- واشنګټن پوسټ
واشنګټن پوسټ ورځپاڼې په یوه تازه لیکنه کې دا پوښتنه راپورته کړې چې د امریکا د ولسمشرۍ له انتخاباتو وروسته به د افغانستان په وړاندې د امریکا ژمنې څنګه شي؟
ورځپاڼه لیکي، سره له دې چې د امریکا د ولسمشرۍ د کاندیدانو ترمنځ مناظرو کې د افغانستان د جګړې په اړه بحث نهدی شوی، خو د لیکوال په باور دا انتخابات د افغانستان لپاره مهم څه دي.
د لیکوال په وینا په فبرورۍ میاشت کې د طالبانو او امریکا ترمنځ د دوحې د تړون سربېره، افغانستان کې تاوتریخوالی نهدی کم شوی.
د واشنګټن پوسټ په وینا په افغانستان کې د طالبانو د وروستیو بریدونو هدف د امریکا او افغانستان پر حکومتونو د فشار راوړل دي.
ورځپاڼه لیکي افغانان غواړي پوه شي چې د نومبر د درېیمې نېټې له انتخاباتو وروسته به د افغانستان سره د امریکا ژمنې څنګه کېږي.
په لیکنه کې وړاندې ویل شوي، ځیني لکه جمهور رئیس اشرف غني ښايي په دې هېله وي چې د امریکا په انتخاباتو کې د جوبایډن د بریالیتوب په صورت کې به د افغانستان د سولې بهیر له سره تنظیم شي او د دوحې د تړون ځینې برخې به لغوه شي.
لیکوال وړاندې وايي، ښکاري چې ولسمشر ډونالد ټرمپ د افغانستان څخه د امریکايي سرتېرو د ایستلو د بهیر د چټکولو هوډ لري.
ولسمشر ټرمپ د اکټوبر میاشت کې په یو ټویټ کې ویلي، غواړي د کرسمس تر جشن، ټول امریکايي سرتېري له افغانستان څخه وباسي.
ورځپاڼه لیکي، په داسې حال کې چې د امریکا د ولسمشرۍ انتخابات نږدې کېږي، څلور اساسي مسئلې د افغانستان پر جګړې اغېز کوي.
وړاندې وايي، د سولې مذکرات د بدلون په حال کې دي، تاوتریخوالي له ولسي افغانانو قرباني اخلي، له القاعده سره د طالبانو اړیکې د فکر وړ دي او څلورم دا چې سیمهییز سیالان د افغانستان د سولې بهیر کمزوری کوي.
- انډین اکسپرس
انډین اکسپریس ورځپاڼې په خپلې وروستۍ ګڼه کې یوه لیکنه کې ویلي، په هند کې د پیازو د بیو لوړېدو، د افغانستان څخه د وارداتو اندازه زیاته کړې. لیکنه وايي، هره ورځ شااوخوا ۷۵ لارۍ پیاز له افغانستان څخه د پاکستان له لارې هندوستان ته داخلېږي.
لیکنه کې ویل شوي، د افغانستان څخه هند ته د پیازو صادرات به په هند کې د مني په فصل کې د پیازو په بیو کې د کمي سبب شي.
