرونا ضد واکسین د موجودیت شرایطو ته په کتو به په کورنیو الوتنو کې د دې واکسین اړتیا په پام کې ونیول شي، خو په نړیوالو الوتنو کې به دغه واکسین ضروري وي.

که څه هم په نړۍ کې په کرونا ویروس د اخته کسانو شمېر تر ۵۹ ميلیونو اوښتی، په عین حال کې د کرونا ویروس ضد واکسین جوړولو هڅې هم چټکې شوې دي.

د ټرمپ ادارې "جو بایډن" ډلې ته د قدرت د لېږد پیل تصویب کړ

ډونالډ ټرمپ

د امریکا د ولسمشر ډونالډ ټرمپ ادارې پرون د منتخب ولسمشر جو بایډن ډلې ته تر ټاکنو نږدې درې اوونۍ وروسته د قدرت د لېږد پیل تصویب کړ.

که څه هم ټرمپ د ټاکنو د پایلو له منلو ډډه کړې، خو ویلي یې دي، چې ده د قدرت د انتقال لپاره د فډرال ادارې پرېکړه ومنله.

تر دې مخکې د عمومي خدماتو ادارې مشرې ایملي مورفي د جنورۍ میاشتې پر شلمه تر لوړې مخکې د قدرت د انتقال په اړه بایډن ته اطلاع ورکړې وه.

چین د خاورو د نمونو ټولولو او راوړلو لپاره بې چلوونکې ستوربېړۍ وتوغوله

ارشیف

چین له سپوږمۍ څخه د خاورو او ډبرو د نمونو ټولولو او راوړلو لپاره نن یوه بې چلوونکې ستوربېړۍ وتوغوله.

دغه پېچلی ماموریت په فضايي برخه کې د چین د پراختیاغوښتنې بېلګه ګڼل کېږي.

د چانګ-پنځه په نوم دغه ستوربېړۍ نن سهار وختي د لانګ مارچ پنځه په نوم توغندي په وسیله د هینان ولایت په جنوب کې له فضايي مرکزه وتوغول شوه.

سپوږمۍ ته د دې ستوربېړۍ د لېږلو او له دې سیارې د خاورو او ډبرو د نمونو د راوړلو هدف دا دی، چې د سپوږمۍ د اصلیت، جوړښت او هلته اورشیندنې د فعالیت په اړه په معلوماتو کې له ساینسپوهانو سره مرسته وشي.

که دغه ماموریت بریالی شي، دا به په تېرو څلورو لسیزو کې لومړی وار وي، چې یو هېواد د سپوږمۍ د خاورې او ډبرو نمونې ځمکې ته راوړي.

د امریکا متحدو ایالتونو او پخواني شوروي اتحاد په ۱۹۶۰ او ۱۹۷۰یمو کلونو کې دا کار کړی و.

د فرانسې د پخواني ولسمشر محاکمه پیل شوه

نیکولای سرکوزي

د فرانسې د پخواني ولسمشر نیکولای سرکوزي محاکمه پیل شوه.

سرکوزي، چې له ۲۰۰۷ څخه تر ۲۰۱۲ پورې د فرانسې ولسمشر و، په دې تورن دی چې هڅه یې کړې وه چې یوه قاضي ته د دې لپاره رشوت ورکړي چې د خپل ګوند د مالي وضعیت په اړه د تحقیقاتو معلومات ورڅخه واخلي.

۶۵ کلن سرکوزي ویلي چې هیڅ ناوړه کار یې نه دی کړی.

پر سرکوزي له ډېره وخته تور دی چې د ۲۰۰۷ کال په انتخاباتو کې یې له پټو بسپنو څخه کار اخیستی دی.

هنګري د روسیې د کرونا ضد واکسین نمونه ترلاسه کړې

د روسیې له لوري جوړ شوی واکسین

د هنګري د بهرنیو چارو وزیر وايي، لومړنی اروپايي هېواد دی چې تېره اوونۍ یې د روسیې د کرونا ضد واکسین نمونه ترلاسه کړه.

پیتر ژیارتو پرون (دوشنبه) د خپل هېواد پارلمان ته وویل، لومړني لس ډوزه واکسین به، چې په اګست میاشت کې د روسیې ولسمشر ولادیمیر پوتین د نړۍ د لومړني کرونا ضد واکسین په توګه وراستولي وو، په هنګري کې وازمویل شي.

د روسیې له لوري دا واکسین له ضروري اسنادو سره د هنګري چارواکو ته وسپارل شو چې ټیست یې کړي او معلومه کړي چې ایا دا واکسین خوندي، اغېزمن او د دې وړ دي چې د هنګري خلکو ته ورکړل شي.

تېره اوونۍ د هنګري صدراعظم وویل چې د دغه هېواد او د روسي درمل جوړوونکې شرکت ترمنځ په هنګري کې د دغه واکسین د جوړولو پر امکان خبرې روانې دي.

نور راوښيه

XS
SM
MD
LG